winter season beauty
Posted by
04 December

തണുപ്പ് കാലത്ത് സൗന്ദര്യത്തില്‍ അല്‍പം ശ്രദ്ധിക്കാം

തണുപ്പ് കാലത്താണ് സൗന്ദര്യ സംരക്ഷണത്തിന് കൂടുതല്‍ പ്രാധാന്യം നല്‍കേണ്ടത്. ചുണ്ടുകള്‍ വിണ്ടു കീറുന്നതും ചര്‍മ്മം വരണ്ടു പോവുന്നതും തുടങ്ങി നിരവധി സൗന്ദര്യ പ്രശ്‌നങ്ങളാണ് തണുപ്പു കാലത്തെ കൂടുതല്‍ ഭീതിതമാക്കുന്നത്. എന്നാല്‍ തണുപ്പ് കാലത്തും സൗന്ദര്യം സംരക്ഷിക്കാം. അതും ഫലപ്രദായി തന്നെ. സാധാരണ ഏത് കാലാവസ്ഥയിലേയും പോലെ തന്നെ ചര്‍മ്മത്തെ സംരക്ഷിക്കാന്‍ ചില ഫലപ്രദമായ വഴികള്‍ നോക്കാം. സൗന്ദര്യസംരക്ഷണത്തില്‍ ഇനി മഞ്ഞുകാലം ഒരിക്കലും ഒരു വെല്ലുവിളിയാകില്ല. അതിനായി ചെയ്യേണ്ട കാര്യങ്ങള്‍ നോക്കാം.

ചുണ്ട് വിണ്ടു കീറുന്നതിന് പലരും ഉറങ്ങുന്നതിനു മുന്‍പ് വെണ്ണ, നെയ്യ് എന്നിവയൊക്കെ പുരട്ടി കിടക്കും. ഇതുകൂടാതെ വാസ്ലിന്‍ പുരട്ടുന്നതും ചുണ്ടിന്റെ വരള്‍ച്ച കുറയ്ക്കും.
ചുണ്ടിന്റെ സ്വാഭാവിക നിറം നിലനിര്‍ത്താനും ഇത്തരത്തില്‍ കഴിയും. ബീറ്റ്‌റൂട്ട് ജ്യൂസും പാലും പുരട്ടി കിടക്കുന്നത് ശീലമാക്കുക. ഇത് ചുണ്ടിന് നല്ല നിറം നല്‍കും.
കഴുത്തിലെ കറുപ്പ് നിറമാണ് മറ്റൊരു പ്രശ്‌നം. സണ്‍ സ്‌ക്രീന്‍ ലോഷന്‍ പുരട്ടുക പുറത്ത് പോകുമ്പോള്‍. കിടക്കുമ്പോള്‍ മോയ്‌സ്ചുറൈസര്‍ പുരട്ടാം.
ചെറുനാരങ്ങയും ഉപയോഗിക്കാവുന്നതാണ്. ഇതിന്റെ തൊലി കൊണ്ട് കഴുത്തില്‍ തടവുന്നത് കഴുത്തിലെ കറുപ്പ് നിറം ഇല്ലാതാക്കുന്നു.

yoga for for better health
Posted by
03 December

മാനസിക പിരിമുറുക്കങ്ങള്‍ക്ക് യോഗ പരിഹാരമാണോ?

യോഗം ആണ് യോഗ. ശാരീരികവും മാനസികവും ആത്മീയവും വൈകാരികവുമായ തലങ്ങളുടെ കൂടിച്ചേരല്‍. ഇതിലൂടെ ആര്‍ജിച്ചെടുക്കുന്ന പൂര്‍ണാരോഗ്യവും.വെറുതെ യോഗ ചെയ്തിട്ടു കാര്യമില്ല. ഓരോ യോഗാഭ്യാസം ചെയ്യുമ്പോഴും മനസ്സ് ശരീരത്തിലേക്ക് കേന്ദ്രീകരിക്കണം. ഫലം എന്താണെന്ന് വ്യക്തമായി മനസ്സിലാക്കിയിരിക്കണം. യോഗ ചെയ്യുന്നു എന്നതല്ല, എങ്ങനെ ചെയ്യുന്നു എന്നതാണ് പ്രധാനം.

പത്തു വയസ്സ് മുതല്‍ കുട്ടികളെ യോഗ അഭ്യസിപ്പിച്ചു തുടങ്ങാം. ഈ പ്രായത്തിനു മുമ്പ് ഒരിടത്ത് തന്നെ അടങ്ങിയിരുന്ന് യോഗ ചെയ്യാനുളള സന്നദ്ധത കുട്ടികള്‍ക്ക് ഉണ്ടാകില്ല. യോഗയോ ടുളള താത്പര്യമുണ്ടാക്കിയെടുത്ത് അത് ശീലിപ്പിക്കുകയാണെങ്കില്‍ ഈ പ്രായമെങ്കിലും ആകണം. ചെറിയ കളികളിലൂടെയും മറ്റും കുട്ടികള്‍ക്ക് യോഗയോടുളള താത്പര്യം വര്‍ധിപ്പിക്കാം.

ഹൈപ്പര്‍ ആക്ടീവ് കുട്ടികള്‍ക്ക് ശാന്തസ്വഭാവം വരുത്താന്‍ യോഗ ശീലിപ്പിക്കാം. ഉത്സാഹക്കുറവുളള കുട്ടിയെക്കൊണ്ട് എല്ലാ ദിവസവും പ്രാണായാമം ചെയ്യിച്ചാല്‍ ഉത്സാഹവും സന്തോഷവും കൂടും. പഠനത്തില്‍ ശ്രദ്ധ, കാര്യങ്ങള്‍ ഗ്രഹിക്കാനുളള കഴിവ്, ശാരീരിക ക്ഷമത എന്നിവ കൂടുന്നതിനു യോഗ സഹായിക്കും.

രാവിലെയോ വൈകിട്ടോ യോഗ ചെയ്യാം. പക്ഷേ, പുലര്‍ച്ചെ പ്രഭാതകൃത്യങ്ങള്‍ക്കു ശേഷം വെറും വയറ്റില്‍ യോഗ ചെയ്യുന്നതാണ് ഏറ്റവും ഉത്തമം. ആഹാരത്തിനു ശേഷം ഉടനേ യോഗ ചെയ്യരുത്. പ്രധാന ആഹാരത്തിനു ശേഷം മൂന്നര മണിക്കൂര്‍ കഴിഞ്ഞും ലഘു ഭക്ഷണത്തിനു ശേഷം ഒരു മണിക്കൂര്‍ കഴി!ഞ്ഞും യോഗ ചെയ്യാം.

ഇല്ല. ഓരോരുത്തരുടെയും ശരീരത്തിന്റെ വഴക്കവും ആരോഗ്യസ്ഥിതിയും അനുസരിച്ചേ യോഗമുറകള്‍ ചെയ്യാവൂ. തുടക്കക്കാര്‍ക്കും പ്രായമുളളവര്‍ക്കും അധികം പ്രയാസമില്ലാത്ത യോഗമുറകള്‍ ചെയ്യാം. യോഗാഭ്യാസം ആവര്‍ത്തിക്കുമ്പോള്‍ അതിന്റെ പടി കൂടി വിലയിരുത്തണം. അങ്ങനയേ കൃത്യമായ നില (പൊസിഷന്‍)കളിലേക്ക് എത്താന്‍ സാധിക്കൂ.

what do for learning disability special story
Posted by
29 November

പഠന വൈകല്യം പരിഹരിക്കാന്‍ എന്തുചെയ്യണം

-ഫഖ്‌റുദ്ധീന്‍ പന്താവൂര്‍

മിഥുന്‍ ക്ലാസിലെ ഏറ്റവും മിടുക്കനാണെന്നാണ് ടീച്ചര്‍ പറയുന്നത്. പഠിക്കുന്നത് ആറാം ക്ലാസില്‍. ക്ലാസ്സിലെ ഏത് ചോദ്യങ്ങള്‍ക്കും ആദ്യം ഉത്തരവുമായി ചാടി വീഴുന്നത് മിഥുന്‍ തന്നെ. പലപ്പോഴും ടീച്ചര്‍ക്ക് സഹികെടുന്നുമുണ്ട്. പക്ഷെ പ്രശനം അതല്ല. മിഥുന്‍ എഴുത്തില്‍ വളരെ പിന്നിലാണ്. ഒരു മൂന്നാം ക്ലാസുകാരന്റെ എഴുത്താണെന്നാണ് ടീച്ചര്‍ പറയുന്നത്. എഴുത്തെല്ലാം തെറ്റ്. ഉത്തരങ്ങള്‍ എല്ലാം അറിയുന്ന മിഥുന് അത് പേപ്പറില്‍ എഴുതിഫലിപ്പിക്കാനാകുന്നില്ല. ഇതില്‍പരം സങ്കടം ആ രക്ഷിതാക്കള്‍ക്ക് വേറെയുണ്ടോ.

മിഥുനെപ്പോലെ നിരവധി കുട്ടികള്‍ കാണാം. മറ്റു കുട്ടികളെ പോലെ ബുദ്ധിപരമായി ഉയര്‍ന്ന് നില്‍ക്കുന്നവരായിട്ടുകൂടി ചില വൈകല്യങ്ങള്‍. ഇത് എഴുതാനാകാം. മറ്റു ചിലര്‍ക്ക് വായനയിലാകം. ചിലര്‍ക്ക് കണക്കിലാകാം. ഇതിനെയാണ് പൊതുവെ പഠന വൈകല്യം എന്ന് പറയുന്നത്. പഠനവൈകല്യമുള്ള കുട്ടികള്‍ മന്ദബുദ്ധികളല്ലന്ന് ആദ്യം തിരിച്ചറിയുക. ജനിതകവും, സാമൂഹികവും, കുടുംബാന്തരീക്ഷവുമായ കാരണങ്ങള്‍കൊണ്ടാണ് കുട്ടികളില്‍ ഇത്തരം വൈകല്യങ്ങള്‍ ഉണ്ടാകുന്നത്. ചെറുപ്രായത്തില്‍ തന്നെ ഇത് കണ്ടെത്തി ശാസ്ത്രീയമായ പരിഹാരമാര്‍ഗങ്ങള്‍ ക്ഷമയോടെ നല്‍കി വന്നാല്‍ പഠന വൈകല്യങ്ങള്‍ മാറ്റിയെടുക്കാനാവും.നിര്‍ഭാഗ്യവശാല്‍ ക്ലാസ് റൂമിലെ പഠന വൈകല്യക്കാരെ മന്ദബുദ്ധികളാക്കുന്ന ചില അധ്യാപകരും ഇവരെ മണ്ടന്മാരായി അധിക്ഷേപിക്കുന്ന ചില രക്ഷിതാക്കളും ഇവരുടെ നല്ല ഭാവിയും ഉള്ളിലെ കഴിവും നഷ്ടപ്പെടുത്തുകയാണ്.

കാഴ്ചയുടെ കുറവ് കൊണ്ട് ക്ലാസില്‍ മറ്റു കുട്ടികള്‍ക്കൊപ്പം വായിക്കാന്‍ കഴിയാത്തവരെ പഠനെവെകല്യക്കാരായി കാണരുത്. അതുപോലെ കേള്‍വി പ്രശ്‌നം കൊണ്ട് പഠനത്തിലും വായനയിലും പിന്നിലായിപ്പോകുന്നവരുമുണ്ടാകാം. ഇവരും പഠനവൈകല്യക്കാരല്ല. പക്ഷെ അവരുടെ കുറവുകള്‍ കണ്ടെത്തി യഥാ സമയം പരിഹരിച്ചില്ലെങ്കില്‍ അത് പഠനവൈകല്യത്തിലെത്തുകയും ചെയ്യും.

പഠന വൈകല്യം പ്രധാനമായും വായിക്കാനുള്ള കഴിവ് കുറവ്, എഴുതാനുള്ള ശേഷി ഇല്ലായ്മ ,കണക്കില്‍ പിന്നിലാവുക എന്നതിലാണ്. കുട്ടികള്‍ പുസ്തകം തല തിരിച്ച് പിടിച്ച് വായിക്കുക. മിറര്‍ ഇമേജ് രീതിയില്‍ (പിറകിലേക്ക് വായിക്കുക) അക്ഷരങ്ങള്‍ കൂട്ടിവായിക്കാന്‍ കഴിയാതാവുക, സാവധാനം വായിച്ചെടുക്കുക ,ചിഹ്നങ്ങള്‍ തിരിച്ചറിയാതാവുക, തപ്പിത്തടത്ത് വായിക്കുക ,ഊഹിച്ച് വായിക്കുക
ഇതെല്ലാം അതിന്റെ ചില ലക്ഷണങ്ങള്‍ മാത്രം.

എഴുതാന്‍ കഴിയാതാവുക എന്നാല്‍ ലക്ഷണങ്ങള്‍ പലതാണ്. ദീര്‍ഘസമയമെടുത്ത് എഴുതേണ്ടിവരിക, വാക്യങ്ങളെ തിരിച്ചെഴുതുക, എഴുതാനുള്ള കഴിവില്ലായ്മ, കൈയ്യക്ഷരം മോശമാവുക, സ്വയം എഴുതിയത് തന്നെ മനസ്സിലാകാതാവുക എന്നിവ ചില ലക്ഷണങ്ങള്‍ മാത്രം. എഴുത്തിലും വായനയിലും കഴിവുകള്‍ എല്ലാം ഉണ്ടെങ്കിലും കണക്കില്‍ വളരെ പിന്നിലാകുന്ന കുട്ടികള്‍. ചെറിയ സംഖ്യകള്‍ പോലും കൂട്ടാനാ കുറക്കാനാ കഴിയാതെവരിക ഇതൊക്കെയാണ് പ്രാഥമിക ലക്ഷണങ്ങള്‍.

ആഴത്തിലുള്ള പഠനവൈകല്യങ്ങള്‍ മൂന്ന് വയസ്സില്‍ തന്നെ കണ്ട് തുടങ്ങും. വാക്കുകള്‍ കൂട്ടിപ്പറയാന്‍ കഴിയാത്ത ആ നാളില്‍ തന്നെ ഇത് ചികിത്സിച്ച് തുടങ്ങിയാല്‍ നന്ന്. ചില വൈകല്യങ്ങള്‍ മൂന്നാം ക്ലാസിലെത്തുന്നതോടെയാണ് കണ്ട് തുടങ്ങുക. പഠന വൈകല്യമുള്ള കുട്ടികളെ ഒരിക്കലും അതിന്റെ പേരില്‍ ശിക്ഷിക്കരുത്. ക്ഷമയോടെ അവന്റെ കുറവുകളെ നേരിടുക. മോട്ടിവേഷന്‍ നല്‍കുക .കുറ്റപ്പെടുത്താതിരിക്കുക. ചെറിയതാണെങ്കിലും മികവുകളെ പ്രോത്സാഹിപ്പിക്കുക, മാനസിക ധൈര്യം കൊടുക്കുക ഇതൊക്കെയാണ് രക്ഷിതാക്കളും അധ്യാപകരും ശ്രദ്ധിക്കേണ്ട പ്രധാന കാര്യങ്ങള്‍. കുട്ടികളാടൊപ്പം നില്‍ക്കണം എല്ലാ കാര്യത്തിലും. അവര്‍ക്ക് മാനസികമായ പിന്തുണ എപ്പോഴും നല്‍കണം. നിരന്തരം മോട്ടിവേറ്റഡ് ചെയ്ത് പഠന താല്‍പര്യം ഇത്തരം കുട്ടികളില്‍ ഉണ്ടാക്കാന്‍ കഴിഞ്ഞാല്‍ പഠന വൈകല്യം വലിയൊരളവില്‍ ഇല്ലാതാക്കാം.

(അധ്യാപകനും, മാധ്യമപ്രവര്‍ത്തകനും, ഹിപ്പ്‌നോട്ടിക്കല്‍ കൗണ്‍സിലറും, മൈന്റ് കണ്‍സള്‍ട്ടന്റുമാണ് ലേഖകന്‍. 9946025819 )

selfie habbit of youth
Posted by
29 November

സെല്‍ഫി ഇത്രയും അപകടകാരമാണെന്ന് പ്രതീക്ഷിച്ചില്ല

സെല്‍ഫികള്‍ സോഷ്യല്‍മീഡിയയില്‍ കണ്ടാല്‍ കലക്കനായിട്ടുണ്ട് എന്ന് പറയാത്തവര്‍ ഇല്ല. സെല്‍ഫി ഡെത്ത് എന്ന വാക്ക് ഗൂഗിളില്‍ ആദ്യമായി സെര്‍ച്ചു ചെയ്യപ്പെട്ടത് 2014 ജനുവരിയിലായിരുന്നു. അതിനു ശേഷം എത്ര സെല്‍ഫി മരണങ്ങളാണ് വാര്‍ത്തയായത്. മറ്റു സ്ഥലങ്ങളില്‍ മാത്രമല്ല കേരളത്തിലും സെല്‍ഫി ദുരന്തങ്ങള്‍ നമ്മള്‍ കാണാന്‍ തുടങ്ങി.

ഡാറ്റാ അനലൈസിങ് സൈറ്റായ പ്രൈസണോമിക്‌സ് സെല്‍ഫിയെക്കുറിച്ച് ഒരു പുതിയ വിവരം പുറത്തുവിട്ടു. ഒരാള്‍ സെല്‍ഫി എടുക്കുന്നതിനിടയില്‍ മരിക്കാനുള്ള സാധ്യത സാധാരണയേക്കാള്‍ ആറു മടങ്ങു കൂടുതലാണത്രേ. ചിത്രങ്ങള്‍ പ്രദര്‍ശിപ്പിക്കാന്‍ ശ്രമിക്കുന്നവര്‍ ഓരോ ചിത്രം കഴിയുന്തോറും മറ്റുള്ളവരുടെ ശ്രദ്ധകിട്ടാനായി കൂടുതല്‍ സാഹസികമായ ചിത്രങ്ങള്‍ എടുക്കാന്‍ ശ്രമിക്കും. ഏറ്റവും അപകടകരമായ സ്ഥലത്തോ സാഹചര്യത്തിലോ ആകും ഈ ചിത്രീകരണം. ഒരു കൈയില്‍ മൊബൈല്‍ പരമാവധി ഉയര്‍ത്തിയോ അകറ്റിയോ പിടിച്ചാണ് സെല്‍ഫി എടുക്കുന്നത്. പശ്ചാത്തലം പരമാവധി ഫ്രെയ്മില്‍ വരാന്‍ എത്താവുന്നത്രയും എത്തിച്ചു പിടിച്ച് ക്ലിക്കിനു ശ്രമിക്കുന്ന നിമിഷങ്ങളില്‍ പരിസരബോധവും ആ സാഹചര്യത്തിലെ അപകടസാധ്യതയും മറന്നു പോകുന്നു. കാട്ടാനയുടെ മുന്നില്‍ പുറം തിരിഞ്ഞു നിന്നു സെല്‍ഫി എടുക്കാന്‍ ശ്രമിക്കുന്നയാള്‍ ആ നിമിഷങ്ങളില്‍ മറന്നു പോകുന്നത് ഓടിരക്ഷപ്പെടാനുള്ള അവസാന അവസരമാണ് അതെന്നാണ്. ഓടിവരുന്ന തീവണ്ടിക്കുമുന്നില്‍ നിന്നു സെല്‍ഫിയെടുക്കുന്നതിനിടയില്‍ തീവണ്ടിയിടിച്ചു മരിച്ച സംഭവത്തിലും ഇതു തന്നെയാണ് നടന്നത്.

കാമുകിയോടൊപ്പം നിന്ന് സ്വന്തം മുഖത്തേയ്ക്ക് തോക്കു ചൂണ്ടി സെല്‍ഫി എടുക്കാന്‍ ശ്രമിച്ച യുവാവ് വേടിയേറ്റു മരിച്ചത് അടുത്തിടെയാണ്, വാഷിങ്ങ്ടണില്‍. ക്യാമറ ക്ലിക്കിനു പകരം വിരലമര്‍ന്നത് തോക്കിന്റെ ട്രിഗറിലായിപ്പോയി. ഏറ്റവുമൊടുവില്‍ തിരമാലകളുടെ പശ്ചാത്തലത്തില്‍ സെല്‍ഫി പകര്‍ത്താന്‍ ശ്രമിച്ച ദമ്പതികള്‍ കടലില്‍ പോയത് കന്യാകുമാരിയിലായിരുന്നു.

സെല്‍ഫി ദുരന്തങ്ങള്‍ ഉയരാന്‍ തുടങ്ങിയതോടെ റഷ്യ അടക്കം ഒട്ടേറെ രാജ്യങ്ങള്‍ സെല്‍ഫിക്ക് കഴിഞ്ഞ ഒരു വര്‍ഷത്തിനുള്ളില്‍ നിയന്ത്രണങ്ങളേര്‍പ്പെടുത്തി. ഒടുവില്‍ ഇന്ത്യയിലും സെല്‍ഫി നിയന്ത്രണം വരുകയാണ്. ഇതിന്റെ ഭാഗമായി കേന്ദ്ര വിനോദസഞ്ചാര വകുപ്പ് എല്ലാ സംസ്ഥാനങ്ങള്‍ക്കും നിര്‍ദേശം നല്‍കിക്കഴിഞ്ഞു. സെല്‍ഫി അപകടസാധ്യതാമേഖലകളെ തിരിച്ചറിയാനും സൂചനാബോര്‍ഡുകള്‍ സ്ഥാപിക്കാനും വേണ്ട ബോധവല്‍ക്കരണം നടത്താനുമാണ് മാര്‍ഗ നിര്‍ദേശം.

day time nap leads to diabetes
Posted by
25 November

നീണ്ട പകലുറക്കം പ്രമേഹസാധ്യത കൂട്ടും

നീണ്ട പകലുറക്കം നിങ്ങള്‍ ആഗ്രഹിക്കുന്നുണ്ടോ? എങ്കില്‍ സൂക്ഷിക്കുക, ഒരുപക്ഷേ പ്രമേഹത്തിനുള്ള മുന്നറിയിപ്പാകാമത്. മൂന്നു ലക്ഷത്തിലധികം പേരെ പങ്കെടുപ്പിച്ചു നടത്തിയ ഒരു പഠനത്തിലാണു പകല്‍ ഒട്ടും മയങ്ങാത്തവരെ അപേക്ഷിച്ച് ഒരു മണിക്കൂറിലധികം പകല്‍ ഉറങ്ങുന്നവര്‍ക്ക് ടൈപ്പ് 2 പ്രമേഹത്തിനുള്ള സാധ്യത 45 ശതമാനം ആണെന്നു കണ്ടത്.ആരോഗ്യം വളരെക്കുറഞ്ഞ ആളുകളോ പ്രമേഹരോഗത്തിന്റെ ആദ്യഘട്ടത്തിലുള്ളവരോ ആകാം ദീര്‍ഘസമയം പകല്‍ ഉറങ്ങുന്നത്.

ദീര്‍ഘകാലമായി രോഗമുള്ളവര്‍ക്കും പ്രമേഹരോഗ നിര്‍ണയം നടത്താത്തവര്‍ക്കും പകല്‍ ക്ഷീണം തോന്നുക പതിവാണെന്ന് ഗവേഷകര്‍ പറയുന്നു. പ്രമേഹം വരാനുള്ള സാധ്യതയാകാം മയക്കത്തിനു കാരണം. രക്തത്തിലെ പഞ്ചസാരയുടെ അളവ് അല്‍പം ഉയരുന്നതു മൂലമാകാം ഇത്. പ്രമേഹത്തിനുള്ള മുന്നറിയിപ്പാണ് ഈ മയക്കമെന്നു ചുരുക്കം. ഉറക്കം തടസ്സപ്പെടുന്നതും പ്രമേഹവുമായി ബന്ധമുണ്ടെന്നതിനു ധാരാളം തെളിവുകളുണ്ടെന്ന് പഠനത്തെ ഉദ്ധരിച്ച് ഗ്ലാസ്‌ഗോ സര്‍വകലാശാലയിലെ പ്രൊഫസര്‍ നവീദ് സത്താര്‍ പറയുന്നു.

സ്ലീപ് അപ്നിയ മൂലം രാത്രിയില്‍ ഉറക്കം തടസ്സപ്പെടുന്നതു മൂലമാകാം പകല്‍ നീണ്ട മയക്കം. ഇങ്ങനെയുള്ള ഉറക്കപ്രശ്‌നങ്ങള്‍ ഹൃദ്രോഗം, പക്ഷാഘാതം, ഹൃദയസംബന്ധമായ പ്രശ്‌നങ്ങള്‍ എന്നിവ വരാനുള്ള സാധ്യത കൂട്ടുകയും ടൈപ്പ് 2 പ്രമേഹമുള്‍പ്പടെയുള്ള മെറ്റബോളിക് ഡിസോര്‍ഡറുകള്‍ വരാനുള്ള സാധ്യതയിലേക്കു നയിക്കുകയും ചെയ്യും.

ജോലിയോ സാമൂഹിക ജീവിതക്രമം മൂലമോ നഷ്ടപ്പെടുന്ന ഉറക്കം വിശപ്പു കൂട്ടുകയും ടൈപ്പ് 2 പ്രമേഹത്തിനുള്ള സാധ്യത കൂട്ടുകയും ചെയ്യും. എന്നാല്‍ ഇതിനു വിരുദ്ധമായി 40 മിനിറ്റില്‍ കുറവുള്ള ചെറുമയക്കം നമ്മളെ ശ്രദ്ധയുള്ളവരാക്കുകയും തലച്ചോറിന്റെ മോട്ടോര്‍സ്‌കില്‍സ് വര്‍ധിപ്പിക്കുകയും ചെയ്യുമെന്ന് ഗവേഷകര്‍ ചൂണ്ടിക്കാട്ടുന്നു.

ടോക്കിയോ സര്‍വകലാശാലയിലെ യമാഡാ ടൊമാഹൈഡിന്റെ നേതൃത്വത്തില്‍ നടത്തിയ ഈ പഠനം, ജര്‍മനിയിലെ മ്യൂണിച്ചില്‍ നടന്ന 2016 ലെ യൂറോപ്യന്‍ അസോസിയേഷന്‍ ഫോര്‍ ദ് സ്റ്റഡി ഓഫ് ഡയബറ്റിസ് മീറ്റിങ്ങില്‍ അവതരിപ്പിച്ചു.

smoking habbit of girls
Posted by
24 November

പുക വലിച്ചാല്‍ മോഡേണ്‍ ആകില്ല

മോഡോണ്‍ ആകുക അല്ലെങ്കില്‍ ഫാഷനബിള്‍ ആകുക, ഇന്‍ഡിപെന്‍ഡന്റ് ആകുക, ആത്മവിശ്വാസമുള്ളവളാകുക.ഇതൊക്കെ ആകണമെങ്കില്‍ പുകവലി കൂടി ശീലമാക്കണോ? ഇന്നത്തെ പെണ്‍കുട്ടികള്‍ സ്വാതന്ത്ര്യം പ്രഖ്യാപിക്കുന്നത് പുകവലിയിലൂടെ ആണത്രേ.

പായ്ക്കറ്റിനു പുറത്ത് നിയമപ്രകാരമുള്ള മുന്നറിയിപ്പുകള്‍ ശക്തമാക്കാനുള്ള ശ്രമങ്ങള്‍ തുടരുമ്പോഴും പെണ്‍കുട്ടികളുടെ ഇടയില്‍ പുകവലി ശീലം കൂടിവരികയാണ്. 21ാം നൂറ്റാണ്ടിലെ പൊതുജനാരോഗ്യ രംഗത്തെ ഏറ്റവും പ്രധാന ഉത്തരവാദിത്തങ്ങളിലൊന്ന് സ്ത്രീകളില്‍ വര്‍ധിച്ചു വരുന്ന പുകവലി തടയുക എന്നതാണ്. ലോകാരോഗ്യ സംഘടനയുടെ കണക്കു പ്രകാരം 5 ദശലക്ഷം പേരെയാണ് പുകവലി കൊല്ലുന്നത്. 2030 ആകുമ്പോഴേയ്്ക്കും ഇത് എട്ടു ദശലക്ഷമാകും.

പെണ്‍കുട്ടികള്‍ കൗമാരപ്രായത്തിലാണ് പുകവലി ശീലമാക്കുന്നത്. രക്ഷിതാക്കളുടെ പുകവലിയാകാം ഇതിനൊരു കാരണം. ദൗര്‍ഭാഗ്യമെന്നു പറയട്ടെ, അനാരോഗ്യകരമായ ശീലങ്ങളും സ്വഭാവങ്ങളും രക്ഷിതാക്കളില്‍ നിന്നാണ് കുട്ടികള്‍ പഠിക്കുന്നത്. പുകവലി ശീലമുള്ള സുഹൃത്തുക്കള്‍ക്ക് ഒപ്പം നില്‍ക്കാനും ചിലര്‍ പുകവലിച്ചു തുടങ്ങുന്നു.

അര നൂറ്റാണ്ടു മുന്‍പ് ശ്വാസകോശാര്‍ബുദം മൂലം മരിക്കുന്ന പുരുഷന്‍മാരുടെ എണ്ണം സ്ത്രീകളുടെ അഞ്ചിരട്ടി ആയിരുന്നു. എന്നാല്‍ ഈ നൂറ്റാണ്ടിന്റെ ആദ്യദശകങ്ങളോടെ ഈ കാര്യത്തില്‍ സ്ത്രീപുരുഷ സമത്വം വന്നു.

ശ്വാസകോശാര്‍ബുദം മൂലമുള്ള മരണനിരക്ക് പുകവലിക്കാത്തവരെ അപേക്ഷിച്ച് 25 മടങ്ങാണ്. തുടര്‍ച്ചയായി പുകവലിക്കുന്ന ഒരു സ്ത്രീ, പുകവലിക്കാത്തവരെ അപേക്ഷിച്ച് 10 കൊല്ലം മുമ്പേ മരിക്കുന്നുവെന്ന് പഠനങ്ങള്‍ സൂചിപ്പിക്കുന്നു. പുകവലി മൂലം ശ്വാസകോശാര്‍ബുദം ഉണ്ടാകുന്നതു കൂടാതെ ഹൃദ്രോഗം, പക്ഷാഘാതം, സ്തനാര്‍ബുദം ഉള്‍പ്പടെയുള്ള മറ്റ് അര്‍ബുദങ്ങള്‍ ഇവയ്ക്കുള്ള സാധ്യതയും കൂടുന്നു.

സിഗരറ്റിന്റെ നിര്‍മാണത്തില്‍ വരുത്തിയ മാറ്റങ്ങളെക്കുറിച്ചും ഇതുണ്ടാക്കുന്ന അപകടങ്ങളെക്കുറിച്ചും മിക്കവര്‍ക്കും അറിയില്ല. നിറയെ ദ്വാരങ്ങളുള്ള ഫില്‍റ്ററുകളുടെ ഉപയോഗം, ശക്തിയായി എളുപ്പത്തില്‍ വലിക്കാനും അതുവഴി നിേക്കാട്ടിന്‍ രക്തത്തില്‍ വളരെവേഗം കലരാനും ഇടയാക്കും. ഫലമോ സിഒപിഡി എന്ന ക്രോണിക് ഒബ്‌സ്ട്രക്ടീവ് പള്‍മണറി ഡിസീസ്.

പുകവലി സ്ത്രീകളില്‍ വന്ധ്യത ഉണ്ടാക്കും. ഒരു സിഗരറ്റ്കുറ്റി വലിച്ചു തീരുമ്പോള്‍ ഏഴായിരത്തിലധികം രാസവസ്തുക്കളാണ് ശരീരത്തിലാകെയും അവയവങ്ങളിലും വ്യാപിക്കുന്നത്. ഇത് ഓവുലേഷനെ ബാധിക്കും, പ്രത്യുല്‍പാദനാവയങ്ങളെ തകരാറിലാക്കും. നേരത്തേയുള്ള ആര്‍ത്തവവിരാമത്തിനു കാരണമാകും.ഇങ്ങനെ ഒട്ടേറെ ആരോഗ്യ പ്രശ്‌നങ്ങള്‍ക്ക് കാരണമാകും.

beetroot for health
Posted by
23 November

ബീറ്റ്‌റൂട്ട് വെറുതേ വാരി കഴിക്കല്ലേ

ധാരാളം പോഷകങ്ങള്‍ അടങ്ങിയിരിക്കുന്ന ബീറ്റ്‌റൂട്ട്, ബീറ്റ് ഇലകള്‍, ജ്യൂസ് എന്നിവ രക്തയോട്ടം മെച്ചപ്പെടുത്തുകയും രക്തസമ്മര്‍ദം കുറയ്ക്കുകയും വ്യായാമം ചെയ്യുമ്പോള്‍ പ്രകടനം മെച്ചപ്പെടുത്തുകയും ചെയ്യുന്നതുള്‍പ്പെടെ ആരോഗ്യപരമായ പല ഗുണങ്ങളും ഉളളവയാണ്. ബീറ്റ്‌റൂട്ടില്‍ ഉളള ന്യൂട്രേറ്റിന്റെ സ്വാധീനമാണ് ഇതിനു കാരണം. പാചകം ചെയ്തും അച്ചാര്‍ ആയും ഉപയോഗിക്കുന്നു ബീറ്റ്‌റൂട്ട്. പച്ചയ്ക്കു കഴിക്കാവുന്നവയാണ് ബീറ്റ് ഇലകള്‍. ചീരയില പോലെ തന്നെ ഉപയോഗിക്കാവുന്ന പോഷക സംപുഷ്ടമായ ഒന്നാണ് ഇവയും.

ബീറ്റ്‌റൂട്ടില്‍ അയണ്‍ ഉളളതുകൊണ്ട് രക്തത്തിലെ ഓക്‌സിജന്റെ സുഗമമായ പ്രവര്‍ത്തനത്തിനും അയണിന്റെ കുറവുകാരണം ഉണ്ടാകുന്ന തളര്‍ച്ച മാറ്റാനും ബീറ്റ്‌റൂട്ട് ഉപയോഗിക്കാം. വൈറ്റമിന്‍ സി ഉളളതിനാല്‍ ബീറ്റ്‌റൂട്ട് രോഗപ്രതിരോധ ശക്തിയും തരുന്നു.

ബീറ്റ്‌റൂട്ടില്‍ ധാരാളമായി നൈട്രേറ്റുകളുണ്ട്. ഇത് നൈട്രിക് ഓക്‌സൈഡ് ആയി മാറുകയും ഇത് രക്തസമ്മര്‍ദം കുറയ്ക്കാനും ഹൃദയാരോഗ്യത്തിനും ഓക്‌സിജന്റെ ഉപയോഗം കൂട്ടി വ്യായാമത്തിലെ പ്രകടനം മെച്ചപ്പെടുത്താനും സഹായിക്കുന്നതായും പഠനങ്ങള്‍ തെളിയിച്ചിട്ടുണ്ട്. എന്നാല്‍ ആവിയില്‍ പാചകം ചെയ്യുന്നതല്ലാതെയുള്ള പാചകരീതികള്‍ ബീറ്റ്‌റൂട്ടിലെ നൈട്രറ്റിന്റെ അളവ് കുറയ്ക്കുമെന്നും പഠനങ്ങള്‍ പറയുന്നു.

ബെറ്റാനിന്‍ (Betanin) ആണ് ബീറ്റ്‌റൂട്ടിനു തനതു നിറം കൊടുക്കുന്നത്. ഇവ കരളിന്റെ സുഗമമായ പ്രവര്‍ത്തനത്തിനു സഹായിക്കുകയും ചെയ്യുന്നു. എന്നാല്‍ ബീറ്റ്‌റൂട്ട് കൂടുതലായി ഉപയോഗിക്കുന്നത് മലമൂത്രങ്ങള്‍ക്ക് ബീറ്റ്‌റൂട്ടിന്റെ നിറം വരാന്‍ കാരണമാകുന്നു.

how to manage teenage love useful tips for parents and teachers
Posted by
22 November

കൗമാരക്കാല പ്രണയങ്ങളെ എങ്ങനെ കൈകാര്യം ചെയ്യാം; രക്ഷിതാക്കളും അധ്യാപകരും അറിയേണ്ട കാര്യങ്ങള്‍

-ഫഖ്‌റുദ്ധീന്‍ പന്താവൂര്‍

കൗമാരക്കാരായ രക്ഷിതാക്കളുടെ ഏറ്റവും വലിയ ആശങ്ക കുട്ടികളുടെ പ്രണയം തന്നെ. കൗമാരക്കാരായ കുട്ടികളുടെ പ്രണയത്തില്‍ 95 ശതമാനവും പരിക്ക് പറ്റുന്നത് പെണ്‍കുട്ടികള്‍ക്കാണ്. ആണ്‍കുട്ടികളുടെ പ്രണയം പതിയെ അവസാനിക്കുമെങ്കിലും പെണ്‍കുട്ടികള്‍ ഇതിന്റെ രസച്ചരടില്‍ നിന്നും/ ആഘാതത്തില്‍ നിന്നും അത്ര വേഗം രക്ഷപ്പെടില്ല .

കൗമാരക്കാല പ്രണയങ്ങള്‍ കൈകാര്യം ചെയ്യുന്നതില്‍ രക്ഷിതാക്കള്‍ക്ക് മാത്രമല്ല അധ്യാപകര്‍ക്ക് പോലും പിഴക്കാറുണ്ട്. ഫലമോ ചിലപ്പോള്‍ കുട്ടികളെ എന്നെന്നേക്കുമായി നഷ്ടപ്പെടുകയും ചെയ്യും. കൗമാരക്കാലം ഏറെ കരുതലോടെ കൈകാര്യം ചെയ്യേണ്ട കാലമാണ്. കൗമാരക്കാരുടെ മുഖ്യ ശത്രു രക്ഷിതാക്കളായിരിക്കും. തട്ടികയറുക, അനുസരണക്കേട്, പെട്ടെന്ന് ദേഷ്യപ്പെടുക, മുറി അടച്ച് ഒറ്റക്കിരിക്കുക, പകല്‍ സ്വപനങ്ങളില്‍ മുഴുകുക, തുടങ്ങിയ ഘട്ടങ്ങളിലൂടെയാണ് കൗമാരക്കാര്‍ കടന്ന് പോവുക. അവര്‍ക്ക് ഏറ്റവും പ്രിയപ്പെട്ടത് അവരുടെ സുഹൃത്തുക്കളായിരിക്കും. പങ്കുവെക്കലുകള്‍ അവരോട് മാത്രം. രക്ഷിതാക്കള്‍ കുട്ടികളുടെ സുഹൃദ് വലയങ്ങളെ നിരീക്ഷിക്കണം. മോശം സുഹൃത്തുക്കളില്‍ നിന്ന് മക്കളെ രക്ഷിച്ചെടുക്കാന്‍ കരുത്തുള്ള നല്ല സുഹൃത്താവാന്‍ രക്ഷിതാക്കള്‍ക്ക് കഴിഞ്ഞാലെ ഇത് സാധ്യമാകൂ .

കൗമാരക്കാലത്തെ ശാരീരിക മാറ്റങ്ങളും മാനസിക പിരിമുറുക്കങ്ങളും സെക്‌സ് സംബന്ധമായ സംശയങ്ങളും ആശങ്കകളും തീര്‍ത്ത് കൊടുക്കാന്‍ കഴിയുന്ന നല്ല കൂട്ടുകാരിയാകാന്‍ അമ്മക്കും നല്ലൊരു സുഹൃത്താവാന്‍ അച്ചനും കഴിയണം. നിങ്ങള്‍ക്കതിന് കഴിയുമോ എന്ന് ചിന്തിക്കുക. കുറ്റപ്പെടുത്തലുകളും ശാസനകളും മാത്രം നല്‍കുന്ന രക്ഷിതാവിനോട് / അധ്യാപകരോട് കൗമാരക്കാര്‍ക്ക് ഒട്ടും സ്‌നേഹമോ താല്‍പര്യമോ ഉണ്ടാകില്ല .

പ്രേമത്തിന്റെ പേരില്‍ മക്കളെ പരസ്യമായി ശാസിക്കുകയോ അടിച്ചമര്‍ത്തി അനുസരിപ്പിക്കാനോ ശ്രമിക്കരുത് .രക്ഷിതാക്കളും അധ്യാപകരും ഒരുപോലെ ശ്രദ്ധിക്കേണ്ട കാര്യമാണിത് . അടിച്ചമര്‍ത്തലും പരസ്യമായ അവഹേളനവും ശാസനയും കുട്ടികളെ ആത്മഹത്യയിലെത്തിക്കും. കൗമാരക്കാല പ്രണയങ്ങള്‍ കേവലം ഹോര്‍മോണിക് താല്‍പര്യങ്ങള്‍ മാത്രമാണെന്ന് കുട്ടികളെ ബോധ്യപ്പെടുത്താന്‍ രക്ഷിതാക്കള്‍ക്ക് കഴിയണം. കൗമാരക്കാലത്ത് എതിര്‍ ലിംഗത്തില്‍ പെട്ടവരോട് തോന്നുന്ന കൗതുകവും ,അറിയാനുള്ള ആഗ്രഹവും, അനുഭവിക്കാനുള്ള ആകാംക്ഷയും സ്വാഭാവിക ഹോര്‍മോണിക് പ്രവര്‍ത്തനങ്ങള്‍ മാത്രമാണ് .ആണ്‍കുട്ടികള്‍ക്കും പെണ്‍കുട്ടികള്‍ക്കുമിത് വ്യത്യാസമുണ്ടാകും.

അപകടത്തിലും ചതിയിലും പെടുന്നത് മിക്കവാറും പെണ്‍കുട്ടികളായിരിക്കും. പക്വതയില്ലാത്ത കൗമാരപ്രണയങ്ങളെ അംഗീകരിക്കരുത്. എന്നാല്‍ അടിച്ചമര്‍ത്താന്‍ ശ്രമിക്കുന്നത് അപകടകരവുമാണ്. കൗമാരകാലഘട്ടത്തില്‍ വിദ്യാര്‍ത്ഥികളില്‍ അഭിമാന, ദുരഭിമാന, മിഥ്യാബോധങ്ങള്‍ രൂപപ്പെട്ടുവരുന്ന കാലമാണ്. അടിച്ചമര്‍ത്തുന്നതും എതിര്‍ലിംഗക്കാരുടെ മുന്നില്‍ വെച്ച് പരസ്യമായി ശാസിക്കുന്നതും കുറ്റവിചാരണ നടത്തുന്നതും അവരുടെ വ്യക്തിത്വത്തിന് നേരെയുള്ള ആക്രമണമാണ് .അഭിമാനബോധത്തിന് ആഘാതമേല്‍പ്പിക്കാതെയുള്ള ശിക്ഷാനടപടികളെ അധ്യാപകര്‍ സ്വീകരിക്കാവൂ.

കൗമാരക്കാലത്തെ പ്രണയങ്ങള്‍ ശക്തമാകുന്ന കുട്ടികളെ പരിശോധനക്ക് വിധേയമാക്കിയാല്‍ വീടുകളില്‍ ലഭിക്കേണ്ട മതിയായ സ്‌നേഹത്തിന്റെയും വാത്സല്യത്തിന്റെയും, അംഗീകാരത്തിന്റെയും നല്ല വാക്കുകളുടെയും കുറവുകളാണെന്ന് ബോധ്യപ്പെടും. ഇത്തരം കുടുംബങ്ങളില്‍ നിന്ന് വരുന്ന കുട്ടികളിലാണ് കൗമാര പ്രേമങ്ങള്‍ അപകടക്കെണിയാകുന്നത്. പ്രണയങ്ങള്‍ ശക്തമാകുന്നതിന് മുമ്പ് മക്കളെ സ്‌നേഹത്തോടെ കീഴ്‌പ്പെടുത്താന്‍ രക്ഷിതാക്കള്‍ക്കാകണം. മൊബൈലിന്റെ അനാവശ്യ ഉപയോഗം വിദ്യാര്‍ത്ഥികളുടെ നല്ല ഭാവി, സ്വഭാവം എന്നിവ നഷ്ടപ്പെടുത്തുകയെ ചെയ്യൂ. ടെക്‌നിക്കലായി നാം ഒത്തിരി വളര്‍ന്നെങ്കിലും സാംസ്‌ക്കാരിക പരമായി നാം തുടങ്ങിയിടത്തുതന്നെ…

(അധ്യാപകനും, മാധ്യമ പ്രവര്‍ത്തകനും, ഹിപ്പ്‌നോട്ടിക്കല്‍ കൗണ്‍സിലറും, മൈന്റ് കണ്‍സള്‍ട്ടന്റുമാണ് ലേഖകന്‍. 9946025819 )

hair style
Posted by
21 November

മുടിയിഴയില്‍ വിടരും പ്രണയ വസന്തം

കല്യാണം പോലുളള ചടങ്ങുകളിലും വിശേഷാവസരങ്ങളിലും ട്രഡീഷനല്‍ വസ്ത്രത്തിനൊപ്പം പൂക്കളണിയാന്‍ സുന്ദരിമാര്‍ക്ക് ഇഷ്ടമാണ്. പക്ഷേ, സ്‌റ്റൈലന്‍ പാര്‍ട്ടിക്കു പോകുമ്പോള്‍ പൂക്കള്‍ അണിയാന്‍ ഒന്നു മടിക്കും. പാര്‍ട്ടി വെയര്‍ ഗൗണിനൊപ്പം ഭംഗിയുളള ഹെയര്‍സ്‌റ്റൈലും പൂക്കളും കൂടിയായാല്‍ ഡിഫ്രന്റ് ലുക് കിട്ടും. ഗ്രാമീണ ശാലീനതയായാലും മോഡേണ്‍ ലുക് ആയാലും പൂക്കള്‍ അഴകാണ്.

പൂക്കള്‍ ഇഷ്ടമില്ലാത്തവര്‍ക്ക് ഫ്‌ലോറല്‍ ആക്‌സസറി ഉപയോഗിക്കാം. ഡയമണ്ടിന്റെ ഭംഗിയുളളതോ മെറ്റാലിക് നിറമുളളതോ ആയ ഫ്‌ലോറല്‍ ആക്‌സസറി മുടിക്കെട്ടിനു കൂടുതല്‍ അഴകേകും.മുടി ഉയര്‍ത്തിക്കെട്ടി വയ്ക്കുന്ന ഹെയര്‍സ്‌റ്റൈലിനൊപ്പവും താഴ്ത്തി കെട്ടി വയ്ക്കുന്ന ഹെയര്‍സ്‌റ്റൈലിനൊപ്പവും ഫ്‌ലോറല്‍ ആക്‌സസറീസ് അണിയാം. കോതിയൊതുക്കാത്ത മുടി കെട്ടി വച്ചതു പോലുളള സ്‌റ്റൈലാണു മെസ്സി സ്‌റ്റൈല്‍. ഇങ്ങനെ മെസ്സി ആയ ഹെയര്‍സ്‌റ്റൈലിനൊപ്പം കഴുത്തിന്റെ വശത്തായി പൂക്കള്‍ കുത്തി നിര്‍ത്താം. അതല്ലെങ്കില്‍ ഹെയര്‍ ആക്‌സസറീസ് പിന്‍ ചെയ്യാം. മെറ്റാലിക് ഫ്‌ലവേഴ്‌സിന്റെ ഭംഗിയില്‍ ക്യൂട്ട് ലുക് ഉറപ്പാക്കാം. മെസ്സി ആയാലും നീറ്റ് ആയാലും പൊക്കിക്കെട്ടിയ ബണ്‍ സ്‌റ്റൈല്‍ ഭംഗിയുണ്ടാകും. അതില്‍ അല്‍പം പൂക്കള്‍ കൂടിയായാല്‍ കൂടുതല്‍ ആകര്‍ഷകമാവും.

മുടിയുടെ പകുതി ഭാഗം കെട്ടിവച്ചു ബാക്കി ഭാഗം ലൂസ് ചെയ്തിടുക. ഈ പകുതി ഭാഗം ചുരുളുകളായോ സ്‌ട്രെയിറ്റായോ കിടക്കട്ടെ. കെട്ടിവച്ച മുടിയുടെ വശത്തു പൂക്കള്‍ ചൂടാം. കുറച്ചു ചെറിയ പൂക്കള്‍ ഒരുമിച്ചു പിന്‍ ചെയ്താല്‍ ഭംഗിയുണ്ടാകും.

മുടി ഒരു വശത്തു നിന്നു മറുവശത്തേക്ക് ബ്രെയ്ഡ് സ്‌റ്റൈലില്‍ കെട്ടുക. ശേഷിക്കുന്ന മുടി തോളിലേക്ക് ഒഴുക്കിയിടുക. ട്വിസ്റ്റഡ് റോപ് സ്‌റ്റൈല്‍ ബ്രെയ്ഡ് നല്ല ലുക് നല്‍കും. ഫിഷ് ടെയ്ല്‍ ബ്രെയ്ഡില്‍ പൂക്കള്‍ ചൂടുന്നത് അഴക് നല്‍കും.

ബേബീസ് ബ്രീത്, ഡെയ്‌സി, ചെറിയ റോസാപ്പൂക്കള്‍, റോസ മൊട്ടുകള്‍ ഇവയെല്ലാം പാര്‍ട്ടികളില്‍ മുടിക്ക് അഴക് നല്‍കും പൂക്കളാണ്. ഒരേയോരു പൂവ് കൊണ്ടും സ്റ്റേറ്റ്‌മെന്റ് ആക്‌സസറി ഒരുക്കാം. മുടിക്കെട്ടിന്റെ വശത്തായി വസ്ത്രത്തിന് ഇണ ങ്ങുന്നതോ കോണ്‍ട്രാസ്റ്റ് നിറത്തിലോ ഉളള വലിയ പൂവ് ചൂടാം.

പതിവായുളള ഹെയര്‍സ്‌റ്റൈലില്‍ പൂക്കള്‍ കൊണ്ട് വ്യത്യസ്തത വരുത്തുകയും ചെയ്യാം. സിംപിള്‍ പോണിടെയ്ല്‍ കെട്ടി അതില്‍ ഭംഗിയുളള വെളുത്ത പൂക്കള്‍ ചൂടി നോക്കൂ.

mental-disorders-in-kerala-youth report
Posted by
20 November

കേരളത്തിലെ യുവാക്കളില്‍ എട്ടിലൊരാള്‍ക്ക് മാനസിക പ്രശ്‌നമെന്നു റിപ്പോര്‍ട്ട്

തിരുവനന്തപുരം: കേരളത്തില്‍ പ്രായപൂര്‍ത്തിയായ എട്ടുപേരില്‍ ഒരാള്‍ക്കു മാനസിക പ്രശ്‌നമുണ്ടെന്നു പഠന റിപ്പോര്‍ട്ട്. 18 നുമേല്‍ പ്രായമുള്ള 12.43% പേര്‍ മാനസിക വെല്ലുവിളി നേരിടുന്നവരാണെന്നു സംസ്ഥാന മാനസികാരോഗ്യ അഥോറിറ്റിയും ദേശീയ ആരോഗ്യ മിഷനും ചേര്‍ന്നു നടത്തിയ പഠനം. കൊല്ലം, ഇടുക്കി, പാലക്കാട്, വയനാട്, കാസര്‍ഗോഡ് ജില്ലകളില്‍ നടത്തിയ പഠനത്തിലെ കണ്ടെത്തലുകള്‍ സര്‍ക്കാരിന്റെ ആരോഗ്യനയത്തില്‍ ഉള്‍പ്പെടുത്തുമെന്ന് ആരോഗ്യമന്ത്രി കെ.കെ. ശൈലജ പറഞ്ഞു.

ഗുരുതരമാനസിക വൈകല്യം(സൈക്കോസിസ്) മൂലം ദുരിതമനുഭവിക്കുന്ന 0.71% പേരുണ്ട്. ഒമ്പതു ശതമാനം പേര്‍ വിഷാദരോഗത്തിന് അടിമപ്പെട്ടവരാണ്. മദ്യപാനവുമായി ബന്ധപ്പെട്ട് മാനസിക ദുരിതമനുഭവിക്കുന്ന 1.46 ശതമാനമുണ്ട്. മാനസികരോഗികളില്‍ 25% പേര്‍ മാത്രമാണ് ചികിത്സ ലഭിക്കാത്തവര്‍. 42.88% രോഗികള്‍ സര്‍ക്കാര്‍ ആശുപത്രികളെ ആശ്രയിക്കുമ്പോള്‍ സ്വകാര്യ ആശുപത്രികളിലെത്തുന്നവര്‍ 29.24%. റിപ്പോര്‍ട്ടിന്റെ അടിസ്ഥാനത്തില്‍ കര്‍മപദ്ധതി തയാറാക്കി മാനസികാരോഗ്യ കേന്ദ്രങ്ങളെ ശക്തിപ്പെടുത്തുമെന്നു മന്ത്രി പറഞ്ഞു.

പഠനത്തിനായി അനുവദിച്ച 1.5 കോടിയില്‍ 34 ലക്ഷം രൂപമാത്രമാണ് അഞ്ചു ജില്ലകളിലെ സര്‍വേയ്ക്കായി ചെലവായത്. ബാക്കി തുക ഉപയോഗിച്ച് മറ്റു ജില്ലകളില്‍ക്കൂടി സര്‍വേ നടത്തും. പരിശീലനം ലഭിച്ച ആശാ വര്‍ക്കര്‍മാരാണ് സര്‍വേ നടത്തിയത്. സര്‍വേയ്ക്കു നേതൃത്വം നല്‍കിയ ഡോ.ഡി രാജു, ആലപ്പുഴ മെഡിക്കല്‍ കോളജിലെ സൈക്യാട്രി വിഭാഗം മേധാവി ഡോ. വി സതീഷ് എന്നിവര്‍ ചേര്‍ന്ന് മന്ത്രിക്കു റിപ്പോര്‍ട്ട് കൈമാറി.