കാസര്‍കോട് ദുരൂഹ സാഹചര്യത്തില്‍ മൂന്ന് അഫ്ഗാനികള്‍ പിടിയില്‍
Posted by
26 September

കാസര്‍കോട് ദുരൂഹ സാഹചര്യത്തില്‍ മൂന്ന് അഫ്ഗാനികള്‍ പിടിയില്‍

കാസര്‍കോട് : കാസര്‍കോട് ദുരൂഹ സാഹചര്യത്തില്‍ കണ്ടെത്തിയ മൂന്ന് അഫ്ഗാനിസ്ഥാന്‍ സ്വദേശികളെ പോലീസ് കസ്റ്റഡിയിലെടുത്തതായി വിവരം. രാവണേശ്വരം കുന്നുപാറയിലെ ഒരു വീട്ടിലെത്തിയപ്പോഴാണ് ഇവരെ കസ്റ്റഡിയിലെടുത്തത്. ഇപ്പോള്‍ ഹോസ്ദുര്‍ഗ് പോലീസ് കസ്റ്റഡിയിലുള്ള ഇവരെ ചോദ്യം ചെയ്തു വരികയാണ്. ഇവരുടെ വിസ അടക്കമുള്ള രേഖകള്‍ പരിശോധിച്ച ശേഷം മേല്‍ നടപടികള്‍ സ്വീകരിക്കുമെന്ന് പോലീസ് അറിയിച്ചു.

ഭാരതപ്പുഴയില്‍ കുളിക്കാനിറങ്ങിയ അഞ്ചു കുട്ടികളില്‍ രണ്ടു കുട്ടികളെ കാണാതായി: തിരച്ചില്‍ തുടരുന്നു
Posted by
25 September

ഭാരതപ്പുഴയില്‍ കുളിക്കാനിറങ്ങിയ അഞ്ചു കുട്ടികളില്‍ രണ്ടു കുട്ടികളെ കാണാതായി: തിരച്ചില്‍ തുടരുന്നു

പൊന്നാനി : ഭാരതപ്പുഴയില്‍ കുളിക്കാനിറങ്ങിയ അഞ്ചു കുട്ടികളില്‍ രണ്ടു പേര്‍ ഒഴുക്കില്‍പ്പെട്ടു കാണാതായി. തവനൂര്‍ വെള്ളാഞ്ചേരി സ്വദേശികളായ അശ്വിന്‍ (17), വിഷ്ണു (17) എന്നിവരെയാണ് കാണാതായത്. പോലീസും നാട്ടുകാരും ചേര്‍ന്ന് തിരച്ചില്‍ നടത്തുന്നു. ശക്തമായ ഒഴുക്കുള്ള പ്രദേശത്താണ് അപകടം.

എല്ലാ ജില്ലയിലും നഗരപാത നവീകരണ പദ്ധതിയുമായ് സര്‍ക്കാര്‍
Posted by
25 September

എല്ലാ ജില്ലയിലും നഗരപാത നവീകരണ പദ്ധതിയുമായ് സര്‍ക്കാര്‍

തിരുവനന്തപുരം: സംസ്ഥാനത്തെ മുഴുവന്‍ ജില്ല കേന്ദ്രങ്ങളിലും നഗരപാത നവീകരണ പദ്ധതി നടപ്പാക്കുന്നത് സര്‍ക്കാറിന്റെ പരിഗണനയില്‍. തിരുവനന്തപുരം, കോഴിക്കോട് നഗരപാത മാതൃകയില്‍ മറ്റ് 12 ജില്ലകളിലും വ്യാപിപ്പിക്കുകയാണ് ലക്ഷ്യം.

പൊതുസ്വകാര്യ പങ്കാളിത്ത (പിപിപി) രീതിയിലെ ആന്വിറ്റി സ്‌കീമില്‍ ഉള്‍പ്പെടുത്തിയാണ് നടപ്പാക്കുക. ആദ്യം നടപ്പാക്കിയ ഇടങ്ങളില്‍ ലഭിച്ച സ്വീകാര്യതയാണ് പദ്ധതി വ്യാപിപ്പിക്കാന്‍ കാരണം. പിപിപി രീതിയിലാണെങ്കിലും ചുങ്കം പിരിവില്ല. കണ്ണൂര്‍, ആലപ്പുഴ, കൊല്ലം ജില്ല കേന്ദ്രങ്ങളിലാണ് പദ്ധതി ഉടന്‍ തുടങ്ങുന്നത്. കണ്ണൂര്‍ നഗരപാത നവീകരണത്തിന് വിശദ പദ്ധതി റിപ്പോര്‍ട്ട് (ഡിപിആര്‍) സമര്‍പ്പിക്കുകയും ഭരണാനുമതി ലഭിക്കുകയും ചെയ്തു. നഗരസഭയിലെയും സമീപ പഞ്ചായത്തുകളിലെയും 40 കിലോമീറ്റര്‍ റോഡുകളാണ് പദ്ധതിയില്‍ ഉള്‍പ്പെടുത്തിയത്. ആലപ്പുഴ നഗരത്തിലെ റോഡ് നവീകരണത്തിന് ടെന്‍ഡര്‍ നടപടി തുടങ്ങി. കൊല്ലത്ത് വിശദപദ്ധതി റിപ്പോര്‍ട്ട് തയാറാക്കുന്നത് പുരോഗമിക്കുകയാണ്.

കൊച്ചിയില്‍ നേരത്തേ തുടങ്ങിവെച്ച പദ്ധതി പുനരാരംഭിക്കും. താമസിക്കാതെ മറ്റ് ജില്ലകളിലെയും പദ്ധതി റിപ്പോര്‍ട്ടുകള്‍ സര്‍ക്കാറിന് സമര്‍പ്പിക്കും. കേരള റോഡ് ഫണ്ട് ബോര്‍ഡിനാണ് നവീകരണച്ചുമതല. റോഡ് നിര്‍മാണത്തിനുള്ള ഫണ്ട് സര്‍ക്കാര്‍ ആദ്യം മുടക്കേണ്ട എന്നതാണ് ആന്വിറ്റി സ്‌കീം കൊണ്ടുള്ള പ്രയോജനം. നിര്‍മാണം പൂര്‍ത്തിയാക്കി ആറുമാസം മുതല്‍ 15വര്‍ഷം വരെയുള്ള കാലയളവില്‍ തവണകളായാണ് കരാറുകാര്‍ക്ക് സര്‍ക്കാര്‍ ഫണ്ട് അനുവദിക്കുക. ഇത്രയും കാലത്തെ റോഡ് പരിപാലന ചുമതലയും ഇവര്‍ക്കാണ്.

റോഡിനു ഇരുവശവും അഴുക്കുചാലുകള്‍, നടപ്പാതകള്‍, വിളക്കുകള്‍, മാലിന്യത്തൊട്ടികള്‍, സൗന്ദര്യവത്കരണം തുടങ്ങിയ കാര്യങ്ങളാണ് പദ്ധതിയിലുള്ളത്. തിരുവനന്തപുരം നഗരത്തില്‍ 42 കിലോമീറ്റര്‍ ദൈര്‍ഘ്യത്തിലാണ് നഗരപാത വികസനം. 15 വര്‍ഷത്തേക്കാണ് പരിപാലന ചുമതല. കോഴിക്കോട് ഏഴ് റോഡുകളിലായി 30.55 കിലോമീറ്ററാണ് നഗരപാത വികസനത്തിന്റെ ആദ്യഘട്ടം. വെള്ളിമാടുകുന്ന്-മാനാഞ്ചിറ റോഡ് ഒഴികെയുള്ള ആറു റോഡുകളുടെ നവീകരണം ഏറക്കുറെ പൂര്‍ത്തിയായി. ആദ്യഘട്ടത്തിന് 275കോടിയാണ് അനുവദിച്ചത്. രണ്ടാം ഘട്ട പദ്ധതിക്കായി നൂറുകോടി ബജറ്റില്‍ വകയിരുത്തിയിട്ടുണ്ട്.

രണ്ടു ക്രിമിനലുകള്‍ ചേര്‍ന്ന് നടുറോഡിലിട്ട് ഒരു യുവാവിനെ തല്ലിച്ചതക്കുന്നതിന്റെ ഞെട്ടിക്കുന്ന വീഡിയോ പുറത്ത്:  സംഭവം ചിറയിന്‍കീഴില്‍
Posted by
24 September

രണ്ടു ക്രിമിനലുകള്‍ ചേര്‍ന്ന് നടുറോഡിലിട്ട് ഒരു യുവാവിനെ തല്ലിച്ചതക്കുന്നതിന്റെ ഞെട്ടിക്കുന്ന വീഡിയോ പുറത്ത്: സംഭവം ചിറയിന്‍കീഴില്‍

തിരുവനന്തപുരം: തിരുവനന്തപുരത്ത് നടുറോഡില്‍ ഗൂണ്ടാ വിളയാട്ടം. ചിറയിന്‍കീഴിലാണ് യുവാവിനെ പട്ടാപ്പകല്‍ ബൈക്ക് തടഞ്ഞ് നിര്‍ത്തി രണ്ടുപേര്‍ അതി ക്രൂരമായി മര്‍ദ്ദിച്ചത്. യുവാവിനെ മര്‍ദ്ദിക്കുന്നതിന്റെ ദൃശ്യങ്ങള്‍ പുറത്ത് വന്നിട്ടും പൊലീസ് ഈ വിഷയത്തില്‍ ഇതുവരെയും നടപടിയെടുത്തിട്ടില്ല.ഈ മാസം പതിമൂന്നിനായിരുന്നു സംഭവം.

ബൈക്കില്‍ അഭ്യാസപ്രകടനം നടത്തിയ രണ്ട് യുവാക്കളെ ചോദ്യം ചെയ്ത ഒരു യുവാവിനെ നടുറോഡില്‍ വെച്ച് രണ്ടംഗ സംഘം അതിക്രൂരമായി മര്‍ദ്ദിക്കുന്നതിന്റെ ദൃശ്യങ്ങളാണ് പുറത്തുവന്നത്. യുവാവിന് തലയ്ക്കും, ശരീരത്തിനും അതിക്രൂരമായി മര്‍ദ്ദനമേല്‍ക്കുന്നുണ്ട്. യുവാവിനെ മര്‍ദ്ദിക്കുന്നത് നിരവധി പേര്‍ കാണുന്നുണ്ടെങ്കിലും ആരും വിഷയത്തില്‍ ഇടപെടുന്നില്ല എന്നതും ദൃശ്യങ്ങളില്‍ നിന്ന് വ്യക്തമാണ്. ഗുരുതരമായി പരുക്കേറ്റ് യുവാവ് ബോധരഹിതനായിട്ടും മര്‍ദ്ദനം തുടര്‍ന്നു. ഒടുവില്‍ കണ്ടു നിന്നവര്‍ എത്തിയാണ് ഗൂണ്ടകളെ പിടിച്ചു മാറ്റിയത്.സംഭവം നടന്ന് ഒരാഴ്ച പിന്നിട്ടിട്ടും അക്രമികള്‍ക്കെതിരെ നടപടിയെടുക്കാന്‍ പൊലീസ് തയ്യാറായിട്ടില്ല.

കൊല്ലം കൊച്ചാലും മൂട് സ്വദേശി എ സുധീറിന് മര്‍ദ്ദനമേറ്റത്. രണ്ടു പേര്‍ ചേര്‍ന്ന് മര്‍ദ്ദിക്കുന്ന ദൃശ്യങ്ങല്‍ സോഷ്യല്‍ മീഡിയാകളിലൂടെയാണ് പ്രചരിച്ചത്. ചിറയിന്‍കീഴ് മുടപുരം എസ്എം ജംഗ്ഷനിലാണ് സംഭവുമുണ്ടായത്. സംഭവത്തിന്റെ സിസിടിവി ദൃശ്യങ്ങള്‍ പൊലീസും ശേഖരിച്ചു. അനന്തു, ശ്രീക്കുട്ടന്‍ എന്നീ രണ്ടു പേര്‍ ചേര്‍ന്നാണ് ബൈക്ക് യാത്രികനെ തടഞ്ഞു നിര്‍ത്തി ചവിട്ടുകയും മര്‍ദ്ദിക്കുകയും ചെയ്തതെന്ന് പൊലീസ് അറിയിച്ചു. ഇതില്‍ അനന്തു പല ക്രിമിനല്‍ കേസുകളില്‍ പ്രതിയാണ്.

സംഭവവുമായി ബന്ധപ്പെട്ട് യാതൊരു പരാതിയും ലഭിച്ചില്ലെന്നാണ് പൊലീസ് വൃത്തങ്ങള്‍ അറിയിച്ചിരുന്നത്. പരാതി ലഭിക്കാത്ത സാഹചര്യത്തില്‍ നടപടിയുമായി മുന്നോട്ട് പോകാനാകില്ലെന്നായിരുന്നു പൊലീസിന്റെ നിലപാട്. എന്നാല്‍ ഇത് സംബന്ധിച്ച് മാധ്യമങ്ങളിലടക്കം വാര്‍ത്തയായതോടെ, സംഭവത്തെ പറ്റി അന്വേഷിച്ച് റിപ്പോര്‍ട്ട് നല്‍കാന്‍ ആറ്റിങ്ങള്‍ ഡിവൈഎസ്പി നിര്‍ദേശിച്ചതായാണ് വിവരം.

അതേ സമയം മനപ്പൂര്‍വ്വം ബൈക്കില്‍ എത്തി ഗതാഗത തടസ്സമുണ്ടാക്കി ഗുണ്ടായിസം കാണിച്ചവരുടെ പേരില്‍ കേസ് എടുക്കാന്‍ പോലും പൊലീസിനു മടിയാണെന്ന് ആക്ഷേപം ഉയരുന്നുണ്ട്.

പിതാവിന് ലക്ഷങ്ങളും ഓട്ടോറിക്ഷയും വീടും നല്‍കി കല്ല്യാണം: പെണ്‍കുട്ടി വഴങ്ങാത്തതിനെ തുടര്‍ന്നു ബലമായി പീഡിപ്പിച്ചു, വിവരം പുറത്തായപ്പോള്‍ മുങ്ങി; കണ്ണൂരില്‍ നാലാം ഭാര്യയെ മൊഴി ചൊല്ലി 16 കാരിയെ വിവാഹം ചെയ്ത 48 കാരനായ കല്യാണ വീരന്‍ ഉമ്മര്‍ ചെയ്ത് കൂട്ടിയത് ഇങ്ങനെ
Posted by
23 September

പിതാവിന് ലക്ഷങ്ങളും ഓട്ടോറിക്ഷയും വീടും നല്‍കി കല്ല്യാണം: പെണ്‍കുട്ടി വഴങ്ങാത്തതിനെ തുടര്‍ന്നു ബലമായി പീഡിപ്പിച്ചു, വിവരം പുറത്തായപ്പോള്‍ മുങ്ങി; കണ്ണൂരില്‍ നാലാം ഭാര്യയെ മൊഴി ചൊല്ലി 16 കാരിയെ വിവാഹം ചെയ്ത 48 കാരനായ കല്യാണ വീരന്‍ ഉമ്മര്‍ ചെയ്ത് കൂട്ടിയത് ഇങ്ങനെ

കണ്ണൂര്‍ : നാലാം ഭാര്യയെ മൊഴി ചൊല്ലി 16 കാരിയെ വിവാഹം ചെയ്ത കല്യാണ വീരന്‍ ഏഴാം മൈലിലെ ഉമ്മര്‍ പെണ്‍കുട്ടിയുടെ പിതാവിന് ലക്ഷങ്ങള്‍ നല്‍കിയെന്ന് റിപ്പോര്‍ട്ട്. നിയമപ്രകാരം വിവാഹം ചെയ്ത നാലാം ഭാര്യയെ മൊഴി ചൊല്ലിയ ശേഷമാണ് മൈസൂര്‍ ശൈലിയില്‍ കല്യാണം നടത്തിയത്. നിര്‍ദ്ധന കുടുംബത്തിലെ സുന്ദരിയും 20 വയസ്സിന് താഴെയുള്ളവരുമായ പെണ്‍കുട്ടികളാണ് ഉമ്മറിന് പ്രിയം.

അല്പകാലത്തിനു ശേഷം ഇവരെ പണം കൊടുത്ത് പറഞ്ഞ് വിടുകയും ചെയ്യും. നേരത്തേയും മൈസൂര്‍ ശൈലിയിലുള്ള വിവാഹം ഇയാള്‍ കഴിച്ചിട്ടുണ്ടെന്ന് പൊലീസിന് വിവരം ലഭിച്ചിട്ടുണ്ട്. വന്‍ തുകയും വീടും മറ്റും നല്‍കുന്നതിനാല്‍ പെണ്‍കുട്ടികളുടെ രക്ഷിതാക്കള്‍ പരാതി പെടാറുമില്ല.

കഴിഞ്ഞ ഫെബ്രുവരിയിലാണ് 16 കാരിയെ വിവാഹം ചെയ്ത് ഉമ്മര്‍ ഏഴാം മൈലില്‍ കൊണ്ടു വന്നത്. ശാരീരിക ബന്ധത്തിലേര്‍പ്പെടാന്‍ പെണ്‍കുട്ടി വിസമ്മതിച്ചതിനാല്‍ വീട്ടിലിട്ട് പീഡിപ്പിക്കുകയായിരുന്നു. ബംഗളൂരുവില്‍ പെണ്‍കുട്ടിയുടെ കുടുംബത്തിന് വീടും അച്ഛന് ഓട്ടോറിക്ഷയും നല്‍കി പ്രലോഭിപ്പിച്ചാണ് പ്രവാസി ധനാഢ്യനായ ഉമ്മര്‍ സുന്ദരിയായ പെണ്‍കുട്ടിയെ നാട്ടിലേക്ക് കൊണ്ടു വന്നത്. മാതാപിതാക്കള്‍ക്ക് പണവും മറ്റ് സൗകര്യവും നല്‍കിയാണ് തന്നെ വിലക്കു വാങ്ങിയതെന്ന് പെണ്‍കുട്ടി പൊലീസിനോട് പറഞ്ഞു.

പെണ്‍കുട്ടിയെ ഇപ്പോള്‍ മഹിളാ മന്ദിരത്തില്‍ പാര്‍പ്പിച്ചിരിക്കയാണ്. കൊട്ടാര സമാനമായ വീട്ടില്‍ നിന്നും ഏറെ സമയത്തെ തിരച്ചിലിന് ശേഷമാണ് പെണ്‍കുട്ടിയെ കണ്ടെത്താനായത്. വിവരമറിഞ്ഞെത്തിയ തളിപ്പറമ്പ് പൊലീസിന് ആദ്യമൊന്നും ചെയ്യാനായില്ല. ഒടുവില്‍ വനിതാ പൊലീസിന്റെ അനുനയത്തില്‍ പെണ്‍കുട്ടിയെ മോചിപ്പിക്കുകയായിരുന്നു.

പത്തു വയസുള്ള മകളെയും മൂന്നര വയസുള്ള മകനെയും പെരുവഴിയില്‍ ഉപേക്ഷിച്ച് കാമുകനൊപ്പം പോയ വീട്ടമ്മയായ യുവതിക്ക് എതിരേ പോലീസ് കേസെടുത്തു; സംഭവം കാസര്‍കോട് നെല്ലിക്കുന്നില്‍
Posted by
23 September

പത്തു വയസുള്ള മകളെയും മൂന്നര വയസുള്ള മകനെയും പെരുവഴിയില്‍ ഉപേക്ഷിച്ച് കാമുകനൊപ്പം പോയ വീട്ടമ്മയായ യുവതിക്ക് എതിരേ പോലീസ് കേസെടുത്തു; സംഭവം കാസര്‍കോട് നെല്ലിക്കുന്നില്‍

കാസര്‍കോട്: മക്കളെ ഉപേക്ഷിച്ച് കാമുകനോടൊപ്പം നാടുവിടുകയും പിന്നീട് മതപഠനകേന്ദ്രത്തില്‍ നിന്നു പോലീസ് കണ്ടെത്തി കോടതി നിര്‍ദേശപ്രകാരം മഹിളാമന്ദിരത്തിലാക്കുകയും ചെയ്ത അധ്യാപികയ്‌ക്കെതിരേ കുട്ടികളെ റോഡില്‍ ഉപേക്ഷിച്ചതിനു കേസെടുത്തു. കാസര്‍കോട് നെല്ലിക്കുന്ന് സ്വദേശിനിയും മേല്‍പ്പറമ്പ് ഇംഗ്ലീഷ് മീഡിയം സ്‌കൂളില്‍ അധ്യാപികയുമായ ജയശ്രീ(32)ക്കെതിരേയാണ് ഭര്‍ത്താവ് മേല്‍പ്പറമ്പ് മറവയല്‍ സ്വാതിനിവാസിലെ മധുസൂദനന്റെ പരാതിയില്‍ കാസര്‍ഗോഡ് ടൗണ്‍ പോലീസ് കേസെടുത്തത്.

മൂന്നര വയസുള്ള മകനെയും പത്തു വയസുള്ള മകളെയുമാണ് ജയശ്രീ ഓട്ടോയില്‍ കൊണ്ടുവന്ന് പെരുവഴിയില്‍ ഇറക്കിവിട്ടത്. പൊതുവഴിയില്‍ കുട്ടികളെ ഉപേക്ഷിച്ചുപോയതിന് ഇന്ത്യന്‍ ശിക്ഷാനിയമത്തിലെ 317ാം വകുപ്പ് പ്രകാരമാണു കേസ്. ബാലനീതി നിയമപ്രകാരവും കേസെടുക്കുമെന്ന് പോലീസ് പറഞ്ഞു. കഴിഞ്ഞ 11നു രാവിലെയാണ് ജയശ്രീ മക്കളെയും കൊണ്ട് മരവയലിലെ വീട്ടില്‍നിന്ന് ഇറങ്ങിയത്.

ഒരു മണിക്കൂറിനു ശേഷം കുട്ടികളെ ഓട്ടോയില്‍ നിന്ന് ഇറക്കി നിര്‍ത്തിയശേഷം ഇപ്പോള്‍ വരാമെന്നു പറഞ്ഞ് പോകുകയായിരുന്നു. അമ്മയെ കാണാതെ കരഞ്ഞ കുട്ടികളെ ആരൊക്കെയോ ചേര്‍ന്ന് ആശ്വസിപ്പിക്കുകയും വിവരങ്ങള്‍ ചോദിച്ചറിഞ്ഞ ശേഷം താമസസ്ഥലത്ത് എത്തിക്കുകയുമായിരുന്നു. ഭാര്യയെ കാണാനില്ലെന്ന മധുസൂദനന്റെ പരാതിയില്‍ കേസെടുത്ത പോലീസ് നടത്തിയ അന്വേഷണത്തില്‍ ഇവര്‍ കാമുകനൊപ്പം പോയതാണെന്നു വ്യക്തമായി.

കഴിഞ്ഞ ചൊവ്വാഴ്ച ജയശ്രീയെ മലപ്പുറത്തെ മതപഠനകേന്ദ്രത്തില്‍ കണ്ടെത്തി. മൊഴി രേഖപ്പെടുത്തിയശേഷം കാസര്‍ഗോഡ് ചീഫ് ജുഡീഷ്യല്‍ മജിസ്‌ട്രേട്ട് കോടതിയില്‍ ഹാജരാക്കുകയും ചെയ്തു. ഭര്‍ത്താവിനും മക്കള്‍ക്കുമൊപ്പം പോകാന്‍ താല്‍പ്പര്യമില്ലെന്നും മതപഠനം തുടരാനും കാമുകനൊപ്പം ജീവിക്കാനുമാണ് ആഗ്രഹിക്കുന്നതെന്നും ജയശ്രീ കോടതിയില്‍ പറഞ്ഞു. രണ്ടു ചെറിയ കുട്ടികളുള്ളതിനാലും വിവാഹമോചനം നടത്തിയിട്ടില്ലാത്തതിനാലും ജയശ്രീയെ കോടതി നിര്‍ദേശപ്രകാരം മഹിളാമന്ദിരത്തിലാക്കി. അറസ്റ്റ് രേഖപ്പെടുത്തി കോടതിയില്‍ ഹാജരാക്കുമെന്നു പോലീസ് പറഞ്ഞു.

കുറ്റിപ്പുറത്ത് യുവാവിന്റെ ജനനേന്ദ്രിയം മുറിച്ച യുവതി 2 കുട്ടികളുടെ അമ്മ, മുറിച്ചത് രഹസ്യ വിവാഹത്തിലൂടെ തന്റെ രണ്ടാം ഭര്‍ത്താവായ ഇര്‍ഷാദ് തന്നെ വിട്ടുപോകാതിരിക്കാന്‍ എന്നും ഹൈറുന്നിസ, സ്ഥിരം തന്നെ പല ലോഡ്ജുകളിലും കൊണ്ടു പോകാറുള്ള ഇര്‍ഷാദിനോട് കുറ്റിപ്പുറത്ത് വെച്ച് യുവതി ചെയ്തത് ഇങ്ങനെ
Posted by
23 September

കുറ്റിപ്പുറത്ത് യുവാവിന്റെ ജനനേന്ദ്രിയം മുറിച്ച യുവതി 2 കുട്ടികളുടെ അമ്മ, മുറിച്ചത് രഹസ്യ വിവാഹത്തിലൂടെ തന്റെ രണ്ടാം ഭര്‍ത്താവായ ഇര്‍ഷാദ് തന്നെ വിട്ടുപോകാതിരിക്കാന്‍ എന്നും ഹൈറുന്നിസ, സ്ഥിരം തന്നെ പല ലോഡ്ജുകളിലും കൊണ്ടു പോകാറുള്ള ഇര്‍ഷാദിനോട് കുറ്റിപ്പുറത്ത് വെച്ച് യുവതി ചെയ്തത് ഇങ്ങനെ

കുറ്റിപ്പുറം: യുവാവിന്റെ ജനനേന്ദ്രിയം മുറിച്ചത് ഭര്‍ത്താവിനെ കൈവിട്ടു പോകാതിരിക്കാനെന്ന് കുറ്റിപ്പുറം ജനനേന്ദ്രിയം മുറിക്കല്‍ കേസിലെ പ്രതി ഹൈറുന്നീസ. ഭര്‍ത്താവ് മറ്റൊരു വിവാഹത്തിന് തയ്യാറെടുത്തതാണ് ഹയറുന്നീസയെ ഇതിനു പ്രേരിപ്പിച്ചത്. പെരുമ്പാവൂരില്‍നിന്ന് തിരൂരിലെത്തിയ ഹൈറുന്നിസ പേനാകത്തി വാങ്ങിയാണ് കുറ്റിപ്പുറത്തെത്തിയത്. ഇര്‍ഷാദിനൊപ്പം ലോഡ്ജ് മുറിയിലെത്തി വിവാഹത്തില്‍നിന്ന് പിന്മാറാന്‍ ആവശ്യപ്പെട്ടു. വഴങ്ങാതായപ്പോള്‍ ഇര്‍ഷാദിനെ ആക്രമിച്ചു. മറ്റൊരു സ്ത്രീയെ വിവാഹംകഴിച്ച് തന്നെ ഉപേക്ഷിച്ച് പോകാതിരിക്കാനാണ് കൃത്യം നടത്തിയതെന്നാണ് ഹൈറുന്നീസ പൊലീസിന് മൊഴിനല്‍കിയത്. പരിക്ക് ഗുരുതരമായതിനാല്‍ ഇര്‍ഷാദിനെ വളാഞ്ചേരിയില്‍നിന്ന് കോഴിക്കോട്ടെ സ്വകാര്യ ആശുപത്രിലേക്കു മാറ്റി അടിയന്തരശസ്ത്രക്രിയയ്ക്ക് വിധേയനാക്കി.

മലപ്പുറം തിരൂരിനടുത്ത പുറത്തൂര്‍ കാവിലക്കാട് സ്വദേശിയാണ് ഇര്‍ഷാദ്(27) സംഭവത്തില്‍ ഇര്‍ഷാദിന്റെ ഭാര്യ പെരുമ്പാവൂര്‍ പൊതിയില്‍ ഹൈറുന്നീസ(30)യെ പൊലീസ് കസ്റ്റഡിയിലെടുക്കുകയും ചെയ്തു. ജനനേന്ദ്രിയം മുക്കാല്‍ഭാഗത്തോളം മുറിഞ്ഞു. ജനനേന്ദ്രിയം സ്വയം മുറിച്ചതാണെന്നും പരാതിയില്ലെന്നുമാണ് ഇര്‍ഷാദ് പൊലീസിനോട് പറഞ്ഞത്. എന്നാല്‍ പൊലീസ് ഇത് വിശ്വസിച്ചില്ല. ഒപ്പമുണ്ടായിരുന്ന ഹൈറുന്നീസയെ ചോദ്യം ചെയ്തപ്പോഴാണ് സത്യം പുറത്തായത്. ഭര്‍ത്താവ് കൈവിട്ടു പോകാതിരിക്കാനാണ് താനിത് ചെയ്‌തെന്നും ഹൈറുന്നീസ പോലീസിനോടു പറഞ്ഞു.

കൃത്യം നിര്‍വഹിച്ചെങ്കിലും മുറിക്കുള്ളില്‍ ഒഴുകിയ രക്തം മനസ്സിനെ പിടിച്ചുകുലുക്കി. പരിക്കേറ്റ ഭര്‍ത്താവിനെ ആശുപത്രിയിലാക്കിയതും പൊലീസിനോട് എല്ലാം ഏറ്റുപറഞ്ഞതും അതു കൊണ്ടുമാത്രമാണെന്നും ഹൈറുന്നീസ പറയുന്നു. ആദ്യ ഭര്‍ത്താവിന്റെ ദുര്‍നടപ്പ് സഹിക്കാതെയാണ് ഹൈറുന്നീസ വിവാഹ മോചനം തേടിയത്. ആക്രമണത്തിനിരയായ ഇര്‍ഷാദിന്റെ നാട്ടിലേക്കായിരുന്നു പെരുമ്പാവൂരില്‍ നിന്ന് ഹൈറുന്നീസയെ ആദ്യം വിവാഹം ചെയ്തുകൊണ്ടുവന്നത്. വിവാഹമോചനം നേടിയ യുവതിയുടെ മൊബൈല്‍ നമ്പറിലേക്ക് അവിചാരിതമായി ഇര്‍ഷാദിന്റെ വിളിയെത്തിയതോടെയാണ് ഇരുവരും തമ്മില്‍ പ്രണയത്തിലാവുന്നത്. തന്നേക്കാള്‍ പ്രായം കുറഞ്ഞ ഇര്‍ഷാദുമായി അകലാന്‍ കഴിയെന്നു മനസിലാക്കിയതോടെ രഹസ്യമായി വിവാഹം രജിസ്റ്റര്‍ ചെയ്യുകയായിരുന്നു.

എന്നാല്‍ ഇര്‍ഷാദ് മറ്റൊരു സ്ത്രീയെ വിവാഹം കഴിക്കാനൊരുങ്ങിയതോടെയാണ് ഹയറുന്നീസ ഈ കൃത്യം പ്ലാന്‍ ചെയ്യുന്നത്. വിദേശത്തു നിന്നും ഇര്‍ഷാദ് നാട്ടിലെത്തിയപ്പോള്‍ വീട്ടുകാര്‍ ഉറപ്പിച്ച വിവാഹത്തില്‍ നിന്നു പിന്മാറണമെന്ന് ഹയറുന്നീസ ആവശ്യപ്പെട്ടു. ഒരാഴ്ചമുമ്പ് കുറ്റിപ്പുറത്തെ ഇതേ ലോഡ്ജില്‍ ഇരുവരും മുറിയെടുത്തിരുന്നു. വീട്ടുകാര്‍ കണ്ടെത്തിയ പെണ്‍കുട്ടിയെ വിവാഹം കഴിക്കാനുള്ള നീക്കത്തില്‍ ഇര്‍ഷാദ് ഉറച്ചു നിന്നതോടെ ഹയറുന്നീസ എല്ലാം തീരുമാനിച്ചുറപ്പിക്കുകയായിരുന്നു. അതേത്തുടര്‍ന്ന് വീണ്ടും ഇതേ ലോഡ്ജില്‍ സംഗമിക്കണമെന്ന് ഇര്‍ഷാദിനോട് ആവശ്യപ്പെടുകയായിരുന്നു.പെരുമ്പാവൂരില്‍നിന്ന് തിരൂരിലെത്തിയ ഹൈറുന്നിസ പേനാകത്തി വാങ്ങിയാണ് കുറ്റിപ്പുറത്തെത്തിയത്.

പത്തരയോടെയാണ് ദമ്പതിമാര്‍ ലോഡ്ജില്‍ മുറിയെടുത്തത്. അരമണിക്കൂറിനുശേഷം ഹൈറുന്നീസ ലോഡ്ജ് കെട്ടിടത്തില്‍ പ്രവര്‍ത്തിക്കുന്ന ട്രാവല്‍സ് ഓഫീസിലെത്തി ഭര്‍ത്താവിന് പരിക്കേറ്റെന്നും ഉടന്‍ ആശുപത്രിയിലെത്തിക്കണമെന്നും ആവശ്യപ്പെട്ടു. ട്രാവല്‍സിലെ ജീവനക്കാര്‍ വിളിച്ചുവരുത്തിയ ആംബുലന്‍സില്‍ ഹൈറുന്നിസ ഇര്‍ഷാദിനെ വളാഞ്ചേരിയിലെ ആശുപത്രിയിലെത്തിച്ചു. ആശുപത്രി അധികൃതര്‍ വിവരം അറിയിച്ചതിനെത്തുടര്‍ന്ന് സ്ഥലത്തെത്തിയ പൊലീസ് ഹൈറുന്നിസയെ കസ്റ്റഡിയിലെടുക്കുകയായിരുന്നു. ആദ്യ വിവാഹത്തില്‍ ഇവര്‍ക്ക് രണ്ടു കുട്ടികളുമുണ്ട്.

ഖബറടക്കുന്നതിനിടെ നവജാതശിശുവിന് ജീവന്റെ ലക്ഷണം: പ്രാര്‍ത്ഥന വിഫലമാക്കി കുഞ്ഞ് മടങ്ങി
Posted by
22 September

ഖബറടക്കുന്നതിനിടെ നവജാതശിശുവിന് ജീവന്റെ ലക്ഷണം: പ്രാര്‍ത്ഥന വിഫലമാക്കി കുഞ്ഞ് മടങ്ങി

കോഴിക്കോട്: ഖബറടക്കാന്‍ കൊണ്ടുവന്ന നവജാത ശിശുവില്‍ വീണ്ടും ജീവന്റെ ലക്ഷണമെന്ന സംശയത്തെ തുടര്‍ന്ന് ആശുപത്രിയിലെത്തിച്ച കുഞ്ഞ് മരിച്ചു. കോഴിക്കോട് സ്വകാര്യ ആശുപത്രിയില്‍ നിന്ന് മരിച്ചെന്ന് ഡോക്ടര്‍മാര്‍ സാക്ഷ്യപ്പെടുത്തിയ 22 ആഴ്ച പ്രായമുള്ള, മാസം തികയാതെ പ്രസവിച്ച ആണ്‍കുട്ടിയെയാണ് ഖബറടക്കാന്‍ നേരം ജീവനുണ്ടെന്ന സംശയത്തില്‍ തിരിച്ച് കൊണ്ടുപോയത്.

കണ്ണംപറമ്പ് ശ്മശാനപ്പള്ളിക്കു സമീപത്തുള്ള മുറിയില്‍ കുളിപ്പിക്കാന്‍ കിടത്തിയ കുട്ടിയുടെ തലയില്‍ തൊട്ടപ്പോള്‍ ശരീരമാകെ അനങ്ങിയതായി ബന്ധുക്കള്‍ പറയുന്നു. കുളിപ്പിക്കാന്‍ കൊണ്ടുപോകുമ്പോള്‍ത്തന്നെ ബന്ധു സംശയം പ്രകടിപ്പിച്ചിരുന്നു. തുടര്‍ന്ന് ഐസിയുവില്‍ പ്രവേശിപ്പിച്ച കുട്ടി അന്തിമമായി മരിച്ചതായി ബുധനാഴ്ച രാവിലെയോടെ സ്ഥിരീകരിക്കുകയായിരുന്നു.

ശിശുമരണം: സര്‍ക്കാര്‍വാദം പൊളിയുന്നു, അട്ടപ്പാടിയില്‍ ഈ വര്‍ഷം മരിച്ചത് പതിമൂന്നു കുഞ്ഞുങ്ങള്‍
Posted by
22 September

ശിശുമരണം: സര്‍ക്കാര്‍വാദം പൊളിയുന്നു, അട്ടപ്പാടിയില്‍ ഈ വര്‍ഷം മരിച്ചത് പതിമൂന്നു കുഞ്ഞുങ്ങള്‍

അഗളി: അട്ടപ്പാടിയിലെ ആദിവാസിവിഭാഗങ്ങള്‍ക്കിടയിലെ ശിശുമരണം കുറഞ്ഞെന്ന സര്‍ക്കാര്‍വാദം പൊളിയുന്നു. ആരോഗ്യവകുപ്പിന്റെ കണക്കുകള്‍ പ്രകാരം ഈ വര്‍ഷം ഇതുവരെ 13 നവജാത ശിശുക്കള്‍ മരിച്ചു. കഴിഞ്ഞവര്‍ഷം എട്ട് ശിശുമരണമാണ് റിപ്പോര്‍ട്ട് ചെയ്തത്. 2015-നുശേഷം ഏറ്റവുമധികം ശിശുമരണം റിപ്പോര്‍ട്ട് ചെയ്തത് ഈ വര്‍ഷമാണ്.

ജനനവൈകല്യം കാരണമാണ് മേഖലയിലെ കൂടുതല്‍ ശിശുമരണങ്ങളും. ഈ വര്‍ഷം റിപ്പോര്‍ട്ട് ചെയ്ത മരണങ്ങളില്‍ ആറെണ്ണവും ഇങ്ങനെയാണ്. ഹൃദയവാല്‍വ്, അന്നനാളം, ശ്വാസകോശം തുടങ്ങിയവയ്ക്കുണ്ടാകുന്ന തകരാര്‍, ഹൃദയാഘാതം എന്നിവകാരണമാണ് മരണമേറെയും.

ഗര്‍ഭസ്ഥശിശുമരണവും മേഖലയില്‍ കുറയ്ക്കാന്‍ സാധിച്ചിട്ടില്ല. കഴിഞ്ഞവര്‍ഷം എട്ടു ഗര്‍ഭസ്ഥശിശുമരണങ്ങള്‍ സംഭവിച്ചിടത്ത് ഈവര്‍ഷം ആറുമരണമുണ്ടായി. കഴിഞ്ഞവര്‍ഷം മേഖലയില്‍ മാതൃമരണങ്ങള്‍ റിപ്പോര്‍ട്ട് ചെയ്തിരുന്നില്ല. എന്നാല്‍ ഈ വര്‍ഷം ഒരു മാതൃമരണവുമുണ്ടായി.

ആദിവാസികള്‍ക്കിടയിലെ ആരോഗ്യ പ്രശ്‌നങ്ങളും പോഷകാഹാരക്കുറവുകളും പരിഹരിക്കാന്‍ ഒട്ടേറെ പദ്ധതികള്‍ സര്‍ക്കാര്‍ നടപ്പാക്കിയിട്ടും ശിശുമരണങ്ങള്‍ കുറയ്ക്കാന്‍ കഴിയുന്നില്ല. ജനന വൈകല്യങ്ങള്‍ മേഖലയിലെ കുട്ടികളില്‍ വ്യാപകമാകുന്നതിന്റെ കാരണത്തെപ്പറ്റി വ്യക്തമായ പഠനങ്ങള്‍ ഇനിയും നടത്തിയിട്ടില്ല. ഇതുസംബന്ധിച്ച് ഗൗരവമായ പഠനങ്ങള്‍ ആവശ്യമാണെന്ന് നോഡല്‍ മെഡിക്കല്‍ ഓഫീസര്‍ ഡോ ആര്‍ പ്രഭുദാസ് പറഞ്ഞു.

2014ല്‍ പതിനഞ്ച് ശിശുക്കളും 2015ല്‍ പതിനാലുമായിരുന്നു. അതേസമയം 2016ല്‍ എട്ട് ശിശുമരണങ്ങളാണ് റിപ്പോര്‍ട്ട് ചെയ്തിട്ടുള്ളത്. എന്നാല്‍ 2017 സെപ്റ്റംബര്‍ പരെയുള്ള കണക്കു പ്രകാരം മൊത്തം പതിമൂന്നു ശിശുമരണങ്ങളാണ് ഉണ്ടായത്.

പാര്‍ത്ഥസാരഥി ക്ഷേത്രം സര്‍ക്കാര്‍ ഏറ്റെടുക്കാന്‍ ശ്രമിക്കുന്നത് സ്വത്ത് കയ്യടക്കാന്‍ മാത്രം: കുമ്മനം
Posted by
21 September

പാര്‍ത്ഥസാരഥി ക്ഷേത്രം സര്‍ക്കാര്‍ ഏറ്റെടുക്കാന്‍ ശ്രമിക്കുന്നത് സ്വത്ത് കയ്യടക്കാന്‍ മാത്രം: കുമ്മനം

തിരുവനന്തപുരം: ഭക്തജനങ്ങളുടെയും വിശ്വാസികളുടേയും നിയന്ത്രണത്തില്‍ മികച്ച രീതിയില്‍ കാലങ്ങളായി പ്രവര്‍ത്തിക്കുന്ന ഗുരുവായൂര്‍ പാര്‍ത്ഥസാരഥി ക്ഷേത്രം സര്‍ക്കാര്‍ ഏറ്റെടുക്കാന്‍ ശ്രമിക്കുന്നത് അവിടുത്തെ സ്വത്ത് കയ്യടക്കാന്‍ മാത്രമാണെന്ന് ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍. ഹൈന്ദവ ആരാധാനാലയങ്ങള്‍ മാത്രം മുട്ടു ന്യായങ്ങള്‍ പറഞ്ഞ് ഏറ്റെടുക്കാന്‍ ശ്രമിക്കുന്നത് ഹിന്ദുക്കളോടുള്ള വെല്ലുവിളിയാണ്. ഇതില്‍ നിന്ന് സര്‍ക്കാര്‍ പിന്‍മാറിയില്ലെങ്കില്‍ രൂക്ഷമായ പ്രത്യാഘാതം നേരിടേണ്ടി വരുമെന്നും നൂറുകണക്കിന് പോലീസുകാരുമായി വന്ന് ആരാധനാലയം പിടിച്ചടക്കാന്‍ ശ്രമിക്കുന്ന കാഴ്ച കേരളത്തിന് അപരിചിതമാണെന്നും കുമ്മനം കൂട്ടിചേര്‍ത്തു.

ഭരണത്തില്‍ ക്രമക്കേട് ഉണ്ടെന്ന് ആരോപിച്ച് കയ്യേറാന്‍ ശ്രമിക്കുന്ന സര്‍ക്കാര്‍, ദേവസ്വം ബോര്‍ഡ് ഭരിക്കുന്ന ക്ഷേത്രങ്ങളിലെ അഴിമതിയും ധൂര്‍ത്തും ആദ്യം അവസാനിപ്പിക്കണം. സര്‍ക്കാരിന്റെ കയ്യിലുള്ള ക്ഷേത്രങ്ങള്‍ കെടുകാര്യസ്ഥതയും അവിശ്വാസികളുടെ ഇടപെടലും മൂലം ശിഥിലമാകുന്ന അവസ്ഥയിലാണ്. ആദ്യം ആ സ്ഥിതി മാറ്റാനാണ് സര്‍ക്കാര്‍ ശ്രമിക്കേണ്ടതെന്നും കുമ്മനം പറഞ്ഞു.

അധികാരത്തര്‍ക്കവും ഭരണപരമായ വീഴ്ചകളും സംസ്ഥാനത്തെ ഇതര മതസ്ഥരുടെ ആരാധനാലയങ്ങളിലും ഉണ്ടായിട്ടുണ്ട്. സഭാതര്‍ക്കം മൂലം വര്‍ഷങ്ങളായി പൂട്ടിക്കിടക്കുന്ന പള്ളികളും സംസ്ഥാനത്തുണ്ട്. അവിടങ്ങളിലൊന്നും പ്രശ്‌നപരിഹാരത്തിനായി ഏറ്റെടുക്കലിന് സര്‍ക്കാര്‍ മുതര്‍ന്നിട്ടില്ല. എന്നിരിക്കെ അമ്പലങ്ങളെ മാത്രം കൈപ്പിടിയിലാക്കാന്‍ ശ്രമിക്കുന്നത് ക്ഷേത്ര വിശ്വാസത്തിന്‍ മേലുള്ള കടന്നു കയറ്റമാണ്. ഭരണഘടനയുടെ ഇരുപത്തിയാറാം ആര്‍ട്ടിക്കിള്‍ അനുസരിച്ച് ഏത് മതസ്ഥര്‍ക്കും അവരവരുടെ ആരാധനാലയങ്ങള്‍ സംരക്ഷിക്കാനും ഭരണ നിര്‍വഹണം നടത്താനുമുള്ള സ്വാതന്ത്ര്യമുണ്ട്. ഈ സ്വാതന്ത്ര്യം ഹിന്ദുക്കള്‍ക്ക് മാത്രം നിഷേധിക്കുന്നത് ആശാസ്യമല്ല. തത്സ്ഥിതി തുടരാന്‍ ആവശ്യപ്പെട്ട് കോടതി വിധി നിലവിലുള്ളപ്പോള്‍ ക്ഷേത്രം കയ്യേറാന്‍ ശ്രമിക്കുന്നത് നിയമ വ്യവസ്ഥയെ അവഹേളിക്കലാണ്. മതേതര സര്‍ക്കാര്‍ എന്നവകാശപ്പെടുന്നവര്‍ ഒരു വിഭാഗത്തിനെ മാത്രം ദ്രോഹിക്കുന്ന നടപടികള്‍ ആവര്‍ത്തിക്കുന്നത് ബിജെപി കൈയും കെട്ടി നോക്കിയിരിക്കില്ലെന്നും അദ്ദേഹം മുന്നറിയിപ്പ് നല്‍കി.