അവധിക്കാലമായതോടെ പ്രവാസികളെ കൊള്ളയടിച്ച് വിമാന കമ്പനികള്‍; ടിക്കറ്റിന് നിരക്ക് വര്‍ധിച്ചത് ആറിരട്ടിയിലേറെ; കുടുംബത്തോടെ യാത്ര ചെയ്യാന്‍ ചിലവ് ലക്ഷങ്ങള്‍
Posted by
21 August

അവധിക്കാലമായതോടെ പ്രവാസികളെ കൊള്ളയടിച്ച് വിമാന കമ്പനികള്‍; ടിക്കറ്റിന് നിരക്ക് വര്‍ധിച്ചത് ആറിരട്ടിയിലേറെ; കുടുംബത്തോടെ യാത്ര ചെയ്യാന്‍ ചിലവ് ലക്ഷങ്ങള്‍

ന്യൂഡല്‍ഹി: ഉത്സവ സീസണില്‍ പ്രവാസികളുടെ പോക്കറ്റ് കൊള്ളയടിക്കുന്ന സ്ഥിരം പല്ലവി ആവര്‍ത്തിച്ച് വിമാന കമ്പനികള്‍. ഓണം ബക്രീദ് അവധി ആഘോഷിച്ചു കേരളത്തില്‍നിന്ന് ഗള്‍ഫ് നാടുകളിലേക്ക് മടങ്ങുന്നവരെയാണ് ഇത്തവണ വിമാനകമ്പനികള്‍ ലക്ഷ്യം വെച്ചിരിക്കുന്നത്. വിമാനടിക്കറ്റ് നിരക്ക് ആറിരട്ടിവരെ കൂട്ടിയാണ് പകല്‍ക്കൊള്ള. എല്ലാ വര്‍ഷവും ഈ സീസണില്‍ ടിക്കറ്റ് കൂടാറുണ്ടെങ്കിലും സമീപകാലത്തൊന്നും ഇത്രയുമുണ്ടായിട്ടില്ല. വിമാനനിരക്ക് നിയന്ത്രിക്കാന്‍ സര്‍ക്കാര്‍ ഇടപെടലില്ലാത്തതാണ് ചൂഷണം വ്യാപകമാവാന്‍ കാരണമെന്ന് ട്രാവല്‍ ഏജന്‍സികള്‍ സാക്ഷ്യപ്പെടുത്തുന്നു.

മുപ്പത്തയ്യായിരം രൂപ മുതല്‍ ഒരു ലക്ഷം വരെയാണു വിവിധ കമ്പനികളുടെ നിരക്ക്. മൂന്നു വര്‍ഷത്തിനിടയിലെ ഏറ്റവും വലിയ വര്‍ധനയാണിതെന്നു ട്രാവല്‍ ഏജന്‍സികളും പറയുന്നു. സാധാരണ സീസണില്‍ 15,000 വരെയായിരുന്നു റിയാദിലേക്കുള്ള നിരക്കെങ്കില്‍ ഇപ്പോള്‍ 50,000 മുതല്‍ 85,000 വരെയായി. കുവൈത്തിലേക്കു യാത്ര ചെയ്യാന്‍ 30,000 മുതല്‍ 88,000 വരെയും ബഹ്‌റൈനിലെത്താന്‍ 75,000 വരെയും കൊടുക്കണം. 5000 മുതല്‍ 10,000 രൂപ വരെയായിരുന്ന ദുബായ് ടിക്കറ്റ് നിരക്ക് എത്തിനില്‍ക്കുന്നത് നാല്‍പ്പതിനായിരത്തിലാണ്. ഏറ്റവും കൂടുതല്‍ നിരക്ക് ഈടാക്കുന്നത് എയര്‍ ഇന്ത്യയാണെന്നതും ശ്രദ്ധേയം. അബുദാബിക്കു പോകാന്‍ 30,000 മതല്‍ അറുപതിനായിരം വരെയാകുമ്പോള്‍ ഷാര്‍ജയിലെത്തുന്നതിനു നാല്‍പതിനായിരമാകും. ജിദ്ദ യാത്രയാണ് ഏറ്റവും കഠിനം. എത്തിഹാദ് വിമാനത്തില്‍ ഒരു ലക്ഷമാണ് ടിക്കറ്റ് നിരക്ക്.

ഗള്‍ഫ് നാടുകളിലിപ്പോള്‍ അവധിക്കാലമാണെന്നതിനാല്‍ തന്നെ പ്രവാസികളെ പിഴിയുക തന്നെയാണ് വിമാനക്കമ്പനികളുടെ ലക്ഷ്യവും. അവധി ആഘോഷിച്ച് മലയാളികള്‍ മടങ്ങുന്ന സമയം വിമാനക്കമ്പനികള്‍ക്ക് ചാകരക്കാലമാണ്. അത് പരമാവധി മുതലാക്കുകയാണ് വര്‍ധനയുടെ ലക്ഷ്യം.

onam celebtraion of tamba malayali association
Posted by
21 August

111 വിഭവങ്ങളുമായി കിടിലന്‍ ഓണാഘോഷത്തിനൊരുങ്ങി ടാമ്പ മലയാളി അസോസിയേഷന്‍

ഫ്‌ളോറിഡ: ഓണാഘോഷത്തിന്റെ നാളുകളാണ് ഇനി മലയാളികള്‍ക്ക്. ജന്മനാടിന്റെ പൈതൃകം മനസ്സിലുണര്‍ത്തി പ്രവാസി മലയാളികളും ഓണത്തിനായി കാത്തിരിക്കുകയാണ്. ഫ്‌ളോറിഡയിലെ പ്രമുഖ മലയാളി സംഘടനയായ മലയാളി അസോസിയേഷന്‍ ഓഫ് ടാമ്പ (മാറ്റ് ) ഇത്തവണ ഓണാഘോഷത്തോടനുബന്ധിച്ചുള്ള വിഭവ സമൃദ്ധമായ ഓണസദ്യയുമായി ചരിത്രം സൃഷ്ടിക്കുവാന്‍ ഒരുങ്ങുകയാണ്.

ഓണാഘോഷങ്ങള്‍ക്ക് നിറം പകരുവാനായി 111 വിഭവങ്ങളുമായി വമ്പന്‍ ഓണസദ്യയും 211 മലയാളി മങ്കമാര്‍ അണിനിരക്കുന്ന നൃത്തോത്സവവും സംഘടിപ്പിക്കുന്നുണ്ട്. വിഭവങ്ങള്‍ എന്തൊക്കയാണെന്ന് സംഘാടകര്‍ ഇതുവരെ പുറത്തു വിട്ടിട്ടില്ല. സെപ്തംബര്‍ 9ന് വാള്‍റിക്കോയിലുള്ള സേക്രഡ് ഹാര്‍ട്ട് ക്‌നാനായ കാത്തലിക്ക് കമ്മ്യൂണിറ്റി സെന്ററിലാണ് ചരിത്രം കുറിക്കാനൊരുങ്ങുന്ന ഈ ഓണാഘോഷത്തില്‍ മലയാളികളും തദ്ദേശീയരുമായി ആയിരത്തോളം പേരാവും പങ്കെടുക്കുക. ഓണസദ്യ ലോകറെക്കോര്‍ഡ് ആക്കി മാറ്റുവാന്‍ ഗിന്നസ് ബുക്ക് അധികൃതരുമായി ചര്‍ച്ച നടന്നുകൊണ്ടിരിക്കുകയാണ്.

ഓണസദ്യയ്ക്കു മാത്രമല്ല പ്രത്യേകത, സദ്യ വിളമ്പുന്ന ഇലയ്ക്കുമുണ്ട് കുറച്ച് പ്രത്യേകതകള്‍. സാധാരണ സദ്യ വിളമ്പുന്ന ഇലയെക്കാള്‍ മൂന്നിരട്ടി വലിപ്പമുള്ള ഇലയിലാണ് സദ്യയൊരുക്കുന്നത്. അതിനായി കേരളത്തില്‍ നിന്നും പ്രത്യേക അച്ചില്‍ നിര്‍മിച്ച ഇലകളും സദ്യ വിളമ്പാനുള്ള പാത്രങ്ങളും താമ്പായിലെത്തിച്ചു കഴിഞ്ഞു.

ഓണ്‍ലൈനായി സദ്യ ബുക്ക് ചെയ്യാനുള്ള അവസരവും മാറ്റ് സംഘാടകര്‍ തയ്യാറാക്കിയിട്ടുണ്ട്. ഒരാള്‍ക്ക് 65 ഡോളര്‍ ചിലവ് വരുന്ന ഓണസദ്യയ്ക്ക് 30 ഡോളര്‍ മാത്രമാണ് സംഘടന ഈടാക്കുന്നത്. ഇത്തവണത്തെ മലയാളി അസോസിയേഷന്‍ ഓഫ് താമ്പയുടെ ഓണാഘോഷം ചരിത്ര സംഭവമായി മാറുമെന്നാണ് സംഘാടകരുടെ പ്രതീക്ഷ.

തന്റെ മകന്റെ കൊലയാളിയെ വധശിക്ഷയില്‍ നിന്നും രക്ഷിച്ച് മാപ്പ് കൊടുത്ത പിതാവിനെ അഭിനന്ദിച്ച് സൗദി ജനത
Posted by
20 August

തന്റെ മകന്റെ കൊലയാളിയെ വധശിക്ഷയില്‍ നിന്നും രക്ഷിച്ച് മാപ്പ് കൊടുത്ത പിതാവിനെ അഭിനന്ദിച്ച് സൗദി ജനത

അസീര്‍: തന്റെ മകന്റെ കൊലയാളിയെ വധശിക്ഷയില്‍ നിന്നും രക്ഷിച്ച പിതാവിന്റെ മഹത്വത്തെ നിറഞ്ഞ കയ്യടികളോടെ അഭിനന്ദിക്കുകയാണ് സൗദി ജനത. അസീര്‍ പ്രവശ്യയിലെ ഒരു സൗദി പൗരനാണ് ഇത്ര മഹത്തായ ഒരു കാര്യത്തിലൂടെ കാരുണ്യത്തിന്റെ ആള്‍ രൂപമായത്.ഖമീസ് മുശൈത് പ്രവിശ്യയിലെ അസീര്‍ പ്രദേശത്ത് തന്റെ മകന്റെ കൊലയാളിയുടെ വധശിക്ഷ നടപ്പാക്കുന്ന സമയത്തിന് തൊട്ട് മുന്‍പായാണ് അദ്ദേഹം എത്തിയത്. ജനക്കൂട്ടത്തിനിടയില്‍ നിന്നും ‘വധശിക്ഷ അരുതെ’ എന്ന് വിളിച്ച് പറഞ്ഞ് മുന്‍പോട്ട് കുതിച്ച അദ്ദേഹം തന്റെ മകനെ കൊന്ന കൊലയാളിക്ക് മാപ്പ് നല്‍കുന്നതായ് പ്രഖ്യാപിച്ചു. കൊലയാളി രണ്ടു വര്‍ഷമായി ശിക്ഷ അനുഭവിച്ച് വരുകയായിരുന്നു. ചുറ്റും കൂടി നിന്ന ആള്‍ക്കൂട്ടം നിറഞ്ഞ ആരവങ്ങളോടെ അദ്ദേഹത്തെ എടുത്ത് പൊക്കിയാണ് വൃദ്ധന്റെ തീരുമാനത്തോടുള്ള ആദരവ് പ്രകടിപ്പിച്ചത്.

പ്രവാസികള്‍ക്ക് സന്തോഷ വാര്‍ത്ത;  ഗള്‍ഫില്‍ നിന്ന് മടങ്ങിയെത്തുന്നവര്‍ക്ക് പ്രതിമാസം അയ്യായിരം രൂപ മുതല്‍ അന്‍പതിനായിരം രൂപവരെ പെന്‍ഷന്‍
Posted by
20 August

പ്രവാസികള്‍ക്ക് സന്തോഷ വാര്‍ത്ത; ഗള്‍ഫില്‍ നിന്ന് മടങ്ങിയെത്തുന്നവര്‍ക്ക് പ്രതിമാസം അയ്യായിരം രൂപ മുതല്‍ അന്‍പതിനായിരം രൂപവരെ പെന്‍ഷന്‍

കൊച്ചി: വിദേശത്ത് നിന്നും പ്രവാസ ജീവിതം മതിയാക്കി മടങ്ങിയെത്തുന്നവര്‍ക്ക് പ്രതിമാസം അയ്യായിരം രൂപ മുതല്‍ അന്‍പതിനായിരം രൂപ വരെ ഡിവിഡന്റ് ലഭിക്കുന്ന പെന്‍ഷന്‍ പദ്ധതിക്ക് പ്രവാസി ക്ഷേമ ബോര്‍ഡ് രൂപം നല്‍കി. പ്രവാസികള്‍ നിക്ഷേപിക്കുന്ന തുകയ്ക്ക് ആനുപാതികമായ തുകയാണ് പെന്‍ഷനായി നല്‍കുക. അഞ്ച് ലക്ഷം മുതല്‍ 50 ലക്ഷം രൂപവരെ പദ്ധതിയില്‍ നിക്ഷേപിക്കാം.

മൂന്ന് വര്‍ഷത്തിനകം ആറ് ഘട്ടമായോ ഒറ്റത്തവണയായോ തുക നിക്ഷേപിക്കാം. നിക്ഷേപത്തുക പൂര്‍ണമായാല്‍ മൂന്നു വര്‍ഷത്തിനു ശേഷം മാസംതോറും ഡിവിഡന്റ് നല്‍കും. പദ്ധതിയിലൂടെ 60,000 കോടി രൂപവരെ സമാഹരിക്കാനാണ് ലക്ഷ്യമിടുന്നത്. വികസന പദ്ധതികള്‍ക്കാണ് ഈ തുക ചെലവഴിക്കുക. പദ്ധതിയുടെ കരട് സര്‍ക്കാര്‍ അംഗീകാരത്തിനായി മുഖ്യമന്ത്രി പിണറായി വിജയന് സമര്‍പ്പിച്ചു.

ബാങ്കില്‍ നിക്ഷേപിച്ചാല്‍ ലഭിക്കുന്നതിലും കൂടുതല്‍ ആനുകൂല്യം ലഭ്യമാക്കുമെന്നതാണ് പദ്ധതിയുടെ സവിശേഷത. ജീവിതത്തിന്റെ നല്ലൊരുഭാഗം വിദേശത്ത് ജോലിചെയ്ത് തിരിച്ചെത്തുന്ന ഭൂരിഭാഗത്തിനും അവസാനകാലം ദാരിദ്യ്രവും രോഗവും മാത്രമാണ് സമ്പാദ്യമെന്ന തിരിച്ചറിവിലാണ് പ്രവാസികളുടെ സമ്പാദ്യം നിക്ഷേപമായി സ്വീകരിച്ചുള്ള പെന്‍ഷന്‍പദ്ധതിക്ക് രൂപംനല്‍കിയതെന്ന് പ്രവാസി ബോര്‍ഡ് ചെയര്‍മാന്‍ പി ടി കുഞ്ഞുമുഹമ്മദ് പറഞ്ഞു.

പ്രവാസി കുടുംബങ്ങള്‍ക്ക് വില്ലകള്‍ നിര്‍മിച്ചുനല്‍കുന്ന ‘സംരക്ഷിത പ്രവാസി ഗ്രാമപദ്ധതി’യും ബോര്‍ഡ് ലക്ഷ്യമിടുന്നുണ്ട്. കേരളത്തിലെ നഗരപ്രദേശങ്ങളില്‍ ആവശ്യമായ ഭൂമി എടുത്ത് അഞ്ച് മുതല്‍ 10 വരെ സെന്റ് തിരിച്ച് 1000 മുതല്‍ 3000 വരെ സ്‌ക്വയര്‍ ഫീറ്റ് വിസ്തൃതിയുള്ള വില്ലകള്‍ നിര്‍മിച്ച് നിശ്ചിതവിലയ്ക്ക് പ്രവാസികള്‍ക്ക് നല്‍കുന്ന പദ്ധതിയാണിത്. താഴേത്തട്ടിലും ഇടത്തരം ജീവിത നിലവാരത്തിലുമുള്ള പ്രവാസികളെ ഉദ്ദേശിച്ചാണ് പദ്ധതിയെന്ന് സിഇഒ സി ജോസ് പറഞ്ഞു.

ഭാര്യയുടെ കാമുകനെ സ്വന്തം കാമുകിയെ ഉപയോഗിച്ച് വശീകരിച്ചു: ഭാര്യയുടെ നഗ്‌നചിത്രങ്ങള്‍ കൈക്കലാക്കി ഭീഷണിയും: പ്രവാസി മലയാളി അറസ്റ്റില്‍
Posted by
20 August

ഭാര്യയുടെ കാമുകനെ സ്വന്തം കാമുകിയെ ഉപയോഗിച്ച് വശീകരിച്ചു: ഭാര്യയുടെ നഗ്‌നചിത്രങ്ങള്‍ കൈക്കലാക്കി ഭീഷണിയും: പ്രവാസി മലയാളി അറസ്റ്റില്‍

കൊച്ചി: ഭാര്യയുടെ കാമുകന്‍ വഴി ഭാര്യയുടെ നഗ്‌നചിത്രങ്ങള്‍ സംഘടിപ്പിക്കുകയും പിന്നീട് ഈ ചിത്രങ്ങള്‍ ഉപയോഗിച്ച് ഭീഷണിപ്പെടുത്തി വിവാഹ മോചനം ആവശ്യപ്പെടുകയും ചെയ്ത പ്രവസി മലയാളി അറസ്റ്റില്‍. പറവൂര്‍ വലിയപല്ലംതുരുത്ത് സ്വദേശിയാണ് അറസ്റ്റിലായത്. കേസില്‍ രണ്ടാം പ്രതിയാണ് പരാതിക്കാരിയുടെ ഭര്‍ത്താവ്. ഒന്നാം പ്രതി ഭാര്യയുടെ കാമുകനായ ബിന്റോ തോമസ് എന്ന യുവാവാണ്. വിവാഹ വാഗ്ദാനം നല്‍കി നഗ്‌നചിത്രങ്ങള്‍ കൈക്കലാക്കിയ ശേഷം വിവാഹത്തില്‍ നിന്ന് പിന്മാറിയെന്നതാണ് ഇയാള്‍ക്കെതിരെയുള്ള കേസ്.

താന്‍ കാമുകന് അയച്ചു കൊടുത്ത നഗ്‌നചിത്രം കാട്ടി ഭീഷണിപ്പെടുത്തുകയും വിവാഹമോചനം ആവശ്യപ്പെടുകയും ചെയ്തുവെന്നാണ് യുവതിയുടെ പരാതി.പരാതിക്കാരിയുടെ ഭര്‍ത്താവ് വിദേശത്തായിരുന്നപ്പോള്‍ അവിടെയുള്ള ഒരു യുവതിയുമായി പ്രണയത്തിലായിരുന്നു.ഇതറിഞ്ഞ ഭാര്യ ഭര്‍ത്താവുമായി പിണങ്ങി. ഇതിനിടെ ഭാര്യ ഫേസ്ബുക്കില്‍ പരിചയപ്പെട്ട ബിന്റോ തോമസുമായി അടുപ്പത്തിലായി. വിദേശത്ത് ജോലി ചെയ്തിരുന്ന ഇയാള്‍ വിവാഹം കഴിക്കാമെന്ന ഉറപ്പില്‍ യുവതിയുടെ നഗ്‌ന ചിത്രങ്ങളും വീഡിയോകളും വാട്‌സ്ആപ്പ് വഴി കൈക്കലാക്കി. തുടര്‍ന്ന് ബിന്റോ യുവതിയുടെ ഭര്‍ത്താവിനെ ഫോണില്‍ വിളിച്ചു തങ്ങള്‍ വിവാഹം കഴിക്കാന്‍ പോകുകയാണെന്നും ഭാര്യയെ വിവാഹമോചനം ചെയ്യണമെന്നും ആവശ്യപ്പെട്ടു. ഭാര്യയുടെ നഗ്‌നചിത്രങ്ങള്‍ തന്റെ പക്കലുണ്ടെന്നും ഇയാള്‍ ഭര്‍ത്താവിനെ അറിയിച്ചു.

തുടര്‍ന്ന് ഭര്‍ത്താവ് തന്റെ സിനിമാ നടികൂടിയായ കാമുകിയെ ഉപയോഗിച്ച് ബിന്റോയെ വശീകരിച്ചു. ഫേസ്ബുക്ക് വഴിയായിരുന്നു ഈ ഓപ്പറേഷന്‍. കാമുകി വഴി ഭാര്യയുടെ നഗ്‌നചിത്രങ്ങള്‍ സ്വന്തമാക്കി. തുടര്‍ന്ന് ഇയാള്‍ ചിത്രങ്ങള്‍ കാട്ടി ഭാര്യയെ ഭീഷണിപ്പെടുത്താന്‍ തുടങ്ങി. പ്രശ്‌നം യുവതിയുടെ വീട്ടുകാര്‍ അറിയുകയും പോലീസില്‍ പരാതി നല്‍കുകയുമായിരുന്നു.

അറസ്റ്റിലായ ഭര്‍ത്താവിനെ പോലീസ് കോടതിയില്‍ ഹാജരാക്കി റിമാന്‍ഡ് ചെയ്തു. ഭര്‍ത്താവിന്റെ കാമുകിയും നടിയുമായ യുവതിയും കേസില്‍ പ്രതിയാണ്. ഇവര്‍ മുന്‍കൂര്‍ ജാമ്യഹര്‍ജി നല്‍യിട്ടുള്ളതിനാല്‍ അറസ്റ്റ് ചെയ്തിട്ടില്ല.

യുഎഇയില്‍ പാസ്‌പോര്‍ട്ടില്‍ വിസ സ്റ്റാമ്പ് ചെയ്യുന്ന നടപടി ഒഴിവാക്കുന്നു
Posted by
20 August

യുഎഇയില്‍ പാസ്‌പോര്‍ട്ടില്‍ വിസ സ്റ്റാമ്പ് ചെയ്യുന്ന നടപടി ഒഴിവാക്കുന്നു

ദുബായ് : യുഎഇയില്‍ പാസ്‌പോര്‍ട്ടില്‍ വിസ സ്റ്റാമ്പ് ചെയ്യുന്ന നടപടി ഒഴിവാക്കുന്നു. താമസ വിസയുള്ളവര്‍ക്കാണ് ഈ ആനുകൂല്യം ലഭിക്കുക. പകരം ഇലക്ട്രോണിക്‌സ് സംവിധാനം പരിഗണിക്കുകയാണ് താമസവിദേശികാര്യ ഡയറക്ടറേറ്റ്. അജ്മാനില്‍ ചേര്‍ന്ന സുപ്രധാന യോഗത്തിലാണ് ഈ നിര്‍ദേശം മുന്നോട്ട് വെച്ചത്.

നിലവില്‍ യുഎഇ റെസിഡന്‍സ് വിസയുള്ളവരുടെ പാസ്‌പോര്‍ട്ടില്‍ വിസാ പേപ്പര്‍ അടിച്ചുനല്‍കുന്നതാണ് രീതി. ഇത് ഒഴിവാക്കി പകരം ഇലക്ട്രോണിക്‌സ് സംവിധാനം കൊണ്ടുവരുന്നതിനെ കുറിച്ചാണ് താമസ വിദേശികാര്യ ഡയറക്ട്രേറ്റിന്റെ ആലോചന. വിസ നടപടികള്‍ കൂടുതല്‍ സ്മാര്‍ട്ടാക്കി പേപ്പര്‍ ജോലികള്‍ കുറക്കുന്നതിന്റെ ഭാഗമായാണ് ഈ പരിഷ്‌കാരം നടപ്പിലാക്കുക.പുതിയതായി ടൈപ്പിങ് കേന്ദ്രങ്ങള്‍ വഴി വിസ പ്രിന്റെടുത്ത് നല്‍കുന്ന നടപടിക്കും വകുപ്പ് തുടക്കം കുറിച്ചിട്ടുണ്ട്.താമസവിസ സ്റ്റാമ്പ് ചെയ്യാനായി ഡയറക്ട്രേറ്റിന്റെ സേവനകേന്ദ്രത്തില്‍ എത്തേണ്ടി വരുന്നതും ഒഴിവാക്കും. ഇത്തരമൊരു പരീക്ഷണം ഇപ്പോള്‍ അജ്മാനില്‍ നടക്കുന്നുണ്ട്. അത് വിജയിച്ചാല്‍ ഇലക്ട്രോണിക്‌സ് സംവിധാനം വ്യാപകമാക്കാനാണ് തീരുമാനം. റെസിഡന്റ്‌സ് വിസ കൈപറ്റാനായി സേവനകേന്ദ്രത്തില്‍ അബൂദബിയില്‍ ഒഴിവാക്കിയിട്ടുണ്ട്.

അക്രമികളുടെ കുത്തേറ്റ് മലയാളി റിയാദില്‍ കൊല്ലപ്പെട്ടു
Posted by
20 August

അക്രമികളുടെ കുത്തേറ്റ് മലയാളി റിയാദില്‍ കൊല്ലപ്പെട്ടു

റിയാദ്: മലയാളി സൗദിയിലെ റിയാദില്‍ വെച്ച് അക്രമികളുടെ കുത്തേറ്റ് കൊല്ലപ്പെട്ടു. കോഴിക്കോട്, കൊടുവള്ളി കരുവന്‍പൊയില്‍ സ്വദേശി കെകെ അബ്ദുല്‍ ഗഫൂര്‍(50) ആണ് മരണപ്പെട്ടത്. റിയാദിലെ ശിഫ സനാഇയ്യയില്‍ ഇന്നു രാവിലെയാണ് ദാരുണമായ സംഭവം നടന്നത്.

പ്ലാസ്റ്റിക്ക് കമ്പനി ബിസിനസ് നടത്തുകയായിരുന്ന ഇദ്ദേഹത്തെ പിന്നില്‍ നിന്ന് ആക്രമിച്ച് സംഘം തലക്കടിച്ചും കുത്തിയും കൊലപ്പെടുത്തുകയായിരുന്നുവെന്നാണ് ലഭിക്കുന്ന പ്രാഥമിക വിവരം.

ശിഫ സനാഇയ്യയില്‍ പള്ളിക്കു സമീപത്തായാണ് ഗഫൂറിന്റെ മൃതദേഹം കണ്ടത്. മൃതദേഹത്തില്‍ തലക്കടിയേറ്റ പാടുകള്‍ ഉണ്ട്. കോഴിക്കോട് കൊടുവള്ളി കരുവന്‍പൊയില്‍ പിടി ഹസ്സന്റെ മകനാണ് മരിച്ച അബ്ദുല്‍ ഗഫൂര്‍.

കടലുകള്‍ താണ്ടി സ്‌നേഹ സംഗമം; നീണ്ട പതിനേഴു വര്‍ഷത്തെ കണ്ണീരിനും കാത്തിരിപ്പിനുമൊടുവില്‍ നൂര്‍ജഹാന്‍ മകന്‍ ഹാനിയെ കണ്ടു; കൂടിക്കാഴ്ച ഒരുക്കിയതാവട്ടെ പാകിസ്താന്‍ സ്വദേശിയും
Posted by
19 August

കടലുകള്‍ താണ്ടി സ്‌നേഹ സംഗമം; നീണ്ട പതിനേഴു വര്‍ഷത്തെ കണ്ണീരിനും കാത്തിരിപ്പിനുമൊടുവില്‍ നൂര്‍ജഹാന്‍ മകന്‍ ഹാനിയെ കണ്ടു; കൂടിക്കാഴ്ച ഒരുക്കിയതാവട്ടെ പാകിസ്താന്‍ സ്വദേശിയും

ദുബായ്: പുളിക്കല്‍ ചെറുവണ്ണൂര്‍ സ്വദേശി നൂര്‍ജഹാന്‍ തന്റെ മകന്‍ ഹാനിയെ നീണ്ട പതിനേഴു വര്‍ഷത്തെ കാത്തിരിപ്പിനൊടുവില്‍ കണ്ടു. ജീവിച്ചിരിപ്പുണ്ടോ ഇല്ലയോ എന്നറിയാതെ മകനായി കാത്തിരുന്ന 17 വര്‍ഷങ്ങള്‍ ദുബായിയില്‍ യുഗങ്ങളായ് അവസാനിക്കുകയായിരുന്നു. കണ്ണീരുമായി കാത്തിരുന്ന ആ അമ്മയുടെ മുന്നില്‍ ഹാനിയെ എത്തിച്ചതാവട്ടെ പാകിസ്താന്‍ സ്വദേശിയുടെ കാരുണ്യവും.

സുഡാന്‍ സ്വദേശിയായ ഹാനിയുടെ പിതാവ് പഠിക്കാന്‍ കേരളത്തില്‍ എത്തിയപ്പോഴാണ് നൂര്‍ജഹാനെ പരിചയപ്പെടുന്നതും വിവാഹം ചെയ്യുന്നതും. പിന്നീട് ഹാനിയുള്‍പ്പടെ നാലു കുട്ടികള്‍ ഈ ദമ്പതികള്‍ക്ക് ജനിക്കുകയും ചെയ്തു. സഹോദരങ്ങള്‍ തമ്മില്‍ പരസ്പരം സ്‌നേഹിച്ചു കൊതിതീരുന്നതിനു മുമ്പേ വഴക്കിട്ട് നൂര്‍ജഹാന്റെ ഭര്‍ത്താവ് കുഞ്ഞു ഹാനിയുമായി സുഡാനിലേക്ക് കടന്നു. താന്‍ എവിടേക്കാണ് പോകുന്നതെന്നോ എന്തിനാണ് പോകുന്നതെന്നോ അന്ന് ഹാനിക്കുമറിയില്ലായിരുന്നു.

സുഡാനില്‍ എത്തിയ അച്ഛന്‍ വീണ്ടും വിവാഹിതനായി. അച്ഛനും രണ്ടാനമ്മയും ചേര്‍ന്ന് തന്നെ എന്നും ഉപദ്രവിക്കുമായിരുന്നുവെന്നാണ് ഹാനി കണ്ണീരോടെ ഓര്‍ക്കുന്നത്. ഇതിനിടയിലും തന്റെ അമ്മയേയും സഹോദരങ്ങളെയും കാണാനുള്ള ആഗ്രഹം തന്റെ മനസില്‍ ഹാനി നിധി പോലെ സൂക്ഷിച്ചിരുന്നു. തുടര്‍ന്ന് അച്ഛനറിയാതെ തന്റെ ജനന സര്‍ട്ടിഫിക്കറ്റും അമ്മയുടെ ഫോട്ടോയും അച്ഛന്റെയും അമ്മയുടെയും വിവാഹ സാക്ഷ്യപത്രവുമൊക്കെ ഹാനി സുഡാനില്‍ താമസിക്കുന്ന മലയാളികളെ കാണിക്കുമായിരുന്നു. ആദ്യമൊക്കെ നിരാശയായിരുന്നു ഫലം. അവസാനം കഥ കേട്ട മണ്ണാര്‍ക്കാട്ട് സ്വദേശിയായ ഫാറൂഖ് ഹാനിയെ സഹായിക്കാനായി ഫേസ്ബുക്കില്‍ പോസ്റ്റിടുകയായിരുന്നു. ഇത് അബുദാബിയില്‍ ജോലി ചെയ്യുന്ന ഹാനിയുടെ സഹോദരി ഷമീറയുടെ ബന്ധുവായ റഹീം അറിയുകയും നാട്ടിലുള്ളവരെ അറിയിക്കുകയുമായിരുന്നു. മാത്രമല്ല ദുബായിയില്‍ ജോലി ചെയ്യുന്ന ഷമീറയും സംഭവം അറിഞ്ഞു.

പിന്നെ പണം സ്വരുക്കൂട്ടി ഹാനിയെ ദുബായിയില്‍ എത്തിക്കാനുള്ള ശ്രമമായിരുന്നു ഷമീറയ്ക്ക്. ദുബായിയില്‍ വച്ച് സഹോദരിയുടെ ഫോണില്‍ നിന്നും അമ്മയെ വിളിച്ചിരുന്നു. എന്നാല്‍ മലയാളം അറിയാഞ്ഞതിനാല്‍ അമ്മ എന്താണ് പറഞ്ഞതെന്ന് ഹാനിക്ക് മനസിലായതുമില്ല.

എങ്കിലും വര്‍ഷങ്ങള്‍ക്ക് ശേഷം തന്റെ പെറ്റമ്മയെ കാണാനും സംസാരിക്കാനും സാധിച്ച സന്തോഷത്തിലാണ് ഹാനി. ഹാനിയെ കണ്ട നിമിഷത്തില്‍ തന്റെ ആനന്ദവും കണ്ണീരുമടക്കാന്‍ നൂര്‍ജഹാനു കഴിഞ്ഞില്ല. ഒരിക്കലും കാണാന്‍ കഴിയില്ലെന്നു കരുതിയ പെറ്റമ്മയെ കണ്ട സന്തോഷത്തില്‍ ഹാനിക്കും കണ്ണീരിനെ നിയന്ത്രിക്കാന്‍ സാധിച്ചില്ല. പൊട്ടിക്കരഞ്ഞുകൊണ്ടാണ് അമ്മയെ ഹാനി കെട്ടിപ്പിടിച്ചത്. ഈ അസുലഭ മുഹൂര്‍ത്തത്തിന് സാക്ഷികളാകാന്‍ ഭാഗ്യം ചെയ്തത് ഷാര്‍ജ വിമാനത്തിലെ അധികൃതരും യാത്രക്കാരും സഹോദരി ഷമീറയുമായിരുന്നു.

അന്താരാഷ്ട്ര മാധ്യമങ്ങളുടെ വരെ ശ്രദ്ധനേടിയ ഈ സംഭവം അറിഞ്ഞതിനെ തുടര്‍ന്ന് പാകിസ്താന്‍ സ്വദേശിയായ ത്വല്‍ഹാ ഷാ ആണ് നൂര്‍ജഹാന് ഷാര്‍ജയിലേക്കുള്ള വിമാന ടിക്കറ്റ് തരപ്പെടുത്തി നല്‍കിയത്. മാത്രമല്ല ഷാര്‍ജയിലെ തന്റെ സ്ഥാപനത്തില്‍ ഹാനിക്ക് ജോലി നല്‍കാനും അദ്ദേഹം താത്പര്യം പ്രകടിപ്പിച്ചു. പക്ഷെ പ്രശസ്തമായ ഒരു ടൈപ്പിംഗ് സ്ഥാപനത്തില്‍ ജോലി ലഭിച്ചതിനാല്‍ ഹാനിക്ക് ആ വാഗ്ദാനം സ്വീകരിക്കാനായില്ല. കഴിഞ്ഞ 16 വര്‍ഷത്തെ കഥകള്‍ പറയാനുള്ള തിടുക്കത്തിലാണ് ഈ അമ്മയും മകനുമിപ്പോള്‍.

ഷാര്‍ജയില്‍ അപകടത്തില്‍ മലയാളി യുവതി മരിച്ചു;    കാസര്‍കോട് മുന്‍ ബിജെപി നഗരസഭ കൗണ്‍സിലറായിരുന്ന സുനിതാ പ്രശാന്തിന്റെ ദാരുണ അന്ത്യം ഓടിക്കൊണ്ടിരുന്ന വാഹനത്തിന്റെ ഡോര്‍ തുറന്നതിനെ തുടര്‍ന്ന് റോഡിലേക്ക് തെറിച്ച് വീണ്
Posted by
17 August

ഷാര്‍ജയില്‍ അപകടത്തില്‍ മലയാളി യുവതി മരിച്ചു; കാസര്‍കോട് മുന്‍ ബിജെപി നഗരസഭ കൗണ്‍സിലറായിരുന്ന സുനിതാ പ്രശാന്തിന്റെ ദാരുണ അന്ത്യം ഓടിക്കൊണ്ടിരുന്ന വാഹനത്തിന്റെ ഡോര്‍ തുറന്നതിനെ തുടര്‍ന്ന് റോഡിലേക്ക് തെറിച്ച് വീണ്

ഷാര്‍ജ: ഷാര്‍ജയില്‍ അപകടത്തില്‍ മലയാളി യുവതി മരിച്ചു. ഇവിടെ ബ്യൂട്ടീഷനായി ജോലി ചെയ്യുന്ന കാസര്‍കോട് സ്വദേശി സുനിതാ പ്രശാന്ത്(40) ആണ് മരിച്ചത്. ഓടിക്കൊണ്ടിരുന്ന വാഹനത്തിന്റെ ഡോര്‍ തുറന്നതിനെ തുടര്‍ന്ന് റോഡിലേക്ക് തെറിച്ച് വീണ സുനിതാ പ്രശാന്ത് തത്ക്ഷണം മരിക്കുകയായിരുന്നു. ഇവരുടെ കൂടെ കാറിലുണ്ടായിരുന്ന ബ്യൂട്ടി സലൂണ്‍ ഉടമ മലയാളിയായ സൂസന്‍, സഹപ്രവര്‍ത്തകയായ നേപ്പാളി യുവതി എന്നിവരെ പരുക്കുകളോടെ ആശുപത്രിയില്‍ പ്രവേശിപ്പിച്ചു.

ചൊവ്വാഴ്ച രാത്രി 11 മണിക്ക് ഷാര്‍ജയിലെ അല്‍ ദൈദ് റോഡിലായിരുന്നു അപകടം. മരിച്ച സുനിത താമസിക്കുന്ന അപ്പാര്‍ട്ട്‌മെന്റില്‍ കീടനാശിനി പ്രയോഗം നടത്തിയിരുന്നതിനാല്‍ രാത്രി സ്ഥാപനം അടച്ച ശേഷം സൂസനും സുനിതയടക്കമുള്ള നാല് ജീവനക്കാരും ദൈദിലേയ്ക്ക് പോകുകയായിരുന്നു. സ്ഥാപനമുടമ സൂസന്‍ ഓടിച്ചിരുന്ന വാഹനത്തിന്റെ വാതില്‍ തനിയെ തുറന്ന് സുനിത പുറത്തേയ്ക്ക് തെറിച്ചുവീഴുകയായിരുന്നുവെന്നാണ് വിവരം. ഇലക്ട്രിക് പോസ്റ്റില്‍ തലയിടിച്ചതിനെ തുടര്‍ന്ന് സുനിത സംഭവ സ്ഥലത്ത് തന്നെ മരിച്ചു.

തുടര്‍ന്ന് ഇവരുടെ വാഹനം ഇലക്ട്രിക് പോസ്റ്റില്‍ ഇടിച്ചതിനെ തുടര്‍ന്നാണ് സൂസനും നേപ്പാളി യുവതിയ്ക്കും പരിക്കേറ്റത്.കാസര്‍കോട് നഗരസഭയില്‍ ബിജെപി കൗണ്‍സിലറായിരുന്ന സുനിത നേരത്തെ ഉദുമ മണ്ഡലം ബിജെപി സ്ഥാനാര്‍ഥിയായും മത്സരിച്ചിരുന്നു. കഴിഞ്ഞ അഞ്ച് വര്‍ഷമായി ഷാര്‍ജയില്‍ ബ്യൂട്ടീഷനായി ജോലി ചെയ്യുകയായിരുന്നു. ഭര്‍ത്താവ് പ്രശാന്ത് .മക്കള്‍: സംഗീത് പ്രശാന്ത്(17), സഞ്ജന പ്രശാന്ത് (14). മൃതദേഹം നിയമ നടപടികള്‍ക്ക് ശേഷം നാട്ടിലേക്ക് കൊണ്ടു പോകും.

ഖത്തറിന് സന്തോഷവാര്‍ത്ത, ഉപരോധത്തിന് അയവ് വരുത്തി സൗദി രാജകുമാരന്‍; ഇ പെര്‍മിറ്റ് ഇല്ലാതെ തീര്‍ത്ഥാടകര്‍ക്ക് ഇനി സൗദിയില്‍ കടക്കാം
Posted by
17 August

ഖത്തറിന് സന്തോഷവാര്‍ത്ത, ഉപരോധത്തിന് അയവ് വരുത്തി സൗദി രാജകുമാരന്‍; ഇ പെര്‍മിറ്റ് ഇല്ലാതെ തീര്‍ത്ഥാടകര്‍ക്ക് ഇനി സൗദിയില്‍ കടക്കാം

ജിദ്ദ: ഖത്തര്‍ ഉപരോധത്തിന് അയവ്‌വരുത്തി തീര്‍ത്ഥാടകരുടെ മനസ്‌നിറയുന്ന ഉത്തരവുമായി സൗദി അറേബ്യന്‍ രാജകുമാരന്‍. ഖത്തര്‍ തീര്‍ത്ഥാടകര്‍ക്ക് ഇ പെര്‍മിറ്റ് ഇല്ലാതെ സല്‍വാ അതിര്‍ത്തി മുഖേന സൗദി അറേബ്യയിലേക്ക് കടക്കാമെന്നുള്ള സല്‍മാന്‍ രാജകുമാരന്റെ ഉത്തരവ് സൗദി പ്രസ് ഏജന്‍സിയാണ് റിപ്പോര്‍ട്ട് ചെയ്തത്.

സൗദി അറേബ്യന്‍ രാജകുമാരന്‍ മുഹമ്മദ് ബിന്‍ സല്‍മാനും ഖത്തര്‍ രാജാവ് ശൈഖ് അബ്ദുല്ലഹ് ബിന്‍ അലി ബിന്‍ അബ്ദുല്ലാഹ് ബിന്‍ ജാസിം അല്‍താനിയുമായി നടത്തിയ കൂടികാഴ്ചയാണ് സുപ്രധാന തീരുമാനത്തിന് വഴിയൊരുക്കിയത്. ബുധനാഴ്ച വൈകുന്നേരം അല്‍ സലാം പാലസില്‍ വെച്ചായിരുന്നു കൂടികാഴ്ച. ചരിത്രപരമായി സൗദിയും ഖത്തറുമായി വളരെ ആഴത്തില്‍ വേരുറച്ച ബന്ധമാണുള്ളതെന്നും അതുകൊണ്ട്തന്നെ ഖത്തര്‍ തീര്‍ത്ഥാടകര്‍ക്കായി സല്‍വ ബോര്‍ഡര്‍ തുറന്ന് നല്‍കണമെന്നും ശൈഖ് അബ്ദുല്ലഹ് അഭ്യര്‍ത്ഥനയെന്നോണം രാജകുമാരനു മുന്നില്‍ അവതരിപ്പിച്ചു. ചരിത്രപരമായുള്ള ബന്ധം ഊട്ടി ഉറപ്പിച്ച്, സല്‍വ ബോര്‍ഡര്‍ ഖത്തര്‍ ജനങ്ങള്‍ക്കായി തുറന്നു നല്‍കണമെന്ന ഖത്തര്‍ രാജാവിന്റെ ആവശ്യം സല്‍മാന്‍ രാജകുമാരന്‍ അംഗീകരിക്കുകയും മറ്റ് ഇലക്ട്രോണിക് പാസ് ഒന്നും തന്നെ ഇല്ലാതെ തീര്‍ത്ഥാടകര്‍ക്ക് സല്‍വ വഴി സൗദിയില്‍ പ്രവേശിക്കാമെന്നുമുള്ള ഉറപ്പ് നല്‍കുകയും ചെയ്തു.

കൂടാതെ ഹജ്ജ്, ഉംറ പ്രമാണിച്ച് ദമാമിലെ കിങ് ഫഹദ് ഇന്റര്‍നാഷ്ണല്‍ എയര്‍പോര്‍ട്ടിലും അല്‍ അഹ്‌സ ഇന്റര്‍നാഷ്ണല്‍ എയര്‍പോര്‍ട്ടിലും ഖത്തര്‍ തീര്‍ത്ഥാടകര്‍ക്ക് പ്രത്യേക ചാര്‍ജുകള്‍ ഈടാക്കരുതെന്നും ദോഹ എയര്‍പോര്‍ട്ടില്‍ നിന്നും ജിദ്ദയിവെത്തുന്നവരുടെ ചെലവുകള്‍ സല്‍മാന്‍ രാജാവ് വഹിക്കുമെന്നും അദ്ദേഹം അറിയിച്ചു.