ഹരിയാനയെ തകര്‍ത്ത് അഭിമാന കേരളം; രഞ്ജി ട്രോഫി ചരിത്രത്തില്‍ ആദ്യമായി കേരളം ക്വാര്‍ട്ടറില്‍
Posted by
28 November

ഹരിയാനയെ തകര്‍ത്ത് അഭിമാന കേരളം; രഞ്ജി ട്രോഫി ചരിത്രത്തില്‍ ആദ്യമായി കേരളം ക്വാര്‍ട്ടറില്‍

ചണ്ഡീഗഡ്: ഹരിയാനയെ സ്വന്തം തട്ടകത്തില്‍ തകര്‍ത്ത് കേരളം രഞ്ജി ട്രോഫി ക്വാര്‍ട്ടറിലേക്ക് മാര്‍ച്ച് ചെയ്തു. രഞ്ജി ട്രോഫി ചരിത്രത്തില്‍ ആദ്യമായാണ് കേരളം ക്വാര്‍ട്ടറില്‍ പ്രവേശിക്കുന്നത്. കേരളത്തിന്റെ വിജയം ഒരു ഇന്നിങ്‌സിനും എട്ട് റണ്‍സിനുമായിരുന്നു. ഇതോടെ ആറ് മത്സരങ്ങളില്‍ അഞ്ചും ജയിച്ച് ഗ്രൂപ്പില്‍ ഒന്നാമതായാണ് കേരളം അടുത്തഘട്ടത്തിലേക്ക് കടക്കുന്നത്. സ്‌കോര്‍: ഹരിയാന-208/173, കേരളം-389

181 റണ്‍സിന്റെ ഒന്നാം ഇന്നിങ്‌സ് കടവുമായി ബാറ്റിങ്ങിനിറങ്ങിയ ഹരിയാന മൂന്നാം ദിനം കളി നിര്‍ത്തുമ്പോള്‍ അഞ്ചു വിക്കറ്റ് നഷ്ടത്തില്‍ 83 റണ്‍സ് എന്ന നിലയിലായിരുന്നു. ഇന്ന് ബാറ്റിങ് പുനരാരംഭിച്ച ഹരിയാനയ്ക്ക് കേരളത്തിന്റെ വിജയത്തെ തടയാന്‍ സാധിക്കുമായിരുന്നില്ല.

കേരളത്തിന്റെ ബാറ്റ്‌സ്മാന്‍മാരും ബോളേഴ്‌സും ഒരു പോലെ തിളങ്ങിയ മത്സരത്തില്‍, ജലജ് സക്‌സേനയും(205 പന്തില്‍ 91) രോഹന്‍ പ്രേമും(273 പന്തില്‍ 79*) ചേര്‍ന്ന് പടുത്ത് ഉയര്‍ത്തിയ 172 റണ്‍സിന്റെ പാര്‍ട്‌നര്‍ഷിപ്പാണ് കേരളത്തിന്‍ മികച്ച അടിത്തറ പാകിയത്.

ഹരിയാനയുടെ വിക്കറ്റുകള്‍ തുടര്‍ച്ചയായി പിഴുത സന്ദീപ് വാര്യര്‍, വിനോദ് കുമാര്‍, നിധീഷ് എംഡി തുടങ്ങിയ സീമര്‍മാരുടെ നിര കേരളത്തിന്റെ വിജയം അനായായമാക്കുകയായിരുന്നു.

ഏകദിനത്തില്‍ നിന്ന് കോഹ്‌ലി മാറി: രോഹിത്ത് ക്യാപ്റ്റന്‍
Posted by
27 November

ഏകദിനത്തില്‍ നിന്ന് കോഹ്‌ലി മാറി: രോഹിത്ത് ക്യാപ്റ്റന്‍

മുംബൈ: ശ്രീലങ്കയ്‌ക്കെതിരായ ഏകദിന പരമ്പരയ്ക്കുള്ള ഇന്ത്യന്‍ ടീമില്‍ നിന്നും നായകന്‍ വിരാട് കോഹ്‌ലിയെ ഒഴിവാക്കി. ദക്ഷിണാഫ്രിക്കന്‍ പര്യടനത്തിന് മുന്‍പ് വിശ്രമം ആവശ്യമായതിനാലാണ് കോഹ്‌ലിയെ ഒഴിവാക്കിയത്. പകരം രോഹിത് ശര്‍മ ടീമിനെ നയിക്കും. അതേസമയം മൂന്നാം ടെസ്റ്റിനുള്ള ടീമിനെയും കോഹ്‌ലി തന്നെ നയിക്കും. ഓപ്പണര്‍ ശിഖര്‍ ധവാന്‍ ടീമില്‍ തിരിച്ചെത്തി.

ഏകദിന ടീം: രോഹിത് ശര്‍മ (ക്യാപ്റ്റന്‍), ശിഖര്‍ ധവാന്‍, അജിങ്ക്യ രഹാനെ, ശ്രേയസ് അയ്യര്‍, മനീഷ് പാണ്ഡെ, കേദാര്‍ ജാദവ്, ദിനേശ് കാര്‍ത്തിക്, എം.എസ്.ധോണി, ഹര്‍ദിക് പാണ്ഡ്യ, അക്ഷര്‍ പട്ടേല്‍, കുല്‍ദീപ് യാദവ്, യുസ് വേന്ദ്ര ചഹല്‍, ജസ്പ്രീത് ബുംറ, ഭുവനേശ്വര്‍ കുമാര്‍, സിദ്ദാര്‍ഥ് കൗള്‍.

മൂന്നാം ടെസ്റ്റ് ടീം: വിരാട് കോഹ്‌ലി (ക്യാപ്റ്റന്‍), മുരളി വിജയ്, കെ.എല്‍.രാഹുല്‍, ശിഖര്‍ ധവാന്‍, ചേതേശ്വര്‍ പൂജാര, അജിങ്ക്യ രഹാനെ, രോഹിത് ശര്‍മ, വൃദ്ധിമാന്‍ സാഹ, ആര്‍.അശ്വിന്‍, രവീന്ദ്ര ജഡേജ, കുല്‍ദീപ് യാദവ്, മുഹമ്മദ് ഷമി, ഉമേഷ് യാദവ്, ഇഷാന്ത് ശര്‍മ, വിജയ് ശങ്കര്‍.

ഡിസംബര്‍ രണ്ടിന് ഡല്‍ഹിയിലാണ് മൂന്നാം ടെസ്റ്റ് തുടങ്ങുക. മൂന്ന് മത്സരങ്ങളുടെ പരന്പരയില്‍ ഇന്ത്യ 10ന് മുന്നിലാണ്.

 

ശ്രീലങ്കയ്‌ക്കെതിരെ ഇന്ത്യക്ക് ഇന്നിങ്‌സിനും 239 റണ്‍സിനും തകര്‍പ്പന്‍ ജയം; അശ്വിന് 300 വിക്കറ്റ്
Posted by
27 November

ശ്രീലങ്കയ്‌ക്കെതിരെ ഇന്ത്യക്ക് ഇന്നിങ്‌സിനും 239 റണ്‍സിനും തകര്‍പ്പന്‍ ജയം; അശ്വിന് 300 വിക്കറ്റ്

നാഗ്പൂര്‍: ശ്രീലങ്കയ്‌ക്കെതിരായ ടെസ്റ്റ് ടൂര്‍ണമെന്റില്‍ ഇന്ത്യയ്ക്ക് തകര്‍പ്പന്‍ ജയം. ഇന്നിങ്‌സിനും 239 റണ്‍സിനുമാണ് ഇന്ത്യ ജയിച്ചത്. ഇന്ത്യ പടുത്തുയര്‍ത്തിയ 405 റണ്‍സിന്റെ ലീഡിനെതിരെ ബാറ്റേന്തിയ ശ്രീലങ്ക രണ്ടാം ഇന്നിങ്‌സില്‍ 166 റണ്‍സിനു പുറത്തായി. സ്‌കോര്‍: ഇന്ത്യ- 610/6. ശ്രീലങ്ക- 205/166. ഇന്ത്യയുടെ ഏറ്റവും മികച്ച മാര്‍ജിന്‍ വിജയമെന്ന ചരിത്ര നേട്ടവും ഈ മത്സരത്തില്‍ ടീം ഇന്ത്യ സ്വന്തമാക്കി. റെക്കോര്‍ഡുകള്‍ പലത് പിറന്ന മത്സരത്തില്‍ ഇന്ത്യയുടെ അശ്വിന്‍ ടെസ്റ്റില്‍ 300 വിക്കറ്റ് എന്ന നേട്ടവും കൈവരിച്ചു. ഏറ്റവും വേഗത്തില്‍ 300 വിക്കറ്റ് എന്ന നേട്ടം കരസ്ഥമാക്കുന്ന താരമെന്ന റെക്കോര്‍ഡും ഇതോടെ അശ്വിന് സ്വന്തം.

ശ്രീലങ്കയുടെ അവസാന ബാറ്റ്‌സ്മാന്‍ ഗാമേജിനെ പുറത്താക്കിയാണ് അശ്വിന്‍ ഈ നേട്ടം സ്വന്തമാക്കിയത്. ഒന്നാം ഇന്നിങ്‌സില്‍ ഇന്ത്യ ആറിന് 610 റണ്‍സെന്ന നിലയില്‍ ഡിക്ലയര്‍ ചെയ്തിരുന്നു. ഒരു വിക്കറ്റ് നഷ്ടത്തില്‍ 21 റണ്‍സെന്ന നിലയിലാണ് ശ്രീലങ്ക ഇന്നു ബാറ്റിങ് പുനരാരംഭിച്ചത്. മൂന്നു ടെസ്റ്റുകളുടെ പരമ്പരയില്‍ ആദ്യ മല്‍സരം സമനിലയില്‍ അവസാനിച്ചിരുന്നു.

നേരത്തെ, കരിയറിലെ 19-ാം ടെസ്റ്റ് സെഞ്ചുറിക്ക് തന്റെ ഇരട്ടസെഞ്ചുറിയിലൂടെ അടിച്ചെടുത്ത നായകന്‍ വിരാട് കോഹ്‌ലിയുടെ മികവിലാണ് ഒന്നാം ഇന്നിങ്‌സില്‍ ഇന്ത്യ കൂറ്റന്‍ സ്‌കോര്‍ പടുത്തുയര്‍ത്തിയത്. കോഹ്‌ലിയുടെ ഇരട്ടസെഞ്ചുറിക്കു പുറമെ ഓപ്പണര്‍ മുരളി വിജയ് (128), ചേതേശ്വര്‍ പൂജാര (143), രോഹിത് ശര്‍മ (പുറത്താകാതെ 102) എന്നിവരുടെയും മികവില്‍ ആറു വിക്കറ്റ് നഷ്ടത്തില്‍ 610 റണ്‍സെടുത്ത ഇന്ത്യ ഇന്നിങ്‌സ് ഡിക്ലയര്‍ ചെയ്യുകയായിരുന്നു. രോഹിത് സെഞ്ചുറി പൂര്‍ത്തിയാക്കിയതിനു പിന്നാലെയായിയിരുന്നു ഇന്ത്യയുടെ ഡിക്ലറേഷന്‍. ഒന്നാം ഇന്നിങ്‌സില്‍ 205 റണ്‍സിനു പുറത്തായ ശ്രീലങ്കയ്ക്ക് പോരാടാന്‍ ഇന്ത്യ 405 റണ്‍സിന്റെ ഒന്നാം ഇന്നിങ്‌സ് ലീഡ് സമ്മാനിക്കുകയായിരുന്നു.

ചാരമായി ഇംഗ്ലണ്ട്; ആഷസ് ആദ്യ ടെസ്റ്റില്‍ ഓസ്‌ട്രേലിയയ്ക്ക് പത്തു വിക്കറ്റ് വിജയം
Posted by
27 November

ചാരമായി ഇംഗ്ലണ്ട്; ആഷസ് ആദ്യ ടെസ്റ്റില്‍ ഓസ്‌ട്രേലിയയ്ക്ക് പത്തു വിക്കറ്റ് വിജയം

ബ്രിസ്‌ബെയ്ന്‍: വീണ്ടും ആഷസില്‍ ഇംഗ്ലണ്ട് ഗുരന്തം. ആഷസ് പരമ്പരയിലെ ആദ്യ മത്സരത്തില്‍ ഓസ്‌ട്രേലിയക്ക് പത്ത് വിക്കറ്റ് വിജയത്തോടെ തുടക്കം. ഇംഗ്ലണ്ടുയര്‍ത്തിയ വിജയലക്ഷ്യമായ 170 റണ്‍സ് ഓസ്‌ട്രേലിയന്‍ ഓപ്പണര്‍മാരായ ബാന്‍ക്രോഫ്റ്റും ഡേവിഡ് വാര്‍ണറും പുറത്താകാതെ അനായാസം അടിച്ചെടുക്കുകയായിരുന്നു. ഇരുവരും യഥാക്രമം 82 ഉം 87 ഉം റണ്‍സെടുത്താണ് വിജയലക്ഷ്യം മറികടന്നത്.

മത്സരത്തിന്റെ ആദ്യ ദിനം വ്യക്തമായ മേധാവിത്വം നേടിയ ഇംഗ്ലണ്ട് പിന്നീട് തകര്‍ന്നടിയുകയായിരുന്നു. ആദ്യ ഇന്നിങ്‌സില്‍ 302 റണ്‍സെടുത്ത ഇംഗ്ലണ്ട് രണ്ടാം ഇന്നിങ്‌സില്‍ കേവലം 195 റണ്‍സിന് പുറത്തായി. ആദ്യ ഇന്നിങ്‌സില്‍ ഓസ്‌ട്രേലിയ 328 റണ്‍സെടുത്ത് 26 റണ്‍സ് ലീഡ് നേടിയിരുന്നു. ക്യാപ്റ്റന്‍ സ്റ്റീവന്‍ സ്മിത്ത് 141 നേടിയ റണ്‍സിന്റെ ബലത്തിലാണ് ഓസ്‌ട്രേലിയ ആദ്യ ഇന്നിങ്‌സ് ലീഡ് നേടിയത്. സ്റ്റീവന്‍ സ്മിത്താണ് കളിയിലെ താരവും.

രണ്ടാം ഇന്നിങ്‌സില്‍ ഇംഗ്ലീഷ് നിരയില്‍ ക്യാപ്റ്റന്‍ ജോയ് റൂട്ടിന് മാത്രമാണ് അര്‍ദ്ധ ശതകം കടക്കാനായത്. സ്റ്റാര്‍ക്, ഹസ്ലെവുഡ്, ലിയോണ്‍ എന്നിവര്‍ മൂന്ന് വീതം വിക്കറ്റ് നേടിയാണ് ഇംഗ്ലണ്ടിനെ രണ്ടാം ഇന്നിങ്‌സില്‍ 195 റണ്‍സിന് ഒതുക്കിയത്. ആഷസ് പരമ്പരയിലെ രണ്ടാം ടെസ്റ്റ് അടുത്തമാസം രണ്ടിന് അഡ്‌ലൈഡിലാണ്.

നാഗ്പൂര്‍ ടെസ്റ്റില്‍ കോഹ്‌ലിക്ക് ഡബിള്‍ സെഞ്ച്വറി; ഇന്ത്യ മികച്ചനിലയില്‍
Posted by
26 November

നാഗ്പൂര്‍ ടെസ്റ്റില്‍ കോഹ്‌ലിക്ക് ഡബിള്‍ സെഞ്ച്വറി; ഇന്ത്യ മികച്ചനിലയില്‍

നാഗ്പൂര്‍: ശ്രീലങ്കയ്‌ക്കെതിരായ രണ്ടാം ടെസ്റ്റ് ക്രിക്കറ്റില്‍ ഇരട്ട സെഞ്ചുറിയുമായി ക്യാപ്റ്റന്‍ വിരാട് കോഹ്‌ലിയുടെ തകര്‍പ്പന്‍ പ്രകടനം. 259 പന്തില്‍ നിന്നാണ് കോഹ്‌ലിയുടെ ഇരട്ട സെഞ്ചുറി നേട്ടം. 15 ഫോറുകളും രണ്ട് സിക്‌സറുകളും കോഹ്‌ലി അടിച്ചെടുത്തു. ഡബിള്‍ സെഞ്ച്വറിക്ക് പിന്നാലെ കോഹ്‌ലി പെരേരയ്ക്ക് വിക്കറ്റ് സമ്മാനിച്ച് മടങ്ങുകയും ചെയ്തു. 267 പന്തില്‍ നിന്ന് 213 റണ്‍സ് താരം നേടി. 84 റണ്‍സോടെ രോഹിത് ശര്‍മ്മയും 2 റണ്‍സ് എടുത്ത അശ്വിനുമാണ് ക്രീസില്‍.

ഒടുവില്‍ വിവരം കിട്ടുമ്പോള്‍ ഇന്ത്യ അഞ്ചു വിക്കറ്റിന് 584എന്ന ശക്തമായ നിലയിലാണ്.

നായകന്‍ കോഹ്‌ലിക്കും സെഞ്ച്വറി; ഇന്ത്യക്ക് കൂറ്റന്‍ സ്‌കോര്‍
Posted by
26 November

നായകന്‍ കോഹ്‌ലിക്കും സെഞ്ച്വറി; ഇന്ത്യക്ക് കൂറ്റന്‍ സ്‌കോര്‍

നാഗ്പൂര്‍: നാഗ്പൂര്‍ ടെസ്റ്റില്‍ ശ്രീലങ്കയ്‌ക്കെതിരെ ഇന്ത്യയ്ക്ക് കൂറ്റന്‍ സ്‌കോര്‍. 455/4 എന്ന നിലയില്‍ ഇന്ത്യയുടെ ബാറ്റിങ് പുരോഗമിക്കുകയാണ്. മിന്നും ഫോമിലുള്ള ഇന്ത്യന്‍ ക്യാപ്റ്റന്‍ വിരാട് കോഹ്‌ലി(153) നേടിയ സെഞ്ച്വറിയാണ് ഇന്ത്യയുടെ സ്‌കോര്‍ അതിവേഗം 400 കടത്തിയത്. ടെസ്റ്റ് ക്രിക്കറ്റിലെ 19ാം സെഞ്ചുറിയെന്ന നേട്ടമാണ് ഇതോടെ കോഹ്‌ലിക്ക് സ്വന്തമായത്. ടെസ്റ്റുകളില്‍ ഏറ്റവും കൂടുതല്‍ സെഞ്ചുറി നേടിയ ഇന്ത്യന്‍ ക്യാപ്റ്റനെന്ന റെക്കോര്‍ഡും കോഹ്‌ലി സ്വന്തമാക്കി. ഗാവസ്‌കറിന്റെ 11 സെഞ്ചുറികളുടെ റെക്കോര്‍ഡാണ് 12 സെഞ്ചുറികളുമായി കോഹ്‌ലി മറികടന്നത്. ഒരു കലണ്ടര്‍ വര്‍ഷത്തില്‍ ഏറ്റവുമധികം സെഞ്ചുറി നേടുന്ന ക്യാപ്റ്റനെന്ന റെക്കോര്‍ഡും കോഹ്‌ലിക്കാണ് 2017ല്‍ ഇതുവരെ 10 എണ്ണം. 2005ലും 2006ലും റിക്കി പോണ്ടിങ്, 2005ല്‍ ഗ്രേയം സ്മിത്ത് എന്നിവര്‍ നേടിയ ഒന്‍പതു സെഞ്ചുറികളുടെ റെക്കോര്‍ഡാണ് ഇതോടെ തകര്‍ന്നത്.

കോഹ്‌ലിയുടെ സെഞ്ച്വറിയ്ക്ക് പിന്നാലെ പതിനഞ്ചു പന്തില്‍ രണ്ടു റണ്‍സെടുത്ത അജിങ്ക്യ രഹാനെയാണു പുറത്തായി. ദില്‍റുവന്‍ പെരേരയുടെ പന്തില്‍ കരുണരത്‌നെ ക്യാച്ചെടുത്തു പുറത്താക്കുകയായിരുന്നു. ക്യാപ്റ്റന്‍ വിരാട് കോഹ്‌ലി(152)യും, രോഹിത് ശര്‍മ(20)യുമാണ് ക്രീസില്‍. സ്‌കോര്‍: ഇന്ത്യ 455/4.

362 പന്തില്‍ 143 റണ്‍സെടുത്ത ചേതേശ്വര്‍ പുജാരയുടെ വിക്കറ്റാണ് ഇന്ത്യയ്ക്ക് ഇന്നു കളി ആരംഭിച്ചപ്പോള്‍ നഷ്ടമായത്. ഷനകയ്ക്കാണു വിക്കറ്റ്. മൂന്നാം വിക്കറ്റ് കൂട്ടുകെട്ടില്‍ കോഹ്‌ലിക്കൊപ്പം 183 റണ്‍സ് നേടിയാണ് പൂജാരയുടെ മടക്കം. നേരത്തെ എട്ടുമാസത്തെ ഇടവേളയ്ക്കുശേഷം തിരിച്ചെത്തിയ ‘വിശ്വസ്ത ഓപ്പണര്‍’ മുരളി വിജയ് (128) റണ്‍സെടുത്ത് പൂജാരയ്ക്ക് മികച്ച പിന്തുണനല്‍കിയിരുന്നു. ഇതും ഇന്ത്യക്ക് മികച്ച അടിത്തറ പാകി. ഒന്നാം ഇന്നിങ്‌സില്‍ ശ്രീലങ്ക 205 റണ്‍സിനു പുറത്തായിരുന്നു.

ബോളേഴ്‌സ് വാണ നാഗ്പൂര്‍ ടെസ്റ്റില്‍ ബാറ്റ്‌സ്മാന്‍മാര്‍ വീണു; ശ്രീലങ്കയ്ക്കും ഇന്ത്യയ്ക്കും ബാറ്റിങ് തകര്‍ച്ച
Posted by
24 November

ബോളേഴ്‌സ് വാണ നാഗ്പൂര്‍ ടെസ്റ്റില്‍ ബാറ്റ്‌സ്മാന്‍മാര്‍ വീണു; ശ്രീലങ്കയ്ക്കും ഇന്ത്യയ്ക്കും ബാറ്റിങ് തകര്‍ച്ച

നാഗ്പൂര്‍: ഇന്ത്യ-ശ്രീലങ്ക രണ്ടാം ടെസ്റ്റില്‍ ബോളേഴ്‌സിന്റെ തകര്‍പ്പന്‍ പ്രകടനം. നാഗ്പൂര്‍ മൈതാനം പൂര്‍ണ്ണമായും ബോളര്‍മാരെ തുണച്ചപ്പോള്‍ ശ്രീലങ്ക ആദ്യ ദിനത്തില്‍ ഓള്‍ഔട്ട് ആയി. മോശം തുടക്കമായിരുന്നു ടോസ് നേട് ബാറ്റിങ് ലഭിച്ച ശ്രീലങ്കയ്ക്ക് ലഭിച്ചത്. ഓപ്പണര്‍മാര്‍ ഉച്ചഭക്ഷണത്തിന് പിരിയുന്നതിനു മുന്‍പെ തന്നെ മടങ്ങിയ മത്സരത്തില്‍ ലങ്കയുടെ മധ്യനിരയും വാലറ്റവും തകര്‍ന്നടിഞ്ഞു.

മികച്ച രീതിയില്‍ പന്തെറിഞ്ഞ അശ്വിനും ജഡേജയും ഇശാന്ത് ശര്‍മ്മയും ചേര്‍ന്ന് ശ്രീലങ്കയെ ഒന്നാം ഇന്നിഗ്‌സില്‍ 205 റണ്‍സിന് ചുരുട്ടുകെട്ടി. അശ്വിന്‍ നാല് വിക്കറ്റ് വീഴ്ത്തയപ്പോള്‍ ജഡേജയും ഇശാന്തും മൂന്ന് വിക്കറ്റ് വീതം വീഴ്ത്തി. അര്‍ദ്ധ സെഞ്ചുറി നേടിയ നായകന്‍ ദിനേഷ് ചണ്ഡിമലും കരുണരത്‌നെയും മാത്രമാണ് ഇന്ത്യന്‍ ആക്രമണത്തെ ചെറുത്തു നിന്നത്.

മറുപടി ബാറ്റിംഗിനിറങ്ങിയ ഇന്ത്യയുടെ തുടക്കവും പിഴച്ചു. സ്‌കോര്‍ബോര്‍ഡില്‍ 7 റണ്‍സായപ്പോള്‍ 7 റണ്‍സ് നേടിയ കെഎല്‍ രാഹുലിന്റെ വിക്കറ്റ് ഗാമേജ് എടുത്തു.

ആദ്യ ദിനം കളിയവസാനിപ്പിക്കുമ്പോള്‍ ഇന്ത്യ ഒരു വിക്കറ്റിന് പതിനൊന്ന് എന്ന നിലയിലാണ്. ശ്രീലങ്കയുടെ ഒന്നാം ഇന്നിംഗ്‌സ് സ്‌കോറിനൊപ്പമെത്താന്‍ ഇന്ത്യക്ക് ഇനി 194 റണ്‍സ് കൂടി വേണം.

ക്രിക്കറ്റ് ചരിത്രത്തിന്റെ നെറുകയില്‍ കേരളാ വനിതകള്‍; നാഗാലാന്‍ഡിനെ രണ്ടു റണ്‍സിന് ഓള്‍ഔട്ട് ആക്കിയും ഒരു ബോളില്‍ വിജയിച്ചും റെക്കോര്‍ഡ് പ്രകടനം
Posted by
24 November

ക്രിക്കറ്റ് ചരിത്രത്തിന്റെ നെറുകയില്‍ കേരളാ വനിതകള്‍; നാഗാലാന്‍ഡിനെ രണ്ടു റണ്‍സിന് ഓള്‍ഔട്ട് ആക്കിയും ഒരു ബോളില്‍ വിജയിച്ചും റെക്കോര്‍ഡ് പ്രകടനം

കൊച്ചി: രണ്ടു റണ്‍സ് എടുക്കുന്നതിനിടെ നാഗാലാന്‍ഡ് വനിതകള്‍ക്ക് നഷ്ടമായത് 10 വിക്കറ്റ്! അതെ സമാനതകളില്ലാത്ത തോല്‍വിയിലേക്ക് നാഗാ പെണ്‍കൊടികളെ തള്ളിവിട്ടത് കേരളത്തിന്റെ പെണ്‍പുലികളും. അസാമാന്യമായ ബോളിങ് പ്രകടനത്തിലൂടെ ലോക ക്രിക്കറ്റിലെ തന്നെ ശ്രദ്ധാകേന്ദ്രമായി മാറിയിരിക്കുകയാണ് കേരളത്തിന്റെ അണ്ടര്‍ 19 വനിതാ ക്രിക്കറ്റ് ടീം.

ബിസിസിഐ അണ്ടര്‍ 19 വനിതാ ലീഗില്‍ എതിരാളികളെ വെറും രണ്ടു റണ്‍സിന് ഓള്‍ഔട്ടാക്കിയാണ് കേരള വനിതകള്‍ ചരിത്രമെഴുതിയത്. നാഗാ പെണ്‍കുട്ടികളില്‍ 9 പേരും ഡക്ക് ആയിരുന്നു. ടീമിന്റെ രണ്ട് റണ്‍സ് രണ്ട് താരങ്ങള്‍ പങ്കുവെക്കുകയും ചെയ്തു.

മൂന്നു റണ്‍സ് വിജയലക്ഷ്യവുമായിറങ്ങിയ കേരളം ആദ്യ പന്തില്‍ത്തന്നെ വിജയം കരസ്ഥമാക്കി. 49.5 ഓവറും 10 വിക്കറ്റും അപ്പോഴും ബാക്കി!

ഫസ്റ്റ് ക്ലാസ് ക്രിക്കറ്റിലെ ഏറ്റവും കുറഞ്ഞ ടീം സ്‌കോറാണ് നാഗാലാന്‍ഡ് നേടിയ രണ്ടു റണ്‍സ്! 1810ല്‍ ഇംഗ്ലണ്ടിലെ ഓള്‍ഡ് ലോര്‍ഡ്‌സില്‍ ദ് ബീസ് (the Bs) ഓള്‍ ഇംഗ്ലണ്ട് ടീമിനെതിരെ നേടിയ ആറു റണ്‍സിന്റെ റെക്കോര്‍ഡാണ് നാഗാലാന്‍ഡ് വനിതകള്‍ ‘തകര്‍ത്ത’ത്.

നേരത്തെ, ബിസിസിഐ അണ്ടര്‍ 19 വനിതാ ലീഗില്‍ നാഗാലാന്‍ഡും മണിപ്പൂരും തമ്മിലുള്ള മല്‍സരത്തില്‍ 136 വൈഡുകള്‍ പിറന്നത് വാര്‍ത്തയായിരുന്നു. അന്നത്തെ മല്‍സരത്തില്‍ ജയിച്ച നാഗാലാന്‍ഡ് ടീമാണ് ഇത്തവണ രണ്ട് റണ്‍സിന് പുറത്തായി നാണക്കേട് വരുത്തിവച്ചത്.

ജയം തേടി ഇന്ത്യ; ബാറ്റിങില്‍ പതറി ലങ്ക; ടോസ് നേടിയ ശ്രീലങ്കയ്ക്ക് രണ്ട് വിക്കറ്റ് നഷ്ടം
Posted by
24 November

ജയം തേടി ഇന്ത്യ; ബാറ്റിങില്‍ പതറി ലങ്ക; ടോസ് നേടിയ ശ്രീലങ്കയ്ക്ക് രണ്ട് വിക്കറ്റ് നഷ്ടം

നാഗ്പൂര്‍: ആദ്യ ടെസ്റ്റ് സമനിലയിലായതോടെ ജയം തേടി ഇന്ത്യയും ശ്രീലങ്കയും രണ്ടാം ടെസ്റ്റില്‍ ഏറ്റുമുട്ടുന്നു. ടോസ് നേടിയ ശ്രീലങ്ക ബാറ്റിങ് തുടരുകയാണ്. തുടക്കം തന്നെ പിഴച്ച ലങ്കയ്ക്ക് രണ്ട് വിക്കറ്റ് നഷ്ടമായി. ഉച്ചഭക്ഷണ്തതിന് പിരിയുമ്പോള്‍ ശ്രീലങ്ക 47/2 എന്ന നിലയിലാണ്. ഇഷാന്ത് ശര്‍മ്മയുടെ ബോളില്‍ സമരവിക്രമയും (13) അശ്വിന്റെ ആക്രമണത്തില്‍ തിരിമന്ന(9)യും കൂടാരം കയറുകയായിരുന്നു. 25 റമണ്‍സ് എടുത്ത കരുണാരത്‌നയും ഒരു റണ്ണുമായി അഞ്ജലാ മാത്യൂസുമാണ് ക്രീസില്‍.

മൂന്നു ടെസ്റ്റുകളുടെ പരമ്പരയില്‍ എതിരാളിക്ക് മേല്‍ ആധിപത്യം സ്ഥാപിക്കാന്‍ ഈ മത്സരത്തിലെ വിജയം ഇരുകൂട്ടര്‍ക്കും അനിവാര്യമാണ്. നാദ്പൂരിലെ വിദര്‍ഭ ക്രിക്കറ്റ് അസോസിയേഷന്‍ സ്‌റ്റേഡിയത്തിലാണ് മത്സരം.

കൊല്‍ക്കത്ത ടെസ്റ്റില്‍ എട്ടു വിക്കറ്റു വീഴ്ത്തിയ ഭുവനേശ്വര്‍ കുമാറും രണ്ടാം ഇന്നിങ്‌സില്‍ 94 റണ്‍സ് നേടിയ ശിഖര്‍ ധവാനും ഇന്ത്യന്‍ ടീമിലില്ല. കൊല്‍ക്കത്തയില്‍ പരാജയപ്പെട്ട രവീന്ദ്ര ജഡേജയ്ക്കു പകരം കുല്‍ദീപ് യാദവിനെ പരീക്ഷിക്കും.

കളിക്കാരെ വിലയിരുത്തുമ്പോള്‍, അവര്‍ക്ക് തയ്യാറെടുക്കാന്‍ സമയം അനുവദിച്ചോ എന്നും പരിഗണിക്കണം: ബിസിസിഐക്കെതിരെ രൂക്ഷവിമര്‍ശനവുമായി വിരാട് കോഹ്‌ലി
Posted by
23 November

കളിക്കാരെ വിലയിരുത്തുമ്പോള്‍, അവര്‍ക്ക് തയ്യാറെടുക്കാന്‍ സമയം അനുവദിച്ചോ എന്നും പരിഗണിക്കണം: ബിസിസിഐക്കെതിരെ രൂക്ഷവിമര്‍ശനവുമായി വിരാട് കോഹ്‌ലി

ന്യൂഡല്‍ഹി: ബിസിസിഐക്കെതിരെ തുറന്നടിച്ച് ഇന്ത്യന്‍ നായകന്‍ വിരാട് കോഹ്‌ലി. ബിസിസിഐയുടെ ആസുത്രണത്തിലെ പിഴവുകള്‍ കളിക്കാരുടെ പ്രകടനത്തെ ബാധിക്കുന്നുണ്ടെന്നും, ദക്ഷണിണാഫ്രിക്കയിലെ പര്യടനത്തിനൊരുങ്ങും മുമ്പ് പരിശീലനത്തിന് സമയം ലഭിച്ചില്ലെന്നും വിരാട് ആരോപിച്ചു.

ഒരു പരമ്പര കഴിഞ്ഞ് അടുത്ത പരമ്പരയ്ക്കായി തയ്യാറെടുക്കാന്‍ വെറും രണ്ട് ദിവസമാണ് കളിക്കാര്‍ക്ക് അനുവദിച്ചതെന്നും, അത് കളിയെ പ്രതികൂലമായി ബാധിക്കുമെന്നും വിരാട് പറഞ്ഞു.

ഒരു മാസത്തെ ഇടവേള ലഭിച്ചിരുന്നെങ്കില്‍ കൃത്യമായ പരിശീലനം നേടാമായിരുന്നു. കളി കഴിയുമ്പോള്‍ പ്ലെയേര്‍സിന്റെ പ്രകടനം എല്ലാവരും വിലയിരുത്താറുണ്ട് എന്നാല്‍ മികച്ച പ്രകടനം പുറത്തെടുക്കാന്‍ അവര്‍ക്ക് തയ്യാറെടുപ്പിനും സമയം അനുവദിക്കണമെന്നും വിരാട് കോഹ്‌ലി വ്യക്തമാക്കി. ശ്രീലങ്കന്‍ പരമ്പരയ്ക്ക് ശേഷം ഉടന്‍ തന്നെ ദക്ഷിണാഫ്രിക്കന്‍ പര്യടനം നേരിടേണ്ടി വന്നതാണ് ഇന്ത്യന്‍ നായകനെ രൂക്ഷ അഭിപ്രായപ്രകടനത്തിന് നിര്‍ബന്ധിതനാക്കിയത്.