five things of life happiness
Posted by
04 January

ജീവിതത്തില്‍ ഈ അഞ്ചുകാര്യങ്ങള്‍ നേടാനായാല്‍ നിങ്ങള്‍ സന്തോഷവാന്മാരാകും

-ഫഖ്‌റുദ്ധീന്‍ പന്താവൂര്‍

ജീവിതത്തില്‍ വിജയവും സന്തോഷവും എല്ലാവരും ആഗ്രഹിക്കുകയും അതിനായി പ്രവര്‍ത്തിക്കുകയും ചെയ്യുന്നുണ്ട്. ചിലപ്പോഴൊക്കെ നമുക്ക് ചുറ്റുമുള്ളവരുടെ ഇടപെടല്‍ അത് നഷ്ടപ്പെടുത്തിക്കളയും. പരാജയങ്ങളെ ഇല്ലാതാക്കി ജീവിതം സന്തോഷകരമാക്കാന്‍ ഇനി പറയുന്ന 5 കാര്യങ്ങള്‍ നിങ്ങളുടെ ജീവിതത്തില്‍ ഉറപ്പുവരുത്തുക. ഇല്ലെങ്കില്‍ അതിനായി പ്രാര്‍ത്ഥിക്കുകയും പ്രവര്‍ത്തിക്കുകയും ചെയ്യുക. ഈ അഞ്ചുകാര്യങ്ങള്‍ നിങ്ങള്‍ക്ക് ജീവിതത്തില്‍ ഒന്നിച്ച് ഉണ്ടാക്കാന്‍ കഴിഞ്ഞാല്‍ സ്വര്‍ഗംപോല്‍ മനോഹരമാകും ജീവിതം .

1 നല്ലൊരു ജോലി

ജോലി എന്നുമാത്രം പറഞ്ഞാല്‍ പോരാ. നല്ല ജോലിതന്നെ വേണം. ഉള്ള ജോലി ആസ്വദിച്ചു ചെയ്തു നോക്കൂ. മടുപ്പ് വരുത്തില്ല .മികച്ച ജോലിയുണ്ടാകുന്നത് നമുക്ക് ആത്മവിശ്വാസം വളര്‍ത്തും. ജീവിതനിലവാരം മെച്ചപ്പെടും. മാനസിക സംഘര്‍ഷങ്ങള്‍ വര്‍ധിക്കുന്നതിനു പിന്നിലെ പ്രധാനകാരണങ്ങളിലൊന്ന് മികച്ച ജോലി ലഭിച്ചില്ല എന്നതുതന്നെയാണ്. ആഗ്രഹിക്കുന്ന ജോലികിട്ടിയില്ല എന്നുവെച്ച് ടെന്‍ഷന്‍ അടിക്കരുത്. ചുരുക്കത്തില്‍ നല്ലൊരു ജോലിക്കായി പ്രാര്‍ത്ഥിക്കുകയും പ്രവര്‍ത്തിക്കുകയും അന്വേഷിക്കുകയും ചെയ്യുക .അതോടൊപ്പം ചെയ്യുന്ന ജോലി സന്തോഷത്തോടെ ആത്മാര്‍ത്ഥമായി ചെയ്യുക.

2 മികച്ച ശമ്പളം

നല്ലൊരു ജോലി ഉണ്ടായതുകൊണ്ടു മാത്രം കാര്യമില്ല. മികച്ച ശമ്പളവും ലഭിക്കണം നല്‍കുന്ന അധ്വാനവും സമയവും മികച്ച ശമ്പളമായി തിരികെ ലഭിച്ചാല്‍ മാത്രമെ ജീവിതം സന്തോഷകരവും വിജയകരവുമാകൂ. എന്നാല്‍ ഇത് രണ്ടും കിട്ടിയതുകൊണ്ട് ജീവിതത്തില്‍ വിജയിച്ചുവെന്ന് വരില്ല. നമുക്ക് ബാക്കി മൂന്നുകാര്യങ്ങള്‍ കൂടി നോക്കാം.

3 അനുസരണയുള്ള ഭാര്യ / ഭര്‍ത്താവ്

സൗന്ദര്യമോ പണമോ ഇതൊന്നുമല്ല ദാമ്പത്യത്തില്‍ അത്യാവശ്യം. പരസ്പരം അനുസരിക്കാന്‍ കഴിയുന്നൊരു പങ്കാളിയെ ലഭിക്കണം. ഈ ഘടകം പാളിയാല്‍ ജീവിതത്തില്‍ മറ്റെന്ത് ലഭിച്ചാലും അത് സന്തോഷത്തോടെ അനുഭവിക്കാന്‍ കഴിയില്ല .നല്ല ജോലിയും മികച്ച ശമ്പളവും ലഭിക്കുന്നവര്‍ക്ക് അനുസരണയും സ്‌നേഹവുമുള്ള പങ്കാളിയില്ലെങ്കില്‍ ഒന്നും ഉപകാരപ്പെട്ടില്ല. ഭര്‍ത്താവ് കല്‍പ്പിക്കാനും ഭാര്യ അനുസരിക്കേണ്ടവളുമാണെന്ന സങ്കല്‍പ്പമാണ് വില്ലനാകുന്നത് . പരസ്പരമുള്ള അംഗീകാരമാണ് വേണ്ടത്.

4 നല്ലൊരു വിട്

സ്വന്തമായൊരു വീട് ഒരു സ്വപ്നം മാത്രമാകാതെ യാഥാര്‍ത്ഥ്യമാകുമ്പോഴാണ് ജീവിതത്തിന് ഒരു താളം ലഭിക്കുക. വലുപ്പത്തിലും ചെറുപ്പത്തിലുമല്ല അതിന്റെ ഉള്ളടക്കത്തിലാണ് കാര്യം. മനോഹരമായൊരു വീട് .അതു നമ്മുടെ ജീവിതത്തില്‍ സന്തോഷവും വിജയവും നല്‍കും. കഴിവിനുമപ്പുറത്തേക്ക് ലോണ്‍ എടുത്ത് വലിയ വീടും പണിത് അതില്‍ ടെന്‍ഷനടിച്ച് ഉറങ്ങാന്‍ കഴിയാത്തവര്‍ ജീവിതം നശിപ്പിച്ചവരല്ലാതെ മറ്റാരാണ് ?വീട് മനോഹരമാണെങ്കില്‍ പങ്കാളി നന്നാകണം.

5 നല്ലൊരു വാഹനം

നിത്യജീവിതത്തില്‍ ഓരോരുത്തരുടെയും കഴിവിനും നിലവാരത്തിനുമനുസരിച്ച് നല്ലൊരു വാഹനം സ്വന്തമായി ഉണ്ടാവണം. അതില്‍ ഒരു പാട് നന്മയും സന്തോഷവുമുണ്ട്.

നിങ്ങള്‍ക്ക് ഈ അഞ്ചുകാര്യങ്ങളും ഏറ്റവും മികച്ച രീതിയില്‍ ഇനിയും ലഭിച്ചിട്ടില്ലങ്കില്‍ അതിനായി പ്രാര്‍ത്ഥിക്കുകയും പ്രവര്‍ത്തിക്കുകയും ചെയ്യുക. ഒരിക്കലും തനിക്ക് ഇതു മുഴുവനായി ലഭിക്കില്ലെന്ന് വിശ്വസിക്കുന്നവരുണ്ടാകും. അവര്‍ നിരാശരാകേണ്ട .ലഭിച്ചതില്‍ സംതൃപ്തി തോന്നിത്തുടങ്ങിയാല്‍ ജീവിതം സന്തോഷമാകും. ഒരു ശരാശരി മനുഷ്യന് സന്തോഷത്തോടെ ജീവിക്കാനാവശ്യമായ ഏറ്റവും പ്രധാനപ്പെട്ട 5 കാര്യങ്ങളാണിത്. ഇതില്‍ പങ്കാളി ഹൃദ്യമല്ലെങ്കില്‍ മറ്റു ഘടകങ്ങള്‍ പൂര്‍ത്തിയാകുന്നതില്‍ പ്രയോജനമില്ല. ഓരോന്നും മറ്റൊന്നിനെ ആശ്രയിച്ചാണ് നിലനില്‍ക്കുന്നത്. നല്ല ജോലിയും മികച്ച ശമ്പളവും വിലകൂടിയ വാഹനവും മനോഹരമായൊരു വീടും ഉള്ളൊരാള്‍ പങ്കാളിയില്‍ പൊരുത്തപ്പെടുന്നില്ലെങ്കില്‍ നിത്യ ദു:ഖത്തിലും മനോ സംഘര്‍ഷത്തിലുമായിരിക്കും. ജീവിതം സംതൃപ്തിയായാല്‍ സന്തോഷവും അസംതൃപ്തിയില്‍ ദുഃഖവുമാണ് ഉണ്ടാവുക.

(മാധ്യമപ്രവര്‍ത്തകനും, അധ്യാപകനും, ഹിപ്പ്‌നോട്ടിക്കല്‍ കൗണ്‍സിലറും, മൈന്റ് കണ്‍സള്‍ട്ടന്റുമാണ് ലേഖകന്‍.9946025819)

ponnani famna wedding  special report
Posted by
03 January

ഭിന്നശേഷിക്കാരായ 200 ഓളം വിദ്യാര്‍ത്ഥികളെ ചേര്‍ത്തുപിടിച്ച് പൊന്നാനിക്കാരി ഫംനയുടെ വിവാഹം

പൊന്നാനി: വിവാഹത്തിന്റെ അപൂര്‍വ്വനിമിഷങ്ങളിലും സമൂഹം ഒപ്പം നിര്‍ത്താന്‍ മടിക്കുന്ന ഭിന്നശേഷിക്കാരായ വിദ്യാര്‍ത്ഥികളെ ചേര്‍ത്തിരുത്തി അനുഗ്രഹം വാങ്ങിയാണ് പൊന്നാനിക്കാരായ ഫംന നിക്കാഹ് ചെയ്തത്. ഈ പെണ്‍കുട്ടി വാക്കുകളിലൂടെയല്ല പ്രവര്‍ത്തികളിലൂടെയാണ് തിരസ്‌കരിക്കപ്പെട്ടവര്‍ക്കൊപ്പം ചേര്‍ന്നുനിന്നത്.

പൊന്നാനിയിലെ സാമൂഹ്യ സാംസ്‌കാരിക സംഘടനയായ ‘കര്‍മ്മ’ യുടെ പ്രസിഡന്റ് ജാവ അഷറഫിന്റെ മകളാണ് ഫംന. കഴിഞ്ഞ ദിവസം അക്ബര്‍ ഓഡിറ്റോറിയത്തില്‍ വെച്ച് നടന്ന വിവാഹചടങ്ങിലാണ് ഭിന്നശേഷിക്കാരായ 200 ഓളം വിദ്യാര്‍ത്ഥികളെയും അവരുടെ രക്ഷിതാക്കളെയും ഒപ്പം ചേര്‍ത്തുനിര്‍ത്തി നല്ല മാതൃകയുടെ പുതിയ കുപ്പായം തുന്നിയത്. ഓരോ കുട്ടികളെയും രക്ഷിതാക്കളെയും നേരിട്ട് ക്ഷണിക്കുകയായിരുന്നു ഫംന. പിതാവ് അഷറഫും എല്ലാ പിന്തുണയും നല്‍കിയിരുന്നു. പൊന്നാനി സ്‌കോളര്‍ കോളേജില്‍ നിന്നും ഡിഗ്രി പഠനം പൂര്‍ത്തിയാക്കിയ ഫംന കോളേജ് യൂണിയനിലും സോഷ്യല്‍ ഫോറത്തിലും സജീവമായിരുന്നു.

ഭിന്നശേഷിക്കാരായതിനാല്‍ പൊതുചടങ്ങുകളില്‍ നിന്ന് മാറ്റിനിര്‍ത്തപ്പെടുന്ന ഇത്തരം കുട്ടികളെയും രക്ഷിതാക്കളെയും ഒപ്പം നിര്‍ത്തിയത് അവര്‍ ദൈവത്തിന്റെ മാലാഖപോല്‍ നിഷ്‌കളങ്കരായതുകൊണ്ടാണെന്ന് ഫംന പറയുന്നു. പൊന്നാനി യു ആര്‍ സി ക്ക് കീഴിലെ 200 ഓളം ഭിന്നശേഷിക്കാരായ കുട്ടികളും വധുവരന്മാര്‍ക്ക് ആശംസകളും ഉപഹാരങ്ങളും നല്‍കിയാണ് യാത്ര പറഞ്ഞത്.

കുട്ടികളെ മധുരം നല്‍കി സ്വീകരിക്കാന്‍ നഗരസഭാ ചെയര്‍മാന്‍ മുഹമ്മദ് കുഞ്ഞിയും മുന്നിലുണ്ടായിരുന്നു. വധുവിനും വരനും ഒപ്പം നില്‍ക്കാന്‍ ദിവസക്കൂലിക്ക് സുന്ദരികളെയും സുന്ദരന്മാരെയും ഇവന്റ് മാനേജ്‌മെന്റ് വഴി ഇറക്കുന്ന പുതുപുത്തന്‍ കാലത്താണ് നന്മയുടെ നല്ല മാതൃകയായി ഫംന മാതൃകയായത്. ഇതാണ് വിവാഹം സ്വര്‍ഗത്തില്‍ വെച്ച് നടക്കുമെന്ന് പറയുന്നത് . ഇതാണ് ഭൂമിയിലെ സ്വര്‍ഗം.

(ഫഖ്‌റുദ്ധീന്‍ പന്താവൂര്‍)

history of nose studd
Posted by
01 January

ചരിത്രത്തിന് ഒരു മൂക്കുത്തി

സ്ത്രീകള്‍ മൂക്കില്‍ അണിയുന്ന ഒരു ആഭരണമാണ് മൂക്കുത്തി സാധാരണയായി ലോഹത്തിലോ കൊമ്പിലോ പണിയുന്ന ഈ ആഭരണം പുരാതനകാലം മുതലേ ഒരു സ്ത്രീകളുടെ ഒരു പ്രധാന ആഭരണമാണ് ഇന്ത്യ, പാകിസ്താന്‍, നേപ്പാള്‍ തുടങ്ങിയ ഏഷ്യന്‍ രാജ്യങ്ങളിലും ആസ്‌ട്രേലിയയിലെ പ്രാക്തന വിഭാഗക്കാരിലും ചില ആഫ്രിക്കന്‍ രാജ്യങ്ങളിലും സ്ത്രീകള്‍ പരമ്പരാഗതമായ രീതിയില്‍ മൂക്ക് കുത്തി വിവിധ തരം ആഭരണങ്ങള്‍ അണിയുന്നു. പാരമ്പര്യമല്ലാതെ ഫാഷനും മറ്റുമായി ലോകത്തിന്റെ മറ്റു ഭാഗങ്ങളിലും മൂക്കുത്തികള്‍ ഉപയോഗിക്കുന്നുണ്ട്. ചെറിയ ശതമാനം പുരുഷന്മാരും മൂക്കൂത്തി അണിയുന്നതായി കാണുന്നു. മൂക്കിന്റെ പാലത്തിനു ചുവടെ രണ്ടും നാസാദ്വാരങ്ങളിലും തൂങ്ങി നില്‍കുന്ന രീതിയിലും മൂക്കുത്തിയുണ്ട്. ഭാരതത്തിലെ ചില നൃത്തരൂപങ്ങളിലും ചില പ്രാക്തന സംസ്‌കാരങ്ങളിലും ഇത്തരം മൂക്കുത്തി ഉപയോഗിച്ചിരുന്നു. ഫുലാനി വംശജരാണ് ഇത് കൂടുതലും ഉപയോഗിക്കുന്നത് .4000 വര്‍ഷങ്ങള്‍ക്ക് മുന്‍പുള്ള രേഖകളില്‍ മധ്യേഷ്യയിലാണ് ഈ സമ്പ്രദായം തുടങ്ങിയതെന്നും പിന്നീട് 1500 വര്‍ഷങ്ങളോടെ ഇന്ത്യന്‍ ഉപഭൂഖണ്ഡപ്രദേശത്തേക്ക് ജനങ്ങള്‍ കുടിയേറിയതോടെ മൂക്കുത്തി ഇന്ത്യയിലും പൂര്‍വേഷ്യയിലും വ്യാപിച്ചു എന്നു കാണുന്നു.

പാരമ്പര്യമായി പ്രസവം എളുപ്പമാക്കാനായി മൂക്കിന്റെ ഇടത്തുവശത്തായിട്ടാണ് മൂക്കുത്തി അണിയുന്നത് എന്ന് പറയപ്പെടുന്നു. സ്ത്രീത്വത്തിന്റെ പ്രതീകമായിട്ടാണ് മൂക്കിന്റെ ഇടതുവശത്തെ ആയുര്‍വേദഗ്രന്ഥങ്ങളിലും പരാമര്‍ശിച്ചുകാണുന്നത്. സുശ്രുതന്‍ രചിച്ച ആയുര്‍വേദ ഗ്രന്ഥമായ സുശ്രുത സംഹിതയില്‍ Chikitsa Sthana Chapter 19 ല്‍ മൂക്കുകുത്തിയെകുറിച്ച് പരാമര്‍ശമുണ്ട് . ദ്രാവിഡ സംസ്‌കാരത്തില്‍ ഭൂമീദേവിയുടെ പ്രതീകമായ പാര്‍വതിയോടുള്ള ആദരവായും മൂക്കുത്തിയെ കണക്കാക്കുന്നു. ദക്ഷിണേഷ്യന്‍ വിവാഹവേളകളില്‍ നവവധു ‘Koka’ എന്നു പേരുള്ള ആഭരണം ധരിക്കാറുണ്ട്, മൂക്കുത്തിയും അതില്‍ നിന്നു തുടങ്ങി തലയുടെ ഒരു വശത്തേയ്ക്ക് (ചെവിയുടെ പിറകിലേക്ക്) നീളുന്ന ഒരു ചെയിനും ഉള്‍പ്പെടുന്നതാണിത്. മരണാനന്തരക്രിയക്കുള്ള ചിലവിനായി മൂക്കുത്തി ധരിക്കുന്നു എന്ന പാരമ്പര്യവും ദക്ഷിണേന്ത്യയില്‍ നില നില്‍കുന്നുണ്ട്.

9, 10 നൂറ്റാണ്ടുകളില്‍ സ്ത്രീകളുടെ വൈവാഹിക ചിഹ്നമായിരുന്നു മൂക്കുത്തി. ഇതിനെ പല ഇന്ത്യന്‍ ഭാഷകളിലും ‘നഥ്’ എന്നറിയപ്പെടുന്നു. സാമ്പത്തിക സ്ഥിതി സൂചിപ്പിക്കുന്നതിനും ഈ മൂക്കുത്തികള്‍ ധരിച്ചിരുന്നു. രാജ്ഞികള്‍, മന്ത്രി പത്‌നിമാര്‍, ധനികരായ സ്ത്രീകള്‍, ഇവര്‍ മുത്തുകള്‍, പവിഴങ്ങള്‍, രത്‌നകല്ലുകള്‍ എന്നിവ പതിച്ച മൂക്കുത്തികള്ളുപയോഗിച്ചു. എന്നാല്‍ മറ്റുള്ളര്‍ വെള്ളികൊണ്ടുണ്ടാക്കിയ മൂക്കുത്തിയായിരുന്നു ഉപയോഗിച്ചിരുന്നത്. 15 ാം നൂറ്റാണ്ടോടു കൂടി ജനപ്രിയമായ ഈ ആഭരണം 1718 നൂറ്റാണ്ടോടുകൂടി കരയാമ്പൂ, ആണി, മുള്ള് എന്നിവ ഉപയോഗിച്ച് പല വൈവിധ്യമാര്‍ന്ന തരത്തില്‍ ഉപയോഗിച്ചു തുടങ്ങി. ഇന്നത്തെ രീതിയിലുള്ള മൂക്കുത്തികള്‍ 20 ാം നൂറ്റാണ്ടോടു കൂടെയാണ് രൂപപ്പെട്ടത്.

പഹാരികളും പഷ്തൂണ്‍ വംശജരും മൂക്കിനിരുവശത്തും മൂക്കുത്തി ധരിക്കുന്നു. ദക്ഷിണേന്ത്യയിലെ തമിഴ് വംശജരും ഇത്തരത്തില്‍ ഇരു വശത്തും മൂക്കുത്തി ധരിക്കുന്ന ശീലക്കാരാണ്. മരണശേഷം ഉദകക്രിയകള്‍ക്ക് വേണ്ടി വരുന്ന ചെലവ് മൂക്കുത്തിയില്‍ നിന്ന് ഇടാക്കാം എന്ന സാമ്പത്തികവശവും മൂക്കുത്തി ധരിക്കുന്നതിനു പിറകില്‍ ഉണ്ടെന്ന് കരുതുന്നു. മറ്റ് ഏത് ആഭരണങ്ങളെയും പോലെ മൂക്കുത്തി എളുപ്പം ഊരി മാറ്റാനാവില്ല എന്നതാണിതിനു പിന്നിലെ ആശയം. ദക്ഷിണേന്ത്യ, രാജസ്ഥാന്‍, പഞ്ചാബ് എന്നിവിടങ്ങളില്‍ മൂക്കിന്റെ ഇരുവശങ്ങളിലും മൂക്കുത്തി ധരിക്കുന്ന ‘ നത്തോരി (nathori)’ എന്ന രീതി കണ്ടുവരുന്നു. മഹാരാഷ്ട്രയിലെ സ്ത്രീകള്‍ മുഖത്തിന്റെ ഒരു വശം മുഴുവന്‍ മറയ്ക്കുന്ന തരത്തിലുള്ള വലിയ നത്തോരികള്‍ ഉപയോഗിച്ചു വരുന്നു. ബംഗാളിസ്ത്രീകള്‍ വിവാഹിതരാണെന്ന് അറിയിക്കാനുള്ള അടയാളമായി മുക്കുത്തി ധരിക്കുന്നു. ഇന്ത്യയിലെ ചില ആദിവാസി ഗോത്രവര്‍ഗ്ഗക്കാരിലെ സ്ത്രീകള്‍ ചെവിയിലും മൂക്കിലുമായി നിരവധി ആഭരണങ്ങള്‍ അണിയുന്നവരാണ്.തമിഴ്‌നാട്ടില്‍ വളരെ പ്രശസ്തമായ, എട്ടു കല്ലുള്ള ത്രികോണാകൃതിയുള്ള മൂക്കുത്തിയാണ് ‘ബേസരി’. രാജസ്ഥാനി സ്ത്രീകള്‍ ‘മാധുരി’, ‘ലാത്കന്‍’, ‘ലാവൂങ് ‘ തുടങ്ങിയ പേരുകളിലുള്ള മൂക്കുത്തികള്‍ ധരിക്കുന്നു.പഞ്ചാബികള്‍ ധരിക്കുന്ന മൂക്കുത്തി ‘ശികാര്‍ പുരിനാദ് ‘ എന്നറിയപ്പെടുന്നു. ബീഹാറില്‍ ‘ചുച്ചീ’ എന്നറിയുന്ന മൂക്കുത്തികളാണ് ധരിക്കുന്നത്. മഹാരാഷ്ട്രയിലെ മൂക്കുത്തിക്ക് ‘ഗുച്ചേദാര്‍ നാദ് ‘ എന്നാണ്

കേരളത്തില്‍ ഒരു കാലഘട്ടത്തില്‍ താഴ്ന്ന ജാതിയില്‍ പെട്ട സ്ത്രീകള്‍ക്ക് മൂക്കു കുത്തുവാന്‍ അവകാശം ഉണ്ടായിരുന്നില്ല ഇതിനെതിരെ നടന്ന സമരമാണ് മൂക്കുത്തി ലഹള എന്നും മൂക്കുത്തി സമരം എന്നും മൂക്കുത്തിവഴക്ക് എന്നുമെല്ലാം അറിയ പെടുന്നത് . വര്‍ഷങ്ങള്‍ക്കു മുന്‍പ് പന്തളത്താണു സംഭവം.വിലക്ക് വകവയ്ക്കാതെ ഒരു യുവതി പന്തളം ചന്തയില!്! മൂക്കുത്തിയിട്ടു നടന്നു. ഇത് കണ്ട് ഇരിക്കപ്പൊറുതി കെട്ട ഉയര്‍ന്ന സമുദായക്കാരായ ചിലര്‍ അവരുടെ മൂക്കുത്തി വലിച്ചു പറിച്ച് ദൂരെയെറിഞ്ഞു. അവരെ ഉപദ്രവിവിക്കുകയും ചെയ്തു. ഇതു കേട്ടറിഞ്ഞ ആറാട്ടുപുഴ വേലായുധപ്പണിക്കര്‍ എന്ന ധീരന്‍ പന്തളം ചന്തയിലെ സകല സ്ത്രീകള്‍ക്കും സ്വര്‍ണമൂക്കുത്തിയുണ്ടാക്കി കൊടുത്തു. അതിട്ടു നടക്കാനും പറഞ്ഞു. ഇവരെ ആരും അപമാനിക്കാതിരിക്കാന്‍ ദിവസങ്ങളോളം പണിക്കര്‍ പന്തളത്തു തങ്ങി. കുതിരപ്പുറത്ത് ആയുധങ്ങളുമേന്തി റോന്തുചുറ്റുന്ന പണിക്കരുടെ മുന്നിലൂടെ നാട്ടിലെ പെണ്ണുങ്ങളെല്ലാം സ്വര്‍ണ്ണ മൂക്കുത്തിയിട്ടു സുന്ദരികളായി നടന്നു. പിന്നീടു നാട്ടിലൊരിടത്തും ഒരു പെണ്ണും മൂക്കു മുറിഞ്ഞു ചോരയൊലിപ്പിച്ചില്ല. ഒരു ലഹള തന്നെ ഉണ്ടാക്കി അവകാശം നേടിയെടുത്തതാണ് ഇന്ന് കേരളത്തിലെ മൂക്കുത്തി .

പരശുരാമന്‍ പ്രതിഷ്ഠിച്ചെന്നു പറയപ്പെടുന്ന കന്യാകുമാരി ദേവീ വിഗ്രഹത്തില്‍ മാണിക്യത്തില്‍ തീര്‍ത്തൊരു മൂക്കുത്തിയുണ്ട്. മൂക്കുത്തിയുടെ തിളക്കം ദൂരെ നിന്നുവരെ കാണാം. മൂക്കുത്തിയുടെ തിളക്കം കണ്ട് ദീപസ്തംഭത്ഭത്തില്‍ നിന്നുള്ള പ്രകാശമാണെന്നു തെറ്റിദ്ധരിച്ച് പണ്ട് കപ്പലുകള്‍ അടുപ്പിക്കാന്‍ ശ്രമിക്കുമായിരുന്നത്രെ. പക്ഷേ, അവയില്‍ പലതും കരയോടു ചേര്‍ന്നുള്ള പാറകളിലിടിച്ചു തകര്‍ന്നു. അങ്ങനെയാണ് കോവിലിന്റെ കിഴക്കേ കവാടം അടച്ചിടാന്‍ തീരുമാനിച്ചത്. ഇപ്പോള്‍ വിശേഷദിവസങ്ങളില്‍ പ്രത്യേക സ്‌നാനത്തിനു വേണ്ടി മാത്രമാണ് കിഴക്കേ കവാടം തുറക്കുക.

ചിലര്‍ മൂക്കുത്തിയെ ഭംഗിയായി കാണുമ്പോള്‍ ഒരു വിഭാഗം ആളുകള്‍ ഇതിനെ താഴ്ന്ന നിലയില്‍ കാണുന്നവരും ഉണ്ട് . ഓരോ വിഭാഗങ്ങളിലും ഓരോ അര്‍ഥങ്ങളാണ് മൂക്കുത്തിക്കുള്ളത് . ഉത്തര ഇന്ത്യയിലെ ചില വിഭാഗങ്ങളില്‍ കല്യാണ ശേഷം അണിയുന്ന സിന്ദൂരം പോലെയാണ് മൂക്കുത്തിയും . മൂക്കുത്തിയും ആയി ബന്ധപെട്ടു രസകരമായ അനേകം കഥകളുണ്ട് .

An Extraordinary life of CP Shihab
Posted by
29 December

കൈകളില്ല കാലുകളില്ല; പക്ഷെ ജീവിതം കൊണ്ട് വിജയകഥകള്‍ രചിക്കുന്ന ശിഹാബ്

ഫഖ്‌റുദ്ധീന്‍ പന്താവൂര്‍

പൊന്നാനി: ഇത് സിപി ശിഹാബ്. ആത്മവിശ്വാസത്തിന്റെ ക്യാന്‍വാസില്‍ പുതിയ ജീവിതം വരച്ചുചേര്‍ത്ത മലപ്പുറം പൂക്കോട്ടൂര്‍ സ്വദേശിയായ സിപി ശിഹാബ്. കൈകളില്ല ,കാലുകളില്ല പക്ഷെ ജീവിതം കൊണ്ട് വിജയകഥ വരച്ചുചേര്‍ത്ത ശിഹാബ് ഇന്ന് സാധാരണ ആളുകള്‍ പോലും ജീവിക്കാന്‍ കഷ്ടപ്പെടുന്ന ഈ ലോകത്ത് അവര്‍ പോലും പരാതിപറയുന്ന ഈ ലോകത്ത് ഒരു വിസ്മയമാണ്.

പ്രകൃതി ഓരോ മനുഷ്യനിലും വലിയ കഴിവുകളാണ് നിക്ഷേപിച്ചിരിക്കുന്നതെന്ന് ശിഹാബിന്റെ ജീവിതം നമുക്ക് കാണിച്ചു തരുന്നു.25 ശതമാനം മാത്രം ശേഷിയുള്ള കൈകളോ കാലോ ഇല്ലാത്ത ഈ വ്യക്തി അത്ഭുതകരമായി ക്രിക്കറ്റ് കളിക്കും. മനോഹരമായി ചിത്രങ്ങള്‍ വരക്കും. വയലിന്‍ വായിക്കും. പിയാനോ വായിക്കും. ത്രസിപ്പിക്കുന്ന നൃത്തം ചെയ്യും .

നിരവധി ചാനല്‍ ഷോകളില്‍ ശിഹാബ് ഇതിനകം മികച്ച ഡാന്‍സറായി തെരഞ്ഞെടുക്കപ്പെട്ടിട്ടുണ്ട്. ഒന്ന് നേരില്‍ കാണാന്‍ പോലും കഴിയില്ലെന്ന് വിശ്വസിച്ചിരുന്ന സാക്ഷാല്‍ മമ്മൂട്ടി ഒരിക്കല്‍ നെഞ്ചോട് ചേര്‍ത്തുപിടിച്ച് കാതിലോതിയത് ശിഹാബ് ഇന്നും ഓര്‍ക്കുന്നു ‘ഈ ജീവിതം വിജയിക്കാന്‍ മാത്രമുള്ളതാണ്’.

ഒരിക്കലും നിരാശയില്ലാതെ ശുഭകരമായ ചിന്തകള്‍ മാത്രം ചേര്‍ത്തുവെച്ച് അത് സ്വന്തം ജീവിതത്തിന്റെ അനുഭവമാക്കിയത് ലോകത്തിന് സമര്‍പ്പിക്കുകയാണ് ശിഹാബ്.പ്രചോദനാത്മകമായ നിരവധി ക്ലാസുകളാണ് ശിഹാബ് നല്‍കുന്നത്.

നിക്കിനെപോലെ…

ഒരു പക്ഷെ ഇന്ത്യയില്‍ അല്ലായിരുന്നുവെങ്കില്‍ ശിഹാബ് ഓസ്‌ടേലിയക്കാരനായ നിക്കിനെപോലെ ലോകം മുഴുക്കെ അറിയുന്നൊരു മോട്ടിവേഷന്‍ സ്പീക്കറായാനേ ..

ശിഹാബിന്റെ ജനനത്തോടെ ആ കുഞ്ഞു കരച്ചfലിനേക്കാള്‍ ഉച്ചത്തില്‍ നിലവിളിച്ചത് അവന്റെ മാതാപിതാക്കളായിരുന്നു. കൈകളില്ലാത്ത കാലില്ലാത്ത ഒരു പൊട്ട് കുഞ്ഞ്… ആറാം വയസ്സില്‍ പതിയെ നടക്കാന്‍ തുടങ്ങിയപ്പോള്‍ ഉമ്മ പറഞ്ഞു ‘മോനേ കാലുകളില്ലാത്ത നീ ഈ ലോകത്തിന് മുന്നില്‍ നടന്നു കാണിക്കുന്നതാണ് എന്നെ ഏറ്റവും അധികം സന്തോഷിപ്പിക്കുക ‘ ഉമ്മയുടെ ഈ വാക്കുകള്‍ ആ കുഞ്ഞുമനസ്സില്‍ സ്വപനങ്ങളുടെ കൊട്ടാരങ്ങള്‍ പണിതു .ആത്മവിശ്വാസം കൊണ്ട് ജീവിതത്തെ മാറ്റിമറിച്ചു .എട്ടാം ക്ലാസ് മുതലാണ് പഠിച്ചുതുടങ്ങിയത്. പത്താം ക്ലാസില്‍ 96 ശതമാനം മാര്‍ക്ക് നേടി വിജയകഥ രചിക്കാന്‍ തുടങ്ങി.രണ്ടുമാസത്തിനപ്പുറത്തേക്ക് ആയുസ്സില്ലെന്ന് ജനിച്ചപ്പോള്‍ വിധിയെഴുതിയ ഡോക്ടര്‍മാരെ മന:ശ്ശക്തിക്കൊണ്ട് ജീവിച്ച് തോല്‍പ്പിച്ച് വിസ്മയമാവുകയാണ് ശിഹാബ് ഇന്ന്.

ഒരാളുടെ ഭാവി നിശ്ചയിക്കുന്നത് അയാളുടെ മനോഭാവവും സ്വപ്നങ്ങള്‍ സാക്ഷാത്കരിക്കാനുള്ള ഇച്ചാശക്തിയുമാണ് .അതാണ് ശിഹാബിന്റെ വിജയം .നമുക്ക് കൈകളുണ്ട് ,കാലുകളുണ്ട് .എന്നിട്ടും നമുക്കുള്ളത് പരാതികളും പരിഭവങ്ങളും മാത്രം .സ്വന്തം പശ്ചാത്തലത്തിനുമപ്പുറം, ഇല്ലായ്മകള്‍ക്കുമപ്പുറം സ്വന്തം ജീവിതം കൊണ്ട് മറ്റുള്ളവര്‍ക്ക് സുഗന്ധം പരത്താന്‍ ശിഹാബിന് കഴിയുന്നു .മന:ശക്തികൊണ്ട് എന്തും നേടാം എന്ന വിജയമന്ത്രമാണ് ശിഹാബിന്റെ ജിവിതം.

നടക്കാന്‍ പ്രയാസമുണ്ടായിരുന്ന വ്യക്തിയാണ് പിന്നീട് പ്രശസ്ത എഴുത്തുകാരനായി മാറിയ ചാള്‍സ് ഡിക്കന്‍സ് , അന്ധയും മൂകയും ബധിരയുമായിരുന്നു പിന്നീട് ലോകപ്രശസ്ത സാമൂഹിക പ്രവര്‍ത്തകയും എഴുത്തുകാരിയുമായി തീര്‍ന്ന ഹെലന്‍ കെല്ലര്‍, കൂനുമായി ജീവിച്ചയാളാണ് ചിത്തനായ പ്ലേറ്റോ, ബാല്യത്തില്‍ പോളിയോ ബാധിച്ച് കാലുകള്‍ തളര്‍ന്ന വ്യക്തിയായിരുന്നു പിന്നീട് അമേരിക്കന്‍ പ്രസിഡന്റായിത്തീര്‍ന്ന ഫ്രാങ്ക്‌ലിന്‍ റൂസ് വെല്‍റ്റ്,പോളിയോ ബാധിച്ച് നടക്കാന്‍ പോലും കഴിയാത്ത പെണ്‍കുട്ടിയാണ് പിന്നിട് ലോകത്തെ മികച്ച ഓട്ടക്കാരിയായി മാറിയ വില്‍മ റുഡോള്‍ഫ്. അക്കൂട്ടത്തിലിതാ കൈകളോ കാലുകളോ ഇല്ലാത്ത ഇപ്പോള്‍ ജീവിതം കൊണ്ട് വിജയകഥകള്‍ രചിക്കുന്ന മലപ്പുറത്തുകാരന്‍ സിപി ശിഹാബ്. ഈ പുതുവത്സരത്തിന് പരിചയപ്പെടാന്‍ ഈ മിടുക്കനേക്കാള്‍ വലിയ ഏതു വ്യക്തിയാണുള്ളത് ?

ജീവിതത്തിലെ ഇല്ലായ്മകളില്‍ പരിഭവിക്കാതെ അതിനെതിരെ പോരാടാന്‍ കഴിയണം. ശിഹാബിന്റെ ജിവിതം നമുക്കതാണ് പഠിപ്പിച്ച് തരുന്നത്. എല്ലാം ലഭിച്ചിട്ടും ചെറിയ പരാജയങ്ങളില്‍ പരിഭവിക്കുന്നവര്‍ ഒരു നിമിഷം ശിഹാബിന്റെ ജീവിതത്തിലേക്ക് നോക്കുക. ഏതുസാഹചര്യത്തിലാണെങ്കിലും ജീവിതം തോറ്റുകൊടുക്കാനുള്ളതല്ല.

( മാധ്യമപ്രവര്‍ത്തകനും, അധ്യാപകനും, ഹിപ്പ്‌നോട്ടിക്കല്‍ കൗണ്‍സിലറും, മൈന്റ് കണ്‍സള്‍ട്ടന്റുമാണ് ലേഖകന്‍.
9946025819 )

obeyable love will determines the successful life
Posted by
28 December

സ്‌നേഹം നല്‍കുന്ന അനുസരണയാണ് ജീവിത വിജയം

ഫഖ്‌റുദ്ധീന്‍ പന്താവൂര്‍

അനുസരണയില്ലാത്ത മക്കളെക്കുറിച്ച് പരാതിപറയാനെ രക്ഷിതാക്കള്‍ക്ക് നേരമുള്ളൂ.. ഭാര്യ ഒന്നും അനുസരിക്കില്ലെന്നാണ് ഭര്‍ത്താവിന്റെ പരാതി. തിരിച്ചുമുണ്ടാകും ഇതേ പരാതി. ആര്‍ക്കും ആരോടും സ്‌നേഹമില്ലെന്നൊരു തോന്നല്‍. അനുസരിപ്പിക്കാന്‍ ഭീഷണിയുടെയും പ്രലോഭനങ്ങളുടെയും മാര്‍ഗം സ്വീകരിക്കുന്നവര്‍. ഇതൊക്കെയാണ് നമ്മുടെ ചുറ്റുമുള്ള നിത്യ കാഴ്ച. അനുസരണയുടെ പുതിയൊരു വിജയമന്ത്രം ഈ പുതുവര്‍ഷത്തില്‍ നമുക്ക് ഒന്നിച്ച് പ്രാവര്‍ത്തികമാക്കാം.

അനുസരണയാണ് ജീവിതത്തിന്റെ വിജയമന്ത്രം. പരസ്പരം അനുസരിക്കുക എന്നത് ശ്രമകരമായൊരു കാര്യമൊന്നുമല്ല. എന്നാല്‍ ചിലര്‍ക്ക് ചിലരെ അനുസരിക്കുന്നത് ഒട്ടും കഴിയാത്തതാണ്. ഭാര്യയും, ഭര്‍ത്താവും,മക്കളും, കുടുംബവും, ജോലിസ്ഥലത്തും അനുസരണയില്ലെങ്കില്‍ സന്തോഷത്തോടെയുള്ള ജീവിതവിജയം അസാധ്യമാകും.

അനുസരണ ഭയപ്പെടുത്തി ഉണ്ടാക്കേണ്ടതല്ല. അങ്ങനെ ചെയ്യാന്‍ ശ്രമിക്കുന്നതാണ് സ്‌നേഹമില്ലായ്മക്ക് കാരണമാകുന്നത്. കുടുംബത്തിലാണെങ്കിലും ജോലിസ്ഥലത്താണെങ്കിലും, മതങ്ങളിലാണെങ്കിലും ഭയപ്പെടുത്തി അനുസരിപ്പിക്കാനാണ് ശ്രമിക്കുന്നത്. ഫലമോ ആത്മാര്‍ത്ഥമായ സ്‌നേഹം ഇവിടെ ഉണ്ടാകില്ല. എന്നാല്‍ ചിലതെല്ലാം ‘മോഹിച്ച്’അനുസരിക്കുന്നവരുണ്ട്. അതില്‍ ആത്മാര്‍ത്ഥതയില്ല എന്നതാണ് സത്യം.

സ്വര്‍ഗത്തെ മോഹിപ്പിച്ച് ദൈവത്തെ അനുസരിപ്പിക്കുന്ന മതരീതികളില്‍ സൂഫികള്‍ വിശ്വസിക്കാത്തതും ഇക്കാരണത്താലാണ്. ഭയപ്പെടുത്തിയും അനുസരിപ്പിക്കും. നരകത്തെ പേടിച്ച് അനുസരിപ്പിക്കുന്ന മതരീതികളില്‍ നിന്ന് സൂഫികള്‍ അകലം പ്രാപിക്കുന്നതും അനുസരണയുടെ ആത്മാവ് സ്‌നേഹമാണെന്ന തിരിച്ചറിവിനാലാണ്. നിത്യജീവിതത്തിലും നമ്മള്‍ പലപ്പോഴും പലരെയും അനുസരിക്കുന്നതും ഭയം കൊണ്ടോ അല്ലെങ്കില്‍ മറ്റെന്തെങ്കിലും നേട്ടം മോഹിച്ചോ ആയിരിക്കും. നേട്ടങ്ങള്‍ ഇല്ലെന്ന് ബോധ്യമാകുന്നതോടെ അനുസരണയും ഇല്ലാതാകുന്നു. അപ്പോള്‍ നാമതിനെ സ്‌നേഹമില്ലെന്ന് പരിഭവിക്കുന്നു. യഥാര്‍ത്ഥത്തില്‍ സ്‌നേഹമെന്നാല്‍ അനുസരണയാണ്. അനുസരണ ജനിക്കേണ്ടത് ഭയത്തില്‍ നിന്നോ മോഹങ്ങളില്‍ നിന്നോ അല്ല കലര്‍പ്പില്ലാത്ത സ്‌നേഹത്തില്‍ നിന്നായിരിക്കണം.

അങ്ങനെയാകുമ്പോള്‍ ഭാര്യ ഭര്‍ത്താവിനെ അനുസരിക്കുന്നു, ഭര്‍ത്താവ് ഭാര്യയെ അനുസരിക്കുന്നു, മക്കള്‍ രക്ഷിതാക്കളെ അനുസരിക്കുന്നു. ജീവിതത്തില്‍ മറ്റുള്ളവരെ അനുസരിപ്പിക്കാന്‍ ശ്രമിക്കുന്നതിന് മുമ്പ് സ്‌നേഹിക്കാന്‍ തയാറാകണം. സ്‌നേഹം അനുസരണയെ സൃഷ്ടിക്കും.

ബഗ്ദാദിലെ ഒരു സൂഫി വനിതയായിരുന്ന റാബിയ ഒരിക്കല്‍ പറഞ്ഞു, ‘മോഹിപ്പിക്കുന്ന സ്വര്‍ഗത്തെ കണ്ടല്ല, പേടിപ്പിക്കുന്ന നരകത്തെ ഭയന്നിട്ടുമല്ല ദൈവമേ നിന്നെ ഞാന്‍ അനുസരിക്കുന്നത്. സ്‌നേഹം മാത്രമാകുന്നു എന്റെ അനുസരണയുടെ കാവല്‍ക്കാരന്‍. സ്വര്‍ഗവും നരകവും എന്നെ മോഹിപ്പിക്കുകയോ ഭയപ്പെടുത്തുകയോ ചെയ്യുന്നില്ല. എനിക്ക് നിന്നെ മതി. നിന്നെ മാത്രം’

ജീവിതത്തില്‍ കലര്‍പ്പില്ലാതെ സ്‌നേഹിക്കാന്‍ തയ്യാറാകണം. എങ്കില്‍ അനുസരണയും സത്യസന്ധമാകും. ഏറ്റവും പ്രിയപ്പെട്ടാരാളെ അനുസരിക്കാന്‍.. സ്‌നേഹി തയ്യാറാകുന്നത് ഒന്നും മോഹിച്ചോ ഭയന്നോ അല്ലല്ലോ.. സ്‌നേഹം കൊണ്ട് മാത്രമല്ലേ..

മറ്റുള്ളവരെ അനുസരിപ്പിക്കുന്നത് ഭയപ്പെടുത്തിയോ പ്രലോഭനങ്ങള്‍ നല്‍കിയോ ആകരുത്. നിത്യജീവിതത്തില്‍ ഈ തത്വം പുലര്‍ത്താന്‍ ശ്രമിക്കുക. ഈ കാലഘട്ടത്തിന്റെ സന്ദേശം സ്‌നേഹം മാത്രമാകുന്നു എന്ന സൂഫിവാക്ക് എപ്പോഴും ഓര്‍ക്കുക. ജീവിതത്തില്‍ പകര്‍ത്തുക. ഈ പുതുവര്‍ഷം നമ്മെ പുതിയൊരു മനുഷ്യനാക്കട്ടെ..

ഒരു ജീവിതത്തില്‍ പല ജീവിതങ്ങള്‍ സാധ്യമാണ്. അതുകൊണ്ട് തന്നെ ഓരോ പുതുവര്‍ഷത്തിലും മൊത്തത്തില്‍ ഒന്ന് മാറുന്നത് നല്ലതാണ്..

(മാധ്യമപ്രവര്‍ത്തകനും, അധ്യാപകനും, ഹിപ്‌നോട്ടിക്കല്‍ കൗണ്‍സിലും, മൈന്റ് കണ്‍സള്‍ട്ടന്റുമാണ് ലേഖകന്‍-9946025819)

Usefull tips for lovers and couples for strengthen relationship
Posted by
27 December

പങ്കാളികളുടെ ശ്രദ്ധയ്ക്ക്... തമ്മില്‍ തല്ലാതെ ബന്ധം മുന്നോട്ട് കൊണ്ടുപോകണോ... ചില മാര്‍ഗ്ഗങ്ങള്‍ ഇതാ

ജീവിത്തില്‍ ഒരിക്കല്‍ പോലും പ്രണയിക്കാത്തവരായി ആരും ഉണ്ടാകില്ല. അതില്‍ ചിലരെങ്കിലും അനശ്വര പ്രണയത്തിന്റെ രക്തസാക്ഷികളും സ്മാരകങ്ങളും ആകും. ചിലര്‍ എപ്പോഴും പ്രണയിച്ചുകൊണ്ടേയിരിക്കും. ഇപ്പറയുന്ന പ്രേമമാണെങ്കിലും സ്‌നേഹമാണെങ്കിലും ബന്ധങ്ങള്‍ വിജയിക്കണമെങ്കില്‍ ഇരുവരും തമ്മിലുള്ള കൂട്ടായ പരിശ്രമം വേണമെന്ന കാര്യത്തില്‍ സംശയമില്ല. ഏറെ നാളത്തെ പ്രണയത്തിനൊടുവില്‍ ഒന്നിച്ച് ജീവിച്ച് തുടങ്ങുമ്പോള്‍ യോജിച്ച് പോകുകയെന്നത് വളരെ പ്രധാനപ്പെട്ട കാര്യമാണ്. മനസ്സിലാക്കാനും മനസ്സിലാക്കപ്പെടുവാനും ഇരു കൂട്ടര്‍ക്കും പ്രത്യേകം കഴിവും വേണമെന്നതില്‍ സംശയമില്ല. പ്രണയിക്കുന്നവര്‍ തമ്മില്‍ പരസ്പരം സ്‌നേഹവും ബഹുമാനവും നല്‍കുമ്പോഴാണ് നല്ലരീതിയില്‍ പ്രണയ ബന്ധം മുന്നോട്ട് പോകുകയുള്ളൂ….

തനിക്കെന്ന പോലെ മറ്റെയാള്‍ക്കും സ്വപ്‌നങ്ങള്‍ ഉണ്ടെന്ന് മനസ്സിലാക്കി പെരുമാറുക എന്നത് ഏറെ പ്രധാനപ്പെട്ട കാര്യമാണ്. ഞാന്‍,എന്റെ എന്നീ സ്വാര്‍ത്ഥ വിചാരങ്ങളാണ് പലപ്പോഴും ബന്ധങ്ങളില്‍ വിള്ളലുണ്ടാക്കുന്നത്. അതിനാല്‍ ‘എന്റെ’ എന്നതിന് പകരം നമ്മുടേത് എന്നും അതുപോലെ ‘നിന്റെ’ എന്ന വാക്കിനും ജീവിതത്തില്‍ പ്രാധാന്യം കൊടുക്കുക. പരസ്പരം രണ്ടാളും കരുതല്‍ നല്‍കുന്നുണ്ടെന്നത് ഏറെ പ്രധാനമാണ്. ഇന്ത് ബന്ധത്തിന് കൂടുതല്‍ ദൃഢത നല്‍കും.

സ്വന്തം വീട്ടുകാര്‍ എന്നത് പോലെ കൂടെയുള്ള ആള്‍ക്കും കുടുംബക്കാര്‍ ഉണ്ടെന്നോര്‍ക്കുക. ഒരുമിച്ച് ജീവിക്കുകയാണെങ്കില്‍ രണ്ട് പേരുടേയും കുടുംബത്തെയും അംഗീകരിച്ചു മുന്നോട്ട് പോകാന്‍ കഴിയണമെന്നതിന് ഏറെ പ്രസക്തിയുണ്ട്. ഇഷ്ടമായില്ലെങ്കില്‍ കൂടി പങ്കാളിയുടെ കുടുംബത്തോട് മോശമായി പെരുമാറാതിരിക്കാനുള്ള മാന്യതയുണ്ടാവണം. മിക്ക പ്രേമബന്ധങ്ങളും കുടുംബ ബന്ധങ്ങളും തകരുന്നതിന്റെ ഒരു കാരണം ഈ മാന്യത കൈവിട്ടു പോകുന്നതാണ് എന്നത് മറക്കരുത്. അവന്റെ അല്ലെങ്കില്‍ അവളുടെ കുടുംബത്തെയോ ബന്ധുക്കളെയോ ഒരു കാര്യമില്ലാതെ കളിയാക്കുകയോ പരിഹസിക്കുകയോ ചെയ്യരുത് എന്നത് ഏറെ ശ്രദ്ധിക്കുക.

സുഹൃത്തുക്കളുമായുള്ള ബന്ധത്തിന്റെ പേരില്‍ സ്വരചേര്‍ച്ചകള്‍ ഇണ്ടാകുക സാധാരണമാണ്. കാമുകന്റെ സുഹൃത്തിനെ കാമുകിയ്ക്ക് ഇഷ്ടമില്ലെങ്കില്‍ അതിന്റെ പേരില്‍ പ്രണയബന്ധത്തിനും കുടുംബ ബന്ധത്തിനും വിള്ളല്‍ വീഴുക സാധാരണമാണ്. അതുകൊണ്ട് തന്നെ പങ്കാളിയുടെ സുഹൃത്തുമായി ഒത്തു പോകാന്‍ കഴിയില്ലെങ്കില്‍ ഇഷ്ടമില്ലാത്ത സുഹൃത്ത് ബന്ധങ്ങളില്‍ വലിച്ചിടാന്‍ ശ്രമിക്കാതിരിക്കുക. നിങ്ങളുടെ സുഹൃത്തിനെ എപ്പോഴും സുഹൃത്തായി കാണാനോ സംസാരിക്കാനോ പങ്കാളിക്ക് കഴിയുന്നില്ലെങ്കില്‍ നിര്‍ബന്ധിച്ച് പ്രശ്‌നമുണ്ടാക്കാതിരിക്കുക. അതേപോലെ തന്നെ എല്ലാവര്‍ക്കും ഇഷ്ടങ്ങളും അനിഷ്ടങ്ങളുമുണ്ടെന്ന ഓര്‍മ്മ വേണം.ഒരിക്കലും നിര്‍ബന്ധിച്ച് ഒരു കാര്യത്തിന് പുറപ്പെടരുത്. എത്രത്തോളം സമയം ഒരു ബന്ധത്തിന് നല്‍കണമെന്നത് ഒരാളുടെ വ്യക്തിപരമായ കാര്യമാണ്. അത് എന്റെ എന്നതു പോലെ മറ്റൊരാളുടേതും എന്ന ചിന്തയുണ്ടാവണം.

എല്ലാ ചിലവുകളും ഒരാള്‍ വഹിക്കുകയെന്നത് ഇന്നത്തെ കാലത്ത് ബുദ്ധിമുട്ടുണ്ടാക്കും, അത് കുടുംബ ബന്ധത്തിലാണെങ്കിലും പ്രണയിക്കുന്ന സമയത്താണെങ്കിലും . പക്ഷേ പ്രണയിക്കുന്ന സമയത്ത് ഒരാള്‍ തന്നെ ബില്ലടയ്ക്കുന്ന സ്ഥിതിയാണ് നാം കാണുക. പക്ഷേ ഒരു കാര്യം ശ്രദ്ധിക്കണം പ്രണയിച്ച് നടക്കുന്ന കാലമാണെങ്കില്‍ എപ്പോഴും ഒരാള്‍ തന്നെ ബില്ലടയ്ക്കുന്നത് അത്ര നല്ല രീതിയില്‍ മുന്നോട്ട് പോവില്ല. കൊടുക്കല്‍ വാങ്ങലുകള്‍ രണ്ട് കൂട്ടരുടേയും ഭാഗത്ത് നിന്ന് ഉണ്ടാവുന്നതാണ് ബന്ധങ്ങള്‍ നല്ല രീതിയില്‍ മുന്നോട്ട് പോകാന്‍ ആവശ്യം.

വഴക്കിനിടയില്‍ താഴ്ത്തി കെട്ടി സംസാരിക്കുന്നതും കഴിഞ്ഞ കാര്യങ്ങളെ കുറിച്ച് സംസാരിക്കുന്നതും ഒഴിവാക്കാന്‍ പ്രത്യേകം ശ്രദ്ധിക്കണം. ചെറിയ ചെറിയ പിണക്കങ്ങള്‍ എല്ലാ ബന്ധങ്ങളിലും സാധാരണമാണ്. എന്നാല്‍ വഴക്ക് മൂര്‍ഛിക്കുമ്പോള്‍ വാക്കുകള്‍ സൂക്ഷിച്ച് ഉപയോഗിക്കാന്‍ ശ്രദ്ധിക്കണം. അതേപോലെ മുന്‍ കാമുകന്റെയോ കാമുകിയുടെയോ കാര്യങ്ങള്‍ പറഞ്ഞ് പരസ്പരം വാക്ക്‌പോര് നടത്താതിരിക്കാന്‍ ശ്രമിക്കണം എക്‌സ് കാമുകി, എക്‌സ് കാമുകന്‍ എന്നത് മലയാള പദമെന്ന പോലെ ആയി കഴിഞ്ഞു. മുന്‍ കാമുകിയും കാമുകനും ബന്ധങ്ങള്‍ക്കിടയില്‍ ചര്‍ച്ചയാവുന്നത് ദോഷം മാത്രമേ ഉണ്ടാക്കൂ.

ഇരുവരുടേയും ജീവിതത്തിലെ സ്ഥാനം അഥവ ‘ഇടം’ എന്നിവയെ കുറിച്ചുള്ള തുറന്ന സംസാരം ആവശ്യമാണ്. ജീവിതത്തില്‍ ഓരോ കാര്യങ്ങള്‍ക്കും പ്രത്യേക ഇടവും സ്ഥാനവും എല്ലാവര്‍ക്കും ഉണ്ട്. ഇത് പരസ്പരം അറിയുകയും സംസാരിച്ച് വ്യക്തത വരുത്തുകയും ചെയ്യേണ്ടത് അത്യാവശമാണ്. പേഴ്‌സണല്‍ മാറ്ററുകളില്‍ ഇടപെടരുതെന്നും വ്യക്തി സ്വാതന്ത്ര്യത്തില്‍ കൈകടത്തരുതെന്നും ചുരുക്കം. അതേസമയം നിങ്ങളുടെ ജീവിതത്തിലെ പ്രധാനപ്പെട്ട മുന്‍ഗണനയുള്ള കാര്യങ്ങള്‍ പങ്കാളിയുമായി ഉറപ്പായും പങ്കുവെയ്ക്കുക. ചിലര്‍ക്ക് ജോലി മുന്‍ഗണന ആയിരിക്കും ചിലര്‍ക്ക് കുടുംബം രക്ഷിതാക്കള്‍ എന്നിവരായിരിക്കും മുന്‍ഗണന. ഇതറിഞ്ഞ് പ്രവര്‍ത്തിക്കാന്‍ പങ്കാളിക്ക് കഴിയുമ്പോള്‍ ബന്ധങ്ങള്‍ ഊഷ്മളമായി തുടരും.

urmila das qustions to public,sex-and-passion-widows-are-human-too-and-have-needs
Posted by
24 December

ഞാനൊരു വിധവയാണ്, അമ്മയും; ചോരയും നീരുമുള്ള സ്ത്രീയെന്ന നിലയ്ക്ക് എനിക്കും വികാരങ്ങളും ആഗ്രഹങ്ങളും ഉണ്ട്, ഞാനും നിങ്ങളെ പോലെ സെക്‌സ് ആഗ്രഹിക്കുന്നു, അത് തുറന്ന് പറയാന്‍ ഞാനെന്തിന് മടിക്കണം; സദാചാര വാദികളുടെ നെറ്റി ചുളിപ്പിച്ച് ഊര്‍മ്മിളാ ദാസിന്റെ ചോദ്യങ്ങള്‍

കൊച്ചി: സ്വതന്ത്രചിന്തകയും പ്രമുഖ അസ്സാമീ എഴുത്തുകാരിയുമായ ഊര്‍മ്മിളാ ദാസിന്റെ ആത്മകാഥാംശമുള്ള ലേഖനം സമൂഹത്തില്‍ വലിയ ചര്‍ച്ചയ്ക്ക്
വഴിവെക്കുന്നു. 40 വയസുള്ള വിധവയായ സ്ത്രീയാണ് ഞാന്‍, എനിക്ക് 20വയസുള്ള മകനുമുണ്ട്. എനിക്കും നിങ്ങളെ പോലെ ലൈംഗികാസക്തികളുണ്ട്. അത് ഞാന്‍ അടിച്ചമര്‍ത്തി വയ്ക്കണോ..? സമൂഹത്തിന് നേര്‍ക്ക് ചാട്ടുളി പോലെ ഉയരുകയാണ് എഴുത്തുകാരിയായ ഊര്‍മ്മിളയുടെ ചോദ്യം. അതേ സമയം ഒരു സ്ത്രീയ്ക്ക് ഇങ്ങെനെ ഒക്കെ പറയാമോ എന്നതരത്തിലുള്ള ചര്‍ച്ചകള്‍ ആരംഭിച്ചുകഴിഞ്ഞു. എന്നാല്‍ സാധാരണ സ്ത്രീയെന്ന നിലയ്ക്ക് കപടസദാചാരത്തിന്റെ പൊയ്മുഖമണിയാതെയുള്ള തുറന്ന് പറച്ചില്‍ നടത്തിയ ഊര്‍മ്മിളയെ വലിയൊരുവിഭാഗം അഭിനന്ദിക്കുന്നുമുണ്ട്.

ഏതാനും ദിവസ്സം മുമ്പാണ് ഊര്‍മ്മിളാ ദാസിന്റെ ലേഖനം പുറത്ത് വന്നത്. തികച്ചു യാഥാസ്ഥിതികമായ കുടുംബത്തില്‍ മാതാവ് മരണപ്പെട്ടതിനെ തുടര്‍ന്ന് പിതാവിന്റെ സംരക്ഷണയിലായിരുന്നു ഊര്‍മ്മിളയുടെ ബാല്യം. പോലീസുകാരനായ പിതാവ് കാന്‍സര്‍ ബാധിതനുമായിരുന്നു. തന്നെക്കാള്‍ ഒരുവയസ് മാത്രം കുറവുള്ള സഹോദനോടായിരുന്നു പിതാവിനും മറ്റ് ബന്ധുക്കള്‍ക്കും സ്‌നേഹവും അടുപ്പവും കാണിച്ചിരുന്നത്.

ആര്‍ക്കും വേണ്ടാത്ത ജന്മമെന്ന നിലയ്ക്കായിരുന്നു ബാല്യം. കൗമാരം അതിലേറെ അവഗണനകളുടെ ഭാരംപേറിയതായിരുന്നു. ചിത്രരചന ആതായിരുന്നു ഊര്‍മ്മിളയുടെ ഏക അശ്വാസം. മകനെ ഒരു നിലയിലെത്തിക്കുക എന്നത് മാത്രമായിരുന്നു പിതാവിന്റെ ചിന്ത. അതോടെ മകളെന്ന ചിന്ത പോലും ആ പിതാവ് മറന്നുഇതിനിടയില്‍ പൂര്‍ണ്ണ സമയവും മദ്യത്തിന് അടിമയായ ഒരാളാളെ ഭര്‍ത്താവായി കണ്ടെത്തിനല്‍കിയതോടെ ചെറുപ്രായത്തില്‍ തന്നെ ഊര്‍മ്മിളയുടെ ജീവിതം കൂടുതല്‍ ദുരിതപൂര്‍ണ്ണവുമായി. ഏറെക്കഴിയും മുമ്പ് ഒരു കുഞ്ഞിന് ജന്മംനല്‍കിയതോടെ അവളുടെ ഏല്ലാ സ്വപ്‌നങ്ങളും കെട്ടടങ്ങുകയായിരുന്നു.

മുഴുക്കുടിയനായ ഭര്‍ത്താവുമായി ഒരുമിച്ച് പോകുക പ്രയാസകരമായതോടെ ഊര്‍മ്മിള മറ്റൊരു വീട്ടിലേക്ക് കുഞ്ഞുമായി താമസം മാറി. കുഞ്ഞിനെ എങ്ങനെ പോറ്റുമെന്നത് ചോദ്യചിഹ്ന്മയി തന്നെ മുന്നില്‍ നിന്നസമയം.18കാരിയായ ഒരു പെണ്‍കുട്ടി സമൂഹത്തിന് മുന്നില്‍ പല ചോദ്യങ്ങളും ഉയര്‍ത്തി. എങ്കിലും അവള്‍ തോല്‍ക്കാനൊരുക്കമായിരുന്നില്ല.ഇതിനിടെ ലഭിച്ച ചെറിയൊരു ജോലിയില്‍ നിന്നും ലഭിക്കുന്ന വരുമാനം കൊണ്ട് തന്റെ മുടങ്ങിയ പഠനം പുനരാരംഭിക്കും, കുഞ്ഞിന്റെ കാര്യങ്ങള്‍ നോക്കാനും അവള്‍ ശ്രമിച്ചുപോന്നു. മറ്റൊരു വിവാഹം പലരും നിര്‍ദ്ദേശിച്ചെങ്കിലും അദ്യവിവാഹ ബന്ധം ഒഴിയാതെ നിലനിന്നത് സമുഹത്തിന് മുന്നില്‍ വിവാഹിത എന്ന ലേബലില്‍ തന്നെ തുടരാന്‍ അവളെ പ്രേരിപ്പിച്ചു.

ഏറെ നാളുകള്‍ക്കം നിയമപരമായുണ്ടായിരുന്ന ഭര്‍ത്താവ് മരണപ്പെട്ടു. ഇതോടെ വിധവ എന്ന ചാര്‍ത്തിലേക്ക് ചെറുപ്രായത്തില്‍ തന്നെ അവളും അകപ്പെട്ടു. സമുഹം വിധവകള്‍ക്ക് ചാര്‍ത്തിനല്‍കിയ മുദ്രകള്‍ എടുത്തണിയാന്‍ ഊര്‍മ്മിളയും നിര്‍ബന്ധിതയായി. തന്റെ വികാരങ്ങളും ചിന്തകളും സമൂഹം കെട്ടിയടക്കപ്പെട്ട ശീലങ്ങള്‍ക്കുള്ളില്‍ തളക്കപ്പെട്ടു. ഇതുവരെയുള്ള ജീവിതകാലത്ത് മറ്റൊരാളുടെയും സ്വകാര്യ ജീവിതത്തില്‍ എത്തിനോക്കാത്ത തനിക്ക് മറ്റുള്ളവരില്‍ നിന്നും തിരിച്ച് അപ്രകാരം ആഗ്രഹിച്ചാല്‍ എന്താണ് തെറ്റെന്ന് ഊര്‍മ്മിള ചോദിക്കുന്നു.

ചോരയും നീരുമുള്ള സ്ത്രീയെന്ന നിലയ്ക്ക് തനിക്കും വികാരങ്ങളും ആഗ്രഹങ്ങളും ഉണ്ട്. അത് തടഞ്ഞ് വയ്ക്കാന്‍ സമൂഹത്തിനെന്താണ് അധികാരം. ഒരു മാതാവെന്ന നിലയ്ക്കുള്ള എല്ലാ കടമകളും താന്‍ ഭംഗിയായി നിര്‍വഹിക്കുന്നുണ്ട്. ഭാരത സമൂഹത്തില്‍ വിധവകള്‍ക്ക് പുനര്‍വിവാഹമെന്നത് എുപ്പമുള്ള കാര്യവുമല്ല. ഇത്തരം സാഹചര്യങ്ങളില്‍ മിക്കവരും ഇത്തരക്കാരായസ്ത്രീകളോട് സെക്‌സ് പരമായി സംസാരിക്കാന്‍ താല്‍പര്യം കാട്ടാറുമില്ല.അവര്‍ക്ക് അവരുടേതായ വികാരങ്ങള്‍ പ്രകടിപ്പിക്കുന്നതിനെ സമൂഹം വെറുക്കുന്നതെന്തിനാണ്. ഞാന്‍ എന്റെ സെക്‌സ് പരമായ ചിന്തകള്‍ തുറന്ന് പറഞ്ഞപ്പോള്‍ തന്നെ സമൂഹം അതിന് എത്ര യാഥാസ്ഥിതികമായാണ് കണ്ടെതെന്ന് എനിക്കറിയാം. അപ്പോള്‍ മറ്റ് വിധവകളുടെയും, വിവാഹമോചിതരുടെയും അനുഭം എങ്ങനെയായിരിക്കും. സമൂഹം ചിന്താഗതി മാറ്റേണ്ട സമയമം അതിക്രമിച്ചിരിക്കുന്നു. വിധവകളും മനുഷ്യരാണ്. അവര്‍ക്കും ജീവിക്കണംമറ്റ് മനുഷ്യരെ പോലെ.. ഊര്‍മ്മിള പറഞ്ഞുവെക്കുന്നു.

eating-red-meats beef and pork good for health new study
Posted by
24 December

കൊളസട്രോളിന്റൈ കാര്യത്തില്‍ പേടി വേണ്ട, രക്തസമ്മര്‍ദം സാധാരണ നിലയില്‍ നിലനിര്‍ത്തിക്കൊണ്ടു പോകും; ബീഫും പന്നിയിറച്ചിയും കഴിക്കുന്നത് ശരീരത്തിന് നല്ലതാണെന്ന് പുതിയ പഠനം

കൊളസട്രോളിനെ പേടിച്ച് ഇറച്ചി കഴിക്കുന്നതിന്റെ അളവ് കുറച്ചവര്‍ക്ക് ഒരു സന്തോഷ വാര്‍ത്ത. ബീഫും പന്നിയിറച്ചിയുമൊക്കെ കഴിക്കുന്നത് ശരീരത്തിനു നല്ലതാണെന്നാണു പുതിയ പഠനം. ഇന്‍ഡിയാനയിലെ പുര്‍ഡുവെ സര്‍വകലാശാലയാണ് പഠന റിപ്പോര്‍ട്ട് പുറത്തുവിട്ടത്.

ഡോക്ടര്‍മാര്‍ ഇത്രകാലം പറഞ്ഞിരുന്നത് പതിവായി ബീഫ് കഴിക്കുന്നവര്‍ അതിന്റെ അളവ് 70 ഗ്രാമില്‍ ഒതുക്കിയില്ലെങ്കില്‍ പണി കിട്ടുമെന്നായിരുന്നു. ഇറച്ചി പതിവായി കഴിക്കാതിരിക്കുന്നതാണു ശരീരത്തിന് നല്ലതെന്നായിരുന്നു അവരുടെ പക്ഷം. എന്നാല്‍ പുതിയ പഠനം പറയുന്നത് റെഡ് മീറ്റ് പോഷകങ്ങളുടെ കലവറയാണെന്നാണ്. പ്രോട്ടീനും ഇരുമ്പും ഇതില്‍ ധാരാളമുണ്ട്. അത് എത്ര കഴിക്കുന്നോ അത്രകണ്ടു നല്ലതാണ്. സര്‍വകലാശാലയിലെ ന്യൂട്രീഷന്‍ സയന്‍സ് വിഭാഗത്തിലെ പ്രൊഫ. വെയിന്‍ ഷാംപ്‌ബെല്‍ പറയുന്നു. പതിവായി മാട്ടിറച്ചി കഴിക്കുന്ന നിരവധി പേരില്‍ തുടര്‍ച്ചയായി നടത്തിയ നിരീക്ഷണത്തിനും പഠനത്തിനും ഒടുവിലാണു റിപ്പോര്‍ട്ട് പുറത്തുവിട്ടത്.

പഠനകാലത്തു നിരീക്ഷിച്ചവരില്‍ ആര്‍ക്കും കൊളസ്‌ട്രോള്‍, ബിപി എന്നിവയുടെ നിലയില്‍ യാതൊരു വ്യതിയാനവും ദൃശ്യമായില്ല. ഇതുമൂലം ഹൃദയാരോഗ്യത്തിനു ദോഷകരമായ യാതൊരു സാഹചര്യവും സൃഷ്ടിക്കപ്പെട്ടുമില്ല. മറിച്ച് രക്തസമ്മര്‍ദം സാധാരണ നിലയില്‍ നിലനിര്‍ത്തിക്കൊണ്ടു പോകുന്നതിന് സഹായകമായെന്നും വ്യക്തമായി.

arya s suresh national winner of yoga and wushu fight
Posted by
23 December

യോഗയിലും വുഷു ആയോധനകലയിലും ദേശീയ ജേതാവായി പതിമൂന്നുകാരി ആര്യ എസ് സുരേഷ്

-ഫഖ്‌റുദ്ധീന്‍ പന്താവൂര്‍

എടപ്പാള്‍: ആര്യ എസ് സുരേഷ് ഇന്ന് വെറുമൊരു പേരല്ല, ഒരുപാട്‌പേര്‍ക്ക് കൊതി തോന്നിയൊരു ജീവിതത്തിന്റെ പുസ്തകമാണിന്ന്. ചങ്ങരംകുളം ആലംകോട് സ്വദേശി ആര്യ നാലുവര്‍ഷമായി യോഗയില്‍ സബ് ജൂനിയര്‍ വിഭാഗത്തില്‍ നാഷണല്‍ പ്ലയറായി ഈ കൊച്ചു പ്രായത്തില്‍ തന്നെ നേട്ടത്തിന്റെ നെറുകെയിലാണ്. ഈ പതിമൂന്നുകാരി പഠിക്കുന്നത് കോക്കൂര്‍ സര്‍ക്കാര്‍ ടെക്‌നിക്കല്‍ സ്‌കൂളിലെ എട്ടാം ക്ലാസിലാണ് . ഈ മാസം 23 ,24 തിയ്യതികളില്‍ ബാംഗ്ലൂരില്‍ വെച്ച് നടക്കുന്ന ദേശീയ യോഗാ മല്‍സരത്തില്‍ ആര്യ പങ്കെടുക്കുന്നുണ്ട്. ഇത്തവണയും വിജയി ആര്യ തന്നെയാണെന്നന്നതില്‍ യാതൊരു സംശയവുമില്ല.

യോഗ മാത്രമല്ല കളരിയും കരാട്ടേയും, ഷാവേലിനും, ബോക്‌സിങ്ങും ഒന്നിച്ച് ചേര്‍ത്ത വുഷു എന്ന ആയോധനകലയിലും ഈ മിടുക്കി കഴിവ് തെളിയിച്ചിട്ടുണ്ട്. രണ്ടുതവണ നാഷണല്‍ വുഷു ചാംപ്യന്‍ഷിപ്പില്‍ വെങ്കലമെഡല്‍ ജേതാവാണ് ആര്യ. ഇന്നലെയാണ് പൂനെയില്‍ നിന്നും ജൂനിയര്‍ വിഭാഗത്തില്‍ വുഷു ചാംപ്യന്‍ഷിപ്പില്‍ വെങ്കലമെഡല്‍ നേടി നാട്ടിലെത്തിയത്. ഇനി ഉടന്‍ ബാംഗ്ലൂരിലേക്ക് ദേശീയ യോഗ മല്‍സരത്തിന്. ദേശീയ വുഷു മാസ്റ്റര്‍മാരായ സൂര്യകാന്ത്, സുഗിത, സുവേഷ് എന്നിവരാണ് ആര്യയുടെ വുഷു ഗുരുക്കന്മാര്‍.

യോഗ അച്ഛന്‍ സുരേഷില്‍ നിന്നാണ് ആര്യ പിടിച്ചത്. പിന്നീട് അയ്യന്തോള്‍ സ്‌കൂള്‍ ഓഫ് യോഗയില്‍ നിന്നും. ബെന്നി, വിനീത, സുരേഷ് എന്നിവരും ഗുരുക്കന്മാര്‍ തന്നെ. പഠിക്കാന്‍ മിടുക്കിയായ ആര്യ കോക്കൂര്‍ സര്‍ക്കാര്‍ സ്‌കൂളിലെ യോഗ ടീച്ചര്‍ കൂടിയാണ് .പതിമൂന്ന്കാരിയായ ടീച്ചര്‍ .200 ലധികം കുട്ടികളും മുതിര്‍ന്നവരും ഈ മിടുക്കിയില്‍ നിന്ന് യോഗ പഠിക്കുന്നുണ്ട്.

അമ്മ പ്രസീദയും സഹോദരി ഐശ്വര്യയും സഹോദരന്‍ അശ്വിനും ചേച്ചിയെ അകമഴിഞ് പിന്തുണക്കുന്നതാണ് ആര്യയുടെ വിജയമന്ത്രം. ഒപ്പം മകളുടെ മനസ്സറിഞ്ഞ് അഭിനന്ദിക്കുകയും ഒപ്പം നില്‍ക്കുകയും ചെയ്യുന്ന ഒരു അച്ഛനും. പതിമൂന്നാം വയസ്സില്‍ യോഗയിലും വുഷു ആയോധനകലയിലും തിളങ്ങുന്ന ഒത്തിരി നേട്ടങ്ങള്‍ കൈവരിച്ച ഈ മിടുക്കി ഒരു നാടിന്റെ മാത്രമല്ല സംസ്ഥാനത്തിന് തന്നെ അഭിമാന നേട്ടമാണ് സമ്മാനിച്ചത്. സ്‌കൂളിലും നാട്ടിലും ആര്യയാണ് താരം. ഇവള്‍ പുതുതലമുറയിലെ പെണ്‍കുട്ടികള്‍ക്ക് മാതൃകയാക്കേണ്ട ജീവിതത്തിന്റെ പുസ്തകമാണ്.

special story about self identifying
Posted by
22 December

നിങ്ങള്‍ക്ക് നിങ്ങളെ ഇങ്ങനെ തിരിച്ചറിയാം..

-ഫഖ്‌റുദ്ധീന്‍ പന്താവൂര്‍

സ്വയം തിരിച്ചറിയുന്നതാണ് ഏറ്റവും വലിയ അറിവ് എന്നൊണല്ലോ സത്യം. സ്വയം തിരിച്ചറിയാനൊരു മാര്‍ഗമിതാ..
ലഭിച്ചതില്‍ സംതൃപ്തി നേടാനായാല്‍ നിങ്ങള്‍ക്ക് ജീവിതത്തില്‍ വിജയിച്ചുവെന്ന് പറയാനാകും. അതിന് നാം നമ്മെ തിരിച്ചറിയണം. നാം ഏതുതരം മനുഷ്യനാണെന്ന്.

മനുഷ്യന് ഒരു ആമുഖത്തിന്റെ ആവശ്യമുണ്ടോ? ഉണ്ട് മനുഷ്യനോളം ആമുഖം പറയേണ്ട മറ്റേത് ജീവിയുണ്ട്. മനുഷ്യനെ പല കാറ്റഗറിയാക്കിയും തിരിക്കാറുണ്ട്. ഓരോര്‍ത്തരും തങ്ങള്‍ക്ക് പറയേണ്ട കാര്യങ്ങള്‍ക്കായി മനുഷ്യനെ തരംതിരിക്കും. സൂഫികള്‍ മനുഷ്യനെ മൂന്നായി തിരിച്ചിട്ടുണ്ട് .ഏറ്റവും ലളിതവും സുന്ദരവുമായാണ് എനിക്കിത് അനുഭവപ്പെട്ടത്. ഒരു മനുഷ്യന്‍ എന്ന നിലയില്‍ നിങ്ങളിതില്‍ ഏതുവിഭാഗത്തില്‍ പെടുന്നു എന്ന് കണ്ണടച്ചിരുന്ന് ചിന്തിക്കുക.

ചില മനുഷ്യര്‍ അസുഖം പോലെയാണ്. അതായത് ആരോഗ്യത്തെ നഷ്ടപ്പെടുത്തുന്ന അസുഖത്തെ ആരും ഇഷ്ടപ്പെടുന്നില്ല.
ഇത്തരക്കാരുടെ സാന്നിധ്യം ആളുകള്‍ ഇഷ്ടപ്പെടുകയില്ല. അരികിലെത്തിയാല്‍ ഒഴിവാക്കാനാണ് ശ്രമിക്കുക. അസുഖങ്ങള്‍ക്ക് മരുന്ന് കഴിക്കും പോലെ എന്ത് ചെയ്തിട്ടാണേലും അവരെ ഒഴിവാക്കാന്‍ ശ്രമിക്കും. മോശം പെരുമാറ്റവും മറ്റുള്ളവരുടെ വികാരങ്ങളെ മാനിക്കാത്തവരും ഇത്തരം ‘ അസുഖ’ക്കാരില്‍ ചിലത് മാത്രം. നിങ്ങള്‍ മറ്റുള്ളവര്‍ക്ക് ഒരു അസുഖക്കാരനാകരുത്. നിങ്ങളുടെ സാമീപ്യം ഏതര്‍ത്ഥത്തിലും ചുറ്റുള്ളവരില്‍ നന്മയും സന്തോഷവും നല്‍കുന്നവയായിരിക്കണം.

മറ്റൊരു വിഭാഗം ആളുകള്‍ മരുന്ന് പോലെയാണ്. ഏത് സാഹചര്യത്തിലും എല്ലായ്‌പ്പോഴും സന്തോഷത്തോടെ ആരും മരുന്ന് കഴിക്കാറില്ല. അസുഖം വന്നാലാണല്ലോ അതൊഴിവാക്കാന്‍ മരുന്ന് കഴിക്കാറ്. അതുപോലെയാണ് ചിലയാളുകള്‍. അവരെ എപ്പോഴും നമുക്ക് ആവശ്യം വരില്ല. ചില ഘട്ടങ്ങളില്‍ അവരെ അത്യാവശ്യമാണ്. അവരില്ലെങ്കില്‍ നമ്മുടെ ആരോഗ്യം വീണ്ടെടുക്കാനാവില്ല. പക്ഷെ ആരോഗ്യകരമായ സന്തോഷകരമായ സാഹചര്യത്തില്‍ ഇത്തരക്കാരുടെ സാന്നിധ്യം ആരും ഇഷ്ടപ്പെടുന്നില്ല. നിങ്ങള്‍ മറ്റുള്ളവര്‍ക്ക് മരുന്ന് പോലെയാണോയെന്ന് കണ്ടെത്തൂ. നിങ്ങളിലെ ഉപകാരമേ അവര്‍ക്ക് വേണ്ടൂ.. എങ്കില്‍ നിങ്ങള്‍ മരുന്നുപോലെയാണ്. നിത്യജീവിതത്തില്‍ ഇത്തരക്കാരുടെ എണ്ണം വളരെ കൂടുതലാണ്. ചിലരുടെ സാന്നിധ്യം നിത്യജീവിതത്തില്‍ മരുന്ന് പോല മാത്രമെ ആശ്വാസം നല്‍കു..

മക്കള്‍, ഭാര്യ, മാതാപിതാക്കള്‍, സുഹൃത്തുക്കള്‍ എന്നിവരെല്ലാം ഒരര്‍ത്ഥത്തില്‍ ജീവിതത്തില്‍ എല്ലാ നിമിഷത്തിലും അരികിലുണ്ടാകുന്നവരല്ല. ഏറെ പ്രിയപ്പെട്ടവരാണെങ്കില്‍ പോലും അവരുടെതായ ഇടങ്ങളില്‍ മാത്രമാണ് അവര്‍ ആനന്ദം പകരുന്നത്. മിക്ക ആളുകളും ഈ രണ്ടാം കാറ്റഗറിയിലാകും. അതു കൊണ്ട് തന്നെ എല്ലാം നേടിയാലും ഒരു അസംതൃപ്തി ഇവരുടെ ഉള്ളിലുണ്ടാകും. അമൂര്‍ത്തമായ ചിത്രം പോലെ ..

മൂന്നാമതൊരു വിഭാഗം മനുഷ്യരുണ്ട് .ഓക്‌സിജന്‍ പോലെ.. എപ്പോഴും ഏത് നിമിഷവും അവര്‍ നമ്മോടൊപ്പമുണ്ടാകും. ഒരാള്‍ ശ്വസനം നടത്തുന്നത് പോലും സ്വയം അറിയാതെ സംഭവിക്കുന്ന പ്രക്രിയയാണല്ലോ.. ഇവരില്ലങ്കില്‍ നമ്മളില്ല. ഒരു സൂഫിക്ക് തന്റെ ആത്മീയ ഗുരു ഓക്‌സിജന്‍ പോലെയാണ് . അതാണവരുടെ അന്നവായു. ഏറ്റവും പ്രിയപ്പെട്ടവരാകാന്‍ പ്രിയമുള്ളതിനൊപ്പം കഴിയണമെന്നില്ല .അവന്റെ ശ്വസനത്തില്‍ പോലും നമ്മമാകുന്നൊരു സാഹചര്യം വരും. അതാണ് മൂന്നാമത്തെ വിഭാഗം. ഇത്തരം പ്രിയപ്പെട്ടവരാരോ നമ്മോടൊപ്പമുണ്ടെങ്കില്‍, തിരക്കുള്ള റോഡില്‍ പിതാവിന്റെ കൈപിടിച്ച് ഒന്നുമറിയാത്ത കുഞ്ഞ് സുരക്ഷിതനായി റോഡ് മുറിച്ചുകടക്കും പോലെയാണ്. നമ്മുടെ സങ്കടങ്ങളും സ്‌നേഹങ്ങളും കിനാവുകളും പങ്കുവെക്കാനൊരിടം .

നിത്യജീവിതത്തില്‍ നമുക്ക് ഏതുവിഭാഗം മനുഷ്യനാകാന്‍ കഴിഞ്ഞു എന്ന് സ്വയം പരിശോധിക്കുക. സ്‌നേഹം സ്‌നേഹത്തെ കൊണ്ടുവരും. നിങ്ങള്‍ സ്‌നേഹത്തില്‍ വിശ്വസിക്കുകയും അതില്‍ ആനന്ദം കണ്ടെത്തുകയും അതില്‍ ഉറങ്ങുകയും ഉന്നരുകയും ചെയ്യുന്നുവെങ്കില്‍ ജീവിതം ഒഴുകുന്ന പുഴപോലെ മനോഹരമായിരിക്കും. നെഗറ്റീവ് ചിന്തകള്‍ / ദുഷ് ചിന്തകള്‍ മനസ്സിലേക്ക് പ്രവേശിപ്പിക്കാതെ നിങ്ങള്‍ സൂക്ഷിക്കണം. മനസ്സിന്റെ സൂക്ഷിപ്പുകാരന്‍ നിങ്ങള്‍ തന്നെയാണ്. ആ നിയന്ത്രണം മറ്റൊന്നിനും നല്‍കരുത്. നിങ്ങള്‍ക്ക് ശക്തിപകരാന്‍ ഓക്‌സിജന്‍ പോലെ ഒരാള്‍ ഒപ്പമുണ്ടെങ്കില്‍. നിങ്ങള്‍ക്ക് അതായ് മാറാനായാല്‍ ഒരു ദുരന്തവും നിങ്ങളുടെ മനസ്സിനെ തകര്‍ക്കില്ല. സന്തോഷങ്ങള്‍ എല്ലാം മായ്ക്കുകയുമില്ല.

(മാധ്യമപ്രവര്‍ത്തകനും, അധ്യാപകനും, ഹിപ്പ്‌നോട്ടിക്കല്‍ കൗണ്‍സിലറും, മൈന്റ് കണ്‍സള്‍ട്ടന്റുമാണ് ലേഖകന്‍. 9946025819 )