ഇന്ത്യക്ക് നാലാം ലോകകിരീടം: ഓസ്‌ട്രേലിയയെ എട്ട് വിക്കറ്റിന് തകര്‍ത്ത് അണ്ടര്‍ 19 ലോകകപ്പ് ഇന്ത്യയുടെ ചുണക്കുട്ടികള്‍ക്ക്
Posted by
03 February

ഇന്ത്യക്ക് നാലാം ലോകകിരീടം: ഓസ്‌ട്രേലിയയെ എട്ട് വിക്കറ്റിന് തകര്‍ത്ത് അണ്ടര്‍ 19 ലോകകപ്പ് ഇന്ത്യയുടെ ചുണക്കുട്ടികള്‍ക്ക്

ഓവല്‍: മന്‍ജോത് കല്‍റയുടെ സെഞ്ച്വറി മികവില്‍ ഓസ്‌ട്രേലിയയെ എട്ട് വിക്കറ്റിന് തകര്‍ത്ത് ഇന്ത്യയുടെ ചുണക്കുട്ടികള്‍ക്ക് അണ്ടര്‍ 19 ലോകകപ്പ് കിരീടം. ഗ്രൂപ്പ് തലം മുതല്‍ തോല്‍വി അറിയാതെ മുന്നേറിയ പൃഥ്വി ഷായും സംഘവും സമ്പൂര്‍ണ്ണ ആധിപത്യത്തോടെയാണ് കിരീടം ചൂടിയത്.

ബാറ്റിങ്ങിനിറങ്ങിയ ഇന്ത്യ 38.5 ഓവറിൽ വെറും രണ്ടു വിക്കറ്റിന് വിജയലക്ഷ്യം മറികടന്നു. പുറത്താകാതെ സെഞ്ചുറി നേടിയ മൻജോത് കൽറയും(102 പന്തിൽ 101 റൺസ്) ഒപ്പം പിന്തുണയുമായി നിന്ന ഹാർവിക് ദേശായിയുമാണ്(61 പന്തിൽ 47) ഇന്ത്യയെ വിജയതീരത്തെത്തിച്ചത്. മൻജോത് കൽറയുടെ സെഞ്ചുറി നേട്ടത്തിൽ എട്ടു ബൗണ്ടറിയും മൂന്നു സിക്സറും ഉൾപ്പെടുന്നു.

മുഹമ്മദ് കൈഫ്(2002), വിരാട് കോഹ്‌ലി(2008), ഉന്മുക്ത് ചന്ദ്(2012) എന്നിവരുടെ ക്യാപ്റ്റൻസിയിൽ മുൻപ് ജേതാക്കളായ ഇന്ത്യ, അണ്ടര്‍ 19 ലോകകപ്പ് ക്രിക്കറ്റില്‍ നാലാം കിരീടമാണ് സ്വന്തമാക്കിയത്. ഇതോടെ ഏറ്റവും കൂടുതല്‍ തവണ കപ്പ് ഉയര്‍ത്തിയ ടീമെന്ന റെക്കോര്‍ഡും ഇന്ത്യ സ്വന്തം പേരില്‍ എഴുതി ചേര്‍ത്തു. ഓസ്ട്രേലിയ മൂന്നുതവണ ചാംപ്യൻമാരായിട്ടുണ്ട്.

ടോസ് നേടി ബാറ്റിങ് തിരഞ്ഞെടുത്ത ഓസ്ട്രേലിയ 47.2 ഓവറിൽ 216 റൺസിൽ എല്ലാവരും പുറത്തായി. ഓസ്ട്രേലിയയെ 216 റണ്‍സിന് ചുരുട്ടിക്കെട്ടിയ സ്പിന്നര്‍മാരാണ് അന്തിമ പോരാട്ടത്തില്‍ ഇന്ത്യക്ക് അനായാസ വിജയം സമ്മാനിച്ചത്. സ്കോർ: ഓസ്ട്രേലിയ 47.2 ഓവറിൽ 216, ഇന്ത്യ 38.5 ഓവറിൽ 220.

ഇന്ത്യയ്ക്കു വേണ്ടി നായകൻ പൃഥ്വി ഷായും മൻജോത് കൽ‌റയുമാണ് ഇന്നിങ്സ് ഓപ്പൺ ചെയ്തത്. 29 റൺസിലെത്തി നിൽക്കെ പൃഥ്വി ഷാ വിൽ സുതർലാൻഡിന്റെ പന്തിൽ ക്ലീൻ ബൗൾഡായി. തുടർന്നെത്തിയ ശുബ്മാൻ ഗിൽ 31 റൺസിലെത്തി നിൽക്കെ പരം ഉപ്പലിന്റെ പന്തിൽ ബൗൾഡായി. ഇന്ത്യൻ ബാറ്റിങ് നാലു ഓവറിൽ നിൽക്കെ മഴപെയ്തതിനാൽ കളി അൽപനേരം തടസപ്പെട്ടെങ്കിലും പിന്നീട് മഴ മാറിനിന്നു. പിന്നീട് കളത്തിലിറങ്ങിയ ഇന്ത്യ ആയാസരഹിതമായി വിജയം പിടിച്ചെടുക്കുകയായിരുന്നു.

ഇന്ത്യയുടെ ടൂര്‍ണമെന്റിലെ പടയോട്ടം ഇങ്ങനെ:

ഓസീസിനെതിരെ : 100 റണ്‍സ് ജയം
പാപുവ ന്യൂഗിനിക്കെതിരെ: പത്തു വിക്കറ്റ് ജയം
സിംബാംബ്‌വെയ്‌ക്കെതിരെ: പത്തു വിക്കറ്റ് ജയം
ബംഗ്ലദേശിനെതിരെ: 131 റണ്‍സ് ജയം
പാകിസ്താനെതിരെ സെമിയില്‍: 203 റണ്‍സ് ജയം
ഓസീസിനെതിരെ ഫൈനലില്‍: എട്ടു വിക്കറ്റ് ജയം

അണ്ടര്‍-19: തകര്‍ന്നടിഞ്ഞ് ഓസീസ്; കിരീടം സ്വന്തമാക്കാന്‍ ഇന്ത്യയ്ക്കു വേണ്ടത് 217 റണ്‍സ്
Posted by
03 February

അണ്ടര്‍-19: തകര്‍ന്നടിഞ്ഞ് ഓസീസ്; കിരീടം സ്വന്തമാക്കാന്‍ ഇന്ത്യയ്ക്കു വേണ്ടത് 217 റണ്‍സ്

ക്രൈസ്റ്റ്ചര്‍ച്ച്: അണ്ടര്‍ 19 ക്രിക്കറ്റ് ലോകകപ്പ് ഫൈനലില്‍ ജയിക്കാന്‍ ഇന്ത്യയ്ക്കു വേണ്ടത് 217 റണ്‍സ്. 47.2 ഓവറില്‍ ഓസ്‌ട്രേലിയ 216 റണ്‍സിന് എല്ലാവരും പുറത്തായി.

ടോസ് നേടിയ ബാറ്റിങ് തെരഞ്ഞെടുത്ത ഓസീസ് ബാറ്റിംഗ് നിരയെ ഇന്ത്യന്‍ ബൗളര്‍മാര്‍ വരിഞ്ഞ് മുറുക്കുകയായിരുന്നു.

ഓവറില്‍ ആറു വിക്കറ്റിന് 191 റണ്‍സെന്ന നിലയിലായിരുന്ന ഓസ്‌ട്രേലിയ പിന്നീട് തകരുകയായിരുന്നു. ഓസീസിന്റെ വാലറ്റത്തിന് ഇന്ത്യന്‍ ബൗളര്‍മാര്‍ക്ക് മുമ്പില്‍ പിടിച്ചു നില്ക്കാനായില്ല.

രണ്ടു വീതം വിക്കറ്റ് വീഴ്ത്തിയ പോറെല്‍, ശിവ സിങ്ങ്, നാഗര്‍കോട്ടി, റോയ് എന്നിവരുടെ ബൗളിങ്ങാണ് ഔസീസിന്റെ ബാറ്റിങ് നട്ടെല്ലൊടിച്ചത്. 102 പന്തില്‍ 76 റണ്‍സെടുത്ത ജൊനാഥാന്‍ മെര്‍ലോ മാത്രമാണ് പിടിച്ചുനിന്നത്.

ടോസ് നേടി ബാറ്റിങ് തിരഞ്ഞെടുത്ത ഓസീസിന് 32 റണ്‍സെടുക്കുന്നതിനിടയില്‍ ആദ്യ വിക്കറ്റ് നഷ്ടമായി. 14 റണ്‍സെടുത്ത ബ്രയന്റിനെ പൊറെല്‍ പുറത്താക്കുകയായിരുന്നു.

ഇഷാന്‍ പോറല്‍ രണ്ടും കമലേഷ് നാഗര്‍കോട്ടിയും അങ്കുല്‍ റോയിയും ഓരോ വിക്കറ്റ് വീതവും വീഴ്ത്തി. നാലാം ലോകകിരീടം തേടിയാണ് ഇരുടീമുകളും ക്രീസിലിറങ്ങിയത്.

ചാരത്തില്‍ നിന്നും ഉയിര്‍ത്തെഴുന്നേറ്റ് ബ്ലാസ്റ്റേഴ്‌സ്; വിനീതിന്റെ കരുത്തില്‍ പൂനെയ്‌ക്കെതിരെ തകര്‍പ്പന്‍ ജയം
Posted by
03 February

ചാരത്തില്‍ നിന്നും ഉയിര്‍ത്തെഴുന്നേറ്റ് ബ്ലാസ്റ്റേഴ്‌സ്; വിനീതിന്റെ കരുത്തില്‍ പൂനെയ്‌ക്കെതിരെ തകര്‍പ്പന്‍ ജയം

പൂനെ: വിജയം കാത്തിരുന്ന ബ്ലാസ്റ്റേഴ്‌സ് ആരാധകര്‍ക്ക് നിരാശ ഉണ്ടായില്ല. ഇഞ്ചുറി ടൈമിലെ തകര്‍പ്പന്‍ ഗോളില്‍ കേരളത്തിന്റെ സ്വന്തം മഞ്ഞപ്പടയ്ക്ക് പൂനെയില്‍ വിജയം. ഐഎസ്എല്ലിലെ നിര്‍ണായക എവേ മത്സരത്തില്‍ പൂനെയെ കേരള ബ്ലാസ്‌റ്റേഴ്‌സ് 2-1ന് തോല്‍പിച്ചു. വിവാദ റഫറി പ്രാഞ്ജല്‍ ബാനര്‍ജി ഇക്കുറിയും അനാവശ്യ പെനാല്‍റ്റിയുമായി വില്ലന്‍ വേഷമണിഞ്ഞെങ്കിലും 93ാം മിനിറ്റില്‍ സികെ വിനീതിന്റെ ഇടെകാലില്‍ നിന്നും ഉതിര്‍ന്ന ഉഗ്രന്‍ ഷോട്ടില്‍ ബ്ലാസ്‌റ്റേഴ്‌സിന്റെ വിജയം പിറന്നു. ത്രസിപ്പിക്കുന്ന ജയത്തോടെ മഞ്ഞപ്പട വീണ്ടും പ്ലേഓഫ് പ്രതീക്ഷ സജീവമാക്കി. 58ാം മിനിററ്റില്‍ ജാകിചന്ദും ഇഞ്ചുറി ടൈമില്‍ വിനീതുമാണ് ബ്ലാസ്‌റ്റേഴ്‌സിന്റെ രക്ഷകരായത്.ആക്രമിച്ചു കളിക്കാനുറച്ചായിരുന്നു ഡേവിഡ് ജെയിംസ് പൂനെയുടെ കളത്തിലെത്തിയത്. വിസില്‍ കേട്ടപാടെ ഇയാന്‍ ഹ്യൂമും സികെ വിനീതും പൂനെ ഗോള്‍മുഖത്ത് വട്ടമിട്ട് പറന്നു. വലതു വിങ്ങില്‍ ജാകി ചന്ദിന്റെ മുന്നേറ്റങ്ങളായിരുന്നു പൂനെയെ പരീക്ഷിച്ചുകൊണ്ടിരുന്നത്.

ആദ്യ പകുതിയില്‍ പൂനെയുടെ മാഴ്‌സലീന്യോയും എമിലിയാനോ അല്‍ഫാരോയും ചേര്‍ന്ന് പതുക്കെ കളി പിടിച്ചെടുത്തു. രണ്ടിലധികം തവണ ബ്ലാസ്‌റ്റേഴ്‌സിന്റെ വലകുലുങ്ങേണ്ടതായിരുന്നു. ആദ്യപകുതി അവസാനിക്കാന്‍ മിനിറ്റുകള്‍ ശേഷിക്കെ ഹ്യൂ പരിക്കേറ്റ് മടങ്ങിയതും ബ്ലാസ്‌റ്റേഴ്‌സിന് തിരിച്ചടിയായി. കളിമാറി രണ്ടാം പകുതി പൂനെയുടെ കണ്ണഞ്ചിപ്പിക്കും മുന്നേറ്റത്തോടെയാണ് രണ്ടാം പകുതി തുടങ്ങിയത്. എട്ടു മിനിറ്റിനിടെതന്നെ നാല് അവസരങ്ങള്‍. 53ാം മിനിറ്റില്‍ മാഴ്‌സലീന്യോയുടെ ഉഗ്രന്‍ ഷോട്ട് പോസ്റ്റില്‍ തട്ടിത്തെറിച്ചത് ബ്ലാസ്‌റ്റേഴ്‌സിന്റെ ഭാഗ്യം കൊണ്ടായിരുന്നു. 58ാം മിനിറ്റിലായിരുന്നു ബ്ലാസ്‌റ്റേഴ്‌സ് ആരാധകര്‍ കാത്തിരുന്ന ഗോളെത്തുന്നത്. പുതുതായി കളത്തിലെത്തിയ ഗുഡ്‌യോണ്‍ ബാള്‍വിന്‍സണ്‍ നല്‍കിയ പാസ് സ്വീകരിച്ച് ജാകിചന്ദ് സിങ് ബോക്‌സിനു പുറത്തുനിന്നുതിര്‍ത്ത ഷോട്ട് വളഞ്ഞ്പുളഞ്ഞ് വലയിലേക്ക് കയറുമ്പോള്‍ പൂനെയുടെ ഗോളിക്ക് നോക്കി നില്‍ക്കാനേ കഴിഞ്ഞുള്ളൂ. എന്നാല്‍, ബ്ലാസ്‌റ്റേഴ്‌സിന്റെ ആഹ്ലാദം 78ാം മിനിറ്റില്‍ അടങ്ങി. അല്‍ഫാരോയെ വീഴ്ത്തിയതിന് ലഭിച്ച പെനാല്‍റ്റിയില്‍ പൂനെ സമനില പിടിച്ചു.

അനവസരത്തില്‍ റഫറി നല്‍കിയ പെനാല്‍റ്റിക്ക് ബ്ലാസ്‌റ്റേഴ്‌സ് താരങ്ങള്‍ തര്‍ക്കിച്ചുനോക്കിയെങ്കിലും കാര്യമുണ്ടായില്ല. എന്നാല്‍, മഞ്ഞപ്പട തോല്‍ക്കാന്‍ ഒരുക്കമല്ലായിരുന്നു. പൂനെയോടും ഒപ്പം റഫറിയോടും വാശിതീര്‍ക്കാന്‍ ബ്ലാസ്‌റ്റേഴ്‌സ് നിറഞ്ഞുകളിച്ചു. ഒടുവില്‍, മലയാളികളുടെ മഞ്ഞപ്പടയെ കാക്കാന്‍ സികെ. വിനീതെത്തി. 93ാം മിനിറ്റില്‍ പെക്കൂസന്‍ നല്‍കിയ പാസ് ബോക്‌സിനു തൊട്ടുമുന്നില്‍നിന്ന് നെഞ്ചിലെടുത്ത് വിനീത് പറപ്പിച്ച ഇടങ്കാലന്‍ വോളി നെടുകെ ചാടിയ ഗോളിയെയും കടന്ന് പൂനെ വലതുളച്ചു കയറി. ബ്ലാസ്‌റ്റേഴ്‌സ് കാത്തിരുന്ന ഗോള്‍. 20 പോയന്റുമായി ഇതോടെ കേരള ബ്ലാസ്‌റ്റേഴ്‌സ് അഞ്ചാം സ്ഥാനത്തെത്തി.

ദക്ഷിണാഫ്രിക്കയോട് പകരം വീട്ടി മെന്‍ ഇന്‍ ബ്ലൂ! കോഹ്‌ലിയും രഹാനെയും പടനയിച്ചു; ഡര്‍ബനില്‍ ഇന്ത്യക്ക് ആറ് വിക്കറ്റ് ജയം
Posted by
02 February

ദക്ഷിണാഫ്രിക്കയോട് പകരം വീട്ടി മെന്‍ ഇന്‍ ബ്ലൂ! കോഹ്‌ലിയും രഹാനെയും പടനയിച്ചു; ഡര്‍ബനില്‍ ഇന്ത്യക്ക് ആറ് വിക്കറ്റ് ജയം

ഡര്‍ബന്‍: ദക്ഷിണാഫ്രിക്കയില്‍ ടെസ്റ്റില്‍ നേരിട്ട തിരിച്ചടിക്ക് ഇന്ത്യ ഏകദിനത്തില്‍ മറുപടി കൊടുത്തു തുടങ്ങി. കോഹ്ലിയും രഹാനേയും തകര്‍ത്തടിച്ചപ്പോള്‍ ഇന്ത്യയ്ക്ക് ആറ് വിക്കറ്റിന്റെ ഉജ്വല ജയം സ്വന്തം. തോക്കിന്റെ സംഹാരശേഷി ഇന്നലെ ദക്ഷിണാഫ്രിക്ക തിരിച്ചറിഞ്ഞു. മൂന്നാംടെസ്റ്റിലെ വിജയവീര്യം നെഞ്ചിലേറ്റിദക്ഷിണാഫ്രിക്കയ്‌ക്കെതിരായ പരമ്പരയിലെ ആദ്യ ഏകദിനത്തില്‍ ഇന്ത്യയുടെ വിജയശില്‍പ്പികള്‍ നായകന്‍ വിരാട് കോഹ്ലിയും(112) മികച്ച പിന്തുണ നല്‍കിയ അജിങ്ക്യരഹാനെയും(79) ആയിരുന്നു.

ഡുപ്ലെസിയുടെ സെഞ്ചുറി മികവില്‍(120) ദക്ഷിണാഫ്രിക്ക എട്ടു വിക്കറ്റിന് 269 റണ്‍സെടുത്തു. 33-ാം സെഞ്ചുറി നേടിയ കോഹ്ലിയും തുടര്‍ച്ചയായി അഞ്ചാം അര്‍ധ സെഞ്ചുറി(79) നേടിയ രഹാനെയും ചേര്‍ന്ന് അനായാസം ഇന്ത്യയെ വിജയത്തിലേക്കു നയിച്ചു. മൂന്നാം വിക്കറ്റില്‍ ഇരുവരും കൂടി കുറിച്ചത് 189 റണ്‍സ്. ഈ ഗ്രൗണ്ടിലെ മൂന്നാം വിക്കറ്റ് റെക്കോര്‍ഡ്. ഇന്ത്യന്‍ ക്യാപ്റ്റന്‍മാരുടെ സെഞ്ചുറി വേട്ടയില്‍ കോഹ്ലി സൗരവ് ഗാംഗുലിക്ക് ഒപ്പമെത്തുകയും ചെയ്തു. ചേസിങ്ങില്‍ കഴിഞ്ഞ 11 മല്‍സരങ്ങളില്‍ ഇന്ത്യയുടെ പത്താം വിജയം. 45.3 ഓവറിലായിരുന്നു ഇന്ത്യന്‍ വിജയം.

രോഹിത് ശര്‍മയുടെ(20) വിക്കറ്റ് 33 റണ്‍സിലും ശിഖര്‍ ധവാന്റെ(35) വിക്കറ്റ് 67 റണ്‍സിലും നഷ്ടമായതിനു ശേഷമായിരുന്നു കോഹ്ലി-രഹാനെ കൂട്ടുകെട്ട്. പതിഞ്ഞു തുടങ്ങി. മെല്ലമെല്ലെ അടിച്ചു കയറി ഒരേ വേഗത്തില്‍, ഒരേ താളത്തില്‍ ഇരുവരും മുന്നേറി. ജയത്തോട് അടുത്തപ്പോള്‍ തകര്‍പ്പനടികളുടെ പൂരം. ജയത്തിനു വെറും 14 റണ്‍സ് അകലെ നില്‍ക്കെ സിക്‌സര്‍ ശ്രമത്തില്‍ രഹാനെ പുറത്തായി. 86 പന്തുകളില്‍ അഞ്ചു ബൗണ്ടറിയും രണ്ടു സിക്‌സറും നിറം ചാര്‍ത്തിയ ഇന്നിങ്‌സ്. വിജയത്തിനു എട്ടു റണ്‍സകലെ വമ്പനടിക്കു ശ്രമിച്ചു കോഹ്ലിയും പുറത്ത്. 119 പന്തുകളില്‍ 10 ബൗണ്ടറി കുറിച്ച ശേഷം മടക്കയാത്ര. പിന്നീട് ധോണിയും ഹാര്‍ദിക് പാണ്ഡ്യയും ചേര്‍ന്നു ടീമിനെ ജയത്തിലേക്കു നയിച്ചു.

നേരത്തെ, രണ്ടു വ്രിസ്റ്റ് സ്പിന്നര്‍മാരെ ഉപഭൂഖണ്ഡത്തിനു പുറത്ത് ആദ്യമായി അവതരിപ്പിച്ച ഇന്ത്യയുടെ തന്ത്രം ഫലിച്ചു. കുല്‍ദീപ് യാദവും യുസ്വേന്ദ്ര ചാഹലും കൂടി 20 ഓവറില്‍ വിട്ടുകൊടുത്തത് 79 റണ്‍സ് മാത്രം. അഞ്ചു വിക്കറ്റും സ്വന്തമാക്കി. എന്നാല്‍ വട്ടംകറക്കിയ പന്തുകള്‍ക്കു മുന്നില്‍ പതറാതെ ബാറ്റേന്തിയ ഡുപ്ലെസി മാത്രം കീഴടങ്ങാതെ നിന്നു. 112 പന്തുകള്‍ നേരിട്ട ഡുപ്ലെസി 11 ബൗണ്ടറിയും രണ്ടു സിക്‌സറും പറത്തി.

വേഗം കുറഞ്ഞ പിച്ചില്‍ ഇന്ത്യന്‍ പേസര്‍മാര്‍ നിറംകെട്ടു. ബുമ്രയും ഭുവനേശ്വറും ഹാര്‍ദിക് പാണ്ഡ്യയും കൂടി വിട്ടുകൊടുത്തത് 168 റണ്‍സ്. അതിവേഗക്കാരനായ ബുമ്രയ്ക്കു പോലും പിച്ചില്‍ നിന്നു വേഗം കണ്ടെത്താന്‍ കഴിയാതെവന്നതോടെ ഉത്തരവാദിത്തം മുഴുവന്‍ സ്പിന്നര്‍മാരുടെ മുന്നിലായി. സമ്മര്‍ദമില്ലാതെ ബാറ്റിങ് നയിക്കേണ്ടതിന്റെ ഉത്തരവാദിത്തം ഡുപ്ലെസിക്കും. ഇന്ത്യന്‍ സ്പിന്നര്‍മാരും ഡുപ്ലെസിയും തമ്മില്‍ നടന്ന പോരാട്ടമാണ് യഥാര്‍ഥത്തില്‍ ദക്ഷിണാഫ്രിക്കന്‍ ഇന്നിങ്‌സ്.

ഒത്തുകളിക്കേസ്: ബിസിസിഐയുടെ ആജീവനാന്ത വിലക്കിനെതിരെ ശ്രീശാന്ത് സുപ്രീം കോടതിയില്‍
Posted by
01 February

ഒത്തുകളിക്കേസ്: ബിസിസിഐയുടെ ആജീവനാന്ത വിലക്കിനെതിരെ ശ്രീശാന്ത് സുപ്രീം കോടതിയില്‍

ന്യൂഡല്‍ഹി: ഒത്തുകളിക്കേസില്‍ ബിസിസിഐയുടെ ആജീവനാന്ത വിലക്കിനെതിരെ ക്രിക്കറ്റ് താരം ശ്രീശാന്ത് സുപ്രീം കോടതിയില്‍ ഹര്‍ജി നല്‍കി. കായികതാരമെന്ന നിലയില്‍ മൗലിക അവകാശങ്ങളുടെ ലംഘനമാണ് ബിസിസിഐയുടെ നടപടിയെന്ന് ഹര്‍ജിയില്‍ ശ്രീശാന്ത് ചൂണ്ടിക്കാട്ടുന്നു.

ഹര്‍ജി ഫയലില്‍ സ്വീകരിച്ച സുപ്രീം കോടതി ചീഫ് ജസ്റ്റീസ് ദീപക് മിശ്ര, ഹര്‍ജി തിങ്കളാഴ്ച പരിഗണിക്കാമെന്നു വ്യക്തമാക്കിയിട്ടുണ്ട്.

നേരത്തെ, ശ്രീശാന്തിനു ബോര്‍ഡ് ഓഫ് കണ്‍ട്രോള്‍ ഫോര്‍ ക്രിക്കറ്റ് ഇന്‍ ഇന്ത്യ(ബിസിസിഐ) ഏര്‍പ്പെടുത്തിയ ആജീവനാന്ത വിലക്ക് റദ്ദാക്കിയ സിംഗിള്‍ ബെഞ്ച് ഉത്തരവ് ഹൈക്കോടതി ഡിവിഷന്‍ ബെഞ്ച് റദ്ദാക്കിയിരുന്നു.

വിലക്കു നീക്കിയ സിംഗിള്‍ ബെഞ്ചിന്റെ ഉത്തരവിനെതിരേ ബിസിസിഐ നല്‍കിയ അപ്പീല്‍ അനുവദിച്ചായിരുന്നു ചീഫ് ജസ്റ്റീസ് ഉള്‍പ്പെട്ട ഡിവിഷന്‍ ബെഞ്ചിന്റെ തീരുമാനം. ഐപിഎല്‍ വാതുവയ്പു കേസില്‍ പ്രതിയായതിനെത്തുടര്‍ന്നാണു ശ്രീശാന്തിനു വിലക്കേര്‍പ്പെടുത്തിയിരുന്നത്.

ഐപിഎല്‍ ആറാം സീസണിലെ വാതുവയ്പു വിവാദങ്ങളെത്തുടര്‍ന്നു 2013 ഒക്ടോബര്‍ പത്തിനാണ് ബിസിസിഐ ശ്രീശാന്തിന് ആജീവനാന്ത വിലക്ക് ഏര്‍പ്പെടുത്തിയത്. ഇതിനെതിരേ ശ്രീശാന്ത് നല്‍കിയ ഹര്‍ജിയില്‍ സിംഗിള്‍ബെഞ്ച് വിലക്ക് നീക്കിയിരുന്നു.

വാതുവയ്പിനെക്കുറിച്ച് ശ്രീശാന്തിന് അറിയുമായിരുന്നെങ്കില്‍പോലും ദേശീയ, അന്തര്‍ദേശീയ ക്രിക്കറ്റില്‍നിന്നു നാലു വര്‍ഷത്തെ വിലക്ക് അനുഭവിച്ചത് ഇതിനുള്ള മതിയായ ശിക്ഷയാണെന്നു വിലയിരുത്തിയാണ് സിംഗിള്‍ബെഞ്ച് ശിക്ഷ ഒഴിവാക്കിയത്. എന്നാല്‍, ഇത്തരത്തില്‍ ശിക്ഷ ഒഴിവാക്കാന്‍ കഴിയില്ലെന്ന് ഡിവിഷന്‍ ബെഞ്ച് വിലയിരുത്തി.

2013 മേയ് ഒന്പതിന് പഞ്ചാബ് കിംഗ്‌സ് ഇലവനും രാജസ്ഥാന്‍ റോയല്‍സും തമ്മില്‍ മൊഹാലിയില്‍ നടന്ന കളിയില്‍ രാജസ്ഥാന്‍ റോയല്‍സിനുവേണ്ടി പന്തെറിഞ്ഞ ശ്രീശാന്ത് ഒരോവറില്‍ 14 റണ്‍സ് വിട്ടു കൊടുക്കുമെന്നു വാതുവച്ചെന്നും ഇതിനു സൂചനയായി അരയില്‍ ടവ്വല്‍ തിരുകിയെന്നുമാണ് ആരോപണം. ഈ ഓവറില്‍ ശ്രീശാന്ത് 13 റണ്‍സാണ് നല്‍കിയത്.

ഏകദിനത്തില്‍ ഒന്നാം റാങ്ക് പിടിക്കാന്‍ ഇന്ത്യ, നിലനിര്‍ത്താന്‍ ദക്ഷിണാഫ്രിക്ക; കോഹ്‌ലിയും ഡിവില്ലിയേഴ്‌സും നേര്‍ക്കുനേര്‍ ഏറ്റുമുട്ടുമ്പോള്‍ ആകാംക്ഷയില്‍ ആരാധകരും
Posted by
31 January

ഏകദിനത്തില്‍ ഒന്നാം റാങ്ക് പിടിക്കാന്‍ ഇന്ത്യ, നിലനിര്‍ത്താന്‍ ദക്ഷിണാഫ്രിക്ക; കോഹ്‌ലിയും ഡിവില്ലിയേഴ്‌സും നേര്‍ക്കുനേര്‍ ഏറ്റുമുട്ടുമ്പോള്‍ ആകാംക്ഷയില്‍ ആരാധകരും

ഡര്‍ബന്‍: ആറു മത്സരങ്ങള്‍ ഉള്‍പ്പെട്ട ഇന്ത്യ- ദക്ഷിണാഫ്രിക്ക ഏകദിന പരമ്പരയ്ക്ക് നാളെ ഡര്‍ബനില്‍ തുടക്കമാകും. ടെസ്റ്റ് പരമ്പര കൈവിട്ടെങ്കിലും, ഏകദിനത്തില്‍ മികച്ച ഫോമിലുള്ള ഇന്ത്യന്‍ ടീം നാളെ കളത്തില്‍ ഇറങ്ങുക വിജയിക്കാന്‍ വേണ്ടി മാത്രമായിരിക്കും. ആറു മത്സരങ്ങള്‍ ഉള്‍പ്പെട്ട ഇന്ത്യ- ദക്ഷിണാഫ്രിക്ക ഏകദിന പരമ്പരയ്ക്ക് നാളെ ഡര്‍ബനില്‍ തുടക്കമാകും. അതേസമയം, ഏകദിനത്തിലെ വെടിക്കെട്ടു വീരന്‍മാരായ കോഹ്‌ലിയും എബി ഡിവില്ലിയേഴ്‌സും നേര്‍ക്കുനേര്‍ വരുന്നതും റാങ്കിങിലെ ചെറിയ പോയിന്റ് വ്യത്യാസവും തുടങ്ങി, ഈ മത്സരത്തിന് മറ്റനേകം മാനങ്ങളുമുണ്ട്.

നിലവില്‍ ദക്ഷിണാഫ്രിക്കയാണ് ഐസിസി ഏകദിന റാങ്കിങ് പട്ടികയില്‍ ഒന്നാമത്. ഇന്ത്യ രണ്ടാമതും. പരമ്പര 4-2ന് നേടിയാല്‍ ഇന്ത്യ ഒന്നാമതെത്തും. എന്നാല്‍ സമനില പിടിച്ചാലും ദക്ഷിണാഫ്രിക്കയ്ക്ക് ഒന്നാം റാങ്ക് നിലനിര്‍ത്താം.

ഏകദിന പരമ്പരയ്ക്കുശേഷം മൂന്ന് ട്വന്റി-ട്വന്റി മത്സരങ്ങളിലും ഇരു ടീമുകളും ഏറ്റുമുട്ടും.

അതേസമയം, ഇന്ത്യയുടെ ദക്ഷിണാഫ്രിക്കന്‍ മത്സര ചരിത്രങ്ങളൊന്നും അത്രയേറെ മധുരമേറിയതല്ല. ടെസ്റ്റില്‍ മാത്രമല്ല, ദക്ഷിണാഫ്രിക്കയില്‍ ഇതുവരെ ഏകദിന പരമ്പര സ്വന്തമാക്കാനും ഇന്ത്യക്ക് ഇതുവരെ സാധിച്ചിട്ടില്ല. നാല് പരമ്പര കളിച്ചതില്‍ നാലും തോറ്റു. ആകെ 20 മത്സരങ്ങളില്‍ കളിച്ചതില്‍ 14ലും ഇന്ത്യ തോറ്റു. വിജയം സ്വന്തമായത് നാലെണ്ണത്തില്‍ മാത്രം.

പേസര്‍മാരുടെ എറിഞ്ഞിട്ട ടെസ്റ്റ് പരമ്പര 2-1നാണ് ദക്ഷിണാഫ്രിക്ക ജയിച്ചത്. എങ്കിലും ഏറെ ദുഷ്‌കരമായ വാണ്ടറേഴ്‌സ് പിച്ചിലെ ജയം ഇന്ത്യക്ക് ആത്മവിശ്വാസം കൂട്ടിയിട്ടുണ്ട്. അവസാന ടെസ്റ്റില്‍ വിജയം ഇന്ത്യ പിടിച്ചെടുക്കുകയായിരുന്നു.

ഏകദിനത്തില്‍ തുല്യശക്തികളായ ഇരുടീമുകളുടേയും അവസാനത്തെ അഞ്ച് പരമ്പരകളുടെ ചരിത്രം പരിശോധിച്ചാല്‍ ഒരെണ്ണത്തില്‍ മാത്രമേ ദക്ഷിണാഫ്രിക്ക തോറ്റിട്ടുള്ളൂ. ഇതില്‍ ന്യൂസിലന്‍ഡില്‍ നേടിയ പരമ്പര നേട്ടം ഏറെ പ്രശംസ പിടിച്ചുപറ്റിയതുമായിരുന്നു. ബാറ്റിങ്ങിലും ബോളിങ്ങിലും ഒരുപോലെ
തിളങ്ങാന്‍ ദക്ഷിണാഫ്രിക്കയ്ക്ക് കഴിഞ്ഞു.

ഇന്ത്യയാകട്ടെ, അവസാനം കളിച്ച അഞ്ച് ഏകദിന പരമ്പരകളും സ്വന്തമാക്കി. പക്ഷെ, ഒന്നൊഴികെ മറ്റെല്ലാം സ്വന്തം മണ്ണില്‍വച്ചായിരുന്നു. വിദേശമണ്ണിലെ ഏക ജയം വെസ്റ്റിന്‍ഡീസിനെതിരെയാണ്.

ഏകദിന റാങ്കിങ്പട്ടികയിലെ ഒന്നാംസ്ഥാനക്കാരന്‍ വിരാട് കോഹ്‌ലിയാണ് ബാറ്റിങ്‌നിരയില്‍ ഇന്ത്യയുടെ നട്ടെല്ല്. കഴിഞ്ഞവര്‍ഷം 26 മത്സരങ്ങളില്‍നിന്ന് 1460 റണ്ണാണ് ഇന്ത്യന്‍ ക്യാപ്റ്റന്‍ അടിച്ചുകൂട്ടിയത്. ആറ് സെഞ്ചുറികളും ഏഴ് അരസെഞ്ചുറികളും സ്വന്തമാക്കി.

നായകനല്ലാതെ, രോഹിത് ശര്‍മ, ശിഖര്‍ ധവാന്‍, മഹേന്ദ്ര സിങ് ധോണി, ഹാര്‍ദിക് പാണ്ഡ്യ, കേദാര്‍ ജാദവ് എന്നിവരാണ് ബാറ്റിങ്ങിലെ മറ്റ് ശ്രദ്ധേയ താരങ്ങള്‍. പേസര്‍മാര്‍ക്ക് മേല്‍ക്കോയ്മയുള്ള ദക്ഷിണാഫ്രിക്കന്‍ പിച്ചുകളില്‍ ജസ്പ്രീത് ബുമ്ര, ഭുവനേശ്വര്‍ കുമാര്‍ എന്നിവരുടെ പ്രകടനങ്ങള്‍ നിര്‍ണായകമാകും. കഴിഞ്ഞവര്‍ഷത്തെ ഇന്ത്യയുടെ ഏകദിന വിജയങ്ങളില്‍ ഇരുവരും നിര്‍ണായക പങ്കാളികളായി.

മുഹമ്മദ് ഷമിയും ശര്‍ദുള്‍ താക്കൂറും പേസ്‌നിരയിലുണ്ട്. സ്പിന്‍ വിഭാഗത്തില്‍ യുസ്വേന്ദ്ര ചഹലും കുല്‍ദീപ് യാദവും അക്‌സര്‍ പട്ടേലുമാണ് സമീപകാലത്ത് ഇന്ത്യയുടെ പ്രധാന ബൗളര്‍മാര്‍. അടുത്തവര്‍ഷത്തെ ലോകകപ്പിനുള്ള ഒരുക്കംകൂടിയാണ് ഇന്ത്യക്ക് ഈ പരമ്പര.

കോഹ്‌ലി കഴിഞ്ഞാല്‍ ഏകദിനത്തില്‍ സമീപകാലത്ത് ഏറ്റവും മികവുകാട്ടുന്ന ബാറ്റ്‌സ്മാന്‍ എ ബി ഡിവില്ലിയേഴ്‌സാണ്. ഒറ്റയ്ക്ക് ഒരു കളിയുടെ ഗതി മാറ്റാന്‍കഴിയും ഡി വില്ലിയേഴ്‌സിന്. ഇന്ത്യ ഏറെ ഭയക്കുന്നതും ഡി വില്ലിയേഴ്‌സിനെതന്നെ. എന്നാല്‍ പരിക്ക് കാരണം ഡിവില്ലേഴ്‌സ് ആദ്യ മൂന്ന് ഏകദിനത്തില്‍ കളിക്കുന്നില്ല. ഇത് ആതിഥേയരെ സംബന്ധിച്ചിടത്തോളം വലിയ തിരിച്ചടിയാണ്. എന്നാല്‍ തുടര്‍സെഞ്ചുറികള്‍ നേടി ഞെട്ടിച്ച ക്വിന്റണ്‍ ഡി കോക്ക് ദക്ഷിണാഫ്രിക്കയുടെ കുന്തമുന. ഹാഷിം അംല, ഫാഫ് ഡു പ്ലെസിസ്, ഡേവിഡ് മില്ലര്‍ ഇങ്ങനെ നീളുന്ന ബാറ്റിങ് നിര ഇന്ത്യയ്ക്ക് വെല്ലുവിളി ഉയര്‍ത്തും. ക്രിസ് മോറിസ്, കഗീസോ റബാദ, മോണി മോര്‍കല്‍ എന്നീ പേസര്‍മാരും ഇമ്രാന്‍ താഹിര്‍, ടബ്രയ്‌സ് ഷംസി എന്നീ സ്പിന്നര്‍മാരുമാണ് ദക്ഷിണാഫ്രിക്കന്‍ ടീമിനെ പൂര്‍ണ്ണമാക്കുന്നത്.

‘മുപ്പത് കടക്കാത്ത ഗെയ്‌ലിനെ ഒന്നും ഞങ്ങള്‍ക്ക് വേണ്ട’; ക്രിസ് ഗെയ്‌ലിനെ അപമാനിച്ച് ചെന്നൈ സൂപ്പര്‍ കിങ്‌സ്
Posted by
30 January

'മുപ്പത് കടക്കാത്ത ഗെയ്‌ലിനെ ഒന്നും ഞങ്ങള്‍ക്ക് വേണ്ട'; ക്രിസ് ഗെയ്‌ലിനെ അപമാനിച്ച് ചെന്നൈ സൂപ്പര്‍ കിങ്‌സ്

ചെന്നൈ: ആര്‍ക്കും വേണ്ടാതെ ഐപിഎല്‍ താരലേലത്തിന്റെ ആദ്യദിനത്തില്‍ ടീമുകള്‍ തട്ടിക്കളിച്ച വെടിക്കെട്ട് വീരന്‍ ക്രിസ് ഗെയിലിനെ അപമാനിച്ച് ചെന്നൈ സൂപ്പര്‍കിങ്‌സ്. കോടികള്‍ ലേലത്തില്‍ പ്രതീക്ഷിച്ച താരത്തിന് പക്ഷെ അടിസ്ഥാന വിലയായ രണ്ടു കോടിക്ക് കിങ്‌സ് ഇലവന്‍ പഞ്ചാബില്‍ ചേക്കേറേണ്ടി വന്നിരുന്നു. വന്‍ നിരാശയാണ് ഈ സംഭവം വെസ്റ്റ് ഇന്‍ഡീസ് താരത്തിന് സമ്മാനിച്ചിട്ടുണ്ടാവുക. ഇതിനു പിന്നാലെയാണ് ഒഫീഷ്യല്‍ പേജിലൂടെ ചെന്നൈയുടെ പരസ്യമായ പരിഹാസം താരത്തിന് നേരെ ഉയര്‍ന്നിരിക്കുന്നത്.

ഒരു ആരാധകനുള്ള മറുപടിയിലാണ് ചെന്നൈ സൂപ്പര്‍ കിങ്‌സ് തങ്ങളുടെ ഔദ്യോഗിക ട്വിറ്റര്‍ പേജിലൂടെ ഗെയ്ലിനെ നൈസായി ട്രോളിയത്. ചെന്നൈയ്ക്ക് ഒരു നല്ല ഓപ്പണറെ കുറവുണ്ട്, എന്നിട്ടും എന്താണ് ക്രിസ്‌ഗെയ്‌ലിനെ വാങ്ങാതെ ഒഴിവാക്കിയത് എന്നായിരുന്നു ആരാധകന്റെ ചോദ്യം. ഇതിന് വെറ്ററന്‍ താരങ്ങളെ വാങ്ങിക്കൂട്ടിയെന്ന ടീം നേരിടുന്ന പഴി മറയാക്കി കൊണ്ടുള്ള ഒരു രസകരമായ മറുപടിയായിരുന്നു ചെന്നൈ ടീം നല്‍കിയത്. ഗെയ്ല്‍ മുപ്പത് കടന്നിട്ടില്ലെന്നും അതുകൊണ്ടാണ് താരത്തെ വേണ്ടെന്ന് വെച്ചതെന്നുമായിരുന്നു ചെന്നൈയുടെ പ്രതികരണം.

യഥാര്‍ത്ഥത്തില്‍ കഴിഞ്ഞ സീസണില്‍ ഗെയ്‌ലിന്റെ ബാറ്റിങ് ശരാശരി ഉദ്ദേശിച്ചായിരുന്നു ചെന്നൈയുടെ ട്വീറ്റ്. റോയല്‍ ചലഞ്ചേഴ്‌സ് ബംഗളൂരുവിനായി ഗെയ്ല്‍ 10 മത്സരങ്ങളില്‍ നിന്ന് 22.22 ശരാശരിയില്‍ 227 റണ്‍സാണ് അടിച്ചത്. ട്വന്റി-20 ലീഗ് കരിയറില്‍ 41.2 ശരാശരിയുള്ള ഗെയ്‌ലിന്റെ മോശം പ്രകടനമായിരുന്നു കഴിഞ്ഞ സീസണില്‍ ഐപിഎല്‍ പ്രേമികള്‍ കണ്ടത്. പ്രകടനം മോശമായതിനെത്തുടര്‍ന്ന്് ബംഗളൂരു ഇത്തവണ ഗെയിലിനെ കയ്യൊഴിയുകയായിരുന്നു.

എന്നാല്‍ ഐപിഎല്ലിന് തൊട്ട് മുമ്പ് ബിഗ് ബാഷ് ലീഗില്‍ അതിവേഗ സെഞ്ച്വറി നേടി ഗെയ്ല്‍ ഫോമിലേക്ക് തിരിച്ചെത്തിയിരുന്നു.

അവര്‍ ശത്രുക്കളല്ല!  തീപാറിയ ഇന്ത്യ-പാകിസ്താന്‍ സെമി പോരാട്ടത്തില്‍ ആരാധകര്‍ സാക്ഷിയായത് അതിരുകളില്ലാത്ത സൗഹൃദക്കാഴ്ചയ്ക്ക്; ആഘോഷമാക്കി സോഷ്യല്‍മീഡിയ
Posted by
30 January

അവര്‍ ശത്രുക്കളല്ല! തീപാറിയ ഇന്ത്യ-പാകിസ്താന്‍ സെമി പോരാട്ടത്തില്‍ ആരാധകര്‍ സാക്ഷിയായത് അതിരുകളില്ലാത്ത സൗഹൃദക്കാഴ്ചയ്ക്ക്; ആഘോഷമാക്കി സോഷ്യല്‍മീഡിയ

ക്രൈസ്റ്റ്ചര്‍ച്ച്: ബദ്ധവൈരികളായ ഇന്ത്യ-പാകിസ്താന്‍ പോരാട്ടമെന്നാണ് ഇരുരാജ്യങ്ങളും തമ്മിലുള്ള മത്സരങ്ങളെ നാം വിശേഷിപ്പിക്കാറുള്ളത്. ഇരു രാഷ്ട്രങ്ങളേയും അത്രയേറെ വാശിയില്‍ കാണാനാവുക അന്യോന്യം പോരാടുമ്പോഴാണ് താനും. എന്നാല്‍ ഇന്നു ഇന്ത്യ വിജയിച്ച അണ്ടര്‍-19 ലോകകപ്പ് ക്രിക്കറ്റിലെ സെമിഫൈനല്‍ മത്സരം സാക്ഷ്യം വഹിച്ചത് അതിര്‍ത്തി രേഖകള്‍ ഭേദിക്കുന്ന സൗഹൃദക്കാഴ്ചയ്ക്കാണ്. വീണ്ടും കാണുമ്പോള്‍ കണ്ണുനിറഞ്ഞു പോകുന്ന സൗഹൃദക്കാഴ്ച്ചയെ സോഷ്യല്‍മീഡിയ ആഘോഷമാക്കുകയും ചെയ്തിരിക്കുകയാണ്.

ഇന്ത്യയുടെ ഇന്നിങ്‌സിന്റെ 48-ാം ഓവറിലാണ് സൗഹൃദ നിമിഷം ഗ്രൗണ്ടില്‍ ആദ്യം കണ്ടത്. 48-ാം ഓവറിലെ അഞ്ചാം പന്തെറിയുന്നതിന് മുമ്പ് ഇന്ത്യയുടെ സെഞ്ച്വറി താരം ശുഭ്മാന്‍ ഗില്ലിന്റെ അഴിഞ്ഞുപോയ ഷൂ ലെയ്‌സ് കെട്ടിക്കൊടുത്തത് പാക് ഫീല്‍ഡറായിരുന്നു. നോണ്‍ സ്‌ട്രൈക്കേഴ്‌സ് എന്‍ഡിലുണ്ടായിരുന്ന ശുഭ്മാന്റെ ഷൂലെയ്‌സ് തടസ്സം സൃഷ്ടിച്ചപ്പോഴാണ് പാക് ഫീല്‍ഡര്‍ സഹായവുമായി അരികിലെത്തിയത്.

പിന്നീട് പാകിസ്താന്‍ ഇന്നിങ്‌സിനിടയിലും സമാനമായ സംഭവം ഉടലെടുക്കുകയായിരുന്നു. പാക് ഇന്നിങ്‌സിന്റെ തുടക്കത്തില്‍ ഇന്ത്യന്‍ ഫീല്‍ഡര്‍ പാക് ബാറ്റ്‌സ്മാന്റെ ഷൂ ലെയ്‌സ് കെട്ടിക്കൊടുക്കുകയായിരുന്നു. ഈ രണ്ട് ചിത്രങ്ങളും ഇപ്പോള്‍ സോഷ്യല്‍ മീഡിയയില്‍ അതിവേഗം പ്രചരിക്കുകയാണ്. ഇന്ത്യന്‍ ക്രിക്കറ്റ് ടീം നായകന്‍ വിരാട് കോഹ്‌ലി ഉള്‍പ്പടെ ശത്രുതയല്ല, ഇതാണ് യഥാര്‍ത്ഥ സ്‌പോര്‍ട്‌സ്മാന്‍ സ്പിരിറ്റ് എന്ന തലക്കെട്ടോടെ ഇന്ത്യ-പാക് സൗഹൃദം ഷെയര്‍ ചെയ്തിട്ടുണ്ട്. പാകിസ്താനില്‍ നിന്നുള്ള ക്രിക്കറ്റ് പ്രേമികളും ഈ സൗഹൃദത്തെ അഭിനന്ദിച്ച് സോഷ്യല്‍മീഡിയയില്‍ സജീവമായതും വ്യത്യസ്തമായ അനുഭവമായിരിക്കുകയാണ് ക്രിക്കറ്റ് ലോകത്തിന്.

അണ്ടര്‍-19 ലോകകപ്പ്: പാകിസ്താനെ തകര്‍ത്ത് ഇന്ത്യയുടെ ചുണക്കുട്ടികള്‍ ഫൈനലില്‍
Posted by
30 January

അണ്ടര്‍-19 ലോകകപ്പ്: പാകിസ്താനെ തകര്‍ത്ത് ഇന്ത്യയുടെ ചുണക്കുട്ടികള്‍ ഫൈനലില്‍

ക്രൈസ്റ്റ്ചര്‍ച്ച്: ബദ്ധവൈരികളായ പാകിസ്താനെ വന്‍ മാര്‍ജിനില്‍ തകര്‍ത്ത് ഇന്ത്യയുടെ കുട്ടികള്‍ ഫൈനലില്‍. അണ്ടര്‍-19 ലോകകപ്പ് ക്രിക്കറ്റ് സെമിഫൈനലില്‍ 273 റണ്‍സ് വിജയലക്ഷ്യവുമായി ഇറങ്ങിയ പാകിസ്താന് 69 റണ്‍സ് എടുക്കുന്നതിനിടയില്‍ കാലിടറി. ഇതോടെ 203 റണ്‍സിന്റെ തകര്‍പ്പന്‍ ജയവുമായി ഇന്ത്യ ഫൈനലിലേക്ക് മാര്‍ച്ച് ചെയ്തു. ഫൈനലില്‍ ഇന്ത്യയെ കാത്തിരിക്കുന്നത് ഓസ്‌ട്രേലിയയാണ്.

ടോസ് നേടി ബാറ്റിങ്ങിന് ഇറങ്ങിയ ഇന്ത്യ 50 ഓവറില്‍ ഒന്‍പതു വിക്കറ്റ് നഷ്ടത്തില്‍ 272 റണ്‍സ് നേടിയിരുന്നു. മറുപടി ബാറ്റിങ്ങിന് ഇറങ്ങിയ പാകിസ്താന് ഒരു തരത്തിലും ഇന്ത്യയ്ക്ക് വെല്ലുവിളി ഉയര്‍ത്താന്‍ സാധിച്ചില്ല.

ആറ് ഓവറില്‍ 17 റണ്‍സ് മാത്രം വിട്ടു നല്‍കി നാലു വിക്കറ്റെടുത്ത ഇഷാന്‍ പൊറേലിന്റെ മികവാണ് ഇന്ത്യക്കു തുണയായത്.റിയാൻ പരാഗ് നാലു ഓവറിൽ ആറു റൺസ് മാത്രം വഴങ്ങി രണ്ടു വിക്കറ്റെടുത്തു. ശിവ സിങ് ആറു ഓവറില്‍ 11 റണ്‍സ് മാത്രം വഴങ്ങി രണ്ടു വിക്കറ്റ് നേടി. ശിവ സിങ് എട്ടു ഓവറിൽ 20 റൺസ് വഴങ്ങി രണ്ടു വിക്കറ്റ് നേടി. അനുകൂൽ സുധാകർ റോയ്, അഭിഷേക് ശർമ എന്നിവർ ഓരോ വിക്കറ്റും. ബാറ്റിങ്ങിൽ പാക്കിസ്ഥാന്റെ മൂന്നു ബാറ്റ്സ്മാൻമാർ മാത്രമാണ് രണ്ടക്കത്തിലെത്തിയത് – റൊഹൈൽ നാസിർ(18), സാദ് ഖാൻ(15), മുഹമ്മദ് മൂസ(11).

നേരത്തെ, 94 പന്തില്‍ ഏഴു ബൗണ്ടറിയോടെ സെഞ്ചുറി നേടി (പുറത്താകാതെ 102 റണ്‍സ്) മികച്ച ബാറ്റിങ് കാഴ്ചവച്ച ശുഭ്മാന്‍ ഗില്ലിന്റെ തോളിലേറിയാണ് ഇന്ത്യ മികച്ച സ്‌കോറിലെത്തിയത്. പൃഥ്വി ഷായും മന്‍ജ്യോത് കല്‍റയും ചേര്‍ന്നുണ്ടാക്കിയ 89 റണ്‍സിന്റെ ഓപ്പണിങ് കൂട്ടുകെട്ട് വന്‍ സ്‌കോറിലേക്ക് ഇന്ത്യ നീങ്ങുമെന്ന സൂചന നല്‍കിയെങ്കിലും 41 റണ്‍സെടുത്ത പൃഥ്വി ഷാ റണ്‍ഔട്ടായി. 47 റണ്‍സെടുത്ത കല്‍റയും പിന്നാലെ പുറത്തായി.

ഒരു വശത്ത് ശുഭ്മാന്‍ ഗില്‍ വീറോടെ പൊരുതിനിന്നപ്പോള്‍ മറുവശത്തെത്തിയ ബാറ്റ്‌സ്മാന്‍മാര്‍ ഒന്നിനു പിന്നാലെ ഒന്നായി കാര്യമായ സ്‌കോര്‍ കൂട്ടിച്ചേര്‍ക്കാതെ മടങ്ങി. വാലറ്റത്ത് 33 റണ്‍സെടുത്ത അങ്കുല്‍ റോയിയുടെ ബാറ്റിങ്ങാണ് ശുഭ്മാന് തുണയായത്.

10 ഓവറില്‍ 67 റണ്‍സ് വിട്ടുകൊടുത്ത് നാലു വിക്കറ്റ് നേടിയ മുഹമ്മദ് മൂസയും 51 റണ്‍സ് വിട്ടുനില്‍കി മൂന്നു വിക്കറ്റ് നേടിയ അര്‍ഷാദ് ഇഖ്ബാലും പാക് ബോളിങ്ങില്‍ തിളങ്ങി. ക്വാര്‍ട്ടര്‍ ഫൈനല്‍ അടക്കം ഇതുവരെയുള്ള നാലു മല്‍സരങ്ങളും വന്‍മാര്‍ജിനില്‍ ജയിച്ചുകയറിയാണ് ഇന്ത്യ സെമിയിലെത്തിയത്.

ആദ്യ മല്‍സരത്തില്‍ ഓസീസിനെ 100 റണ്‍സിനു തോല്‍പിച്ച ശേഷം തുടര്‍ന്നുള്ള മല്‍സരങ്ങളില്‍ പാപുവ ന്യൂഗിനി, സിംബാബ്‌വെയെ എന്നിവര്‍ക്കെതിരെ പത്തു വിക്കറ്റിന്റെ ജയമാണ് ഇന്ത്യ നേടിയത്. ഗ്രൂപ്പ് ഘട്ടത്തില്‍ അവിശ്വസനീയ കുതിപ്പ് നടത്തിയ ഇന്ത്യ ക്വാര്‍ട്ടറിലും മോശമാക്കിയില്ല. ബംഗ്ലദേശിനെ തോല്‍പിച്ചത് 131 റണ്‍സിന്. ബാറ്റിങ്ങില്‍ ഉജ്വല ഫോമില്‍ കളിക്കുന്ന ശുഭ്മാന്‍ ഗില്‍ ടൂര്‍ണമെന്റിലെ ടോപ് സ്‌കോററുമാണ്.

മറുഭാഗത്ത് ടൂര്‍ണമെന്റില്‍ പാകിസ്താന്റെ മുന്നേറ്റം അനായായമായിരുന്നില്ല. ആദ്യ മല്‍സരത്തില്‍ അഫ്ഗാനിസ്ഥാനോടു തോറ്റ ടീം തുടര്‍ന്നുള്ള മൂന്നുമല്‍സരങ്ങളിലും വിജയം കണ്ടു. ദക്ഷിണാഫ്രിക്കയ്ക്കും ശ്രീലങ്കയ്ക്കുമെതിരെ മൂന്നുവിക്കറ്റിന്റെ ജയത്തോടെ പാകിസ്താന്‍ കടന്നുകൂടുകയായിരുന്നു.

അണ്ടര്‍-19; അഫ്ഗാനെ തളച്ച് ഓസീസ് ഫൈനലില്‍
Posted by
29 January

അണ്ടര്‍-19; അഫ്ഗാനെ തളച്ച് ഓസീസ് ഫൈനലില്‍

ക്രൈസ്റ്റ്ചര്‍ച്ച്: അണ്ടര്‍-19 ലോകകപ്പില്‍ അഫ്ഗാനെ തകര്‍ത്ത് ഓസ്‌ട്രേലിയ ഫൈനലില്‍. ആറു വിക്കറ്റിനാണ് ഓസീസ് വിജയം സ്വന്തമാക്കിയത്. ആദ്യം ബാറ്റു ചെയ്ത അഫ്ഗാനിസ്ഥാന്‍ 48 ഓവറില്‍ 181 റണ്‍സിന് പുറത്തായി. മറുപടി ബാറ്റിങ്ങിനിറങ്ങിയ ഓസ്‌ട്രേലിയയാകട്ടെ 37.3 ഓവറില്‍ നാലു വിക്കറ്റു നഷ്ടത്തില്‍ ലക്ഷ്യം കണ്ടു.

അഫ്ഗാന്‍ നിരയില്‍ നാലു പേര്‍ മാത്രമാണ് രണ്ടക്കം കണ്ടത്. 80 റണ്‍സ് നേടിയ ഇക്രം അലിയും 20 റണ്‍സ് നേടിയ റഹ്മനുള്ള ഗര്‍ബാസുമാണ് അല്പമെങ്കിലും പിടിച്ചു നിന്നത്. നാലു വിക്കറ്റ് നേടിയ ജോനാഥന്‍ മെര്‍ലോയും രണ്ടു വിക്കറ്റ് നേടിയ സാക്ക് ഇവാന്‍സുമാണ് അഫ്ഗാന്‍ ബാറ്റിംഗിന്റെ നടുവൊടിച്ചത്.

മറുപടി ബാറ്റിംഗിനിറങ്ങിയ ഓസീസിനായി ജാക്ക് എഡ്വേര്‍ഡ്‌സ് 72ഉം പരം ഉപ്പല്‍ 32 ഉം നാഥന്‍ മക്‌സ്വീനി 22ഉം റണ്‍സെടുത്തു. ചൊവ്വാഴ്ച നടക്കുന്ന ഇന്ത്യ- പാക്കിസ്ഥാന്‍ പോരാട്ടത്തില്‍ ജയിക്കുന്നവരായിരിക്കും ഫൈനലില്‍ കങ്കാരുപ്പടയുടെ എതിരാളികള്‍. ഫെബ്രുവരി മൂന്നിനാണ് ഫൈനല്‍.

error: This Content is already Published.!!