Champions trophy- India vs SriLanka match today
Posted by
08 June

ചാമ്പ്യന്‍സ് ട്രോഫി: സെമി ലക്ഷ്യം വെച്ച് ഇന്ത്യ ഇന്ന് ശ്രീലങ്കയ്ക്ക് എതിരെ

ബര്‍മിങ്ഹാം: സെമി ലക്ഷ്യം വെച്ച് ഇന്ത്യ ഇന്ന് ചാമ്പ്യന്‍സ് ട്രോഫി ക്രിക്കറ്റില്‍ കളത്തിലിറങ്ങുന്നു. അയല്‍ക്കാരായ ശ്രീലങ്കയാണ് നീലപ്പടയുടെ എതിരാളികള്‍. ഓവല്‍ മൈതാനത്ത് ഉച്ചകഴിഞ്ഞ് മൂന്നു മണി മുതലാണ് മത്സരം. പാകിസ്താനെതിരെ അനായാസം വിജയം സ്വന്തമാക്കിയതിന്റെ ആത്മവിശ്വാസത്തിലാണ് ടീം ഇന്ത്യ ഇന്നിറങ്ങുന്നത്. എന്നാല്‍ ലങ്കയെ നിസാരക്കാരായി തള്ളിക്കളയാനാവില്ലെന്ന ഉത്തമ ബോധ്യവും ഇന്ത്യക്കുണ്ട്. അതേസമയം ഇന്ന് വിജയം നേടാനായില്‍ ഇന്ത്യക്ക് ഇംഗ്ലണ്ടിന് പിന്നാലെ സെമിയില്‍ എത്തുന്ന ടീമായി മാറാനാവും. പാക് ബോളിങ് നിരയെ അപമാനിച്ച് മടക്കിയ ഇന്ത്യയുടെ ബാറ്റ്‌സ്മാന്‍മാരും, പാക് ബാറ്റിങ് നിരയെ ഒതുക്കി വിട്ട ഇന്ത്യന്‍ ബോളര്‍മാരും മികച്ച ഫോമിലാണ്.

പാകിസ്താന് എതിരെ ഇറങ്ങിയ ആദ്യ നാല് ബാറ്റ്‌സ്മാന്‍മാരും അര്‍ധസെഞ്ച്വറി നേടിയിരുന്നു. അഞ്ചാമനായി ക്രീസില്‍ എത്തിയ ഹര്‍ദിക് പാണ്ഡ്യയും കൂറ്റനടികളോടെ താന്‍ മികച്ചഫോമിലാണെന്ന് തെളിയിച്ചിരുന്നു. റണ്‍സ് വിട്ടുകൊടുക്കുന്നതില്‍ പിശുക്ക് കാട്ടിയ ഇന്ത്യന്‍ ബോളര്‍മാര്‍, വിക്കറ്റ് വീഴ്ത്തുന്നതില്‍ ഒരു വിട്ടുവീഴ്ചയും കാണിച്ചതുമില്ല.

പാകിസ്താനെതിരെ കളിച്ച അതേ ഇന്ത്യന്‍ നിര തന്നെയായിരിക്കും ഇന്ന് ലങ്കയ്‌ക്കെതിരെ ഇറങ്ങുക.
ടീമില്‍ വലിയ മാറ്റങ്ങള്‍ക്ക് സാധ്യതയില്ല. സ്പിന്നര്‍ അശ്വിന്‍ അന്തിമ ഇലവനില്‍ ഇടം നേടുമോ എന്നതു മാത്രമാണ് ഏവരും ഉറ്റുനോക്കുന്നത്. അശ്വിനെ അവസാന ഇലവനില്‍ ഉള്‍പ്പെടുത്തിയാല്‍ ഒരു പേസ് ബോളറെ ഒഴിവാക്കിയേക്കും.

അതേസമയം ദക്ഷിണാഫ്രിക്കയോട് 96 റണ്‍സിന്റെ തോല്‍വി വഴങ്ങിയ ശേഷമാണ് ലങ്കയുടെ വരവ്. ദക്ഷിണാഫ്രിക്ക മുന്നോട്ടുവെച്ച 300 റണ്‍സ് പിന്തുടര്‍ന്ന ലങ്കന്‍ പടയ്ക്ക് 203 റണ്‍സ് എടുക്കാന്‍ മാത്രമേ കഴിഞ്ഞിരുന്നുള്ളൂ. ദക്ഷിണാഫ്രിക്കയ്‌ക്കെതിരെ അര്‍ധ സെഞ്ച്വറി നേടിയ ഉപുല്‍ തരംഗ സസ്‌പെന്‍ഷനെ തുടര്‍ന്ന് ഇന്ന് കളിക്കില്ല. അതേസമയം പരിക്കില്‍ നിന്ന് മുക്തനായ നായകന്‍ ഏഞ്ജലോ മാത്യൂസ് ടീമില്‍ തിരിച്ചെത്തും.

ഉപുല്‍ തരംഗയ്ക്ക് പകരം ഡിക്ക്വെല്ലിയ്‌ക്കൊപ്പം, ധനുഷ്‌ക ഗുണതിലകെയാകും ലങ്കന്‍ ഇന്നിങ്‌സ് ഓപ്പണ്‍ ചെയ്യുക. ലസിത് മലിംഗ, നുവാന്‍ പ്രദീപ്. തിസര പെരേര എന്നിവരാണ് ബോളിങ് നയിക്കുക. ടൂര്‍ണമെന്റില്‍ നിലനില്‍ക്കണമെങ്കില്‍ വിജയത്തില്‍ കുറഞ്ഞൊന്നും ശ്രീലങ്കയ്ക്ക് മതിയാകില്ല. എന്നാല്‍ കെന്നിംഗ്ടണ്‍ ഓവലില്‍ മഴ കളിക്കുമോ ഇത്തവണയും എന്ന ആശങ്കയും നിലനില്‍ക്കുന്നുണ്ട്.

off spinner R aswin against ex india cricket player  virendar sewag
Posted by
07 June

വീരേന്ദര്‍ സേവാഗിനെക്കുറിച്ച് തനിക്ക് ഉള്ളത് മനോവീര്യം കെടുത്തുന്ന ഓര്‍മകള്‍: സ്പിന്നര്‍ ആര്‍ അശ്വിന്‍

ഡല്‍ഹി: മുന്‍ ഇന്ത്യന്‍ ബാറ്റ്‌സ്മാന്‍ വീരേന്ദര്‍ സേവാഗിനെക്കുറിച്ച് തനിക്ക് മനോവീര്യം കെടുത്തുന്ന ഓര്‍മകളാണുള്ളതെന്ന് ഓഫ് സ്പിന്നര്‍ ആര്‍ അശ്വിന്‍. വാട്ട് വിത്ത് ദ ഡക്ക് ടു എന്ന ചാറ്റ് ഷോയില്‍ സംസാരിക്കവേയാണ് നെറ്റ് പ്രാക്ടീസിനിടെ സേവാഗില്‍ നിന്നുണ്ടായ അനുഭവങ്ങള്‍ അശ്വിന്‍ പറഞ്ഞത്. ഇന്ത്യന്‍ ക്രിക്കറ്റ് ടീമിന്റെ പുതിയ കോച്ചാകാന്‍ സാധ്യത കല്‍പ്പിക്കപ്പെടുന്ന താരങ്ങളില്‍ പ്രമുഖനാണ് സേവാഗ്.

ധാംബുള്ളയില്‍ വെച്ചുണ്ടായ ഒരു അനുഭവമാണ് അശ്വിന് പറയാനുള്ളത്. നെറ്റ്‌സില്‍ ബൗള്‍ ചെയ്ത തന്നെ സേവാഗ് അടിച്ച് പറത്തി. ആദ്യം ഓഫ് സ്റ്റമ്പിന് പുറത്ത് എറിഞ്ഞു. സേവാഗ് കട്ട് ചെയ്തു. ഓഫ് സ്റ്റമ്പില്‍ എറിഞ്ഞു, അതും സേവാഗ് കട്ട് ചെയ്തു. അടുത്ത പന്ത് മിഡില്‍ സ്റ്റംബില്‍ എറിഞ്ഞു അതും സേവാഗ് കട്ട് ചെയ്തു. ലെഗ് സ്റ്റമ്പില്‍ എറിഞ്ഞ അടുത്ത പന്തും സേവാഗ് കട്ട് ചെയ്തു.

എന്ത് കുന്തമാണ് ഇവിടെ സംഭവിക്കുന്നത് എന്ന് മനസില്‍ ഓര്‍ത്ത് ഒരു ഫുള്‍ ബോള്‍ എറിഞ്ഞു. സേവാഗ് മുന്നോട്ട് കയറി കൂറ്റന്‍ ഒരു സിക്‌സടിച്ചു. താന്‍ ഇന്ത്യന്‍ ടീമില്‍ ഇടം കണ്ടെത്താന്‍ കഷ്ടപ്പെടുന്ന സമയം കൂടിയായിരുന്നു അത്. ഒന്നുകില്‍ താന്‍ അത്ര നല്ല ബൗളറല്ല അല്ലെങ്കില്‍ ഇയാള്‍ അത്രയ്ക്കും മികച്ചവനാണെന്ന തോന്നിയെന്ന് അശ്വിന്‍ പറയുന്നു.

ബാറ്റിങ് ഇതിഹാസമായ സച്ചിന്‍ പോലും തന്നെ ഇത്രയും ബുദ്ധിമുട്ടിച്ചിട്ടില്ല എന്നാണ് അശ്വിന്‍ പറയുന്നത്. ഇത് കുറേ ദിവസം തുടര്‍ന്നപ്പോള്‍ താന്‍ സേവാഗിനോട് തന്നെ സംസാരിക്കാന്‍ തീരുമാനിച്ചു. സേവാഗിന്റെ പ്രതികരണം തന്നെ അത്ഭുതപ്പെടുത്തുന്നതായിരുന്നു. ഓഫ് സ്പിന്‍ ബൗളര്‍മാരെ താന്‍ ബൗളര്‍മാരായി തന്നെ കാണുന്നില്ല എന്നായിരുന്നു തന്നോട് സേവാഗ് പറഞ്ഞത്. അവര്‍ ഒരിക്കലും തന്നെ ബുദ്ധിമുട്ടിച്ചിട്ടേ ഇല്ല. അനായാസമായി താനവരെ അടിച്ചുപറത്തും. ഒരു പത്ത് വയസ്സുകാരന്‍ തനിക്കെതിരെ ബൗള്‍ ചെയ്താല്‍ താന്‍ എങ്ങനെ ബാറ്റ് ചെയ്യുമോ അത്രയ്ക്കും അനായാസമാണ് സേവാഗ് തനിക്കെതിരെ ബാറ്റ് ചെയ്തതെന്നും അശ്വിന്‍ ഓര്‍ക്കുന്നു.

തന്റെ മികച്ച പന്തുകളെല്ലാം സേവാഗ് അടിച്ചുപറത്തുന്നത് കണ്ട് അവസാനം അശ്വിന്‍ ഒരു വഴി കണ്ടുപിടിച്ചു. ഏറ്റവും മോശം പന്തുകള്‍ സേവാഗിനെതിരെ എറിയുക. അത് ഒട്ടും പ്രതീക്ഷിക്കാത്ത സേവാഗ് വിക്കറ്റ് കളയും. ഐപിഎല്ലിലും ഈ സൂത്രം താന്‍ പ്രയോഗിച്ച് വിജയിച്ചിട്ടുണ്ട് എന്ന് അശ്വിന്‍ പറഞ്ഞു.

പനി പിടിച്ച് കളിച്ച ഒരു ദിവസം ഹര്‍ഭജന്‍ സിങ്ങിനെ താന്‍ 12 സിക്‌സറിന് പറത്തിയ കാര്യം സേവാഗ് പറഞ്ഞതും അശ്വിന്‍ ഓര്‍ക്കുന്നു. സേവാഗിന്റെ ഈഗോയ്‌ക്കെതിരെയാണ് തനിക്ക് പന്തെറിയേണ്ടി വന്നത്. ടീം മീറ്റിങില്‍ ഏറ്റവും കുറച്ച് സംസാരിക്കുന്ന ആളും സേവാഗ് ആയിരുന്നെന്ന് അശ്വിന്‍ പറയുന്നു.

Virat Kohli breaks up with pepsi
Posted by
07 June

കോടികള്‍ പ്രതിഫലം വേണ്ട; പെപ്‌സി പരസ്യം ഉപേക്ഷിച്ച് വിരാട് കോഹ്‌ലി

ബാംഗ്ലൂര്‍: പെപ്‌സിയുമായി കരാര്‍ പുതുക്കാന്‍ താല്‍പര്യമില്ലെന്നു ഇന്ത്യന്‍ ക്രിക്കറ്റ് നായകന്‍ വിരാട് കോഹ്ലി. പ്രമുഖ ശീതള പാനീയ കമ്പനിയായ പെപ്‌സിയുമായി ആറു വര്‍ഷം നീണ്ട കരാര്‍ ജൂണ്‍ 30 ന് അവസാനിക്കുകയാണ്. കരാര്‍ പുതുക്കാന്‍ താത്പര്യമില്ലെന്നും പരസ്യത്തില്‍ നിന്നും ലഭിക്കുന്ന വരുമാനം വേണ്ടെന്നു വയ്ക്കുകയാണെന്നും കോഹ്‌ലി പ്രമുഖ ദേശീയ മാധ്യമത്തിന് നല്‍കിയ അഭിമുഖത്തില്‍ വ്യക്തമാക്കി.

താന്‍ ഇത്തരം ശീതള പദാര്‍ത്ഥങ്ങള്‍ ഉപയോഗിക്കാറില്ല. പണം കിട്ടും എന്ന ഒറ്റക്കാരണത്താല്‍, താന്‍ ഉപയോഗിക്കാത്ത പദാര്‍ത്ഥങ്ങള്‍ മറ്റുള്ളവരോട് ഉപയോഗിക്കണമെന്ന് ആവശ്യപ്പെടാന്‍ ആഗ്രഹിക്കുന്നില്ലെന്നും കോഹ്‌ലി അഭിമുഖത്തില്‍ വ്യക്തമാക്കി.

പെപ്‌സിയുമായുള്ള കരാറിലൂടെ കോടിക്കണക്കിന് രൂപയാണ് കോഹ്‌ലിയ്ക്ക് പ്രതിഫലമായി ലഭിച്ചിരുന്നത്. പെപ്‌സിക്കാകട്ടെ യുവാക്കള്‍ക്കിടയില്‍ ഏറെ സ്വാധീനമുള്ള കോഹ്‌ലിയെ മോഡല്‍ ആക്കിയതിലൂടെ വന്‍ ലാഭം കൊയ്യാനും സാധിച്ചിരുന്നു. എന്നാല്‍ കോഹ്‌ലിയുടെ പിന്മാറ്റം പെപ്‌സിയുടെ ഭാവിയെ എങ്ങനെ ബാധിക്കുമെന്നതാണ് ഏവരും ഉറ്റുനോക്കുന്നത്.

നേരത്തെ മഹേന്ദ്രസിങ് ധോണി പെപ്സിയുമായുള്ള 11 വര്‍ഷത്തെ കരാര്‍ 2016-ല്‍ അവസാനിപ്പിച്ചിരുന്നു. ഇതോടെ ഇന്ത്യന്‍ ടീമിലെ രണ്ട് താരങ്ങളാണ് പെപ്സിയുമായുള്ള കരാര്‍ അവസാനിപ്പിരിക്കുന്നത്

Yuvraj wins hearts of Pakistan fans
Posted by
05 June

പനി കിടക്കയില്‍ നിന്നും എത്തി; പാകിസ്താന്‍ താരങ്ങളുടെയും കാണികളുടെയും ഹൃദയം കീഴടക്കി യുവി

എഡ്ജ്ബാസ്റ്റണ്‍: ക്രിക്കറ്റ് മാന്യന്മാരുടെ കളിയാണെന്ന് ഒരിക്കല്‍ കൂടി ഓര്‍മ്മിപ്പിച്ച് യുവരാജ് സിങ്. ചാമ്പ്യന്‍സ് ട്രോഫിയില്‍ പാകിസ്താനെ തകര്‍ത്തെറിഞ്ഞ ഇന്ത്യ കളിക്കളത്തില്‍ കാണിച്ചത് യഥാര്‍ഥ സ്‌പോര്‍ട്‌സ്മാന്‍ സിപിരിറ്റ്. ചിരവൈരികളായ പാകിസ്താനെതിരെ നയതന്ത്ര ബന്ധം പോലും വശളായിരിക്കുന്ന വേളയില്‍ നടക്കുന്ന കളിയായിരുന്നിട്ടും ടീം ഇന്ത്യ പുറത്തെടുത്തത് മാന്യമായ കളി മാത്രം. ഒരുവേളയില്‍ പാകിസ്താന്‍ ആരാധകരുടെ പോലും ഹൃദയം കീഴടക്കും വിധമായിരുന്നു ഇന്ത്യന്‍ താരങ്ങളുടെ പെരുമാറ്റം.

മത്സരത്തിന്റെ 46ാം ഓവറില്‍ പരുക്കേറ്റ് നിലത്തിരുന്ന പാക് പേസ് ബൗളര്‍ വഹാബ് റിയാസിനെ സാന്ത്വനിപ്പിക്കാന്‍ ഇന്ത്യന്‍ താരം യുവരാജ് എത്തിയത് വേറിട്ട അനുഭവമായി. പരിക്കേറ്റ് വേദനകൊണ്ട പുളഞ്ഞ പാക് താരത്തെ ആശ്വസിപ്പിക്കുകയായിരുന്നു യുവരാജ് സിങ്. ഇന്ത്യയുടെ പാകിസ്താനും തമ്മിലുളള ശത്രുത കളിയില്‍ മാത്രമാണെന്നും താരങ്ങള്‍ക്കിടയില്‍ ഇല്ലെന്നും തെളിക്കുകയായിരുന്നു യുവരാജ്. ഈ കാഴ്ചകണ്ട പാക് ആരാധകര്‍ പോലും ഒരു വേള എഴുന്നേറ്റ് നിന്ന് കൈയ്യടിച്ചതായി മാധ്യമങ്ങള്‍ റിപ്പോര്‍ട്ട് ചെയ്യുന്നു.

ഇന്ത്യാ-പാക് മത്സരത്തില്‍ കളിയിലെ താരവും യുവിയായിരുന്നു. പനിയെ തോല്‍പ്പിച്ചെത്തിയ സാക്ഷാല്‍ യുവരാജ് സിങ് തന്നെയായിരുന്നു. 32 പന്തില്‍ എട്ട് ഫോറും ഒരു സിക്സും സഹിതം 53 റണ്‍സാണ് യുവരാജ് അടിച്ചുകൂട്ടിയത്. ഒരു ഘട്ടത്തില്‍ ഇന്ത്യന്‍ സ്‌കോര്‍ ഇഴഞ്ഞുനീങ്ങവെ യുവരാജിന്റെ വേഗമേറിയ ഇന്നിങ്‌സാണ് ടീം ഇന്ത്യയെ 300 കടത്തിയത്.

മഴകളിച്ച മത്സരത്തില്‍ ഡെക്ക് വര്‍ത്ത് ലൂയിസ് നിയമ പ്രകാരം 124 റണ്‍സിനാണ് ഇന്ത്യ ജയിച്ചത്. യുവരാജിനെ കൂടാതെ ഇന്ത്യയ്ക്കായി കോഹ്ലി, ധവാന്‍, രോഹിത്ത് എന്നിവര്‍ അര്‍ധ സെഞ്ച്വറി നേടി. മഴ പലപ്പോഴും തടസപ്പെടുത്തിയ മത്സരത്തില്‍ ഇന്ത്യയുടെ കൂറ്റന്‍ വിജയലക്ഷ്യത്തിന് മുന്നില്‍ 33.4 ഓവറില്‍ 164 റണ്‍സിന് പാകിസ്താന്‍ കീഴടങ്ങുകയായിരുന്നു.

champions trophy cricket Australia bangladesh
Posted by
05 June

ചാംപ്യന്‍സ് ട്രോഫി ക്രിക്കറ്റ്: ഓസ്‌ട്രേലിയയും ബംഗ്ലാദേശും ഇന്ന് ഏറ്റുമുട്ടും

ബര്‍മിങ്ഹാം : ചാംപ്യന്‍സ് ട്രോഫി ക്രിക്കറ്റില്‍ ഓസ്‌ട്രേലിയയും ബംഗ്ലാദേശും തമ്മിലുള്ള പോരാട്ടം ഇന്ന്. ആദ്യ ജയം തേടിയാണ് ഇരുടീമുകളുടേയും പോരാട്ടം. ന്യൂസീലാന്‍ഡിനെതിരായ ഓസ്‌ട്രേലിയയുടെ ആദ്യ മല്‍സരം മഴമൂലം ഉപേക്ഷിച്ചപ്പോള്‍ ബംഗ്ലദേശ് ഇംഗ്ലണ്ടിനോട് തോറ്റു. ഇന്നത്തെ മല്‍സരത്തിനും മഴഭീഷണിയുണ്ട്.ബംഗ്ലദേശിനെതിരായ മല്‍സരഫലം ഓസ്‌ട്രേലിയയുടെ സെമിപ്രതീക്ഷകളെ സ്വാധീനിക്കും. ന്യൂസീലന്‍ഡിനെതിരായ മല്‍സരം നഷ്ടമാക്കിയ മഴ ഇന്നും ഓവലില്‍ ഭീഷണിയാണ്. കളി ഉപേക്ഷിക്കേണ്ടി വന്നാല്‍ ഓസീസിന്റെ സെമിസാധ്യത തുലാസിലാകും.

champions trophy cricket india beat pakistan
Posted by
04 June

യുദ്ധം ജയിച്ച് വീരപുത്രന്‍മാര്‍: ചാംപ്യന്‍സ് ട്രോഫി മത്സരത്തില്‍ പാകിസ്താനെ തകര്‍ത്തെറിഞ്ഞ് ഇന്ത്യ

ബിര്‍മിങ്ഹാം: ചാംപ്യന്‍സ് ട്രോഫി മത്സരത്തില്‍ പാകിസ്താനെ തകര്‍ത്തെറിഞ്ഞ് ഇന്ത്യ. മഴമൂലം 41 ഓവറില്‍ 289 ആയി ലക്ഷ്യം പുനര്‍നിര്‍ണയിച്ച മല്‍സരത്തില്‍ വിജയലക്ഷ്യത്തിലെത്തുന്നതിന് മുമ്പെ ഇന്ത്യന്‍ ബോളിങ്‌നിര പാകിസ്താനെ എറിഞ്ഞിട്ടു. 164 റണ്‍സ് മാത്രമേ പാകിസ്താന് സ്‌കോര്‍ ചെയ്യാനായുള്ളൂ. 34-ാം ഓവറില്‍ പാകിസ്താന്‍ ഓള്‍ ഔട്ടായി.

പാകിസ്താന് വേണ്ടി അര്‍ധസെഞ്ചുറി നേടിയ അസ്ഹര്‍ അലി (65 പന്തില്‍ 50), ബാബര്‍ അസം (12 പന്തില്‍ എട്ട്), അഹമ്മദ് ഷെഹ്‌സാദ് (22 പന്തില്‍ 12), ശുഐബ് മാലിക്ക് (ഒന്‍പതു പന്തില്‍ 15), മുഹമ്മദ് ഹഫീസ് (43 പന്തില്‍ 33) , ഇമാദ് വാസിം (0), സര്‍ഫ്രാസ് അഹമ്മദ് (16 പന്തില്‍ 15) എന്നിവരാണ് പുറത്തായത്. ഷെഹ്‌സാദിനെ ഭുവനേശ്വര്‍ കുമാറും ബാബര്‍ അസമിനെ ഉമേഷ് യാദവും, ഇമാദ് വാസിമിനെയും സര്‍ഫ്രാസിനെയും പാണ്ഡ്യയും അസ്ഹര്‍ അലി, ഹഫീസ് എന്നിവരെ ജഡേജയുമാണ് മടക്കിയത്. മികച്ച തുടക്കം ലഭിച്ച മാലിക്കിനെ ജഡേജ നേരിട്ടുള്ള ഏറില്‍ റണ്ണൗട്ടാക്കി
ഓപണറായ അഹ്മദ് ഷെഹ്‌സാദും (12 റണ്‍സ്), ബാബര്‍ അസം (8 റണ്‍സ്) എന്നിവര്‍ വേഗം പുറത്തായത് പാകിസ്തന് തിരിച്ചടിയായി. ഭുവനേശ്വര്‍ ഷെഹ്‌സാദിനെ വിക്കറ്റിനുമുമ്പില്‍ കുരുക്കിയപ്പോള്‍ അസമിനെ യാദവ് ജഡേജയുടെ കൈകളിലെത്തിച്ചു.

ആദ്യ ബാറ്റ് ചെയ്ത ഇന്ത്യ 48 ഓവറില്‍ മൂന്നു വിക്കറ്റ് നഷ്ടത്തില്‍ 319 റണ്‍സ് എടുത്തിരുന്നു. ഓപണര്‍മാരായ രോഹിത് ശര്‍മയും 91(119) ശിഖര്‍ ധവാനും 68(65) അര്‍ധസെഞ്ച്വറി നേടി. ഒന്നാം വിക്കറ്റില്‍ ഈ കൂട്ട്‌ക്കെട്ട് നേടിയത് 136 റണ്‍സാണ്. ശദാബ് ഖാന്റെ ബൗളില്‍ അസ്ഹര്‍ അലിക്ക് ക്യാച്ച് നല്‍കി ശിഖര്‍ ധവാന്‍ മടങ്ങി. രോഹത്തിന് കൂട്ടായി ക്യാപ്റ്റന്‍ കോഹ്‌ലി എത്തിയെങ്കിലും സ്‌കോര്‍ ബോര്‍ഡില്‍ 192 റണ്‍സെത്തിയപ്പോള്‍ ശര്‍മ റണ്‍ഔട്ടായി. ഒമ്പത് റണ്‍സിനാണ് ശര്‍മയ്ക്ക് സെഞ്ച്വറി നഷ്ടമായത്.

എന്നാല്‍, ക്യാപ്റ്റന്‍ കോഹ്‌ലിക്ക് കൂട്ടായി യുവരാജെത്തിയതോടെ കളിയുടെ ഗതി മാറി. കോഹ്‌ലി 108 പന്തില്‍ നിന്നും 81 നേടി ഔട്ടാകാതെ നിന്നു. യുവരാജാവാകട്ടെ 49 പന്തില്‍ നിന്നും 53 റണ്‍സ് അടിച്ചെടുത്തു. ഹസന്‍ അലിയുടെ പന്തില്‍ എല്‍.ബി.ഡബ്യു ആവുകയായിരുന്നു യുവരാജ്. പിന്നീടെത്തിയ ഹര്‍ദിക് പാണ്ഡ്യ എട്ട് പന്തില്‍ നിന്നും 20 റണ്‍സ് നേടി.

Champions Trophy; Pakistan won the toss and chose to field
Posted by
04 June

ചാംപ്യന്‍സ് ട്രോഫി പാകിസ്താനെതിരെ ഇന്ത്യക്ക് ബാറ്റിങ്; മികച്ചപ്രകടനം ലക്ഷ്യമെന്ന് കോഹ്‌ലി

ബിര്‍മിങ്ങാം: ചാംപ്യന്‍സ് ട്രോഫി ക്രിക്കറ്റില്‍ കായികപ്രേമികള്‍ ആവേശത്തോടെ കാത്തിരിക്കുന്ന ഇന്ത്യാ-പാക് പോരാട്ടത്തില്‍ ടോസ് നേടിയ പാകിസ്താന്‍ ഇന്ത്യയെ ബാറ്റിങ്ങിനയച്ചു. നിലവിലെ ചാംപ്യന്‍മാരായ ഇന്ത്യയിലാണ്ഏവരുടെയും പ്രതീക്ഷ. പരിശീലകനെച്ചൊല്ലിയുള്ള വിവാദങ്ങളെല്ലാം അവസാനിച്ചെന്നും മികച്ച പ്രകടനമാണ് ടീം ലക്ഷ്യമിടുന്നതെന്നും ഇന്ത്യന്‍ ക്യാപ്റ്റന്‍ വിരാട് കോഹ്ലി പറഞ്ഞു.

toss1

ടീം ഇന്ത്യ: രോഹിത് ശര്‍മ, ശിഖര്‍ ധവാന്‍, വിരാട് കോഹ്ലി(ക്യാപ്റ്റന്‍), യുവരാജ് സിങ്, എംഎസ് ധോണി, കേദാര്‍ ജാദവ്, ഹാര്‍ദിക് പാണ്ഡ്യ, രവീന്ദ്ര ജഡേജ, ഭുവനേശ്വര്‍ കുമാര്‍, ഉമേഷ് യാദവ്, ജസ്പ്രിത് ഭൂംറ.

ടീം പാകിസ്താന്‍: അസ്ഹര്‍ അലി, അഹമ്മദ് ഷെഹ്‌സാദ്, ബാബര്‍ അസം, മുഹമ്മദ് ഹഫീസ്, ഷൊഹൈബ് മാലിക്, സര്‍ഫ്രാസ് അഹമ്മദ്(ക്യാപ്റ്റന്‍), ഇമാദ് വാസിം, മുഹമ്മദ് അമീര്‍, ഷഹബാദ് ഖാന്‍, വഹാബ് റിയാസ്, ഹസന്‍ അലി.

South Africa look to extend run against Sri Lanka
Posted by
03 June

ചാംപ്യന്‍സ് ട്രോഫി ക്രിക്കറ്റ്: ഇന്ന് ദക്ഷിണാഫ്രിക്ക ശ്രീലങ്ക പോരാട്ടം

ചാംപ്യന്‍സ് ട്രോഫി ക്രിക്കറ്റില്‍ ഇന്ന് ദക്ഷിണാഫ്രിക്ക ശ്രീലങ്ക പോരിനിറങ്ങും.യുവനിരയുമാണ് ശ്രീലങ്ക ഐസിസി റാങ്കിങ്ങിലെ ഒന്നാം സ്ഥാനക്കാരായ ദക്ഷിണാഫ്രിക്കയെ നേരിടാനിറങ്ങുന്നത്. കാലിന് പരുക്കേറ്റ ശ്രീലങ്കന്‍ നായകന്‍ ഏയ്ഞ്ചലോ മാത്യൂസ് ഇന്ന് കളിച്ചേക്കില്ല.

ഡിവില്ലിയേഴ്‌സിന്റെ നേതൃത്തില്‍ പരിചയസമ്പന്നരുടെ വന്‍ നിരയുമായി ഇറങ്ങുന്ന ദക്ഷിണാഫ്രിക്കയെ പിടിച്ചുകെട്ടാന്‍ ശ്രീലങ്കയുടെ പുതുനിരയ്ക്ക് എത്ര കഴിയുമെന്ന് കണ്ട് അറിയണം. ബാറ്റ്‌സ്മാന്‍മാരുടെ റാങ്കിങ്ങ് പട്ടികയില്‍ ആദ്യ പത്തില്‍ നാലു ദക്ഷിണാഫ്രിക്കന്‍ ബാറ്റ്‌സ്മാന്‍മാരുണ്ട്. ഏയ്ഞ്ചലോ മാത്യൂസിനാണ് ലങ്കന്‍ താരങ്ങളില്‍ ഉയര്‍ന്ന സ്ഥാനം. 26. ഈ കണക്ക് തന്നെ ടീമുകളുടെ കരുത്ത് കാട്ടുന്നു. എന്നാല്‍ ഏത് വമ്പന്‍ ടീമിനേയും കീഴടക്കാനുള്ള കരുത്ത് തങ്ങള്‍ക്കുണ്ടെന്നാണ് ഏയ്ഞ്ചലോ മാത്യൂസിന്റെ അഭാവത്തില്‍ ടീമിനെ നയിക്കാന്‍ നിയോഗിക്കപ്പെട്ട ഉപുല്‍ തരംഗയുടെ ആത്മവിശ്വാസം.

champions trophy; Australia- New Zealand match progressing
Posted by
02 June

ചാമ്പ്യന്‍സ് ട്രോഫിയില്‍ ഓസ്‌ട്രേലിയ-ന്യൂസിലാന്‍ഡ് പോരാട്ടം; ന്യൂസിലാന്‍ഡിന് ബാറ്റിങ്

ഓവല്‍: ചാംപ്യന്‍സ് ട്രോഫിയില്‍ ഓസ്‌ട്രേലിയ ന്യൂസീലന്‍ഡിനെ നേരിടുന്നു. ഓവലിലാണ് മല്‍സരം പുരോഗമിക്കുന്നത്. ടോസ് നേടിയ ന്യൂസിലാന്റ് ബാറ്റിങ് തിരഞ്ഞെടുക്കുകയായിരുന്നു. ഒടുവില്‍ വിവരം കിട്ടുമ്പോള്‍ 6 ഓവറില്‍ 41 ന് ഒന്ന് എന്ന നിലയില്‍ ന്യൂസിലാന്‍ഡ് ബാറ്റിങ് പുരോഗമിക്കുകയാണ്. 24 റണ്‍സിന് ഗപ്റ്റില്ലിനെയാണ് കിവികള്‍ക്ക് നഷ്ടമായത്.

bating

രണ്ടുതവണ ചാംപ്യന്‍സ് ട്രോഫി ജേതാക്കളായ ഓസ്‌ട്രേലിയ കരുത്തരായ ന്യൂസീലന്‍ഡിനെ നേരിടുന്നത് ഇതുവരെ ന്യൂസിലാന്‍ഡിന് ചാംപ്യന്‍സ് ട്രോഫിയില്‍ ഓസ്‌ട്രേലിയയെ തോല്‍പ്പിക്കാനായിട്ടില്ലെന്ന ആത്മവിശ്വാസത്തിലാണ്.

ഐപിഎല്ലില്‍ മികച്ച ഫോമിലായിരുന്ന ഡേവിഡ് വാര്‍ണറാണ് ഓസ്‌ട്രേലിയയുടെ ബാറ്റിങ് കരുത്ത്. സ്മിത്തും, ഫിഞ്ചും, ക്രിസ് ലിന്നുമടങ്ങുന്ന ബാറ്റിങ് നിര വാര്‍ണര്‍ക്ക് പിന്തുണയാകുമെന്നാണ് കംഗാരുക്കളുടെ പ്രതീക്ഷ.

ausis

സ്റ്റാര്‍ക്കും, കമ്മിന്‍സും, ഹേസല്‍വുഡുമടങ്ങുന്ന പേസ് ബോളര്‍മാര്‍ ഇംഗ്ലണ്ടിലെ സാഹചര്യം മുതലാക്കാന്‍ പോന്നവരുമാണ്. ജന്‍മദിനത്തില്‍ അയല്‍ക്കാരോട് പോരിനിറങ്ങുന്ന ക്യാപ്ടന്‍ സ്റ്റീവ് സ്മിത്തിന് ജയത്തോടെ പിറന്നാളാശംസിക്കാനാവും ടീമംഗങ്ങള്‍ ആഗ്രഹിക്കുന്നത്.

മറുവശത്ത് പരിശീലന മല്‍സരത്തില്‍ ഇന്ത്യയോട് തോറ്റെങ്കിലും കിവീസ് നിര ആത്മവിശ്വാസത്തിലാണ്. ഗപ്റ്റിലും വില്യംസണും, ലഥവും, ടെയ്ലറുമടങ്ങുന്ന ബാറ്റിങ് നിരയും ബോള്‍ട്ടും സൌത്തിയും മക്ലീഗനും നേതൃത്വം നല്‍കുന്ന പേസ് ആക്രമണവും ശക്തം. ആദ്യം ബാറ്റ് ചെയ്യുന്നവര്‍ക്ക് 300ന് മുകളില്‍ സ്‌കോര്‍ ചെയ്യാവുന്നതും, 284 വരെയുള്ള സ്‌കോറുകള്‍ പിന്തുടര്‍ന്ന ജയിക്കുന്ന ചരിത്രവുമുള്ള പിച്ചാണ് എഡ്ജ്ബാസ്റ്റണിലെ ഓവല്‍ ക്രിക്കറ്റ് ഗ്രൗണ്ടിനുള്ളത്.

Ramachandra Guha against Indian cricket team
Posted by
02 June

ടെസ്റ്റില്‍ നിന്നും വിരമിച്ച ധോണിക്ക് എ ഗ്രേഡ് നല്‍കിയത് തെറ്റ്; ഇന്ത്യന്‍ ടീമിന് 'സൂപ്പര്‍സ്റ്റാര്‍ സിന്‍ഡ്രോം' എന്നും രാമചന്ദ്ര ഗുഹ

മുംബൈ: ഇന്ത്യന്‍ ക്രിക്കറ്റ് ടീമിലെ താരാധിപത്യത്തെ കടുത്തഭാഷയില്‍ വിമര്‍ശിച്ച് രാമചന്ദ്ര ഗുഹ. ഇന്ത്യന്‍ ക്രിക്കറ്റ് ടീമിന് ‘സൂപ്പര്‍സ്റ്റാര്‍ സിന്‍ഡ്രം’ ബാധിച്ചിരിക്കുകയാണെന്നും ബിസിസിഐ ഇടക്കാല ചെയര്‍മാന്‍ പദവിയില്‍ നിന്ന് രാജിവച്ച രാമചന്ദ്ര ഗുഹ അഭിപ്രായപ്പെട്ടു. ടെസ്റ്റ് മാച്ചുകളില്‍ നിന്ന് വിരമിച്ച മുന്‍ക്യാപ്റ്റന്‍ മഹേന്ദ്ര സിങ് ധോണിക്ക് ബിസിസിഐ കോണ്‍ട്രോക്ട് പട്ടികയില്‍ എ ഗ്രേഡ് നല്‍കിയ നടപടി തെറ്റായ സന്ദേശമാണ് നല്‍കുന്നതെന്നും ഗുഹ ആരോപിക്കുന്നു.

ബിസിസിഐ ചെയര്‍മാന്‍ വിനോദ് റായിക്ക് അയച്ച കത്തിലാണ് ഗുഹ ധോണിക്ക് എതിരെയും ഇന്ത്യന്‍ ക്രിക്കറ്റ് ടീമിലെ താരാധിപത്യത്തിനെതിരെയും ശക്തമായി ആഞ്ഞടിച്ചത്. സ്പോര്‍ട് മാര്‍ക്കറ്റിംഗ് കമ്പനിയായ പിഎംജിയുടെ തലവനായിരിക്കുകയും അതേ സമയം തന്നെ ബിസിസിഐയുടെ കമന്റേറ്റര്‍ പദവി വഹിക്കുകയും ചെയ്യുന്ന സുനില്‍ ഗവാസ്‌കറിനെയും ഗുഹ വെറുതെ വിട്ടില്ല. പിഎംജിയുടെ തലവനായിരിക്കുമ്പോള്‍ തന്നെ താരങ്ങളെ വിലയിരുത്തുന്ന കമന്റേറ്ററായി ഇരിക്കുന്നത് ശരിയല്ലെന്നും അദ്ദേഹം ചൂണ്ടിക്കാട്ടി.

താരങ്ങള്‍ തന്നെ കളിക്കാരെ തീരുമാനിക്കുന്ന കാലം ഇന്ത്യന്‍ ടീമില്‍ വിദൂരമല്ലെന്ന് നായകന്‍ വിരാട് കോഹ്‌ലിയെ ഉദ്ദേശിച്ച് ഒളിയമ്പ് എറിയാനും ഗുഹ മറന്നില്ല.

അതേസമയം, ഇന്ത്യന്‍ ടീം പരിശീലകന്‍ അനില്‍ കുംബ്ലെയുമായും നായകന്‍ വിരാട് കോഹ്‌ലിയുമായും ബന്ധപ്പെട്ട വിവാദങ്ങളാണ് ഗുഹയുടെ രാജിക്ക് പിന്നിലെന്ന് സൂചനയുണ്ട്. കുംബ്ലെയുമായി അടുത്ത ബന്ധം പുലര്‍ത്തുന്നയാളാണ് അദ്ദേഹം. ഇന്ത്യന്‍ സീനിയര്‍ ടീം പരിശീലകനായ കുംബ്ലെയെ ബിസിസിഐ ‘കൈകാര്യം’ ചെയ്ത രീതിയെയും ഗുഹ വിമര്‍ശിച്ചിട്ടുണ്ട്. കുംബ്ലൈ പരിശീലകനായ ശേഷം ഇന്ത്യന്‍ ക്രിക്കറ്റ് ടീമിന്റെ പ്രകടനം ഉജ്ജ്വലമായിരുന്നെന്ന് അദ്ദേഹം ചൂണ്ടിക്കാട്ടി.