പ്രദീപ് സിംഗ് ഖരോല എയര്‍ ഇന്ത്യ സിഎംഡിയായി ചുമതലയേറ്റു
Posted by
11 December

പ്രദീപ് സിംഗ് ഖരോല എയര്‍ ഇന്ത്യ സിഎംഡിയായി ചുമതലയേറ്റു

ന്യൂഡല്‍ഹി: സീനിയര്‍ ഐഎഎസ് ഓഫീസര്‍ പ്രദീപ് സിംഗ് ഖരോല എയര്‍ ഇന്ത്യയുടെ ചെയര്‍മാനും മാനേജിംഗ് ഡയറക്ടറുമായി ചുമതലയേറ്റു. കാലാവധി കഴിഞ്ഞിട്ട് മൂന്നു മാസത്തേക്ക് ഇടക്കാല സിഎംഡിയായി തുടരുന്ന രാജീവ് ബന്‍സാലിനു പകരക്കാരനായാണ് ഖരോല ചുമതലയേറ്റത്.

ബംഗളൂരു മെട്രോ റെയില്‍ കോര്‍പറേഷന്‍ ലിമിറ്റഡിന്റെ മാനേജിംഗ് ഡയറക്ടറായിരുന്ന ഖരോല കര്‍ണാടക കേഡറില്‍നിന്നുള്ള ഐഎഎസ് ഓഫീസറാണ്. എയര്‍ ഇന്ത്യയുടെ ഓഹരി വിറ്റഴിക്കലുമായി ബന്ധപ്പെട്ടു സര്‍ക്കാര്‍ അന്തിമരൂപം തയാറാക്കുന്ന സമയത്താണ് പുതിയ സിഎംഡിയായി ഖരോല ചുമതലയേല്‍ക്കുന്നത്. കേന്ദ്രസര്‍ക്കാരിന്റെ കീഴിലുള്ള എയര്‍ ഇന്ത്യയ്ക്ക് കോടികണക്കിന് രൂപയുടെ കടമാണ് നിലവിലുള്ളത്.

 

ജീന്‍സ് ധരിച്ച് കല്ല്യാണമണ്ഡപത്തില്‍ എത്തുന്ന പെണ്‍കുട്ടിയെ ആരും വിവാഹം കഴിക്കില്ലെന്ന് കേന്ദ്രസഹമന്ത്രി
Posted by
11 December

ജീന്‍സ് ധരിച്ച് കല്ല്യാണമണ്ഡപത്തില്‍ എത്തുന്ന പെണ്‍കുട്ടിയെ ആരും വിവാഹം കഴിക്കില്ലെന്ന് കേന്ദ്രസഹമന്ത്രി

ഗോരഖ്പൂര്‍: ജീന്‍സ് ധരിച്ച് കല്ല്യാണമണ്ഡപത്തിലെത്തുന്ന പെണ്‍കുട്ടിയെ വിവാഹം കഴിക്കാന്‍ യുവാക്കളാരും തയാറാകില്ലെന്ന കേന്ദ്രസഹമന്ത്രിയുടെ പ്രസ്താവന വിവാദത്തില്‍. ഞായറാഴ്ച ഗോരഖ്പൂര്‍ ക്ഷേത്രത്തില്‍ നടന്ന മഹാറാണാ പ്രതാപ് ശിക്ഷ പരിഷത്തിന്റെ സ്ഥാപന ദിനചടങ്ങില്‍ പങ്കെടുത്ത് സംസാരിക്കുകയായിരുന്നു മാനവവികസന സഹമന്ത്രി സത്യപാല്‍ സിങ്ങ്.

”വിവാഹമണ്ഡപത്തിലേക്ക് ജീന്‍സ് ധരിച്ച വരുന്ന പെണ്‍കുട്ടിയെ ആരും വിവാഹം കഴിക്കില്ലെന്നും അതുപോലെ സന്ന്യസിമാര്‍ പരമ്പരാഗത വസ്ത്രധാരണത്തില്‍ നിന്നും മാറി ജീന്‍സ് ധരിച്ചെത്തിയാലും ആരും ബഹുമാനിക്കില്ലെന്നും” സത്യപാല്‍ സിങ് പറഞ്ഞു. ഇന്ത്യന്‍ സംസ്‌കാരത്തിലെ വസ്ത്രധാരണത്തെ കുറിച്ച് സംസാരിക്കുകയായിരുന്നു അദ്ദേഹം. ചടങ്ങില്‍ ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് രചിച്ച രണ്ട് പുസ്തകങ്ങളുടെ പ്രകാശനവും നടന്നു.

RSS Leader Indresh Kumar Demands Law to Enforce ‘Respect’ for India
Posted by
11 December

രാജ്യസ്‌നേഹമില്ലാത്തവരെ ശിക്ഷിക്കാന്‍ നിയമം വേണം; ആര്‍എസ്എസ് നേതാവ്

ന്യുഡല്‍ഹി: രാജ്യസ്‌നേഹമില്ലാത്തവരെ ശിക്ഷിക്കാന്‍ നിയമം വേണമെന്ന് ആര്‍എസ്എസ്. രാജ്യത്തേയും ദേശീയപതാകയേയും അപമാനിക്കുന്നവരെ ശിക്ഷിക്കാന്‍ നിയമം കൊണ്ടുവരണമെന്ന് പറഞ്ഞ് ആര്‍എസ്എസ് നേതാവ് ഇന്ദ്രേഷ് കുമാര്‍ രംഗത്ത്. ഭാരതത്തെ ഇഷ്ടപ്പെടാത്തവര്‍ ഭാരതം വിട്ടുപോകുകയാണ് വേണ്ടതെന്നും ഇന്ദ്രേഷ് കുമാര്‍ പറഞ്ഞു.

കോണ്‍ഗ്രസ് രാജ്യത്തെ വിഭജിച്ചു. വിഭജനമാണ് ഇന്ത്യയെ സ്വാതന്ത്രം നേടാന്‍ സാധിച്ചതെന്ന് പറയുന്നത് നുണയാണ്. ജവഹര്‍ലാല്‍ നെഹ്‌റു രാജ്യത്തെ വിഭജിച്ചു, രാജ്യത്തെ ഒന്നാക്കിയത് സര്‍ദാര്‍ വല്ലഭായ് പട്ടേലാണെന്നും ഇന്ദ്രേഷ് കുമാര്‍ പറഞ്ഞു. അന്താരാഷ്ട്ര സമ്മര്‍ദ്ദം കൊണ്ട് ദോക്‌ലാ വിഷയത്തില്‍ ഇന്ത്യയ്ക്ക് മുന്നില്‍ ചൈനയ്ക്ക് കുനിയേണ്ടി വന്നുവെന്നും ഇന്ദ്രേഷ് കുമാര്‍ പറഞ്ഞു.

ആര്‍എസ്എസിന്റെ മുസ്ലീം സംഘടനയായ മുസ്ലീം രാഷ്ട്രീയ മഞ്ചിന്റെ മാര്‍ഗദര്‍ശക് ആണ് ഇന്ദ്രേഷ് കുമാര്‍. അജ്മീര്‍ ദര്‍ഗ സ്‌ഫോടനക്കേസില്‍ പ്രതിയായിരുന്നു ഇന്ദ്രേഷ് കുമാര്‍. മോഡി സര്‍ക്കാര്‍ അധികാരത്തില്‍ വന്നതിന് ശേഷം ഇന്ദ്രേഷ് കുമാറിനെ എന്‍ഐഐ വെറുതെ വിട്ടിരുന്നു.

ഇനി രാഹുല്‍ നയിക്കും; കോണ്‍ഗ്രസ് അദ്ധ്യക്ഷനായി രാഹുല്‍ ഗാന്ധി ഐക്യകണ്‌ഠേന തെരഞ്ഞെടുക്കപ്പെട്ടു, സ്ഥാനാരോഹണം ശനിയാഴ്ച
Posted by
11 December

ഇനി രാഹുല്‍ നയിക്കും; കോണ്‍ഗ്രസ് അദ്ധ്യക്ഷനായി രാഹുല്‍ ഗാന്ധി ഐക്യകണ്‌ഠേന തെരഞ്ഞെടുക്കപ്പെട്ടു, സ്ഥാനാരോഹണം ശനിയാഴ്ച

ന്യൂഡല്‍ഹി: ഇനി കോണ്‍ഗ്രസിനെ രാഹുല്‍ നയിക്കും. 19 വര്‍ഷത്തിന് ശേഷം കോണ്‍ഗ്രസില്‍ തലമുറ മാറ്റം. കോണ്‍ഗ്രസ് അദ്ധ്യക്ഷനായി നിലവിലെ ഉപാദ്ധ്യക്ഷന്‍ രാഹുല്‍ ഗാന്ധി ഐക്യകണ്‌ഠേന തിരഞ്ഞെടുക്കപ്പെട്ടു. ശനിയാഴ്ച രാവിലെ 11ന് എഐസിസി ആസ്ഥാനത്ത് നടക്കുന്ന ചടങ്ങില്‍ അമ്മയും നിലവിലെ പ്രസിഡന്റുമായ സോണിയാ ഗാന്ധിയില്‍ നിന്ന് രാഹുല്‍ ഗാന്ധി ചുമതലയേറ്റെടുക്കുമെന്ന് മുന്‍ കേന്ദ്ര മന്ത്രിയും എഐസിസിയുടെ തിരഞ്ഞെടുപ്പ് സമിതി അദ്ധ്യക്ഷനുമായ മുല്ലപ്പള്ളി രാമചന്ദ്രന്‍ വാര്‍ത്താ സമ്മേളനത്തില്‍ പറഞ്ഞു.

നാമനിര്‍ദ്ദേശ പത്രിക പിന്‍വലിക്കാനുള്ള അവസാന ദിവസമായ ഇന്ന് സമയം അവസാനിച്ചപ്പോള്‍ ഏക സ്ഥാനാര്‍ത്ഥിയായി രാഹുല്‍ മാത്രമാണ് ഉണ്ടായിരുന്നത്. രാഹുലിനായി 89 പത്രികളാണ് സമര്‍പ്പിക്കപ്പെട്ടത്. എല്ലാം അംഗീകരിച്ചു. സ്ഥാനാര്‍ത്ഥിയായി രാഹുല്‍ മാത്രമെ രംഗത്ത് ഉണ്ടായിരുന്നു എന്നതിനാല്‍ തന്നെ അദ്ദേഹം പ്രസിഡന്റായി തിരഞ്ഞെടുക്കപ്പെടുകയായിരുന്നെന്ന് മുല്ലപ്പള്ളി വിശദീകരിച്ചു.

സിനിമയെ വെല്ലുന്ന തിരക്കഥ; ഭര്‍ത്താവിനെ കൊലപ്പെടുത്തി കുഴിച്ചിട്ടു, ഒപ്പം താമസിക്കുന്നത് ഭര്‍ത്താവാണെന്ന് വരുത്തി തീര്‍ക്കാന്‍ കാമുകന്റെ മുഖം ആസിഡൊഴിച്ച് വികൃതമാക്കി
Posted by
11 December

സിനിമയെ വെല്ലുന്ന തിരക്കഥ; ഭര്‍ത്താവിനെ കൊലപ്പെടുത്തി കുഴിച്ചിട്ടു, ഒപ്പം താമസിക്കുന്നത് ഭര്‍ത്താവാണെന്ന് വരുത്തി തീര്‍ക്കാന്‍ കാമുകന്റെ മുഖം ആസിഡൊഴിച്ച് വികൃതമാക്കി

ഹൈദരാബാദ്: കാമുകനൊപ്പം ജീവിക്കാന്‍ യുവതി തയ്യാറാക്കിയത് സിനിമയെ വെല്ലുന്ന തിരക്കഥ. തെലങ്കാനയിലാണ് നാടിനെ ഞെട്ടിക്കുന്ന സംഭവം അരങ്ങേറിയത്. ഭര്‍ത്താവിനെ തലക്കടിച്ച് കൊലപ്പെടുത്തിയ യുവതി കാമുകന്റെ മുഖം ആസിഡൊഴിച്ച് വികൃതമാക്കി. ഭര്‍ത്താവിന്റെ കൊലപാതകം മറിച്ചുവെക്കാനും ഒപ്പം താമസിക്കുന്നത് ഭര്‍ത്താവ് തന്നെയാണെന്ന് വരുത്തി തീര്‍ക്കുന്നതിനും വേണ്ടിയാണ് സ്വാതി റെഡ്ഢിയെന്ന യുവതി കാമുകന്‍ രാജേഷിന്റെ മുഖം ആസിഡൊഴിച്ച് വികൃതമാക്കിയത്.

രണ്ടുവര്‍ഷം മുമ്പാണ് സ്വാതിയും സുധാകറും തമ്മിലുള്ള വിവാഹം നടന്നത്. രാജേഷുമായി അടുപ്പത്തിലായ സ്വാതി ഭര്‍ത്താവിനെ കൊലപ്പെടുത്താന്‍ പദ്ധതിയിടുകയായിരുന്നു. നവംബര്‍ 22 നാണ് നാഗര്‍കുര്‍നൂല്‍ ജില്ലയിലുള്ള വസതിയില്‍ വെച്ച് ഉറങ്ങികിടക്കുകയായിരുന്ന സുധാകറിനെ സ്വാതി തലക്കടിച്ച് കൊലപ്പെടുത്തിയത്. ശേഷം രാജേഷിന്റെ സഹായത്തോടെ സമീപത്തുള്ള വനത്തില്‍ മൃതശരീരം കുഴിച്ചിടുകയായിരുന്നു.

ശേഷം സുധാകര്‍ മരിച്ചിട്ടില്ലെന്നും ഒപ്പമുള്ളത് കാമുകനാണെന്ന് തിരിച്ചറിയാതിരിക്കുന്നതിനു വേണ്ടി രാജേഷിന്റെ മുഖത്ത് ആസിഡ് തളിച്ച് പൊള്ളലേല്‍പ്പിച്ചു. ഹൈദരാബാദില്‍ വെച്ച് അജ്ഞാതന്റെ ആസിഡ ആക്രമണത്തില്‍ ഭര്‍ത്താവിന് പൊള്ളലേറ്റുവെന്നാണ് സ്വാതി വീട്ടുകാരെ അറിയിച്ചത് രാജേഷിന്റെ ചികിത്സക്കായി അഞ്ചു ലക്ഷം രൂപ സുധാകറിന്റെ വീട്ടുകാര്‍ ചെലവഴിച്ചിരുന്നു. ചികിത്സക്കു ശേഷം മുഖം പ്ലാസ്റ്റിക് സര്‍ജറിയിലൂടെ സുധാകരന്റേതു പോലെയാക്കാനായിരുന്നു നീക്കം. എന്നാല്‍ പുതിയ സുധാകറിന്റെ പെരുമാറ്റത്തിലും സംസാരരീതിയിലുമെല്ലാം സംശയം തോന്നിയ മാതാവ് പോലീസ് സഹായം തേടി. പോലീസ് അന്വേഷണത്തില്‍ സ്വാതിയോടൊപ്പമുള്ളത് രാജേഷാണെന്ന് കണ്ടെത്തി.

പോലീസ് ചോദ്യം ചെയ്യലില്‍ സ്വാതി കുറ്റസമ്മതം നടത്തി.സ്വാതിയുടെ മൊഴിയുടെ അടിസ്ഥാനത്തില്‍ നടത്തിയ തെരച്ചിലിലില്‍ വനപ്രദേശത്തുനിന്ന് സുധാകറിന്റെ മൃതദേഹം കണ്ടെടുത്തു. സ്വാതിയെയും ചികിത്സയില്‍ കഴിയുന്ന രാജേഷിനെയും ഞായറാഴ്ച പോലീസ് അറസ്റ്റു ചെയ്തു.

അമിത് ഷായുടെ മകന്റെ കാര്യത്തില്‍ മൗനമെന്ത്? മോഡിയെ ചോദ്യശരങ്ങളില്‍ തളച്ച് രാഹുല്‍ ഗാന്ധി
Posted by
11 December

അമിത് ഷായുടെ മകന്റെ കാര്യത്തില്‍ മൗനമെന്ത്? മോഡിയെ ചോദ്യശരങ്ങളില്‍ തളച്ച് രാഹുല്‍ ഗാന്ധി

ന്യൂഡല്‍ഹി: ഗുജറാത്ത് തെരഞ്ഞെടുപ്പിനോട് അനുബന്ധിച്ച് ട്വിറ്ററില്‍ നടക്കുന്ന ഗുജറാത്ത് മാംഗേ ജവാബ് (ഗുജറാത്ത് ഉത്തരം ആവശ്യപ്പെടുന്നു) എന്ന ചോദ്യോത്തര പരിപാടിയില്‍ മോഡിയെ കുടുക്കി കോണ്‍ഗ്രസ് ഉപാദ്ധ്യക്ഷന്‍ രാഹുല്‍ ഗാന്ധി.

ജിഎസ്പിസി അഴിമതി, ഇലക്ട്രിസിറ്റി- മെട്രോ അഴിമതി, ഷാഹ് സാദ( അമിത് ഷായുടെ മകന്‍ ജയ് ഷാ ആരോപണ വിധേയനായ അഴിമതി കേസ്) ഇൗ വിഷയങ്ങളുമായി ബന്ധപ്പെട്ട് എന്തുകൊണ്ടാണ് നിശബ്ദത പാലിക്കുന്നു എന്ന് രാഹുല്‍ ഗാന്ധി ചോദിച്ചു. ഉത്തരവാദിത്ത ഭരണം വാഗ്ദാനം ചെയ്താണ് നിങ്ങള്‍ അധികാരത്തിലെത്തിയത്. എന്നിട്ടും ലോക്പാല്‍ എന്ത്‌കൊണ്ട് നടപ്പാക്കിയില്ല? ഓഫീസ് ഓഫ് രാഹുല്‍ ഗാന്ധി എന്ന ഔദ്യോഗിക ട്വിറ്റര്‍ അക്കൗണ്ടിലൂടെയാണ് മോഡിക്ക് നേരയുള്ള ചോദ്യങ്ങള്‍ ഉന്നയിച്ചത്.

പട്ടിക നീണ്ടതാണെന്നും, മേംസാബ്( യജമാനന്) ഇതിന് ഉത്തരങ്ങള്‍ നല്‍കേണ്ടി വരും, അതിന് ഉത്തരം ലഭിക്കാന്‍ ആകാംഷയോടെ ഞങ്ങള്‍ കാത്തിരിക്കുകയാണ്.

ചീഫ് ജസ്റ്റിസിന്റെ വിമര്‍ശം: രാജിവ് ധവാന്‍ അഭിഭാഷകവൃത്തി അവസാനിപ്പിച്ചു
Posted by
11 December

ചീഫ് ജസ്റ്റിസിന്റെ വിമര്‍ശം: രാജിവ് ധവാന്‍ അഭിഭാഷകവൃത്തി അവസാനിപ്പിച്ചു

ന്യൂഡല്‍ഹി: മുതിര്‍ന്ന അഭിഭാഷകന്‍ രാജിവ് ധവാന്‍ അഭിഭാഷകവൃത്തി അവസാനിപ്പിച്ചു. സുപ്രീംകോടതി ചീഫ് ജസ്റ്റില്‍ നിന്നുണ്ടായ വിമര്‍ശനമാണ് തന്നെ ജോലി അവസാനിപ്പിക്കാനുള്ള തീരുമാനത്തിലെത്തിച്ചെന്ന് ജസ്റ്റിസ് ദീപക് മിശ്രക്ക് അയച്ച കത്തില്‍ ധവാന്‍ പറയുന്നു. സുപ്രീംകോടതി ചീഫ് ജസ്റ്റിസ് ദീപക് മിശ്രയും രാജേഷ് ധവാനും തമ്മിലുള്ള കേസിന്റെ വാദത്തിനിടെയുണ്ടായ അസ്വാരസ്യങ്ങള്‍ കഴിഞ്ഞയിടെ വാര്‍ത്തയായിരുന്നു.

രാമജന്മഭൂമി -ബാബ്‌റി മസ്ജിദ് കേസിലും അരവിന്ദ് കെജ്രിവാള്‍ സര്‍ക്കാര്‍- കേന്ദ്രസര്‍ക്കാര്‍ കേസിലും വാദങ്ങള്‍ക്കിടെ ശബ്ദം ഉയര്‍ത്തി ഭീഷണിപ്പെടുത്തരുത് എന്ന് ചീഫ് ജസ്റ്റിസിന്റെ ബഞ്ച് നിര്‍ദേശിക്കുകയുണ്ടായി. ആദ്യത്തെ കേസിലെ വാദം തുടരുന്നതിനിടെ ധവാന്‍ ജസ്റ്റിസ് ദീപക് മിശ്രയോട് ശബ്ദമുയര്‍ത്തി സംസാരിച്ചെന്ന് റിപ്പോര്‍ട്ടുകള്‍ പുറത്തുവന്നിരുന്നു. അരവിന്ദ് കെജ്രിവാള്‍ സര്‍ക്കാരിന് വേണ്ടി ഹാജരായ അവസരത്തില്‍ വാദങ്ങളുന്നയിക്കാന്‍ ജസ്റ്റിസ് മിശ്ര ധവാന് മതിയായ സമയം അനുവദിച്ചില്ലെന്നും ആക്ഷേപമുണ്ടായി.

കോടതിമുറിയില്‍ അഭിഭാഷകര്‍ ശബ്ദമുയര്‍ത്തി സംസാരിക്കുന്നത് അവരുടെ പോരായ്മയയൊണ് തെളിയിക്കുന്നതെന്നായിരുന്നു മിശ്രയുടെ പരാമര്‍ശം. അവരുടെ സാമര്‍ഥ്യമില്ലായ്മയും മുതിര്‍ന്ന അഭിഭാഷകനാന്‍ വേണ്ട യോഗ്യതയില്ലായ്മയും അത്തരം പ്രവര്‍ത്തികളിലൂടെ വെളിപ്പെടുകയാണ് ചെയ്യുന്നതെന്നും അദ്ദേഹം വിമര്‍ശിച്ചിരുന്നു. ദീപക് മിശ്രയുടെ പരാമര്‍ശം പുറത്തുവന്ന് ദിവസങ്ങള്‍ക്കുള്ളിലാണ് അഭിഭാഷകവൃത്തി ഉപേക്ഷിക്കാനുള്ള തീരുമാനം രാജീവ് ധവാന്‍ അറിയിച്ചിരിക്കുന്നത്.

വിവിഐപി വിമാനങ്ങളുടെ നവീകരണത്തിന് 1,160 കോടി വായ്പ ആവശ്യപ്പെട്ട് എയര്‍ ഇന്ത്യ
Posted by
11 December

വിവിഐപി വിമാനങ്ങളുടെ നവീകരണത്തിന് 1,160 കോടി വായ്പ ആവശ്യപ്പെട്ട് എയര്‍ ഇന്ത്യ

ന്യൂഡല്‍ഹി: വിവിഐപികള്‍ക്ക് സഞ്ചരിക്കാനുള്ള വിമാനങ്ങളുടെ നവീകരണത്തിനായി 1,160 കോടി രൂപയുടെ വായ്പ അനുവദിക്കണമെന്ന്
സര്‍ക്കാരിനോട് എയര്‍ ഇന്ത്യ. രാഷ്ട്രപതി, ഉപരാഷ്ട്രപതി, പ്രധാനമന്ത്രി എന്നിവര്‍ക്ക് സഞ്ചരിക്കാനുള്ള രണ്ട് വിമാനങ്ങളുടെ നവീകരണത്തിനാണ് വായ്പ തേടുന്നത്.

ജനുവരിയോടെ പ്രവര്‍ത്തനസജ്ജമാകേണ്ട വിമാനങ്ങളുടെ ഉള്‍ഭാഗം നവീകരിക്കാനാണ് ഭീമമായ തുക എയര്‍ഇന്ത്യ ആവശ്യപ്പെടുന്നത്. ബോയിങ് 777300 ഇആര്‍ വിമാനങ്ങളുടെ നവീകരണത്തിനായി വായ്പ അനുവദിച്ചാല്‍ തിരിച്ചടവ് കാലാവധി ഒരു വര്‍ഷത്തില്‍ താഴെയേ അനുവദിക്കാനാവൂ എന്നാണ് സര്‍ക്കാര്‍ സൂചിപ്പിച്ചിരിക്കുന്നതെന്നും എയര്‍ഇന്ത്യ ഔദ്യോഗിക വാര്‍ത്താക്കുറിപ്പില്‍ പറയുന്നു.

നിലവില്‍ അമ്പതിനായിരം കോടി രൂപയുടെ കടബാധ്യത എയര്‍ ഇന്ത്യക്കുണ്ട്. എയര്‍ ഇന്ത്യയെയും അഞ്ച് അനുബന്ധ കമ്പനികളെയും സ്വകാര്യവല്‍ക്കരിക്കുന്നതിന് ഈ വര്‍ഷമാദ്യം കേന്ദ്രസര്‍ക്കാര്‍ തത്വത്തില്‍ അംഗീകാരം നല്‍കിയിരുന്നു. ധനമന്ത്രി അരുണ്‍ ജെയ്റ്റ്‌ലിയുടെ നേതൃത്വത്തിലുള്ള മന്ത്രിതല സമിതി ഇതു സംബന്ധിച്ച കാര്യങ്ങള്‍ പഠിച്ചുവരികയാണ്.

accused wife reacting to ‪Zaira Wasim‬ ‘molestation’ case
Posted by
11 December

ലൈംഗിക അതിക്രമം ഉണ്ടായെങ്കില്‍ എന്തുകൊണ്ട് സംഭവസ്ഥലത്ത് വച്ച് ഒച്ചയെടുത്തില്ല; പൊതുജനമധ്യത്തില്‍ ആളാവാനാണ് സൈറയുടെ ശ്രമമെന്ന് അറസ്റ്റിലായ പ്രതിയുടെ ഭാര്യ

മുംബൈ: ബോളിവുഡ് താരം സൈറ വസീം വിമാനത്തില്‍ വച്ച് ലൈംഗിക അതിക്രമത്തിനിരയായ സംഭവത്തില്‍ പ്രതികരിച്ച് കേസില്‍ അറസ്റ്റിലായ പ്രതിയുടെ ഭാര്യ. കേസില്‍ നടി സൈറ വസീമിനെതിരെ, അറസ്റ്റിലായ വികാസ് സച്ച്‌ദേവിന്റെ ഭാര്യ ദിവ്യയാണ് ഇപ്പോള്‍ രംഗത്ത് വന്നിരിക്കുന്നത്. അടിസ്ഥാനരഹിതമായ ആരോപണമാണ് സൈറ ഉന്നയിക്കുന്നതെന്നും പൊതുജനമധ്യത്തില്‍ ആളാവാന്‍ വേണ്ടിയാണ് സൈറയുടെ ശ്രമമെന്നുമാണ് ദിവ്യയുടെ ആരോപണം.

സംഭവത്തില്‍ ദിവ്യയുടെ പ്രതികരണം ഇങ്ങനെ ‘അമ്മാവന്‍ മരിച്ചതിനെ തുടര്‍ന്ന് അദ്ദേഹം ദില്ലിയില്‍ നിന്ന് മുംബൈയിലേക്കുള്ള യാത്രയിലായിരുന്നു. ആകെ ക്ഷീണിതനായിരുന്ന വികാസ് ഉറക്കം വന്നതിനെ തുടര്‍ന്ന് ഒരു ബ്ലാങ്കറ്റ് ആവശ്യപ്പെട്ടു. സൈറയുടെ പ്രതികരണം കണ്ട് ഞാന്‍ ശരിക്കും ഞെട്ടിപ്പോയി. പോലീസ് എന്റെ ഭര്‍ത്താവിനെ കസ്റ്റഡിയില്‍ എടുത്തിരിക്കുകയാണ്.’

‘ലൈംഗിക അതിക്രമം ഉണ്ടായെങ്കില്‍ എന്തുകൊണ്ടാണ് സംഭവസ്ഥലത്ത് വച്ച് തന്നെ സൈറ പ്രതികരിക്കാതിരുന്നത്? രണ്ട് മണിക്കൂറിന് ശേഷം മാത്രം അവര്‍ പ്രതികരിച്ചത് എന്തുകൊണ്ടാണ്? സൈറയുടെ അമ്മയും അവര്‍ക്കൊപ്പം ഉണ്ടായിരുന്നു. രണ്ട് സ്ത്രീകളും അപ്പോള്‍ ഒച്ചയെടുക്കാതിരുന്നത് എന്തുകൊണ്ടാണെന്ന്’ ദിവ്യ ചോദിക്കുന്നു.

‘മൂല്യങ്ങള്‍ ഉയര്‍ത്തിപ്പിടിക്കുന്നവരാണ് ഞങ്ങളുടെ കുടുബം. ഒന്‍പത് വയസായ കുട്ടിയുണ്ട് ഞങ്ങള്‍ക്ക്. വികാസിന് ഒരിക്കലും ഒരു സ്ത്രീയോടും മോശമായി പെരുമാറാന്‍ സാധിക്കില്ല’ ദിവ്യ വ്യക്തമാക്കി.

കഴിഞ്ഞ ദിവസം രാത്രിയാണ് ഡല്‍ഹിയില്‍ നിന്ന് മുംബൈയിലേക്കുള്ള യാത്രക്കിടെ എയര്‍ വിസ്താരയുടെ വിമാനത്തില്‍ വെച്ച് അപമാനിക്കപ്പെട്ടുവെന്ന് ബോളിവുഡ് നടി സൈറ വസീം ഇന്‍സ്റ്റഗ്രാമിലൂടെ ലോകത്തെ അറിയിച്ചത്. സംഭവത്തില്‍ വികാസ് സച്‌ദേവിനെ പോലീസ് അറസ്റ്റ് ചെയ്തിരുന്നു. അതേസമയം, വികാസ് സച്‌ദേവിനെ ഇന്ന് കോടതിയില്‍ ഹാജരാക്കുമെന്ന് ഡെപ്യൂട്ടി കമ്മിഷണര്‍ അനില്‍ കുംഭാരെ അറിയിച്ചു. കുട്ടികള്‍ക്കെതിരെയുള്ള കുറ്റം തടയുന്നതിനുള്ള പോക്‌സോ ആക്ട് പ്രകാരമാണ് കേസെടുത്തിരിക്കുന്നത്.

ലാവ്ലിന്‍ കേസ് പരിഗണിക്കുന്നത് സുപ്രീം കോടതി മാറ്റിവെച്ചു
Posted by
11 December

ലാവ്ലിന്‍ കേസ് പരിഗണിക്കുന്നത് സുപ്രീം കോടതി മാറ്റിവെച്ചു

ന്യൂഡല്‍ഹി : ലാവ്ലിന്‍ കേസ് പരിഗണിക്കുന്നത് സുപ്രീംകോടതി മാറ്റിവെച്ചു. കേസില്‍ വാദം കേള്‍ക്കുന്നത് നീട്ടിവയ്ക്കണമെന്ന് ആവശ്യപ്പെട്ട് കേസിലെ പ്രതികളായ കസ്തൂരി അയ്യരും ശിവദാസനും അപേക്ഷ നല്‍കിയിരുന്നു. ഇതിന്റെ പശ്ചാത്തലത്തിലാണ് കേസ് പരിഗണിക്കുന്നത് കോടതി മാറ്റിവെച്ചത്.

കേസുമായി ബന്ധപ്പെട്ട കൂടുതല്‍ രേഖകള്‍ സമര്‍പ്പിക്കാന്‍ ഒരുമാസം സമയം വേണമെന്നായിരുന്നു കസ്തൂരി അയ്യരുടെ ആവശ്യം. അതേസമയം, അഭിഭാഷകന് വ്യക്തിപരമായ അസൗകര്യങ്ങള്‍ ഉള്ളതിനാല്‍ കേസ് പരിഗണിക്കുന്നത് മൂന്നാഴ്ച നീട്ടിവയ്ക്കണമെന്നായിരുന്നു ശിവദാസന്റെ അഭിഭാഷകന്റെ ആവശ്യം.

ഇതേതുടര്‍ന്ന് കേസ് പരിഗണിക്കുന്നത് കോടതി മാറ്റിവയ്ക്കുകയായിരുന്നു. തങ്ങളെ മാത്രം കുറ്റക്കാരെന്ന് കണ്ടെത്തിയ ഹൈക്കോടതി വിധിയ്ക്കെതിരെയാണ് കസ്തൂരി അയ്യരും ശിവദാസനും സുപ്രീംകോടതിയെ സമീപിച്ചിട്ടുള്ളത്.