ഗര്‍ഭിണികള്‍ക്ക് മാത്രമല്ല പപ്പായ വില്ലന്‍!
Posted by
20 September

ഗര്‍ഭിണികള്‍ക്ക് മാത്രമല്ല പപ്പായ വില്ലന്‍!

ഒരുപാട് ഔഷധമൂല്യങ്ങളുള്ള ഒരു ഫലമാണ് പപ്പായ. ഗര്‍ഭിണികള്‍ പപ്പായ കഴിക്കാന്‍ പാടില്ലെന്നു പറയാറുണ്ട്. എന്നാല്‍ ഗര്‍ഭിണികള്‍ക്ക് മാത്രമല്ല ബാക്കിയുള്ളവരും പപ്പായ കഴിക്കാന്‍ പാടില്ലാത്ത അവസരങ്ങള്‍ ഉണ്ട്. പപ്പായ വിഷകരമായി പ്രവര്‍ത്തിക്കുന്ന ചില അവസരങ്ങള്‍ ഇവയാണ്.

1. അബോര്‍ഷന്‍ സാധ്യത

നിരവധി ആരോഗ്യഗുണങ്ങള്‍ പപ്പായയ്ക്കുണ്ട്. പക്ഷേ ഇതിന്റെ കുരുക്കളും വേരും ഗര്‍ഭച്ഛിദ്രത്തിനുള്ള സാധ്യത വര്‍ധിപ്പിക്കും. പഴുക്കാത്ത പപ്പായ ഗര്‍ഭാശയപരമായ അസ്വസ്ഥതകളുമുണ്ടാക്കും. അതുകൊണ്ടുതന്നെ ഗര്‍ഭകാലത്ത് ഈ പഴം കഴിക്കാതിരിക്കുന്നതാകും നല്ലത്.

2. അന്നനാളത്തിനു തടസ്സം

കഴിക്കാന്‍ നല്ല രുചിയാണെങ്കിലും അമിതമായി പപ്പായ കഴിക്കുന്നത് അന്നനാളത്തിനു ദോഷമുണ്ടാക്കും. അതുകൊണ്ട് ഒരു ദിവസം ഒരു കപ്പില്‍ കൂടുതല്‍ പപ്പായ കഴിക്കരുത്.

3. ജനനവൈകല്യങ്ങള്‍

പപ്പായയുടെ ഇലയില്‍ അടങ്ങിയിരിക്കുന്ന പപ്പെയ്ന്‍ എന്ന ഘടകം കുഞ്ഞുങ്ങള്‍ക്ക് വളരെ ദോഷകരമാണ്. ഇതു ജനനവൈകല്യങ്ങള്‍ക്കു വരെ കാരണമാകും. അതുകൊണ്ട് ഗര്‍ഭിണികള്‍ പ്രസവത്തിനു മുന്‍പും പ്രസവശേഷം കുറച്ചുകാലത്തേക്കും പപ്പായ കഴിക്കുന്നത് ഒഴിവാക്കുന്നതാകും നല്ലത്.

4. അലര്‍ജി

പപ്പായയിലുള്ള ലാറ്റക്‌സ് ചിലരില്‍ അലര്‍ജിക്കു കാരണമാകുന്നുണ്ട്. പഴുക്കാത്ത പപ്പായയാണ് കൂടുതലും അലര്‍ജി ഉണ്ടാക്കുന്നത്.

5. രക്തസമ്മര്‍ദം

രക്തസമ്മര്‍ദത്തിനു മരുന്നു കഴിക്കുന്നവര്‍ പപ്പായ കഴിച്ചാല്‍ ബിപി വല്ലാതെ താഴാനുള്ള സാധ്യതയുമുണ്ട്. ഇത് ഏറെ അപകടകരമാണ്.

6. പ്രത്യുല്‍പ്പാദനത്തെ ബാധിക്കും

പപ്പായയുടെ കുരു പുരുഷന്റെ പ്രത്യുല്‍പ്പാദനശേഷിയെ ബാധിക്കും. ബീജാണുക്കളുടെ അളവു കുറയ്ക്കുകയും ചലനത്തെ ബാധിക്കുകയും ചെയ്യും.

കുഞ്ഞുങ്ങള്‍ക്ക് തേന്‍ നല്‍കാമേ?
Posted by
15 September

കുഞ്ഞുങ്ങള്‍ക്ക് തേന്‍ നല്‍കാമേ?

ജനിച്ചയുടന്‍ തന്നെ കുഞ്ഞിന് തേനും വയമ്പുമൊക്കെ ചാലിച്ച് കൊടുക്കുന്ന രീതി നമ്മുടെ നാട്ടില്‍ പതിവാണല്ലോ.

ഈ തേനൂട്ടല്‍ ഒരു അവകാശമായി കാണുന്നവരാണ് ഏറെയും. പല ഡോക്ടര്‍മാരും ഇന്ന് ഇക്കാര്യം സമ്മതിക്കില്ല എങ്കിലും ഡോക്ടറുടെയും നഴ്‌സിന്റെയും കണ്ണില്‍പ്പെടാതെ പലരും കുഞ്ഞിന് തേന്‍ നല്‍കും.

ജനിച്ചയുടനെ എന്നല്ല, അടുത്ത ഒരു മാസത്തോളം കുഞ്ഞിന് തേന്‍ നല്‍കരുത് എന്നാണ് പഠനങ്ങള്‍ പറയുന്നത്. തേന്‍ നല്‍കുന്നതു മൂലമുണ്ടാകുന്ന രോഗാവ്‌സഥയായ ബോട്ടുലിസം കുഞ്ഞിന്റെ ജീവന് പോലും ഹാനികരണമാണെന്നാണ് വിദഗ്ദ്ധരുടെ കണ്ടെത്തല്‍.

വയറ് വേദനയെ പേടിക്കണം: കാരണങ്ങള്‍ ഇതാണ്
Posted by
07 September

വയറ് വേദനയെ പേടിക്കണം: കാരണങ്ങള്‍ ഇതാണ്

വയറ് വേദന ഒരു സാധാരണ അസുഖമായിട്ടാണ് എല്ലാവരും കാണുന്നത്. നേരിയ ദഹന പ്രശ്‌നങ്ങള്‍ എന്നിവ മുതല്‍ പിരിമുറക്കം വരെ വയറുവേദനയ്ക്ക് കാരണമാകാം. പലതരത്തില്‍ വയറ് വേദന വരാറുണ്ട്. പലപ്പോഴും നമ്മള്‍ അത് ശ്രദ്ധിക്കാറില്ല. എന്നാല്‍ ചില വയറ് വേദനയെ കുറിച്ചും അവയുടെ ലക്ഷണങ്ങളെ കുറിച്ചും അറിഞ്ഞിരിക്കേണ്ടതുണ്ട്.

1. അപ്പന്‍ഡിസൈറ്റിസ്: അപ്പന്‍ഡിക്‌സ് വീര്‍ത്ത് വരുന്നത് മൂലം വയറിന്റെ വലതുവശത്ത് താഴെയായി കടുത്ത വേദനയുണ്ടാവും. അടിയന്തര ശസ്ത്രക്രിയയിലൂടെ അപ്പന്‍ഡിക്‌സ് നീക്കം ചെയ്യേണ്ടി വരും.

2. ഗ്യാസ്ട്രിക് അള്‍സര്‍: ചെറുകുടലിലെ അള്‍സര്‍ മൂലം വയറ്റില്‍ രക്തസ്രാവവും കഠിനമായ വേദനയുമുണ്ടാവും.

3. പിത്തസഞ്ചിയുടെ വീക്കം: പിത്തസഞ്ചിയുടെ വീക്കം മൂലം അല്ലെങ്കില്‍ പിത്തസഞ്ചിയുടെ കല്ലുകള്‍ മൂലമുള്ള കോളിയോസിസ്‌റ്റൈറ്റിസ് മൂലം വേദനയുണ്ടാകാം. പിത്ത സഞ്ചിയിലെ കല്ലുകള്‍ നീക്കം ചെയ്യുന്നതാണ് ഇതിനുള്ള പരിഹാരം. പലപ്പോഴും വയറിന്റെ മുകളില്‍ ഒരു ഗ്യാസ് കുടുങ്ങുന്ന വേദനയുമുണ്ടാവും.

4. വൃക്കയിലെ കല്ലുകള്‍: ഇത് പലപ്പോഴും കഠിനമായ വേദനയുണ്ടാക്കും. പ്രത്യേകിച്ച് മൂത്രനാളിയിലൂടെയോ, വൃക്കനാളിയിലൂടെയോ കല്ലുകള്‍ പുറത്തേക്ക് നീങ്ങുന്ന സമയത്ത്.

5. ആയോഗ്രിയുടെ വീക്കം: പാന്‍ക്രിയാസ്(ആയോഗ്രിയുടെ വീക്കം) മൂലം വയറിന്റെ മധ്യഭാഗത്തായോ മുകള്‍ ഭാഗത്തായോ എരിയുന്നപോലുള്ള കഠിനമായ വേദനയുണ്ടാകാം. മദ്യം ഉപയോഗിച്ചാല്‍ ഈ വേദന വര്‍ധിക്കുകയും ചെയ്യും.

6. കുടലിലെ ഡൈവെര്‍ട്ടിക്കുല എന്നു വിളിക്കുന്ന മടക്കുകളിലെ വീക്കംമൂലം(ഡൈവെര്‍ട്ടിക്കുലൈറ്റിസ്)വേദന തോന്നാം.

7. ആള്‍സറേറ്റീവ് കൊളൈറ്റിസ്, ക്രോണ്‍സ് ഡിസീസ് തുടങ്ങി കുടലിലെ വീക്കം മൂലം കഠിനമായ വേദനയും വയറിളക്കവും രക്തസ്രാവവും ഉണ്ടാകാം.

8. ഗ്യാസ്‌ട്രോ എന്റൈറ്റിസ് അല്ലെങ്കില്‍ ആമാശയത്തിലെയോ കുടലിലെയോ അണുബാധ മൂലം വേദനയുണ്ടാകാം.

9. മുറിവോ വയറിലെ പേശികള്‍ വലിയുന്നതോ മൂലവും വേദനയുണ്ടാകം.

ചൂടുവെള്ളം കുടിച്ച് കുടവയറും പൊണ്ണത്തടിയും കുറയ്ക്കാം
Posted by
30 August

ചൂടുവെള്ളം കുടിച്ച് കുടവയറും പൊണ്ണത്തടിയും കുറയ്ക്കാം

വില കൊടുത്ത് വാങ്ങിയ പലതരം മരുന്നുകള്‍ ഉപയോഗിച്ച് നേരം കളയുന്നതിന് പകരം ഒരു ഗ്ലാസ് ചൂടുവെള്ളം കൊണ്ട് വയറിലടിഞ്ഞുകൂടുന്ന കൊഴുപ്പിനെ നീക്കം ചെയ്യാം. രാവിലെയും വൈകുന്നേരവും ഒരു ഗ്ലാസ് ചൂടുവെള്ളം ശീലമാക്കിയാല്‍ ഒരുപാട് ഗുണങ്ങളുണ്ട്.

പച്ചവെള്ളത്തെക്കാള്‍ മികച്ച ഫലം തരുമെന്നതിനാല്‍ ചൂടുവെള്ളം ശീലമാക്കുന്നത് തടി കുറയ്ക്കാന്‍ സഹായിക്കും. രാവിലെ ഒരു ഗ്ലാസ് ചൂടു വെള്ളം കുടിച്ച് തുടങ്ങുന്നത് മെറ്റബോളിസം വേഗത്തിലാക്കും. ശരീരത്തെ വിഷവിമുക്തമാക്കി വെക്കാന്‍ മികച്ച മാര്‍ഗ്ഗമാണിത്. രാവിലെ ചൂടുവെള്ളം ശീലമാക്കുന്നതും ഭക്ഷണത്തിനു ശേഷം ചൂടുവെള്ളം കുടിക്കുന്നതും ദഹനപ്രക്രിയ മെച്ചപ്പെടുത്തും. ദിവസവും ഒരു ഗ്ലാസ് ചൂടുവെള്ളം കുടിക്കുന്നതിലൂടെ പൊണ്ണത്തടിയും കുടവയറും കുറയ്ക്കാന്‍ സാധിക്കുമെന്നാണ് പുതിയ പഠനങ്ങള്‍ തെളിയിക്കുന്നത്.

വെറും വയറ്റിലുള്ള ചൂടുവെള്ളം കുടിക്കുന്നത് പ്രമേഹരോഗികള്‍ക്കും ഏറെ ഗുണം ചെയ്യും. ചൂടുവെള്ളം കുടിക്കുന്നതിലൂടെ രക്ത പ്രവാഹം വര്‍ദ്ധിക്കുകയും ചെയ്യുന്നു. ശരീരത്തിലെ വിഷാംശത്തെ വിയര്‍പ്പാക്കി പുറന്തള്ളാനും ചൂടുവെള്ളം സഹായിക്കും.

ഞെട്ടിക്കുന്ന കണക്ക് പുറത്തു വന്നു; ഇന്ത്യയില്‍ ക്ഷയം പിടിച്ച് മാത്രം കഴിഞ്ഞ രണ്ടു വര്‍ഷം കൊണ്ട് മരിച്ചത് 60000 കുഞ്ഞുങ്ങള്‍
Posted by
22 August

ഞെട്ടിക്കുന്ന കണക്ക് പുറത്തു വന്നു; ഇന്ത്യയില്‍ ക്ഷയം പിടിച്ച് മാത്രം കഴിഞ്ഞ രണ്ടു വര്‍ഷം കൊണ്ട് മരിച്ചത് 60000 കുഞ്ഞുങ്ങള്‍

ന്യൂഡല്‍ഹി: ഞെട്ടിക്കുന്ന കണക്ക് പുറത്തു വന്നിരിക്കുന്നു .ഇന്ത്യയില്‍ ക്ഷയം പിടിച്ച് രണ്ടു വര്‍ഷം കൊണ്ട് മരിച്ചത് 60000 കുഞ്ഞുങ്ങള്‍. ശാസ്ത്ര ജേണലായ ദ ലാന്‍സെറ്റില്‍ പ്രസിദ്ധീകരിച്ച പഠനത്തിലാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്.2015 മുതലുള്ള കണക്കുകളാണ് ഇത്. 15 വയസ്സിനു താഴെയുള്ള 60000 കുഞ്ഞുങ്ങളാണ് കഴിഞ്ഞ രണ്ടു വര്‍ഷം കൊണ്ട് ഇന്ത്യയില്‍ ട്യൂബര്‍കുലോസിസ് (ക്ഷയം) ബാധിച്ചുമരിച്ചത്.

മൈക്രോബാക്ടീരിയം ട്യൂബര്കുലോസിസ് എന്ന ബാക്റ്റീരിയ ആണ് ക്ഷയത്തിന് കാരണം. എന്നാല്‍ രോഗത്തിന് ഉചിതമായ ചികിത്സാരീതികള്‍ ഇന്ത്യയില്‍ സ്വീകരിക്കാത്തതാണ് കുട്ടികളിലെ മരണനിരക്ക് കൂട്ടിയത്.

ടിബിയെ കണ്ടെത്താനുള്ള മാര്‍ഗ്ഗങ്ങള്‍ ഇന്നും ഇന്ത്യയില്‍ അപൂര്‍ണ്ണമാണ്. കുട്ടികളില്‍ നിന്നും രോഗസാമ്പിളുകള്‍ ശേഖരിക്കാനുള്ള പ്രയാസവും ടിബി ബാധിച്ചുകഴിഞ്ഞാല്‍ ഇവര്‍ക്ക് ശ്വസനപ്രക്രിയയ്ക്കുള്ള വൈഷമ്യവും കുട്ടികളിലെ മരണനിരക്ക് കൂട്ടുന്നു.

ലോകത്തില്‍ 2.39 ലക്ഷം കുട്ടികള്‍ക്കാണ് ടിബി ബാധയെത്തുടര്‍ന്ന് ജീവന്‍ നഷ്ടമായത്. വേദനാജനകം ആയിട്ടുള്ളത് അതില്‍ മരിച്ചവരില്‍ ഭൂരിഭാഗവും അഞ്ചു വയസ്സിനുതാഴെയുള്ളവരാണ് എന്നതാണ്

മുക്തയുടെ ആദ്യ കണ്മണിയുടെ പിറന്നാള്‍ ചിത്രങ്ങള്‍ കാണാം
Posted by
19 August

മുക്തയുടെ ആദ്യ കണ്മണിയുടെ പിറന്നാള്‍ ചിത്രങ്ങള്‍ കാണാം

കുടുംബ ജീവിതത്തിന്റെ ഓരോ ഘട്ടവും, ഓരോ വേഷവും ആസ്വദിയ്ക്കുകയാണ് ഇന്ന് നടി മുക്ത. വിവാഹ ശേഷം ഭര്‍ത്താവ് റിങ്കുവിനൊപ്പമുള്ള ഓരോ നിമിഷവും സന്തോഷവും മുക്ത ആരാധകരുമായി പങ്കുവച്ചു. മകള്‍ കിയാര കൂടെ വന്നതോടെ സന്തോഷം ഇരട്ടിച്ചു.

ഇപ്പോള്‍ മുക്ത റിങ്കുവും കിയാരയും മാത്രമുള്ള മറ്റൊരു ലോകത്താണ്. മുക്തയുടെ ആദ്യത്തെ കണ്‍മണിയുടെ ജന്മദിനമായിരുന്നു ആഗസ്റ്റ് 17ന്. മാലാഖയെ പോലുള്ള മകളുടെ ചിത്രങ്ങള്‍ക്കൊപ്പം ആ സന്തോഷവും മുക്ത ഫേസ്ബുക്കിലൂടെ ആരാധകരെ അറിയിച്ചു.

കിയാരയുടെ ഒന്നാം പിറന്നാളിന്റെ ഫോട്ടോകളാണ് മുക്ത തന്റെ ഫേസ്ബുക്ക് പേജില്‍ പോസ്റ്റ് ചെയ്തത്. ആതിര സിദ്ധാര്‍ത്ഥാണ് മുക്തയുടെയും കുടുംബത്തിന്റെയും സന്തോഷ നിമിഷങ്ങള്‍ ക്യാമറയില്‍ പകര്‍ത്തിയത്.

കഴിഞ്ഞ ആഗസ്റ്റ് 17നാണ് മുക്തയ്ക്കും റിങ്കു ടോമിയ്ക്കും പെണ്‍കുഞ്ഞ് പിറന്നത്. കിയാറ റിങ്കു ടോമി എന്നാണ് കുഞ്ഞിന് പേരിട്ടിരിക്കുന്നത്. കണ്മണി എന്നാണ് മുക്ത കുഞ്ഞിനെ വിളിക്കുന്നത്.

കിയാരയെ കുറിച്ചുള്ള സ്വപ്‌നങ്ങള്‍ മുക്ത നെയ്തു കഴിഞ്ഞു. കുറച്ചൂടെ വലുതായാല്‍ മകളെ ഡാന്‍സ് പഠിക്കാന്‍ വിടണം എന്നാണ് മുക്ത പറയുന്നത്. മുക്ത മൂന്ന് വയസ്സായപ്പോഴാണ് ഡാന്‍സ് പഠനം തുടങ്ങിയത്. മകളെയും വലിയ കലാകാരിയാക്കണം എന്നാണ് മുക്തയുടെ സ്വപ്‌നം.

ഒരു വയസ്സ് തികഞ്ഞ മകള്‍ക്ക്, പതിനെട്ടാം പിറന്നാളിന് നല്‍കാനുള്ള സമ്മാനങ്ങളും ഇപ്പോഴേ മുക്ത ഒരുക്കുന്നുണ്ട്. കണ്‍മണിയുടെ ഒരു ഫോട്ടോ ഡയറി! കണ്‍മണി ജനിച്ചതു മുതല്‍ അവളുടെ വളര്‍ച്ചയുടെ ഓരോ ഘട്ടവും ഫോട്ടോ എടുത്ത് വച്ചിട്ടുണ്ട്. അതിനോടൊപ്പം ആദ്യമായി ചെയ്ത കാര്യങ്ങളുടെ ദിവസവും സമയവുമൊക്കെ എഴുതി വച്ചിട്ടുണ്ട്. പതിനെട്ട് വയസ്സ് തികയുമ്പോള്‍ അവള്‍ക്ക് ഈ ഡയറി സമ്മാനമായി കൊടുക്കുമത്രെ.

ഗായിക റിമി ടോമിയുടെ സഹോദരനാണ് റിങ്കു ടോമി. റിമിയ്‌ക്കൊപ്പം സ്‌റ്റേജ് ഷോകളില്‍ പോകുന്നതിലൂടെയാണ് മുക്തയും റിങ്കുവും പരിചയപ്പെട്ടത്. പ്രണയമായിരുന്നില്ല.. ഇരുവരുടെയും ജോഡി പൊരുത്തം മനസ്സിലാക്കി, വീട്ടുകാര്‍ ആലോചിച്ച് നടത്തുകയായിരുന്നു. 2015 ആഗസ്റ്റ് 30 നായിരുന്നു വിവാഹം.

മുക്ത മടങ്ങിയെത്തും. വിവാഹ ശേഷം അഭിനയിക്കുന്നതിലോ സ്‌റ്റേജ് ഷോകള്‍ നടത്തുന്നതിലോ റിങ്കുവിന് ഒട്ടും എതിര്‍പ്പില്ല. വിവാഹ ശേഷം ചില സ്‌റ്റേജ് ഷോകളും മുക്ത നടത്തിയിരുന്നു. മകള്‍ ജനിച്ചതോടെ സിനിമയില്‍ നിന്നും സ്‌റ്റേജ് ഷോകളില്‍ നിന്നുമെല്ലാം വിട്ടു നില്‍ക്കുകയാണ് മുക്ത. നല്ല അവസരം ലഭിച്ചാല്‍ അഭിനയിക്കുമെന്ന് നടി പറഞ്ഞിട്ടുണ്ട്.

കുടുംബത്തിനൊപ്പം കുടുംബാഗങ്ങളും കുടുംബ സുഹൃത്തുക്കളുമൊക്കെ കണ്മണിയുടെ ആദ്യ പിറന്നാള്‍ ആഘോഷത്തില്‍ പങ്കെടുത്തു.

പഴയ ഷര്‍ട്ടുകൊണ്ട് ഭംഗിയുള്ള കുഞ്ഞുടുപ്പുകള്‍ : നിങ്ങള്‍ക്കും പരീക്ഷിക്കാം
Posted by
15 August

പഴയ ഷര്‍ട്ടുകൊണ്ട് ഭംഗിയുള്ള കുഞ്ഞുടുപ്പുകള്‍ : നിങ്ങള്‍ക്കും പരീക്ഷിക്കാം

നമ്മുടെയൊക്കെ വീട്ടില്‍ പഴയഷര്‍ട്ടുകളുടെ സ്ഥാനം അടുക്കളയിലും, ബാത്ത്‌റൂമിലും ഒക്കെയാണ്. എന്നാല്‍ അമേരിക്കക്കാരിയായ ഒരു വീട്ടമ്മയുടെ ആശയം ലോകത്തെതന്നെ ഞെട്ടിച്ചിരിക്കുകയാണ്.

ഭര്‍ത്താവിന്റെ പഴയ ഷര്‍ട്ടുകള്‍കൊണ്ട് 3 വയസ്സുകാരിയായ തന്റെ മകള്‍ക്ക് തുന്നിയ കുഞ്ഞുടുപ്പുകള്‍ ആണ് ഇപ്പോള്‍ എല്ലാവരുടേയും ചര്‍ച്ചാവിഷയം.


ഭര്‍ത്താവിന്റെ പഴയ ഷര്‍ട്ടുകള്‍ എന്ത് ചെയ്യും എന്നുള്ള ചിന്തയില്‍ നിന്നാണ് അമേരിക്കക്കാരിയായ സ്‌റ്റെഫിനി മില്ലര്‍ എന്ന വീട്ടമ്മയ്ക്ക് ഈ കിടിലന്‍ ആശയം കിട്ടിയത്.
ചിത്രകാരികൂടിയായ സ്റ്റെഫിനിക്ക് മറ്റൊന്നും ചിന്തിക്കേണ്ടിവന്നില്ല വാള്‍മാര്‍ട്ടില്‍ നിന്ന് വാങ്ങിയ 50 ഡോളറിന്റെ തയ്യല്‍മെഷീന്‍ ഉപയോഗിച്ച് പഴയ ഷര്‍ട്ടുകള്‍ അവര്‍ കുഞ്ഞുടുപ്പുകളാക്കി മാറ്റി.


പ്രസവശേഷം വിഷാദരോഗത്തിനടിമയായ താന്‍, വ്യക്തിത്വം നഷ്ടപ്പെട്ടവളായി മാറിയിരുന്നു. സന്തോഷകരമായ ജീവിതത്തിലേയ്ക്ക് ഇനിയൊരു തിരിച്ചുവരവ് പ്രതീക്ഷിച്ചിരിക്കുമ്പോഴാണ് ഇത്തരമൊരു ആശയം മനസ്സിലേയ്ക്ക് വരുന്നത്, സ്‌റ്റെഫിനി പറയുന്നു.


ചിത്രകലാ അധ്യാപികകൂടിയായ തനിക്ക് യൂറ്റൂബ് വഴി ഈയൊരു ആശയം പഠിച്ചെടുക്കാന്‍ വളരെ എളുപ്പമായിരുന്നു എന്നും, ആദ്യം പഴയ ഷര്‍ട്ടുപയോഗിച്ച് ഉണ്ടാക്കിയത് ഒരു തലയിണ ആയിരുന്നു എന്നും സ്‌റ്റെഫിനി കൂട്ടിചേര്‍ത്തു.

പഴയതും പുതിയതുമായ ഷര്‍ട്ടുകളുമായി ഇപ്പോള്‍ സുഹൃത്തുക്കളും അയല്‍വാസികളും സ്റ്റെഫിനിയുടെ വീട്ടില്‍ തന്നെയാണ്. തങ്ങളുടെ കുട്ടികള്‍ക്കും വ്യത്യസ്തമായ ഉടുപ്പുകള്‍ ഉണ്ടാക്കാനായി.

special story about bottle garden making on children in vocation time
Posted by
21 April

അവധിക്കാലത്ത് നമുക്കൊരുക്കാം കുപ്പിക്കുള്ളില്‍ ഉദ്യാനം

-ഫഖ്‌റുദ്ധീന്‍ പന്താവൂര്‍

അവധിക്കാലം ഉത്സവക്കാലമാണ്. ഈ അവധിക്കാലത്ത് നമുക്ക് രസകരമായ ഒരു കാര്യം ചെയ്യാം. എന്താണെന്നല്ലേ… നല്ലൊരു ഉദ്യാനം ഉണ്ടാക്കാം. ഒരു കുട്ടി ഉദ്യാനം. ഉദ്യാനം ഉണ്ടാക്കണമെന്നൊക്കെ കേള്‍ക്കുമ്പോള്‍ സ്ഥലമില്ല. ഞങ്ങള്‍ ഫ്‌ളാറ്റിലാണ്.. എന്നൊക്കെയാവും നിങ്ങളുടെ മറുപടി. എന്നാല്‍ ശ്രദ്ധിച്ചോളൂ .. നമുക്ക് കുപ്പിക്കുള്ളിലൊരു ഉദ്യാനം തീര്‍ക്കാം .

ഫ്‌ളാറ്റിലും മറ്റും താമസിക്കുന്നവര്‍ ഉദ്യാനമുണ്ടാക്കാന്‍ മുറ്റമില്ലന്നോര്‍ത്ത് ഇനി വിഷമിക്കേണ്ട. ഫ്‌ളാറ്റിനുള്ളില്‍ തന്നെ നല്ലൊരു ഉദ്യാനം എങ്ങനെ ഉണ്ടാക്കാം എന്നതിനെക്കുറിച്ചാണ് ഇത്തവണ പറയുന്നത്. കുപ്പിക്കുള്ളിലും ഗ്ലാസ് അക്വേറിയത്തിനുള്ളിലുമൊക്കെ പൂന്തോട്ടമുണ്ടാക്കുന്ന രീതിയാണ് ‘ ടെറേറിയം’. ഇതുണ്ടാക്കാന്‍ കുപ്പിയോ ,ഗ്ലാസ് ബൗളോ ,അക്വേറിയമോ വേണം.

പാത്രത്തിന്റെ അടിത്തട്ടില്‍ ഒരിഞ്ച് ഉയരത്തില്‍ ചരല്‍ക്കല്ലുകളും അതിനു മീതെ കരിക്കഷ്ണങ്ങളും നിരത്തുക. ഫിഷ് അക്വേറിയത്തില്‍ ഉപയോഗിക്കുന്ന ചരല്‍ക്കല്ലുകള്‍ തന്നെ മതിയാകും .ഇവയ്ക്കുമീതെ മണ്ണ് ,മണല്‍ ,കുറച്ചു ജൈവവളം എന്നിവയുടെ മിശ്രിതം നിറക്കണം. കുപ്പിയുടെയോ ബൗളിന്റെയോ ഒക്കെ 1/5 ഭാഗം വരും വിധം മാത്രം മിശ്രിതം നിറച്ചാല്‍ മതി. വാവട്ടം വലുതായ കുപ്പികളാണ് ഏറ്റവും നല്ലത്. വാവട്ടം കുറഞ്ഞവയാണെങ്കില്‍ പേപ്പറോ കാര്‍ഡ് ബോര്‍ഡോ ഫണല്‍ പോലെ ചുരുട്ടി അതിലൂടെ നിറക്കണം. മിശ്രിതം ഗ്ലാസിന്റെ ഉള്‍ഭാഗത്ത് പറ്റിപ്പിടിക്കാതിരിക്കാനാണിത്.
വലുപ്പം കുറഞ്ഞ ഇലച്ചെടികളാണ് കുപ്പികളിലെ പൂന്തോട്ടങ്ങള്‍ക്ക് നല്ലത്. അതിനു പറ്റിയ ചില ചെടികളെ നമുക്ക് പരിചയപ്പെടാം.
സിങ്കോണിയം
കലേഡിയം
മരാന്ത
പെപ്പറോമിയ
ബെഗോണിയ
കലാത്തിയ
പന്നലുകള്‍
ആഫ്രിക്കന്‍ വയലറ്റ്

ഇനി നിങ്ങള്‍ ചെയ്യേണ്ടത് ഈ ചെടികളുടെ തൈകള്‍ കുപ്പിക്കുള്ളിലെ മിശ്രിതത്തില്‍ നടലാണ്. ഇതിന് രണ്ട് കഷണം നീണ്ട കമ്പോ ചെന്‍സിലോ മതിയാകും. ഇവ ഉപയോഗിച്ച് നടീല്‍ മിശ്രിതത്തില്‍ കുഴിയുണ്ടാക്കി, തൈയുടെ വേര് അതില്‍ വച്ച് ചുറ്റും മണ്ണ് കൂട്ടിവെക്കണം. ഇനി കൂട്ടുകാരുടെ ഭാവനക്കനുസരിച്ച് ചെറിയ പ്രതിമകളോ ചിപ്പികളോ ഒക്കെ വെച്ച് ഈ പൂന്തോട്ടത്തിന്റെ ഭംഗി കൂട്ടാം.

വെള്ളം വളരെ കുറച്ചുമാത്രം ചുവട്ടിലൊഴിക്കണം. തുടര്‍ന്ന് അടപ്പ് ഉപയോഗിച്ച് അടച്ച് കുപ്പി ഉദ്യാനത്തെ മുറിക്കുള്ളിലെ നേരിട്ടല്ലാതെ സൂര്യപ്രകാശം കിട്ടുന്ന ഏതെങ്കിലും ഭാഗത്ത് വെയ്ക്കുക. കുപ്പിക്കുള്ളിലെ വെള്ളം ചെടികള്‍ വലിച്ചെടുക്കുന്നു. ഇതിനു സമാന്തരമായി മണ്ണിലെ ഈര്‍പ്പവും ചെടികള്‍ പുറത്തുവിടുന്ന ഈര്‍പ്പവും ആവിയായി ഗ്ലാസ് ഭിത്തിയില്‍ തട്ടി വെള്ളത്തുള്ളികളായി ഒലിച്ച് താഴത്തെ നടീല്‍ മിശ്രിതത്തില്‍ വീഴും. അങ്ങനെ വെള്ളത്തിന്റെ പ്രകൃത്യായുള്ള ചംക്രമണം കുപ്പിക്കുള്ളില്‍ നടക്കുന്നു. ഈര്‍പ്പം തീരെ കുറയുന്ന സമയത്തുമാത്രം വീണ്ടും വെള്ളം നല്‍കിയാല്‍ മതി. അതായത് ഏത് വേനലിലും ഈ കുപ്പിക്കുള്ളിലെ പൂന്തോട്ടം ഒരുക്കാമെന്നര്‍ത്ഥം .

കുപ്പിക്കുള്ളിലെ ചെടികളുടെ കരിഞ്ഞ ഇലകളും അധിക വളര്‍ച്ചയുമൊക്കെ അറ്റത്തു ബ്ലേഡ് ഘടിപ്പിച്ച ഒരു കമ്പിന്‍ കഷണമോ കത്രികയോ മറ്റോ ഉപയോഗിച്ചു മുറിച്ചു മാറ്റാം. രണ്ടുവര്‍ഷത്തോളം കഴിഞ്ഞ് ചെടികള്‍ മാറ്റി പുതിയത് നടുകയും ചെയ്യാം. എന്തായിരിക്കും കുപ്പിക്കുള്ളില്‍ വെള്ളവും അന്തരീക്ഷവായുവുമില്ലാതെ ചെടികള്‍ വളരുന്നതിന്റെ രഹസ്യം . പരമ രഹസ്യമാണ് കേട്ടോളൂ. ചെടികള്‍ ഒഴികെയുള്ള കുപ്പിക്കുള്ളിലെ ഭാഗം തന്നെ അവയ്ക്ക് വളരാന്‍ ആവശ്യമായ അന്തരീക്ഷമൊരുക്കുന്നുണ്ട് .പിന്നെ പ്രകാശം മാത്രമെ ചെടികള്‍ക്ക് വളരാന്‍ പുറമെനിന്ന് ലഭിക്കേണ്ടതായുള്ളൂ. പ്രകാശ സംശ്ലേഷണത്തിലൂടെ ചെടികള്‍ ആഹാരം നിര്‍മിക്കുകയും അതിന്റെ ഭാഗമായി പുറത്തുവിടുന്ന ഓക്‌സിജന്‍ കുപ്പിക്കുള്ളിലെ ഉദ്യാനത്തിലെ മണ്ണിലുള്ള ബാക്ടീരിയകള്‍ വലിച്ചെടുക്കുകയും ചെയ്യും .ഈ ബാക്ടീരിയകള്‍ പുറത്തു വിടുന്നത് കാര്‍ബണ്‍ഡൈ ഓക്‌സൈഡ് ആണ്. അതാണ് ചെടികള്‍ പിന്നിട് ആഹാരനിര്‍മ്മാണത്തിനായി ഉപയോഗിക്കുന്നത്. ഇങ്ങനെ ചെടികള്‍ക്ക് കുപ്പിക്കുള്ളില്‍ നിഷ്പ്രയാസം വളരാന്‍ സാധിക്കും.

വെള്ളമില്ലാതെ നാല്‍പ്പതിലധികം വര്‍ഷം ജീവിപ്പിച്ച ഒരു ചെടിയുടെ ചരിത്രം നിങ്ങള്‍ കേട്ടിട്ടുണ്ടോ ? 1960 ല്‍ കാനഡയിലെ ഡേവിഡ് ലാറ്റിമര്‍ തന്റെ കുപ്പിക്കുള്ളിലെ പൂന്തോട്ടത്തില്‍ ഒരു ചെടി നട്ടു . സ്‌പൈഡര്‍വര്‍ട്ട് എന്നയിനം ചെടിയാണ് ലാറ്റിമര്‍ നട്ടത്. 1972 വരെ അദ്ധേഹം അതിന് വെള്ളമൊഴിച്ചു. അടച്ചു വെച്ച ആ കുപ്പിയില്‍ പിന്നീടദ്ധേഹം വെള്ളമൊഴിച്ചതേയില്ല .എന്നാല്‍ ലാറ്റിമറെ അത്ഭുതപ്പെടുത്തിക്കൊണ്ട് ആ ചെടി കൂടുതല്‍ കരുത്തോടെ വളര്‍ന്നു. അങ്ങനെ അന്തരീക്ഷ വായുവും വെള്ളവും ഇല്ലാതെതന്നെ നാല്‍പ്പത് വര്‍ഷത്തോളം ആ കുപ്പിക്കുള്ളില്‍ സ്‌പൈഡര്‍വര്‍ട്ട് ചെടി ഇപ്പോഴും വളര്‍ന്നുകൊണ്ടിരിക്കുന്നു .53 വര്‍ഷം പ്രായമുള്ള ഈ കുപ്പിയിലെ ഉദ്യാനവും ലാറ്റിമറും അതോടെ ലോകത്തിന്റെ ശ്രദ്ധാ കേന്ദ്രമായി. ഇപ്പോള്‍ ലിറ്റിമറുടെ കുപ്പിക്കുള്ളിലെ പൂന്തോട്ടമാണ് ( ബോട്ടില്‍ ഗാര്‍ഡന്‍ ) കാനഡയിലെ പ്രധാന കാഴ്ച

കുപ്പിക്കുള്ളില്‍ പൂന്തോട്ടം ഒരുക്കും പോലെ ലളിതമാണ് ഡിഷ് ഗാര്‍ഡന്‍. പരന്ന മണ്‍ചട്ടികളിലും പോര്‍സലൈന്‍ ചട്ടികളിലുമൊക്കെ ഡിഷ് ഗാര്‍ഡന്‍ ഉണ്ടാക്കാം.പക്ഷെ കുപ്പി ഉദ്യാനത്തേക്കാള്‍ സൂര്യപ്രകാശം വേണമെന്നതിനാല്‍ ജനാലയ്ക്കടുത്തോ സിറ്റൗട്ടിലോ വെക്കുന്നതാണ് ഉചിതം. നേരിട്ട് വെയില്‍ കൊള്ളും വിധവും വെക്കാം.ഡിഷുകള്‍ക്ക് അടിത്തട്ടിലായി ചരല്‍, കരി, നടില്‍ മിശ്രിതം എന്നിവ നിരക്കുക. ഡിഷിന്റെ 3/4 ഭാഗം ഇങ്ങനെ നിറക്കാം. ഉയരം കുറഞ്ഞ ഇനം കള്ളിച്ചെടികള്‍ ( കാക്റ്റ്‌സ്) ,സക്കുലന്റ് വിഭാഗത്തില്‍പ്പെട്ട ചെടികള്‍, ക്രിസ്റ്റാന്തസ്, ഹവോര്‍ത്തിയ തുടങ്ങിയവ ഡിഷ് ഗാര്‍ഡന് യോജിച്ചവയാണ്.

ഡിഷ് ഗാര്‍ഡനുണ്ടാക്കുന്ന ചട്ടികളില്‍ വെള്ളം വാര്‍ന്നു പോകാനുള്ള ഡ്രയിനേജ് സുഷിരങ്ങള്‍ കാണാറില്ല. അതിനാല്‍ വെള്ളക്കെട്ട് ഉണ്ടാക്കാത്ത വിധം ശ്രദ്ധയോടെ വേണം നനക്കാന്‍. ഇത്തരം ചെടികള്‍ക്ക് അധികം വെള്ളം ആവശ്യവുമില്ല. ചെടികളുടെ ചുവടുഭാഗം ഉരുളന്‍ കല്ലുകള്‍ ഉപയോഗിച്ച് അലങ്കരിക്കുകയും ചെയ്യാം. ഈ അവധിക്കാലത്ത് കുപ്പിക്കുള്ളിലെ പൂന്തോട്ടവും ഡിഷ് ഗാര്‍ഡനും ഒരുക്കി വിട് കൂടുതല്‍ മനോഹരമാക്കാം.
ഈ അവധിക്കാലം കമ്പ്യൂട്ടര്‍ ഗെയിമുകള്‍ക്കുമപ്പുറം ആത്മാവുള്ള വിനോദങ്ങളാകണം. ഇന്നു തന്നെ കുപ്പിക്കുള്ളിലെ പൂന്തോട്ടമൊരുക്കാന്‍ തയ്യാറായിക്കൊളൂ …

(മാധ്യമപ്രവര്‍ത്തകനും, അധ്യാപകനും ,സൈക്കോളജിസ്റ്റുമാണ് ലേഖകന്‍.9946025819 )

sex abuse against child; special story
Posted by
13 March

കുട്ടികള്‍ക്ക് എതിരായ ലൈംഗിക അതിക്രം: രക്ഷിതാക്കള്‍ അറിയേണ്ട കാര്യങ്ങള്‍, പീഡോഫീലിയ ഒരു മാനസിക രോഗമാണ്

ഫഖ്‌റുദ്ധീന്‍ പന്താവൂര്‍

വാര്‍ത്തകള്‍ വായിക്കാനും കാണാനും ഭയമാണിന്ന് . മറ്റൊന്നുമല്ല കൊച്ചുകുട്ടികള്‍ വരെ ലൈംഗികമായി പീഡിപ്പിക്കപ്പെടുന്ന വാര്‍ത്തകള്‍ വര്‍ധിക്കുമ്പോള്‍ നമുക്ക് പത്രങ്ങള്‍ വായിക്കാനോ ചാനലുകള്‍ തുറക്കാനോ വയ്യാതായി. കേരളത്തില്‍ കഴിഞ്ഞ ഒരു മാസത്തിനിടയില്‍ നിരവധി പീഡനവാര്‍ത്തകളാണ് പുറത്തുവന്നത്. വാളയാറിലെ ചെറിയ പെണ്‍കുട്ടികളുടെ ആത്മഹത്യയിലേക്കു ശ്രദ്ധ ചെന്നു കയറുന്നതിനു കുറച്ചു ദിവസം മുന്‍പാണ് സോഷ്യല്‍ മീഡിയയില്‍ മഞ്ച് കൊടുത്ത് അഞ്ചാംക്ലാസുകാരിയുടെ കാമം നേടാന്‍ ശ്രമിക്കുന്ന യുവാവിനെയും (മുഹമ്മദ് ഫര്‍ഹാന്‍, ഇയാള്‍ക്കെതിരെ ഒടുവില്‍ പോലീസ് കേസെടുത്തു ) അയാളെ അനുകൂലിയ്ക്കുന്ന ചില ബുദ്ധിജീവികളെയും (ഭൂരിഭാഗവും യുവതികള്‍) കണ്ടത്. എന്തെങ്കിലും ലഭിക്കുമ്പോള്‍ പകരം എന്തെങ്കിലും നല്‍കണമല്ലോ. കഴിഞ്ഞ ദിവസം എന്റെയൊരു അഭിഭാഷക സുഹൃത്ത് മറ്റൊരു കേസ് പറഞ്ഞു. ഒരുത്തന്‍ ചെറിയൊരു പെണ്‍കുട്ടിക്ക് ഉമ്മ കൊടുത്ത് ആരോടും പറയാതിരിക്കാന്‍ 5 രൂപയും സമ്മാനിച്ചത്രേ. ഐസ്‌ക്രീമും ചോക്ലേറ്റും നല്‍കി ഒരു പെണ്‍കുട്ടിയുടെ പിഞ്ചു ശരീരത്തിന് വിലപേശുന്നത് കാണുമ്പോള്‍ നാമോര്‍ക്കുക അതാണ് പീഡോഫീലിയ എന്ന മാനസിക രോഗം.

എന്താണ് പിഡോഫീലിയ ?

പിഡോഫിലിയ എന്നത് മുതിര്‍ന്നവര്‍ക്ക് ‘കുട്ടികളോട് മാത്രം’ തോന്നുന്ന ലൈഗീകാസക്തിയാണ്. ഇതില്‍ പെണ്‍കുട്ടിയെന്നോ ആണ്‍കുട്ടിയെന്നോ വിത്യാസമില്ല .ഇരകളില്‍ കൂടുതലും പെണ്‍കുട്ടികളാണ് .കാണാന്‍ ഭംഗിയുള്ള ആണ്‍കുട്ടികള്‍ക്കുനേരെയും ഇത്തരം ലൈംഗിക താല്‍പര്യക്കാര്‍ വരാറുണ്ട് .
ലോകാരോഗ്യ സംഘടന അടക്കം, ഇതൊരു മാനസീക രോഗമായിത്തന്നെയാണ് അംഗീകരിച്ചിരിക്കുന്നതും.
‘സൈക്കാട്രിക് ഡിസോര്‍ഡര്‍’ അല്ലെങ്കില്‍ ലൈംഗീകതയിലെ തെരഞ്ഞെടുപ്പുമായി ബന്ധപ്പെട്ടുള്ള അപക്വ ചിന്താരീതിയാണ് ഒരാളെ പീഡോഫീലിയ ‘രോഗി’യാക്കുന്നത്.ഇതിനെ നോര്‍മല്‍ മാനസികാവസ്ഥയായി കാണാനാവില്ല .

പൊതുവെ പുരുഷന്മാരിലാണ് ഇത്തരം മനോരോഗികള്‍ ഉള്ളത്. ജനസംഖ്യയുടെ ഒരു ശതമാനത്തിലും വളരെ കുറവ് ആളുകള്‍ മാത്രമേ സമൂഹം വെറുക്കുന്ന ഈ മാനസീക വൈകൃതം പ്രകടിപ്പിക്കാറുള്ളൂ. ഇപ്പോള്‍ നമ്മുടെ നാട്ടില്‍ ഇവരുടെ എണ്ണം വര്‍ധിച്ചുവരുന്നുണ്ടോ എന്നാണ് ആശങ്ക. ഒരു ലൈംഗീക കുറ്റകൃത്യത്തിലോ, ശ്രമത്തിലോ മാത്രമേ ഇവരെ കണ്ടെത്താനാകുകയുള്ളൂ. ഇവര്‍ ഒരിക്കലും അവരുടെ ‘രോഗ’ത്തെ പുറത്തറിയിക്കാറില്ല. എങ്ങാനും പുറത്തറിഞ്ഞാല്‍ അതോടെ അവരുടെ ‘ലക്ഷ്യം’ തകരും എന്നതും, സമൂഹത്തില്‍ വെറുക്കപ്പെടും എന്നതുമാണ് കാരണം. പിഡോ രോഗികള്‍ മരണം വരെയും ഈ രോഗമായി തുടരും എന്നതും ശ്രദ്ധേയമാണ്. കുട്ടികള്‍ ഒഴിച്ച് മുതിര്‍ന്നവരായി ഇവര്‍ ഇത്തരം ബന്ധങ്ങള്‍ ആഗ്രഹിക്കാറില്ല. എങ്ങനെയാണിതിന് ഒരു ചികിത്സ ?

ലൈംഗീക താല്‍പ്പര്യം കുറയ്ക്കാനുള്ള മരുന്നുകളും തുടര്‍ച്ചയായ കൗണ്‍സിലിംഗ് മുഖേനയുള്ള ഇരയോടുള്ള അക്രമണാസക്തി കുറയ്ക്കാനുമുള്ള, മാനസീക ചികിത്സയാണ്, ഇതിനായി ഇതുവരെ കൊടുത്തുപോരുന്നത്. കൗണ്‍സിലിംഗിലൂടെയും വിവിധ തെറാപ്പികളിലൂടെയും ഇത് മാറ്റിയെടുക്കാം .
കൊച്ചുകുട്ടികളെ അമിതമായി ലാളിക്കുന്നവരാണ് ഇവരില്‍ ചിലര്‍ .മധുരം നല്‍കിയും ഇഷ്ടമുള്ളത് നല്‍കിയും ഇവര്‍ സ്‌നേഹിച്ച് താലോലിക്കാന്‍ തുടങ്ങും. തലോടലുകള്‍ക്ക് വാത്സല്യത്തിന്റെ മുഖമാണ് ഇവര്‍ പുറമേക്ക് നല്‍കുക . എളുപ്പത്തില്‍ ഇവരെ തിരിച്ചറിയില്ല . കുട്ടികളെ ഉമ്മവെച്ചും മറ്റുമാണ് ഇതു തുടങ്ങുക.

ആശങ്കയിലാവുന്ന രക്ഷിതാക്കള്‍

പീഡോഫീലിയ എന്ന മനോവ്യാപാരത്തെ അനുകൂലിച്ചും പ്രതികൂലിച്ചും അഭിപ്രായങ്ങള്‍ ഉയരുമ്പോള്‍! ചങ്കിടിയ്ക്കുന്നത് പെണ്‍കുട്ടികള്‍ വീട്ടിലുള്ള മാതാപിതാക്കള്‍ക്കു തന്നെയാണ്. എന്തുകൊണ്ട് കുഞ്ഞുങ്ങളെ മുതിര്‍ന്നവര്‍ തങ്ങളുടെ ലൈംഗിക ഉപകരണമാക്കുന്നുവെന്ന് നിങ്ങള്‍ ചിന്തിച്ചിട്ടുണ്ടോ ? സൗകര്യവും സുരക്ഷിതത്വവുമാണ് ഏറ്റവും വലിയ ഘടകം. കുഞ്ഞുങ്ങളെ ഭീഷണിപ്പെടുത്തിയോ അവര്‍ക്കിഷ്ടമുള്ള എന്തെങ്കിലും വസ്തുക്കള്‍ നല്‍കിയോ തങ്ങളുടെ ലൈംഗികാകര്‍ഷണത്തിലേയ്ക്ക് കുഞ്ഞുങ്ങളെ കൊണ്ടു വരാനാകും എന്ന വിശ്വാസം. ചെയ്യുന്ന തെറ്റിന്റെ ആഴമറിയാതെ കുട്ടികള്‍ ലൈംഗികതയിലേക്ക് ആകര്‍ഷിക്കപ്പെടാനും സാധ്യതയുണ്ട്. ചെറിയ പെണ്‍കുട്ടികള്‍ ലൈംഗികാതിക്രമത്തിന് ഇരയായ മിക്ക കേസുകളിലും ഭയപ്പെടുത്തുന്ന സത്യം പലകാരണങ്ങളാലും ഇവര്‍ ആകര്‍ഷിക്കപ്പെടുന്നു എന്നതാണ്.

അതുകൊണ്ടു തന്നെയാണ് പീഡോഫീലിയ ബാധിതര്‍ തങ്ങളുടെ തെറ്റിനെ മനഃപൂര്‍വ്വമാണെങ്കിലും ന്യായീകരിയ്ക്കാന്‍ ശ്രമിക്കുന്നതും. കുട്ടികള്‍ ഇത് ആസ്വദിക്കുന്നതിനാല്‍ ഇതൊരു തെറ്റല്ല എന്ന വാദിക്കുന്നവര്‍ സമൂഹത്തിലുണ്ട് മനോരോഗികളാണ് ഇവര്‍. ആര് ന്യായീകരിച്ചാലും ഇതിനെ നമുക്ക് അംഗീകരിക്കാന്‍ കഴിയില്ല. എല്ലായ്‌പ്പോഴും കുട്ടികള്‍ ആകര്‍ഷിക്കുകയുമല്ല, മറിച്ച് ഭീഷണിപ്പെടുത്തലിലൂടെയും അവരെ ഏറെക്കുറെ നിശ്ശബ്ദരാക്കാനും ഇവര്‍ ശ്രമിക്കുകയുമാണ് ചെയ്യുന്നത്. പലപ്പോഴും ഇത്തരം കാര്യങ്ങള്‍ കുറച്ച് കഴിഞ്ഞിട്ട് മാത്രമാണ് രക്ഷിതാക്കളെ അറിയാറ്. കുട്ടികളെ അമ്മമാര്‍ ശരിയായ രീതിയില്‍ ഒപ്പം നിര്‍ത്തിയാല്‍ മാത്രമെ ഇതില്‍ നിന്ന് രക്ഷിച്ചെടുക്കാനാവൂ .

കുട്ടികള്‍ക്കു ലൈംഗികത ആസ്വദിയ്ക്കാന്‍ കഴിയുമോ?

ഈ ചോദ്യം ഏറെ പ്രസക്തമാണ്.

കഴിയും എന്നു തന്നെയാണ് ശാസ്ത്രത്തിന്റെ ഉത്തരം. പക്ഷെ ലൈംഗികതയെ അതിന്റേതായ ആഘോഷങ്ങളിലല്ല മറിച്ച് അതിന്റെ ഇക്കിളിപ്പെടുത്തലുകളില്‍ ശരീരം ആസ്വദിക്കപ്പെടുന്നു എന്നതാണ് സത്യം. മൂന്ന് വയസ്സ് കഴിഞ്ഞ് നാല് വയസ്സിലെത്തുമ്പോള്‍ തന്നെ ഇത് തുടങ്ങും.
പക്ഷെ ഇത്തരം അനുഭവങ്ങള്‍ കുട്ടികളെ കടുത്ത മാനസിക പ്രശ്‌നങ്ങളിലേയ്ക്കു എത്തിക്കുകയാണ് പിന്നീടുണ്ടാവുക . കുട്ടിത്തത്തില്‍ നിന്നും വളര്‍ന്നു മുതിര്‍ന്ന ചിന്തകളിലേക്ക് എത്തുകയും ശരീരം എന്നാല്‍ അവനവന്റേതു മാത്രമാണെന്ന തിരിച്ചറിയലുകള്‍ ലഭിക്കുമ്പോഴുമാണ് അറിയാത്ത പ്രായത്തില്‍ അപരിചിതനായ ഒരാളാല്‍ ശരീരം ഉപയോഗപ്പെട്ടു എന്ന് അവള്‍ തിരിച്ചറിയുക. അതോടെ അവള്‍ വീണു പോകുന്ന ഒരു വലിയ ഗര്‍ത്തമുണ്ട്. നിരാശയുടെയും മാനസിക സംഘര്‍ഷങ്ങളുടെയും ആഴമേറിയ കടലില്‍ വീണതു പോലെ അവള്‍ തകര്‍ന്നു പോകാനും ആ ചിന്തകള്‍ മതി. ഈ നിരാശ അവളെത്തന്നെ ഇല്ലാതാക്കും.

ഏറ്റവും ബഹുമാനിക്കപ്പെടുന്നവരില്‍ നിന്നാണ് ഇത്തരം അനുഭവങ്ങളെങ്കില്‍ അതുണ്ടാക്കുന്ന മുറിവ് വലുതായിരിക്കും.
വീണ്ടുമൊരു ജീവിതത്തിലേയ്ക്ക് എത്തിപ്പെടുമ്പോഴും സ്വന്തം ശരീരത്തിനോടുള്ള വെറുപ്പ് പലപ്പോഴും പലതരത്തിലും അവള്‍ പ്രകടിപ്പിക്കുന്നതോടെ ദാമ്പത്യത്തില്‍പ്പോലും അസ്വാരസ്യങ്ങള്‍ വര്‍ധിച്ചു തുടങ്ങും. ഒപ്പം പുരുഷനെക്കുറിച്ചുള്ള ചിന്തകള്‍ പോലും അവള്‍ക്കു വെറുപ്പായിത്തുടങ്ങാം. കുട്ടികളോട് എല്ലാം സംസാരിക്കാന്‍ രക്ഷിതാക്കള്‍ സമയം കണ്ടെത്തണം .അവരുടെ ഷെല്‍ട്ടര്‍ നിങ്ങളാവണം. നല്ലൊരു കേള്‍വിക്കാരാകണം രക്ഷിതാക്കള്‍. ബാല്യത്തില്‍ അതിക്രൂരമോ അല്ലാത്തതോ ആയ ശാരീരിക ഉപദ്രവങ്ങള്‍ നേരിട്ട സ്ത്രീകളുടെ പിന്നീടുള്ള മാനസിക നിലകള്‍ ഏറെ അപകടകരമാണ്. സംതൃപ്തിയുള്ള ജീവിതം അവര്‍ക്ക് അനുഭവിക്കാനോ പകര്‍ന്നുനല്‍കാനോ കഴിഞ്ഞെന്നു വരില്ല .

(മാധ്യമപ്രവര്‍ത്തകനും ,അധ്യാപകനും ,സൈക്കോളജിസ്റ്റുമാണ് ലേഖകന്‍ 9946025819)

what do for learning disability special story
Posted by
29 November

പഠന വൈകല്യം പരിഹരിക്കാന്‍ എന്തുചെയ്യണം

-ഫഖ്‌റുദ്ധീന്‍ പന്താവൂര്‍

മിഥുന്‍ ക്ലാസിലെ ഏറ്റവും മിടുക്കനാണെന്നാണ് ടീച്ചര്‍ പറയുന്നത്. പഠിക്കുന്നത് ആറാം ക്ലാസില്‍. ക്ലാസ്സിലെ ഏത് ചോദ്യങ്ങള്‍ക്കും ആദ്യം ഉത്തരവുമായി ചാടി വീഴുന്നത് മിഥുന്‍ തന്നെ. പലപ്പോഴും ടീച്ചര്‍ക്ക് സഹികെടുന്നുമുണ്ട്. പക്ഷെ പ്രശനം അതല്ല. മിഥുന്‍ എഴുത്തില്‍ വളരെ പിന്നിലാണ്. ഒരു മൂന്നാം ക്ലാസുകാരന്റെ എഴുത്താണെന്നാണ് ടീച്ചര്‍ പറയുന്നത്. എഴുത്തെല്ലാം തെറ്റ്. ഉത്തരങ്ങള്‍ എല്ലാം അറിയുന്ന മിഥുന് അത് പേപ്പറില്‍ എഴുതിഫലിപ്പിക്കാനാകുന്നില്ല. ഇതില്‍പരം സങ്കടം ആ രക്ഷിതാക്കള്‍ക്ക് വേറെയുണ്ടോ.

മിഥുനെപ്പോലെ നിരവധി കുട്ടികള്‍ കാണാം. മറ്റു കുട്ടികളെ പോലെ ബുദ്ധിപരമായി ഉയര്‍ന്ന് നില്‍ക്കുന്നവരായിട്ടുകൂടി ചില വൈകല്യങ്ങള്‍. ഇത് എഴുതാനാകാം. മറ്റു ചിലര്‍ക്ക് വായനയിലാകം. ചിലര്‍ക്ക് കണക്കിലാകാം. ഇതിനെയാണ് പൊതുവെ പഠന വൈകല്യം എന്ന് പറയുന്നത്. പഠനവൈകല്യമുള്ള കുട്ടികള്‍ മന്ദബുദ്ധികളല്ലന്ന് ആദ്യം തിരിച്ചറിയുക. ജനിതകവും, സാമൂഹികവും, കുടുംബാന്തരീക്ഷവുമായ കാരണങ്ങള്‍കൊണ്ടാണ് കുട്ടികളില്‍ ഇത്തരം വൈകല്യങ്ങള്‍ ഉണ്ടാകുന്നത്. ചെറുപ്രായത്തില്‍ തന്നെ ഇത് കണ്ടെത്തി ശാസ്ത്രീയമായ പരിഹാരമാര്‍ഗങ്ങള്‍ ക്ഷമയോടെ നല്‍കി വന്നാല്‍ പഠന വൈകല്യങ്ങള്‍ മാറ്റിയെടുക്കാനാവും.നിര്‍ഭാഗ്യവശാല്‍ ക്ലാസ് റൂമിലെ പഠന വൈകല്യക്കാരെ മന്ദബുദ്ധികളാക്കുന്ന ചില അധ്യാപകരും ഇവരെ മണ്ടന്മാരായി അധിക്ഷേപിക്കുന്ന ചില രക്ഷിതാക്കളും ഇവരുടെ നല്ല ഭാവിയും ഉള്ളിലെ കഴിവും നഷ്ടപ്പെടുത്തുകയാണ്.

കാഴ്ചയുടെ കുറവ് കൊണ്ട് ക്ലാസില്‍ മറ്റു കുട്ടികള്‍ക്കൊപ്പം വായിക്കാന്‍ കഴിയാത്തവരെ പഠനെവെകല്യക്കാരായി കാണരുത്. അതുപോലെ കേള്‍വി പ്രശ്‌നം കൊണ്ട് പഠനത്തിലും വായനയിലും പിന്നിലായിപ്പോകുന്നവരുമുണ്ടാകാം. ഇവരും പഠനവൈകല്യക്കാരല്ല. പക്ഷെ അവരുടെ കുറവുകള്‍ കണ്ടെത്തി യഥാ സമയം പരിഹരിച്ചില്ലെങ്കില്‍ അത് പഠനവൈകല്യത്തിലെത്തുകയും ചെയ്യും.

പഠന വൈകല്യം പ്രധാനമായും വായിക്കാനുള്ള കഴിവ് കുറവ്, എഴുതാനുള്ള ശേഷി ഇല്ലായ്മ ,കണക്കില്‍ പിന്നിലാവുക എന്നതിലാണ്. കുട്ടികള്‍ പുസ്തകം തല തിരിച്ച് പിടിച്ച് വായിക്കുക. മിറര്‍ ഇമേജ് രീതിയില്‍ (പിറകിലേക്ക് വായിക്കുക) അക്ഷരങ്ങള്‍ കൂട്ടിവായിക്കാന്‍ കഴിയാതാവുക, സാവധാനം വായിച്ചെടുക്കുക ,ചിഹ്നങ്ങള്‍ തിരിച്ചറിയാതാവുക, തപ്പിത്തടത്ത് വായിക്കുക ,ഊഹിച്ച് വായിക്കുക
ഇതെല്ലാം അതിന്റെ ചില ലക്ഷണങ്ങള്‍ മാത്രം.

എഴുതാന്‍ കഴിയാതാവുക എന്നാല്‍ ലക്ഷണങ്ങള്‍ പലതാണ്. ദീര്‍ഘസമയമെടുത്ത് എഴുതേണ്ടിവരിക, വാക്യങ്ങളെ തിരിച്ചെഴുതുക, എഴുതാനുള്ള കഴിവില്ലായ്മ, കൈയ്യക്ഷരം മോശമാവുക, സ്വയം എഴുതിയത് തന്നെ മനസ്സിലാകാതാവുക എന്നിവ ചില ലക്ഷണങ്ങള്‍ മാത്രം. എഴുത്തിലും വായനയിലും കഴിവുകള്‍ എല്ലാം ഉണ്ടെങ്കിലും കണക്കില്‍ വളരെ പിന്നിലാകുന്ന കുട്ടികള്‍. ചെറിയ സംഖ്യകള്‍ പോലും കൂട്ടാനാ കുറക്കാനാ കഴിയാതെവരിക ഇതൊക്കെയാണ് പ്രാഥമിക ലക്ഷണങ്ങള്‍.

ആഴത്തിലുള്ള പഠനവൈകല്യങ്ങള്‍ മൂന്ന് വയസ്സില്‍ തന്നെ കണ്ട് തുടങ്ങും. വാക്കുകള്‍ കൂട്ടിപ്പറയാന്‍ കഴിയാത്ത ആ നാളില്‍ തന്നെ ഇത് ചികിത്സിച്ച് തുടങ്ങിയാല്‍ നന്ന്. ചില വൈകല്യങ്ങള്‍ മൂന്നാം ക്ലാസിലെത്തുന്നതോടെയാണ് കണ്ട് തുടങ്ങുക. പഠന വൈകല്യമുള്ള കുട്ടികളെ ഒരിക്കലും അതിന്റെ പേരില്‍ ശിക്ഷിക്കരുത്. ക്ഷമയോടെ അവന്റെ കുറവുകളെ നേരിടുക. മോട്ടിവേഷന്‍ നല്‍കുക .കുറ്റപ്പെടുത്താതിരിക്കുക. ചെറിയതാണെങ്കിലും മികവുകളെ പ്രോത്സാഹിപ്പിക്കുക, മാനസിക ധൈര്യം കൊടുക്കുക ഇതൊക്കെയാണ് രക്ഷിതാക്കളും അധ്യാപകരും ശ്രദ്ധിക്കേണ്ട പ്രധാന കാര്യങ്ങള്‍. കുട്ടികളാടൊപ്പം നില്‍ക്കണം എല്ലാ കാര്യത്തിലും. അവര്‍ക്ക് മാനസികമായ പിന്തുണ എപ്പോഴും നല്‍കണം. നിരന്തരം മോട്ടിവേറ്റഡ് ചെയ്ത് പഠന താല്‍പര്യം ഇത്തരം കുട്ടികളില്‍ ഉണ്ടാക്കാന്‍ കഴിഞ്ഞാല്‍ പഠന വൈകല്യം വലിയൊരളവില്‍ ഇല്ലാതാക്കാം.

(അധ്യാപകനും, മാധ്യമപ്രവര്‍ത്തകനും, ഹിപ്പ്‌നോട്ടിക്കല്‍ കൗണ്‍സിലറും, മൈന്റ് കണ്‍സള്‍ട്ടന്റുമാണ് ലേഖകന്‍. 9946025819 )