മിന്നും ഫോം തുണച്ചില്ല; ഫെഡററെ കീഴടക്കി സവറേവിന് മോണ്‍ട്രിയല്‍ മാസ്‌റ്റേഴ്‌സ് കപ്പ്
Posted by
14 August

മിന്നും ഫോം തുണച്ചില്ല; ഫെഡററെ കീഴടക്കി സവറേവിന് മോണ്‍ട്രിയല്‍ മാസ്‌റ്റേഴ്‌സ് കപ്പ്

അറ്റ്‌ലാന്റ: ആരാധകരെ നിരാശയിലാഴ്ത്തി റോജര്‍ ഫെഡറര്‍ക്ക് കിരീട നഷ്ടം. മോണ്‍ട്രിയല്‍ മാസ്റ്റേഴ്സ് ടെന്നീസ് ടൂര്‍ണമെന്റ് പുരുഷ ഫൈനലില്‍ റോജര്‍ ഫെഡററെ തകര്‍ത്ത് ജര്‍മന്‍ താരം അലക്സാണ്ടര്‍ സവറേവിന് കിരീടം. രണ്ടു സെറ്റുകളിലും വ്യക്തമായ ആധിപത്യം നേടിയാണ് സവറേവിന്റെ ജയം. സ്‌കോര്‍: 6-3, 6-4.

ഇതോടെ പത്ത് വര്‍ഷത്തിനിടയില്‍ കിരീടം നേടുന്ന ആദ്യത്തെ പ്രായം കുറഞ്ഞ വ്യക്തിയായിരിക്കുകയാണ് സവറേവ്. ഓസ്‌ട്രേലിയന്‍ ഓപ്പണും വിംബിള്‍ഡണും നേടിയ ഫെഡററുടെ അപ്രതീക്ഷിത തോല്‍വി കാണികളെ നിരാശരാക്കി. ഈ വര്‍ഷം ഫെഡററെ തോല്‍പ്പിക്കുന്ന മൂന്നാമത്തെ കളിക്കാരനാണ് സവറേവ്.

അവസാന മത്സരത്തില്‍ ഉസൈന്‍ ബോള്‍ട്ടിന് കണ്ണീരോടെ മടക്കം
Posted by
13 August

അവസാന മത്സരത്തില്‍ ഉസൈന്‍ ബോള്‍ട്ടിന് കണ്ണീരോടെ മടക്കം

ലണ്ടന്‍: അവസാന മത്സരത്തില്‍ ഉസൈന്‍ ബോള്‍ട്ടിന് കണ്ണീരോടെ മടക്കം. പരിക്കിനെ തുടര്‍ന്ന് ബോള്‍ട്ടിന് മത്സരം പൂര്‍ത്തിയാക്കാനായില്ല. 50 മീറ്റര്‍ ശേഷിക്കേ ബോള്‍ട്ട് പരിക്കേറ്റ് വീണു. ഈ മത്സരത്തോടെ ബോള്‍ട്ട് ട്രാക്കിനോട് വിടപറഞ്ഞു. അവസാന മത്സരയിനമായ 4×100 മീറ്റര്‍ റിലേയില്‍ അവസാന ലാപ്പിലോടിയ ബോള്‍ട്ട് പേശിവലിവിനെ തുടര്‍ന്ന് മത്സരം പൂര്‍ത്തിയാക്കാനാവാതെ ട്രാക്കില്‍ വീണപ്പോള്‍ ആതിഥേയരായ ബ്രിട്ടന്‍(37.47 സെ) സ്വര്‍ണം പിടിച്ചെടുത്തു.

ജമൈക്കന്‍ സ്പ്രിന്റര്‍ ഉസൈന്‍ ബോള്‍ട്ടും ദീര്‍ഘദൂര ഓട്ടത്തില്‍ അതുല്യ നേട്ടങ്ങള്‍ക്കുടമയായ മോ ഫറയ്ക്കും നിരാശയോടെ കളം വിടാനായിരുന്നു വിധി. 100 മീറ്ററിലെ സ്വര്‍ണ, വെള്ളി മെഡല്‍ ജേതാക്കളെ അണിനിരത്തിയ അമേരിക്ക 37.52 സെക്കന്‍ഡില്‍ വെള്ളി നേടി. 38.02 സെക്കന്‍ഡില്‍ മല്‍സരം പൂര്‍ത്തിയാക്കിയ ജപ്പാന്‍ വെങ്കലവും നേടി.

ലോകം എന്നും ആരാധനയോടെ കണ്ട ആ സ്വതസിദ്ധമായ ശൈലിയില്‍ ബോള്‍ട്ട് സ്വര്‍ണത്തിലേക്ക് ഓടിക്കയറുന്ന കാഴ്ചയ്ക്കായി ആരാധകര്‍ കാത്തിരിക്കവെ, പ്രതീക്ഷയ്‌ക്കൊത്ത് ബോള്‍ട്ട് കുതിക്കാനാരംഭിച്ചു. എന്നാല്‍, അല്‍പദൂരം പിന്നിട്ടപ്പോഴേക്കും വേഗം കുറച്ച ബോള്‍ട്ട് വേദനകൊണ്ട് പുളഞ്ഞ് ഞൊണ്ടിച്ചാടിയതോടെ ആരാധകരുടെ മനസില്‍ വെള്ളിടി വെട്ടി. ബ്രിട്ടന്റെയും അമേരിക്കയുടെ താരങ്ങള്‍ മെഡലിലേക്ക് ഓടിക്കയറുമ്പോള്‍ ബോള്‍ട്ട് വേദന സഹിക്കാനാകാതെ ട്രാക്കിലേക്കു വീണു. ഫിനിഷിങ് ലൈനിലേക്ക് കുതിക്കുന്ന എതിരാളികളെ പാളി നോക്കിയശേഷം വേദനയോടെ ട്രാക്കിലേക്ക് മുഖം പൂഴ്ത്തി ബോള്‍ട്ട് സങ്കടപ്പെടുന്ന കാഴ്ച കായിക പ്രേമികള്‍ക്ക് നൊമ്പര കാഴ്ചയായി.

110 ഹര്‍ഡില്‍സ് ചാമ്പ്യന്‍ ഒമര്‍ മക്ലിയോഡ്, ജൂലിയന്‍ ഫോര്‍ട്ടെ, മുന്‍ലോക സ്പ്രിന്റ് ചാമ്പ്യന്‍ യൊഹാന്‍ ബ്ലെയ്ക്ക്, ബോള്‍ട്ട് എന്നിവരുള്‍പ്പെട്ട സംഘമാണ് ജമൈക്കക്കായി അണിനിരന്നത്. വനിതകളുടെ 4×100 മീറ്റര്‍ റിലേയില്‍ അമേരിക്ക സ്വര്‍ണം നേടി. 42.82 സെക്കന്‍ഡില്‍ ഓട്ടം പൂര്‍ത്തിയാക്കിയ അമേരിക്കന്‍ ടീം ഈ വര്‍ഷത്തെ മികച്ച സമയത്തോടെയാണ് ഒന്നാമതെത്തിയത്. ഈയിനത്തില്‍ ആതിഥേയരായ ബ്രിട്ടന്‍ രണ്ടും (42.12സെ.) വെള്ളിയും ജമൈക്ക വെങ്കലവും(42.19 സെ.) നേടി.

കരിയറിലെ അവസാന മല്‍സരത്തിനിറങ്ങിയ ഉസൈന്‍ ബോള്‍ട്ടിന്റെ മികവിലാണ് ജമൈക്ക ഫൈനലില്‍ കടന്നത്. സീസണില്‍ തങ്ങളുടെ ഏറ്റവും മികച്ച സമയം (37.95 സെക്കന്‍ഡ്) കുറിച്ചാണ് ജമൈക്ക സെമിഫൈനല്‍ ഹീറ്റ്‌സില്‍ ഒന്നാമതെത്തിയത്. അവസാന ലാപ്പ് ഓടിയ ബോള്‍ട്ട് അനായാസം ടീമിനെ വിജയത്തിലെത്തിച്ചു. ഫ്രാന്‍സ്, ചൈന എന്നിവരാണ് പിന്നിലായത്. ഈ വര്‍ഷത്തെ മികച്ച സമയം കുറിച്ചാണ് അമേരിക്കയും ഫൈനലിലെത്തിയത്.

100 മീറ്ററില്‍ ബോള്‍ട്ടിനു മുന്നില്‍ വെള്ളി നേടിയ ക്രിസ്റ്റ്യന്‍ കോള്‍മാന്‍ ഉള്‍പ്പെട്ട ടീം 37.70 സെക്കന്‍ഡില്‍ ഓട്ടം പൂര്‍ത്തിയാക്കി. 37.76 സെക്കന്‍ഡോടെ രണ്ടാമതെത്തിയ ബ്രിട്ടനൊപ്പം ഫ്രാന്‍സ് (38.03), ചൈന (38.20), ജപ്പാന്‍ (38.21), തുര്‍ക്കി (38.44), കാനഡ (38.48) എന്നീ ടീമുകളും ഫൈനലില്‍ മാറ്റുരയ്ക്കാനെത്തി.

പുരുഷന്മാരുടെ ട്രിപ്പിള്‍ജമ്പിലും വനിതകളുടെ ഹര്‍ഡില്‍സിലും അമേരിക്ക സ്വര്‍ണം നേടി
Posted by
12 August

പുരുഷന്മാരുടെ ട്രിപ്പിള്‍ജമ്പിലും വനിതകളുടെ ഹര്‍ഡില്‍സിലും അമേരിക്ക സ്വര്‍ണം നേടി

ലണ്ടന്‍ : ലോക അത്ലറ്റിക് ചാമ്പ്യാന്‍ഷിപ്പില്‍ പുരുഷന്മാരുടെ ട്രിപ്പിള്‍ജമ്പില്‍ അമേരിക്കയുടെ ക്രിസ്റ്റ്യന്‍ ടെയ്‌ലര്‍ കിരീടം നിലനിര്‍ത്തി. 17.68 മീറ്ററിലാണ് ടെയ്‌ലര്‍ സ്വര്‍ണം നേടിയത്. അമേരിക്കയുടെതന്നെ വില്‍ ക്‌ളായെ (17.63) വെള്ളിയും നേടി. പോര്‍ച്ചുഗലിന്റെ നെല്‍സണ്‍ എവോറയാണ് (17.19) മൂന്നാമതെത്തിയത്.

വനിതകളുടെ 400 മീറ്റര്‍ ഹര്‍ഡില്‍സിലും അമേരിക്കതന്നെ സ്വര്‍ണ്ണം നേടി .കോറി കാര്‍ട്ടര്‍ 53.07 സെക്കന്‍ഡിലാണ് കാര്‍ട്ടര്‍ ഒന്നാമതെത്തിയത്. രണ്ടാമതെത്തിയതും അമേരിക്കക്കാരി. 53.50 സെക്കന്‍ഡില്‍ ദലൈലാ മുഹമ്മദ്. ജമൈക്കയുടെ റിസ്റ്റാന്ന ട്രേസി 53.74 സെക്കന്‍ഡില്‍ വെങ്കലം നേടി.

ദാവീന്ദര്‍ സിങ് ലോക അത്ലറ്റിക് ചാമ്പ്യന്‍ഷിപ്പിന്റെ ജാവലിന്‍ ത്രോയുടെ ഫൈനലില്‍
Posted by
12 August

ദാവീന്ദര്‍ സിങ് ലോക അത്ലറ്റിക് ചാമ്പ്യന്‍ഷിപ്പിന്റെ ജാവലിന്‍ ത്രോയുടെ ഫൈനലില്‍

ലണ്ടന്‍: ദാവീന്ദര്‍ സിങ് ലോക അത്ലറ്റിക് ചാമ്പ്യന്‍ഷിപ്പിന്റെ ജാവലിന്‍ ത്രോയുടെ ഫൈനലില്‍ . ജാവലിന്‍ ത്രോയുടെ ഫൈനലിന് യോഗ്യത നേടുന്ന ആദ്യ ഇന്ത്യന്‍ താരമെന്ന ബഹുമതി ദാവീന്ദര്‍ സിങ്ങിന് ഇനി സ്വന്തം.
ഇന്ത്യാക്കാരാരും ഇതുവരെ ലോക ചാമ്പ്യന്‍ഷിപ്പിന്റെ ജാവലില്‍ ത്രോ ഫൈനലിന് യോഗ്യത നേടിയിട്ടില്ല.

യോഗ്യതാ റൗണ്ടില്‍ 84.22 മീറ്റര്‍ ദൂരത്തേയക്ക് ജാവലിന്‍ പായിച്ചാണ് ദാവീന്ദര്‍ അവസാന പോരാട്ടത്തിന് അര്‍ഹത നേടിയത്. അതേസമയം ഇന്ത്യയുടെ മെഡല്‍ പ്രതീക്ഷയായിരുന്ന നീരജ് ചോപ്ര യോഗ്യതാ റൗണ്ടില്‍ പുറത്തായി.
യോഗ്യത റൗണ്ട് ഗ്രൂപ്പ് ബിയില്‍ മത്സരിച്ച ദേവീദാവീന്ദര്‍ അവസാന ശ്രമത്തില്‍ യോഗ്യതാ മാര്‍ക്കായ 83 മീറ്റര്‍ മറികടന്ന് ഫൈനലിലേയ്ക്ക് മാര്‍ച്ച് ചെയ്തു. 84.22 മീറ്റര്‍ ദൂരത്തേയ്ക്കാണ് ജാവലില്‍ പറന്നത്.

ആദ്യ ശ്രമത്തില്‍ 82.22 മീറ്ററും രണ്ടാം ശ്രമത്തില്‍ 82.14 മീറ്ററും താണ്ടിയിരുന്നു. തോളെല്ലിലെ പരിക്കുമായാണ് പഞ്ചാബുകാരനായ ദാവീന്ദര്‍ മത്സരിച്ചത്. ഗ്രൂപ്പ് എയില്‍ നിന്ന് അഞ്ചു പേരും ഗ്രൂപ്പ് ബിയില്‍ നിന്ന് ഏഴുപേരും ഫൈനലിന് യോഗ്യത നേടിയിട്ടുണ്ട്. അവസാന റൗണ്ടിന് യോഗ്യത നേടിയ 13 പേരില്‍ മികച്ച ഏഴാമത്തെ പ്രകടനമാണ് ദേവീന്ദറി(84.22)ന്റേത്.

ജൂനിയര്‍ ലോക റെക്കോര്‍ഡ് ജേതാവായ നീരജ്ചോപ്ര നിരാശപ്പെടുത്തി. ഇതാദ്യമായി ലോക ചാമ്പ്യന്‍ഷിപ്പില്‍ മത്സരിച്ച നീരജിന് യോഗ്യതാ മാര്‍ക്ക് (83 മീറ്റര്‍) മറികടക്കാനായില്ല.ആദ്യ ശ്രമത്തില്‍ 82.26 മീറ്റര്‍ ദൂരത്തേയ്ക്ക് ജാവലിന്‍ പായിച്ച നീരജിന് രണ്ട് അവസരങ്ങള്‍ കൂടി ലഭിച്ചെങ്കിലും മികച്ച പ്രകടനം കാഴ്ചവെയ്ക്കാനായില്ല. ആദ്യ മൂന്ന് ത്രോയില്‍ തന്നെ നീരജിന്റെ മെഡല്‍ സ്വപ്നം തകര്‍ന്നു.

200 മീറ്ററില്‍ വമ്പന്‍മാരെ പിന്നിലാക്കി റാമില്‍ ഗുലിയേവിന് അട്ടിമറി വിജയം
Posted by
12 August

200 മീറ്ററില്‍ വമ്പന്‍മാരെ പിന്നിലാക്കി റാമില്‍ ഗുലിയേവിന് അട്ടിമറി വിജയം

ലണ്ടന്‍: ലോക അത്‌ലറ്റിക്‌സ് ചാമ്പ്യന്‍ഷിപ്പില്‍ 200 മീറ്ററില്‍ വമ്പന്‍മാരെ പിന്നിലാക്കി തുര്‍ക്കിയുടെ റാമില്‍ ഗുലിയേവ് അട്ടിമറി വിജയം നേടി. ദക്ഷിണാഫ്രിക്കയുടെ മിന്നും താരം വെയ്‌ദെ വാന്‍ നീകെര്‍ക്കിനെ രണ്ടാം സ്ഥാനത്തേക്ക് പിന്തള്ളിയായിരുന്നു ഗുലിയേവിന്റെ സ്വര്‍ണം. ട്രിനിഡാഡ് ആന്‍ഡ് ടുബാഗോയുടെ ജെറീം റിച്ചാര്‍ഡ്‌സിനാണ് വെങ്കലം.

ഹീറ്റ്‌സില്‍ ഒറ്റയ്ക്ക് ഓടി പോരിനെത്തിയ ബോട്‌സ്വാനയുടെ ഐസക് മക്വാല ആറാമതായി. ആറാം ലൈനില്‍ ഓടിയ ഗുലിയേവിന് മെഡല്‍സാധ്യത കല്‍പ്പിച്ചിരുന്നില്ല. എന്നാല്‍ വെടിയൊച്ച മുഴങ്ങിയതും ഗുലിയേവിന്റെ അവിശ്വസനീയ കുതിപ്പ് കണ്ടു. അവസാന 100 മീറ്ററില്‍ നീകെര്‍ക്കുമായി ഉശിരന്‍ മത്സരം. അവസാന 30 മീറ്ററില്‍ ഇഞ്ചിനിഞ്ച് പോരാട്ടം.

ഒടുവില്‍ 0.02 സെക്കന്‍ഡ് വ്യത്യാസത്തില്‍ ഗുലിയേവിന് സ്വര്‍ണം. മൈക്കേല്‍ ജോണ്‍സണുശേഷം 200ലും 400ലും ഒരേസമയം സ്വര്‍ണമണിയാമെന്ന നീകെര്‍ക്കിന്റെ മോഹത്തിന് ഗുലിയേവ് തിരിച്ചടി നല്‍കി. തുര്‍ക്കിയുടെ ആദ്യ ലോകചാമ്പ്യന്‍ഷിപ് സ്വര്‍ണമാണിത്. 20.09 സെക്കന്‍ഡില്‍ ഗുലിയേവ് ഒന്നാമതെത്തി. 20.11ല്‍ നീകെര്‍ക്ക് രണ്ടാമത്.

റിച്ചാര്‍ഡ് സെക്കന്‍ഡിന്റെ ആയിരത്തിലൊരംശത്തില്‍ മൂന്നാമതായി. നാന്നൂറ് മീറ്ററില്‍ മികച്ച പ്രകടനത്തോടെ സ്വര്‍ണമണിഞ്ഞ നീകെര്‍ക്കിന്റെ 200ലെ ആദ്യ ലോകചാമ്പ്യന്‍ഷിപ് മത്സരമായിരുന്നു. യുസൈന്‍ ബോള്‍ട്ട് മാറിനിന്ന 200ല്‍ നീകെര്‍ക്കിലൂടെയാണ് പുതിയ ചാമ്പ്യനെ പ്രതീക്ഷിച്ചത്.

ഹാ കഷ്ടം! കടന്നുവന്ന വഴികള്‍ മറന്നുപോയത് കഷ്ടമെന്നു പിടി ഉഷയോട് മന്ത്രി ജി സുധാകരന്‍
Posted by
08 August

ഹാ കഷ്ടം! കടന്നുവന്ന വഴികള്‍ മറന്നുപോയത് കഷ്ടമെന്നു പിടി ഉഷയോട് മന്ത്രി ജി സുധാകരന്‍

തിരുവനന്തപുരം: പിടി ഉഷ കടന്നുവന്ന വഴികള്‍ മറന്നുപോയത് കഷ്ടമായെന്നും ചിത്രയെ ഒഴിവാക്കിയതില്‍ ഉഷ തെറ്റ് ഏറ്റുപറയണമെന്നും മന്ത്രി ജി സുധാകരന്‍. ലോക അത്‌ലറ്റിക് ചാമ്പ്യന്‍ഷിപ്പില്‍നിന്നു പിയു ചിത്രയെ ഒഴിവാക്കിയ സംഭവത്തില്‍ പിടി ഉഷയുടെ പങ്കിനെതിരെ ശക്തമായ വിമര്‍ശനം മന്ത്രി ഉയര്‍ത്തിയത്. കേരളത്തിന്റെ പൂര്‍ണ പിന്തുണ ചിത്രയ്ക്കാണെന്നും ജി സുധാകരന്‍ വ്യക്തമാക്കി.

ലോക അത്‌ലറ്റിക് ചാമ്പ്യന്‍ഷിപ്പിന് യോഗ്യത നേടിയശേഷമാണ് ചിത്രയെ ലണ്ടനിലേക്കു പോകാനുള്ള ഇന്ത്യന്‍ ടീമില്‍നിന്നു തഴഞ്ഞത്. ഇതിനെതിരേ ഹൈക്കോടതിയെ സമീപിച്ച ചിത്രയ്ക്ക് അനുകൂല വിധി ലഭിച്ചെങ്കിലും വിധി നടപ്പാക്കാന്‍ കഴിയില്ലെന്ന നിലപാട് ദേശീയ അത്‌ലറ്റിക് ഫെഡറേഷന്‍ സ്വീകരിക്കുകയായിരുന്നു.

ലോക അത്‌ലറ്റിക് ചാമ്പ്യന്‍ഷിപ്പിനുള്ള ടീമിനെ തെരഞ്ഞെടുക്കാനുള്ള സമിതിയുടെ പ്രത്യേക നിരീക്ഷകയായിരുന്നു പിടി ഉഷ ഇവര്‍ കൂടി പങ്കെടുത്ത യോഗത്തിലാണ് ചിത്രയെ ടീമില്‍നിന്ന് ഒഴിവാക്കാന്‍ തീരുമാനിച്ചത്. ചിത്രയെ ഒഴിവാക്കിയതില്‍ ഉഷയ്ക്കും പങ്കുണ്ടെന്ന് നേരത്തെ സെലക്ഷന്‍ കമ്മിറ്റി ചെയര്‍മാന്‍ ജിഎസ് രണ്‍ധാവ വെളിപ്പെടുത്തിയിരുന്നു. കഴിഞ്ഞ മന്ത്രി സഭാ യോഗത്തില്‍ ചിത്രയുടെ മുന്നോട്ട് പോക്കിനുള്ള സഹായം സര്‍ക്കാര്‍ പ്രഖ്യാപിച്ചിരുന്നു

ലോകത്തിന്റെ പുതിയ വേഗറാണിയായി തോറി ബോവി
Posted by
07 August

ലോകത്തിന്റെ പുതിയ വേഗറാണിയായി തോറി ബോവി

ലണ്ടന്‍: ലോക അത്ലറ്റിക് മീറ്റില്‍ പുതിയ വേഗറാണിയായി യുഎസിന്റെ തോറി ബോവി. ആവേശകരമായ 100 മീറ്റര്‍ മല്‍സരത്തില്‍, 10.85 സെക്കന്‍ഡില്‍ ഫിനിഷ് ചെയ്താണു തോറി ട്രാക്ക് കീഴടക്കിയത്. ഐവറികോസ്റ്റിന്റെ മാരി ജോസു
10.86 എടുത്താണ് രണ്ടാമതായി ഫിനിഷ് ചെയ്തത്

നെതര്‍ലന്‍ഡ്സിന്റെ ഡഫ്നി ഷിപ്പേഴ്സ് 10.91 സെക്കന്‍ഡില്‍ ഫിനിഷ് ചെയ്ത് മൂന്നാംസ്ഥാനത്തെത്തി. മെഡല്‍ നേടുമെന്നു പ്രതീക്ഷിച്ച ജമൈക്കയുടെ എലെയിന്‍ തോംസണ്‍ അഞ്ചാമത് മാത്രമാണ് ഫിനിഷ് ചെയ്തത്

ചൈന അതിര്‍ത്തി കടക്കാന്‍ ധൈര്യപ്പെടരുത്; ഇടിക്കൂട്ടില്‍ ചൈനയെ മുട്ടുകുത്തിച്ച് ഏഷ്യന്‍ ചാമ്പ്യനായ വിജേന്ദര്‍ സിങിന്റെ മുന്നറിയിപ്പ്
Posted by
06 August

ചൈന അതിര്‍ത്തി കടക്കാന്‍ ധൈര്യപ്പെടരുത്; ഇടിക്കൂട്ടില്‍ ചൈനയെ മുട്ടുകുത്തിച്ച് ഏഷ്യന്‍ ചാമ്പ്യനായ വിജേന്ദര്‍ സിങിന്റെ മുന്നറിയിപ്പ്

മുംബൈ: ചൈനീസ് താരം സുല്‍പിക്കര്‍ മെയ്‌മെയ്താലിയെ ഇടിച്ചു വീഴ്ത്തി ഏഷ്യ പസഫിക് സൂപ്പര്‍ മിഡില്‍ വെയ്റ്റ് കിരീടം ഇന്ത്യയുടെ വിജേന്ദര്‍ സിങിന്. ഓറിയന്റല്‍ സൂപ്പര്‍ മിഡില്‍വെയ്റ്റ് ചാമ്പ്യനായിരുന്നു വിജേന്ദറിന്റെ എതിരാളിയായ ചൈനയുടെ മെയ്‌മെയ്താലി. ഇതോടെ പ്രൊഫഷണല്‍ ബോക്‌സിങ്ങില്‍ തുടര്‍ച്ചയായി ഒന്‍പതാം വിജയം സ്വന്തമാക്കാനും വിജേന്ദറിനായി. 96-93, 95-94, 95-94 എന്ന സ്‌കോറിനായിരുന്നു വിജേന്ദറിന്റെ വിജയം. വിജയത്തോടെ മെയ്‌മെയ്താലിയുടെ ഓറിയന്റല്‍ സൂപ്പര്‍ മിഡില്‍വെയ്റ്റ് ബെല്‍റ്റും വിജേന്ദറിന് ലഭിക്കും.

ചൈന തങ്ങളുടെ അതിര്‍ത്തിയില്‍ കടക്കരുതെന്നും സമാധാനമാണ് വേണ്ടതെന്നും മത്സര ശേഷം വിജേന്ദര്‍ പ്രതികരിച്ചു. ഓറിയന്റല്‍ സൂപ്പര്‍ മിഡില്‍വെയ്റ്റ് ബെല്‍റ്റ് മെയ്‌മെയ്താലിക്ക് തിരിച്ചു കൊടുക്കുകയാണെന്നും ഇതാണ് സമാധാനത്തിന്റെ സന്ദേശമെന്നും വിജേന്ദര്‍ മത്സര ശേഷം പറഞ്ഞു.

‘ഏഷ്യന്‍ പോരാട്ടഭൂമി’ എന്നു പേരുള്ള വിജേന്ദര്‍-മെയ്‌മെയ്താലി മത്സരത്തിന് അതിര്‍ത്തിയിലെ സംഘര്‍ഷത്തെ തുടര്‍ന്ന് വലിയ പ്രാധാന്യമാണ് ഉണ്ടായിരുന്നത്.

ചൈനക്കാര്‍ ആരാണെന്ന് റിംഗില്‍ കാണിച്ചു തരാം എന്ന മെയ്‌മെയ്താലിയുടെ വെല്ലുവിളിക്ക് ചൈനീസ് ഉല്‍പ്പന്നങ്ങള്‍ക്ക് അധികം ആയുസില്ല എന്നായിരുന്നു വിജേന്ദറിന്റെ മറുപടി.

മൂന്നാമനായി മടക്കം; ലോക അത്‌ലറ്റിക് ചാമ്പ്യന്‍ഷിപ്പില്‍ ഉസൈന്‍ ബോള്‍ട്ട് മൂന്നാമത്; ഗാട്‌ലിന്‍ ലോക ചാമ്പ്യന്‍
Posted by
06 August

മൂന്നാമനായി മടക്കം; ലോക അത്‌ലറ്റിക് ചാമ്പ്യന്‍ഷിപ്പില്‍ ഉസൈന്‍ ബോള്‍ട്ട് മൂന്നാമത്; ഗാട്‌ലിന്‍ ലോക ചാമ്പ്യന്‍

ലണ്ടന്‍: വേഗരാജാവ് ഉസൈന്‍ ബോള്‍ട്ട് മൂന്നാമനായി മടങ്ങി. വിടവാങ്ങല്‍ മത്സരത്തില്‍ 9.95 സെക്കന്‍ഡ് വേഗത്തില്‍ 100 മീറ്റര്‍ കടന്ന് ജമൈക്കന്‍ താരം ട്രാക്കിനോട് വിടപറഞ്ഞു.

9.92 സെക്കന്റില്‍ ഫിനിഷ് ചെയ്ത അമേരിക്കയുടെ ജസ്റ്റിന്‍ ഗാട്‌ലിന്‍ ആണ് ചാമ്പ്യന്‍. അമേരിക്കയുടെ തന്നെ ക്രിസ്റ്റ്യന്‍ കോള്‍മാന്‍ രണ്ടാം സ്ഥാനത്ത് ഫിനിഷ്‌ചെയ്തു.

ഹീറ്റ്സിൽ 10.09 സെക്കൻഡും സെമിയിൽ 9.98 സെക്കൻഡും കുറിച്ച ബോൾട്ടിന്, മോശം തുടക്കമാണ് ഫൈനലിലും വിനയായത്. ഫലം, ഒളിംപിക്സിൽ എട്ടും ലോക അത്‍ലറ്റിക് ചാംപ്യൻഷിപ്പിൽ 11ഉം സ്വർണനേട്ടവുമായി ആധുനിക അത്‍ലറ്റിക്സിന്റെ ചരിത്രം തന്നെ തിരുത്തിയെഴുതി ഇതിഹാസമായി മാറിയ താരം, വെങ്കലവുമായി അത്‍ലറ്റിക്സിലെ ഗ്ലാമർ ഇനത്തോട് വിടപറഞ്ഞു. നൂറു മീറ്ററിൽ ഉസൈൻ ബോൾട്ട് കുറിച്ച 9.58 സെക്കൻഡാണ് ലോക റെക്കോർഡ്.

ബോൾട്ടിന്റെ മുഖ്യ എതിരാളി യുഎസ് താരം ജസ്റ്റിൻ ഗാട്‌ലിൻ സ്വർണത്തിലേക്ക് ഓടിയെത്തിയപ്പോൾ കൂക്കുവിളികളോടെയാണ് കാണികൾ വരവേറ്റത്. കഴിഞ്ഞ രണ്ടു ലോക ചാംപ്യൻഷിപ്പുകളിലും ബോൾട്ടിനു പിന്നിൽ രണ്ടാമനായിരുന്ന ഗാട്‍ലിൻ, 2013നു ശേഷം ഇതാദ്യമായാണ് ബോൾട്ടിനെ തോൽപ്പിക്കുന്നത്. ഒന്നാമനായി ഓടിയെത്തിയശേഷം ചുണ്ടിൽ വിരൽ ചേർത്ത് കാണികളോട് നിശബ്ദരാകാൻ ആവശ്യപ്പെട്ട ഗാട്‍ലിൻ, ട്രാക്കിനോട് വിടപറയുന്ന പ്രിയ എതിരാളിയുടെ മുന്നിൽ മുട്ടുകുത്തിനിന്ന് ആദരമർപ്പിച്ചു. ഉത്തേജകമരുന്നുപയോഗത്തിന്റെ പേരിൽ 2006 മുതൽ നാലുവർഷം വിലക്കു നേരിട്ട ശേഷമാണ് ഗാട്‌ലിൻ ട്രാക്കിലേക്കു മടങ്ങിയെത്തിയത്

വ്യക്തിഗത ഇനത്തിൽ സ്വർണമെഡലുമായി ട്രാക്കിനോടു വിടപറയാനായില്ലെങ്കിലും 4–100 മീറ്റർ റിലേയിൽ ജമൈക്കൻ ടീമിൽ അംഗമായി ബോൾട്ടിനെ ഒരിക്കൽ കൂടി മൽസരവേദിയിൽ കാണാം. 200 മീറ്ററിൽ നിന്നു പിൻമാറിയ ബോൾട്ട് 100 മീറ്ററിലും 4–100 മീറ്റർ റിലേയിലും മാത്രമേ ലണ്ടനിൽ മൽസരിക്കുന്നുള്ളൂ.

വനിതാ ഹോക്കി താരം ജ്യോതി ഗുപ്ത റെയില്‍വേ ട്രാക്കില്‍ മരിച്ച നിലയില്‍
Posted by
04 August

വനിതാ ഹോക്കി താരം ജ്യോതി ഗുപ്ത റെയില്‍വേ ട്രാക്കില്‍ മരിച്ച നിലയില്‍

ന്യൂഡല്‍ഹി: ദേശീയ വനിതാ ഹോക്കി താരം ജ്യോതി ഗുപ്തയെ (20) ഹരിയാണയിലെ രേവാരി റെയില്‍വേ ട്രാക്കില്‍ മരിച്ച നിലയില്‍ കണ്ടെത്തി. ബുധനാഴ്ച വൈകിട്ടാണ് ഇവരുടെ മൃതദേഹം കണ്ടെത്തിയത്. ജയ്പൂര്‍-ചണ്ഡീഗഡ് ഇന്റര്‍സിറ്റി എക്‌സ്പ്രസിന് മുന്നിലേക്ക് ചാടി ഇവര്‍ ആത്മഹത്യ ചെയ്യുകയായിരുന്നുവെന്ന് ദൃക്‌സാക്ഷികള്‍ പറഞ്ഞു.

മഹാറിഷി ദയാനന്ദ് യൂണിവേഴ്‌സിറ്റിയില്‍ നിന്ന് സര്‍ട്ടിഫിക്കറ്റിലെ പേരില്‍ വന്ന തെറ്റ് തിരുത്താനായാണ് ജ്യോതി വീട്ടില്‍ നിന്നും ഇറങ്ങിയതെന്നാണ് അമ്മ പറഞ്ഞു്. വൈകിട്ട് സോനിപത്തില്‍ നിന്ന് വിളിച്ചപ്പോള്‍ ബസ് കിട്ടാത്തതിനാലാണ് വൈകുന്നതെന്നാണ് ജ്യോതി പറഞ്ഞത്. എന്നാല്‍ രാത്രി 10മണി കഴിഞ്ഞിട്ടും വീട്ടിലെത്താത്തതിനെ തുടര്‍ന്ന് അമ്മ വീണ്ടും വിളിച്ചപ്പോഴാണ് മരണ വിവരം റെയില്‍വേ പൊലീസ് അറിയിക്കുന്നത്.

2016ലെ സൗത്ത് ഏഷ്യന്‍ ഗെയിംസ് അടക്കം നിരവധി അന്താരാഷ്ട്ര മത്സരങ്ങളില്‍ ഇന്ത്യയെ പ്രതിനിധീകരിച്ചിട്ടുള്ള താരമാണ് ജ്യോതി ഗുപ്ത.