FIFA ranking: India rises to 101
Posted by
06 April

പ്രതീക്ഷയുടെ ചിറകില്‍ ഇന്ത്യ; ഫിഫ റാങ്കിങ്ങില്‍ ചരിത്ര കുതിപ്പ്

ന്യൂഡല്‍ഹി: പുത്തന്‍ പ്രതീക്ഷയുടെ ചിറകിലേറി ഇന്ത്യന്‍ ഫുട്‌ബോള്‍. ഫിഫ റാങ്കിങ്ങില്‍ ചരിത്ര കുതിപ്പാണ് രാജ്യം നടത്തിയത്. ഇന്ന് പുറത്തുവന്ന റാങ്കിങ് പട്ടികയില്‍ 132-ാം സ്ഥാനത്തായിരുന്ന ഇന്ത്യ 31 സ്ഥാനങ്ങള്‍ മെച്ചപ്പെടുത്തി 101 സ്ഥാനത്തെത്തി. രണ്ടു പതിറ്റാണ്ടിനിടെ ഇന്ത്യയുടെ മികച്ച റാങ്കാണിതെന്നു വിശേഷിപ്പിക്കാം.

സൗഹൃദ മത്സരത്തില്‍ കംബോഡിയക്കെതിരെയും എഎഫ്സി കപ്പ് യോഗ്യതാ മത്സരത്തില്‍ മ്യാന്‍മറിനെതിരെയും നേടിയ ജയങ്ങളാണ് ഇന്ത്യയ്ക്ക് തുണയായത് എന്നുവേണം പറയാന്‍. കഴിഞ്ഞ പതിമൂന്ന് മത്സരങ്ങളില്‍ പതിനൊന്നിലും ഇന്ത്യന്‍ ടീം ജയിച്ചിരുന്നു. ഇതില്‍ ആറെണ്ണം തുടര്‍ച്ചയായ ജയങ്ങളായിരുന്നു.

1996 ല്‍ നേടിയ 94ാം സ്ഥാനമാണ് റാങ്കിങ്ങില്‍ ഇതുവരെയുള്ള ഇന്ത്യയുടെ ഏറ്റവും വലിയ നേട്ടം. എന്നാല്‍ അതിനുശേഷമുള്ള റാങ്കിങ്ങില്‍ വന്‍ തിരിച്ചടിയായിരുന്നു ഇന്ത്യയ്ക്ക്. 2015 മാര്‍ച്ചില്‍ 173ാം റാങ്ക് വരെ ഇന്ത്യ താഴ്ന്നിരുന്നു.

Ban for messi from fifa
Posted by
29 March

അര്‍ജന്റീനയ്ക്ക് തിരിച്ചടി: ലോകക്കപ്പ് യോഗ്യതാ മത്സരങ്ങള്‍ കളിക്കുന്നതിന് ലയണല്‍ മെസ്സിക്ക് വിലക്ക്

ലോകക്കപ്പ് യോഗ്യതാ മത്സരങ്ങള്‍ കളിക്കുന്നതിന് ലയണല്‍ മെസ്സിക്ക് വിലക്ക്. ഫുട്‌ബോളര്‍ ലയണല്‍ മെസ്സി എഫ്ഡിസിയുടെ 57ാം വകുപ്പ് ലംഘിച്ചതിനാണ് കുറ്റക്കാനായി കണ്ടെത്തിയത്.
യോഗ്യതാ റൗണ്ടിലെ അടുത്ത നാല് മത്സരങ്ങള്‍ കളിക്കുന്നതില്‍ നിന്നും അന്താരാഷ്ട്ര ഫുട്‌ബോള്‍ സംഘടനയായ ഫിഫയാണ് വിലക്കിയത്.

ചിലിയുമായുള്ള മത്സരത്തിനിടെ അസിസ്റ്റ് റഫറിയോട് മോശമായി പെരുമാറിയതിനാണ് വിലക്ക്. അഞ്ച് മത്സരങ്ങളാണ് യോഗ്യതാറൗണ്ടില്‍ അര്‍ജന്റീനയ്ക്ക് ബാക്കിയുള്ളത്. അര്‍ജന്റീനിയന്‍ ഫുട്‌ബോള്‍ ടീമിന് വിലക്ക് കനത്ത തിരിച്ചടിയാകും.തനിക്കെതിരെ ഫൗള്‍ വിളിച്ചതിന് മെസ്സി അസിസ്റ്റന്റ് റെഫറിക്ക് നേരെ പ്രകോപിതനായി. രോഷാകുലനായ മെസ്സി റഫറിയെ ചീത്ത വിളിച്ചു. മെസ്സി മോശമായി പെരുമാറിയത് അസിസ്റ്റന്റ് റഫറി റിപ്പോര്‍ട്ട് ചെയ്തിരുന്നില്ല. പക്ഷെ ഫിഫ സ്വമേധയാ നടപടി സ്വീകരിക്കുകയായിരുന്നു.

U-17 football WC: FIFA dissatisfied with Kochi stadium
Posted by
28 March

അണ്ടര്‍ 17 ഫുട്‌ബോള്‍ ലോകകപ്പില്‍ നിരാശ; പ്രധാനമത്സരങ്ങള്‍ക്ക് കൊച്ചി വേദിയാവില്ല

കൊച്ചി: അണ്ടര്‍ 17 ലോകകപ്പിന് കൊച്ചിയില്‍ പന്തുരുളുന്നത് കാണാന്‍ കാത്തിരുന്ന കേരളത്തിന് നിരാശ. ലോകകപ്പ് മത്സരങ്ങള്‍ക്കായി സ്റ്റേഡിയവും ഗ്രൗണ്ടും ഒരുക്കുന്നത് ഇഴഞ്ഞുനീങ്ങുന്ന സാഹചര്യത്തിലാണ് പ്രധാനമത്സരങ്ങള്‍ കൊച്ചിയില്‍ നടക്കില്ലെന്ന് ഉറപ്പായത്.

ഗ്രൂപ്പ് ഘട്ടത്തിലെ ആറ് മത്സരങ്ങള്‍ക്കും ഒക്ടോബര്‍ 22ന് നടക്കുന്ന ഒരു ക്വാര്‍ട്ടര്‍ ഫൈനലിനും മാത്രമാകും കൊച്ചി ഇനി വേദിയാവുക. ഫൈനല്‍ മത്സരം ഒക്ടോബര്‍ 28ന് കൊല്‍ക്കത്തയിലാകും നടക്കുക. കൊച്ചിയിലെത്തിയ ഫിഫ സംഘത്തിന്റെ വിമര്‍ശനത്തിന് പിന്നാലെയാണ് കേരളത്തിനെ നിരാശപെടുത്തിക്കൊണ്ട് പുതിയ പ്രഖ്യാപനം വന്നത്.

കൊല്‍ക്കത്ത സാള്‍ട്ട്ലേക്ക് സ്റ്റേഡിയം കഴിഞ്ഞാല്‍ ഏറ്റവുമധികം കാണികളെ ഉള്‍ക്കൊള്ളാന്‍ കഴിയുന്ന സ്റ്റേഡിയം കൊച്ചിയില്‍ ഉണ്ടായിട്ടും, ഫിഫ സംഘത്തിന്റെ പരസ്യവിമര്‍ശനം കൊച്ചിക്ക് തിരിച്ചടി നല്‍കി. ഏറ്റവും മികച്ച കാണികളെന്ന പ്രശംസ നേടിയിട്ടും പ്രധാന മത്സരങ്ങള്‍ കൊച്ചിക്ക് നഷ്ടമായത് സംഘാടകരുടെ പിടിപ്പുകേട് കൊണ്ടാണെന്ന് ഓരോ ഫുട്‌ബോള്‍ ആരാധകരും നിരാശയോടെ പറയുന്നു.

Brazil to win over Uruguay
Posted by
24 March

ലോകകപ്പ് യോഗ്യതാ മത്സരത്തില്‍ ബ്രസീലിന് തകര്‍പ്പന്‍ ജയം

ലോകകപ്പ് യോഗ്യതാ മത്സരത്തില്‍ ബ്രസീലിന് തകര്‍പ്പന്‍ ജയം. യുറഗ്വായെ നാലു ഗോളുകള്‍ക്ക് തകര്‍ത്തു. പൗളിഞ്ഞോ ഹാട്രിക്ക് നേടി. അര്‍ജന്റീന ചിലെക്കെതിരെ ആശ്വാസ വിജയം സ്വന്തമാക്കി. മറ്റൊരു മത്സരത്തില്‍ കൊളംബിയ ബൊളീവയെ തോല്‍പ്പിച്ചു.മിന്നുന്ന ജയത്തോടെ 30 പോയിന്റുമായി ലാറ്റിനമേരിക്കന്‍ ഗ്രൂപ്പില്‍ ബ്രസീല്‍ ഒന്നാം സ്ഥാനം നിലനിര്‍ത്തി. പരാജയപ്പെട്ടങ്കിലും യുറഗ്വായാണ് രണ്ടാം സ്ഥാനത്ത്. ചിലെക്കെതിരെ ജയം സ്വന്തമാക്കിയ അര്‍ജന്റീന മൂന്നാമതെത്തി. കൊളംബിയ നാലാം സ്ഥാനത്ത് എത്തിയപ്പോള്‍ ചിലെ ആറാം സ്ഥാനത്തേക്ക് തള്ളപ്പെട്ടു.

മറ്റൊരു മല്‍സരത്തില്‍ ഏകപക്ഷീയമായ ഒരുഗോളിന് കൊളംബിയ ബൊളീവിയയെ തോല്‍പ്പിച്ചു. എണ്‍പത്തിമൂന്നാം മിനിട്ടില്‍ ജയിംസ് റോഡ്രിഗസാണ് മല്‍സരത്തിലെ ഏകഗോള്‍ നേടിയത്. ജയത്തോടെ ലോകകപ്പിലേക്കുള്ള പ്രവേശനം സാധ്യതയും കൊളംബിയ നിലനിര്‍ത്തി.

Virat kohli breaks records of Bradman and Dravid
Posted by
10 February

തുടര്‍ച്ചയായ നാലാം പരമ്പരയിലും ഇരട്ട സെഞ്ച്വറി; ദ്രാവിഡിന്റെയും ബ്രാഡ്മാന്റെയും റെക്കോര്‍ഡുകള്‍ തകര്‍ത്ത് ഇന്ത്യയുടെ വിരാട വീര്യം

ഹൈദരാബാദ് : മഹാരഥന്മാരുടെ റെക്കോര്‍ഡുകള്‍ ഓരോന്നായി കടപുഴക്കി ഇന്ത്യന്‍ നായകന്‍ വിരാട് കോഹ്‌ലി മുന്നോട്ട്. തുടര്‍ച്ചയായ നാലാം പരമ്പരയിലും ഇരട്ടസെഞ്ചുറി കുറിച്ച് കോഹ്ലി റെക്കോര്‍ഡുകളുടെ കൂമ്പാരമാണ് തീര്‍ത്തിരിക്കുന്നത്. ഏകദിന ശൈലിയില്‍ ബാറ്റുവീശിയ കോഹ്‌ലി, 239 പന്തില്‍ 24 ബൗണ്ടറികള്‍ ഉള്‍പ്പെടെയാണ് ഇരട്ടസെഞ്ചുറിയിലേക്കെത്തിയത്. ഉച്ചഭക്ഷണ സമയത്ത് 191 റണ്‍സെടുത്ത് പുറത്താകാതെ നില്‍ക്കുകയായിരുന്ന കോഹ്‌ലി ക്രീസില്‍ തിരിച്ചെത്തി അധികം വൈകാതെ ഇരട്ടസെഞ്ചുറി പൂര്‍ത്തിയാക്കി. ഒടുവില്‍ തയ്ജുല്‍ ഇസ്‌ലാമിന് വിക്കറ്റ് സമ്മാനിച്ച് മടങ്ങുമ്പോള്‍ 246 പന്തുകളില്‍നിന്ന് 24 ബൗണ്ടറികളുള്‍പ്പെടെ നേടിയ 204 റണ്‍സായിരുന്നു കോഹ്‌ലിയുടെ സമ്പാദ്യം.

തുടര്‍ച്ചയായി മൂന്നു പരമ്പരകളില്‍ ഇരട്ടസെഞ്ചുറി കുറിച്ച സാക്ഷാല്‍ ഡോണ്‍ ബ്രാഡ്മാന്‍, ഇന്ത്യയുടെ വന്മതില്‍ രാഹുല്‍ ദ്രാവിഡ് എന്നിവരുടെ റെക്കോര്‍ഡാണ് നാലാം ഇരട്ടശതക നേട്ടത്തോടെ കോഹ്‌ലി മറികടന്നത്. നേരത്തെ വെസ്റ്റ് ഇന്‍ഡീസ് (200), ന്യൂസീലന്‍ഡ് (211), ഇംഗ്ലണ്ട് (235) ടീമുകള്‍ക്കെതിരെയും കോഹ്‌ലി ഇരട്ടസെഞ്ചുറി നേടിയിരുന്നു. ക്യാപ്റ്റനെന്ന നിലയില്‍ കോഹ്‌ലിയുടെ നാലാം ഇരട്ടസെഞ്ചുറിയാണിത്. ഒരു ഇരട്ടസെഞ്ചുറി മാത്രം പേരിലുള്ള മറ്റ് മുന്‍ ഇന്ത്യന്‍ ക്യാപ്റ്റന്‍മാരേക്കാള്‍ ബഹുദൂരം മുന്നില്‍. ടെസ്റ്റ് കളിച്ച എല്ലാ ടീമുകള്‍ക്കും എതിരെയും സെഞ്ചുറി നേടിയ താരമായും കോഹ്ലി മാറിയിരുന്നു. (പാക്കിസ്ഥാന്‍, സിംബാബ്വെ ടീമുകള്‍ക്കെതിരെ കോഹ്ലി ടെസ്റ്റ് കളിച്ചിട്ടില്ല). ഒരു സീസണില്‍ സ്വന്തം നാട്ടില്‍ ഏറ്റവും കൂടുതല്‍ റണ്‍സ് നേടുന്ന താരമായും കോഹ്‌ലി മാറി. 2004-05 സീസണില്‍ 1105 റണ്‍െസടുത്ത വീരേന്ദര്‍ സെവാഗിന്റെ റെക്കോര്‍ഡാണ് മറികടന്നത്.

കോഹ്ലിയുടേയും മുരളി വിജയ്, തേജേശ്വര്‍ പൂജാര തുടങ്ങിയവരുടെയും ബാറ്റിങ് മികവില്‍ ബംഗ്ലദേശിനെതിരെ ഇന്ത്യ ശക്തമായ നിലയില്‍ ഡിക്ലയര്‍ ചെയ്തു. 687/ 6 എന്ന നിലയില്‍ ഇന്ത്യ ഡിക്ലയര്‍ ചെയ്യാന്‍ തീരുമാനിക്കുകയായിരുന്നു. കരിയറിലെ നാലാം ഇരട്ടശതകം കുറിച്ച കോഹ്‌ലി, 204 റണ്‍സെടുത്ത് പുറത്തായി. 82 റണ്‍സെടുത്ത അജിങ്ക്യ രഹാനെയുടെ വിക്കറ്റാണ്
ഇന്ന് ഇന്ത്യയ്ക്ക് ആദ്യം നഷ്ടമായത്.

നാലാം വിക്കറ്റില്‍ അജിങ്ക്യ രഹാനെയ്‌ക്കൊപ്പം 222 റണ്‍സ് കൂട്ടിച്ചേര്‍ക്കാനും കോഹ്‌ലിക്കായി. ടെസ്റ്റില്‍ ഇരുവരുടെയും മൂന്നാം ഇരട്ടസെഞ്ചുറി കൂട്ടുകെട്ടാണിത്. നാലാം വിക്കറ്റില്‍ മൂന്ന് ഇരട്ടസെഞ്ചുറി കൂട്ടുകെട്ട് തീര്‍ത്തിട്ടുള്ള സച്ചിന്‍ തെന്‍ഡുല്‍ക്കര്‍-സൗരവ് ഗാംഗുലി സഖ്യത്തിനു ശേഷം ഈ നേട്ടത്തിലേക്കെത്തുന്ന ആദ്യ ഇന്ത്യന്‍ സഖ്യവുമായി ഇവര്‍.

record for messi
Posted by
06 February

ഫ്രീകിക്കില്‍ അത്ഭുത ഗോളുമായി വീണ്ടും മെസ്സി: റെക്കോര്‍ഡ് കടന്ന് സൂപ്പര്‍ താരം

ബാര്‍സിലോന: ബാര്‍സ ജഴ്‌സിയില്‍ മനോഹരമായ ഫ്രീകിക്കിലൂടെ മറ്റൊരു റെക്കോര്‍ഡും കടന്നു മെസ്സി താരമാകുന്നു. ക്ലബിനു വേണ്ടി ഏറ്റവും കൂടുതല്‍ ഫ്രീകിക്ക് ഗോളുകള്‍. എല്ലാ ചാംപ്യന്‍ഷിപ്പുകളിലുമായി മെസ്സിയുടെ 27ാം ഫ്രീകിക്ക് ഗോളായിരുന്നു ഇത്. ബാഴ്‌സലോണയ്ക്ക് വേണ്ടി ഫ്രീകിക്കുകളിലൂടെ ഏറ്റവും ഗോള്‍ നേടുന്ന കളിക്കാരന്‍ എന്ന റെക്കോര്‍ഡ് ആണ് ഇന്നലെ മെസ്സി സ്വന്തം പേരില്‍ കുറിച്ചത്. നിലവില്‍ എവര്‍ട്ടന്‍ മാനേജര്‍ ആയ റൊണാള്‍ഡ് ക്യുമാന്റെ 26 ഗോളുകള്‍ എന്ന റെക്കോര്‍ഡാണ് പഴങ്കഥയായത്.

പാകോ അല്‍കാസറിന്റെയും അലക്‌സ് വിദാലിന്റെയും ഗോളുകള്‍കൂടിയായതോടെ ബാര്‍സ അത്‌ലറ്റിക് ബില്‍ബാവോയെ 30നു തകര്‍ത്തുവിട്ടു. ജയത്തോടെ പോയിന്റ് പട്ടികയില്‍ റയലിന് ഒരു പോയിന്റ് മാത്രം പിന്നില്‍ രണ്ടാമതെത്തി.

ഹാഫ്‌ടൈമിനു മുന്‍പുതന്നെ മെസ്സി റെക്കോര്‍ഡ് ഗോള്‍ കുറിച്ചു. സ്റ്റേഡിയത്തിലെ മോശം കാലാവസ്ഥമൂലം റയല്‍സെല്‍റ്റ വിഗോ മത്സരം മാറ്റിവച്ചതിനാല്‍ പോയിന്റ് നില തല്‍ക്കാലം ഇങ്ങനെ തുടരും. റയലിനു രണ്ടു മത്സരങ്ങള്‍ ബാക്കിയുണ്ടെന്നു മാത്രം. ഫെര്‍ണാണ്ടോ ടോറസിന്റെ രണ്ടു ഗോളില്‍ ലെഗാനെസിനെ 20നു തോല്‍പിച്ച അത്‌ലറ്റിക്കോ മഡ്രിഡ് നാലാം സ്ഥാനത്തു തുടരുന്നു.

fifa ranking; indian team rank  hike
Posted by
13 January

ഫിഫ റാങ്കിംഗ്: ഇന്ത്യന്‍ ഫൂട്‌ബോള്‍ ടീമിന് മികച്ച മുന്നേറ്റം

സൂറിച്ച് : ഫിഫ റാങ്കിംഗില്‍ ഇന്ത്യന്‍ ഫൂട്‌ബോള്‍ ടീമിന് മികച്ച മുന്നേറ്റം. ഒരു ദശാബ്ദത്തിന് ശേഷമാണ് ഇന്ത്യന്‍ ഫൂട്‌ബോള്‍ ടീം ഫിഫ റാങ്കിംഗില്‍ മികച്ച നിലയിലെത്തുന്നത്. ഫിഫ ഏറ്റവും ഒടുവില്‍ പുറത്ത് വിട്ട കണക്ക് പ്രകാരം 42 റാങ്കുകള്‍ മുന്നേറി 129-ാം സ്ഥാനത്താണ് ഇന്ത്യ. കഴിഞ്ഞ രണ്ട് വര്‍ഷത്തിനിടെയാണ് ടീമിന്റെ ഈ മുന്നേറ്റം. 2005 ന് ശേഷം ഇതാദ്യമായാണ് രാജ്യം ഫിഫ റാങ്കിംഗില്‍ ഇത്രയും മുന്നില്‍ എത്തുന്നത്.

2016ല്‍ മത്സരിച്ച 11 മത്സരങ്ങളില്‍ ഒമ്പതിലും ഇന്ത്യന്‍ ടീം വിജയിച്ചിരുന്നു, ഇന്ത്യന്‍ ടീം പരിശീലകനായി സ്റ്റീഫന്‍ കോണ്‍സ്റ്റന്റൈന്‍ രണ്ടാമതും വന്ന ശേഷമാണ് ഇന്ത്യന്‍ ടീം മികച്ച മുന്നേറ്റം നടത്തിയത്. കോണ്‍സ്റ്റന്റൈന്‍ 2015 ല്‍ സ്ഥാനമേറ്റെടുക്കുമ്പോള്‍ റാങ്കിംഗില്‍ 173-ാം സ്ഥാനത്തായിരുന്നു ഇന്ത്യ. നേരത്തെ 2002-2005 സീസണിലും കോണ്‍സ്റ്റന്റൈന്‍ ഇന്ത്യന്‍ ടീമിനെ പരിശീലിപ്പിച്ചിരുന്നു. പുതിയ റാങ്കിംഗില്‍ അര്‍ജന്റീനയാണ് ഒന്നാം സ്ഥാനത്ത്. ബ്രസീല്‍ രണ്ടാമതും, ജര്‍മ്മനി മൂന്നാം സ്ഥാനത്തുമാണ്.

English premier league: Liverpool, United and Chelsea are won
Posted by
01 January

ഇംഗ്ലീഷ് പ്രീമിയര്‍ ലീഗ്: പുതുവത്സരത്തില്‍ വമ്പന്മാര്‍ക്ക് വിജയം; ചെല്‍സിയും ലിവര്‍പൂളും മാഞ്ചസ്റ്റര്‍ യുണൈറ്റഡും എതിരാളികളെ തകര്‍ത്തു

ലണ്ടന്‍: പുതുവത്സര സമ്മാനമായി ആരാധകര്‍ക്ക് വിജയം സമ്മാനിച്ച് ഇംഗ്ലീഷ് പ്രീമിയര്‍ ലീഗിലെ കരുത്തര്‍. ചെല്‍സിക്കും ലിവര്‍പൂളിനും മാഞ്ചസ്റ്റര്‍ യുണൈറ്റഡിനും ജയം. ക്ലാസിക്ക് പോരാട്ടമായ ലിവര്‍പൂള്‍-മാഞ്ചസ്റ്റര്‍ സിറ്റി മത്സരത്തില്‍ ലിവര്‍പൂള്‍ ഏകപക്ഷീയമായ ഒരുഗോളിന് വിജയിച്ചു. ജോര്‍ജിനോ വിനാല്‍ഡമാണ് നിര്‍ണായക മല്‍സരത്തില്‍ ലിവര്‍പൂളിന്റെ രക്ഷകനായത്

ചെല്‍സി സ്റ്റോക്ക് സിറ്റിയെ രണ്ടിനെതിരെ നാലുഗോളിന് തകര്‍ത്ത് ലീഗിലെ ഒന്നാം സ്ഥാനം ഭദ്രമാക്കി. സ്വന്തം തട്ടകത്തില്‍ നടന്ന മല്‍സരത്തില് വില്യന്‍ ചെല്‍സിക്കായി ഇരട്ടഗോളടിച്ചു. ഡീഗോ കോസ്റ്റ, ഗാരി കാഹില്‍ എന്നിവരാണ് മറ്റു സ്‌കോറര്‍മാര്‍.

മാഞ്ചസ്റ്റര്‍ യുണൈറ്റഡ് ഒന്നിനെതിരെ രണ്ടു ഗോളുകള്‍ക്ക് മിഡില്‍സ് ബ്രോയെ തോല്‍പിച്ചു. രണ്ടുഗോളുകള്‍ക്ക് പിന്നിട്ട നിന്ന ശേഷമായിരുന്നു യുണൈറ്റഡിന്റെ തിരിച്ചുവരവ്.

ck vineeth says football other sports should be the energy of youth
Posted by
28 December

ഫുട്‌ബോള്‍ മാത്രമാണ് തന്റെ ലഹരി; യുവജനത ഫുട്‌ബോള്‍ പോലുള്ള കായിക വിനോദങ്ങളിലാണ് ലഹരി കണ്ടത്തേണ്ടത് കഞ്ചാവിനും മയക്കു മരുന്നിലുമല്ല: സികെ വിനീത്

കോഴിക്കോട്: ഒളിമ്പ്യന്‍ റഹ്മാന്റെ പേരില്‍ ഏര്‍പ്പെടുത്തിയ അഞ്ചാമത് ഒളിമ്പ്യന്‍ റഹ്മാന്‍ അവാര്‍ഡ് സികെ വിനീതീന് സമ്മാനിച്ചു. ഒളിമ്പ്യന്‍ റഹ്മാന്റെ പതിനാലാം ചരമവാര്‍ഷികത്തിന്റെ ഭാഗമായി കോഴിക്കോട് വികെ കൃഷ്ണമേനോന്‍ ഇന്‍ഡോര്‍ സ്‌റ്റേഡിയത്തില്‍ നടന്ന ചടങ്ങില്‍ മേയര്‍ തോട്ടത്തില്‍ രവീന്ദ്രന്‍ സികെ വിനീതിന് പുരസ്‌കാരം സമ്മാനിച്ചു.

ഫുട്‌ബോള്‍ മാത്രമാണ് തന്റെ ലഹരി. ആ ലഹരിയാണ് എന്നെ ഇവിടെ വരെ എത്തിച്ചത്. കഞ്ചാവിനും മയക്കു മരുന്നിനും അടിമപ്പെടുന്ന യുവജനത ഫുട്‌ബോള്‍ പോലുള്ള കായിക വിനോദങ്ങളിലാണ് ലഹരി കണ്ടത്തേണ്ടത്. അതാണ് ആരോഗ്യത്തിനും സമൂഹത്തിനും നല്ലതെന്നും വിനീത് പറഞ്ഞു. ഫുട്‌ബോള്‍ കളിച്ച് ജയവും തോല്‍വിയുമൊക്കെ അനുഭവിച്ചാല്‍ മറ്റ് ലഹരികള്‍ തേടിപ്പോവില്ലെന്നും സികെ വിനീത് വ്യക്തമാക്കി.

ഐഎസ്എല്ലാണ് തന്നെ വലിയ താരമാക്കിയത്. ടൂര്‍ണമെന്റിലൂടെ ശ്രദ്ധിക്കപ്പെട്ടതില്‍ സന്തോഷമുണ്ട്. എന്നാല്‍ കിരീടം നേടാന്‍ കഴിയിഞ്ഞില്ല എന്ന ദു:ഖം അവശേഷിക്കുന്നുണ്ട്. നിലവില്‍ ടീമുമായുള്ള കരാര്‍ അവസാനിച്ചിരിക്കുകയാണ്. അടുത്ത വര്‍ഷം താന്‍ കേരള ബ്ലാസ്റ്റേഴ്‌സില്‍ ഉണ്ടെങ്കില്‍ ആരാധകര്‍ക്ക് വേണ്ടി കിരീടം നേടുമെന്നും താരം കൂട്ടിച്ചേര്‍ത്തു

Kaloor Stadium will  host u-17 world cup
Posted by
22 December

കൊച്ചിക്ക് ആശ്വാസം; സെപ്പിയുടെ മനസ്സലിഞ്ഞു;ലോകകപ്പിന് കലൂര്‍ സ്റ്റേഡിയം വേദിയാകും

കൊച്ചി: കൈയ്യെത്തും ദൂരത്ത് എത്തിയ അണ്ടര്‍-17 ഫുട്‌ബോള്‍ ലോകക്കപ്പിന്റെ വേദിയെന്ന സ്വപ്നം നഷ്ടമാവുമോ എന്ന ആശങ്കയിലായിരുന്നു കൊച്ചി. എന്നാല്‍ ഇപ്പോള്‍ പുറത്തു വന്നിരിക്കുന്നത് ആശ്വാസത്തിന്റെ വാര്‍ത്തകളാണ്. അണ്ടര്‍-17 മത്സരങ്ങള്‍ കലൂര്‍ ജവഹര്‍ലാല്‍ നെഹ്റു സ്റ്റേഡിയത്തില്‍ തന്നെ നടക്കും.

ഐഎസ്എല്‍ കേരള ബ്ലാസ്റ്റേഴ്സ്-നോര്‍ത്ത് ഈസ്റ്റ് മത്സരശേഷമുണ്ടായ അനിഷ്ട സംഭവങ്ങളെ തുടര്‍ന്ന് ലോകകപ്പ് മത്സരവേദി കൊച്ചിയില്‍ നിന്നും മാറ്റുമെന്ന് വാര്‍ത്തകളുണ്ടായിരുന്നു. നേരത്തെ സ്റ്റേഡിയത്തിലെ സുരക്ഷയെക്കുറിച്ച് ആശങ്ക പ്രകടിപ്പിച്ച ഫിഫ ടൂര്‍ണമന്റ് ഡയറക്ടര്‍ ഹാവിയര്‍ സെപ്പി ഇപ്പോള്‍ കൊച്ചിയിലെ സ്റ്റേഡിയം ടൂര്‍ണ്ണമെന്റിന് യോഗ്യമാണെന്ന് വ്യക്തമാക്കിയതോടെയാണ് അഭ്യൂഹങ്ങള്‍ക്കും ആശങ്കകള്‍ക്കും അവസാനമായത്.

നോര്‍ത്ത് ഈസ്റ്റുമായുള്ള മത്സരശേഷം മൈതാനത്തേക്കിറങ്ങിയ ആരാധകനെ സുരക്ഷാ ഉദ്യോഗസ്ഥര്‍ മര്‍ദ്ദിച്ചിരുന്നു. ഇതേതുടര്‍ന്ന് പ്രകോപിതരായ കാണികള്‍ ഗ്രൗണ്ടിലേക്ക് കസേരകളും കുപ്പികളും വലിച്ചെറിയുകയായിരുന്നു. സംഭവത്തോട് രൂക്ഷമായ ഭാഷയിലായിരുന്നു സെപ്പി അന്ന് പ്രതികരിച്ചത്. സ്റ്റേഡിയത്തില്‍ മതിയായ സുരക്ഷയുണ്ടോ എന്ന കാര്യത്തില്‍ സംശയമുണ്ടെന്നും താരങ്ങളുടെ ജീവന്‍ ആപത്തിലാക്കാന്‍ കഴിയില്ലെന്നുമായിരുന്നു സെപ്പി പറഞ്ഞത്. അതിനാല്‍ അണ്ടര്‍-17 ലോകകപ്പിന്റെ മുഖ്യ വേദികളിലൊന്നായ കൊച്ചിയെ പട്ടികയില്‍ നിന്നും മാറ്റേണ്ടിവരുമെന്നും അന്ന് അദ്ദേഹം പറഞ്ഞിരുന്നു.

എന്നാല്‍ ഐഎസ്എല്ലിന്റെ ഫൈനലാണ് കൊച്ചിയ്ക്ക് തുണയായത്. സ്റ്റേഡിയം നിറഞ്ഞ് കവിഞ്ഞ മഞ്ഞക്കടല്‍ മത്സരം വീക്ഷിക്കാനെത്തിയത് സെപ്പിയുടെ മനസിനെ സ്വാധീനിച്ചു. സ്വന്തം ടീം തോറ്റിട്ടും നിയന്ത്രണം വിടാത്ത കാണികള്‍ വലിയ ആശ്വാസമാണ് നല്‍കിയതെന്നും. കാര്യമായ പ്രശ്നങ്ങളൊന്നുമില്ലാതെ കളിനടന്നു എന്നത് ശുഭകരമാണെന്നും സെപ്പി പറയുന്നു. ലോകക്കപ്പിലെ ഏത് മത്സരവും നടത്താന്‍ കലൂര്‍ സ്റ്റേഡിയം സജ്ജമാണെന്നും ഫൈനല്‍ മത്സരത്തിന് ശേഷം തന്റെ അഭിപ്രായം താന്‍ പിന്‍വലിക്കുന്നതായും സെപ്പി പറഞ്ഞു.

എന്നാല്‍ ഏതൊക്കെ മത്സരങ്ങളായിരിക്കും കൊച്ചിയില്‍ നടക്കുക എന്ന കാര്യത്തില്‍ വ്യക്തത ഇനിയും കൈവരാനുണ്ട്. പ്രാഥമിക റൗണ്ട്, നോക്കൗട്ട് മത്സരങ്ങള്‍ എന്നിവ നടക്കുമെന്നാണ് സൂചന. സെമി ഫൈനല്‍, ഫൈനല്‍ മത്സരങ്ങളുടെ കാര്യത്തില്‍ തീരുമാനമായിട്ടില്ല. അടുത്ത വര്‍ഷം ഒക്ടോബര്‍ ആറു മുതല്‍ 28 വരെയാണ് കൊച്ചി ഉള്‍പ്പടെയുള്ള ആറ് നഗരങ്ങളിലായി അണ്ടര്‍-17 ലോകക്കപ്പ് നടക്കുക. ഇന്ത്യന്‍ ഫുട്ബോളിന് പുതുജീവന്‍ നല്‍കുന്നതില്‍ ലോകകപ്പിന് വലിയ സ്വാധീനം ഉണ്ടാകുമെന്നാണ് പ്രതീക്ഷ.