Afghanistan player Rashid Khan’s incredible performance
Posted by
11 March

സണ്‍ റൈസേഴ്‌സ് നാലുകോടിക്ക് സ്വന്തമാക്കിയ അഫ്ഗാന്‍ താരം അയര്‍ലന്റിനെതിരെ കാഴ്ചവെച്ചത് റെക്കോര്‍ഡ് പ്രകടനം

നോയ്ഡ : ഐപിഎല്ലില്‍ സണ്‍റൈസസ് ഹൈദരാബാദ് അഫ്ഗാനിസ്ഥാന്റെ യുവസ്പിന്നര്‍ റാഷിദ് ഖാനായി മുടക്കിയ നാല് കോടി രൂപ വെറുതെയായില്ല. റാഷിദിന്റെ അവിശ്വസനീയ പ്രകടന മികവില്‍ അഫ്ഗാനിസ്ഥാന്‍ അയര്‍ലന്‍ഡിനെ തകര്‍ത്ത് തരിപ്പണമാക്കി. രണ്ട് ഓവറില്‍ മൂന്ന് റണ്‍സ് വഴങ്ങി അഞ്ച് വിക്കറ്റാണ് റാഷിദ് ഖാന്‍ സ്വന്തമാക്കിയത്.

ഇതോടെ ട്വന്റി-ട്വന്റിയില്‍ വേഗത്തില്‍ അഞ്ച് വിക്കറ്റ് സ്വന്തമാക്കിയ താരം എന്ന റെക്കോര്‍ഡ് റാഷിദ് ഖാന്‍ സ്വന്തം പേരില്‍ എഴുതിച്ചേര്‍ത്തു. തനിക്ക് ലഭിച്ച ആദ്യ ഓവറില്‍ മൂന്ന് റണ്‍സ് വഴങ്ങി ഒബ്റീനെയും വില്യംസനെയും വീഴ്ത്തിയ റാഷിദ് രണ്ടാം ഓവറില്‍ റണ്‍സൊന്നും നല്‍കാതെ മൂന്ന് വിക്കറ്റ് വീഴ്ത്തുകയായിരുന്നു. തുക്കര്‍, തോംസണ്‍, എസികാര്‍ത്തെ എന്നിവരാണ് റാഷിദിന്റെ രണ്ടാം ഓവറില്‍ പുറത്തായത്.

നേരത്തെ ആദ്യം ബാറ്റ് ചെയ്ത അഫ്ഗാന്‍ 20 ഓവറില്‍ എട്ട് വിക്കറ്റ് നഷ്ടത്തില്‍ 184 റണ്‍സാണ് നേടിയത്. 90 റണ്‍സെടുത്ത നജീബാ തറാകയ് ആണ് അഫ്ഗാനിനെ മികച്ച സ്‌കോറിലെത്തിച്ചത്. 58 പന്തില്‍ ഏഴ് ഫോറും അഞ്ച് സിക്സും സഹിതമായിരുന്നു തറാകയ്‌യുടെ ബാറ്റിംഗ്.

മറുപടി ബാറ്റിംഗിനിങ്ങിയ അയര്‍ലന്‍ഡ് 11 ഓവറില്‍ ഒന്‍പത് വിക്കറ്റിന് 93 റണ്‍സ് എന്ന നിലയില്‍ പരുങ്ങുന്നതിനിടെ മഴയെത്തി. തുടര്‍ന്ന് ഡെത്ത് വര്‍ത്ത് ലൂയിസ് നിയമ പ്രകാരം അഫ്ഗാന്‍ 17 റണ്‍സിന് വിജയിച്ചതായി പ്രഖ്യാപിക്കുകയായിരുന്നു. റാഷിദ് ഖാനെ കൂടാതെ കരീം ജനത്ത് മൂന്ന് വിക്കറ്റ് വീഴ്ത്തി. ഇതോടെ ടി20 പരമ്പര 2-0ത്തിന് അഫ്ഗാന്‍ സ്വന്തമാക്കി.
നേരത്തെ ഐപിഎല്‍ താരലേലത്തില്‍ നാല് കോടി രൂപ സ്വന്തമാക്കി റാഷിദ് ഖാന്‍ ക്രിക്കറ്റ് ലോകത്തെ അത്ഭുതപ്പെടുത്തിയിരുന്നു. റാഷിദിനെ കൂടാതെ മറ്റൊരു അഫ്ഗാന്‍ താരമായ മുഹമ്മദ് നബിയും ഐപിഎല്‍ കളിക്കുന്നുണ്ട്.

Shoaib Akthar supports Virat Kohli
Posted by
09 March

കോഹ്‌ലിയെ വിമര്‍ശിച്ച ഹീലിക്ക് മറുപടിയുമായി പാകിസ്താന്‍ താരം ശോയബ് അക്തര്‍

ഇസ്ലാമാബാദ് : ഇന്ത്യന്‍ നായകന്‍ വിരാട് കോഹ്‌ലിയെ വിമര്‍ശിച്ച മുന്‍ ഓസീസ് താരം ഹീലിക്ക് ചുട്ടമറുപടി നല്‍കി മുന്‍ പാകിസ്താന്‍ പേസ് ബോളര്‍ ശോയബ് അക്തര്‍. ഓസ്ട്രേലിയക്കെതിരായ രണ്ടാം ടെസ്റ്റിനിടെയാണ് വിരാട് കോഹ്‌ലിയെ രൂക്ഷമായി വിമര്‍ശിച്ച് ഇതിഹാസ താരം ഇയാന്‍ ഹീലി രംഗത്തെത്തിയത്. കോഹ്‌ലിയെ കുറിച്ച് ഹീലിയുടെ വാക്കുകള്‍ താന്‍ വായിച്ചെന്നും അതുകണ്ട് കുരുവുളളവനെ കൂനന്‍ കളിയാക്കുന്നത് പോലെയാണ് തനിക്ക് തോന്നിയതെന്നും അക്തര്‍ പറയുന്നു. ട്വിറ്ററിലൂടെയായിരുന്നു അക്തറിന്റെ പ്രതികരണം.

നേരത്തെ കളിക്കളത്തില്‍ ഓസ്‌ട്രേലിയന്‍ ബാറ്റ്‌സ്മാന്‍മാരോടുളള കോഹ്‌ലിയുടെ ചൂടന്‍ പെരുമാറ്റത്തെ തുടര്‍ന്നാണ് വിരാട് കോഹ്‌ലിയോടുളള ബഹുമാനം തനിക്ക് നഷ്ടപ്പെട്ടിരിക്കുന്നുവെന്ന് ഹീലി തുറന്നടിച്ചത്. മെല്‍ബണ്‍ റേഡിയോ സ്റ്റേഷനോടായിരുന്നു ഇയാന്‍ ഹീലിയുടെ പ്രതികരണം.

എനിക്ക് കോഹ്‌ലിയോടുളള ബഹുമാനം നഷ്ടപ്പെട്ടു, അവന്‍ മാത്രമല്ല ഓസ്‌ട്രേലിയന്‍ കളിക്കാരോടും അമ്പയര്‍മാരോടും മോശമായി പെരുമാറുന്ന ഏകതാരം എന്നാല്‍ അവന്‍ തന്റെ കളിക്കാര്‍ക്ക് പോലും സമ്മര്‍ദ്ദമാണ് നല്‍കുന്നത്, അശ്വിന്റെ മുഖം കണ്ടാല്‍ നമുക്ക് അത് അത് മനസ്സിലാകും, വളരെ ആക്രമണോത്സുഗമാണ് അവന്റെ പെരുമാറ്റം, എതിരാളികള്‍ക്ക് കുറച്ചുകൂടി ബഹുമാനം കോഹ്‌ലി നല്‍കേണ്ടതുണ്ട്, ഇതായിരുന്നു ഇയാന്‍ ഹീലിയുടെ പ്രതികരണം.

ഹീലിയ്‌ക്കൊപ്പം മാര്‍ക്ക് വോയും കോഹ്‌ലിയെ പരിഹസിച്ച് രംഗത്തെത്തിയിരുന്നു. കോഹ്‌ലിയ്ക്ക് വെളിവില്ലെന്നും ബംഗളൂരു ടെസ്റ്റിലെ ആദ്യ ഇന്നിംഗ്സില്‍ വിരാട് പുറത്തായത് ഭീകരമായ മിസ്ജഡ്ജ്മെന്റാണെന്ന് മാര്‍ക്ക് വോ അഭിപ്രായപ്പെട്ടു. നായകന്റെ വെളിവില്ലാത്ത പ്രകടനം ടീമിന് മുഴുവന്‍ ദോഷമായി ബാധിക്കുമെന്നും മാര്‍ക്ക് വോ പ്രതികരിച്ചിരുന്നു.

india won by 75 runs on 2nd cricket test against Australia
Posted by
07 March

ഓസ്‌ട്രേലിയക്ക് എതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യക്ക് തകര്‍പ്പന്‍ ജയം

ബംഗളൂരു: ഓസ്‌ട്രേലിയക്ക് എതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യക്ക് തകര്‍പ്പന്‍ ജയം. 75 റണ്‍സിനാണ് ഓസ്‌ട്രേലിയയെ ഇന്ത്യ തോല്‍പ്പിച്ചത്. ഇതോടെ നാല് മത്സരങ്ങളടങ്ങിയ പരമ്പരയില്‍ ഇന്ത്യ(1 1)ഒപ്പമെത്തി.പൂണെ ടെസ്റ്റില്‍ ഓസ്‌ട്രേലിയക്കായിരുന്നു വിജയം. ഇന്ത്യ ഉയര്‍ത്തിയ 188 റണ്‍സെന്ന വിജയലക്ഷ്യം പിന്തുടര്‍ന്ന ഓസ്‌ട്രേലിയക്ക് 112 റണ്‍സെടുക്കാനെ കഴിഞ്ഞുള്ളൂ. ആറു വിക്കറ്റ് വീഴ്ത്തിയ രവിചന്ദ്ര അശ്വിനാണ് ഓസ്‌ട്രേലിയയെ തകര്‍ത്തത്. ഉമേഷ് യാദവ് രണ്ടും രവീന്ദ്ര ജഡേജ, ഇശാന്ത് ശര്‍മ്മ എന്നിവരും ഓരോ വിക്കറ്റ് വീതവും നേടി.

വിജയലക്ഷ്യം പിന്തുടര്‍ന്ന ഓസ്‌ട്രേലിയക്ക് വേണ്ടി ഡേവിഡ് വാര്‍ണറും മാറ്റ് റെന്‍ഷോവും 22 റണ്‍സിന്റെ കൂട്ടുകെട്ടുയര്‍ത്തിയെങ്കിലും 5 റണ്‍സെടുത്ത റെന്‍ഷോയെ വിക്കറ്റ് കീപ്പറുടെ കൈകളിലെത്തിച്ച് ഇഷാന്ത് ശര്‍മ്മ ആദ്യ വിക്കറ്റ് സമ്മാനിച്ചു. 28 റണ്‍സെടുത്ത സ്റ്റീവന്‍ സ്മിത്തിനും 24 റണ്‍സെടുത്ത പീറ്റര്‍ ഹാന്‍ഡ്‌കോമ്പിനും മാത്രമെ അല്‍പമെങ്കിലും പിടിച്ചുനില്‍ക്കാനായുള്ളൂ. ബാക്കിയുളളവരെല്ലാം വന്നാ പാടെ കൂടാരം കയറി.

നേരത്തെ ഇന്ത്യയുടെ രണ്ടാം ഇന്നിങ്‌സ് 274ന് അവസാനിച്ചിരുന്നു. ആറു വിക്കറ്റ് വീഴ്ത്തിയ പേസര്‍ ജോഷ് ഹേസില്‍ വുഡിന്റെ പ്രകടനമാണ് ഇന്ത്യയെ വീഴ്ത്തിയത്. മിച്ചല്‍ സ്റ്റാര്‍ക്ക് സ്റ്റീവന്‍ ഒക്കീഫി എന്നിവര്‍ രണ്ടു വിക്കറ്റ് വീതം നേടി. 92 റണ്‍സെടുത്ത ചേതേശ്വര്‍ പുജാരയാണ് ടോപ് സ്‌കോറര്‍. അജിങ്ക്യ രഹാനെ(52) ലോകേഷ് രാഹുല്‍(51) എന്നിവരും തിളങ്ങി.

213ന് നാല് എന്ന നിലയില്‍ മൂന്നാം നാലാം ദിനം കളി തുടങ്ങിയ ഇന്ത്യക്ക് 61 റണ്‍സ് മാത്രമാണ് കൂട്ടിച്ചേര്‍ക്കാനായത്. രഹാനെയുടെ വിക്കറ്റാണ് ആദ്യം നഷ്ടമായത്. അര്‍ധ സെഞ്ച്വറിക്ക് പിന്നാലെ രഹാനെ സ്റ്റാര്‍ക്കിന്റെ പന്തില്‍ വിക്കറ്റിന് മുന്നില്‍ കുരുങ്ങുകയായിരുന്നു. പിന്നീടൊക്കെ ചടങ്ങുകള്‍ മാത്രമായിരുന്നു. മലയാളി താരം കരണ്‍ നായരെ പൂജ്യത്തിന് പുറത്താക്കി സ്റ്റാര്‍ക്ക് ഇന്ത്യയെ വീണ്ടും ഞെട്ടിച്ചു. പുജാരയെയും അശ്വിനെയും ഹേസില്‍വുഡ് മടക്കി. വാലറ്റത്ത് ഇഷാന്ത് ശര്‍മ്മയെ കൂട്ടുപിടിച്ച് വിക്കറ്റ് കീപ്പര്‍ സാഹ ചെറുത്ത് നില്‍പ്പിന് ശ്രമിച്ചെങ്കിലും ശര്‍മ്മയെ ഒക്കീഫി മടക്കിയതോടെ ഇന്ത്യന്‍ പതനം പൂര്‍ത്തിയായി. സാഹ 20 റണ്‍സുമായി പുറത്താകാതെ നിന്നു.

ഇന്ത്യയുടെ ആദ്യ ഇന്നിങ്‌സ് 189ന് അവസാനിച്ചിരുന്നു. എട്ട് വിക്കറ്റ് വീഴ്ത്തിയ നഥാന്‍ ലിയോണാണ് ഇന്ത്യയുടെ നടുവൊടിച്ചത്. 90 റണ്‍സെടുത്ത ലോകേഷ് രാഹുലായിരുന്നു ടോപ് സ്‌കോറര്‍. മറുപടി ബാററിങ്ങിനിറങ്ങിയ ആസ്‌ട്രേലിയ 276 റണ്‍സിന് പുറത്തായി. 87 റണ്‍സിന്റെ നിര്‍ണായക ലീഡും ആസ്‌ട്രേലിയ സ്വന്തമാക്കി. ആറു വിക്കറ്റ് വീഴ്ത്തി രവീന്ദ്ര ജദേജയുടെ മികവാണ് ഓസ്‌ട്രേലിയയെ 276ല്‍ ഒതുക്കാനായത്. ഷോണ്‍ മാര്‍ഷ്(66) മാറ്റ് റെന്‍ഷോ(60) മാത്യു വേഡ്(40) എന്നിവരാണ് ഓസ്‌ട്രേലിയന്‍ നിരയില്‍ തിളങ്ങിയത്.

Kerala HC sends notice to BCCI on Sreesanth’s plea
Posted by
03 March

ശ്രീശാന്തിന്റെ വിലക്ക്; കേരള ഹൈക്കോടതി ബിസിസിഐക്ക് നോട്ടീസ് അയച്ചു

കൊച്ചി: ക്രിക്കറ്റ് താരം ശ്രീശാന്തിന്റെ വിലക്ക് നീക്കാന്‍ കേരള ഹൈക്കോടതി ബിസിസിഐക്ക് നോട്ടീസ് അയച്ചു. ശ്രീശാന്ത് സമര്‍പ്പിച്ച ഹര്‍ജിയിന്മേലാണ് ഹൈക്കോടതിയുടെ നീക്കം. ഐപിഎല്‍ ഒത്തുകളിയുമായി ബന്ധപ്പെട്ട് ഇന്ത്യന്‍ ക്രിക്കറ്റ് ബോര്‍ഡ് ഏര്‍പ്പെടുത്തിയ ആജീവനാന്ത വിലക്കിനെതിരേയാണ് ശ്രീശാന്ത് ഹര്‍ജി സമര്‍പ്പിച്ചത്.

ഏപ്രിലില്‍ സ്‌കോട്ട്‌ലാന്‍ഡില്‍ നടക്കുന്ന പ്രീമിയര്‍ ലീഗില്‍ കളിക്കാന്‍ ഈ വിലക്ക് നിലനില്‍ക്കുന്നതിനാല്‍ സാധിക്കില്ല എന്നതിനാല്‍ ഇക്കാര്യത്തില്‍ അനുമതി നല്‍കാന്‍ ബോര്‍ഡിന് നിര്‍ദേശം നല്‍കണമെന്നും ശ്രീശാന്ത് ഹര്‍ജിയില്‍ ആവശ്യപ്പെട്ടിട്ടുണ്ട്. ഐപിഎല്‍ ഒത്തുകളി കേസില്‍ ഡല്‍ഹി പാട്യാല ഹൗസ് കോടതി ശ്രീശാന്തിനെ കുറ്റവിമുക്തനാക്കിയെങ്കിലും ക്രിക്കറ്റ് ബോര്‍ഡ് ഏര്‍പ്പെടുത്തിയ ആജീവനാന്ത വിലക്ക് ഇതുവരെ നീക്കിയിട്ടില്ല. ഇതിനെ തുടര്‍ന്നാണ് താരം ഹൈക്കോടതിയെ സമീപിച്ചത്.

Sehwag insults Kargil martyr’s daughter
Posted by
27 February

എബിവിപിയെ ഭയക്കുന്നില്ലെന്ന ക്യാമ്പയിന്‍: കാര്‍ഗില്‍ രക്തസാക്ഷിയുടെ മകളെ പരിഹസിച്ച് സെവാഗ്

മുംബൈ:എബിവിപിയെ താന്‍ ഭയക്കുന്നില്ലെന്ന് ഓണ്‍ലൈന്‍ ക്യാമ്പയിന്‍ നടത്തിയ കാര്‍ഗില്‍ രക്തസാക്ഷിയുടെ മകളെ പരിഹസിച്ച് മുന്‍ ഇന്ത്യന്‍ ക്രിക്കറ്റ് താരം വീരേന്ദ്ര സെവാഗ്. ഡല്‍ഹി സര്‍വകലാശാല വിദ്യാര്‍ത്ഥി കൂടിയായ ഗുര്‍മെഹര്‍ കൗര്‍ ജെഎന്‍യുവില്‍ വിദ്യാര്‍ത്ഥികള്‍ക്ക് നേരെ ഉണ്ടായ എബിവിപിയുടെ അതിക്രമത്തെ തുടര്‍ന്നാണ് വ്യത്യസ്തമായ ക്യാമ്പയിനുമായി രംഗത്തു വന്നത്. താന്‍ ഡല്‍ഹി സര്‍വകലാശാല വിദ്യാര്‍ത്ഥിയാണെന്നും എബിവിപിയെ ഭയക്കുന്നില്ല എന്നെഴുതിയ പ്ലക്കാര്‍ഡ് ഉയര്‍ത്തിയ ഗുര്‍മെഹര്‍ കൗറിന്റെ ചിത്രം സോഷ്യല്‍ മീഡിയയില്‍ വൈറലായിരുന്നു.

ഇതിനെ പരിഹസിച്ചാണ് വീരേന്ദ്രര്‍ സെവാഗ് രംഗത്തെത്തിയത്. ഗുര്‍മെഹര്‍ കൗര്‍ നേരത്തെ തന്റെ പിതാവിനെ കൊന്നത് പാകിസ്താനല്ല, യുദ്ധമാണെന്ന് എഴുതിയ പ്ലക്കാര്‍ഡ് ഈ ക്യാമ്പയിന്റെ ഭാഗമായി ഉയര്‍ത്തിക്കാണിച്ചിരുന്നു. ഈ പ്ലക്കാര്‍ഡിനുള്ള മറുപടിയായാണ് സെവാഗിന്റെ പരിഹാസം. താനല്ല രണ്ട് ട്രിപ്പിള്‍ സെഞ്ച്വറി നേടിയതെന്നും തന്റെ ബാറ്റാണെന്ന പ്ലക്കാര്‍ഡ് ഉയര്‍ത്തിപ്പിടിച്ചിരിക്കുന്ന ചിത്രം ട്വീറ്റ് ചെയ്താണ് സെവാഗിന്റെ പ്രതികരണം.

ഈ ചിത്രത്തെ ഷെയര്‍ ചെയ്ത് നിരവധി ചിരി ഇമോജികള്‍ കമന്റ് ചെയ്ത് ബിജെപി നേതാവിന്റെ മകന്‍ കൂടിയായ രണ്‍ദീപ് സിംഹ് ഹൂഡയും രംഗത്തെത്തിയിട്ടുണ്ട്.

നിരവധിപേരാണ് സെവാഗിനെ അനൂകൂലിച്ചും പ്രതികൂലിച്ചും സോഷ്യല്‍മീഡിയയയില്‍ പ്രതികരിക്കുന്നത്.

UttaraKhand govt payed 47.19 lakh to  Virat Kohli from flood relief fund
Posted by
26 February

ഉത്തരാഖണ്ഡ് സര്‍ക്കാരിന്റെ ദുരിതാശ്വാസഫണ്ടില്‍ നിന്നും വിരാട് കോഹ്‌ലിക്ക് 50 ലക്ഷം; വിവാദം കത്തുന്നു

ഡെറാഡൂണ്‍: വിവാദങ്ങള്‍ വിടാതെ പിന്തുടര്‍ന്ന് വിരാട് കോഹ്‌ലി. ഓസ്ട്രേലിയക്കെതിരെയുള്ള തോല്‍വിയുടെ നിരാശയില്‍ കഴിയുന്ന ഇന്ത്യന്‍ ക്യാപ്റ്റനെ തേടി പുതിയ വിവാദം. 60 സെക്കന്റ് വരുന്ന പരസ്യത്തില്‍ അഭിനയിച്ചതിന് ഉത്തരാഖണ്ഡ് സര്‍ക്കാരിന്റെ പക്കല്‍ നിന്നും 47.19 ലക്ഷം രൂപ സ്വീകരിച്ചതാണ് വിവാദത്തിന് ഹേതുവായിരിക്കുന്നത്.

സര്‍ക്കാരിന്റെ പ്രളയ ദുരിതാശ്വാസത്തിന് വകയിരുത്തിയ ഫണ്ടില്‍നിന്നുമാണ് കോഹ്‌ലി പണം സ്വീകരിച്ചത്. ഇതാണ് അദ്ദേഹത്തിന് വിനയായിരിക്കുന്നതും. സംഭവം പുറത്തായതോടെ മാര്‍ച്ച് 11ന് നിയമസഭാ തെരഞ്ഞെടുപ്പ് നടക്കാനിരിക്കുന്ന ഉത്തരാഖണ്ഡിലെ ഹരീഷ് റാവത്ത് സര്‍ക്കാറിനും തലവേദനയായിട്ടുണ്ട്.

ബിജെപി നേതാവായ അജേന്ദ്ര അജയ്ക്ക് വിവരാവകാശ നിയമപ്രകാരം ലഭിച്ച മറുപടിയിലാണ് പണം കൈമാറിയത് ദുരിതാശ്വാസ ഫണ്ടില്‍ നിന്നും ആണെന്ന കാര്യം വ്യക്തമായത്. 2013ല്‍ കേദാര്‍നാഥിലുണ്ടായ കനത്ത പ്രളയത്തില്‍ ദുരിതത്തിലായവരെ സഹായിക്കാന്‍ നീക്കിവെച്ച തുകയില്‍ നിന്നാണ് സംസ്ഥാനത്തെ വിനോദസഞ്ചാരം പ്രോത്സാഹിപ്പിക്കുന്നതിനുള്ള 60 സെക്കന്‍ഡ് വീഡിയോയില്‍ അഭിനയിച്ചതിന് വിരാട് കോഹ്‌ലിക്ക് പ്രതിഫലം നല്‍കിയത്. ആ സമയത്ത് ഉത്തരാഖണ്ഡിന്റെ ബ്രാന്‍ഡ് അംബാസഡറായിരുന്നു കോഹ്‌ലി.

എന്നാല്‍, സാമ്പത്തിക ഇടപാടൊന്നുമുണ്ടായിട്ടില്ലെന്ന് കോഹ്‌ലിയുടെ ഏജന്റും കോര്‍ണര്‍സ്റ്റോണ്‍ സ്പോര്‍ട് ആന്‍ഡ് എന്റര്‍ടെയ്ന്‍മെന്റ് സിഇഒയുമായ ബണ്ടി സജ്ദേ പറഞ്ഞു. അതെസമയം വിരമിച്ച സുപ്രീം കോടതി ജഡ്ജിയുടെ നേതൃത്വത്തില്‍ ഇക്കാര്യത്തെ കുറിച്ച് അന്വേഷിക്കുമെന്ന് ഉത്തരാഖണ്ഡ് മുഖ്യമന്ത്രി ഹരീഷ് റാവത്ത് അറിയിച്ചു.

Pune test: Against Men in blue Ausis won by 333 runs
Posted by
25 February

ദയനീയ പ്രകടവുമായി ഇന്ത്യന്‍ നിര: ഓസീസിനെതിരെ 333 റണ്‍സിന്റെ നാണംകെട്ട തോല്‍വി

പൂനെ: പൂനെ ടെസ്റ്റില്‍ അമിതാത്മവിശ്വാസത്തില്‍ കളത്തിലിറങ്ങിയ ഇന്ത്യയെ കശക്കിയെറിഞ്ഞ് ഓസീസ് പട. ഓസ്‌ട്രേലിയക്കെതിരെ ഇന്ത്യക്ക് ചരിത്രത്തിലെ തന്നെ ഏറ്റവും ദയനീയമായ 333 റണ്‍സിന്റെ തോല്‍വി. 12 വര്‍ഷങ്ങള്‍ക്കിപ്പുറം ഇന്ത്യയില്‍ ആദ്യ ടെസ്റ്റ് വിജയം നേട്ടം സ്വന്തമാക്കിയാണ് ഓസ്‌ട്രേലിയ ഇന്ത്യയെ നാണക്കേടിന്റെ പടുകുഴിയിലേക്ക് തള്ളിവിട്ടത്. രണ്ടാം ഇന്നിങ്‌സ് ബാറ്റിങ്ങിനിറങ്ങിയ ഇന്ത്യന്‍ നിര 107 റണ്‍സിനു തകര്‍ന്നടിയുകയായിരുന്നു.

സ്പിന്നിനെ പരിധിവിട്ട് സഹായിക്കുന്ന പിച്ച് ഒരുക്കി ഓസ്‌ട്രേലിയയെ സ്വാഗതം ചെയ്ത ഇന്ത്യക്ക് തിരിച്ചടിയായതും ഇതേ പിച്ചായിരുന്നു. പരമ്പരയിലെ ആദ്യ ക്രിക്കറ്റ് ടെസ്റ്റിലെ കനത്ത തോല്‍വി ഇന്ത്യയെ വിമര്‍ശകരുടെ ഇരയാക്കി മാറ്റിയിരിക്കുകയാണ.്‌തോല്‍വിയറിയാത്ത 19 തുടര്‍ടെസ്റ്റുകളുടെ വിജയതേരോട്ടത്തിനും ഈ തോല്‍വിയോടെ വിരാമമായി.

ഇന്ന് ഇന്ത്യയ്ക്കു ജയിക്കാന്‍ 441 റണ്‍സായിരുന്നു വേണ്ടിയിരുന്നത്. കൈയിലുള്ള 10 വിക്കറ്റും മുന്നിലുള്ള രണ്ടര ദിവസത്തെ കളിയും ഓസ്‌ട്രേലിയന്‍ ബോളര്‍മാര്‍ക്ക് മുന്നില്‍ വലിച്ചെറിഞ്ഞു കൊടുത്താണ് ഇന്ത്യ തോല്‍വി ഏറ്റുവാങ്ങിയത്. 32 റണ്‍സ് നേടിയ ചേതേശ്വര്‍ പൂജാരയാണ് ഇന്ത്യന്‍ നിരയില്‍ അല്‍പ്പമെങ്കിലും പിടിച്ചു നിന്നത്. നായകന്‍ വിരാട് കോഹ്‌ലി ഉള്‍പ്പടെയുള്ള ഇന്ത്യയുടെ കേളികേട്ട ബാറ്റിങ് നിര ഓസീസിന് തകര്‍ന്നടിയുകയായിരുന്നു.

ഒന്നാം ഇന്നിങ്‌സില്‍ 260 റണ്‍സെടുത്ത ഓസീസിനെതിരെ ഇന്ത്യ 105 റണ്‍സിന് ഓള്‍ഓട്ടായിരുന്നു. ക്യാപ്റ്റന്‍ സ്റ്റീവന്‍ സ്മിത്ത് പൊരുതിനേടിയ സെഞ്ച്വറിയാണ് രണ്ടാം ഇന്നിങ്‌സില്‍ കംഗാരുക്കള്‍ക്ക് കരുത്തായത്. തുടര്‍ച്ചയായ അഞ്ചാം ടെസ്റ്റിലാണ് സ്മിത്ത് ഇന്ത്യയ്‌ക്കെതിരെ സെഞ്ചുറി നേടുന്നത്. 202 പന്തുകള്‍ നേരിട്ട സ്മിത്ത്, 11 ബൗണ്ടറികളുടെ അകമ്പടിയോടെയാണ് 109 റണ്‍സെടുത്തത്.

നാലിന് 143 റണ്‍സ് എന്ന നിലയില്‍ മൂന്നാം ദിനമായ ഇന്ന് ബാറ്റിങ് പുനരാരംഭിച്ച ഓസീസ് മികച്ച ലീഡ് നേടി ഇന്ത്യയെ ബാറ്റിങ്ങിന് അയയ്ക്കാനുള്ള ശ്രമത്തിലായിരുന്നു. മിച്ചല്‍ മാര്‍ഷ് (31), മാത്യു വെയ്ഡ് (20), മിച്ചല്‍ സ്റ്റാര്‍ക്ക് (30) എന്നിവര്‍ സ്മിത്തിന് മികച്ച പിന്തുണ നല്‍കിയതോടെ അവര്‍ തയ്യാറാക്കിയ പദ്ധതിയില്‍ വിജയിക്കുകയും ചെയ്തു. ഇന്ത്യയ്ക്കായി അശ്വിന്‍ നാലും ജഡേജ മൂന്നും ഉമേഷ് യാദവ് രണ്ടും വിക്കറ്റു വീഴ്ത്തി.

Pune Test: India needs 411 runs to win
Posted by
25 February

പൂനെ ടെസ്റ്റ്: ഇന്ത്യക്ക് 441 റണ്‍സ് വിജയലക്ഷ്യം; സ്മിത്തിന് സെഞ്ച്വറി

പൂനെ : പൂനെ ടെസ്റ്റില്‍ ഇന്ത്യക്കെതിരെ ഓസീസിന് കൂറ്റന്‍ സ്‌കോര്‍. ഇന്ത്യ 441 റണ്‍സ് വിജയലക്ഷ്യത്തിനായി പൊരുതുകയാണ്. നായകന്‍ സ്റ്റീവ് സ്മിത്തിന്റെ തകര്‍പ്പന്‍ സെഞ്ച്വറിയാണ് ഓസീസിന്റെ കുതിപ്പിന് ഊര്‍ജ്ജം പകര്‍ന്നത്. സ്മിത്ത് 109 റണ്‍സെടുത്തു.

നാല് വിക്കറ്റിന് 143 റണ്‍സ് എന്ന നിലയില്‍ മൂന്നാം ദിനം രണ്ടാം ഇന്നിംഗ്സ് ബാറ്റിംഗ് തുടര്‍ന്ന കംഗാരുക്കള്‍ ഉച്ചഭക്ഷണത്തിന് പിരിയുന്നതിനു മുമ്പ് 285 റണ്‍സിന് എല്ലാവരും പുറത്താവുകയായിരുന്നു. ഇതോടെ ആദ്യ ഇന്നിംഗ്സില്‍ നേടിയ 155 റണ്‍സ് അടക്കം മൊത്തം ലീഡ് 440 ആയി.

31 റണ്‍സെടുത്ത മിച്ചല്‍ മാര്‍ഷിന്റെ വിക്കറ്റാണ് മൂന്നാംദിനം ആദ്യം വീണത്. രവീന്ദ്ര ജഡേജയുടെ പന്തില്‍ കീപ്പര്‍ സാഹ പിടിച്ചാണ് മാര്‍ഷ് പുറത്തായത്. എന്നാല്‍ തുടര്‍ന്നു വന്ന മാത്യു വെയ്ഡ്, മിച്ചല്‍ സ്റ്റാര്‍ക് എന്നിവര്‍ നായകന് പിന്തുണ നല്‍കിയതോടെ ഓസീസ് ലീഡ് 400 കടക്കുകയായിരുന്നു.

വെയ്ഡ് 20 ഉം, സ്റ്റാര്‍ക് 30 ഉം റണ്‍സെടുത്തു. നഥാം ലിയോണ്‍ 13 റണ്‍സെടുത്തു. ഇന്ത്യയ്ക്കു വേണ്ടി അശ്വിന്‍ നാലു വിക്കറ്റെടുത്തപ്പോള്‍, ജഡേജ മൂന്നും, ഉമേഷ് യാദവ് രണ്ടും വിക്കറ്റുകള്‍ നേടി അശ്വിന് പിന്തുണ നല്‍കി. സ്പിന്നര്‍മാര്‍ക്ക് അനുകൂലമായ പിച്ചില്‍ ഓസീസ് സ്പിന്‍ ആക്രമണത്തെ പുകള്‍പെറ്റ ഇന്ത്യന്‍ ബാറ്റിംഗ് നിര എങ്ങനെ ചെറുക്കുമെന്നതിന് അനുസരിച്ചിരിക്കും ഇന്ത്യന്‍ വിജയം.

AB De Villiers Smashes Sourav Ganguly’s ODI Record
Posted by
25 February

ഗാംഗുലിയുടെ റെക്കോഡ് പഴങ്കഥയാക്കി എബി ഡിവില്ലിയേഴ്‌സ്

വെല്ലിംഗ്ടണ്‍ : ഏകദിനക്രിക്കറ്റില്‍ അതിവേഗം 9000 റണ്‍സെടുക്കുന്ന ക്രിക്കറ്റ് താരമെന്ന റെക്കോഡ് സ്വന്തമാക്കി ദക്ഷിണാഫ്രിക്കന്‍ ബാറ്റിംഗ് ഇതിഹാസം എബി ഡിവില്ലിയേഴ്‌സ്. ഇന്ത്യന്‍ താരം സൗരവ് ഗാംഗുലിയുടെ റെക്കോഡ് പഴങ്കഥയാക്കിയാണ് എബി ഡിവില്ലിയേഴ്‌സ് തന്റെ ക്രിക്കറ്റ് കരിയറില്‍ മറ്റൊരു പൊന്‍തൂവല്‍ കൂടി നേടിയത്.

വെല്ലിംഗ്ടണില്‍ നടക്കുന്ന ന്യൂസിലന്‍ഡിനെതിരായ മൂന്നാം ഏകദിനത്തിലാണ് ഡിവില്ലിയേഴ്‌സ് ചരിത്രനേട്ടം കൈവരിച്ചത്. 205 ഇന്നിംഗ്‌സില്‍ നിന്നാണ് ഡിവില്ലിയേഴ്‌സിന്റെ നേട്ടം. 228 ഇന്നിംഗ്‌സുകളില്‍ നിന്നായിരുന്നു ഗാംഗുലി അതിവേഗം 9000 റണ്‍സെടുത്തത്. ഈ പട്ടികയില്‍ ഇടംനേടുന്ന 18 ആമത്തെ താരവും രണഅടാമത്തെ ദക്ഷിണാഫ്രിക്കക്കാരന്‍ കളിക്കാരനുമാണ് ഡിവില്ലിയേഴ്‌സ്. ജാക്വസ് കല്ലിസാണ് ആദ്യം ഈ നേട്ടം കൈവരിച്ച ദക്ഷിണാഫ്രിക്കന്‍ താരം.
ഈ പട്ടികയിലുള്ള മറ്റു പ്രമുഖര്‍ ഇവരാണ്.
സച്ചിന്‍ടെണ്ടുല്‍ക്കര്‍( 235 ഇന്നിംഗ്‌സ്), ബ്രയാന്‍ ലാറ( 239 ഇന്നിംഗ്‌സ്), റിക്കി പോണ്ടിംഗ് ( 242 ഇന്നിംഗ്‌സ്), ജാക് കാലിസ്( 242 ഇന്നിംഗ്‌സ് ), മഹേന്ദ്ര സിംഗ് ധോണി (244 ഇന്നിംഗ്‌സ് ), മുഹമ്മദ് യൂസഫ് (245 ഇന്നിംഗ്‌സ്) , രാഹുല്‍ ദ്രാവിഡ് (259 ഇന്നിംഗ്‌സ് ).

Sehwag happy about removal of Dhoni as RPS captain
Posted by
23 February

ധോണിയെ നായകസ്ഥാനത്തു നിന്നും മാറ്റിയതില്‍ താന്‍ ഏറെ സന്തോഷിക്കുന്നുവെന്ന് സെവാഗ്

മുംബൈ: മഹേന്ദ്ര സിങ് ധോണിയെ നായകസ്ഥാനത്തു നിന്നും മാറ്റിയ റൈസിംഗ് പൂനെ സൂപ്പര്‍ ജയന്റ്സിന്റെ തീരുമാനം ക്രിക്കറ്റ്-ഐപിഎല്‍ ആരാധകരെ ആകെ ഞെട്ടിച്ചിരിക്കുകയായിരുന്നു. എന്നാല്‍ ധോണിയെ ക്യാപ്റ്റന്‍സിയില്‍ നിന്നും മാറ്റിയതില്‍ ഏറെ സന്തോഷിക്കുന്ന ഒരു താരമുണ്ട്. അത് മറ്റാരുമല്ല, സാക്ഷാല്‍ വീരേന്ദ്ര സേവാഗ് തന്നെ.

‘ ധോണിയെ പുറത്താക്കിയതില്‍ എനിക്കൊരുപാട് സന്തോഷമുണ്ട്. കാരണം, ഇനി എന്റെ ടീമിന് പൂനെ ടീമിനെ തോല്‍പ്പിക്കാന്‍ എളുപ്പമാകുമല്ലോ ‘ എന്നാണ് വിരേന്ദര്‍ സെവാഗ് സംഭവത്തോട് പ്രതികരിച്ചത്. കിംഗ്സ് ഇലവന്‍ പഞ്ചാബിന്റെ ക്രിക്കറ്റ് ഓപ്പറേഷന്‍സ് വിഭാഗം തലവനാണ് സെവാഗ്. നേരത്തെ ടീമിനുവേണ്ടി ലീഗില്‍ കളിച്ചിട്ടുമുണ്ട്. ധോണി ഇന്ത്യ കണ്ട എക്കാലത്തേയും മികച്ച താരങ്ങളിലൊരാണ് ധോണിയെന്നും എന്നാല്‍ അദ്ദേഹത്തെ നായകസ്ഥാനത്തുനിന്നും പുറത്താക്കിയത് ടീമിന്റെ തീരുമാനമായിരിക്കാം എന്നും സെവാഗ് കൂട്ടിച്ചേര്‍ക്കുന്നു.

ഇന്ത്യയുടെ നിശ്ചിത ഓവര്‍ മത്സരങ്ങളുടെ നായകസ്ഥാനത്തു നിന്നും ഒഴിഞ്ഞ ധോണിയെ ഐപിഎല്‍ പത്താം സീസണിന്റെ ലേലത്തിന് രണ്ട് ദിവസം മുമ്പായിരുന്നു ടീം മാനേജ്‌മെന്റ് നായക സ്ഥാനത്തുനിന്നും പുറത്താക്കിയത്. ഓസീസ് നായകന്‍ സ്റ്റീവ് സ്മിത്തായിരിക്കും ടീമിനെ ഐപിഎല്ലിന്റെ ഈ സീസണില്‍ നയിക്കുക.

അതേസമയം ധോണി നായകസ്ഥാനത്തു നിന്നും സ്വയം പിന്മാറിയതാണെന്നായിരുന്നു ആദ്യം പുറത്തുവന്ന വാര്‍ത്തകള്‍. എന്നാല്‍ ധോണി സ്വയം ഒഴിയുകയല്ലായിരുന്നുവെന്നും തങ്ങള്‍ അദ്ദേഹത്തെ പുറത്താക്കി പകരം സ്റ്റീവ് സ്മിത്തിനെ നായകനായി തെരഞ്ഞെടുക്കുകയുമായിരുന്നു എന്നാണ് ടീം ഉടമയായ സഞ്ജീവ് ഗോയങ്ക പിന്നീട് വ്യക്തമാക്കിയത്.