സിപിഎമ്മിനും സിപിഐയ്ക്കും ഒരേ അഭിപ്രായം ഉണ്ടാകണമെന്ന് ശഠിക്കരുത്; ആക്ഷേപിക്കുന്നവര്‍ താലോലിക്കുന്ന കാലം വരുമെന്നും കാനം
Posted by
19 February

സിപിഎമ്മിനും സിപിഐയ്ക്കും ഒരേ അഭിപ്രായം ഉണ്ടാകണമെന്ന് ശഠിക്കരുത്; ആക്ഷേപിക്കുന്നവര്‍ താലോലിക്കുന്ന കാലം വരുമെന്നും കാനം

പാലക്കാട്: സിപിഎമ്മിനും സിപിഐയ്ക്കും ഒരേ അഭിപ്രായം ഉണ്ടാകണമെന്ന് ശഠിക്കരുതെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്‍. പലപ്പോഴും, ഒരു പാര്‍ട്ടിയില്‍ തന്നെ രണ്ടഭിപ്രായമുള്ളപ്പോള്‍ രണ്ട് പാര്‍ട്ടികള്‍ക്ക് ഒരേ അഭിപ്രായമുണ്ടാകുന്നത് എങ്ങനെയെന്നും അദ്ദേഹം ചോദിച്ചു. തോളിലിരുന്ന് ചെവി തിന്നുന്നു എന്ന് ആക്ഷേപിക്കുന്നവര്‍ നാളെ തോളിലിരുത്തി താലോലിക്കുന്ന കാലം വരുമെന്നും അദ്ദേഹം പറഞ്ഞു.

സിപിഎമ്മിനും സിപിഐക്കും ഒരേ അഭിപ്രായം വേണമെന്ന് ശഠിക്കരുത്. സിപിഐ വളരുന്ന പാര്‍ട്ടിയാണ്. അന്തര്‍ സംസ്ഥാന നദീജല കരാര്‍ വിഷയത്തില്‍ മാറി മാറി വന്ന സര്‍ക്കാരുകള്‍ വേണ്ട തരത്തില്‍ പ്രവര്‍ത്തിച്ചിട്ടില്ല എന്ന് വിമര്‍ശനം ഉണ്ട്. പറമ്പിക്കുളം ആളിയാര്‍ വിഷയത്തില്‍ അര്‍ഹമായ ജലം കേരളത്തിന് കിട്ടിയിട്ടുണ്ടോ എന്ന് സര്‍ക്കാര്‍ പരിശോധിക്കണമെന്നും കാനം കൂട്ടിച്ചേര്‍ത്തു.

സിപിഎമ്മിനെതിരെ നടക്കുന്ന ആക്രമണങ്ങളെ കണ്ടില്ലെന്ന് നടിക്കുന്നു; മാധ്യമങ്ങളുടെ ഇരട്ടത്താപ്പ് ജനങ്ങള്‍ തിരിച്ചറിയണമെന്ന് പി ജയരാജന്‍
Posted by
19 February

സിപിഎമ്മിനെതിരെ നടക്കുന്ന ആക്രമണങ്ങളെ കണ്ടില്ലെന്ന് നടിക്കുന്നു; മാധ്യമങ്ങളുടെ ഇരട്ടത്താപ്പ് ജനങ്ങള്‍ തിരിച്ചറിയണമെന്ന് പി ജയരാജന്‍

കണ്ണൂര്‍: സിപിഎമ്മിനെതിരെ നടക്കുന്ന ആക്രമണങ്ങള്‍ മാധ്യമങ്ങള്‍ സൗകര്യപൂര്‍വ്വം കണ്ടില്ലെന്ന് നടിക്കുകയാണെന്ന് സിപിഎം കണ്ണൂര്‍ ജില്ലാ സെക്രട്ടറി പി ജയരാജന്‍. പാട്യം ക്ഷീരോല്‍പ്പാദക സംഘത്തിലെ പാല്‍ വില്‍പ്പനക്കാരന്‍ കിഴക്കേ കതിരൂര്‍ സ്വദേശി ഷാജിയെ നീര്‍വേലിയില്‍ വെച്ച് ഇന്ന് രാവിലെ ആര്‍എസ്എസ് ക്രിമിനലുകള്‍ ആക്രമിച്ച സംഭവത്തില്‍ പ്രതികരിക്കുകയായിരുന്നു ജയരാജന്‍.

ഫേസ്ബുക്കിലൂടെയാണ് അദ്ദേഹത്തിന്റെ പ്രതികരണം. ഇത്തരം ആക്രമണങ്ങളെല്ലാം മാധ്യമങ്ങള്‍ മനഃപൂര്‍വം തിരസ്‌കരിക്കുകയാണെന്നും വലതുപക്ഷ മാധ്യമങ്ങളുടെ ഈ ഇരട്ടത്താപ്പ് ജനങ്ങള്‍ തിരിച്ചറിയണം. അക്രമികള്‍ക്കെതിരെ ശക്തമായ നടപടി സ്വീകരിക്കണമെന്നും മാധ്യമങ്ങള്‍ പച്ചക്കള്ളം പ്രചരിപ്പിക്കുകയാണെന്നും പി ജയരാജന്‍ തന്റെ ഫേസ്ബുക് പേജില്‍ വ്യക്തമാക്കുന്നു.

കമലഹാസന്‍ വിജയകാന്തുമായി കൂടിക്കാഴ്ച്ച നടത്തി
Posted by
19 February

കമലഹാസന്‍ വിജയകാന്തുമായി കൂടിക്കാഴ്ച്ച നടത്തി

ചെന്നൈ: പാര്‍ട്ടി പ്രഖ്യാപനത്തിന് മുന്നോടിയായി നടനും, ഡിഎംഡികെ നേതാവുമായ വിജയകാന്തിനോട് രാഷ്ട്രീയ പിന്തുണതേടി കമല്‍ഹാസന്‍. ചെന്നൈയിലെ പാര്‍ട്ടി ഓഫീസിലെത്തിയാണ് കമല്‍ഹസന്‍ വിജയകാന്തുമായി കൂടിക്കാഴ്ച്ച നടത്തിയത്.

കഴിഞ്ഞ ദിവസം ഇതേ ആവശ്യവുമായി കമല്‍ഹസന്‍ നടന്‍ രജനീകാന്തിനെ കണ്ടിരുന്നു. പാര്‍ട്ടി പ്രഖ്യാപനം നടക്കുന്ന രാമേശ്വരത്തേക്ക് രജിനിയെ കമല്‍ഹാസന്‍ ക്ഷണിക്കുകയും ചെയ്തു. എന്നാല്‍ തങ്ങള്‍ സിനിമയിലെന്ന പോലെ രാഷ്ട്രീയത്തിലും രണ്ടു വഴിക്കാണെന്നായിരുന്നു രജിനിയുടെ മറുപടി. ഈ മാസം 21 ന് മുന്‍ രാഷ്ട്രപതി ഡോ.എ പി ജെ അബ്ദുള്‍ കലാമിന്റെ വസിതിയില്‍ നിന്ന് രാഷ്ട്രീയ യാത്ര നടത്തുന്നുണ്ട്. ഇതിനെ തുടര്‍ന്നാണ് പാര്‍ട്ടി പ്രഖ്യാപനമുണ്ടാവുക.

 

 

ഹോട്ടലില്‍ വെച്ച് യുവാവിനെ ക്രൂരമായി ആക്രമിച്ച കോണ്‍ഗ്രസ് എംഎല്‍എ എന്‍എ ഹാരിസിന്റെ മകന്‍ പോലീസില്‍ കീഴടങ്ങി
Posted by
19 February

ഹോട്ടലില്‍ വെച്ച് യുവാവിനെ ക്രൂരമായി ആക്രമിച്ച കോണ്‍ഗ്രസ് എംഎല്‍എ എന്‍എ ഹാരിസിന്റെ മകന്‍ പോലീസില്‍ കീഴടങ്ങി

ബംഗളൂരു: ഹോട്ടലില്‍ ഭക്ഷണം കഴിക്കാനെത്തിയ യുവാവിനെ ക്രൂരമായി ആക്രമിച്ച് മൃതപ്രായനാക്കിയ സംഭവത്തില്‍ മലയാളിയായ കോണ്‍ഗ്രസ് എംഎല്‍എ എന്‍എ ഹാരിസിന്റെ മകന്‍ മുഹമ്മദ് നാലപ്പാട് പോലീസില്‍ കീഴടങ്ങി. മുഹമ്മദും കൂട്ടാളികളും യുബി സിറ്റിയിലെ ആഡംബര റസ്റ്റോറന്റില്‍ വച്ചായിരുന്നു വിദ്വത് എന്ന 24 കാരനെ അതിക്രൂരമായി ആക്രമിച്ചത്. പരിക്കേറ്റ ഇയാളെ ആശുപത്രിയിലെത്തിച്ചപ്പോഴും ഇവര്‍ മര്‍ദ്ദിക്കുകയായിരുന്നു. ശനിയാഴ്ച രാത്രി 11.30 നായിരുന്നു സംഭവം.

യൂത്ത് കോണ്‍ഗ്രസ് ജില്ലാ ജനറല്‍സെക്രട്ടറി കൂടിയായ മുഹമ്മദ് നാലപ്പാടും പത്തു സുഹൃത്തുക്കളും ചേര്‍ന്നാണ് ഡോളേഴ്സ് കോളനിയിലെ വിദ്വതിനെ ആക്രമിച്ചത്. ഇയാളുടെ സുഹൃത്ത് പ്രവീണ്‍ വെങ്കിടാചലത്തിന്റെ പരാതിയില്‍ പോലീസ് കേസെടുക്കുകയായിരുന്നു.

ലോകനാഥിലെ ബിസിനസുകാരന്റെ മകനായ വിദ്വതും പ്രവീണും കഫേയില്‍ ഭക്ഷണം കഴിക്കുകയായിരുന്നു. കാലില്‍ പ്ലാസ്റ്ററിട്ടതിനാല്‍ നേരെയിരിക്കാന്‍ സാധിക്കാതിരുന്ന വിദ്വതിനോട് നേരെയിരിക്കണമെന്ന് ആവശ്യപ്പെട്ട് മുഹമ്മദും സുഹൃത്തുക്കളും വഴക്കിട്ടു. തുടര്‍ന്ന് മര്‍ദിച്ചു. കുപ്പികൊണ്ട് മുഖത്തും കണ്ണിനും മര്‍ദനമേറ്റ് മല്യ ആശുപത്രിയില്‍ ചികിത്സ തേടിയ വിദ്വതിനെ കൂടുതല്‍പേര്‍ സംഘടിച്ചെത്തി ആശുപത്രിയില്‍വച്ചും ആക്രമിക്കുകയായിരുന്നു.

അതേസമയം, മുഹമ്മദിനെ കോണ്‍ഗ്രസ് പ്രാഥമികാംഗത്വത്തില്‍നിന്ന് പുറത്താക്കിയതായി കെപിസിസി പ്രസിഡന്റ് ഡോ. ജി പരമേശ്വര്‍ അറിയിച്ചു. അക്രമികള്‍ നിശ്ചയമായും ശിക്ഷിക്കപ്പെടുമെന്ന് മുഖ്യമന്ത്രിയും പ്രതികരിച്ചു. അതേസമയം, ഹാരിസ് എംഎല്‍എ വിദ്വതിനെ സന്ദര്‍ശിച്ച് കേസ് ഒതുക്കിത്തീര്‍ക്കാന്‍ ശ്രമിക്കുന്നുവെന്നും ആരോപണമുണ്ട്.

കണ്ണൂരില്‍ ബുധനാഴ്ച്ച സമാധാന യോഗം
Posted by
19 February

കണ്ണൂരില്‍ ബുധനാഴ്ച്ച സമാധാന യോഗം

കണ്ണൂര്‍: യൂത്ത് കോണ്‍ഗ്രസ് നേതാവ് ശുഹൈബ് കൊല്ലപ്പെട്ട സാഹചര്യത്തില്‍ ബുധനാഴ്ച കണ്ണൂരില്‍ സര്‍വകക്ഷി സമാധാന യോഗം ചേരും. മുഖ്യമന്ത്രിയുടെ നിര്‍ദേശപ്രകാരമാണ് യോഗം. മന്ത്രി എ.കെ. ബാലന്റെ അധ്യക്ഷതയിലായിരിക്കും യോഗം നടക്കുക.

സമാധാന യോഗത്തില്‍ പങ്കെടുക്കുമെന്ന് പ്രതിപക്ഷ നേതാവ് രമേശ് ചെന്നിത്തലയും അറിയിച്ചു. ശുഹൈബിന്റെ കൊലപാതകവുമായി ബന്ധപ്പെട്ട് നിരവധി ആരോപണങ്ങള്‍ ഉയര്‍ന്ന സാഹചര്യത്തിലാണ് സമാധാന യോഗം വിളിക്കാന്‍ സര്‍ക്കാര്‍ തീരുമാനിച്ചത്.

 

കോണ്‍ഗ്രസ് കൈയക്ഷരം നന്നാവാത്തതിന് പേനയെ കുറ്റം പറഞ്ഞു നടക്കുന്നു; ചെങ്ങന്നൂരില്‍ പിസി വിഷ്ണുനാഥ് ജീവനുംകൊണ്ട് ഓടിയെന്നും മാണി ഗ്രൂപ്പ്
Posted by
19 February

കോണ്‍ഗ്രസ് കൈയക്ഷരം നന്നാവാത്തതിന് പേനയെ കുറ്റം പറഞ്ഞു നടക്കുന്നു; ചെങ്ങന്നൂരില്‍ പിസി വിഷ്ണുനാഥ് ജീവനുംകൊണ്ട് ഓടിയെന്നും മാണി ഗ്രൂപ്പ്

കോട്ടയം: ചെങ്ങന്നൂര്‍ ഉപതെരഞ്ഞെടുപ്പില്‍ മത്സരിക്കാന്‍ ഭയന്ന് കോണ്‍ഗ്രസും പിസി വിഷ്ണുനാഥും ജീവനുംകൊണ്ട് ഓടിയെന്ന് കേരള കോണ്‍ഗ്രസ് മാണി ഗ്രൂപ്പ്. ചെങ്ങന്നൂരില്‍ കോണ്‍ഗ്രസ് സ്ഥാനാര്‍ത്ഥി ജീവനും കൊണ്ട് ഓടിയെന്നായിരുന്നു ജില്ലാ കമ്മിറ്റി യോഗത്തില്‍ മാണി വിഭാഗത്തിന്റെ പരിഹാസം.

കൈയ്യിലിരുപ്പിന്റെ ഫലം കൊണ്ടാണ് കോണ്‍ഗ്രസ് നശിച്ചതെന്ന് കേരള കോണ്‍ഗ്രസ് നേതാക്കള്‍ കുറ്റപ്പെടുത്തി. ‘സ്വന്തം കൈയിലിരുപ്പുകൊണ്ട് നശിച്ചതിന് മറ്റുളളവരെ കുറ്റപ്പെടുത്തുകയാണ് കോണ്‍ഗ്രസ്. കൈയക്ഷരം നന്നാവാത്തതിന് പേനയെ കുറ്റപ്പെടുത്തും പോലെയാണത്.’

ഡമ്മികളെ ഇറക്കിക്കളിച്ചാലൊന്നും ബാര്‍ കോഴ കേസിലെ ആസൂത്രകരെ തിരിച്ചറിയാതിരിക്കില്ല. വിശ്വസ്തതയോടെ കൂടെനിന്നവരുടെ കുതികാല്‍ വെട്ടുന്ന സംസ്‌കാരം എന്ന് അവസാനിപ്പിക്കുന്നോ അന്നേ കോണ്‍ഗ്രസ് ഗതിപിടിക്കുകയുള്ളൂവെന്നും ജില്ലാ കമ്മിറ്റി യോഗത്തില്‍ നേതാക്കള്‍ പറഞ്ഞു. മാത്രമല്ല ചെങ്ങന്നൂരില്‍ ഒറ്റയ്ക്കു മത്സരിക്കാനും മാണി വിഭാഗം കോണ്‍ഗ്രസിനെ വെല്ലുവിളിച്ചു.

അതേസമയം മാണിഗ്രൂപ്പിനെ രൂക്ഷമായി വിമര്‍ശിച്ച് ഡിസിസി യോഗം പ്രമേയം പാസാക്കി. ഭരണത്തിന്റെ സൗഭാഗ്യങ്ങളെല്ലാം അനുഭവിച്ച ശേഷം മുന്നണി വിട്ടുപോയി രാഷ്ട്രീയ ശത്രുക്കള്‍ക്ക് ആയുധം നല്‍കുന്ന മാണി ഗ്രൂപ്പിന്റെ വിലപേശല്‍ രാഷ്ട്രീയം കോണ്‍ഗ്രസ് നേതൃത്വം മനസിലാക്കണമെന്ന് പ്രമയേത്തില്‍ പറയുന്നു.

നാല് ദിവസം പിന്നിട്ട് സ്വകാര്യ ബസ് സമരം: ജനജീവിതം ഇനിയും ദുസ്സഹമാക്കിയാല്‍ പെര്‍മിറ്റ് റദ്ദാക്കലാണ് അടുത്ത നടപടിയെന്ന് സര്‍ക്കാര്‍
Posted by
19 February

നാല് ദിവസം പിന്നിട്ട് സ്വകാര്യ ബസ് സമരം: ജനജീവിതം ഇനിയും ദുസ്സഹമാക്കിയാല്‍ പെര്‍മിറ്റ് റദ്ദാക്കലാണ് അടുത്ത നടപടിയെന്ന് സര്‍ക്കാര്‍

തിരുവനന്തപുരം: നാലു ദിവസമായി തുടരുന്ന സ്വകാര്യ ബസ് സമരം ഇതിനോടകം തന്നെ ജനജീവിതത്തെ തടസ്സപ്പെടുത്തിയിരുന്നു. ഇനിയും സമരവുമായി മുന്‍പോട്ടു പോകാനാണ് തീരുമാനമെങ്കില്‍ പെര്‍മിറ്റ് റദ്ധാക്കല്‍ തുടങ്ങി കടുത്ത നടപടികളിലേയ്ക്ക് നീങ്ങുമെന്ന് സര്‍ക്കാര്‍. ഇതിന്റെ ഭാഗമായി ആദ്യം കാരണം കാണിക്കല്‍ നോട്ടീസ് അയക്കും. പെര്‍മിറ്റ് റദ്ദാക്കാതിരിക്കാന്‍ എന്തെങ്കിലും കാരണമുണ്ടെങ്കില്‍ അറിയിക്കണമെന്ന് ചൂണ്ടിക്കാട്ടിയാവും നോട്ടീസ് നല്‍കുക.

മറുപടി തൃപ്തികരമല്ലെങ്കില്‍ പെര്‍മിറ്റ് റദ്ദാക്കല്‍ അടക്കമുള്ള നടപടികളുമായി മുന്നോട്ട് പോവാനാണ് സര്‍ക്കാര്‍ നീക്കം. സമരത്തിന്റെ പേരില്‍ ജനങ്ങളെ ബുദ്ധിമുട്ടിച്ച് സര്‍വീസ് നടത്താതിരിക്കുന്നത് അംഗീകരിക്കന്‍ കഴിയില്ലെന്ന് സര്‍ക്കാര്‍ അറിയിച്ചു. ഇതു സംബന്ധിച്ച് ട്രാന്‍സ്‌പോര്‍ട്ട് സെക്രട്ടറിക്കാവും ആദ്യം നിര്‍ദേശം നല്‍കുക. ട്രാന്‍സ്‌പോര്‍ട്ട് സെക്രട്ടറി അതത് സ്ഥലത്തെ ജില്ലാ കളക്ടറുമായി ബന്ധപ്പെട്ട് ബസുടമകള്‍ക്ക് നോട്ടീസ് നല്‍കും.

സ്വകാര്യ ബസ് സമരം നാല് ദിവസം പിന്നിട്ട സാഹചര്യത്തിലാണ് ബസ്സുടമകള്‍ക്ക് മേല്‍ കൂടുതല്‍ സമ്മര്‍ദം ചെലുത്താന്‍ സര്‍ക്കാര്‍ ഒരുങ്ങുന്നത്. മിനിമം ചാര്‍ജ് എട്ട് രൂപയാക്കിയിട്ടും വീണ്ടും സമരവുമായി മുന്നോട്ട് പോവുന്ന ബസുടമകളുടെ നിലപാട് അംഗീകരിക്കാനാവില്ലെന്നാണ് സര്‍ക്കാര്‍ പറയുന്നത്. വിദ്യാര്‍ത്ഥികളുടെ മിനിമം ചാര്‍ജ് വര്‍ധിപ്പിക്കണമെന്ന് ആവശ്യപ്പെട്ടാണ് സ്വകാര്യ ബസുടമകള്‍ ഇപ്പോള്‍ സമരം തുടരുന്നത്. ഇത് സംബന്ധിച്ച് ഗതാഗത മന്ത്രി എ.കെ ശശീന്ദ്രനുമായി ഇന്നലെ കോഴിക്കോട് നടന്ന ചര്‍ച്ച പരാജയപ്പെട്ടിരുന്നു.

സിപിഎമ്മിനെ നേരിടാന്‍ കോണ്‍ഗ്രസ് ബിജെപിയെ സഹായിക്കണം; ഇക്കാര്യം രാഹുല്‍ ഗാന്ധിയെ പറഞ്ഞ് മനസിലാക്കണമെന്നും കെ സുരേന്ദ്രന്‍
Posted by
19 February

സിപിഎമ്മിനെ നേരിടാന്‍ കോണ്‍ഗ്രസ് ബിജെപിയെ സഹായിക്കണം; ഇക്കാര്യം രാഹുല്‍ ഗാന്ധിയെ പറഞ്ഞ് മനസിലാക്കണമെന്നും കെ സുരേന്ദ്രന്‍

തിരുവനന്തപുരം: സിപിഎം ഒരു സാമൂഹ്യവിരുദ്ധ സംഘടനയാണെന്ന ആരോപണവുമായി ബിജെപി നേതാവ് കെ സുരേന്ദ്രന്‍. ആശയപരമായും നിയമപരമായും സിപിഎം എന്ന വിപത്തിനെ നേരിടാനാണ് ബിജെപി ശ്രമിക്കുന്നതെന്നും അതിന് പിന്തുണ നല്‍കാന്‍ കോണ്‍ഗ്രസ് നേതൃത്വം തയ്യാറാവണമെന്നും കെ സുരേന്ദ്രന്‍ ഫേസ്ബുക്കില്‍ കുറിച്ചു.

സിപിഎമ്മിനൊപ്പം കൂട്ടുകൂടാന്‍ ഓടി നടക്കുന്ന രാഹുല്‍ഗാന്ധിയെ ആദ്യം ഇതു പറഞ്ഞുമനസ്സിലാക്കാനാണ് കേരളത്തിലെ കോണ്‍ഗ്രസ്സ് നേതൃത്വം തയ്യാറാവേണ്ടത്. ഈ വിപത്തിനെ എതിര്‍ത്തുതോല്‍പ്പിക്കാന്‍ ബിജെപിക്കുമാത്രമേ കഴിയൂവെന്നും സുരേന്ദ്രന്‍ പറയുന്നു.

ആര്‍എസ്എസും സിപിഎമ്മും ഒരുപോലെയാണെന്നുള്ള പതിവു പ്രചാരണം അവസാനിപ്പിക്കാന്‍ കോണ്‍ഗ്രസ് ഇനിയെങ്കിലും തയ്യാറാവണം. ഷുഹൈബ് കൊലപാതകത്തിനു പിന്നില്‍ ഉന്നതനേതാക്കള്‍ തന്നെയാണെന്നും സുരേന്ദ്രന്‍ ആരോപിച്ചു.

സിപിഎമ്മിനെ എതിര്‍ക്കാന്‍ ബിജെപിക്ക് മാത്രമെ സാധിക്കൂവെന്ന് കോണ്‍ഗ്രസ് അണികളും ചില നേതാക്കളും മനസ്സിലാക്കിത്തുടങ്ങിയിട്ടുണ്ട്. രാജ് മോഹന്‍ ഉണ്ണിത്താന്റെ വാക്കുകള്‍ അതാണ് കാണിക്കുന്നത്. സുധാകരന്റെ ശൗര്യം കണ്ണൂരില്‍ പണ്ടെപ്പോലെ ഫലിക്കുന്നില്ലെന്നുള്ളത് ഒരു പച്ചപരമാര്‍ത്ഥമാണെന്നും സുരേന്ദ്രന്‍ അഭിപ്രായപ്പെട്ടു.

കെ സുരേന്ദ്രന്റെ ഫേസ്ബുക്ക് പോസ്റ്റിന്റെ പൂര്‍ണ്ണരൂപം:

കണ്ണൂരില്‍ ആര്‍. എസ്. എസുകാരെ കൊല്ലുന്നതിന് സി. പി. എം എപ്പോഴും പറയുന്ന ന്യായീകരണം സംഘപരിവാറിന്റെ ആക്രമണഭീഷണിയില്‍ നിന്ന് മുസ്‌ളീങ്ങളെ സംരക്ഷിക്കാനാണ് ഞങ്ങള്‍ ആര്‍. എസ്. എസ്സിനെ നേരിടുന്നത് എന്നാണ്. എന്നാല്‍ ഈ വാദഗതി എത്രമാത്രം പൊള്ളയാണെന്നുള്ളതിന്റെ
ഒടുവിലത്തെ ഉദാഹരണമാണ് ശുഹൈബ് കൊലപാതകം. ഫസലിന്റെ കാര്യത്തിലും അരിയില്‍ ഷുക്കൂറിന്റെ കാര്യത്തിലും നാദാപുരത്തെ ലീഗ് പ്രവര്‍ത്തകന്റെ കൊലയിലും ഈ പൊള്ളത്തരം തെളിഞ്ഞുകാണാം. പാര്‍ട്ടി ഗ്രാമങ്ങളില്‍ തങ്ങള്‍ക്ക് ഭീഷണിയായി ആരുവന്നാലും തട്ടിക്കളയും എന്നതാണ് സി. പി. എം രീതി. കൂടുതല്‍ ഇരകളാവുന്നത് ആര്‍. എസ്. എസ്സ് ആണെന്നു മാത്രം. സി. പി. എം ഒരു സാമൂഹ്യവിരുദ്ധസംഘടനയാണ്. ഭീകരവാദികള്‍ ചെയ്യുന്നതുതന്നെയാണ് സി. പി. എമ്മും ചെയ്യുന്നത്. ഇപ്പോഴത്തെ കെലപാതകത്തിനു പിന്നിലും ഉന്നതനേതാക്കള്‍ തന്നെയാണ്. ഗൂഡാലോചനക്കാരെ പിടിക്കാതെ കണ്ണൂര്‍ ശാന്തമാവുകയില്ല. ആര്‍. എസ്. എസും സി. പി. എമ്മും ഒരുപോലെയാണെന്നുള്ള പതിവു പ്രചാരണം അവസാനിപ്പിക്കാന്‍ കോണ്‍ഗ്രസ്സ് ഇനിയെങ്കിലും തയ്യാറാവണം. ആശയപരമായും നിയമപരമായും ഈ വിപത്തിനെ നേരിടാനാണ് ബി. ജെ. പി ശ്രമിക്കുന്നത്. അതിന് പിന്തുണ നല്‍കാനാണ് കോണ്‍ഗ്രസ്സ് തയ്യാറാവേണ്ടത്. സി. പി. എമ്മിനൊപ്പം കൂട്ടുകൂടാന്‍ ഓടി നടക്കുന്ന രാഹുല്‍ഗാന്ധിയെ ആദ്യം ഇതു പറഞ്ഞുമനസ്സിലാക്കാനാണ് കേരളത്തിലെ കോണ്‍ഗ്രസ്സ് നേതൃത്വം തയ്യാറാവേണ്ടത്. ഈ വിപത്തിനെ എതിര്‍ത്തുതോല്‍പ്പിക്കാന്‍ ബി. ജെ. പിക്കുമാത്രമേ കഴിയൂ. ത്രിപുര കാണിച്ചുതരുന്ന പാഠം അതാണ്. കോണ്‍ഗ്രസ്സ് അണികളും ചില നേതാക്കളും ആ കാര്യം മനസ്സിലാക്കിത്തുടങ്ങിയിട്ടുണ്ട്. രാജ് മോഹന്‍ ഉണ്ണിത്താന്റെ വാക്കുകള്‍ അതാണ് കാണിക്കുന്നത്. സുധാകരന്റെ ശൗര്യം കണ്ണൂരില്‍ പണ്ടെപ്പോലെ ഫലിക്കുന്നില്ലെന്നുള്ളത് ഒരു പച്ചപരമാര്‍ത്ഥമാണ്.

സകലരേയും ഞെട്ടിച്ച മോഡിയുടെ പാകിസ്താനിലെ അപ്രതീക്ഷിത സന്ദര്‍ശനം; പാകിസ്താന്റെ ബില്ല് കണ്ട് പ്രധാനമന്ത്രി ശരിക്കും ഞെട്ടി; വ്യോമപാതയ്ക്ക് 2.86 ലക്ഷത്തിന്റെ ബില്ല്
Posted by
19 February

സകലരേയും ഞെട്ടിച്ച മോഡിയുടെ പാകിസ്താനിലെ അപ്രതീക്ഷിത സന്ദര്‍ശനം; പാകിസ്താന്റെ ബില്ല് കണ്ട് പ്രധാനമന്ത്രി ശരിക്കും ഞെട്ടി; വ്യോമപാതയ്ക്ക് 2.86 ലക്ഷത്തിന്റെ ബില്ല്

ന്യൂഡല്‍ഹി: പ്രധാനമന്ത്രി പദം ഏറ്റെടുത്തതിനു പിന്നാലെ ആദ്യമായി പാകിസ്താനില്‍ അപ്രതീക്ഷിത സന്ദര്‍ശനം നടത്തി പാകിസ്താനേയും ലോകരാജ്യങ്ങളേയും ഒരു പോലെ ഞെട്ടിച്ച പ്രധാനമന്ത്രി നരേന്ദ്ര മോഡിക്ക് എട്ടിന്റെ പണി. മോഡിയുടെ ‘ക്രിസ്മസ് സന്ദര്‍ശനത്തിന്’ പാകിസ്താന്‍ വിലയിട്ടത് 1.49 ലക്ഷം രൂപ. 2015ലെ ക്രിസ്മസ് സന്ദര്‍ശനങ്ങളുടെ ഭാഗമായി റഷ്യ, അഫ്ഗാന്‍ എന്നീരാജ്യങ്ങള്‍ സന്ദര്‍ശിച്ച മോഡി തിരിച്ചു വരുമ്പോള്‍ യാതൊരു സൂചനയും നല്‍കാതെ പാകിസ്താന്‍ സന്ദര്‍ശിച്ചിരുന്നു.

റഷ്യ അഫ്ഗാനിസ്ഥാന്‍ സന്ദര്‍ശനം കഴിഞ്ഞു മടങ്ങിവരവെയാണു 2015 ഡിസംബര്‍ 25ന് മോഡി ലഹോറിലിറങ്ങിയത്. ലഹോറിലെത്തിയ പ്രധാനമന്ത്രിക്കു മികച്ച സ്വീകരണമാണു ലഭിച്ചത്. പിന്നീട് അവിടെനിന്നു ഹെലിക്കോപ്റ്ററില്‍ മോഡി പ്രധാനമന്ത്രി നവാസ് ഷരീഫിന്റെ വീട്ടിലേക്ക് പോയിരുന്നു.

ഈയാത്രയ്ക്ക് 1.49 ലക്ഷം രൂപയാണ് പാകിസ്താന്‍ വ്യോമയാന റൂട്ടിലെ നിരക്കായി വാങ്ങിയതെന്ന് പാകിസ്താനിലെ ഇന്ത്യന്‍ ഹൈക്കമ്മീഷനില്‍നിന്നുള്ള രേഖകള്‍ വ്യക്തമാക്കുന്നു. സാമൂഹിക പ്രവര്‍ത്തകനായ ലോകേഷ് ബത്ര നല്‍കിയ അപേക്ഷയിലാണു വിവരാവകാശ നിയമപ്രകാരം മറുപടി ലഭിച്ചതെന്നു വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്യുന്നത്.

കൂടാതെ, 2016 മേയ് 22,23ന് മോഡി ഇറാന്‍ സന്ദര്‍ശിച്ചപ്പോള്‍ 77,215 രൂപയും 2016 ജൂണ്‍ 4,5 തീയതികളില്‍ ഖത്തര്‍ സന്ദര്‍ശിച്ചതിന് 59,215 രൂപയും പാകിസ്താന്‍ ഇന്ത്യയില്‍നിന്ന് ഈടാക്കി. മോഡിയുടെ ഈ രണ്ടു യാത്രയും പാകിസ്താന്റെ വ്യോമമേഖലയ്ക്കു മുകളിലൂടെയായിരുന്നു.

2014 -2016 വരെയുള്ള കാലഘട്ടത്തില്‍ വ്യോമസേനയുടെ വിമാനത്തില്‍ പ്രധാനമന്ത്രി നടത്തിയ യാത്രയുടെ കണക്കുകള്‍ അന്വേഷിച്ചാണു ബത്ര വിവരാവകാശ നിയമപ്രകാരം അപേക്ഷിച്ചത്. 2016 ജൂണ്‍ വരെ വ്യോമസേനയുടെ വിമാനമാണു മോഡി വിവിധ രാജ്യങ്ങളിലെ സന്ദര്‍ശനത്തിനായി ഉപയോഗിച്ചതെന്ന് രേഖകള്‍ തെളിയിക്കുന്നു. ഇക്കാലയളവില്‍ നേപ്പാള്‍, ഭൂട്ടാന്‍, ബംഗ്ലാദേശ്, അഫ്ഗാനിസ്ഥാന്‍, ഖത്തര്‍, ഓസ്ട്രേലിയ, പാകിസ്താന്‍, റഷ്യ, ഇറാന്‍, ഫിജി, സിംഗപ്പൂര്‍ എന്നീ രാജ്യങ്ങളാണു മോഡി സന്ദര്‍ശിച്ചത്.

അതേസമയം, വ്യോമസേനയുടെ വിമാനം ഉപയോഗിച്ചുള്ള മോഡിയുടെ വിദേശ സന്ദര്‍ശനങ്ങളില്‍ ആകെ രണ്ടു കോടി രൂപയാണ് കേന്ദ്രം ചിലവിട്ടതെന്ന് കണക്കുകള്‍ പറയുന്നത്. സാധാരണയായി വിവിഐപികളുടെ വിദേശയാത്രകള്‍ക്ക് എയര്‍ ഇന്ത്യയുടെ വിമാനങ്ങളാണ് ഉപയോഗിക്കാറുള്ളത്. ഇതിന് എയര്‍ ഇന്ത്യക്ക് കേന്ദ്രം പണം നല്‍കാറുണ്ട്.

അപഹാസ്യരായി വിദ്യാര്‍ത്ഥികള്‍; പ്രധാനമന്ത്രിയുടെ ‘പരീക്ഷ പേ’ പ്രഭാഷണം കാണാന്‍ ദളിത് വിദ്യാര്‍ത്ഥികളെ ഇരുത്തിയത് കുതിരകളെ കെട്ടുന്ന സ്ഥലത്ത്
Posted by
19 February

അപഹാസ്യരായി വിദ്യാര്‍ത്ഥികള്‍; പ്രധാനമന്ത്രിയുടെ 'പരീക്ഷ പേ' പ്രഭാഷണം കാണാന്‍ ദളിത് വിദ്യാര്‍ത്ഥികളെ ഇരുത്തിയത് കുതിരകളെ കെട്ടുന്ന സ്ഥലത്ത്

ന്യൂഡല്‍ഹി: ദളിത് വിദ്യാര്‍ത്ഥികളോടുപോലും അവഗണന കാണിച്ച് പ്രധാനമന്ത്രി നരേന്ദ്ര മോഡി. വാര്‍ഷിക പരീക്ഷ അടുത്തു വരുന്ന സാഹചര്യത്തില്‍ മോഡി വിദ്യാര്‍ത്ഥികള്‍ക്കായുള്ള പരീക്ഷ പേ ചര്‍ച്ച പരിപാടിയിലാണ് മറ്റു കുട്ടികള്‍ക്കൊപ്പം ഇരുത്താതെ ദളിത് വിദ്യാര്‍ത്ഥികളെ മാത്രം മാറ്റിയിരുത്തിയത്. ഹിമാചല്‍പ്രദേശിലെ കുളു ജില്ലയിലെ ചേസ്ത എന്ന ഗ്രാമത്തിലാണ് സംഭവം.

കുതിരകളെ കെട്ടുന്നതിനായി നിര്‍മിച്ചിരുന്ന സ്ഥലത്തിരുന്നാണ് ദളിത് വിദ്യാര്‍ഥികള്‍ പ്രധാനമന്ത്രിയുടെ പ്രഭാഷണം കേള്‍പ്പിച്ചത്. സംഭവത്തെ തുടര്‍ന്ന് കുട്ടികളുടെ മാതാപിതാക്കള്‍ സ്‌കൂളിനും അധ്യാപികയായ മെഹര്‍ ചന്ദിനുമെതിരേ പോലീസ് മേധാവിക്ക് പരാതി നല്‍കി. നിങ്ങള്‍ക്ക് കാണാനായി പുറത്ത് ടിവി സ്ഥാപിച്ചിട്ടുണ്ടെന്നു പറഞ്ഞാണ് കുട്ടികളെ മറ്റ് കുട്ടികളില്‍ നിന്ന് മാറ്റിയത്. ഇത് കുതിരയെ കെട്ടുന്ന സ്ഥലമായിരുന്നുന്നവെന്നും കാണിച്ചാണ് പരാതി നല്‍കിയത്.

പരിപാടി മുഴുവന്‍ കഴിയാതെ പോകരുതെന്നും ടീച്ചര്‍ ആവശ്യപ്പെട്ടതായി കുട്ടികള്‍ അറിയിച്ചു. സംഭവത്തിന്റെ വീഡിയോ ദൃശ്യങ്ങളും മേഖലയില്‍ പ്രചരിക്കുന്നുണ്ട്. ഇതേ തുടര്‍ന്ന് സംഭവത്തില്‍ സ്‌കൂള്‍ അധികൃതര്‍ ഖേദം പ്രകടിപ്പിക്കുകയും കുട്ടികളോട് ക്ഷമാപണം നടത്തുകയും ചെയ്തു. ഈ കാര്യം ഇന്നാണ് തന്റെ ശ്രദ്ധയില്‍പെട്ടത്. തുടര്‍ന്ന് വിദ്യാഭ്യാസ സെക്രട്ടറിയോട് റിപ്പോര്‍ട്ട് ആവശ്യപ്പെട്ടതായും ശക്തമായി നടപടി സ്വീകരിക്കുമെന്ന് വിദ്യാഭ്യാസ മന്ത്രി സുരേഷ് ഭരത്വാജ് പറഞ്ഞു.

error: This Content is already Published.!!