Narendra Modi Says Killing in Name of Cow Worship Not Acceptable at Sabarmati
Posted by
29 June

പശുവിനെ സംരക്ഷിക്കേണ്ടത് മനുഷ്യരെ കൊന്നിട്ടല്ല; പശുവിന്റെ പേരില്‍ നിയമം കൈയ്യിലെടുക്കുന്നവര്‍ക്ക് താക്കീതുമായി മോഡി

അഹമ്മദാബാദ്: പശുവിന്റെ പേരിലുള്ള കൊലപാതകങ്ങളെ അപലപിച്ച് പ്രധാനമന്ത്രി നരേന്ദ്ര മോഡി രംഗത്ത്. പശുവിന്റെ പേരില്‍ നിയമം കയ്യിലെടുക്കാന്‍ ആരെയും അനുവദിക്കില്ലെന്ന് മോഡി പറഞ്ഞു. മനുഷ്യരെ കൊന്നിട്ടല്ല പശുവിനെ സംരക്ഷിക്കേണ്ടത്. അക്രമങ്ങള്‍ നടക്കുന്നത് കര്‍ശനമായി തടഞ്ഞ മഹാത്മാ ഗാന്ധിയുടെ നാടാണിത്. എന്തുകൊണ്ടാണ് ആളുകള്‍ ഇതു മറന്നു പ്രവര്‍ത്തിക്കുന്നത്. അക്രമരാഹിത്യമാണ് ഇന്ത്യയുടെ നയമെന്നും പ്രധാനമന്ത്രി പറഞ്ഞു.

സബര്‍മതി ആശ്രമത്തിന്റെ ശതാബ്ദി ആഘോഷങ്ങളില്‍ പങ്കെടുക്കാനും ഇവിടത്തെ വിവിധ പദ്ധതികള്‍ ഉദ്ഘാടനം ചെയ്യാനുമാണ് പ്രധാനമന്ത്രി നരേന്ദ്ര മോഡി രണ്ടുദിവസത്തെ സന്ദര്‍ശനത്തിന് എത്തിയിട്ടുള്ളത്. തനിക്കു വിഷമമുണ്ടായ ചില കാര്യങ്ങളില്‍ ചിലതു പറയാനുണ്ടെന്നു വ്യക്തമാക്കിയാണു മോഡി ഗോസംരക്ഷണ വിഷയത്തിലേക്കു കടന്നത്. ഗോ സംരക്ഷണത്തിന്റെ പേരിലുള്ള മനുഷ്യഹത്യ ഗാന്ധിജി അംഗീകരിക്കില്ല ആക്രമം ഒരിക്കലും ഒരു പ്രശ്‌നവും പരിഹരിക്കില്ല. സമൂഹമെന്ന നിലയ്ക്കു എല്ലായിപ്പോഴും നമ്മള്‍ ചരിത്രവുമായി ബന്ധപ്പെടണം.

മഹാത്മാ ഗാന്ധിയുടെ ചിന്തകള്‍ ലോകം ഇന്നു നേരിടുന്ന വെല്ലുവിളികള്‍ക്കു പരിഹാരമാണ്. അഹിംസയുടെ നാടാണിത്. മഹാത്മാ ഗാന്ധിയുടെ നാടാണിത്. എന്താണ് ഇക്കാര്യം നമ്മള്‍ മറക്കുന്നത്. നിയമം കയ്യിലെടുക്കാന്‍ ആര്‍ക്കും അവകാശമില്ല. ഗാന്ധിജിയുടെ സ്വപ്നങ്ങള്‍ സാക്ഷാല്‍കരിക്കാന്‍ നാം പ്രയത്‌നിക്കണം. എല്ലാവരും സബര്‍മതി ആശ്രമം വന്നു സന്ദര്‍ശിക്കണമെന്നു മോഡി ആവശ്യപ്പെട്ടു

Radha Mohan Singh, Union Minister for Agriculture, urinates in public; pictures go viral
Posted by
29 June

ഇതോ സ്വച്ഛ് ഭാരത്? പൊതു സ്ഥലത്ത് സുരക്ഷാഭടന്മാരെ കാവല്‍ നിര്‍ത്തി കേന്ദ്രമന്ത്രിയുടെ മൂത്രമൊഴിക്കല്‍

ന്യൂഡല്‍ഹി: രാജ്യത്തിന് തന്നെ നാണക്കേടായി കേന്ദ്രമന്ത്രിയുടെ പൊതുസ്ഥലത്തെ പരസ്യമായ മൂത്രമൊഴിക്കല്‍. സ്വഛ് ഭാരത് പദ്ധതിക്ക് തന്നെ നാണക്കേടുണ്ടാക്കുന്ന പ്രവര്‍ത്തിയാണ് കേന്ദ്ര കൃഷിമന്ത്രി രാധാ മോഹന്‍ സിങിന്റെ ഭാഗത്തുനിന്നുണ്ടായിരിക്കുന്നത്. കൃഷിമന്ത്രിയുടെ മൂത്രമൊഴിക്കല്‍ ഫോട്ടോ സഹിതം സാമൂഹിക മാധ്യമങ്ങളില്‍ വ്യാപകമായി പ്രചരിക്കപ്പെടുകയും ചര്‍ച്ചയാവുകയും ചെയ്തു.

സുരക്ഷ ജീവനക്കാരെ കാവല്‍ നിര്‍ത്തി മതിലിനോട് ചേര്‍ന്ന് കേന്ദ്ര മന്ത്രി മൂത്രമൊഴിക്കുന്ന ദൃശ്യമാണ് പ്രചരിക്കപ്പെട്ടത്. ബീഹാറിലെ കിഴക്കന്‍ ചമ്പാരണ്‍ മണ്ഡലത്തിലെ മോതിഹാരിയില്‍ മന്ത്രി അടുത്തിടെ സന്ദര്‍ശനം നടത്തിയപ്പോഴെടുത്ത ഫോട്ടോയാണിത്.

ഈ മാസം ഇത് രണ്ടാം തവണയാണ് രാധാ മോഹന്‍ സിംഗ് വിവാദത്തില്‍ അകപ്പെടുന്നത്. മധ്യപ്രദേശില്‍ അഞ്ച് കര്‍ഷകരെ പോലീസ് വെടിവെച്ചു കൊലപ്പെടുത്തിയതിന്റെ ഞെട്ടലില്‍ രാജ്യം നില്‍ക്കെ ഇദ്ദേഹം യോഗ ഗുരു ബാബാ രംദേവിനൊപ്പം യോഗ പരിശീലന പരിപാടിയില്‍ പങ്കെടുത്തതും വിവാദമായിരുന്നു.

Prakash Karat against Modi govt
Posted by
29 June

മോഡിയുടെ ഭരണത്തിന്‍ കീഴില്‍ മുസ്ലിം ആകുകയെന്നതും കുറ്റകരം; പ്രകാശ് കാരാട്ട്

ന്യൂഡല്‍ഹി: മോഡി ഭരണകാലത്ത് മുസ്ലിം ആകുകയെന്നതുപോലും കുറ്റമാണെന്ന് സിപിഐഎം പോളിറ്റ്ബ്യൂറോ അംഗം പ്രകാശ് കാരാട്ട്. രാജസ്ഥാനില്‍ പെഹ്ലുഖാനും ഉത്തര്‍പ്രദേശില്‍ അഖ്ലാക്കും ജാര്‍ഖണ്ഡില്‍ മുഹമ്മദ് മജ്ലൂമും ഇനായത്തുള്ള ഖാനും കൊല്ലപ്പെട്ടത് മുസ്ലീങ്ങളായതുകൊണ്ടാണെന്നും അദ്ദേഹം പറഞ്ഞു.

ഇന്ത്യയിലെ ഇത്തരം വിദ്വേഷ ആക്രമണങ്ങളെ വില കുറച്ചുകാണാനാണ് പോലീസ് ശ്രമിച്ചതെന്നും കാരാട്ട് കുറ്റപ്പെടുത്തുന്നു. ദേശാഭിമാനിയിലെ ലേഖനത്തിലൂടെയാണ് കാരാട്ട് ഇക്കാര്യം പറയുന്നത്. വിദ്വേഷ ആക്രമങ്ങളെ ന്യായീകരിക്കുന്ന സമീപനമാണ് പോലീസ് സ്വീകരിക്കുന്നതെന്ന് ഉദാഹരണ സഹിതം കാരാട്ട് ലേഖനത്തില്‍ വിവരിക്കുന്നുണ്ട്.

ബിജെപി ഭരിക്കുന്ന ഹരിയാന പൊലുള്ള സംസ്ഥാനങ്ങളില്‍ പോലീസും ഭരണകൂടവും ഹിന്ദുത്വ ഗുണ്ടകളെയും ഗോസംരക്ഷകരെയും പിന്തുണയ്ക്കുകയാണ്. പെഹ്ലു ഖാന്‍ കേസില്‍ രാജസ്ഥാന്‍ പോലീസ് അദ്ദേഹത്തിനും കുടുംബത്തിനുമെതിരെ കന്നുകാലി കടത്ത് ആരോപിച്ച് കേസെടുക്കുകയാണ് ചെയ്തത്. ഹരിയാനയില്‍ ട്രെയിനില്‍വെച്ച് ബീഫ് കൈവശം വെച്ചെന്നാരോപിച്ച് ജുനൈദ് കൊല്ലപ്പെട്ട സംഭവത്തിലും ഇത്തരത്തിലാണ് കാര്യങ്ങള്‍ മുന്നോട്ടുപോകുന്നതെന്നും അദ്ദേഹം ചൂണ്ടിക്കാട്ടുന്നു.

അതിശക്തമായ രാഷ്ട്രീയ പ്രത്യയശാസ്ത്ര പ്രചരണത്തിലൂടെയും പ്രതിരോധത്തിലൂടെയും മാത്രമേ ഇത്തരം ആക്രമണങ്ങളെ ചെറുക്കാന്‍ സാധിക്കൂവെന്നും അദ്ദേഹം വ്യക്തമാക്കുന്നു. ‘ഈ വര്‍ഗീയ ആക്രമണങ്ങളോടുള്ള പ്രതികരണം രണ്ട് വിധത്തിലായിരിക്കണം. ഒന്നാമതായി ഹിന്ദുത്വ വലതുപക്ഷ ശക്തികള്‍ക്കെതിരെ ജനങ്ങള്‍ക്കിടയില്‍ അതിശക്തമായ രാഷ്ട്രീയ പ്രത്യയശാസ്ത്ര പ്രചാരണം സംഘടിപ്പിക്കണം. ഇതോടൊപ്പം ഇത്തരം ആക്രമണങ്ങള്‍ക്കെതിരെ പ്രതിരോധം തീര്‍ക്കുകയും വേണം. ഈ ഉത്തരവാദിത്തം മുസ്ലിങ്ങളുടെമാത്രം ചുമലിലിടരുത്. ഈ കടമ ഇടതുപക്ഷ ജനാധിപത്യശക്തികള്‍ നിര്‍ബന്ധമായും ഏറ്റെടുക്കണം’ അദ്ദേഹം ലേഖനത്തില്‍ പറയുന്നു.

Sushma Swaraj to ask Indian embassy to get the necessary legal assistance for Fathimunisa
Posted by
29 June

ഇങ്ങനെയാവണം വിദേശകാര്യ മന്ത്രി; വിദേശത്ത് ജയിലിലായ ഫാത്തിമുനിസയ്ക്ക് ആവശ്യമായ നിയമസഹായം ലഭ്യമാക്കാന്‍ എംബസിയോട് സുഷമ സ്വരാജ്

 

ന്യൂഡല്‍ഹി: വിദേശത്തെ ഇന്ത്യകാര്‍ക്ക് വീണ്ടും സുഷമയുടെ കൈത്താങ്ങ്. റിയാദില്‍ ജയിലിലായ ഇന്ത്യാക്കാരി ഫാത്തിമുനിസക്കാണ് ഇപ്രാവശ്യം കേന്ദ്ര വിദേശകാര്യ മന്ത്രി സുഷമാ സ്വരാജ് സഹായം ലഭ്യമാക്കിയത്.

തെലങ്കാന സ്വദേശി ഫാത്തിമുനിസ സൗദി അറേബ്യയിലാണ് ജയില്‍ ശിക്ഷ അനുഭവിക്കുന്നത്. ഭാര്യയെ മോചിപ്പിക്കാന്‍ സഹായം ആവശ്യപ്പെട്ട് ഫാത്തിമുനിസയുടെ ഭര്‍ത്താവാണ് സുഷമയെ സമീപിച്ചത്.

ഫാത്തിമുനിസയ്ക്ക് ആവശ്യമായ നിയമസഹായം ലഭ്യമാക്കാന്‍ എംബസിയോട് നിര്‍ദ്ദേശിക്കുമെന്ന് സുഷമ ഉറപ്പ് നല്‍കിയിട്ടുണ്ട്. അതേസമയം ഫാത്തിമുനിസയെ ജയിലില്‍ അടച്ചതിന് കാരണം വ്യക്തമല്ല.

congress leader vinay pradhan resigned from the party
Posted by
29 June

അവസാനം അദ്ദേഹം പറഞ്ഞു രാഹുല്‍ ഗാന്ധി പപ്പു തന്നെ; രാഹുലിനെ പപ്പുവെന്ന് വിളിച്ച് അച്ചടക്ക നടപടിക്ക് വിധേയനായ കോണ്‍ഗ്രസ് നേതാവ് വിനയ് പ്രഥാന്‍ പാര്‍ട്ടിയില്‍ നിന്നും രാജിവച്ചു

 

ന്യൂഡല്‍ഹി: കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയെ പപ്പുവെന്ന് വിളിച്ചതിന് അച്ചടക്ക നടപടിക്ക് വിധേയനായ കോണ്‍ഗ്രസ് നേതാവ് വിനയ് പ്രഥാന്‍ പാര്‍ട്ടിയില്‍ നിന്നും രാജിവച്ചു.

വാട്‌സ് ആപ്പിലൂടെ രാഹുലിനെ പപ്പു എന്ന് പരാമര്‍ശിച്ചതിന് തനിക്കെതിരെ നടപടിയെടുത്തതിലൂടെ രാഹുല്‍ ആ പേരിന് അര്‍ഹനാണെന്ന് തെളിയിച്ചിരിക്കുകയാണെന്ന് വിനയ് പറഞ്ഞു.

പാര്‍ട്ടിയുടെ അച്ചടക്ക നടപടിക്ക് വിധേയനായ വിനയ് പ്രഥാന്‍ തന്റെ രാഷ്ട്രീയ ജീവിതം അവസാനിപ്പിക്കുകയാണെന്നും പാര്‍ട്ടി പ്രവര്‍ത്തനം ഉപേക്ഷിക്കുകയാണെന്നും വ്യക്തമാക്കി.

Again Modi fans’ fake video
Posted by
29 June

അതും പൊളിഞ്ഞു; മോഡിക്ക് അമേരിക്കയില്‍ ലഭിച്ച സ്വീകരണമെന്ന് പറഞ്ഞ് മോഡി ഫാന്‍സ് പ്രചരിപ്പിച്ചത് 2010ലെ ഒബാമയുടെ പരേഡ് ദൃശ്യങ്ങള്‍

ന്യൂഡല്‍ഹി: അമേരിക്കന്‍ പ്രസിഡന്റ് ഡൊണാള്‍ഡ് ട്രംപുമായുള്ള ആദ്യ കൂടിക്കാഴ്ച്ചയിക്കെത്തിയ ഇന്ത്യന്‍ പ്രധാനമന്ത്രിക്ക് അമേരിക്കയില്‍ ലഭിച്ചത് ഊഷ്മള സ്വീകരണമാണെന്ന കാര്യത്തില്‍ ആര്‍ക്കും സംശയമില്ല. എന്നാല്‍ മോഡിയുടെ ആരാധകര്‍ക്ക് കുറച്ചു കൂടി മികവുറ്റ സ്വീകരണമാണ് അദ്ദേഹത്തിന് അമേരിക്കയില്‍ ലഭിച്ചതെന്ന് വരുത്തി തീര്‍ക്കാതെ ഉറക്കമില്ലാത്ത അവസ്ഥയാണ്.

ഇന്ത്യന്‍ പ്രധാനമന്ത്രിയെ ട്രംപ് വിശേഷിപ്പിച്ചത് ട്രൂ ഫ്രണ്ട് എന്നൊക്കെയായിരുന്നു, അതെല്ലാം തന്നെ ഇന്ത്യന്‍ മാധ്യമങ്ങള്‍ക്കും സോഷ്യല്‍മീഡിയയ്ക്കും ആഘോഷിക്കാന്‍ മാത്രം സന്തോഷം നല്‍കിയതുമാണ്. എന്നാല്‍ വ്യാജ വീഡിയോ ഇറക്കി മോഡിയെ നാണം കെടുത്തുകയാണ് മോഡി ആരാധകരുടെ ലക്ഷ്യമെന്ന് ആര്‍ക്കും സംശയം തോന്നിപ്പോവും.

അത്തരത്തിലാണ് മോഡിക്ക് അമേരിക്കയില്‍ ലഭിച്ച സ്വീകരണം എന്ന പേരില്‍ ബിജെപി ആര്‍എസ്എസ് അനുകൂല പേജുകളും മോഡി ആരാധകരും അമേരിക്കയിലെ ഒരു പരേഡിന്റെ വീഡിയോ പ്രചരിപ്പിച്ചത്. ഇതാവട്ടെ 2010ലെ ദൃശ്യങ്ങളാണുതാനും. അതും അന്നത്തെ അമേരിക്കന്‍ പ്രസിഡന്റായിരുന്ന ബരാക് ഒബാമയുടെ പരേഡിന്റെ ദൃശ്യങ്ങള്‍.

പ്രധാനമന്ത്രി നരേന്ദ്ര മോഡിയുടെ വൈറ്റ് ഹൗസിലേക്കുള്ള ഗംഭീര യാത്ര എന്ന തലക്കെട്ടോട് കൂടിയാണ് വീഡിയോ പ്രചരിപ്പിച്ചത്. മോഡി ഫോളോവേഴ്‌സ് എന്ന ഫേസ്ബുക്ക് പേജാണ് ആദ്യം വീഡിയോ പോസ്റ്റ് ചെയ്തത്. പതിനായിരങ്ങളാണ് ഈ വീഡിയോ കണ്ടതും ഷെയര്‍ ചെയ്തതും.

തൊട്ടുപിന്നാലെ മോഡി ആരാധകരുടെ കമന്റുകളും ഒഴുകിയെത്തി. 130 കോടി ജനങ്ങളുടെ പ്രതിനിധിക്ക് ഒരു ശ്രേഷ്ഠ രാജ്യത്തിന്റെ ആദരം, മോഡിയുടെ പവര്‍, ഇതാ അമേരിക്ക മോഡിജിക്ക് നല്‍കുന്ന ആദരം എന്നിങ്ങനെയായിരുന്നു കമന്റുകള്‍. മോഡി വിമര്‍ശകര്‍ക്ക് ഒരു തട്ട് കൊടുക്കാനും ആരാധകര്‍ മറന്നില്ലെന്ന് ആള്‍ട്ട് ന്യൂസ് റിപ്പോര്‍ട്ടില്‍ പറയുന്നു. എല്ലാ പ്രതിപക്ഷപാര്‍ട്ടി അംഗങ്ങള്‍ക്കും മൗലികവാദികള്‍ക്കും പൊള്ളുന്ന നിമിഷം എന്നായിരുന്നു ഒരു കമന്റ്. ഈ സ്വീകരണം ഇന്ത്യയിലായിരുന്നു ഒരുക്കിയതെങ്കില്‍ ഇന്ത്യന്‍ മാധ്യമങ്ങള്‍ അന്യായമായി പെരുമാറുമായിരുന്നു എന്നും പരിതപിക്കുന്നുണ്ട് ചിലര്‍.

ആര്‍എസ്എസ്- രാഷ്ടീയ സ്വയംസേവക് സംഘ് ഫാന്‍സ്, അടല്‍ ബീഹാരി ബാജ്‌പേയ്, നരേന്ദ്ര മോഡി-ട്രൂ ഇന്ത്യന്‍ എന്നീ പേജുകളും വീഡിയോ പോസ്റ്റ് ചെയ്തു.

modi 1

പക്ഷേ 2010ല്‍ സന്‍ഫ്രാന്‍സിസ്‌കോയില്‍ നടന്ന മുന്‍ അമേരിക്കന്‍ പ്രസിഡന്റ് ബരാക് ഒബാമയുടെ പരേഡിന്റെ ദൃശ്യങ്ങളാണ് മോഡിയുടേതായി ഈ പേജുകള്‍ പ്രചരിപ്പിച്ചതെന്ന് പിന്നീട് സോഷ്യല്‍മീഡിയ തന്നെ തെളിയിച്ചു. ഹോട്ടല്‍ മുറികളില്‍ നിന്നും അജ്ഞാതന്‍ പകര്‍ത്തിയ ദൃശ്യങ്ങള്‍ അന്നേ തരംഗമായിരുന്നു.

അബദ്ധം മനസിലായിട്ടായിരിക്കാം പല പേജുകളും ഈ ‘തള്ള്’ വീഡിയോ വീഡിയോ നീക്കം ചെയ്തിട്ടുണ്ട്. മോഡിയുടെ വികസന പ്രവര്‍ത്തനങ്ങളുടെ ഫോട്ടോഷോപ്പ് ചിത്രങ്ങള്‍ കുപ്രസിദ്ധിയാര്‍ജിച്ച സമയത്താണ് മോഡി ആരാധകരുടെ വ്യാജ വീഡിയോ പ്രചരരണം പൊളിഞ്ഞിരിക്കുന്നത് എന്നതും ശ്രദ്ധേയം.

200 rupee currency printing progressing
Posted by
29 June

നോട്ട് ക്ഷാമത്തിന് പരിഹാരമായി; 200 രൂപ നോട്ടുകളുടെ അച്ചടി പുരോഗമിക്കുന്നു

 

മുംബൈ: കുറഞ്ഞമുല്യമുള്ള നോട്ടുകളുടെ ക്ഷാമം പരിഹരിക്കുന്നതിനായി റിസര്‍വ് ബാങ്ക് 200 രൂപ നോട്ടിന്റെ അച്ചടി തുടങ്ങി.

പുതിയ 200 രൂപ നോട്ടുകളിറക്കാന്‍ മാര്‍ച്ചില്‍ ചേര്‍ന്ന ആര്‍ബിഐ ബോര്‍ഡ് യോഗം തീരുമാനിച്ചിരുന്നു.
എന്നാല്‍ പുതിയ നോട്ടിന്റെ അച്ചടി തുടങ്ങിയകാര്യം റിസര്‍വ് ബാങ്ക് ഔപചാരികമായി വെളിപ്പെടുത്തിയിട്ടില്ല.

2000 രൂപ നോട്ട് ഉപയോഗിച്ചുള്ള ഇടപാട് എളുപ്പമല്ലെന്ന പരാതിയെത്തുടര്‍ന്നാണ് 200 രൂപയുടെ പുതിയനോട്ട് ഇറക്കുന്നത് പരിഗണിച്ചത്.

Pollachi cow vigilantes feared and run before Police action
Posted by
29 June

ലാത്തി കണ്ട് പേടിച്ചോടി ഗോ രക്ഷാ സേന; നിയമപരമായി പശുക്കളെ കടത്തുന്നത് തടഞ്ഞ് ഹീറോയിസം കാണിക്കാന്‍ ശ്രമിച്ച ഗോ രക്ഷകരെ പോലീസ് അടിച്ചോടിച്ചു

ചെന്നൈ: നിയമപരമായി പശുക്കളെ കടത്തുകയായിരുന്ന വ്യാപാരിക്ക് നേരെ ആക്രമണം അഴിച്ചുവിടാന്‍ ശ്രമിച്ച ഗോരക്ഷാ സേന പ്രവര്‍ത്തകരെ പോലീസ് അടിച്ചോടിച്ചു. പോലീസിന്റെ ലാത്തി കണ്ട് ഭയന്ന് ഓടി ഒളിക്കുന്ന ഗോരക്ഷാ സേനാ പ്രവര്‍ത്തകരുടെ വീഡിയോ സോഷ്യല്‍മീഡിയയില്‍ വൈറലാവുകയാണ്. തമിഴ്നാട്ടില്‍ നിയമപരമായി പശുക്കളെ കൊണ്ടു വരികയായിരുന്ന വ്യാപാരിയെ കശാപ്പിനായി പശുവിനെ കടത്തുന്നു എന്നാരോപിച്ചായിരുന്നു ദിണ്ടിഗലില്‍ വെച്ച് ഗോ രാക്ഷാ പ്രവര്‍ത്തകര്‍ തടഞ്ഞു നിര്‍ത്തി അക്രമിച്ചത്.

എന്നാല്‍ സംഭവം അറിഞ്ഞയുടന്‍ സ്ഥലത്തെത്തിയ പോലീസ് അക്രമികളെ ശക്തമായി നേരിട്ടപ്പോള്‍ അലറി വിളിച്ചോടുകയായിരുന്നു അതുവരെ ഭീകരാന്തരീക്ഷം സൃഷ്ടിച്ച ഗോരക്ഷാ പ്രവര്‍ത്തകര്‍. നിയമപരമായി പൊളളാച്ചിയിലേക്ക് പശുക്കളെ കൊണ്ടുവരികയായിരുന്ന വ്യവസായിയെയാണ് ഗോരക്ഷാ പ്രവര്‍ത്തകര്‍ അക്രമിച്ചത്.

വ്യാപാരിയെ ചോദ്യം ചെയ്ത വലിയൊരു സംഘം പ്രവര്‍ത്തകര്‍ വടക്കേ ഇന്ത്യന്‍ മോഡല്‍ ആക്രമണത്തിന് മുതിരുകയായിരുന്നു. വ്യവസായിയെ മര്‍ദ്ദിച്ച ഇവര്‍ വാഹനം അടിച്ച് തകര്‍ക്കുകയും ചെയ്തു. എന്നാല്‍ വിവരമറിഞ്ഞ് സ്ഥലത്തെത്തിയ പോലീസ് ലാത്തിച്ചാര്‍ജ്ജ് തുടങ്ങിയ ഉടനെ അക്രമികള്‍ പലവഴികളിലൂടെ ഓടി രക്ഷപ്പെടാന്‍ ശ്രമിക്കുകയായിരുന്നു. ലാത്തിക്ക് മുന്നില്‍ നിലവിളിച്ചോടിയ ഗോരക്ഷാ പ്രവര്‍ത്തകര്‍ സമീപത്തെ അമ്പലത്തിലും മറ്റ് കെട്ടിടങ്ങളിലും ഓടി കയറി രക്ഷപ്പെടാന്‍ ശ്രമിച്ചെങ്കിലും പിന്തുടര്‍ന്നെത്തിയ പോലീസ് ഇവരെ പിടികൂടി. അക്രമത്തില്‍ മറ്റു ചില വാഹനങ്ങള്‍ക്കും കേടുപാടുകള്‍ സംഭവിച്ചിട്ടുണ്ട്.

if aadhar is not linked with pancard it doesnot cancelled
Posted by
29 June

ആധാറുമായി ബന്ധിപ്പിച്ചില്ലെങ്കില്‍ പാന്‍ കാര്‍ഡ് ഉടന്‍ റദ്ദാകില്ല ; ആശങ്ക അകറ്റി വ്യക്തതയുമായി ആദായ നികുതി വകുപ്പ്

 

കൊച്ചി:നികുതി റിട്ടേണുമായി ബന്ധപ്പെട്ട് ആധാറും പാന്‍കാര്‍ഡും ബന്ധിപ്പിച്ചില്ലെങ്കില്‍ പാന്‍ കാര്‍ഡ് ഉടന്‍ റദ്ദുചെയ്യുമെന്ന തെറ്റിധാരണകള്‍ക്ക് വ്യക്തതയുമായി ആദായനികുതി വകുപ്പ് അധികൃതര്‍.

നികുതി റിട്ടേണിന് ഇത് അത്യാവശ്യമാണെങ്കിലും നിലവിലുള്ള ഉത്തരവുപ്രകാരം ഭാവിയില്‍ പാന്‍കാര്‍ഡ് റദ്ദാക്കിയേക്കുമെന്നു മാത്രമാണ് പറയുന്നത് അല്ലാതെ പാന്‍ ഉടന്‍ റദ്ദുചെയ്യില്ലെന്ന് ആദായനികുതി വകുപ്പ് വ്യക്തമാക്കി.

ആദായനികുതി റിട്ടേണ്‍സമര്‍പ്പിക്കുന്നതിനും പാന്‍കാര്‍ഡ് ലഭിക്കുന്നതിനും ജൂലായ് ഒന്നുമുതല്‍ആധാര്‍ നിര്‍ബന്ധമാണെന്ന് കേന്ദ്ര പ്രത്യക്ഷനികുതി ബോര്‍ഡ് വ്യക്തമാക്കിയിരുന്നു. ഇതുപ്രകാരം നിലവില്‍ പാന്‍കാര്‍ഡും ആധാറും ഉള്ളവര്‍ ജൂലായ് ഒന്നിനുമുമ്പ് ഇവ ബന്ധിപ്പിക്കണമെന്നാണ് നിര്‍ദേശം. ജൂലായ് ഒന്നിനുശേഷം പാന്‍കാര്‍ഡ് ലഭിക്കണമെങ്കില്‍ ആധാര്‍ നിര്‍ബന്ധമാണ്.

Faridabad lynching: Delhi govt staffer among four held for murder on train
Posted by
29 June

ബീഫിന്റെ പേരില്‍ ജുനൈദ് ഖാനെ കൊലപ്പെടുത്തിയ കേസില്‍ അറസ്റ്റിലായ നാല് സംഘപരിവാറുകാരില്‍ ഒരാള്‍ ഡല്‍ഹിയിലെ സര്‍ക്കാര്‍ ഉദ്യോഗസ്ഥന്‍

ന്യൂഡല്‍ഹി: ജുനൈദ് ഖാന്‍ എന്ന പതിനാറുകാരനെ ബീഫിന്റെ പേരില്‍ ട്രെയിനില്‍ കൊലപ്പെടുത്തിയ കേസില്‍ അറസ്റ്റിലായ നാലു സംഘപരിവാര്‍ പ്രവര്‍ത്തകരില്‍ ഒരാള്‍ ഡല്‍ഹി സര്‍ക്കാര്‍ ഉദ്യോഗസ്ഥന്‍. ജുനൈദിനേയും സഹോദരനേയും ബീഫ് തീനികളെന്നും രാജ്യദ്രോഹികളെന്നും വിളിച്ചയാളും സര്‍ക്കാര്‍ ഉദ്യേഗസ്ഥനാണ്. ഇയാളെ ദൃശ്യങ്ങളില്‍ നിന്ന് തിരിച്ചറഞ്ഞിട്ടുണ്ടെങ്കിലും അറസ്റ്റ് ചെയ്തിട്ടില്ല്.

കഴിഞ്ഞ ദിവസമാണ് നാലു പേരെ പൊലിസ് അറസ്റ്റു ചെയ്തത്. ഇവരില്‍ രമേശ് എന്നയാളുടെതൊഴികെയുള്ളവരുടെ വിവരങ്ങള്‍ പോലീസ് പുറത്തു വിട്ടിട്ടില്ല. ഹരിയാന പൊലിസാണ് ഇവരെ അറസ്റ്റ് ചെയ്തത്.

junaid-murder

ഡല്‍ഹിയില്‍ നിന്ന് ഹരിയാനയിലെ ബല്ലാബ്ഗഡിലേക്ക് ട്രെയിനില്‍ പോവുകയായിരുന്നു മതവിദ്യാര്‍ഥി ഹാഫിള് ജുനൈദിനെ ഇരുപതോളം പേര്‍ ചേര്‍ന്ന് കുത്തിക്കൊല്ലുകയായിരുന്നു. സഹോദരനും കത്തികൊണ്ട് പരുക്കേറ്റിട്ടുണ്ട്. നോമ്പ് തുറക്കാന്‍ ബീഫ് വാങ്ങി കൈവശം വെച്ചിട്ടുണ്ടെന്നും, പശുവിറച്ചി തിന്നുന്നവരെന്നും മുസ്‌ലിംകളെന്നും അധിക്ഷേപിച്ചാണ് ഇവര്‍ക്കു നേരെ ആക്രമണം നടത്തിയത്.

ജുനൈദ് ഖാനെ കൊന്നതിനു ശേഷം എറിഞ്ഞ ഗ്രാമത്തില്‍ നിന്ന് മൂന്നുപേര്‍ ബൈക്കില്‍ സഞ്ചരിക്കുന്നതിന്റെ സിസിടിവി ദൃശ്യങ്ങള്‍ പോലിസിന് ലഭിച്ചിരുന്നു. ഇതില്‍ ഒരാള്‍ തലയ്ക്ക് ബാന്‍ഡേജ് ചുറ്റിയിരുന്നു. ജുനൈദ് വധവുമായി ഇവര്‍ക്കു ബന്ധമുണ്ടാവുമെന്നാണ് പൊലിസ് കരുതുന്നത്.