Ranchi test: Australia struggles in final day
Posted by
20 March

റാഞ്ചി ടെസ്റ്റില്‍ ഇന്നിങ്‌സ് തോല്‍വി ഒഴിവാക്കാന്‍ ഓസ്‌ട്രേലിയ പൊരുതുന്നു

റാഞ്ചി: ഇന്ത്യയുടെ സ്‌കോറിനു മുന്നില്‍ ഓസ്‌ട്രേലിയ പൊരുതുന്നു. റാഞ്ചിയിലെ മൂന്നാം ക്രിക്കറ്റ് ടെസ്റ്റില്‍ ഇന്നിങ്‌സ് തോല്‍വി ഒഴിവാക്കാന്‍ ഓസ്‌ട്രേലിയ പൊരുതുന്നു. 23/2 എന്ന നിലയില്‍ അവസാന ദിനം ക്രീസിലിറങ്ങിയ ഓസ്‌ട്രേലിയക്ക് ഓപ്പണര്‍ മാറ്റ് റെന്‍ഷായുടെയും ക്യാപ്റ്റന്‍ സ്റ്റീവന്‍ സ്മിത്തിനെയും നഷ്ടമായി. ലഞ്ചിന് പിരിയുമ്പോള്‍ 83/4 എന്ന നിലയിലാണ് കംഗാരുക്കള്‍. ഇന്നിങ്‌സ് തോല്‍വി ഒഴിവാക്കാന്‍ ഓസീസിന് ഇനിയും 69 റണ്‍സ് കൂടി വേണം. 15 റണ്‍സോടെ ഷോണ്‍ മാര്‍ഷും നാലു റണ്ണുമായി ഹാന്‍ഡ്‌സ്‌കോമ്പുമാണ് ക്രീസില്‍.

പൊരുതാനുറച്ചുതന്നെയാണ് അഞ്ചാം ദിനം സ്മിത്തും റെന്‍ഷായും ക്രീസിലിറങ്ങിയത്. ആദ്യ മണിക്കൂറില്‍ വിക്കറ്റ് പോവാതെ പിടിച്ചു നിന്നെങ്കിലും സ്മിത്തും മാറ്റ് റെന്‍ഷായും പ്രതിരോധം കൊണ്ട് ഇന്ത്യയെ വലച്ചു. ഒടുവില്‍ റെന്‍ഷായെ വിക്കറ്റിന് മുന്നില്‍ കുടുക്കിയ ഇഷാന്ത് ശര്‍മയാണ് ആദ്യ ബ്രേക്ക് ത്രൂ സമ്മാനിച്ചത്. 84 പന്ത് നേരിട്ട റെന്‍ഷാ 15 റണ്‍സെടുത്തു.

3rd-test

അധികം വൈകാതെ ജഡേജ സ്മിത്തിന്റെ പ്രതിരോധം തകര്‍ത്തു. ലെഗ് സ്റ്റമ്പില്‍ പിച്ച് ചെയ്ത പന്ത് ലീവ് ചെയ്ത സ്മിത്തിന്റെ ഓഫ് സ്റ്റമ്പിളകി. ഇന്ത്യ ഏറ്റവും അധികം കൊതിച്ച വിക്കറ്റ്. 68 പന്തില്‍ 21 റണ്‍സായിരുന്നു സ്മിത്തിന്റെ സമ്പാദ്യം. ഉച്ചഭക്ഷണത്തിന് ശേഷം സ്പിന്നര്‍മാര്‍ വീണ്ടും മികവിലേക്കുയര്‍ന്നാല്‍ ഇന്ത്യക്ക് പരമ്പരയും മൂന്നാം ടെസ്റ്റും നിഷ്പ്രയാസം സ്വന്തമാക്കാം.

Ranchi test: India scores 300
Posted by
18 March

ഒാസ്‌ട്രേലിയക്കെതിരെ ഇന്ത്യ ശക്തമായ നിലയില്‍; പൂജാരക്ക് സെഞ്ച്വറി

റാഞ്ചി: റാഞ്ചി ടെസ്റ്റില്‍ ഓസ്ട്രേലിയയ്ക്കെതിരെ ഇന്ത്യ ശക്തമായ നിലയില്‍. മൂന്നാം ക്രിക്കറ്റ് ടെസ്റ്റില്‍ മൂന്നാം ദിനം കളി അവസാനിപ്പിക്കുമ്പോള്‍ ഇന്ത്യ ആറിന് 360 എന്ന നിലയിലാണ്. നാല് വിക്കറ്റ് ശേഷിക്കെ ഓസീസ് സ്‌കോറിന് 91 റണ്‍സ് പിറകിലാണ് ഇന്ത്യ. ചേതേശ്വര്‍ പൂജാരയുടെ സെഞ്ച്വറിയും മുരളി വിജയ്‌യുടെ അര്‍ദ്ധ ശതകവുമാണ് ഇന്ത്യക്ക് കരുത്തായത്. പരമ്പരയില്‍ ഇതാദ്യമായാണ് ഇന്ത്യ 300 കടക്കുന്നത്.

പതിനൊന്നാം ടെസ്റ്റ് സെഞ്ച്വറി കുറിച്ച പൂജാരയാണ് ഇന്ത്യന്‍ ഇന്നിങ്‌സിന്റെ നെടുംതൂണ്‍. 228 പന്തുകള്‍ നേരിട്ട പൂജാര 130 റണ്‍സോടെ ക്രീസില്‍ തുടരുകയാണ്. 17 ഫോറുകള്‍ ഉള്‍പ്പെട്ടതാണ് പൂജാരയുടെ മനോഹരമായ ഇന്നിംഗ്സ്. മുരളി വിജയ്ക്കൊപ്പം സെഞ്ച്വറികൂട്ടുകെട്ടും രഹാനെയ്ക്കൊപ്പം അര്‍ദ്ധ സെഞ്ച്വറി കൂട്ടുകെട്ടും തീര്‍ത്ത പൂജാര ഇന്ത്യയെ മികച്ച സ്‌കോറിലേക്ക് നയിക്കുകയായിരുന്നു.

ഒന്നിന് 120 എന്ന നിലയില്‍ മൂന്നാം ദിനം ബാറ്റിംഗ് ആരംഭിച്ച ഇന്ത്യയ്ക്ക് മികച്ച തുടക്കമാണ് ലഭിച്ചത്. സ്‌കോര്‍ 193 ല്‍ നില്‍ക്കെയാണ് സന്ദര്‍ശകര്‍ക്ക് രണ്ടാം വിക്കറ്റ് നഷ്ടമാകുന്നത്. സെഞ്ച്വറിയിലേക്ക് കുതിക്കുകയായിരുന്ന വിജയ്യെ പുറത്താക്കി ഒക്കീഫാണ് ഓസീസിന് ബ്രേക്ക് ത്രൂ നല്‍കിയത്. 183 പന്തില്‍ പത്തുഫോറുകളും ഒരു സിക്സറും പറത്തി വിജയ് 82 റണ്‍സെടുത്തു. രണ്ടാം വിക്കറ്റില്‍ 102 റണ്‍സാണ് വിജയ്-പൂജാര സഖ്യം ചേര്‍ത്തത്.

Afghanistan player Shahzad crossed record of Kohli
Posted by
13 March

റണ്‍വേട്ടയില്‍ കോഹ്‌ലിയുടെ റെക്കോര്‍ഡ് മറികടന്ന് അഫ്ഗാന്‍ താരം ഷഹ്സാദ്

നോയ്ഡ: ഇന്ത്യന്‍ നായകന്‍ വിരാട് കോഹ്‌ലിയുടെ റെക്കോര്‍ഡ് മറികടന്ന് അഫ്ഗാനിസ്ഥാന്‍ താരം മുഹമ്മദ് ഷഹ്‌സാദ്. അന്താരാഷ്ട്ര ട്വന്റി-ട്വന്റിയില്‍ ഏറ്റവും അധികം റണ്‍സ് നേടിയ നാലാമത്തെ താരം എന്ന കോഹ്‌ലിയുടെ റെക്കോര്‍ഡാണ് ഷഹ്സാദ് മറികടന്നത്.

അയര്‍ലന്‍ഡിനെതിരെ മൂന്നാം ട്വന്റി-ട്വന്റിയില്‍ 43 പന്തില്‍ 72 റണ്‍സ് സ്വന്തമാക്കിയതോടെയാണ് ഷഹ്സാദിന് ഈ നേട്ടം കൈവരിക്കാനായത്. ഇതോടെ അയര്‍ലന്‍ഡിനെതിരെ പരമ്പരയും അപ്ഗാനിസ്ഥാന്‍ 3-0ത്തിന് സ്വന്തമാക്കിയിരുന്നു.

58 മത്സരങ്ങളില്‍ നിന്നും 1749 റണ്‍സാണ് ഷഹ്സാദ് സ്വന്തമാക്കിയത്. പുറത്താകാതെ 118 റണ്‍സ് നേടിയതാണ് ഉയര്‍ന്ന സ്‌കോര്‍. അതേസമയം കോഹ്‌ലി 44 ഇന്നിംഗ്സുകളില്‍ നിന്നും 1709 റണ്‍സെടുത്തിട്ടുണ്ട്. 53.4 ശരാശരിയുളള കോഹ്‌ലിയുടെ ഉയര്‍ന്ന സ്‌കോര്‍ 90 ആണ്.

ന്യൂസിന്‍ഡ് താരം ബ്രെന്‍ഡം മക്കല്ലമാണ് ട്വന്റി-ട്വന്റിയില്‍ ഏറ്റവും അധികം റണ്‍സ് നേടിയിട്ടുളള താരം. 70 ഇന്നിംഗ്സുകളില്‍ നിന്നും 2140 റണ്‍സാണ് മക്കല്ലം നേടിയത്. ശ്രീലങ്കന്‍ താരം ദില്‍ഷനാണ് രണ്ടാം സ്ഥാനത്ത്. 79 ഇന്നിംഗ്സുകളില്‍ നിന്ന് 1889 റണ്‍സാണ് ദില്‍ഷനുളളത്. 59 ഇന്നിംഗ്സുകളില്‍ നിന്ന് 1806 റണ്‍സ് നേടിയിട്ടുളള ഗുപ്റ്റിലാണ് മൂന്നാം സ്ഥാനത്ത്.

Dravid will replace Kumble
Posted by
12 March

കുബ്ലെ ടീം ഇന്ത്യ ഡയറക്ടറാവും ദ്രാവിഡ് പരിശീലക സ്ഥാനത്തേക്കും; ബിസിസിഐ തീരുമാനം ഉടനെന്ന് സൂചന

മുംബൈ: നിലവിലെ ഇന്ത്യന്‍ ക്രിക്കറ്റ് ടീം മുഖ്യപരിശീലകന്‍ അനില്‍ കുബ്ലെയെ ടീം ഡയറക്ടറായി നിയമിച്ചേക്കുമെന്ന് സൂചന. കഴിഞ്ഞ വര്‍ഷം രവി ശാസ്ത്രി സ്ഥാനമൊഴിഞ്ഞ പോസ്റ്റിലേക്കാണ് കുബ്ലെയെ പരിഗണിക്കുന്നത്. അതേസമയം കുംബ്ലെ വഹിക്കുന്ന പരിശീലക സ്ഥാനം ഇന്ത്യന്‍ ഇതിഹാസതാരം രാഹുല്‍ ദ്രാവിഡിന് കൈമാറുമെന്നും റിപ്പോര്‍ട്ടുകള്‍ സൂചിപ്പിക്കുന്നു. എന്നാല്‍ ഇക്കാര്യങ്ങളില്‍ ഔദ്യോഗിക സ്ഥിരീകരണം വന്നിട്ടില്ല.

കുബ്ലെയുടെ പരിശീലനത്തിന് കീഴിലാണ് ഇന്ത്യ ടെസ്റ്റില്‍ നമ്പര്‍വണ്‍ സ്ഥാനം സ്വന്തമാക്കിയത്. കഴിഞ്ഞവര്‍ഷം ഒരൊറ്റ ടെസ്റ്റില്‍ പോലും ഇന്ത്യ പരാജയമറിഞ്ഞതുമില്ല. വെസ്റ്റിന്‍ഡീസിനെ അവരുടെ പാളയത്തില്‍ തോല്‍പ്പിച്ച് പരമ്പര നേടിയ ടീം സ്വന്തം മണ്ണില്‍ ന്യൂസിലാന്‍ഡ്, ഇംഗ്ലണ്ട്, ബംഗ്ലാദേശ് ടീമുകള്‍ക്കെതിരെയും കരുത്ത് കാണിച്ചു. ബിസിസിഐയില്‍ ഘടനാപരമായ മാറ്റങ്ങള്‍ കൊണ്ടുവരുന്നതിന്റെ ഭാഗമായാണ് കുബ്ലെയ്ക്ക് സ്ഥാനക്കയറ്റം നല്‍കാനുള്ള തീരുമാനമെന്നാണ് സൂചന.

നിലവില്‍ ഇന്ത്യന്‍ അണ്ടര്‍ 19 ടീമിന്റെ പരിശീലകനാണ് ദ്രാവിഡ്. ദ്രാവിഡിന്റെ പരിശീലന മികവില്‍ അണ്ടര്‍ 10 ലോകകപ്പ് ഫൈനലില്‍ കടന്ന ടീം സ്ഥിരതയാര്‍ന്ന പ്രകടനമാണ് ഇപ്പോള്‍ കാഴ്ച്ചവെയ്ക്കുന്നത്. ബിസിസിഐയിലെ പടലപ്പിണക്കങ്ങള്‍ കാരണം സുപ്രീംകോടതി നിയോഗിച്ച വിനോദ് റായ് അധ്യക്ഷനായ ഭരണകര്‍തൃസമിതിയ്ക്കാണ് നിലവില്‍ ടീമിന്റെ ഭരണചുമതല.

ഇന്ത്യ ജയിച്ച ബാഗ്ലൂര്‍ ടെസ്റ്റിന് ശേഷം അനില്‍ കുബ്ലെ ഭരണകര്‍തൃ സമിതിയുമായി കൂടിക്കാഴ്ച്ച നടത്തിയിരുന്നു. ഇന്ത്യയുടെ സീനിയര്‍, എ, ജൂനിയര്‍, വനിതാ ടീമുകളെ കുറിച്ച് സമഗ്രമായ റിപ്പോര്‍ട്ടുകള്‍ സമര്‍പ്പിക്കാന്‍ കുബ്ലെയോട് സമിതി ആവശ്യപ്പെട്ടിട്ടുണ്ട്. ഏപ്രില്‍ പതിനാലിന് കുബ്ലെയെ ടീം ഡയറക്ടറാക്കിയുള്ള ഔദ്യോഗിക പ്രഖ്യാപനം ഉണ്ടായേക്കും. അങ്ങനെയെങ്കില്‍ ഓസ്ട്രേലിയക്കെതിരായ പരമ്പര പരിശീലകനെന്ന നിലയില്‍ കുബ്ലെയുടെ അവസാന പരമ്പരയായിരിക്കും.

Afghanistan player Rashid Khan’s incredible performance
Posted by
11 March

സണ്‍ റൈസേഴ്‌സ് നാലുകോടിക്ക് സ്വന്തമാക്കിയ അഫ്ഗാന്‍ താരം അയര്‍ലന്റിനെതിരെ കാഴ്ചവെച്ചത് റെക്കോര്‍ഡ് പ്രകടനം

നോയ്ഡ : ഐപിഎല്ലില്‍ സണ്‍റൈസസ് ഹൈദരാബാദ് അഫ്ഗാനിസ്ഥാന്റെ യുവസ്പിന്നര്‍ റാഷിദ് ഖാനായി മുടക്കിയ നാല് കോടി രൂപ വെറുതെയായില്ല. റാഷിദിന്റെ അവിശ്വസനീയ പ്രകടന മികവില്‍ അഫ്ഗാനിസ്ഥാന്‍ അയര്‍ലന്‍ഡിനെ തകര്‍ത്ത് തരിപ്പണമാക്കി. രണ്ട് ഓവറില്‍ മൂന്ന് റണ്‍സ് വഴങ്ങി അഞ്ച് വിക്കറ്റാണ് റാഷിദ് ഖാന്‍ സ്വന്തമാക്കിയത്.

ഇതോടെ ട്വന്റി-ട്വന്റിയില്‍ വേഗത്തില്‍ അഞ്ച് വിക്കറ്റ് സ്വന്തമാക്കിയ താരം എന്ന റെക്കോര്‍ഡ് റാഷിദ് ഖാന്‍ സ്വന്തം പേരില്‍ എഴുതിച്ചേര്‍ത്തു. തനിക്ക് ലഭിച്ച ആദ്യ ഓവറില്‍ മൂന്ന് റണ്‍സ് വഴങ്ങി ഒബ്റീനെയും വില്യംസനെയും വീഴ്ത്തിയ റാഷിദ് രണ്ടാം ഓവറില്‍ റണ്‍സൊന്നും നല്‍കാതെ മൂന്ന് വിക്കറ്റ് വീഴ്ത്തുകയായിരുന്നു. തുക്കര്‍, തോംസണ്‍, എസികാര്‍ത്തെ എന്നിവരാണ് റാഷിദിന്റെ രണ്ടാം ഓവറില്‍ പുറത്തായത്.

നേരത്തെ ആദ്യം ബാറ്റ് ചെയ്ത അഫ്ഗാന്‍ 20 ഓവറില്‍ എട്ട് വിക്കറ്റ് നഷ്ടത്തില്‍ 184 റണ്‍സാണ് നേടിയത്. 90 റണ്‍സെടുത്ത നജീബാ തറാകയ് ആണ് അഫ്ഗാനിനെ മികച്ച സ്‌കോറിലെത്തിച്ചത്. 58 പന്തില്‍ ഏഴ് ഫോറും അഞ്ച് സിക്സും സഹിതമായിരുന്നു തറാകയ്‌യുടെ ബാറ്റിംഗ്.

മറുപടി ബാറ്റിംഗിനിങ്ങിയ അയര്‍ലന്‍ഡ് 11 ഓവറില്‍ ഒന്‍പത് വിക്കറ്റിന് 93 റണ്‍സ് എന്ന നിലയില്‍ പരുങ്ങുന്നതിനിടെ മഴയെത്തി. തുടര്‍ന്ന് ഡെത്ത് വര്‍ത്ത് ലൂയിസ് നിയമ പ്രകാരം അഫ്ഗാന്‍ 17 റണ്‍സിന് വിജയിച്ചതായി പ്രഖ്യാപിക്കുകയായിരുന്നു. റാഷിദ് ഖാനെ കൂടാതെ കരീം ജനത്ത് മൂന്ന് വിക്കറ്റ് വീഴ്ത്തി. ഇതോടെ ടി20 പരമ്പര 2-0ത്തിന് അഫ്ഗാന്‍ സ്വന്തമാക്കി.
നേരത്തെ ഐപിഎല്‍ താരലേലത്തില്‍ നാല് കോടി രൂപ സ്വന്തമാക്കി റാഷിദ് ഖാന്‍ ക്രിക്കറ്റ് ലോകത്തെ അത്ഭുതപ്പെടുത്തിയിരുന്നു. റാഷിദിനെ കൂടാതെ മറ്റൊരു അഫ്ഗാന്‍ താരമായ മുഹമ്മദ് നബിയും ഐപിഎല്‍ കളിക്കുന്നുണ്ട്.

Shoaib Akthar supports Virat Kohli
Posted by
09 March

കോഹ്‌ലിയെ വിമര്‍ശിച്ച ഹീലിക്ക് മറുപടിയുമായി പാകിസ്താന്‍ താരം ശോയബ് അക്തര്‍

ഇസ്ലാമാബാദ് : ഇന്ത്യന്‍ നായകന്‍ വിരാട് കോഹ്‌ലിയെ വിമര്‍ശിച്ച മുന്‍ ഓസീസ് താരം ഹീലിക്ക് ചുട്ടമറുപടി നല്‍കി മുന്‍ പാകിസ്താന്‍ പേസ് ബോളര്‍ ശോയബ് അക്തര്‍. ഓസ്ട്രേലിയക്കെതിരായ രണ്ടാം ടെസ്റ്റിനിടെയാണ് വിരാട് കോഹ്‌ലിയെ രൂക്ഷമായി വിമര്‍ശിച്ച് ഇതിഹാസ താരം ഇയാന്‍ ഹീലി രംഗത്തെത്തിയത്. കോഹ്‌ലിയെ കുറിച്ച് ഹീലിയുടെ വാക്കുകള്‍ താന്‍ വായിച്ചെന്നും അതുകണ്ട് കുരുവുളളവനെ കൂനന്‍ കളിയാക്കുന്നത് പോലെയാണ് തനിക്ക് തോന്നിയതെന്നും അക്തര്‍ പറയുന്നു. ട്വിറ്ററിലൂടെയായിരുന്നു അക്തറിന്റെ പ്രതികരണം.

നേരത്തെ കളിക്കളത്തില്‍ ഓസ്‌ട്രേലിയന്‍ ബാറ്റ്‌സ്മാന്‍മാരോടുളള കോഹ്‌ലിയുടെ ചൂടന്‍ പെരുമാറ്റത്തെ തുടര്‍ന്നാണ് വിരാട് കോഹ്‌ലിയോടുളള ബഹുമാനം തനിക്ക് നഷ്ടപ്പെട്ടിരിക്കുന്നുവെന്ന് ഹീലി തുറന്നടിച്ചത്. മെല്‍ബണ്‍ റേഡിയോ സ്റ്റേഷനോടായിരുന്നു ഇയാന്‍ ഹീലിയുടെ പ്രതികരണം.

എനിക്ക് കോഹ്‌ലിയോടുളള ബഹുമാനം നഷ്ടപ്പെട്ടു, അവന്‍ മാത്രമല്ല ഓസ്‌ട്രേലിയന്‍ കളിക്കാരോടും അമ്പയര്‍മാരോടും മോശമായി പെരുമാറുന്ന ഏകതാരം എന്നാല്‍ അവന്‍ തന്റെ കളിക്കാര്‍ക്ക് പോലും സമ്മര്‍ദ്ദമാണ് നല്‍കുന്നത്, അശ്വിന്റെ മുഖം കണ്ടാല്‍ നമുക്ക് അത് അത് മനസ്സിലാകും, വളരെ ആക്രമണോത്സുഗമാണ് അവന്റെ പെരുമാറ്റം, എതിരാളികള്‍ക്ക് കുറച്ചുകൂടി ബഹുമാനം കോഹ്‌ലി നല്‍കേണ്ടതുണ്ട്, ഇതായിരുന്നു ഇയാന്‍ ഹീലിയുടെ പ്രതികരണം.

ഹീലിയ്‌ക്കൊപ്പം മാര്‍ക്ക് വോയും കോഹ്‌ലിയെ പരിഹസിച്ച് രംഗത്തെത്തിയിരുന്നു. കോഹ്‌ലിയ്ക്ക് വെളിവില്ലെന്നും ബംഗളൂരു ടെസ്റ്റിലെ ആദ്യ ഇന്നിംഗ്സില്‍ വിരാട് പുറത്തായത് ഭീകരമായ മിസ്ജഡ്ജ്മെന്റാണെന്ന് മാര്‍ക്ക് വോ അഭിപ്രായപ്പെട്ടു. നായകന്റെ വെളിവില്ലാത്ത പ്രകടനം ടീമിന് മുഴുവന്‍ ദോഷമായി ബാധിക്കുമെന്നും മാര്‍ക്ക് വോ പ്രതികരിച്ചിരുന്നു.

india won by 75 runs on 2nd cricket test against Australia
Posted by
07 March

ഓസ്‌ട്രേലിയക്ക് എതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യക്ക് തകര്‍പ്പന്‍ ജയം

ബംഗളൂരു: ഓസ്‌ട്രേലിയക്ക് എതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യക്ക് തകര്‍പ്പന്‍ ജയം. 75 റണ്‍സിനാണ് ഓസ്‌ട്രേലിയയെ ഇന്ത്യ തോല്‍പ്പിച്ചത്. ഇതോടെ നാല് മത്സരങ്ങളടങ്ങിയ പരമ്പരയില്‍ ഇന്ത്യ(1 1)ഒപ്പമെത്തി.പൂണെ ടെസ്റ്റില്‍ ഓസ്‌ട്രേലിയക്കായിരുന്നു വിജയം. ഇന്ത്യ ഉയര്‍ത്തിയ 188 റണ്‍സെന്ന വിജയലക്ഷ്യം പിന്തുടര്‍ന്ന ഓസ്‌ട്രേലിയക്ക് 112 റണ്‍സെടുക്കാനെ കഴിഞ്ഞുള്ളൂ. ആറു വിക്കറ്റ് വീഴ്ത്തിയ രവിചന്ദ്ര അശ്വിനാണ് ഓസ്‌ട്രേലിയയെ തകര്‍ത്തത്. ഉമേഷ് യാദവ് രണ്ടും രവീന്ദ്ര ജഡേജ, ഇശാന്ത് ശര്‍മ്മ എന്നിവരും ഓരോ വിക്കറ്റ് വീതവും നേടി.

വിജയലക്ഷ്യം പിന്തുടര്‍ന്ന ഓസ്‌ട്രേലിയക്ക് വേണ്ടി ഡേവിഡ് വാര്‍ണറും മാറ്റ് റെന്‍ഷോവും 22 റണ്‍സിന്റെ കൂട്ടുകെട്ടുയര്‍ത്തിയെങ്കിലും 5 റണ്‍സെടുത്ത റെന്‍ഷോയെ വിക്കറ്റ് കീപ്പറുടെ കൈകളിലെത്തിച്ച് ഇഷാന്ത് ശര്‍മ്മ ആദ്യ വിക്കറ്റ് സമ്മാനിച്ചു. 28 റണ്‍സെടുത്ത സ്റ്റീവന്‍ സ്മിത്തിനും 24 റണ്‍സെടുത്ത പീറ്റര്‍ ഹാന്‍ഡ്‌കോമ്പിനും മാത്രമെ അല്‍പമെങ്കിലും പിടിച്ചുനില്‍ക്കാനായുള്ളൂ. ബാക്കിയുളളവരെല്ലാം വന്നാ പാടെ കൂടാരം കയറി.

നേരത്തെ ഇന്ത്യയുടെ രണ്ടാം ഇന്നിങ്‌സ് 274ന് അവസാനിച്ചിരുന്നു. ആറു വിക്കറ്റ് വീഴ്ത്തിയ പേസര്‍ ജോഷ് ഹേസില്‍ വുഡിന്റെ പ്രകടനമാണ് ഇന്ത്യയെ വീഴ്ത്തിയത്. മിച്ചല്‍ സ്റ്റാര്‍ക്ക് സ്റ്റീവന്‍ ഒക്കീഫി എന്നിവര്‍ രണ്ടു വിക്കറ്റ് വീതം നേടി. 92 റണ്‍സെടുത്ത ചേതേശ്വര്‍ പുജാരയാണ് ടോപ് സ്‌കോറര്‍. അജിങ്ക്യ രഹാനെ(52) ലോകേഷ് രാഹുല്‍(51) എന്നിവരും തിളങ്ങി.

213ന് നാല് എന്ന നിലയില്‍ മൂന്നാം നാലാം ദിനം കളി തുടങ്ങിയ ഇന്ത്യക്ക് 61 റണ്‍സ് മാത്രമാണ് കൂട്ടിച്ചേര്‍ക്കാനായത്. രഹാനെയുടെ വിക്കറ്റാണ് ആദ്യം നഷ്ടമായത്. അര്‍ധ സെഞ്ച്വറിക്ക് പിന്നാലെ രഹാനെ സ്റ്റാര്‍ക്കിന്റെ പന്തില്‍ വിക്കറ്റിന് മുന്നില്‍ കുരുങ്ങുകയായിരുന്നു. പിന്നീടൊക്കെ ചടങ്ങുകള്‍ മാത്രമായിരുന്നു. മലയാളി താരം കരണ്‍ നായരെ പൂജ്യത്തിന് പുറത്താക്കി സ്റ്റാര്‍ക്ക് ഇന്ത്യയെ വീണ്ടും ഞെട്ടിച്ചു. പുജാരയെയും അശ്വിനെയും ഹേസില്‍വുഡ് മടക്കി. വാലറ്റത്ത് ഇഷാന്ത് ശര്‍മ്മയെ കൂട്ടുപിടിച്ച് വിക്കറ്റ് കീപ്പര്‍ സാഹ ചെറുത്ത് നില്‍പ്പിന് ശ്രമിച്ചെങ്കിലും ശര്‍മ്മയെ ഒക്കീഫി മടക്കിയതോടെ ഇന്ത്യന്‍ പതനം പൂര്‍ത്തിയായി. സാഹ 20 റണ്‍സുമായി പുറത്താകാതെ നിന്നു.

ഇന്ത്യയുടെ ആദ്യ ഇന്നിങ്‌സ് 189ന് അവസാനിച്ചിരുന്നു. എട്ട് വിക്കറ്റ് വീഴ്ത്തിയ നഥാന്‍ ലിയോണാണ് ഇന്ത്യയുടെ നടുവൊടിച്ചത്. 90 റണ്‍സെടുത്ത ലോകേഷ് രാഹുലായിരുന്നു ടോപ് സ്‌കോറര്‍. മറുപടി ബാററിങ്ങിനിറങ്ങിയ ആസ്‌ട്രേലിയ 276 റണ്‍സിന് പുറത്തായി. 87 റണ്‍സിന്റെ നിര്‍ണായക ലീഡും ആസ്‌ട്രേലിയ സ്വന്തമാക്കി. ആറു വിക്കറ്റ് വീഴ്ത്തി രവീന്ദ്ര ജദേജയുടെ മികവാണ് ഓസ്‌ട്രേലിയയെ 276ല്‍ ഒതുക്കാനായത്. ഷോണ്‍ മാര്‍ഷ്(66) മാറ്റ് റെന്‍ഷോ(60) മാത്യു വേഡ്(40) എന്നിവരാണ് ഓസ്‌ട്രേലിയന്‍ നിരയില്‍ തിളങ്ങിയത്.

Kerala HC sends notice to BCCI on Sreesanth’s plea
Posted by
03 March

ശ്രീശാന്തിന്റെ വിലക്ക്; കേരള ഹൈക്കോടതി ബിസിസിഐക്ക് നോട്ടീസ് അയച്ചു

കൊച്ചി: ക്രിക്കറ്റ് താരം ശ്രീശാന്തിന്റെ വിലക്ക് നീക്കാന്‍ കേരള ഹൈക്കോടതി ബിസിസിഐക്ക് നോട്ടീസ് അയച്ചു. ശ്രീശാന്ത് സമര്‍പ്പിച്ച ഹര്‍ജിയിന്മേലാണ് ഹൈക്കോടതിയുടെ നീക്കം. ഐപിഎല്‍ ഒത്തുകളിയുമായി ബന്ധപ്പെട്ട് ഇന്ത്യന്‍ ക്രിക്കറ്റ് ബോര്‍ഡ് ഏര്‍പ്പെടുത്തിയ ആജീവനാന്ത വിലക്കിനെതിരേയാണ് ശ്രീശാന്ത് ഹര്‍ജി സമര്‍പ്പിച്ചത്.

ഏപ്രിലില്‍ സ്‌കോട്ട്‌ലാന്‍ഡില്‍ നടക്കുന്ന പ്രീമിയര്‍ ലീഗില്‍ കളിക്കാന്‍ ഈ വിലക്ക് നിലനില്‍ക്കുന്നതിനാല്‍ സാധിക്കില്ല എന്നതിനാല്‍ ഇക്കാര്യത്തില്‍ അനുമതി നല്‍കാന്‍ ബോര്‍ഡിന് നിര്‍ദേശം നല്‍കണമെന്നും ശ്രീശാന്ത് ഹര്‍ജിയില്‍ ആവശ്യപ്പെട്ടിട്ടുണ്ട്. ഐപിഎല്‍ ഒത്തുകളി കേസില്‍ ഡല്‍ഹി പാട്യാല ഹൗസ് കോടതി ശ്രീശാന്തിനെ കുറ്റവിമുക്തനാക്കിയെങ്കിലും ക്രിക്കറ്റ് ബോര്‍ഡ് ഏര്‍പ്പെടുത്തിയ ആജീവനാന്ത വിലക്ക് ഇതുവരെ നീക്കിയിട്ടില്ല. ഇതിനെ തുടര്‍ന്നാണ് താരം ഹൈക്കോടതിയെ സമീപിച്ചത്.

Sehwag insults Kargil martyr’s daughter
Posted by
27 February

എബിവിപിയെ ഭയക്കുന്നില്ലെന്ന ക്യാമ്പയിന്‍: കാര്‍ഗില്‍ രക്തസാക്ഷിയുടെ മകളെ പരിഹസിച്ച് സെവാഗ്

മുംബൈ:എബിവിപിയെ താന്‍ ഭയക്കുന്നില്ലെന്ന് ഓണ്‍ലൈന്‍ ക്യാമ്പയിന്‍ നടത്തിയ കാര്‍ഗില്‍ രക്തസാക്ഷിയുടെ മകളെ പരിഹസിച്ച് മുന്‍ ഇന്ത്യന്‍ ക്രിക്കറ്റ് താരം വീരേന്ദ്ര സെവാഗ്. ഡല്‍ഹി സര്‍വകലാശാല വിദ്യാര്‍ത്ഥി കൂടിയായ ഗുര്‍മെഹര്‍ കൗര്‍ ജെഎന്‍യുവില്‍ വിദ്യാര്‍ത്ഥികള്‍ക്ക് നേരെ ഉണ്ടായ എബിവിപിയുടെ അതിക്രമത്തെ തുടര്‍ന്നാണ് വ്യത്യസ്തമായ ക്യാമ്പയിനുമായി രംഗത്തു വന്നത്. താന്‍ ഡല്‍ഹി സര്‍വകലാശാല വിദ്യാര്‍ത്ഥിയാണെന്നും എബിവിപിയെ ഭയക്കുന്നില്ല എന്നെഴുതിയ പ്ലക്കാര്‍ഡ് ഉയര്‍ത്തിയ ഗുര്‍മെഹര്‍ കൗറിന്റെ ചിത്രം സോഷ്യല്‍ മീഡിയയില്‍ വൈറലായിരുന്നു.

ഇതിനെ പരിഹസിച്ചാണ് വീരേന്ദ്രര്‍ സെവാഗ് രംഗത്തെത്തിയത്. ഗുര്‍മെഹര്‍ കൗര്‍ നേരത്തെ തന്റെ പിതാവിനെ കൊന്നത് പാകിസ്താനല്ല, യുദ്ധമാണെന്ന് എഴുതിയ പ്ലക്കാര്‍ഡ് ഈ ക്യാമ്പയിന്റെ ഭാഗമായി ഉയര്‍ത്തിക്കാണിച്ചിരുന്നു. ഈ പ്ലക്കാര്‍ഡിനുള്ള മറുപടിയായാണ് സെവാഗിന്റെ പരിഹാസം. താനല്ല രണ്ട് ട്രിപ്പിള്‍ സെഞ്ച്വറി നേടിയതെന്നും തന്റെ ബാറ്റാണെന്ന പ്ലക്കാര്‍ഡ് ഉയര്‍ത്തിപ്പിടിച്ചിരിക്കുന്ന ചിത്രം ട്വീറ്റ് ചെയ്താണ് സെവാഗിന്റെ പ്രതികരണം.

ഈ ചിത്രത്തെ ഷെയര്‍ ചെയ്ത് നിരവധി ചിരി ഇമോജികള്‍ കമന്റ് ചെയ്ത് ബിജെപി നേതാവിന്റെ മകന്‍ കൂടിയായ രണ്‍ദീപ് സിംഹ് ഹൂഡയും രംഗത്തെത്തിയിട്ടുണ്ട്.

നിരവധിപേരാണ് സെവാഗിനെ അനൂകൂലിച്ചും പ്രതികൂലിച്ചും സോഷ്യല്‍മീഡിയയയില്‍ പ്രതികരിക്കുന്നത്.

UttaraKhand govt payed 47.19 lakh to  Virat Kohli from flood relief fund
Posted by
26 February

ഉത്തരാഖണ്ഡ് സര്‍ക്കാരിന്റെ ദുരിതാശ്വാസഫണ്ടില്‍ നിന്നും വിരാട് കോഹ്‌ലിക്ക് 50 ലക്ഷം; വിവാദം കത്തുന്നു

ഡെറാഡൂണ്‍: വിവാദങ്ങള്‍ വിടാതെ പിന്തുടര്‍ന്ന് വിരാട് കോഹ്‌ലി. ഓസ്ട്രേലിയക്കെതിരെയുള്ള തോല്‍വിയുടെ നിരാശയില്‍ കഴിയുന്ന ഇന്ത്യന്‍ ക്യാപ്റ്റനെ തേടി പുതിയ വിവാദം. 60 സെക്കന്റ് വരുന്ന പരസ്യത്തില്‍ അഭിനയിച്ചതിന് ഉത്തരാഖണ്ഡ് സര്‍ക്കാരിന്റെ പക്കല്‍ നിന്നും 47.19 ലക്ഷം രൂപ സ്വീകരിച്ചതാണ് വിവാദത്തിന് ഹേതുവായിരിക്കുന്നത്.

സര്‍ക്കാരിന്റെ പ്രളയ ദുരിതാശ്വാസത്തിന് വകയിരുത്തിയ ഫണ്ടില്‍നിന്നുമാണ് കോഹ്‌ലി പണം സ്വീകരിച്ചത്. ഇതാണ് അദ്ദേഹത്തിന് വിനയായിരിക്കുന്നതും. സംഭവം പുറത്തായതോടെ മാര്‍ച്ച് 11ന് നിയമസഭാ തെരഞ്ഞെടുപ്പ് നടക്കാനിരിക്കുന്ന ഉത്തരാഖണ്ഡിലെ ഹരീഷ് റാവത്ത് സര്‍ക്കാറിനും തലവേദനയായിട്ടുണ്ട്.

ബിജെപി നേതാവായ അജേന്ദ്ര അജയ്ക്ക് വിവരാവകാശ നിയമപ്രകാരം ലഭിച്ച മറുപടിയിലാണ് പണം കൈമാറിയത് ദുരിതാശ്വാസ ഫണ്ടില്‍ നിന്നും ആണെന്ന കാര്യം വ്യക്തമായത്. 2013ല്‍ കേദാര്‍നാഥിലുണ്ടായ കനത്ത പ്രളയത്തില്‍ ദുരിതത്തിലായവരെ സഹായിക്കാന്‍ നീക്കിവെച്ച തുകയില്‍ നിന്നാണ് സംസ്ഥാനത്തെ വിനോദസഞ്ചാരം പ്രോത്സാഹിപ്പിക്കുന്നതിനുള്ള 60 സെക്കന്‍ഡ് വീഡിയോയില്‍ അഭിനയിച്ചതിന് വിരാട് കോഹ്‌ലിക്ക് പ്രതിഫലം നല്‍കിയത്. ആ സമയത്ത് ഉത്തരാഖണ്ഡിന്റെ ബ്രാന്‍ഡ് അംബാസഡറായിരുന്നു കോഹ്‌ലി.

എന്നാല്‍, സാമ്പത്തിക ഇടപാടൊന്നുമുണ്ടായിട്ടില്ലെന്ന് കോഹ്‌ലിയുടെ ഏജന്റും കോര്‍ണര്‍സ്റ്റോണ്‍ സ്പോര്‍ട് ആന്‍ഡ് എന്റര്‍ടെയ്ന്‍മെന്റ് സിഇഒയുമായ ബണ്ടി സജ്ദേ പറഞ്ഞു. അതെസമയം വിരമിച്ച സുപ്രീം കോടതി ജഡ്ജിയുടെ നേതൃത്വത്തില്‍ ഇക്കാര്യത്തെ കുറിച്ച് അന്വേഷിക്കുമെന്ന് ഉത്തരാഖണ്ഡ് മുഖ്യമന്ത്രി ഹരീഷ് റാവത്ത് അറിയിച്ചു.