ഫ്രഞ്ച് ഓപ്പണ്‍ സീരീസ്: പിവി സിന്ധു പുറത്ത്‌
Posted by
28 October

ഫ്രഞ്ച് ഓപ്പണ്‍ സീരീസ്: പിവി സിന്ധു പുറത്ത്‌

പാരീസ്: ഫ്രഞ്ച് ഓപ്പണ്‍ ബാഡ്മിന്റണ്‍ സൂപ്പര്‍ സീരീസില്‍നിന്ന് ഇന്ത്യയുടെ പി.വി.സിന്ധു തോറ്റു പുറത്തായി. ജപ്പാന്റെ അകാനെ യാമാഗുച്ചിയോടു നേരിട്ടുള്ള സെറ്റുകള്‍ക്കാണു സിന്ധു തോല്‍വി വഴങ്ങിയത്. സ്‌കോര്‍: 14-21, 9-21. ആദ്യ സെറ്റില്‍ മികച്ച പോരാട്ടം നടത്തിയ സിന്ധുവിനെ രണ്ടാം സെറ്റില്‍ ജപ്പാന്‍ താരം നിലയുറപ്പിക്കാന്‍ അനുവദിക്കാതെ തകര്‍ക്കുകയായിരുന്നു.

നേരത്തെ, ചൈനയുടെ ചെന്‍ യുഫിയെ പരാജയപ്പെടുത്തിയാണ് സിന്ധു അവസാന നാലിലെത്തിയത്. നേരിട്ടുള്ള സെറ്റുകള്‍ക്കായിരുന്നു സിന്ധുവിന്റെ വിജയം

 

ഇനിയില്ല ടെന്നീസ് കോര്‍ട്ടിലേക്ക് മാര്‍ട്ടിന ഹിംഗിസ്; വിരമിക്കല്‍ പ്രഖ്യാപിച്ചു
Posted by
27 October

ഇനിയില്ല ടെന്നീസ് കോര്‍ട്ടിലേക്ക് മാര്‍ട്ടിന ഹിംഗിസ്; വിരമിക്കല്‍ പ്രഖ്യാപിച്ചു

സൂറിച്ച്: ടെന്നീസ് കോര്‍ട്ടിലെ മിന്നും താരം സ്വിറ്റ്‌സര്‍ലന്‍ഡിന്റെ മാര്‍ട്ടിന ഹിംഗിസ് വിരമിക്കുന്നു. മുപ്പത്തേഴുകാരിയായ താരം തന്നെയാണ് തന്റെ ഫേസ്ബുക്ക് പേജിലൂടെ വിരമിക്കുന്ന കാര്യം അറിയിച്ചത്. ഡബഌുടിഎ ഫൈനല്‍സിനു ശേഷമാണ് ടെന്നീസില്‍നിന്നു വിരമിക്കുക.

തായ് വാന്റ ചാന്‍ യുങ് ജാനിനൊപ്പമാണ് ഡബിള്‍സില്‍ അവസാന ടൂര്‍ണമെന്റില്‍ ഹിംഗ്‌സ് കളിക്കുന്നത്. 25 ഗ്ലാന്‍സ്ലാം കിരീടങ്ങളാണ് ഈ ടെന്നീസ് സുന്ദരി അടിച്ചു നേടിയത്. ഇതില്‍ അഞ്ചു കിരീടങ്ങള്‍ സിംഗിള്‍സിലും ഏഴെണ്ണം മിക്‌സഡ് ഡബിള്‍സിലും 13 എണ്ണം വനിതാ ഡബിള്‍സിലുമാണ്.

2003ല്‍ 22ാം വയസില്‍ തുടര്‍ച്ചയായ പരിക്കിനെ തുടര്‍ന്നു ഹിംഗിസ് കോര്‍ട്ടില്‍നിന്നു വിരമിച്ചിരുന്നെങ്കിലും 2013ല്‍ ഹിംഗിസ് വീണ്ടും കോര്‍ട്ടിലേക്കു തിരിച്ചെത്തുകയായിരുന്നു.

ഇതിനുശേഷം പത്തു ഗ്രാന്‍സ്ലാം കിരീടങ്ങളാണ് ഹിംഗിസ് തന്റെ ഷെല്‍ഫില്‍ എത്തിച്ചത്.

ഫ്രഞ്ച് ഓപ്പണ്‍ സീരീസ്: സൈന പുറത്ത്‌
Posted by
26 October

ഫ്രഞ്ച് ഓപ്പണ്‍ സീരീസ്: സൈന പുറത്ത്‌

പാരിസ്: ഫ്രഞ്ച് ഓപ്പണ്‍ സൂപ്പര്‍ സീരീസില്‍നിന്നും ഇന്ത്യയുടെ സൈന നെഹ്‌വാള്‍ പുറത്തായി. രണ്ടാം റൗണ്ടില്‍ ജപ്പാന്റെ അകാനെ യാമഗുച്ചിയോടാണ് സൈന പരാജയപ്പെട്ടത്. അഞ്ചാം സീഡായ യാമഗുച്ചി നേരിട്ടുള്ള സെറ്റുകള്‍ക്കാണ് സൈനയെ വീഴ്ത്തിയത്.

ആദ്യ സെറ്റ് അനായാസം യാമഗുച്ചി സ്വന്തമാക്കി. എന്നാല്‍ രണ്ടാം സെറ്റില്‍ സൈന ശക്തമായി പൊരുതിയെങ്കിലും രണ്ടു പോയിന്റകലെ വീണു. മത്സരം 39 മിനിറ്റുകള്‍ മാത്രമാണ് ദീര്‍ഘിച്ചത്. സ്‌കോര്‍: 921, 2123. യാമഗുച്ചിയുമായി സൈന നാലു തവണ നേര്‍ക്കുനേര്‍വന്നപ്പോള്‍ മൂന്നിലും തോല്‍വിയായിരുന്നു ഫലം.

 

usain bolt to step into football
Posted by
24 October

വേഗരാജാവ് കാല്‍പന്തിനായി ബൂട്ടണിയുന്നു

വാഷിംഗ്ടണ്‍: ജമൈക്കന്‍ വേഗരാജാവ് ഉസൈന്‍ ബോള്‍ട്ട് ഫുട്‌ബോള്‍ ലോകത്തിലേക്ക് ചുവട് വെക്കാനൊരുങ്ങുന്നു.യുഎസ് ഫോര്‍മുല ഗ്രാന്റ് പ്രീ കാണാന്‍ എത്തിയ അദ്ദേഹം മാധ്യമങ്ങളോട് വെളിപ്പെടുത്തി. ബാല്യകാലം മുതല്‍ മനസില്‍ താലോലിക്കുന്ന സ്വപ്‌നമാണ് ഫുട്‌ബോളെന്നും, മറ്റുള്ളവര്‍ എന്താണ് ചിന്തിക്കുന്നതെന്ന് തനിക്ക് പ്രശ്‌നമില്ലെന്നും ബോള്‍ട്ട് പറഞ്ഞു.

ജീവിതത്തിലെ മറ്റൊരു ഏടായിരിക്കും ഇത്. ഗ്രൗണ്ടിലിറങ്ങി പരിശീലിക്കുമ്പോള്‍ തനിക്കിത് സാധ്യമാകുമെന്ന് ആത്മവിശ്വാസം ലഭിച്ചാല്‍ തീര്‍ച്ചയായും മുഖ്യധാര ഫുട്‌ബോളില്‍ സജീവമാകാന്‍ ശ്രമിക്കുമെന്നും അദ്ദേഹം പറഞ്ഞു. ക്ലബുകളില്‍ തനിക്ക് ഏറ്റവും പ്രിയപ്പെട്ടത് മാഞ്ചെസ്റ്റര്‍ യുണൈറ്റഡാണെന്നും, തന്റെ രാജ്യത്തിന് വേണ്ടി കളിക്കുക എന്നതാണ് സ്വപ്‌നമെന്നും ബോള്‍ട്ട് കൂട്ടിച്ചേര്‍ത്തു.

ഓട്ടട്രാക്കിലെ ഇടിമിന്നലായിരുന്ന ഉസൈന്‍ ബോള്‍ട്ട് എന്ന 31കാരന്‍ 8തവണ ഒളിംപിക്‌സില്‍ സ്വര്‍ണ്ണ മെഡല്‍ കരസ്ഥമാക്കിയിട്ടുണ്ട്. ഹാംസ്ട്രിംഗ് മസിലില്‍ സംഭവിച്ച പരുക്കിനെ തുടര്‍ന്ന് കഴിഞ്ഞ ഓഗസറ്റില്‍ നടന്ന ലോക അത്‌ലറ്റിക്ക് ചാമ്പ്യന്‍ഷിപ്പിലാണ് ബോള്‍ട്ട് വിരമിച്ചത്.

സ്‌കൂള്‍ മീറ്റ്: പാലക്കാടിനെ പിന്തള്ളി എറണാകുളത്തിന് കിരീടം; മാര്‍ ബേസില്‍ ചാമ്പ്യന്‍
Posted by
23 October

സ്‌കൂള്‍ മീറ്റ്: പാലക്കാടിനെ പിന്തള്ളി എറണാകുളത്തിന് കിരീടം; മാര്‍ ബേസില്‍ ചാമ്പ്യന്‍

പാലാ: സംസ്ഥാന സ്‌കൂള്‍ കായികമേളയില്‍ പാലക്കാടിനെ പിന്നിലാക്കി എറണാകുളത്തിന് കിരീടം. സ്‌കൂളുകളില്‍ കോതമംഗലം മാര്‍ ബേസില്‍ ചാമ്പ്യന്‍ പട്ടം നിലനിര്‍ത്തി. കോഴിക്കോട് പുല്ലൂരാമ്പാറ സ്‌കൂളാണ് രണ്ടാം സ്ഥാനത്ത്. പാലക്കാട് പറളി സ്‌കൂള്‍ മൂന്നാം സ്ഥാനത്തെത്തി.

അവസാന ദിനം സീനിയര്‍ പെണ്‍കുട്ടികളുടെ 200 മീറ്ററില്‍ ഒന്നാമതെത്തി കോഴിക്കോടിന്റെ അപര്‍ണ റോയി ട്രിപ്പിള്‍ സ്വര്‍ണ്ണനേട്ടം കൈവരിച്ചു. ജൂനിയര്‍ പെണ്‍കുട്ടികളില്‍ ഒന്നാമതെത്തി തൃശൂരിന്റെ ആന്‍സി സോജന്‍ സ്പ്രിന്റ് ഡബിളും കരസ്ഥമാക്കി.

നാലു ദിവസമായി തുടരുന്ന മേളയുടെ സമാപനസമ്മേളനം പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്യും. വിദ്യാഭ്യാസമന്ത്രി സി രവീന്ദ്രനാഥ് ചടങ്ങില്‍ പുരസ്‌കാരങ്ങള്‍ വിതരണം ചെയ്യും.

കായിക താരങ്ങളുടെ സമ്മാനത്തുക പ്രമുഖരുള്‍പ്പെടെയുള്ള പരിശീലകര്‍ തട്ടിയെടുക്കുന്നു; താരങ്ങള്‍ ഇന്നും പട്ടിണിയിലെന്നും ഒളിംപ്യന്‍ ഷൈനി വില്‍സണ്‍
Posted by
22 October

കായിക താരങ്ങളുടെ സമ്മാനത്തുക പ്രമുഖരുള്‍പ്പെടെയുള്ള പരിശീലകര്‍ തട്ടിയെടുക്കുന്നു; താരങ്ങള്‍ ഇന്നും പട്ടിണിയിലെന്നും ഒളിംപ്യന്‍ ഷൈനി വില്‍സണ്‍

പാലാ: സംസ്ഥാനത്തെ കായിക താരങ്ങള്‍ ഇന്നും പട്ടിണിയിലും കഷ്ടപ്പാടിലും കിടന്ന് ഉഴറാന്‍ കാരണം പരിശീലകരെന്ന് ആരോപണം. പ്രമുഖപരിശീലകര്‍പോലും കായികതാരങ്ങളുടെ സമ്മാനത്തുകയായി ലഭിക്കുന്ന പണം തട്ടിയെടുക്കുന്നുണ്ടെന്ന് ഒളിംപ്യന്‍ ഷൈനി വില്‍സന്‍. പല മുന്‍നിര താരങ്ങളും ദരിദ്രരായി തുടരുന്നത് ഇത്തരത്തില്‍ പണം നഷ്ടപ്പെടുന്നത് കൊണ്ടാണെന്നും ഷൈനി വില്‍സണ്‍ ആരോപിക്കുന്നു. കായികതാരങ്ങള്‍ക്കുള്ള പണം അവര്‍ക്കു മാത്രമുള്ളതാണെന്നും പണം തട്ടിയെടുക്കുന്നത് അവസാനിപ്പിക്കണമെന്നും ഷൈനി വില്‍സന്‍ പറഞ്ഞതായി മനോരമ റിപ്പോര്‍ട്ട് ചെയ്യുന്നു.

അതിനിടെ ഷൈനി വില്‍സന്റെ ആരോപണം ശരിവച്ച് അത്‌ലറ്റിക് അസോസിയേഷന്‍ സെക്രട്ടറി പിഐ ബാബുവും പരിശീലക മേഴ്‌സി കുട്ടനും രംഗത്തെത്തി. ഈ പ്രവണത ശ്രദ്ധയില്‍ പെട്ടിട്ടുണ്ടെന്നും കുട്ടികളുടെ ആവശ്യങ്ങള്‍ക്ക് ഉപയോഗിക്കേണ്ട പണമാണ് ഇങ്ങനെ പരിശീലകര്‍ കൈപ്പറ്റുന്നതെന്നും പിആ ബാബു പറയുന്നു. ഭീഷണിയും ഭയവും മൂലമാണ് കായിക താരങ്ങള്‍ ഇത് തുറന്നു പറയാത്തതെന്നും ഇരുവരും ആരോപിച്ചു.

സംസ്ഥാന സ്‌കൂള്‍ മീറ്റ്: അനുമോള്‍ തമ്പിക്ക് ട്രിപ്പിള്‍ സ്വര്‍ണ്ണം
Posted by
22 October

സംസ്ഥാന സ്‌കൂള്‍ മീറ്റ്: അനുമോള്‍ തമ്പിക്ക് ട്രിപ്പിള്‍ സ്വര്‍ണ്ണം

പാലാ: പാലായില്‍ നടക്കുന്ന സംസ്ഥാന സ്‌കൂള്‍ കായികോത്സവത്തില്‍ മാര്‍ ബേസില്‍ താരം അനുമോള്‍ തമ്പിക്ക് ട്രിപ്പിള്‍ സ്വര്‍ണ്ണം. സീനിയര്‍ പെണ്‍കുട്ടികളുടെ 1500 മീറ്ററിലും സ്വര്‍ണ്ണം നേടിയതോടെയാണ് ട്രിപ്പിള്‍ നേട്ടം അനുമോള്‍ക്ക് സ്വന്തമായത്.

3000,5000 മീറ്ററുകളിലും അനുമോള്‍ നേരത്തെ സ്വര്‍ണ്ണം നേടിയിരുന്നു. സീനിയര്‍ ആണ്‍കുട്ടികളുടെ വിഭാഗത്തില്‍ മാര്‍ ബേസിലിന്റെ തന്നെ ആദര്‍ശ് ഗോപിയാണ് സ്വര്‍ണ്ണം നേടിയത്. ജൂനിയര്‍ വിഭാഗത്തില്‍ അഭിഷേക് മാത്യുവും സ്വര്‍ണ്ണം കരസ്ഥമാക്കി.

ഏഷ്യ കപ്പ് ഹോക്കി: പാകിസ്താനെ തകര്‍ത്ത് ഇന്ത്യക്ക് ഹാട്രിക്ക് വിജയം
Posted by
15 October

ഏഷ്യ കപ്പ് ഹോക്കി: പാകിസ്താനെ തകര്‍ത്ത് ഇന്ത്യക്ക് ഹാട്രിക്ക് വിജയം

ധാക്ക: ഏഷ്യാ കപ്പ് ഹോക്കിയില്‍ പാക്കിസ്ഥാനെ പരാജയപ്പെടുത്തി ഇന്ത്യ. ഒന്നിനെതിരേ മൂന്നു ഗോളുകള്‍ക്കായിരുന്നു ഇന്ത്യന്‍ വിജയം. ചിംഗ്ലന്‍സന സിംഗ്, രമണ്‍ദീപ് സിംഗ്, ഹര്‍മന്‍പ്രീത് സിംഗ് എന്നിവരാണ് ഇന്ത്യക്കായി ലക്ഷ്യം കണ്ടത്. അലി ഷാന്റെ വകയായിരുന്നു പാക്കിസ്ഥാന്റെ ആശ്വാസഗോള്‍.

17ാം മിനിറ്റില്‍ ചിംഗ്ലന്‍സന സിംഗിലൂടെയാണ് ഇന്ത്യ ഗോള്‍വേട്ട ആരംഭിച്ചത്. 43ാം മിനിറ്റില്‍ രമണ്‍ദീപ് സിംഗ് ഇന്ത്യന്‍ ലീഡ് ഉയര്‍ത്തി. തൊട്ടടുത്ത മിനിറ്റില്‍ ലഭിച്ച പെനാല്‍റ്റി കോര്‍ണര്‍ മുതലാക്കി ഹര്‍മന്‍പ്രീത് സിംഗ് ഇന്ത്യന്‍ ഗോള്‍നേട്ടം മൂന്നാക്കി വര്‍ധിപ്പിച്ചു. നാലു മിനിറ്റിനുശേഷം അലി ഷാ പാക്കിസ്ഥാനായി ഒരു ഗോള്‍ മടക്കിയെങ്കിലും പിന്നീട് ഇന്ത്യന്‍ പ്രതിരോധപ്പൂട്ട് പൊളിക്കാന്‍ പാക് താരങ്ങള്‍ക്കു കഴിഞ്ഞില്ല.

പൂള്‍ എയില്‍ ഇന്ത്യയുടെ തുടര്‍ച്ചയായ മൂന്നാം ജയമാണിത്. ആദ്യ മത്സരത്തില്‍ ജപ്പാനെ ഒന്നിനെതിരേ അഞ്ചു ഗോളുകള്‍ക്കു തകര്‍ത്ത ഇന്ത്യ രണ്ടാം മത്സരത്തില്‍ ബംഗ്ലാദേശിനെ എതിരില്ലാത്ത ഏഴു ഗോളുകള്‍ക്കു കെട്ടുകെട്ടിച്ചിരുന്നു.

 

ബോള്‍ ബാഡ്മിന്റന്‍: വിവേകും ശ്രീലക്ഷ്മിയും കേരളത്തെ നയിക്കും
Posted by on 04 October

ബോള്‍ ബാഡ്മിന്റന്‍: വിവേകും ശ്രീലക്ഷ്മിയും കേരളത്തെ നയിക്കും

ചങ്ങനാശേരി: കര്‍ണാടകയിലെ ശിക്കാരിപുരയില്‍ നടക്കുന്ന ദേശീയ ജൂനിയര്‍ നാഷനല്‍ ബോള്‍ബാഡ്മിന്റന്‍ ചാംപ്യന്‍ഷിപ്പില്‍ കേരളത്തിന്റെ ആണ്‍കുട്ടികളുടെ ടീമിനെ വിവേകും (കൊല്ലം) പെണ്‍കുട്ടികളുടെ ടീമിനെ ശ്രീലക്ഷ്മിയും (തിരുവനന്തപുരം) നയിക്കും. ടീം ആണ്‍കുട്ടികള്‍: വിആര്‍ വിവേക്, അനന്തഗോപന്‍, മുഹമ്മദ് ഫെബിന്‍ (കൊല്ലം), നിഥിന്‍ ലോറന്‍സ്, ആകാശ് ഘോഷ് (പത്തനംതിട്ട), പിഎസ് അഭിരാം (ഇടുക്കി), ടി മിഥുന്‍, മുഹമ്മദ് ആഷിക് (മലപ്പുറം), എ ഹാരിഫ്, സിഎസ് സില്‍ജോയ് (പാലക്കാട്). സോളമന്‍ ജോണ്‍ (കോച്ച്), സന്തോഷ് ഇമ്മട്ടി (മാനേജര്‍).

പെണ്‍കുട്ടികള്‍: എംഎസ് ശ്രീലക്ഷ്മി, ബിഎച്ച് ആര്യദാസ്, സിഎസ് ആര്യ (തിരുവനന്തപുരം), പിയു അപര്‍ണ, ടി അഞ്ജു കിഷോര്‍, കെഎസ് ആര്യ, എയു അഞ്ജന (എറണാകുളം), വിഎസ് ശ്രീധു (പാലക്കാട്), റോസ്ന പ്രിന്‍സ് (കോട്ടയം), സിഡി ഡെല്‍മ (തൃശൂര്‍), എല്‍ മിനിമോള്‍ (മാനേജര്‍), റഷീദ് (കോച്ച്).

ദേശീയ ഓപ്പണ്‍ അത്‌ലറ്റിക്‌സ് ചാമ്പ്യന്‍ഷിപ്പ്: കിരീടം നിലനിര്‍ത്തി റെയില്‍വേസ് ചാമ്പ്യന്‍മാര്‍
Posted by on 29 September

ദേശീയ ഓപ്പണ്‍ അത്‌ലറ്റിക്‌സ് ചാമ്പ്യന്‍ഷിപ്പ്: കിരീടം നിലനിര്‍ത്തി റെയില്‍വേസ് ചാമ്പ്യന്‍മാര്‍

ചെന്നൈ: ദേശീയ ഓപ്പണ്‍ അത്‌ലറ്റിക്‌സ് ചാമ്പ്യന്‍ഷിപ്പില്‍ കിരീടം ആര്‍ക്കും വിട്ടുനല്‍കാതെ ഇത്തവണയും റെയില്‍വേസ് തന്നെ ചാമ്പ്യന്മാര്‍. 182 പോയിന്റ് നേടിയ സര്‍വീസസാണ് റണ്ണറപ്പ്. 77 പോയിന്റുമായി ഒഎന്‍ജിസി മൂന്നാം സ്ഥാനത്തെത്തി. 2 സ്വര്‍ണവും 1വെള്ളിയുമടക്കം 40 പോയിന്റുള്ള കേരളം ഏഴാം സ്ഥാനത്താണ്. കഴിഞ്ഞ നാല് ദിവസമായി ചെന്നൈയിലെ ജവഹര്‍ലാല്‍ നെഹ്‌റു സ്റ്റേഡിയത്തില്‍ നടന്ന മീറ്റില്‍ 17 സ്വര്‍ണവും 13 വെള്ളിയും 12 വെങ്കലവും നേടി 296 പോയിന്റോടെയാണ് ഇത്തവണ റെയില്‍വേസ് ചാമ്പ്യന്‍മാരായത്.

മീറ്റിന്റെ താരങ്ങളായി പുരുഷന്മാരുടെ 400 മീറ്റര്‍ ഹര്‍ഡില്‍സില്‍ റെക്കാഡോടെ സ്വര്‍ണം നേടിയ തമിഴ്‌നാടിന്റെ സന്തോഷ് കുമാറും(1122 പോയിന്റ്) 3000 മീറ്രര്‍ സ്റ്റീപ്പിള്‍ ചേസില്‍ സ്വര്‍ണം നേടിയ റെയില്‍വേസിന്റെ ചിന്താ യാദവും(1121 പോയിന്റ്) തെരഞ്ഞെടുക്കപ്പെട്ടു. രണ്ടു ദിസവമായി മെഡല്‍ ഒന്നുമില്ലാതിരുന്ന കേരളത്തിന് അവസാന ദിനം ട്രിപ്പിള്‍ജമ്പില്‍ കീറിയ സ്‌പൈക്‌സുമായി മത്സരിച്ച കെ ശ്രീജിത്ത് മോന്റെ (16.15 മീറ്റര്‍ ) സ്വര്‍ണ നേട്ടം ആശ്വാസമായി. സര്‍വീസസിനായി മത്സരിച്ച മലയാളി താരം ഇ രാകേഷ് ബാബുവാണ് ഈ ഇനത്തില്‍ (16.06 മീറ്റര്‍) വെങ്കലമണിഞ്ഞത്. പുരുഷന്മാരുടെ 800 മീറ്ററില്‍ വെള്ളി നേടിയ സര്‍വീസസിന്റെ പി മുഹമ്മദ് അഫ്‌സലും വനിതകളുടെ പോള്‍വോള്‍ട്ടില്‍ വെങ്കലം നേടിയ റെയില്‍വേസിന്റെ കെസി ദിജയുമാണ് ഇന്നലെ മെഡല്‍നേടിയ മറ്റ് മലയാളി താരങ്ങള്‍.

error: This Content is already Published.!!