Ricky Ponting’s IPL Eleven- Dhoni is captain
Posted by
20 May

റിക്കി പോണ്ടിങിന്റെ ടീമില്‍ ധോണി ക്യാപ്റ്റന്‍

മെല്‍ബണ്‍: റിക്കിയുടെ ഐപിഎല്‍ ടീമില്‍ ക്യാപ്റ്റന്‍ ധോണി. ഓസ്‌ട്രേലിയയുടെ മുന്‍നായകന്‍ റിക്കി പോണ്ടിങ് തയാറാക്കിയ ഐപിഎല്‍ ഇലവന്റെ നായകന്‍ മുന്‍ ഇന്ത്യന്‍ നായകന്‍ മഹേന്ദ്ര സിങ് ധോണി. ഏഴ് ഇന്ത്യന്‍ താരങ്ങളാണു പോണ്ടിങ്ങിന്റെ പട്ടികയില്‍ ഇടംപിടിച്ചത്. വിദേശതാരങ്ങള്‍ നാലു പേര്‍ മാത്രം.

വിരാട് കോഹ്ലി, രോഹിത് ശര്‍മ, സുരേഷ് റെയ്‌ന, ഹര്‍ഭജന്‍ സിങ്, ആശിഷ് നെഹ്‌റ, അമിത് മിശ്ര എന്നിവരാണു ടീമിലെത്തിയ മറ്റ് ഇന്ത്യന്‍ താരങ്ങള്‍. ടീമിന്റെ ഓപ്പണര്‍മാര്‍ രണ്ടു വിദേശ താരങ്ങളാണ്. വെടിക്കെട്ടു ബാറ്റിങ്ങിന്റെ ആശാന്മാരായ ക്രിസ് ഗെയ്ലും ഡേവിഡ് വാര്‍ണറും. ഓള്‍ റൗണ്ടര്‍ ഡ്വെയ്ന്‍ ബ്രാവോയും പേസ് ബോളര്‍ ലസിത് മലിംഗയുമാണു മറ്റു രണ്ടു വിദേശ താരങ്ങള്‍.

ഐപിഎല്ലില്‍ കളിക്കുകയും മുംബൈ ഇന്ത്യന്‍സിനെ പരിശീലിപ്പിക്കുകയും ചെയ്ത പോണ്ടിങ് ലെഗ്‌സ്പിന്നര്‍ അമിത് മിശ്രയെ ടീമിലെടുത്തത് അദ്ഭുതമായി. എല്ലാവരെയും ഒന്നു ഞെട്ടിക്കാന്‍ തന്നെയാണു മിശ്രയെ ടീമിലെടുത്തതെന്നു പോണ്ടിങ് പറയുന്നു.

‘ധോണി ടീമിലെ ആറാം നമ്പര്‍ ബാറ്റ്‌സ്മാന്‍ ആയിരിക്കും. ടീമിന്റെ നായകനുമാണ്. അതുല്യമായ പരിചയസമ്പത്താണു ധോണിയുടെ മുതല്‍ക്കൂട്ട്. ധോണി ക്രീസിലുള്ളപ്പോള്‍ ഏതു സാഹചര്യത്തിലും വിജയപ്രതീക്ഷയുണ്ട്. ധോണിയുടെ അത്തരം പ്രകടനങ്ങള്‍ ഒട്ടേറെ കണ്ടിട്ടുള്ളതുകൊണ്ടാണ് ആറാം നമ്പര്‍ ബാറ്റ്‌സ്മാനും നായകനുമായി ധോണിയെ തീരുമാനിച്ചത്’- പോണ്ടിങ് പറഞ്ഞു.

IPL 2017: Kolkata Knight Riders beat Sunrisers Hyderabad by seven wickets (D/L) to enter Qualifier 2
Posted by
18 May

ഐപിഎല്‍ എലിമിനേറ്റര്‍ മല്‍സരത്തില്‍ കൊല്‍ക്കത്ത നൈറ്റ് റൈഡേഴ്‌സിന് ജയം

ബെംഗളൂരു: സണ്‍റൈസേഴ്‌സ് ഹൈദരാബാദിനെ ഐപിഎല്‍ എലിമിനേറ്റര്‍ മല്‍സരത്തില്‍ കൊല്‍ക്കത്ത നൈറ്റ് റൈഡേഴ്‌സ് അട്ടിമറിച്ചു. മഴ അലങ്കോലമാക്കിയ മല്‍സരത്തില്‍ ഡക്ക്‌വര്‍ത്ത് ലുയീസ് നിയമ പ്രകാരം പുനര്‍ നിര്‍ണയിക്കപ്പെട്ട ലക്ഷ്യം മറികടന്നാണ് കൊല്‍ക്കത്ത ഏഴ് വിക്കറ്റ് ജയം സ്വന്തമാക്കിയത്.

നേരത്തെ ടോസ് നേടിയ കൊല്‍ക്കത്ത ഹൈദരാബാദിനെ ബാറ്റിങ്ങിനയക്കുകയായിരുന്നു. എന്നാല്‍ എലിമിനെറ്ററില്‍ മികച്ച പ്രകടനം കാഴ്ച വെക്കാന്‍ ഹൈദരാബാദിന് കഴിഞ്ഞില്ല. ഏഴ് വിക്കറ്റ് നഷ്ടത്തില്‍ 128 റണ്‍സ് മാത്രമായിരുന്ന ഹൈദരാബാദിന്റെ സമ്പാദ്യം.
ഡേവിഡ് വാര്‍ണര്‍(37) ഒഴികെ മറ്റാര്‍ക്കും ഹൈദരാബാദ് നിരയില്‍ മികച്ച പ്രകടനം കാഴ്ച വെക്കാന്‍ സാധിച്ചിരുന്നില്ല. കൗണ്ടര്‍ ലീ കൊല്‍ക്കത്തക്കായി മൂന്ന് വിക്കറ്റുകള്‍ വീഴ്ത്തി.

മഴമൂലം ആറ് ഓവറാക്കി ചുരുക്കിയ മല്‍സരത്തില്‍ കൊല്‍ക്കത്ത വിജയലക്ഷ്യമായ 48 റണ്‍സ് നാല് പന്ത്?ബാക്കി നില്‍ക്കെ മൂന്ന് വിക്കറ്റ് നഷ്ടത്തില്‍ മറികടന്നു. 32 റണ്‍സോടെ ഗൗതം ഗംഭീറാണ് കൊല്‍ക്കത്തയെ മുന്നില്‍ നിന്ന് നയിച്ചത്. ക്വാളിഫെയര്‍ മല്‍സരത്തില്‍ പരാജയപ്പെട്ട മുംബൈയാണ് ഇനി കൊല്‍ക്കത്തയുടെ എതിരാളികള്‍. മുംബൈയെ കൂടി തോല്‍പ്പിച്ചാല്‍ കൊല്‍ക്കത്തക്ക് ഫൈനലിലേക്ക് മുന്നേറാം.

Pune smashed Mumbai and enter to the final
Posted by
17 May

മുംബൈ ബാറ്റിങ് തകര്‍ന്നു; പൂനെ ഫൈനലില്‍

വാംഖഡെ: മുംബൈ ഇന്ത്യന്‍സിന്റെ ബാറ്റിങിന്റെ തകര്‍ച്ച മുതലെടുത്ത് റൈസിങ് പൂനെ സൂപ്പര്‍ജയന്റ്‌സ് ഐപിഎല്‍ പത്താം സീസണിലെ ആദ്യ ഫൈനലിസ്റ്റായി. ആദ്യ ക്വാളിഫയറില്‍ മുംബൈയെ 20 റണ്‍സിന് തകര്‍ത്താണ് റൈസിങ് പൂനെ സൂപ്പര്‍ജയന്റ്‌സ് കലാശക്കളിക്ക് അര്‍ഹത നേടിയത്. പൂനെ ഉയര്‍ത്തിയ 163 റണ്‍സ് വിജയലക്ഷ്യം പിന്തുടര്‍ന്ന മുംബൈയ്ക്ക് നിശ്ചിത ഓവറില്‍ ഒന്‍പത് വിക്കറ്റിന് 142 റണ്‍സ് നേടാനേ സാധിച്ചുള്ളൂ.

സ്‌കോര്‍:പൂനെ നാലിന് 162, മുംബൈ ഒന്‍പതിന് 142.

നിര്‍ണായകമായ മൂന്ന് വിക്കറ്റുകള്‍ വീഴ്ത്തിയ സ്പിന്നര്‍ വാഷിങ്ടണ്‍ സുന്ദറാണ് മുംബൈ ബാറ്റിംഗ് നിരയെ തകര്‍ത്തത്. ടൂര്‍ണമെന്റില്‍ ഇത് മൂന്നാം തവണയാണ് മുംബൈ പൂനെയോട് പരാജയപ്പെടുന്നത്. നേരത്തെ ഗ്രൂപ്പ് ഘട്ടത്തിലെ രണ്ട് മത്സരങ്ങളിലും മുംബൈ പൂനെയോട് തോറ്റിരുന്നു.

അര്‍ദ്ധ സെഞ്ച്വറി നേടിയ ഓപ്പണര്‍ പാര്‍ത്ഥീവ് പട്ടേലിന് മാത്രമാണ് മുംബൈ നിരയില്‍ പിടിച്ചുനില്‍ക്കാനായത്. 40 പന്തില്‍ മൂന്ന് വീതം ഫോറുകളും സിക്സറുകളും പറത്തിയ പട്ടേല്‍ 52 റണ്‍സെടുത്തു. മികച്ച തുടക്കം ലഭിച്ച ശേഷം വിക്കറ്റുകള്‍ വലിച്ചെറിഞ്ഞ മുംബൈ തോല്‍വി ഇരന്ന് വാങ്ങുകയായിരുന്നു. 4.3 ഓവറില്‍ 35 റണ്‍സ് ചേര്‍ത്തശേഷമാണ് ആദ്യ വിക്കറ്റ് നഷ്ടമായത്. സിമ്മണ്‍സ് (5) തുടങ്ങിവെച്ച മാര്‍ച്ച് പാസ്റ്റ് പിന്നാലെ വന്ന താരങ്ങളും ആവര്‍ത്തിച്ചു. ക്യാപ്റ്റന്‍ രോഹിത് ശര്‍മ (1), കഴിഞ്ഞ മത്സരത്തിലെ ഹീറോ അമ്പാട്ടി റായിഡു (0), വെടിക്കെട്ട് വീരന്‍ പൊള്ളാര്‍ഡ് (7), നിര്‍ണായക അവസരങ്ങളില്‍ രക്ഷകരാകാറുള്ള ഹാര്‍ദ്ദിക് പാണ്ഡ്യെ (14), കൃണാല്‍ പാണ്ഡ്യെ (15) എന്നിവര്‍ ഇന്ന് തീര്‍ത്തും നിരാശപ്പെടുത്തി.

ആദ്യം ബാറ്റ് ചെയ്ത പൂനെ തുടക്കത്തിലെ തകര്‍ച്ചയ്ക്ക് ശേഷം തിരിച്ചടിച്ചാണ് മികച്ച സ്‌കോര്‍ നേടിയത്. രണ്ടോവറില്‍ ഒമ്പത് റണ്‍സിന് രണ്ട് വിക്കറ്റ് നഷ്ടമായ പൂനെ മൂന്നും നാലും വിക്കറ്റുകളിലെ മികച്ച കൂട്ടുകെട്ടുകളിലൂടെ മുന്നേറുകയായിരുന്നു. ഓപ്പണര്‍ രാഹുല്‍ ത്രിപാദി (0), ക്യാപ്റ്റന്‍ സ്മിത്ത് (1) എന്നിവര്‍ തുടക്കത്തിലെ പുറത്തായപ്പോള്‍ ബാറ്റിംഗ് തകര്‍ച്ചയായിരുന്നു പൂനെയെ കാത്തിരുന്നത്. എന്നാല്‍ ഒരറ്റത്ത് ഉറച്ച് നിന്ന രഹാനെ (56) മനോജ് തിവാരിക്കൊപ്പം (58) മൂന്നാം വിക്കറ്റില്‍ ടീമിന് ശക്തമായ അടിത്തറ സമ്മാനിച്ചു.അവസാന ഏഴ് ഓവറില്‍ 73 റണ്‍സാണ് പൂനെ അടിച്ചെടുത്തത്. ഇതിന് ധോണിയുടെ ഇന്നിംഗ്സിനോട് നന്ദി പറയണം. 26 പന്തില്‍ 40 റണ്‍സെടുത്ത ധോണിയാണ് സ്‌കോര്‍ 162 ലെത്തിച്ചത്. അഞ്ച് സിക്സറുകള്‍ ഉള്‍പ്പെട്ടതായിരുന്നു ധോണിയുടെ ഇന്നിംഗ്സ്.

തോറ്റെങ്കിലും മുംബൈയ്ക്ക് ഇനിയും ഫൈനല്‍ പ്രതീക്ഷകള്‍ അവശേഷിക്കുന്നുണ്ട്. നാളെ നടക്കുന്ന ആദ്യ എലിമിനേറ്ററിലെ വിജയികളുമായി ഏറ്റുമുട്ടി വിജയിക്കാന്‍ കഴിഞ്ഞാല്‍ കലാശപ്പോരിന് അര്‍ഹത നേടാന്‍ മുംബൈയ്ക്ക് സാധിക്കും. കൊല്‍ക്കത്തയും ഹൈദരാബാദും തമ്മിലാണ് ആദ്യ എലിമിനേറ്റര്‍.

Deepti Sharma and Poonam Raut share first 300-run stand in women’s ODI cricket
Posted by
16 May

ഏകദിനത്തില്‍ ആദ്യമായി 300 റണ്‍സ് മറികടന്ന് ഇന്ത്യന്‍ വനിത ക്രിക്കറ്റ് ടീം

ന്യൂഡല്‍ഹി: ആദ്യമായി ഏകദിനത്തില്‍ 300 റണ്‍സ് മറികടന്ന് ഇന്ത്യന്‍ വനിത ക്രിക്കറ്റ് ടീം. അയര്‍ലന്‍ഡിനെതിരെ മൂന്ന് വിക്കറ്റ് നഷ്ടത്തില്‍ 358 റണ്‍സാണ് ഇന്ത്യന്‍ വനിതകള്‍ അടിച്ച് കൂട്ടിയത്. ചതുര്‍രാഷ്ട്ര ടൂര്‍ണ്ണമന്റിലായിരുന്നു ഇത്. ഒന്നാം വിക്കറ്റിന് ദീപ്തി ശര്‍മ്മയും പുനം റൌത്തും ചേര്‍ന്ന് 320 റണ്‍സ് വാരിക്കൂട്ടി. ദീപ്തി ശര്‍മ്മ 188 റണ്‍സും റൌത്ത് 109 റണ്‍സുമെടുത്തു.

ആദ്യമായാണ് വനിതാ ഏകദിനത്തില്‍ 300 റണ്‍സിലധികം ഒരു കൂട്ടുകെട്ട് നേടുന്നത്. ശിഖ പാണ്ഡേ പതിനാല് പന്തില്‍ 27 റണ്‍സ് നേടി. മറുപടി ബാറ്റിംഗിനിറങ്ങിയ ഐറിഷ് വനിതകള്‍ 109 റണ്‍സിന് എല്ലാവരും പുറത്തായി. ഇന്ത്യക്ക് 249 റണ്‍സ് വിജയം. രാജേശ്വരി ഗെയ്ക് വാദ് നാല് വിക്കറ്റും ശിഖ പാണ്ഡേ മൂന്ന് വിക്കറ്റും നേടി. ഇന്ത്യന്‍ വനിതകള്‍ ഇതുവരെ ടൂര്‍ണ്ണമന്റില്‍ കളിച്ച നാല് മല്‍സരങ്ങളും വിജയിച്ചു.

‘Foreign players did not take responsibility’ – virender Sehwag
Posted by
15 May

വിദേശ താരങ്ങളുടെ ഉത്തരവാദിത്വം ഇല്ലായ്മയാണ് കിങ്‌സ് ഇലവന്‍ പഞ്ചാബിനെ കനത്ത പരാജയത്തിലേക്ക് തള്ളിയിട്ടതെന്ന് വീരേന്ദര്‍ സെവാഗ്

ന്യൂഡല്‍ഹി: റൈസിങ് പൂന്നെ ജയന്റസിനോട് കനത്ത തോല്‍വി ഏറ്റുവാങ്ങിയതിന് ഐപിഎല്ലിലെ നിര്‍ണായക മത്സരത്തില്‍ പിന്നാലെ ടീമങ്ങള്‍ക്കെതിരെ രൂക്ഷവിമര്‍ശനവുമായി വീരേന്ദര്‍ സെവാഗ് . ഐപിഎല്ലില്‍ കിങ്‌സ് ഇലവന്‍ പഞ്ചാബ് ടീമിന്റെ ഉപദേഷ്ടാവ് കൂടിയാണ് അദ്ദേഹം. നിര്‍ണായക മത്സരത്തില്‍ കനത്ത തോല്‍വിയാണ് ടീമിന് നേരിടേണ്ടി വന്നത്. ഇതു തന്നെയാണ് സെവാഗിനെ ചൊടിപ്പിച്ചതും. ഒമ്പതു വിക്കറ്റിന്റെ നാണംകെട്ട തോല്‍വിയോടെയായിരുന്നു പഞ്ചാബ് പുറത്തുപ്പോയത്.

വിദേശ താരങ്ങള്‍ക്കെതിരെയാണ് സെവാഗ് ശക്തമായ ഭാഷയില്‍ വിമര്‍ശനം ഉന്നയിച്ചത്. വിദേശ താരങ്ങളുടെ ഉത്തരവാദിത്വമില്ലായ്മയാണ് ടീമിനെ കനത്ത പരാജയത്തിലേക്ക് തള്ളിയിട്ടതെന്നും അദ്ദേഹം പറഞ്ഞു. പഞ്ചാബിന്റെ പ്രകടനത്തില്‍ അങ്ങേയറ്റം നിരാശയുണ്ടെന്നും ടീമിലെ ഒരു വിദേശ താരം പോലും ഉത്തരവാദിത്വം ഏറ്റെടുത്തില്ലെന്നും അദ്ദേഹം പറഞ്ഞു. ഏതെങ്കിലുമൊരാള്‍ 12 മുതല്‍ 15 വരെയുള്ള ഓവറുകള്‍ വരെ പിടിച്ചുനിന്നിരുന്നെങ്കില്‍ പ്രതീക്ഷയുണ്ടായിരുന്നെന്നും അദ്ദേഹം പറഞ്ഞു.

IPL Play off match fixture
Posted by
15 May

ഇനിയുളള ദിനങ്ങളില്‍ ഐപിഎല്ലില്‍ 'പ്ലേ ഓണ്‍'

പൂനെ: ഐപിഎല്ലില്‍ പ്ലേഓഫിന് മുന്നോടിയായുള്ള മത്സരത്തില്‍ കിങ്‌സ് ഇലവന്‍ പഞ്ചാബിനെ ഒമ്പതു വിക്കറ്റിന് തോല്‍പിച്ച് റൈസിങ് പൂനെ സൂപ്പര്‍ ജയന്റ്‌സ് രണ്ടാം സ്ഥാനെത്തത്തി. ഇതോടെ പ്ലേഓഫ് പോരാട്ടങ്ങളുടെ ചിത്രം തെളിഞ്ഞിരിക്കുകയാണ്. ക്വാളിഫയര്‍ മത്സരത്തില്‍ ഏറ്റമുട്ടുക ഒന്നാം സ്ഥാനത്തുള്ള മുംബൈ ഇന്ത്യന്‍സും പൂനെയുമായിരിക്കും. അതേസമയം എലിമിനേറ്റര്‍ റൗണ്ടില്‍ മൂന്നാം സ്ഥാനത്തുള്ള സണ്‍റൈസേഴ്‌സ് ഹൈദരാബാദ് നാലാമതുള്ള കൊല്‍ക്കത്ത നൈറ്റ് റൈഡേഴ്‌സുമായി ഏറ്റുമുട്ടും. ക്വാളിഫയര്‍ മത്സരം 16നും എലിമിനേറ്റര്‍ മത്സരം 17നും നടക്കും. ക്വാളിഫയര്‍ മത്സരത്തില്‍ തോല്‍ക്കുന്ന ടീമിന് എലിമിനേറ്റര്‍ മത്സരത്തിലെ വിജയികളോട് വീണ്ടും മത്സരിക്കാം. എലിമിനേറ്റര്‍ പോരാട്ടത്തില്‍ തോല്‍ക്കുന്ന ടീം നേരിട്ട് പുറത്താകും. 21നാണ് ഫൈനല്‍.

അതേസമയം ഓസീസ് നായകന്മാര്‍ നേര്‍ക്കുനേര്‍ വരുമ്പോള്‍ കടുത്ത പോരാട്ടം പ്രതീക്ഷിച്ച് മഹാരാഷ്ട്ര ക്രിക്കറ്റ് അസോസിയേഷന്‍ സ്‌റ്റേഡിയത്തിലെത്തിയ ക്രിക്കറ്റ് പ്രേമികള്‍ക്ക് കാണാനായത് കിങ്‌സ് ഇലവന്‍ പഞ്ചാബിന്റെ ദയാവധമായിരുന്നു. ഗ്ലെന്‍ മാക്‌സ്‌വെല്‍, മാര്‍ട്ടിന്‍ ഗുപ്റ്റില്‍, ഷോണ്‍ മാര്‍ഷ്, ഒയിന്‍ മോര്‍ഗന്‍ തുടങ്ങി വമ്പനടിക്കാര്‍ ഏറെയുള്ള പ്രീതിയുടെ രാജാക്കന്മാര്‍ പൂനെക്കു മുന്നില്‍ 73ന് തകര്‍ന്നടിഞ്ഞു. ഒരു വിക്കറ്റ് മാത്രം നഷ്ടപ്പെട്ട് പൂനെ വിജയലക്ഷ്യം അനായാസം എത്തിപ്പിടിച്ച് പ്ലേ ഓഫ് ടിക്കറ്റുറപ്പിച്ചു. സ്‌കോര്‍- പഞ്ചാബ്: 73 (15.5), പൂനെ: 78/1 (12).

ടോസ് നേടിയ പൂനെ ക്യാപ്റ്റന്‍ സ്റ്റീവ് സ്മിത്ത് എതിരാളികളെ ബാറ്റിങ്ങിനയച്ചു. കൈയ്യടി നല്‍കി ടീം ഉടമ പ്രീതി സിന്റ താരങ്ങളെ ഗ്രൗണ്ടിലേക്ക് ആനയിച്ചെങ്കിലും പിന്നീട് സംഭവിച്ചത് വന്‍ ദുരന്തമായിരുന്നു. പൂനെക്ക് രാഹുല്‍ ത്രിപാഠിയുടെ (28) വിക്കറ്റാണ് നഷ്ടമായത്. അജിന്‍ക്യ രഹാനെ (34), ക്യാപ്റ്റന്‍ സ്റ്റീവ് സ്മിത്ത് (15) എന്നിവര്‍ പുറത്താകാതെ ടീമിനെ വിജയിപ്പിക്കുകയായിരുന്നു.

IPL Betting: Six Arrested In Ghaziabad As Net Widens
Posted by
14 May

ഐപിഎല്‍ വാതുവെയ്പ്; ആറ് പേര്‍ കൂടി അറസ്റ്റില്‍

ഗാസിയാബാദ് : ഇന്ത്യന്‍ പ്രീമിയര്‍ ലീഗ് അഴിമതിയില്‍ നിന്ന് പൂര്‍ണമായും മുക്തമായിട്ടില്ലെന്ന് സൂചനകള്‍ നല്‍കി വാതുവെപ്പുമായി ബന്ധപ്പെട്ട് ആറ് പേര്‍ കൂടി അറസ്റ്റിലായി. ഗാസിയാബാദ് പോലീസാണ് വെള്ളിയാഴ്ച്ച അര്‍ധരാത്രിയോടെ ഇവരെ അറസ്റ്റ് ചെയ്തത്. ഇവരില്‍ നിന്ന് മൊബൈല്‍ ഫോണുകളും 70 ലക്ഷം രൂപയും പൊലീസ് പിടിച്ചെടുത്തിട്ടുണ്ട്.

കാണ്‍പൂരില്‍ നിന്ന് വാതുവെപ്പുമായി ബന്ധപ്പെട്ട് മൂന്ന് പേര്‍ അറസ്റ്റിലായതിന് പിന്നാലെയാണ് പുതിയ സംഭവവികാസങ്ങള്‍. ഡല്‍ഹി ഡെയര്‍ഡെവിള്‍സ്ഗുജറാത്ത് ലയണ്‍സ് മല്‍സരത്തിനിടെ വാതുവെച്ചതിനാണ് മൂന്ന് പേരെ ഉത്തര്‍പ്രദേശ് പൊലീസ് കാണ്‍പൂരില്‍ നിന്ന് അറസ്റ്റ് ചെയ്തത്. വ്യവസായിയ രമേഷ് നയന്‍ ഷാ, രമേഷ് കുമാര്‍, വികാസ് കുമാര്‍ എന്നിവരാണ് അറസ്റ്റിലായത്.

ഇതില്‍ കാണ്‍പൂരിലെ ഗ്രീന്‍പാര്‍ക്ക് സ്‌റ്റേഡിയത്തില്‍ ഹോര്‍ഡിങുകള്‍ വെക്കുന്നതില്‍ കോണ്‍ട്രാക്ട് എടുത്ത വ്യക്തിയാണ് രമേഷ് കുമാര്‍. രമേഷ് ഷായാണ് ഇവര്‍ക്കായി ഹോട്ടലുകളില്‍ റൂമുകള്‍ ബുക്ക് ചെയ്തതെന്നും വ്യക്തമായി. ഗുജറാത്ത് ലയണ്‍സിലെ രണ്ട് താരങ്ങളും കേസുമായി ബന്ധപ്പെട്ട് നിരീക്ഷണത്തിലാണെന്നും യുപി പൊലീസിലെ സീനിയര്‍ സുപ്രണ്ട് അറിയിച്ചു.

kohli new audi cue 7
Posted by
13 May

പുതിയ ഔഡി ക്യൂ 7 സ്വന്തമാക്കി ഇന്ത്യന്‍ ക്രിക്കറ്റ് ടീം നായകന്‍ വിരാട് കോഹ്‌ലി

ന്യൂഡല്‍ഹി: ഇന്ത്യന്‍ ക്രിക്കറ്റ് ടീമിന്റെ നായകന്‍ വിരാട് കോഹ്‌ലി പുതിയ ഔഡി ക്യൂ 7 സ്വന്തമാക്കി.
ഏകദേശം 72 ലക്ഷം മുതല്‍ 80 ലക്ഷം രൂപ വരെയാണ് വാഹനത്തിന്റെ എക്‌സ്‌ഷോറൂം വില. പഴയ മോഡല്‍ ക്യൂ7 നേരത്തെ കോഹ്‌ലിക്ക് സ്വന്തമായുണ്ടായിരുന്നു.

ഒപ്പം സെഡാനായ എ6, സ്‌പോര്‍ട്‌സ് കാറായ ആര്‍8 വി10 പ്ലസ്, ടൊയോട്ട ഫോര്‍ച്യൂണര്‍, റെനോ ഡസ്റ്റര്‍ തുടങ്ങിയ വാഹനങ്ങളും കോഹ്‌ലിയുടെ വാഹനശേഖരത്തിലുണ്ട്. ഔഡി ഇന്ത്യ തന്നെയാണ് ഇന്ത്യന്‍ ക്രിക്കറ്റ് ടീമിന്റെ ക്യാപ്റ്റന്‍ പുതിയ ഔഡി സ്വന്തമാക്കിയ വിവരം ആരാധകരെ അറിയിച്ചത്.

BCCI denies demands of PCB
Posted by
10 May

413 കോടി രൂപ നഷ്ടപരിഹാരം വേണമെന്ന പാകിസ്താന്റെ ആവശ്യം ബിസിസിഐ തള്ളി

മുംബൈ: ഇന്ത്യ കരാര്‍ ലംഘനം നടത്തിയതിന് പാകിസ്താന്‍ ക്രിക്കറ്റ് ബോര്‍ഡ് നഷ്ടപരിഹാരമായി ആവശ്യപ്പെട്ട തുക നല്‍കാനാവില്ലെന്ന് ബിസിസിഐ. പാക് ക്രിക്കറ്റ് ബോര്‍ഡ് ചെയര്‍മാന്‍ ഷഹീരിയര്‍ ഖാന്‍ ആണ് ഇക്കാര്യം അറിയിച്ചത്. ഇരു ബോര്‍ഡുകളും തമ്മിലുള്ള കരാര്‍ ലംഘിച്ചതിന് നഷ്ടപരിഹാരമായി 6.4 മില്യന്‍ ഡോളര്‍ (413 കോടി രൂപ) നല്‍കണമെന്നാവശ്യപ്പെട്ട് പാകിസ്താന്‍ ക്രിക്കറ്റ് ബോര്‍ഡ് ബിസിസിഐക്ക് കഴിഞ്ഞയാഴ്ച നോട്ടീസ് അയച്ചിരുന്നു. ഇതിനുള്ള മറുപടിയാണ് ഇന്ത്യന്‍ ക്രിക്കറ്റ് ബോര്‍ഡ് കഴിഞ്ഞദിവസം നല്‍കിയത്.

ഇരു ബോര്‍ഡുകളും തമ്മിലുള്ള നിയമപരമായ കരാറായി ഇതിനെ പരിഗണിക്കുന്നില്ലെന്നാണ് മറുപടിയില്‍ ഇന്ത്യന്‍ ക്രിക്കറ്റ് ബോര്‍ഡ് പറയുന്നത്. ഇന്ത്യാ-പാക് പരമ്പരക്ക് സര്‍ക്കാറിന്റെ അനുവാദം ആവശ്യമാണെന്നും എന്നാല്‍ തങ്ങള്‍ക്ക് അനുമതി ലഭിക്കുന്നില്ലെന്നും കത്തില്‍ പറയുന്നതായി ഷഹരിയാര്‍ ഖാന്‍ വ്യക്തമാക്കി. പാകിസ്താനിലെ സുരക്ഷ പ്രശ്‌നങ്ങളും ബിസിസിഐ മറുപടിയില്‍ ഉള്‍കൊള്ളിച്ചിട്ടുണ്ട്.

അവര്‍ക്ക് ഒരു കത്ത് കൂടി അയയ്ക്കും, ഞങ്ങള്‍ക്ക് നഷ്ടപരിഹാരം നല്‍കാന്‍ തയ്യാറാകുന്നില്ലെങ്കില്‍ ഐസിസി തര്‍ക്ക പരിഹാര കമ്മിറ്റിയില്‍ പ്രശ്‌നം ഉന്നയിക്കും. ഐസിസിയുടെ കൂടെ അറിവോടെയാണ് കരാര്‍ ഒപ്പുവെച്ചത്-ഷഹരിയാര്‍ ഖാന്‍ പറഞ്ഞു. തങ്ങള്‍ക്ക് നീതി ലഭിക്കുന്നതിനായി ഐസിസി തലത്തില്‍ ഏതറ്റം വരെയും പൊകുമെന്നും അദ്ദേഹം വ്യക്തമാക്കി. പരമ്പര കളിക്കുന്നതിന് സര്‍ക്കാര്‍ അനുമതി ലഭ്യമാക്കുന്നത് സംബന്ധിച്ച് കരാറില്‍ പറയുന്നില്ലെന്നും അനുമതി ലഭ്യമാക്കല്‍ ബിസിസിഐയുടെ ചുമതലയാണെന്നും അദ്ദേഹം കുറ്റപ്പെടുത്തി.

2015നും 2023 നും ഇടക്ക് ഇരുരാജ്യങ്ങളും തമ്മില്‍ ആറു പരമ്പര കളിക്കാന്‍ ഇന്ത്യ- പാക് ക്രിക്കറ്റ് ബോര്‍ഡുകള്‍ ധാരണാപത്രം ഒപ്പിട്ടിരുന്നു. എന്നാല്‍ അതിര്‍ത്തിയിലെ സംഘര്‍ഷം കാരണം ഇരു രാജ്യങ്ങളും തമ്മിലുള്ള ബന്ധം നഷ്ടമായതോടെ ഈ പരമ്പരകള്‍ക്കെല്ലാം കേന്ദ്ര സര്‍ക്കാര്‍ അനുമതി നിഷേധിക്കുകയായിരുന്നു.

Champions trophy: Team India announced
Posted by
08 May

ചാമ്പ്യന്‍സ് ട്രോഫി: ഇന്ത്യന്‍ ടീം പ്രഖ്യാപിച്ചു; ഷമിയും ധവാനും തിരിച്ചെത്തി; സഞ്ജുവിന് ഇടമില്ല

മുംബൈ: ചാമ്പ്യന്‍സ് ട്രോഫിക്കായി വലിയ മാറ്റങ്ങളില്ലാതെ ഇന്ത്യന്‍ ടീമിനെ പ്രഖ്യാപിച്ചു. ഇന്ത്യ ഋഷഭ് പന്ത്,സഞ്ജു വി സാംസണ്‍ ഉള്‍പ്പെടെയുള്ള ഐപിഎല്ലില്‍ തിളങ്ങിയ താരങ്ങളെ തഴഞ്ഞപ്പോള്‍ ഓപ്പണര്‍ ശിഖര്‍ ധവാനും ബോളര്‍ മുഹമ്മദ് ഷമിയും തിരിച്ചെത്തി.

മൂന്നാം സ്പിന്നര്‍ വിഷയവും അധിക ബാറ്റ്സ്മാനും ചര്‍ച്ചയാകുമോ എന്ന കാര്യം പ്രതീക്ഷിച്ചെങ്കിലും ഒന്നുമുണ്ടായില്ല. ഋഷഭ് പന്തിന്റെ പേര് ചര്‍ച്ച ചെയ്തെങ്കിലും അജിങ്ക്യാ രഹാനേയെ അധിക ബാറ്റ്സ്മാനായി ഉള്‍പ്പെടുത്തി. പരിക്കേറ്റ കെഎല്‍ രാഹുലിനെ പരിഗണിച്ചില്ല. രോഹിത് ശര്‍മ്മയും ശിഖര്‍ ധവാനുമാണ് ഓപ്പണര്‍മാര്‍.

വിരാട് കോഹ്ലി നായകനാവുന്ന ടീമില്‍ ധോണിയെ വിക്കറ്റ് കീപ്പറായി ഉള്‍പ്പെടുത്തിയിട്ടുണ്ട്. ഹര്‍ദിക് പാണ്ഡ്യയെ ബോളിങ് ഓള്‍റൗണ്ടറാക്കി നിലനിര്‍ത്തി. ഏഴാം നമ്പര്‍ ബാറ്റ്സ്മാനായി റെയ്നയ്ക്ക് മുകളില്‍ മനീഷ് പാണ്ഡേയെ തെരഞ്ഞെടുത്തു. ഓള്‍റൗണ്ടര്‍മാരായ അശ്വിനും ജഡേജയും സ്പിന്നര്‍മാരുടെ വേഷത്തിലുണ്ട്. പേസ് ആക്രമണം ബുമ്ര, ഭുവനേശ്വര്‍ കുമാര്‍, ഉമേഷ് യാദവ്, മൊഹമ്മദ് ഷമി എന്നിവരുടെ ചുമതലയാണ്.

ഇന്ത്യന്‍ ടീം: വിരാട് കോഹ്ലി (നായകന്‍), ശിഖര്‍ ധവാന്‍, രോഹിത് ശര്‍മ്മ, അജിങ്ക്യാ രഹാനേ, മനീഷ് പാണ്ഡേ, എംഎസ് ധോണി (വിക്കറ്റ് കീപ്പര്‍), യുവരാജ് സിങ്, കേദാര്‍ യാദവ്, ഹര്‍ദിക് പാണ്ഡ്യ, ആര്‍ അശ്വിന്‍, രവീന്ദ്ര ജഡേജ, മൊഹമ്മദ് ഷമി, ഉമേഷ് യാദവ്, ഭുവനേശ്വര്‍ കുമാര്‍, ജസ്പ്രീത് ബുമ്ര.