Cooking gas cylinder fraud by IOC and  other companies
Posted by
27 February

പാചകവാതക സിലിണ്ടറുകളുടെ തൂക്കത്തില്‍ പൊതുമേഖല എണ്ണക്കമ്പനികളുടെ തട്ടിപ്പ്

കൊച്ചി: പാചകവാതക സിലിണ്ടറുകളുടെ തൂക്കത്തില്‍ പൊതുമേഖല എണ്ണക്കമ്പനികള്‍ തട്ടിപ്പ് കാണിക്കുന്നുവെന്ന് ലീഗല്‍ മെട്രോളജി വിഭാഗം കണ്ടെത്തി. ഗാര്‍ഹികാവശ്യത്തിനുള്ള സിലിണ്ടറുകളില്‍ 700 ഗ്രാം വരെ കുറവുണ്ടെന്നാണ് കൊച്ചിയില്‍ ലീഗല്‍ മെട്രോളജി വിഭാഗം നടത്തിയ പരിശോധയില്‍ കണ്ടെത്തിയത്. ഇതേ തുടര്‍ന്ന് ഐഒസി അടക്കമുള്ളവരില്‍ നിന്ന് ലക്ഷക്കണക്കിന് രൂപ പിഴയീടാക്കിയതാണി റിപ്പോര്‍ട്ടുകള്‍.

ഗ്യാസ് സിലിണ്ടര്‍ പതിവിലും നേരത്തെ കാലിയാവുന്നെന്ന വീട്ടമ്മമാരുടെ പരാതിയെ തുടര്‍ന്നാണ് ലീഗല്‍ മെട്രോളജി വകുപ്പ് കൊച്ചിയില്‍ പരിശോധനയ്ക്ക് ഇറങ്ങിയത്. അന്വേഷണത്തില്‍ തട്ടിപ്പിന്റെ കേന്ദ്രബിന്ദു ഐഒസി ബോട്ട്ലിംഗ് പ്ലാന്റാണെന്ന് വ്യക്തമായി. ഉദയംപേരൂരിലെ ബോട്ട്ലിംഗ് പ്ലാന്റിലെത്തിയപ്പോള്‍ കണ്ടത് നിറച്ച് വച്ച ഭൂരിഭാഗം സിലണ്ടറിലും നിയമാനുസൃതമായ തൂക്കമില്ല. 14.2 കിലോ എല്‍പിജി വേണ്ടിടത്ത് ഓരോ സിലിണ്ടറിലും കുറവ് 700 ഗ്രാം വരെയാണ്.

ആദ്യതവണത്തെ അപരാധം എന്ന നിലയില്‍ ലീഗല്‍ മെട്രോളജി വകുപ്പ് ഐഒസിയില്‍ നിന്ന് ഏഴര ലക്ഷം രൂപ പിഴ ഈടാക്കി. വാങ്ങുന്നതിന് മുന്പ് ഉപഭോക്താവ് സിലണ്ടറിന്റെ തൂക്കം നോക്കാന്‍ തയ്യാറായാല്‍ തട്ടിപ്പ് തടയാമെന്ന് അധികൃതര്‍ പറയുന്നു. ഓരോ സിലിണ്ടറിലും 14.2 കിലോഗ്രാം എല്‍പിജിയാണ് വേണ്ടത്.

ഇതും കുറ്റിയുടെ ഭാരവും സിലിണ്ടറിന് മുകളില്‍ രേഖപ്പെടുത്തിയിട്ടുണ്ടാകും. 15.8 കിലോഗ്രാമാണ് സിലിണ്ടറിന്റെ ഭാരമെങ്കില്‍ എല്‍പിജി കൂടി ചേര്‍ത്ത് മൊത്തം ഭാരം 30 കിലോ വരണം. പാചകവാതകം വീട്ടിലെത്തിക്കുന്ന വാഹനങ്ങളിലും തൂക്കം നോക്കുന്ന യന്ത്രം നിര്‍ബന്ധമായും സൂക്ഷിക്കണമെന്നാണ് നിയമം.

MT Ramesh Criticizes Pinarayi
Posted by
27 February

ആര്‍എസ്എസിനെ നിയമസഭയില്‍ പിണറായി വിമര്‍ശിച്ചത് തരംതാണ നിലപാടാണെന്ന് എംടി രമേശ്

തിരുവനന്തപുരം: മുഖ്യമന്ത്രി പിണറായി നിയമസഭയില്‍ ആര്‍എസ്എസിനെ വിമര്‍ശിച്ചത് തരംതാണ നിലപാടാണെന്ന വിമര്‍ശനവുമായി ബിജെപി സംസ്ഥാന ജനറല്‍ സെക്രട്ടറി എംടി രമേശ്. സംസ്ഥാനത്തെ സ്ത്രീ സുരക്ഷയെപ്പറ്റിയും ക്രമസമാധാന നിലയുടെ തകര്‍ച്ചയെപ്പറ്റിയും പറയാന്‍ മറുപടി ഇല്ലാത്തതിനാലാണ് മുഖ്യമന്ത്രി ആര്‍എസ്എസിനെ വിമര്‍ശിക്കുന്നതെന്ന് എംടി രമേശ്.

ആര്‍എസ്എസിനെ വിമര്‍ശിക്കാന്‍ ധാരാളം പൊതുവേദികള്‍ ഉണ്ടെന്നിരിക്കെ അതിന് നിയമസഭയെ ഉപയോഗിച്ചത് തരംതാണ നിലപാടാണ്. ഉത്തരം മുട്ടുമ്പോള്‍ കൊഞ്ഞനം കുത്തുന്ന രീതിയാണ് മുഖ്യമന്ത്രിയുടേത്. പിണറായി ഭരണത്തില്‍ കേരളം ക്രിമിനലുകളുടെ താവളമായി മാറിയെന്ന റിപ്പോര്‍ട്ടില്‍ നിന്ന് ഒളിച്ചോടാനാണ് മുഖ്യമന്ത്രി ശ്രമിക്കുന്നതെന്നും രമേശ് കുറ്റപ്പെടുത്തി.

ആര്‍എസ്എസിനെ കാലില്ലാത്തവരോട് ഉപമിച്ച മുഖ്യമന്ത്രി സ്വന്തം പാര്‍ട്ടിയെപ്പറ്റി ഒന്ന് ആലോചിക്കണം. ഒന്ന് ഇഴയാന്‍ പോലും കെല്‍പ്പില്ലാത്ത പ്രസ്ഥാനത്തിന്റെ നേതാവാണ് താനെന്ന് പിണറായി മനസ്സിലാക്കണം. ഏത് നിമിഷവും ചിതയിലേക്ക് എടുക്കാവുന്ന അവസ്ഥയാണ് പിണറായിയുടെ പാര്‍ട്ടിക്ക്. കഴിഞ്ഞ 90 വര്‍ഷമായി ഇരുകാലിലും നിവര്‍ന്ന് നിന്നാണ് ആര്‍എസ്എസ് പ്രവര്‍ത്തിച്ചത്. അതേ കാലയളവില്‍ തന്നെ പ്രവര്‍ത്തനം തുടങ്ങിയ സിപിഎമ്മിന്റെ അവസ്ഥ ഇങ്ങനെയായത് എന്തുകൊണ്ടാണെന്ന് വിലയിരുത്താന്‍ തയാറാകണം. ആരെയും ഭീഷണിപ്പെടുത്തുന്ന രീതി ആര്‍എസ്എസിനില്ല. പേടിയില്ലാത്തവര്‍ എന്തിനാണ് നിയമസഭയില്‍ ഉള്‍പ്പടെ വിലപിക്കുന്നതെന്നും എംടി രമേശ് പ്രസ്താവനയില്‍ ചോദിച്ചു.

society against renjiths note
Posted by
27 February

താങ്കളുടെ തിരുത്ത് തിരുത്തല്ല, സ്ത്രീവിരുദ്ധതയുടെ ആവര്‍ത്തനമാണ് : രഞ്ജിത്തിനെതിരെ പ്രതികരിച്ച് സാംസ്‌കാരിക ലോകം

കൊച്ചി : ഇന്ന് മാതൃഭൂമിയില്‍ ആക്ഷേപങ്ങളും അഭിപ്രായങ്ങളും എന്ന കോളത്തില്‍ കള്ളുകുടി നിര്‍ത്തിയത് നന്നായി ഇല്ലെങ്കില്‍ ഞാന്‍ നിന്നെ ബലാത്സംഗം ചെയ്‌തേനെ’ എന്ന സ്പിരിറ്റിലെ സംഭാഷണത്തെ ‘ ഈ നിമിഷം ഭവതിയോട് തോന്നിയ ശാരീരികാകര്‍ഷണത്തിന്റെ പേരില്‍ ഞാന്‍ ഖേദിക്കുന്നു, എന്നോട് പൊറുക്കണം എന്ന് അപേക്ഷിക്കുന്നു’ എന്ന് തിരുത്തിയെഴുതുന്നുവെന്ന രഞ്ജിത്തിന്റെ പ്രസ്താവനയെ തുടര്‍ന്ന്‌സിനിമാ മേഖലയില്‍ നിന്നുള്‍പെടെയുള്ളവര്‍ വിമര്‍ശനവുമായി രംഗത്ത്.ഇത്രയുംകാലം കച്ചവടത്തിന്റെ പേരും പറഞ്ഞ് നിരൂപകര്‍ക്കുമേല്‍ കുതിരകയറിയിരുന്ന പുരുഷകേസരികള്‍ക്ക് പൊള്ളിത്തുടങ്ങിയിരിക്കുന്നു എന്ന് വിഷയത്തില്‍ ഛായാഗ്രാഹകന്‍ പ്രതാപ് ജോസഫും പ്രതികരിച്ചു.

ആ ഡയഗോലുകളൊന്നും കഥാപാത്രങ്ങളുടേതല്ലെന്നും സംവിധായകരുടെ ഉള്ളില്‍ ഉറഞ്ഞുകിടക്കുന്ന മാടമ്പിത്തരത്തിന്റേയാണെന്നും മനസിലാക്കാന്‍ ഈ ഒരൊറ്റ വരി മതി. താരങ്ങള്‍ തിരുത്തിയാല്‍ മാത്രം കാര്യമില്ല തിരുത്തേണ്ടത് സംവിധായകരും രചയിതാക്കളും തന്നെയാണെന്ന് സംവിധായകന്‍ സനല്‍കുമാര്‍ ശശിധരന്‍ പറഞ്ഞു.

എന്‍എസ് മാധവന്‍ തിരുത്തില്‍ ഒരൊറ്റ വാക്കാണ് തിരുത്തിയത്. ആ തിരുത്ത് ചരിത്രത്തിലെ ഒരു പാട് തെറ്റുകളുടെ തിരുത്തായിരുന്നു. അതിന് കഴിയണമെങ്കില്‍ തെറ്റ് എന്താണ് എന്ന ബോധ്യം ഉണ്ടാവണം.
വാക്കുകള്‍ ചരിത്രത്തെയും കാഴ്ചപ്പാടുകളേയും രാഷ്ട്രീയത്തേയും നിര്‍മിക്കുന്നതെങ്ങനെയാണ് എന്ന് തിരിച്ചറിയാന്‍ പറ്റണം.പെണ്ണിനു മേല്‍ വാക്ക് കൊണ്ടും നോക്കു കൊണ്ടും ദൃശ്യങ്ങള്‍ കൊണ്ടും സ്ഥാപിച്ചെടുത്തിട്ടുള്ള അധികാരത്തില്‍ നിന്ന് പുറത്തു വരാന്‍ സ്വയം കഴിയണം.സ്ത്രീവിരുദ്ധ പരാമര്‍ശങ്ങള്‍ തിരുത്തുക എന്ന് പറഞ്ഞാല്‍ ശരിയും നന്മയും മാത്രമുള്ള കഥാപാത്രങ്ങളെ സൃഷ്ടിക്കുക എന്നല്ല അര്‍ത്ഥം എന്ന മിനിമം ധാരണയെങ്കിലും വേണം.താങ്കളുടെ തിരുത്ത് തിരുത്തല്ല, സ്ത്രീവിരുദ്ധതയുടെ ആവര്‍ത്തനമാണെന്ന് മാധ്യമ പ്രവര്‍ത്തക മനില സി മോഹന്‍ തുറന്നടിച്ചു.

pc-george mla -apperciate -on-pinarayi vijayans manglore speech
Posted by
27 February

കാലുകുത്താന്‍ അനുദിക്കില്ലെന്ന് പറഞ്ഞിടത്ത് എത്തി പറയേണ്ട കാര്യങ്ങള്‍ കൃത്യമായി പറഞ്ഞു; മുഖ്യമന്ത്രിയുടെ മംഗലാപുരത്തെ പ്രസംഗത്തില്‍ അഭിമാനിക്കുന്നു; പിണറായിയെ പുകഴ്ത്തി പിസി ജോര്‍ജ് എംഎല്‍എ

തിരുവനന്തപുരം: മംഗലാപുരത്തെ മുഖ്യമന്ത്രി പിണറായി വിജയന്റെ പ്രസംഗത്തില്‍ അഭിമാനിക്കുന്നതായി പിസി ജോര്‍ജ് എംഎല്‍എ. മംഗലാപുരത്തെ മുഖ്യമന്ത്രിയുടെ പ്രസംഗം കൃത്യമായിരുന്നെന്നും കാലുകുത്താന്‍ അനുദിക്കില്ലെന്ന് പറഞ്ഞിടത്ത് എത്തി പറയേണ്ട കാര്യങ്ങള്‍ അദ്ദേഹം പറഞ്ഞുവെന്നും പിസി ജോര്‍ജ് പറഞ്ഞു.

കര്‍ണാടകത്തില്‍ കാലു കുത്താന്‍ അനുവദിക്കില്ലെന്ന സംഘപരിവാര്‍ ഭീഷണിക്ക് കടുത്ത ഭാഷയിലായിരുന്നു മുഖ്യമന്ത്രി മറുപടി നല്‍കിയത്. ‘മുഖ്യമന്ത്രി അല്ലാത്ത പിണറായി വിജയന്‍ ഇന്ദ്രനെയോ ചന്ദ്രനെയോ ഭയപ്പെടാത്ത ആളാണ്, അതുകൊണ്ട് വിരട്ടൊന്നും ഇങ്ങോട്ടു വേണ്ട’ന്നായിരുന്നു മുഖ്യമന്ത്രി പറഞ്ഞത്.

ബ്രണ്ണന്‍ കോളജില്‍ നിന്നു താന്‍ പഠനം കഴിഞ്ഞിറങ്ങിയ കാലം നിങ്ങള്‍ ഓര്‍ക്കണം. അന്ന് ആര്‍എസ്എസിന്റെ ഊരിപ്പിടിച്ച കത്തിക്കും വാളിനും ഇടയിലൂടെയാണ് താന്‍ അന്നു നടന്നു നീങ്ങിയത്. അന്ന് നിങ്ങള്‍ക്ക് എന്നെ ഒന്നും ചെയ്യാന്‍ സാധിച്ചിട്ടില്ലെങ്കില്‍ ഇപ്പോഴും ഒന്നും ചെയ്യാന്‍ സാധിക്കില്ല. ഇപ്പോള്‍ മുഖ്യമന്ത്രി അല്ലായിരുന്നെങ്കിലും തന്നെ ഒന്നും ചെയ്യാന്‍ സാധിക്കില്ലായിരുന്നെന്നും മുഖ്യമന്ത്രി പിണറായി പറഞ്ഞു. ഒരു ദിവസം ആകാശത്തുനിന്ന് പൊട്ടി വീണ ആളല്ല ഞാന്‍.

മുഖ്യമന്ത്രി ആയതു കൊണ്ടാണ് ഒരു സംസ്ഥാനത്ത് ചെല്ലുമ്പോള്‍ ആ സര്‍ക്കാര്‍ പറയുന്ന കാര്യങ്ങള്‍ അനുസരിച്ചത്. അതുകൊണ്ടാണ് സര്‍ക്കാര്‍ പോകരുതെന്നു പറഞ്ഞ സ്ഥലങ്ങളില്‍ പോകാതിരുന്നതും. മുഖ്യമന്ത്രി അല്ലാത്ത പിണറായി വിജയന്‍ ആയിരുന്നെങ്കില്‍ ഇന്നു താന്‍ എല്ലായിടത്തും എത്തിയേനെ. തടയാന്‍ നിങ്ങള്‍ക്കാകുമായിരുന്നില്ലെന്നും പിണറായി കൂട്ടിച്ചേര്‍ത്തു.

തനിക്കു സുരക്ഷ ഒരുക്കിയ കര്‍ണാടക സര്‍ക്കാരിനെ അഭിനനന്ദിക്കുന്നതായും പിണറായി പറഞ്ഞിരുന്നു. തടയുമെന്ന സംഘപരിവാറിന്റെ ഭീഷണി തള്ളി മംഗലാപുരത്തെത്തിയ കേരളാ മുഖ്യമന്ത്രി പിണറായി വിജയന് ഉജ്ജ്വല സ്വീകരമാണ് ഒരുക്കിയിരുന്നത്.

pinarayi vijayan against kummanam rajasekharan and vm sudheeran
Posted by
27 February

ആളുകളെ കൊന്നൊടുക്കുകയാണ് ആര്‍എസ്എസ് ശാഖകളുടെ ലക്ഷ്യം, ആര്‍എസ്എസുമായി സമരസപ്പെടാനാണ് കോണ്‍ഗ്രസിന്റെ ശ്രമം വര്‍ഗീയ വിഷയങ്ങളില്‍ കുമ്മനത്തിനും സുധീരനും ഒരേ സ്വരം; ആഞ്ഞടിച്ച് പിണറായി

തിരുവനന്തപുരം: ബിജെപി സംസ്ഥാന പ്രസിഡന്റ് കുമ്മനം രാജശേഖരനെയും കെപിസിസി പ്രസിഡന്റ് വിഎം സുധിരനേയും രൂക്ഷമായി വിമര്‍ശിച്ച് മുഖ്യമന്ത്രി പിണറായി വിജയന്‍. വര്‍ഗീയ വിഷയങ്ങളില്‍ കുമ്മനം രാജശേഖരനും വിഎം സുധീരനും ഒരേ സ്വരമാണെന്ന് മുഖ്യമന്ത്രി പിണറായി വിജയന്‍ പറഞ്ഞു. ആര്‍എസ്എസുമായി സമരസപ്പെടാനാണ് കോണ്‍ഗ്രസിന്റെ ശ്രമം. നിയമസഭയില്‍ ചോദ്യോത്തരവേളയില്‍ സംസാരിക്കുകയായിരുന്നു മുഖ്യമന്ത്രി. ആളുകളെ കൊന്നൊടുക്കുയാണ് ആര്‍എസ് ശാഖകളുടെ ലക്ഷ്യം. ആരാധനാലയങ്ങളിലെ ആയുധ പരിശീലനം തടയാന്‍ നിയമ നിര്‍മാണം നടത്തുമെന്നും മുഖ്യമന്ത്രി പറഞ്ഞു.

മംഗലാപുരത്ത് കാല്കുത്താന്‍ അനുവദിക്കില്ലെന്ന നിലപാടാണ് സംഘപരിവാര്‍ സ്വീകരിച്ചത്. ഇതിനെതിരെ മാംഗലാപുരത്തെ ജനങ്ങള്‍ ഒരേമനസോടെ നിന്നു. എന്തും വിളിച്ച് പറയാവുന്ന വിടുവായിത്തമായിത്തമായിട്ടാണ് ആര്‍എസ്എസ് പ്രസ്താവനയെ കണക്കാക്കുന്നത്. ബിജെപി നേതാവ് കെ സുരേന്ദ്രന്റെ കൊലയ്ക്ക് കൊലയും അടിക്ക് അടിയും നല്‍കിയിട്ടുണ്ടെന്ന വിവാദ പ്രസ്താവന പരിശോധിക്കുമെന്നും മുഖ്യമന്ത്രി സഭയെ അറിയിച്ചു.

നടിക്കെതിരായ ആക്രമണത്തില്‍ അന്വേഷണം നടക്കുകയാണ്. സംഭവത്തില്‍ ഗൂഢാലോചന ഇല്ലെന്ന നിലപാട് സര്‍ക്കാരിനില്ല. പൊലീസ് കൃത്യമായി കേസില്‍ ഇടപെട്ടിട്ടുണ്ടെന്നും മുഖ്യമന്ത്രി പറഞ്ഞു.

fake news against dileep dgp ordered investigation
Posted by
27 February

ദിലീപിനെതിരെ വ്യാജ പ്രചരണം നടത്തിയവര്‍ കുടുങ്ങും; അന്വേഷണത്തിന് ഡിജിപിയുടെ ഉത്തരവ്

കൊച്ചി: യുവനടി ആക്രമിക്കപ്പെട്ട സംഭവത്തില്‍ നടന്‍ ദിലീപിനെതിരെ സോഷ്യല്‍ മീഡിയയിലൂടെ പ്രചരണം നടത്തിയവര്‍ക്കെതിരെ ഡിജിപി അന്വേഷണത്തിന് ഉത്തരവിട്ടു. ആസൂത്രിതമായി നടനെ കേസില്‍ പ്രതിയാക്കണമെന്ന തരത്തിലായിരുന്നു ചിലരുടെ നീക്കം. നടനെ പോലീസ് ചോദ്യം ചെയ്‌തെന്നും, പള്‍സര്‍ സുനിയുമായി അടുത്ത ബന്ധമുണ്ടെന്നുമുള്ള തരത്തിലാണ് വാര്‍ത്തകള്‍ പ്രചരിപ്പിച്ചത്. ഇതിനെതിരെ കഴിഞ്ഞ ദിവസം ഡിജിപിക്ക് ദിലീപ് പരാതി നല്‍കി.

പരാതിക്ക് പിന്നാലെ എറണാകുളം ഡിസിപി യതീഷ് ബി ചന്ദ്രയെ കേസിന്റെ ചുമതല ഏല്‍പ്പിച്ചു. നടിയും ദിലീപും തമ്മില്‍ പ്രശ്‌നത്തിലാണെന്നും ഇതിന് ക്വട്ടേഷന്‍ നല്‍കിയന്ന തരത്തിലുമായിരുന്നു വാര്‍ത്ത. പോലീസ് മഫ്തിയില്‍ ദിലീപിന്റെ വീട്ടിലെത്തി ചോദ്യം ചെയ്‌തെന്നും വാര്‍ത്ത പ്രചരിപ്പിച്ചു. ദിലീപിനൊപ്പം ഇത് തള്ളി അന്വേഷണ സംഘവും രംഗത്തെത്തിയിരുന്നു. ദിലീപിനെതിരെയുള്ള ദുഷ്പ്രചരണം അവസാനിപ്പിക്കണമെന്ന് സിനിമ ലോകവും പറഞ്ഞു.

Opposition walk out from assembly
Posted by
27 February

നിയമസഭയില്‍ പ്രതിപക്ഷ ബഹളം: ചോദ്യോത്തരവേള നിര്‍ത്തിവെച്ച് സ്ത്രീ സുരക്ഷ ചര്‍ച്ച ചെയ്യണമെന്ന് ആവശ്യം

തിരുവനന്തപുരം: കൊച്ചിയില്‍ യുവനടിക്ക് നേരെ ആക്രമണമുണ്ടായ പശ്ചാത്തലത്തില്‍ സ്ത്രീ സുരക്ഷ സംബന്ധിച്ച വിവരങ്ങള്‍ സഭയില്‍ ചര്‍ച്ചചെയ്യണമെന്ന് ആവശ്യപ്പെട്ട് നിയമസഭയില്‍ പ്രതിപക്ഷ ബഹളം. ചോദ്യോത്തരവേള നിര്‍ത്തിവെച്ച് ചര്‍ച്ച ചെയ്യണമെന്നാവശ്യവുമായി പ്രതിപക്ഷ എംഎല്‍എമാര്‍ പ്രതിഷേധം ആരംഭിക്കുകയായിരുന്നു. ഭക്ഷ്യ സിവില്‍സപ്ലൈസ് മന്ത്രി സഭയില്‍ സംസാരിച്ച് കൊണ്ടിരിക്കവേയാണ് അടിയന്തിര ചര്‍ച്ചയാവശ്യപ്പെട്ട് പ്രതിപക്ഷ എംഎല്‍എമാര്‍ നടുത്തളത്തില്‍ ഇറങ്ങിയത്.

സഭയില്‍ പ്രതിപക്ഷ നേതാവ് രമേശ് ചെന്നിത്തലയാണ് ചോദ്യോത്തരവേള നിര്‍ത്തിവെച്ച് സ്ര്തീ സുരക്ഷ ചര്‍ച്ച ചെയ്യണമെന്ന് ആവശ്യപ്പെട്ട് രംഗത്ത് വന്നത്. എന്നാല്‍ ചോദ്യോത്തരവേള പുരോഗമിക്കുന്നത് കണക്കിലെടുത്ത് സ്പീക്കര്‍ അനുമതി നിഷേധിക്കുകയായിരുന്നു.

ഇതിനിടെ സ്പീക്കറുടെ നടപടിയില്‍ പ്രതിഷേധിച്ച് പ്രതിപക്ഷ നേതാവിന്റെ നേതൃത്വത്തില്‍ അംഗങ്ങള്‍ സമ്മേളനത്തില്‍ നിന്നും ഇറങ്ങിപ്പോയി.

reason behind the fire of padmanaba swami temple
Posted by
27 February

പത്മനാഭ സ്വാമി ക്ഷേത്രത്തിലെ തീപിടുത്തത്തിന് കാരണം ഷോര്‍ട്ട് സര്‍ക്യൂട്ട്

തിരുവനന്തപുരം : ശ്രീ പത്മനാഭ സ്വാമി ക്ഷേത്രത്തിലെ തീപിടുത്തത്തിന് കാരണം ഷോര്‍ട്ട് സര്‍ക്യൂട്ടെന്ന് കെഎസ്ഇബി. പോസ്റ്റല്‍ വകുപ്പിന്റെ അക്കൗണ്ട്‌സ് വിഭാഗത്തിലെ ആറാം നമ്പര്‍ ഗോഡൗണിലുണ്ടായ ഷോര്‍ട്ട് സര്‍ക്യൂട്ടാണ് തീപിടുത്തത്തിനു കാരണമായത്.
തീപിടിത്തമുണ്ടായ ഉടന്‍ വിവിധ വകുപ്പുകള്‍ ഏകോപനത്തോടെ പ്രവര്‍ത്തിച്ചതിനാല്‍ വലിയ ദുരന്തമൊഴിവായെന്നും റവന്യു വകുപ്പിന്റെ റിപ്പോര്‍ട്ട് വ്യക്തമാക്കുന്നു. കെഎസ്ഇബിയുടെ കണ്ടെത്തല്‍ കൂടി ഉള്‍പ്പെടുത്തി ഇതേക്കുറിച്ചുള്ള വിശദ റിപ്പോര്‍ട്ട് തഹസില്‍ദാര്‍ തയാറാക്കി.

Kerala Online taxi drivers on strike
Posted by
27 February

യൂബര്‍-ഓല ടാക്‌സി ഡ്രൈവര്‍മാര്‍ സംസ്ഥാനത്ത് പണിമുടക്കുന്നു

കൊച്ചി: കേരളത്തിലെ ഓണ്‍ലൈന്‍ ടാക്‌സി ഡ്രൈവര്‍മാര്‍ ഇന്ന് പണിമുടക്കുന്നു. കര്‍ണാടകയ്ക്കു പിന്നാലെയാണ് കേരളത്തിലും ഓണ്‍ലൈന്‍ ടാക്സികളായ യൂബര്‍-ഓല ഡ്രൈവര്‍മാരുടെ 24 മണിക്കൂര്‍ പണിമുടക്ക് ആരംഭിച്ചത്. സംസ്ഥാനത്തെ 2000 യൂബര്‍-ഓല ഡ്രൈവര്‍ പണിമുടക്കില്‍ പങ്കെടുക്കുന്നുണ്ട്. വൈകീട്ട് മൂന്നിന് പാലാരിവട്ടം യൂബര്‍ ഓഫീസിലേക്ക് പ്രതിഷേധ പ്രകടനവും ധര്‍ണയും നടത്തുമെന്ന് സമരസമിതി അറിയിച്ചു. കമ്പനിയുടെ തൊഴിലാളി വിരുദ്ധ നയങ്ങളെത്തുടര്‍ന്നാണ് സമരം.

ശമ്പളത്തില്‍ ഏകീകൃത സംവിധാനം കൊണ്ടുവരിക, ഡ്രൈവര്‍മാരെ തൊഴിലാളികളായി അംഗീകരിക്കുക, മലയാളത്തില്‍ കസ്റ്റര്‍കെയര്‍ സര്‍വീസ് ആരംഭിക്കുന്ന എന്നിവയടക്കം 18 ആവശ്യങ്ങളാണ് കമ്പനിക്ക് മുന്നില്‍ വച്ചത്. എന്നാല്‍ ഒന്നു പോലും കമ്പനി അംഗീകരിക്കാത്തതിനെ തുടര്‍ന്നാണ് സമരത്തിലേക്ക് നീങ്ങുന്നതെന്ന് ഡ്രൈവര്‍മാരുടെ യൂണിയന്‍ വ്യക്തമാക്കി. ഡ്രൈവര്‍മാരെ കമ്പനി ചൂഷണം ചെയ്യുന്നതിനെതിരേയാണ് ഈ സമരം.

മുമ്പ് 1000 രൂപ കമ്പനിക്ക് ലഭിച്ചിരുന്നപ്പോള്‍ 500 രൂപ ഡ്രൈവര്‍മാര്‍ക്കു ലഭിച്ചിരുന്നു. എന്നാല്‍ ഇപ്പോള്‍ ഇതു 100 രൂപയാക്കി കുറച്ചു. കമ്പനി ദിവസേന പുതിയ വാഹനങ്ങള്‍ പുറത്തിറക്കുന്നതും ഡ്രൈവര്‍മാരെയും കൊണ്ടുവരുന്നതും മൂലം തങ്ങള്‍ക്ക് ഓര്‍ഡറുകള്‍ കുറഞ്ഞുവരിയാണെന്ന് ഓള്‍കേരള ഓണ്‍ലൈന്‍ ടാക്സി ഡ്രൈവേഴ്സ് അസോസിയേഷന്‍ സെക്രട്ടറി ഷാജോ ജോസ് പറഞ്ഞു.

Free Wi-Fi ends
Posted by
27 February

പൊതുനിരത്തുകളിലെ സൗജന്യ വൈഫൈ സേവനം അവസാനിപ്പിക്കുന്നു

കൊല്ലം: ഇനിമുതല്‍ പൊതുനിരത്തുകളില്‍ സൗജന്യ വൈഫൈ സംവിധാനം ഉണ്ടായിരിക്കുന്നതല്ല. പൊതു നിരത്തുകളില്‍ ഗ്രാമപഞ്ചായത്തുകളും മുനിസിപ്പാലിറ്റികളും മറ്റു സ്ഥാപനങ്ങളും നല്‍കിയിരുന്ന സൗജന്യ വൈഫൈ സേവനം അവസാനിപ്പിക്കാന്‍ തീരുമാനം.

തദ്ദേശ സ്വയം ഭരണ സ്ഥാപനങ്ങള്‍ നല്‍കുന്ന സൗജന്യ വൈഫൈ സേവനം അവസാനിപ്പിക്കാന്‍ വികേന്ദ്രീകൃത ആസൂത്രണത്തിനുള്ള സംസ്ഥാന തല കോ-ഓര്‍ഡിനേഷന്‍ കമ്മറ്റിയുടേതാണ് ഈ തീരുമാനം.

നിരത്തുകളിലും ജംഗ്ഷനുകളിലും ബസ് സ്റ്റോപ്പുകളിലും വൈഫൈ നല്‍കുന്ന പദ്ധതി നടപ്പിലാക്കേണ്ട എന്ന തീരുമാനവും കമ്മറ്റി എടുത്തു. പല ഭരണസമിതികളും സൗജന്യ വൈഫൈ സേവനം നല്‍കുന്നതിനു വേണ്ടി തുക വകയിരുത്തിയിട്ടുണ്ട്. പദ്ധതി നടപ്പിലാക്കിയ പല സമിതികളും 75 ലക്ഷം രൂപ വരെ ബില്ലടക്കേണ്ടി വന്നിട്ടുണ്ട്.

സൗജന്യ വൈഫൈ സേവനത്തേക്കാള്‍ മുന്‍തൂക്കം നല്‍കേണ്ടുന്ന മറ്റു പല പദ്ധതികളുണ്ട് എന്ന നിലയിലാണ് ഈ തീരുമാനം.