അമേരിക്കന്‍ സാഹിത്യകാരന്‍ ജോര്‍ജ് സോന്‍ഡേര്‍സിന് മാന്‍ ബുക്കര്‍ പ്രൈസ്
Posted by
18 October

അമേരിക്കന്‍ സാഹിത്യകാരന്‍ ജോര്‍ജ് സോന്‍ഡേര്‍സിന് മാന്‍ ബുക്കര്‍ പ്രൈസ്

ലോസ് ആഞ്ചലസ്: അമേരിക്കന്‍ സാഹിത്യകാരന്‍ ജോര്‍ജ് സോന്‍ഡേര്‍സിന് ബുക്കര്‍ പ്രൈസ്. ചെറുകഥാകൃത്തായി അറിയപ്പെടുന്ന സോന്‍ഡേര്‍സിന്റെ നോവലായ ലിങ്കണ്‍ ദ ബാര്‍ഡോ എന്ന നോവലിനാണ് മാന്‍ ബുക്കര്‍ പ്രൈസ് ലഭിച്ചത്. അമേരിക്കന്‍ പ്രസിഡന്റായിരുന്ന എബ്രഹാം ലിങ്കണുമായി ജീവിതവുമായി ബന്ധപ്പെട്ട നോവലാണ് ‘ലിങ്കണ്‍ ഇന്‍ ദി ബാര്‍ഡോ’.

ജോര്‍ജ് സാന്‍ഡേഴ്‌സിനൊപ്പം ബ്രിട്ടീഷ് എഴുത്തുകാരായ അലി സ്മിത്ത്, ഫിയോണ മോസ്ലി, അമേരിക്കന്‍ എഴുത്തുകാരായ പോള്‍ ഓസ്റ്റര്‍, എമിലി ഫ്രിഡോള്‍ഡ്, ബ്രിട്ടീഷ്പാകിസ്താനി എഴുത്തുകാരനായ മോഷിന്‍ ഹാമിദ് എന്നിവരും ബുക്കര്‍ പ്രൈസിനായി പരിഗണിക്കപ്പെട്ടിരുന്നു. തുടര്‍ന്നും എഴുത്തുകള്‍ക്ക് വേണ്ടിയാകും തന്റെ ജീവിതമെന്ന് സാന്‍ഡേഴ്‌സ് പറഞ്ഞു.

ടെക്‌സാസിലെ അമരിലോയില്‍ 1958ലാണ് സോന്‍ഡേര്‍സ് ജനിച്ചത്. ടെക്‌നിക്കല്‍ റൈറ്റര്‍ ആയാണ് ഇദ്ദേഹം കരിയര്‍ ആരംഭിച്ചത്. പിന്നീട് സൈറക്യൂസ് യൂണിവേഴ്‌സിറ്റിയില്‍ പ്രഫസറായി ജോലി ചെയ്യുമ്പോഴും ഫിക്ഷന്‍ നോണ്‍ ഫിക്ഷന്‍ എഴുത്ത് തുടര്‍ന്നു. അമേരിക്കയിലെ പ്രശസ്തമായ പല അവാര്‍ഡുകളും ഇദ്ദേഹത്തെ തേടിയെത്തിയിട്ടുണ്ട്.

സാഹിത്യ നോബല്‍ കസുവോ ഇഷിഗുറോയ്ക്ക്
Posted by
05 October

സാഹിത്യ നോബല്‍ കസുവോ ഇഷിഗുറോയ്ക്ക്

സ്റ്റോക്ക്‌ഹോം: ഈ വര്‍ഷത്തെ സാഹിത്യത്തിനുള്ള നോബല്‍ സമ്മാനത്തിന് ജപ്പാന്‍ -ഇംഗ്ലിഷ് എഴുത്തുകാരനായ കസുവോ ഇഷിഗുറോ അര്‍ഹനായി. 1989ല്‍ ഇറങ്ങിയ ദ റിമെയിന്‍സ് ഒഫ് ദ ഡേ എന്ന നോവലാണ് ഇഷിഗുറോയെ പ്രശസ്തനാക്കിയത്. ഈ നോവലിന് മാന്‍ ബൂക്കര്‍ പ്രൈസും ലഭിച്ചിരുന്നു.

അടിച്ചമര്‍ത്താന്‍ ശ്രമിക്കുമ്പോള്‍ ഉയിര്‍ത്തെഴുന്നേറ്റ ചരിത്രമാണ് സാഹിത്യലോകത്തിനുള്ളത്:  എം മുകുന്ദന്‍
Posted by
03 October

അടിച്ചമര്‍ത്താന്‍ ശ്രമിക്കുമ്പോള്‍ ഉയിര്‍ത്തെഴുന്നേറ്റ ചരിത്രമാണ് സാഹിത്യലോകത്തിനുള്ളത്: എം മുകുന്ദന്‍

മനാമ: അടിച്ചമര്‍ത്താന്‍ ശ്രമിക്കുേമ്പാള്‍ ഉയിര്‍ത്തെഴുന്നേറ്റ ചരിത്രമാണ് സാഹിത്യലോകത്തിനുള്ളത്. അതു കൊണ്ടുതന്നെ എഴുത്തുകാര്‍ക്ക് നേരെ എക്കാലവും ഭീഷണികള്‍ തുടര്‍ന്നു കൊണ്ടേയിരിക്കും. എന്നാല്‍ അത്തരം ഭീഷണികള്‍ കൊണ്ടൊന്നും എഴുത്തിനെ ആര്‍ക്കും ഇല്ലാതാകാന്‍ കഴിയില്ലെന്നും സാഹിത്യക്കാരന്‍ എം മുകുന്ദന്‍ പറഞ്ഞു. ബഹ്‌റൈന്‍ കേരളീയ സമാജം സാഹിത്യ വേദി സംഘടിപ്പിച്ച മുഖാമുഖം ചര്‍ച്ചയില്‍ സംസാരിക്കുകയായിരുന്നു അദ്ദേഹം.

ചെറിയ എഴുത്തില്‍നിന്നും വലിയ ചലനങ്ങള്‍ ഉണ്ടാകുമെന്നും ആരാലും ശ്രദ്ധിക്കാതെ പോകുന്ന ചെറിയ മനുഷ്യരുടെ ജീവിതം, അവര്‍ ഉയര്‍ത്തുന്ന പ്രതിരോധം എന്നിവയാണ് ചര്‍ച്ച ചെയ്യേെപ്പടണ്ടതെന്നും മുകുന്ദന്‍ പറഞ്ഞു. കഥകളെ കുറിച്ചും സമകാലിക രാഷ്ട്രീയ സാഹചര്യങ്ങളെ കുറിച്ചും മുകുന്ദന്‍ സംസാരിച്ചു.

സ്വന്തം രചനകളെ കുറിച്ച് സംസാരിക്കവെ, റിയലിസ്റ്റിക്കായ, നേര്‍രേഖയില്‍ കഥ പറഞ്ഞു കൊണ്ടിരുന്ന പതിവ് ശൈലികളെ തകര്‍ത്ത ആഖ്യാന രീതിയായിരുന്നു ‘ആദ്യത്യനും രാധയും മറ്റു ചിലരും’ എന്ന കൃതിയില്‍ സ്വീകരിച്ചതെന്ന് അദ്ദേഹം പറഞ്ഞു. ഈ നോവല്‍ കൂടുതലും വായിച്ചത് പെണ്‍കുട്ടികളാണ്. ഏറ്റവും വിമര്‍ശിക്കപ്പെട്ട കൃതി ‘കേശവെന്റ വിലാപങ്ങള്‍’ ആണ്. ഇഎംഎസിന്റെ ആരാധകനായ കേശവെന്റ കഥയായിരുന്നു ഈ നോവല്‍. എകെ ആന്റണിയാണ് വിമര്‍ശത്തിന് തുടക്കം കുറിച്ചത്. പിന്നീട് പലരും അതേറ്റെടുത്തു. ‘താങ്കള്‍ മലയാളിയാണോ’ എന്ന ചോദ്യത്തോട് പ്രതികരിക്കവെ, ഈ ചോദ്യം മയ്യഴിയില്‍വെച്ച് ഒരാള്‍ ചോദിച്ചതാണെന്ന് മുകുന്ദന്‍ പറഞ്ഞു. മലയാളി എപ്പോഴും മറ്റുള്ളവരുടെ കുറവുകളാണ് അന്വേഷിക്കുക. നല്ലതിനെ കാണുന്നതിനേക്കാള്‍ പ്രശ്‌നങ്ങള്‍ കാണാനാണ് തിടുക്കം കുട്ടുന്നത്. നോവലിന്റെ ആഖ്യാനശൈലി അതിന്റെ പ്രമേയത്തെ അടിസ്ഥാനപ്പെടുത്തിയാണ് രൂപപ്പെടേണ്ടത്. ശൂന്യതയില്‍നിന്ന് സാഹിത്യം ഉണ്ടാകില്ല. നല്ല കൃതി ഉണ്ടാകുന്നത് കഥാപാത്രങ്ങളുടെയും ആശയങ്ങളുടെയും ഉള്‍വിളി എഴുത്തുകാരന് താങ്ങാന്‍ കഴിയാതെ വരുേമ്പാഴാണ്. അങ്ങിനെയുള്ള എഴുത്ത് വായനക്കാരില്‍ ചലനങ്ങള്‍ സൃഷ്ടിക്കും. പുതിയകാലത്തെ കഥാകൃത്തുകളെ കുറിച്ച് പ്രതീക്ഷയുണ്ടെന്നും മുകുന്ദന്‍ പറഞ്ഞു.

കൃതികള്‍ ഒന്നുംതന്നെ പൂര്‍ണമല്ല. എഴുതിയത് കുറേ കാലം കഴിഞ്ഞ് വായിക്കുന്ന അവസരത്തില്‍ മാറ്റം ആവശ്യമാണെന്ന് തോന്നും. അതുകൊണ്ട് പൊളിച്ചെഴുതാന്‍ തുടങ്ങിയാല്‍ അതിനേ നേരമുണ്ടാവുകയുള്ളൂ എന്നും മുകുന്ദന്‍ പറഞ്ഞു. നിരവധി പേര്‍ ചര്‍ച്ചയില്‍ പങ്കെടുത്തു. കേരളത്തില്‍ വര്‍ധിച്ചുവരുന്ന ലൈംഗിക പീഢനം, ഇന്ത്യയില്‍ അഭിപ്രായ സ്വാതന്ത്ര്യത്തിന് നേരെ ഉയരുന്ന ഭീഷണി, മലയാളിയുടെ മദ്യപാന ശീലം തുടങ്ങിയ വിഷയങ്ങള്‍ പങ്കെടുത്തവര്‍ ഉന്നയിച്ചു.

സമാജം പ്രസിഡന്റ് പിവി രാധാകൃഷ്ണപിള്ള, സാഹിത്യ വിഭാഗം സെക്രട്ടറി കെസി ഫിലിപ്പ്, കണ്‍വീനര്‍ വിജു കൃഷ്ണന്‍, അനില്‍ വങ്കാട് എന്നിവര്‍ സംബന്ധിച്ചു. അജിത്, ജയചന്ദ്രന്‍, സുധീഷ് രാഘവന്‍, സ്വപ്ന വിനോദ്, രാജു ഇരിങ്ങല്‍, ആദര്‍ശ് മാധവന്‍കുട്ടി, രഞ്ജന്‍ ജോസഫ്, മായ കിരണ്‍, ജോസ് ആന്റണി, ജോയ് തുടങ്ങിയവര്‍ ചര്‍ച്ചയില്‍ പങ്കെടുത്തു.

സ്ത്രീധനത്തിന്റെ കനവും തൊലിവെളുപ്പുമല്ല നല്ല മരുമകളുടെ യോഗ്യത: എല്ലാമാതാപിതാക്കളും ഭര്‍ത്താക്കന്‍മാരും വായിക്കണം ഹൃദയസ്പര്‍ശിയായ ഈ കുറിപ്പ്
Posted by
02 October

സ്ത്രീധനത്തിന്റെ കനവും തൊലിവെളുപ്പുമല്ല നല്ല മരുമകളുടെ യോഗ്യത: എല്ലാമാതാപിതാക്കളും ഭര്‍ത്താക്കന്‍മാരും വായിക്കണം ഹൃദയസ്പര്‍ശിയായ ഈ കുറിപ്പ്

സ്ത്രീധനം

‘മാളു… നേരം ഒരുപാടായി.. എഴുന്നേല്‍ക്ക്.. അച്ഛന്‍ ഉമ്മറത്തിരുന്ന് പിറുപിറുക്കാന്‍ തുടങ്ങീട്ടുണ്ട്’ രാഹുല്‍ കട്ടിലില്‍ ഇരുന്ന് മാളുവിനെ തട്ടി വിളിച്ചു. വിവാഹം കഴിഞ് ഇതാദ്യമായാണ് മാളു ഇത്രയും നേരം വൈകി എഴുന്നേല്‍ക്കുന്നത്. കണിശക്കാരനായ അച്ഛന്‍ വേണു മരുമകള്‍ എഴുന്നേല്‍ക്കാന്‍ നേരം വൈകിയതിന് ഭാര്യ സുലോചനയോട് പിറുപിറുക്കാന്‍ തുടങ്ങി. അച്ഛനെ ഭയന്ന് ജീവിക്കുന്ന മകന്‍ രാഹുല്‍ മാളുവിനെ എഴുന്നേല്‍പ്പിക്കാതെ റൂമില്‍നിന്നും വരാനും പറ്റാതെ നിന്നു.

പതിവ് ദിനങ്ങളില്‍ മാളു ഉമ്മറത്ത് കത്തിച്ചുവെക്കുന്ന നിലവിളക്കിന്റെ വെളിച്ചത്തിലാണ് ആ വീട് ഉണരാറുള്ളത്. ഇന്നിപ്പോ മാളുവിന്റെ സാന്നിദ്ധ്യം ഉമ്മറത്ത് എത്തിയിട്ടില്ല. ചാരു കസേരയില്‍ പത്രവും പിടിച്ചു മുഖം കനപ്പിച്ച് അച്ഛന്റെ ഇരുപ്പ് കണ്ടാലറിയാം ആ മനസ്സില്‍ എന്താണെന്ന്. ‘അതേ.. എനിക്കിനി ഒട്ടും വയ്യാട്ടാ ഇവിടിങ്ങനെ പണിയെടുക്കാന്‍.. കാലിലെ നീര് കൂടിക്കൂടി വരികയാ. എനിക്കൊരുകൂട്ടിന് മോനെകൊണ്ട് കെട്ടിക്കണം. വേഗം രാഹുലിന് പെണ്ണുനോക്കണം’ എന്ന് ഭാര്യ സുലോചന പറഞ്ഞതുകേട്ടപ്പോള്‍ ഉമ്മറത്തെ ചാരു കസേരയില്‍ ഇതുപോലൊരു ഇരുപ്പ് ഇരുന്നതാ. അതന്ന് ഭാര്യയോടുള്ള ദേഷ്യമാണോ അതോ ഒരു ജോലി കണ്ടെത്താതെ നില്‍ക്കുന്ന തന്റെ മകനെ സ്വന്തം പോക്കറ്റില്‍ നിന്നും പൈസ ചിലവാക്കി കെട്ടിക്കേണ്ട അവസ്ഥ ഓര്‍ത്തുള്ള വെപ്രാളമോ.. അറിയില്ല..

ഭാര്യയുടെ വാക്കിനെ മാനിച്ച് വേണുവും അനിയനും നാനാ ദിക്കിലേക്കും പെണ്ണ് തിരഞ്ഞു നടപ്പിലായി. ബ്രോക്കറിന് പൈസ കൊടുത്തു കൊടുത്തു അവസാനം ബ്രോക്കര്‍ സ്വന്തമായൊരു ബൈക്ക് വാങ്ങി എന്ന് അറിഞ്ഞപ്പോള്‍ വേണു പിന്നെ ബ്രോക്കറോടൊത്തുള്ള യാത്ര മതിയാക്കി സ്വയം പെണ്ണ് തിരഞ്ഞു നടന്നുതുടങ്ങി. ആ അമ്മയുടെ പുണ്ണ്യമെന്നോണം ഒരു പെണ്ണിന്റെ ജാതകം ഒത്തു. പെണ്‍കുട്ടി ഇരുനിറം, ചെറിയ വീട്.. എങ്കിലും തൊലി വെളുത്ത രാഹുലിന്റെ മനസ്സും വെളുത്തതുകൊണ്ട് അവളെ മതിയെന്ന് രാഹുല്‍ പറഞ്ഞു. സ്ത്രീധനം അധികമൊന്നും തരാനില്ലാന്ന് പെണ്‍കുട്ടിയുടെ അച്ഛന്‍ പറഞ്ഞപ്പോള്‍ വേണു എടുത്തുചാടി പറഞ്ഞു..’ഞങ്ങള്‍ക്ക് ഈ കുട്ടിയെ ഒന്ന് ഇറക്കി തന്നാല്‍ മാത്രം മതി. ഒരു പണ്ടവും പണവും വേണ്ടാ’ എന്നും.

അതുകേട്ട് മനം നിറഞ്ഞ പെണ്‍കുട്ടിയുടെ അച്ഛന്‍ സന്തോഷത്തോടെ സമ്മതിച്ചു. അധികം വൈകാതെ രാഹുലും മാളുവും തമ്മിലുള്ള വിവാഹം നടന്നു. വിവാഹം കഴിഞ്ഞു വൈകാതെ രാഹുലിന് വിദേശത്ത് ഒരു ജോലി കിട്ടി അങ്ങോട്ട് പോയി. മാളു തന്റെ പഠനം നിര്‍ത്തി രാഹുലിന്റെ വീട്ടില്‍ നല്ലൊരു മരുമകളായി ജീവിച്ചുനേരത്തെ എഴുന്നേല്‍ക്കുന്ന മാളു വീട്ടിലെ സകല ജോലികളും നേരത്തെ ചെയ്തതീര്‍ക്കും. ബാക്കിയുള്ള സമയത്തും മാളു വീട്ടില്‍ എന്തെങ്കിലുമൊക്കെ ചെയ്തുകൊണ്ടിരിക്കും. അതുകൊണ്ടുതന്നെ സുലോചനക്ക് മാളുവിനെ ഒത്തിരി ഇഷ്ട്ടമായി. എന്തും കണ്ടറിഞ്ഞു ചെയ്യുന്നവള്‍. അവരുടെ വീടിന് ഇപ്പൊ എന്തെന്നില്ലാത്ത വെളിച്ചവും ഐശ്വര്യവും കൈവന്നു. സുലോചനക്ക് വയ്യാതെ വീട് വൃത്തിയാക്കലും മറ്റും ഇല്ലായിരുന്നു. മാളു വന്നു കയറിയതില്‍ പിന്നെ അതെല്ലാം അവള്‍ തന്നെ ചെയ്തു. ഒരുനേരം പോലും വെറുതെ ഇരിക്കാറില്ല.

അച്ഛന്‍ വേണു പ്രഷറിന് ഗുളിക കഴിക്കാറുണ്ട്. കഴിക്കേണ്ട സമയം ആയാല്‍ വേണു പറയാതെതന്നെ മാളു ഒരു ഗ്ലാസ് വെള്ളവും ഗുളികയും വേണുവിന്റെ അടുത്ത് എത്തിച്ചിരിക്കും. മുട്ടിന് താഴേക്ക് ഇടക്ക് നീരുവന്ന് വീര്‍ക്കാറുള്ള സുലോചനയുടെ കാലുകള്‍ മാളുവാണ് ഇപ്പോള്‍ കുഴമ്പും തൈലവും ഇട്ടു ഉഴിയാറുള്ളത്. അപ്പോഴൊക്കെ മാളുവിന്റെ തലയില്‍ തലോടി സുലോചന പറയാറുണ്ട്..’നീയെനിക്ക് പിറക്കാതെ പോയ എന്റെ സ്വന്തം മോള്‍ തന്ന്യാ’. ദിവസങ്ങള്‍ കഴിഞ്ഞു. വേണുവിന്റെ അനിയന്‍ ദിവാകരന്റെ മകന് വിവാഹം ആയി. വലിയ ഒരു വീട്ടില്‍ നിന്ന് 75 പവനും ഒരു കാറും ആ പയ്യന് ആ പെണ്ണിന്റെ വീട്ടുകാര്‍ കൊടുത്തു. പെണ്‍കുട്ടിയാണേല്‍ നല്ല ചൊകചൊകാന്ന് ഇരിക്കുന്നു. കല്യാണപ്പന്തലില്‍ വേണുവിന്റെ നോട്ടം പെണ്‍കുട്ടിയില്‍ മാത്രമായിരുന്നു. വിവാഹം കഴിഞ്ഞു വീട്ടിലെത്തിയ വേണു സുലോചനയോടായ് പറഞ്ഞു.

‘എന്റെ മോന്‍ ഇവനെക്കാള്‍ എത്രയോ ഭംഗിയുണ്ട്. എന്നിട്ട് കിട്ടിയത് ഒരു കരികൊള്ളിയെ. ത്ഫൂ.!! വേണുവിന്റെ മനസ്സിലെ സ്വാര്‍ത്ഥ ചിന്തകന്‍ പുറത്തുവന്നു. അന്നുമുതല്‍ വേണു മാളുവിനോട് അകല്‍ച്ച കാണിച്ചു. മാളു കൊണ്ടുവന്ന ഗുളിക കഴിക്കാറില്ല. മാളുവിനെ കാണുമ്പോള്‍ പുച്ഛിക്കുന്ന മുഖവുമായി വേണു തല തിരിക്കും. ഇതെന്താ മറിമായം എന്നറിയാതെ മാളു ആലോചിക്കും. പിന്നീട് വേണു റൂമില്‍ വേണു സുലോചനയോട് തലയണമന്ത്രം ചൊല്ലിത്തുടങ്ങി. ‘ഹും.. എന്റെ അനിയന്റെ മോന്‍ നമ്മുടെ മോന്റെ അത്ര ഭംഗിയുണ്ടോടി? നമ്മുടെ മോന്റെ അത്ര ശമ്പളം ഉണ്ടോടി? എന്നിട്ടും അവന് കിട്ടിയ പെണ്ണിനേയും വീട്ടുകാരെയും സ്ത്രീധനവും ഒന്ന് നോക്ക്യേ.. ഇവിടൊന്നു കേറി വന്നിട്ടുണ്ടല്ലോ അടുക്കളയിലെ മല്ലുപോലെയുള്ളതൊന്ന്. അവരുടെ കയ്യില്‍ ഒന്നുമില്ലത്രേ. ത്ഫൂ.. ഏത് നേരത്താ ദൈവമേ എനിക്ക് ഈ കുരുപ്പിനെ ഇങ്ങോട്ട് കെട്ടിയെടുക്കാന്‍ തോന്നിയത്’

‘ദേ മനുഷ്യാ ആ പെണ്‍കുട്ടി അപ്പുറത്തുണ്ട്. കേള്‍ക്കണ്ടാ.’ ‘കേട്ടാല്‍ എനിക്കെന്താ ഉള്ളതുതന്നെയല്ലേ പറഞ്ഞത്. അര്‍ഹതപ്പെടാത്തത് ആഗ്രഹിക്കാന്‍ പാടില്ല. അവര്‍ക്ക് അന്ന് തോന്നണമായിരുന്നു നമ്മളെപ്പോലെ ഉള്ള വലിയ കുടുംബത്തേക്ക് ബന്ധം ചേരില്ലാന്ന്.”അതിന് നിങ്ങള്‍ തന്നെയല്ലേ മനുഷ്യ അവളെ മാത്രം ഇറക്കിത്തന്നാല്‍ മതിയെന്നും പൊന്നും പണവും വേണ്ടാന്നോക്കെ പറഞ്ഞത്. എന്നിട്ടിപ്പോ അവരെയാണോ കുറ്റപ്പെടുത്തുന്നത്.”ഞാന്‍ അങ്ങനെ പലതും പറയും. അതെന്ന് വെച്ച് അവര്‍ സ്ത്രീധനം കുറക്കാന്‍ പാടുണ്ടോ.’

‘ആ എനിക്കൊന്നും പറയാനില്ല. നിങ്ങള്‍ക്ക് വേണ്ടേല്‍ മോനെ നാട്ടിലോട്ട് വിളിച്ചുവരുത്തി എന്താന്നുവെച്ചാല്‍ തീരുമാനിച്ചോ. ഞാനൊന്നിനും ഇല്ല്യ”ആഹ് അത് തന്നെയാ ചെയ്യാന്‍ പോകുന്നത്. എന്റെ മോന് നല്ല ചാമ്പക്ക പോലെയുള്ള ഒരു പെണ്ണിനെ കണ്ടെത്തും ഞാന്‍. നോക്കിക്കോ നീ’ ഇതെല്ലാം കേട്ട് കണ്ണുനീര്‍ വാര്‍ത്ത് കയ്യില്‍ വെള്ളത്തിന്റെ ജഗ്ഗുമായി മാളു അവിടെനിന്നു. കുറച്ചുനാളത്തെ ഇടവേള കഴിഞ്ഞു രാഹുല്‍ നാട്ടില്‍ മടങ്ങിയെത്തി. പോകുമ്പോള്‍ ഉള്ള സാഹചര്യമല്ല ഇപ്പോള്‍ വീട്ടില്‍ ഉള്ളതെന്ന് രണ്ടുദിവസത്തിനുള്ളില്‍ തന്നെ രാഹുലിന് മനസ്സിലായി. രാഹുല്‍ കാര്യം മാളുവിനോട് ചോദിച്ചെങ്കിലും മാളു ഒന്നും പറഞ്ഞില്ല. അച്ഛനോട് ചോദിക്കാന്‍ ധൈര്യമില്ലാത്തതുകൊണ്ട് രാഹുല്‍ അച്ഛന്റെ അടുത്തും ചോദിച്ചില്ല. കുറച്ചുദിവസം കഴിഞ്ഞു അച്ഛന്‍ തന്നെ രാഹുലിന്റെ അടുത്തുവന്നു പറഞ്ഞു.

‘മോനെ നമ്മള്‍ പേരുകേട്ട തറവാട്ടുകാരാണ്. അച്ഛന് ഈ നാട്ടിലെ വില മോന് അറിയുന്നതല്ലേ. അതുകൊണ്ട് ഞാന്‍ ഒരു കാര്യം പറഞ്ഞാല്‍ മോന്‍ അനുസരിക്കണം. ഞാനായിട്ട് നിനക്ക് കണ്ടെത്തിതന്ന നിന്റെ ഭാര്യയെ നീ ഒഴിവാക്കി വേറെ നല്ല കുടുംബത്തില്‍നിന്നും കാണാന്‍ കൊള്ളാവുന്ന ഒരു പെണ്‍കുട്ടിയെ നീ വിവാഹം കഴിക്കണം. അല്ലെങ്കില്‍ അച്ഛന് സമൂഹത്തില്‍ ഇറങ്ങി നടക്കാന്‍ പറ്റാതാകും. നമ്മുടെ നിലക്കും വിലക്കും ചേര്‍ന്ന ബന്ധമല്ല ഇത്. അതുകൊണ്ട് നമുക്കിത് അവസാനിപ്പിക്കാം.’ ഇന്നുവരെ അച്ഛന്റെ വാക്കുകള്‍ക്ക് എതിര്‍ത്തൊരു മറുപടി പറയാത്ത രാഹുല്‍ സ്വന്തം ജീവിതത്തിന്റെ കാര്യത്തിലും ഒരു തീരുമാനം എടുക്കാന്‍ പറ്റാത്ത മനുഷ്യനായിമാറി. ഒന്നും മിണ്ടാതെ തിരിഞ്ഞുനടക്കാന്‍ മുതിര്‍ന്ന രാഹുല്‍ കണ്ടത് മുഖം പൊത്തിപിടിച്ചു അകത്തേക്ക് ഓടിയ മാളുവിനെയാണ്. രാഹുല്‍ മാളുവിന്റെ അടുത്തേക്ക് ചെന്നു.

‘മോളെ മാളു.. ഞാന്‍’ ‘വേണ്ട ഏട്ടാ.. ഒന്നും പറയേണ്ട.. അച്ഛന്‍ പറഞ്ഞതാ ശരി. അച്ഛന്റെ പേരിനും പ്രൗഢിക്കും ഞങ്ങളെപ്പോലുള്ള പാവപ്പെട്ടവരുമായുള്ള ബന്ധം ചേരില്ല. നമ്മള്‍ അധികമൊന്നും ജീവിച്ചില്ലല്ലോ. അച്ഛന്‍ പറഞ്ഞപോലെ ചെയ്യാം. അല്ലെങ്കില്‍ അച്ഛന്റെ ഉള്ളില്‍ ഞാന്‍ ഇത്രയും വലിയൊരു കരടായി ഇവിടെ കഴിയേണ്ടിവരും. അതുവേണ്ടാ. നമുക്ക് പിരിയാം. എന്തായാലും ഏട്ടന്‍ എന്നെ ഉപേക്ഷിച്ചാലും ഈ മാളു വേറെ ഒരാളെ വിവാഹം കഴിച്ചു ജീവിക്കാനൊന്നും പോണില്ല. ഏട്ടന് വേണ്ടി അച്ഛന്‍ നല്ലൊരു പെണ്ണിനെ കണ്ടെത്തി തരും. ആ കുട്ടിയെ വിവാഹം ചെയ്തു സന്തോഷത്തോടെ ജീവിക്കണം.’

‘നീയെന്തൊക്കെയാ മാളു പറയുന്നത്. അച്ഛന്‍ അങ്ങനെ ഓരോന്നും പറഞ്ഞെന്നുവെച്ചു നീ കാര്യമാക്കേണ്ട ആവശ്യമില്ല’ രാഹുലിന്റെ വാക്കുകള്‍ മുഴുവന്‍ കേള്‍ക്കാതെ മാളു കണ്ണുകള്‍ തുടച്ചു റൂമിലേക്കോടി. പിറ്റെന്നാള്‍ കയ്യില്‍ രണ്ട് ബാഗുമായി റൂമില്‍ നിന്നും വരുന്ന മാളുവിനെക്കണ്ട രാഹുല്‍ അവളെ പിന്തിരിപ്പിക്കാന്‍ കുറെ ശ്രമിച്ചു. അന്നേരം അച്ഛന്റെ മുഖം കണ്ട് രാഹുല്‍ ആ പിന്തിരിപ്പിക്കലില്‍ നിന്നും പിന്‍വാങ്ങി. ‘അമ്മ അടുക്കളയില്‍നിന്നും മോളെ എന്ന് വിളിച്ചു അടുത്തുവന്നപ്പോള്‍ അമ്മയുടെ വലതു കൈ പിടിച്ചു അച്ഛന്‍ അതിനും തടസ്സം നിന്നു. അവസാനം നിറഞ്ഞൊഴുകിയ കണ്ണുകളുമായി മാളു ആ പടിയിറങ്ങി നടന്നു.

കുറച്ചു ദിവസങ്ങള്‍ക്ക് ശേഷം വേണുവിന്റെ അനിയനും ഭാര്യയും കൂടി വീട്ടില്‍ വന്നു. രാവിലെ പുറത്തോട്ടിറങ്ങാന്‍ തുടങ്ങിയ വേണു പതിവില്ലാതെ അനിയനെയും ഭാര്യയെയും കണ്ടപ്പോള്‍ അവിടെ നിന്നു. ‘എന്തേ രണ്ടാളുംകൂടി രാവിലെതന്നെ’? ‘ഒന്നും പറയണ്ടാ… ആകെയുള്ള സന്തതി ഒരു മൂധേവിയെ കെട്ടികൊണ്ടുവന്നതിനു ശേഷം ആ വീടിന്റെ ഐശ്വര്യവും സമാധാനവും എല്ലാം പോയി.’ ‘എന്താടാ ഒന്ന് തെളിച്ചുപറ’ അനിയന്റെ ഭാര്യ തുടര്‍ന്നു.’ഏട്ടാ.. രണ്ടുനില വീടല്ലേ വലിയ പഠിപ്പും പത്രാസ്സുമുള്ള പെണ്ണല്ലേ സൗന്ദര്യം തുളുമ്പി നില്‍ക്കുന്ന പെണ്ണല്ലേ എന്നൊക്കെ പറഞ്ഞു അന്ന് നമ്മളെല്ലാവരും അവനെക്കൊണ്ട് കെട്ടിച്ചു. പക്ഷെ അന്നുമുതല്‍ ഈ നിമിഷംവരെ അവളെ എനിക്കൊരു മരുമകളായി കാണാന്‍ പറ്റിയിട്ടില്ല അവള്‍ക്ക് എന്നെ ഒരു അമ്മായിഅമ്മ ആയി കാണാനും പറ്റിയിട്ടില്ല.’

‘വീട്ടില്‍ ഒരു ജോലി പോലും ചെയ്യില്ല. അതുപോട്ടെ, രാവിലെ എഴുന്നേല്‍ക്കുന്നത് 10 മണിക്ക്. എന്നിട്ട് ആ വെള്ളാമ്പിച്ചു നില്‍ക്കുന്ന മുഖത്തു എന്തൊക്കെയോ തേച്ചു പിടിപ്പിച്ചു ഒരു മണിക്കൂര്‍ ഇരിക്കും. പിന്നെയാണ് കുളിയും തേവാരവും. അതുമാത്രമല്ല, അവള്‍ക്ക് മാത്രമായി ഒരു കറി ഉണ്ടാക്കണം. ഉണ്ടാക്കിയില്ലേല്‍ അവള്‍ അവനെയും കൂട്ടി കാറില്‍ ഹോട്ടലില്‍ പോയി കഴിക്കും. ഏത് സമയവും ടീവിയുടെ മുന്നില്‍ അല്ലേല്‍ കമ്പ്യൂട്ടറും മടിയില്‍ വെച്ച് ഇരിക്കും. വേണുവും ഭാര്യയും മുഖാമുഖം നോക്കി. അപ്പോള്‍ ഭാര്യ വേണുവിന്റെ മുഖത്തുനിന്ന് ദേഷ്യത്തോടെ തലവെട്ടിച്ചു. അനിയന്റെ ഭാര്യ തുടര്‍ന്നു.

‘ന്റെ ചേച്ച്യേ.. അവള്‍ക്ക് ആര്‍ത്തവം ഉണ്ടായാല്‍ പോലും വീട്ടിലെ ഉമ്മറത്തെ പൂജാമുറിയുടെ മുന്നിലൂടെയൊക്കെയാ നടത്തം. അതൊക്കെ സാമാന്യം ബുദ്ധിയുള്ള പെണ്‍കുട്ടികള്‍ ചെയ്യുമോ? എന്നിട്ട് ഞാന്‍ എന്തേലും പറയാന്‍ പോയാല്‍ എന്നോട് തട്ടിക്കേറും. മിനിഞ്ഞാന്ന് ഞാനൊന്ന് കിണറിന്റെ അവിടെ വഴുക്കി വീണു. കാലില്‍ നീരും വന്നു. നടക്കാന്‍ പറ്റാതെ അന്ന് കിടന്നു. അന്ന് ഈ മനുഷ്യനാ അടുക്കള പണി ചെയ്തത്. അവള്‍ക്ക് വെട്ടിവിഴുങ്ങാന്‍ വെച്ചുണ്ടാക്കിയത്. ഒരു തൈലത്തിന്റെ കുപ്പി എടുക്കാന്‍ പറഞ്ഞപ്പോള്‍ അവള്‍ പറയാ അതിന്റെ മണം കേട്ടിട്ട് ചര്‍ദ്ധിക്കാന്‍ വരുന്നെന്ന്. ഞങ്ങള്‍ക്കും ഇല്ലേ ഒരു കൊച്ചിനെ താലോലിക്കാനൊക്കെ മോഹം. അതിനുപോലും അവള്‍ മുടക്കം പറഞ്ഞു. എന്തോ പഠിക്കാന്‍ പോണമത്രേ. അപ്പോള്‍ വയറു വീര്‍ത്താല്‍ മോശമാണെന്ന്. അവസാനം എന്റെയും ഏട്ടന്റെയും അടുത്ത് അവള്‍ക്കിനി നില്‍ക്കാന്‍ പറ്റില്ലെന്ന്. അവനെയും കൂട്ടി ഒരു ഫ്‌ലാറ്റ് എടുക്കാന്‍ പോവുകയാണത്രെ.

‘എന്തൊക്കെയാ ഈ കേള്ക്കുന്നെ ദൈവമേ. ഇങ്ങനെയും പെണ്‍കുട്ടികള്‍ ഉണ്ടോ’ സുലോചന മുഖത്ത് കൈവെച്ചു പറഞ്ഞു. ‘ഇതൊക്കെയല്ലേ ചേച്ചി അവിടത്തെ കാര്യം. പോകുവാണേല്‍ പോട്ടെ. നാട്ടുകാരെക്കൊണ്ട് പറയിപ്പിക്കും അവളും അവനും. അത് ഞങ്ങള്‍ സഹിച്ചോളാം. അല്ല മാളു എന്ത്യേ. കണ്ടില്ലല്ലോ. അല്ലേല്‍ ചായയുമായി വരേണ്ട സമയം കഴിഞ്ഞല്ലോ’ അനിയന്റെ ഭാര്യയുടെ ചോദ്യം കേട്ട് വേണു സുലോചനയെ നോക്കി. എന്താ പറയാ എന്നുള്ള ചിന്തയില്‍. ‘അവള്‍ രണ്ടൂസം അവളുടെ വീട്ടില്‍ നില്‍ക്കാന്‍ പോയി.’ സുലോചനയുടെ മറുപടി കാക്കാതെ വേണു പറഞ്ഞു.’ഏട്ടാ നിങ്ങളുടെ ഭാഗ്യമാണ് മാളു. ഇന്നത്തെ കാലത്തു അങ്ങനെയുള്ള ഒരു കുട്ടിയെ എവിടെയും കിട്ടില്ല. പഠിത്തവും നിര്‍ത്തി ഭര്‍ത്താവിന്റെ മാതാപിതാക്കളെ ശുശ്രൂഷിക്കാന്‍ തീരുമാനമെടുക്കുന്ന ആ മനസ്സുണ്ടല്ലോ അതാണ് ഏറ്റവും വലിയ പുണ്യം’

വേണുവിന്റെ അനിയന്‍ പറഞ്ഞതുകേട്ട് വാക്കുകള്‍ ഇല്ലാതെ വേണു ഇരുന്നു. കുറച്ചു നാളുകള്‍ കഴിഞ്ഞു. സുലോചനയുടെ കാലില്‍ നീര് കൂടിവന്നു. മുറ്റം അടിച്ചുവാരാതെ പുല്ലുകള്‍ മുളച്ചുതുടങ്ങി. അരിമണികള്‍ കാത്ത് മുറ്റത്ത് വീട്ടിലെ കോഴികളും താറാവുകളും കാത്തുനില്‍ക്കാന്‍ തുടങ്ങി. നിലവിളക്കിലെ കരി ദിവസങ്ങളോളം അങ്ങനെ ഇരുന്നു. ഉമ്മറത്തെ മുലകളിലും മറ്റും മാറാലകള്‍ വന്നു തുടങ്ങി. വേണുവിന്റെ പ്രഷറിന്റെ ഗുളിക കഴിക്കേണ്ട സമയം തെറ്റി തുടങ്ങി. എല്ലാംകൊണ്ടും ആ വീട് ഉറങ്ങി. അനക്കമില്ല വെളിച്ചമില്ല ശബ്ദമില്ല. ഓരോരുതരും ഒരു മൂലയില്‍ ഇരുന്നു. ‘അച്ചാ.. എനിക്ക് ടിക്കറ്റ് കിട്ടി. മറ്റന്നാള്‍ പോണം. അതിനുമുന്‍പ് അച്ഛന്റെ തീരുമാനം എന്താണെന്നുവെച്ചാല്‍ എടുക്കണം. കാരണം ഒപ്പിടാന്‍ ഞാന്‍ വേണമല്ലോ. പിന്നൊരു കാര്യം, എന്നെ വേറെ പെണ്ണ് കെട്ടിക്കാം എന്നുള്ള ആഗ്രഹം നടക്കില്ല. ഇന്നുവരെ അച്ഛനെ ഞാന്‍ ധിക്കരിച്ചിട്ടില്ല. പക്ഷെ അച്ഛനും അമ്മയും കണ്ടെത്തിത്തന്ന പെണ്ണിനെത്തന്നെയാണ് ഞാന്‍ വിവാഹം ചെയ്തതും. എനിക്കില്ലാത്ത പോരായ്മ അച്ഛന്‍ അവളില്‍ കണ്ടെത്തി കുറ്റം ചുമത്തി പറഞ്ഞയച്ചു. ഞാന്‍ പിന്നെ അവളെ കാണാനും മിണ്ടാനും പോയിട്ടില്ല. രാഹുലിന്റെ ഭാര്യ അത് മാളു തന്നെയാണ്. എന്റെ മരണം വരെ.’

വേണു ഒന്നും മിണ്ടാതെ ചാരുകസേരയില്‍ ചാഞ്ഞിരുന്നു. സുലോചന അകത്തിരുന്നു പുഞ്ചിരിച്ചു. രാഹുലിന് പോവേണ്ട ദിവസമെത്തി.
‘അമ്മേ.. അച്ഛനെന്ത്യേ.. ഇറങ്ങേണ്ട സമയമായി.’ ‘അപ്പൊ നീ പോവാണ് അല്ലേടാ. ആ പാവം പെണ്ണിന്റെ ശാപം വാങ്ങിവെച്ച് പോവുകയാണല്ലേ?”അതിനി ഇവിടെ സംസാരിക്കേണ്ട അമ്മേ, ഞാന്‍ പോട്ടെ.. ‘ രാഹുല്‍ പെട്ടിയുമായി ഉമ്മറത്തോട്ട് നടന്നു. അപ്പോള്‍ മുറ്റത്ത് ഒരു കാര്‍ വന്നുനിന്നു. ഡോര്‍ തുറന്നു വേണു ഇറങ്ങിവന്നു. ‘നീ ഇറങ്ങുവാനായോ.?’ ‘മ്മ്.. സമയമായി. അച്ഛനെ കാക്കുവായിരുന്നു. ഇനി യാത്ര പറയുന്നില്ല. പോയിവരാം’ ‘മ്മ്.. പോയിവാ..’അച്ഛന്‍ സമ്മതം മൂളി ചവിട്ടുപടി കയറി. കൂടെ രാഹുല്‍ മുറ്റത്തോട്ടിറങ്ങി.

‘പിന്നേ.. പോയിട്ട് ഒരു എട്ട് മാസം കഴിഞ്ഞിങ്ങു പോരെ. നിന്റെ കുട്ടിയെ കാണാന്‍’ വേണു തിരിഞ്ഞുനിന്നു രാഹുലിനോടായ് പറഞ്ഞു. പറഞ്ഞത് എന്താണെന്ന് മനസ്സിലാവാതെ രാഹുലും സുലോചനയും വേണുവിനെ നോക്കി. ‘അതേടാ… ദാ ഇരിക്കുന്നു കാറില്‍ നിന്റെ മാളു. പോയി ചോദിക്ക് എന്താ കാര്യമെന്ന്.’രാഹുല്‍ കാറിലേക്ക് നോക്കി. പുഞ്ചിരിച്ചു മുഖവുമായി മാളു കാറില്‍ നിന്നിറങ്ങി. നീര് കൂടിയ കാലുമായി സുലോചന അതിവേഗം മാളുവിന്റെ അടുത്തുവന്നു.’മോളെ മാളു’ സുലോചന അവളുടെ നെറുകയില്‍ ഉമ്മ വെച്ചു. ‘അമ്മേ.. ‘അമ്മ ഒരു അച്ചമ്മ ആവാന്‍ പോകുന്നു.. രാഹുലേട്ടാ.,’മാളുവിന്റെ ആ വിളിയില്‍ രാഹുലിന് മനസ്സിലായി താനൊരു അച്ഛന്‍ ആവാന്‍ പോകുന്നുവെന്ന്. മാളുവിനെ നെഞ്ചോട് ചേര്‍ത്തുപിടിച്ചു. ‘രണ്ടാളും അകത്തോട്ട് പോയി സ്‌നേഹപ്രകടനം നടത്തിക്കോ. ഇവിടെ ആളുകള്‍ കാണും.’ വേണു ചിരിച്ചുകൊണ്ട് പറഞ്ഞു.

എല്ലാരും അകത്തോട്ട് കയറിപ്പോയി. നടക്കുന്നതിനിടയില്‍ അച്ഛന്‍ പറഞ്ഞു. ‘മോളെ മാളു.. അച്ഛനോട് ക്ഷമിക്കണം. നിന്നെ വാക്കുകള്‍ കൊണ്ട് ഒരുപാട് നോവിച്ചിട്ടുണ്ട് ഞാന്‍. അതിനു തിരിച്ചൊരു വാക്കുപോലും പറയാതെ നീ എല്ലാം കേട്ടു. അതുകൊണ്ട് തന്നെയാ ഞാന്‍ തന്നെ നിന്നെ കൂട്ടികൊണ്ടുവന്നത്. നീ പോയതില്‍ പിന്നെ ഈ വീടുറങ്ങി ഞങ്ങള്‍ തനിച്ചായി. നീയായിരുന്നു ഈ വീടിന്റെ വെളിച്ചം. ഇനി അച്ഛന്റെ ഭാഗത്തുനിന്ന് എന്റെ മോളെ വേദനിപ്പിക്കുന്ന ഒരുവാക്കുപോലും വരില്ല”എന്താ അച്ഛാ ഇതൊക്കെ.. അങ്ങനൊന്നും പറയണ്ടാ. ശാസിക്കേണ്ടിടത്ത് ശാസിക്കണം. എങ്കിലേ ഞാന്‍ നല്ല കുട്ടിയാകൂ’ മാളുവിന്റെ മറുപടി കേട്ട് എല്ലാരും ചിരിച്ചു. പിന്നീട് ആ വീട് സന്തോഷത്തിന്റെ നാളുകള്‍ മാത്രമായി.

NB: സ്ത്രീധനത്തിന്റെ പേരില്‍ പല പെണ്‍കുട്ടികളും ഇന്നും ഒരുപാട് വിഷമങ്ങള്‍ അനുഭവിക്കുന്നവരുണ്ട്. സ്ത്രീധനം എന്നത് ഒരു പെണ്‍ക്കുട്ടിയുടെ നല്ല മനസ്സ് മാത്രമാണ്. അതിനേക്കാള്‍ വലിയ സ്ത്രീധനം ഇല്ല എന്ന് ചിന്തിക്കുക. ഇനി സ്ത്രീധനത്തിന്റെ പേരില്‍ ഒരു പെണ്‍കുട്ടിയും വിഷമിക്കാതിരിക്കട്ടെ.

രചന: വിപിന്‍ദാസ് അയിരൂര്‍

കവര്‍ ചിത്രമായി ഉപയോഗിച്ചിരിക്കുന്നത് നടി പാര്‍വ്വതി രതീഷിന്റെ ഫോട്ടോ

പ്രഭാവര്‍മയ്ക്ക് വള്ളത്തോള്‍ പുരസ്‌കാരം
Posted by on 25 September

പ്രഭാവര്‍മയ്ക്ക് വള്ളത്തോള്‍ പുരസ്‌കാരം

തിരുവനന്തപുരം: ഈ വര്‍ഷത്തെ വള്ളത്തോള്‍ പുരസ്‌കാരം കവിയും ഗാനരചയിതാവുമായ പ്രഭാവര്‍മയ്ക്ക്. ശ്യാമമാധവം എന്ന കൃതിക്കാണ് പുരസ്‌കാരം. 1,11,111 രൂപയും ഫലകവും അടങ്ങുന്നതാണ് അവാര്‍ഡ്. ഈ കൃതിക്ക് കേന്ദ്ര സാഹിത്യ അക്കാഡമി അവാര്‍ഡും വയലാര്‍ അവാര്‍ഡും ലഭിച്ചിരുന്നു.

ശ്രീകൃഷ്ണന്റെ ജീവിതത്തെ ആധാരമാക്കി രചിച്ച ശ്യാമമാധവം വ്യാസ മഹാഭാരതത്തിന്റെ പശ്ചാത്തലത്തിലുള്ള രചനയാണ്. കൃഷ്ണായനം മുതല്‍ ശ്യാമമാധവം വരെ 15 അദ്ധ്യായങ്ങളടങ്ങിയ ശ്യാമമാധവത്തിന് വയലാര്‍ അവാര്‍ഡ് ലഭിച്ചിരുന്നു. സൗപര്‍ണിക, ആര്‍ദ്രം, അവിചാരിതം തുടങ്ങിയവയാണ് പ്രഭാവര്‍മ്മയുടെ പ്രധാന കൃതികള്‍. കേരളസാഹിത്യ അക്കാദമി അവാര്‍ഡ്, മലയാറ്റൂര്‍ അവാര്‍ഡ്, മഹാകവി പി പുരസ്‌കാരം, ചങ്ങമ്പുഴ പുരസ്‌കാരം, വൈലോപ്പിള്ളി അവാര്‍ഡ്, കൃഷ്ണഗീതി പുരസ്‌കാരം, മികച്ച ചലച്ചിത്രഗാനരചയിതാവിനുള്ള പുരസ്‌കാരങ്ങള്‍ തുടങ്ങിയവയും പ്രഭാവര്‍മയ്ക്ക് ലഭിച്ചിട്ടുണ്ട്.

ഹിറ്റ്‌ലറുടെ അപൂര്‍വ്വ ആത്മകഥയ്ക്ക് ലേലത്തില്‍ റെക്കോര്‍ഡ് തുക
Posted by
19 September

ഹിറ്റ്‌ലറുടെ അപൂര്‍വ്വ ആത്മകഥയ്ക്ക് ലേലത്തില്‍ റെക്കോര്‍ഡ് തുക

ന്യൂയോര്‍ക്ക്: ജര്‍മന്‍ സ്വേച്ഛാധിപതി അഡോള്‍ഫ് ഹിറ്റ്‌ലറെ ചരിത്രത്തിലെ ഏറ്റവും വലിയ ക്രൂരനെന്ന് വിശേഷിപ്പിക്കുമ്പോഴും ആ വ്യ്കതിക്കായി പണം ചിലവഴിക്കാന്‍ മത്സരിച്ച് സമ്പന്നര്‍. നാസിസത്തിന്റെ ഉപജ്ഞാതാവും ഹോളോകോസ്റ്റിന്റെ ബുദ്ധികേന്ദ്രവുമായ ഈ ഭരണാധികാരിയുടെ ആത്മകഥ സ്വന്തമാക്കാന്‍ ഇക്കാലത്തും ജനങ്ങള്‍ മത്സരിക്കുകയാണെന്നതും ശ്രദ്ധേയം.

അമേരിക്കയില്‍ ഹിറ്റ്‌ലറുടെ ആത്മകഥയായ ‘മെയ്ന്‍ കാംഫ്’ ലേലത്തിനു വെച്ചപ്പോള്‍, സ്വന്തമാക്കാനായി സമൂഹത്തിലെ ഉന്നതര്‍ കടുത്ത മത്സരമാണ് കാഴ്ചവെച്ചത്. ഒടുവില്‍ 8,33,755 രൂപ (13,000 യുഎസ് ഡോളര്‍)യില്‍ ലേലമുറപ്പിച്ചു.

ഹിറ്റ്‌ലറുടെ ഒപ്പുള്ള അപൂര്‍വം കോപ്പികളിലൊന്നാണെന്ന പ്രത്യേകതയും ഇതിനുണ്ട്. പുസ്തകത്തിന്റെ ആദ്യ പേജില്‍ ഹിറ്റ്‌ലര്‍ സ്വന്തം കൈപ്പടയില്‍ എഴുതിയ ”യുദ്ധത്തില്‍ അതിജീവിക്കുന്നവര്‍ കുലീനമനുഷ്യര്‍ മാത്രമാണ്” എന്ന കുറിപ്പുമുണ്ട്. ഈ എഴുത്തിന്മേലാണ് ആഗസ്റ്റ് 18, 1930 എന്ന തീയതിയോടൊപ്പമുള്ള ഹിറ്റ്‌ലറുടെ ഒപ്പ്.

അതേസമയം, പുസ്തകത്തിന് കൂടുതല്‍ തുക ലഭിക്കുമെന്നായിരുന്നു പ്രതീക്ഷയെന്ന് ലേലം നടത്തിപ്പുകാര്‍ വാദിച്ചു.

സൈബര്‍ ലോകത്ത് വായനയ്ക്ക് പുതിയ രൂപം നല്‍കി റീഡേഴ്‌സ് സര്‍ക്കിള്‍
Posted by
14 September

സൈബര്‍ ലോകത്ത് വായനയ്ക്ക് പുതിയ രൂപം നല്‍കി റീഡേഴ്‌സ് സര്‍ക്കിള്‍

എല്ലാവരും ഒരുപോലെ ഇഷ്ടപ്പെടുന്ന ഒരു ശീലമാണ് വായന. വായനാശീലമുള്ളവരെ പ്രേത്സാഹിപ്പിക്കാനും നിരവധി പേരാണുള്ളത്. ഇപ്പോള്‍ വായന ഓണ്‍ലൈനിലൂടെയും സാധ്യമായതോടെ വായമക്കാരുടെ എണ്ണവും വന്‍തോതില്‍ വര്‍ധിച്ചിട്ടുണ്ട്. വായന മാത്രമല്ല വായിച്ചതിനെകുറിച്ചുള്ള അഭിപ്രായങ്ങളും വിമര്‍ശനങ്ങളും എല്ലാം അപ്പോള്‍ തന്നെ രേഖപ്പെടുത്താന്‍ കഴിയുന്ന സാഹചര്യമാണല്ലോ ഇപ്പോള്‍. ഏറ്റവും കൂടുതല്‍ വായനക്കാരുള്ള ഒരു മാധ്യമമാണ് ഫേസ്ബുക്ക്. അതുകൊണ്ടുതന്നെ വായനയെ പ്രോത്സാഹിപ്പിക്കാനായി ഒരു ഫേസ്ബുക്ക് വായനാമൂല ആരംഭിച്ചിരിക്കുകയാണ് ഒരുക്കൂട്ടം യുവാക്കള്‍.

വായനയുടെയും എഴുത്തിന്റെയും വിയോജിപ്പുകളുടെയും യോജിപ്പുകളുടെയും ഒരു ഇടം. വായിച്ച പുസ്തകങ്ങളെ പറ്റിയുള്ള ചര്‍ച്ചകള്‍ മാത്രമല്ല, കൃത്യമായി നിലപാടുകള്‍ പറയാനുള്ള ഇടം. ഓണ്‍ലൈനില്‍ നിന്ന് ഓഫ് ലൈനിലേക്ക് ആ നിലപാടുകളെയും രാഷ്ട്രീയത്തെയും മുന്നോട്ട് കൊണ്ട് പോവുന്നവരുടെയും ഒരുമിച്ച് ചേരല്‍. അങ്ങനെ പലതുമാണ് ‘ദി റീഡേഴ്‌സ് സര്‍ക്കിള്‍’ എന്ന ഫേസ്ബുക്ക് കൂട്ടായ്മ.

നാല് മാസം മുമ്പാണ്, വായനയെ പ്രോത്സാഹിപ്പിക്കാനും അത് വഴി പുരോഗമന ആശയങ്ങള്‍ പ്രചരിപ്പിക്കാനുമായി ഒരു കൂട്ടം യുവാക്കള്‍ ചേര്‍ന്ന് ഗ്രൂപ്പ് തുടങ്ങുന്നത്. വായനയെ സ്‌നേഹിക്കുന്നവര്‍ക്കും അത്തരം ചര്‍ച്ചകളില്‍ ഇടപെടാന്‍ താല്‍പര്യമുള്ളവര്‍ക്കും ഗ്രൂപ്പില്‍ ചേരാം. വായനാ ചര്‍ച്ചകള്‍ കൊണ്ടും എഴുത്ത് ഇടപെടലുകള്‍ കൊണ്ടും പെട്ടെന്ന് തന്നെ ഗ്രൂപ്പ് സജീവമായി. വളരെ പെട്ടെന്ന് തന്നെ നൂറ് കണക്കിന് പേരുള്ള വലിയൊരു പ്ലാറ്റ്‌ഫോം ആയി മാറാന്‍ റീഡേഴ്‌സ് സര്‍ക്കിളിനു കഴിഞ്ഞു.

എഴുത്തുകാര്‍ക്കും കലാകാരന്‍മാര്‍ക്കും മറ്റുമെതിരെ നടക്കുന്ന അക്രമങ്ങള്‍ക്കെതിരെ പുരോഗമനപക്ഷത്തു നിന്ന് കൊണ്ട് ശക്തമായ നിലപാടുകള്‍ ഈ ഓണ്‍ലൈന്‍ കൂട്ടായ്മ എടുക്കാറുണ്ട്. മാധ്യമപ്രവര്‍ത്തക ഗൗരി ലങ്കേഷിന്റെ കൊലപാതകത്തില്‍ പ്രതിഷേധിച്ച് നിരവധി പ്രതികരണങ്ങളിലും എആര്‍ റഹ്മാനെതിരെ നടന്ന പ്രചരണങ്ങള്‍ക്കെതിരെയും നിലപാടുകള്‍ കൊണ്ട് ചെറുത്ത് നിന്നതില്‍ സൈബറിടത്തിലെ റീഡേഴ്‌സ് സര്‍ക്കിളിന്റെ ഇടപെടല്‍ ചെറുതല്ല. ഗ്രൂപ്പില്‍ വരുന്ന മികച്ച പോസ്റ്റുകള്‍ തെരഞ്ഞെടുത്ത് അവ പബ്ലിഷ് ചെയ്യുന്ന മറ്റൊരു പ്ലാറ്റ്‌ഫോം കൂടി റീഡേഴ്‌സ് സര്‍ക്കിളിനുണ്ട്. മികച്ച പോസ്റ്റുകള്‍ തെരഞ്ഞെടുക്കുന്നത് അഡ്മിന്‍ ടീമാണ്. ആയിരത്തിലധികം ഫോളോവേഴ്‌സ് ആണ് ഇപ്പോള്‍ ഈ പേജിനുള്ളത്.

എല്ലാ മാസവും ബുക്‌സ് ഓഫ് ദി മന്ത് എന്ന പേരില്‍ പുസ്തകങ്ങളുടെ ചര്‍ച്ച ഗ്രൂപ്പില്‍ നടക്കാറുണ്ട്. ഗ്രൂപ് അംഗങ്ങള്‍ക്കായി രണ്ടോ മൂന്നോ പുസ്തകങ്ങള്‍ സെലക്ട് ചെയ്തു വായനക്കായി വെക്കുന്നു. ആ പുസ്തകങ്ങളുടെ മേല്‍ ചര്‍ച്ചകളും നിരൂപണവും ക്ഷണിക്കുന്നു.. എല്ലാ അംഗങ്ങള്‍ക്കും അവരവര്‍ വായിച്ച പുസ്തകങ്ങളെ പറ്റിയുള്ള അഭിപ്രായങ്ങള്‍ എഴുതുകയും ഇടപെടുകയും ചെയ്യാം. പുസ്തകങ്ങളുമായി ബന്ധപ്പെട്ട സംശയങ്ങള്‍, ചോദ്യങ്ങള്‍, ക്വിസ് എന്നിവ ഒക്കെ നടത്താനുമുള്ള ഇടം കൂടിയാണ് ഈ കൂട്ടായ്മ.

തുടര്‍ചികിത്സക്ക് പണം കണ്ടെത്തണം: അതിജീവനത്തിന്റെ കൈയ്യൊപ്പുള്ള ബിന്ദു സന്തോഷിന്റെ ആദ്യ പുസ്തകം ‘വാക്സ്ഥലി’ നാലാം പതിപ്പിലേക്ക്..
Posted by
09 September

തുടര്‍ചികിത്സക്ക് പണം കണ്ടെത്തണം: അതിജീവനത്തിന്റെ കൈയ്യൊപ്പുള്ള ബിന്ദു സന്തോഷിന്റെ ആദ്യ പുസ്തകം 'വാക്സ്ഥലി' നാലാം പതിപ്പിലേക്ക്..

പൊന്നാനി: വിധിയെ തോല്‍പ്പിച്ച് അക്ഷരങ്ങളിലൂടെ പുതിയ തീരം തേടുകയാണ് ബിന്ദുസന്തോഷ് എന്ന എഴുത്തുകാരി. അതിജീവനത്തിന്റെ കരുത്തും അഴകുമുണ്ട് ബിന്ദുവിന്റെ ഭാഷയ്ക്ക്. വിധി നഷ്ടപ്പെടുത്തിയ രണ്ടു കണ്ണിന്റെ കാഴ്ചക്കും രണ്ടു കിഡ്‌നികളുടെ പ്രവര്‍ത്തനങ്ങള്‍ക്കും മുന്നില്‍ കഥകളിലൂടെയും കവിതകളിലൂടെയും ജീവിതത്തിന്റെ പച്ചപ്പ് തേടുന്ന ബിന്ദുസന്തോഷിന്റെ ആദ്യ പുസ്തകമായ ‘വാക്സ്ഥലി’ യുടെ നാലാം പതിപ്പിന്റെ പ്രകാശനമാണ് ഇന്ന്. തുടര്‍ ചികിത്സക്കുള്ള ഫണ്ട് കണ്ടെത്തുന്നതിനായാണ് അക്ഷരങ്ങള്‍ക്ക് വിലയിട്ടുള്ളത്. ആദ്യ മൂന്ന് പതിപ്പുകളും ദുബായില്‍ വെച്ചാണ് പലപ്പോഴായി പ്രകാശനം ചെയ്തിട്ടുള്ളത്.

പലപ്പോഴായി എഴുതിയ 47 കവിതകളും 86 കഥകളുമാണ് ഈ പുസ്തകത്തിലുള്ളത്. കാഴ്ചയില്ലാത്തതിനാല്‍ സുഹൃത്തും യുവ കഥാകൃത്തുമായ രമേശ് പെരുമ്പിലാവാണ് കഥകളും കവിതകളും എഴുതിയെടുത്തത് . പത്തൊമ്പതാം വയസ്സില്‍ മലേറിയ പിടിപെട്ട് ഇഞ്ചക്ഷന്‍ മാറി നല്‍കിയതാണ് ബിന്ദുവിന്റെ ജിവിതം തകര്‍ത്തത്. ഇതോടെ 7 ദിവസം പുര്‍ണ്ണമായി ബോധം നഷ്ടപ്പെട്ട ഇവര്‍ക്ക് ബോധം തിരികെ കിട്ടിയപ്പോള്‍ രണ്ടു കണ്ണിന്റെ കാഴ്ച പൂര്‍ണ്ണമായും നഷ്ടപ്പെട്ടിരുന്നു. ഒപ്പം രണ്ടു കിഡ്‌നികളുടെ പ്രവര്‍ത്തനവും നിലച്ചു. ജീവിതം എന്നെന്നേക്കുമായി നഷ്ടപ്പെടുന്നു എന്ന തോന്നല്‍ ഇല്ലാതാക്കിയത് ഭര്‍ത്താവായ സന്തോഷിന്റെ കരുതലാണ്. ആഗ്രയിലെ എയര്‍ഫോഴ്‌സില്‍ മെക്കാനിക്കായിരുന്ന ഇയാള്‍ ഭാര്യയുടെ ചികിത്സക്കായി ആ ജോലി ഉപേക്ഷിച്ചു. ഇപ്പോള്‍ ദുബായില്‍ എയര്‍പോര്‍ട്ട് ജീവനക്കാരാണ് സന്തോഷ് എന്ന ചാവക്കാട്ടുകാരന്‍ .കാസര്‍ഗോഡ് കാഞ്ഞങ്ങാടാണ് ബിന്ദുവിന്റെ സ്വദേശം.

ഗര്‍ഭിണിയായ സമയത്താണ് ബിന്ദുവിന്റെ ജീവിതത്തിലേക്ക് ദുരന്തങ്ങള്‍ കടന്നുവരുന്നത്.ഇതോടെ ഗര്‍ഭം അലസിപ്പായി. മനക്കരുത്തില്‍ അവര്‍ ജീവിതത്തിന്റെ നല്ല നാളുകളിലേക്ക് തിരികെ വന്നു .നാല്‍പ്പത്തി ആറ് വയസ്സായ ബിന്ദുവിന് റിഷിന്‍ എന്ന പേരുള്ള ഒരു മകനുണ്ടിപ്പോള്‍. ചികിത്സ ലക്ഷങ്ങളുടെ ബാധ്യതകളാണ് ഈ കുടുംബത്തിന് നല്‍കിയത്.

1996 മുതല്‍ ഭര്‍ത്താവിനൊപ്പം ദുബായില്‍ സ്ഥിരതാമസമാക്കിയ ബിന്ദു 1999ല്‍ സ്‌നേഹതരംഗം കഥ അവാര്‍ഡ് ‘ഇന്ദുരഞ്ജിനിയുടെ സഞ്ചാരപഥങ്ങള്‍’ എന്ന കഥയ്ക്ക് ലഭിച്ചുകൊണ്ടാണ് യുഎഇയിലെ സാഹിത്യരംഗത്ത് അറിയപ്പെടുന്നത്. 2000 – ല്‍ ദിശാസൂചിക എന്ന കവിതയ്ക്ക് ഇശല്‍ അബുദാബി, ജിദ്ദ അരങ്ങ് പുരസ്‌കാരങ്ങള്‍. 2002-ല്‍ സുനിതാ സ്മാരക ചെറുകഥ അവാര്‍ഡ് ഒട്ടകപ്പക്ഷിക്ക് ഒളിനിലം അതിജീവനത്തിന് എന്ന കഥയ്ക്കുംലഭിച്ചു. ദുബായ് കൈരളി കലാകേന്രം കഥ പുരസ്‌ക്കാരം 2002 – ലും കവിതാ പുരസ്‌ക്കാരം 2005 – ലും ലഭിച്ചിട്ടുണ്ട്. പാം പുസ്തകപ്പുരയുടെ അക്ഷരതൂലികാ പുരസ്‌കാരം, ഭാവന ആര്‍ട്‌സ് സൊസൈറ്റി സാഹിത്യപുരസ്‌കാരം, ഇന്ത്യന്‍ സോഷ്യല്‍ സെന്റെര്‍ അല്‍ ഐന്‍ ലിറ്റററി അവാര്‍ഡും 2005 ല്‍ കൈരളി ചാനലും അറ്റ്‌ലസ് ജ്വല്ലറിയും സംയുക്തമായി ലോകമലയാളി എഴുത്തുകാര്‍ക്കിടയില്‍ സംഘടിപ്പിച്ച സാഹിത്യ മത്സരത്തില്‍ പാന്‍ഗിയ എന്ന കവിതയ്ക്ക് ഒന്നാം സമ്മാനവും ബിന്ദുവിനെ തേടിയെത്തിയിട്ടുണ്ട്.

ഇന്ന് വൈകിട്ട് നാലുമണിക്ക് കുന്ദംകുളം ബോയ്‌സില്‍ വെച്ച് നടക്കുന്ന പ്രകാശനച്ചടങ്ങില്‍ സാഹിത്യകാരനായ ശ്രീരാമന്‍, ഗാനരചയിതാവും കവിയുമായ റഫീഖ് അഹമ്മദ്, സിനിമാതാരം ഇര്‍ഷാദ്, വിത്സന്‍, ബഷീര്‍ എന്നിവര്‍ സംബന്ധിക്കും.

തുടര്‍ചികിത്സക്കാവശ്യമായ പണം കണ്ടെത്താന്‍ കൂടിയാണ് പുസ്തകം അച്ചടച്ചിറക്കിയതെന്ന് ബിന്ദുപറയുന്നു. ദുബായില്‍ ഭര്‍ത്താവൊന്നിച്ചാണ് താമസമെങ്കിലും സാധ്യമായ വരുമാനം കൊണ്ട് ഒരു താങ്ങാവാന്‍ കഴിയുമല്ലോ എന്നാണിവരുടെ പ്രതീക്ഷ.

(ഫഖ്‌റുദ്ധീന്‍ പന്താവൂര്‍ )

‘അവരിപ്പോഴും സെക്‌സ് ചെയ്യാറുണ്ടോ” എംടിയോട് പെണ്‍കുട്ടിയുടെ ചോദ്യം? ഉള്ളില്‍ ചിരിച്ചു കൊണ്ട് എംടിയുടെ മറുപടി ‘ഞാന്‍ അവരോട് ചോദിച്ചിട്ട് പറയാം’
Posted by
27 August

'അവരിപ്പോഴും സെക്‌സ് ചെയ്യാറുണ്ടോ'' എംടിയോട് പെണ്‍കുട്ടിയുടെ ചോദ്യം? ഉള്ളില്‍ ചിരിച്ചു കൊണ്ട് എംടിയുടെ മറുപടി 'ഞാന്‍ അവരോട് ചോദിച്ചിട്ട് പറയാം'

‘അവരിപ്പോഴും സെക്‌സ് ചെയ്യാറുണ്ടോ’ എംടിയോട് പെണ്‍കുട്ടിയുടെ ചോദ്യം?

മലയാളത്തിന്റെ മഹാനായ എഴുത്തുകാരനോട് ഇങ്ങനെ ആരെങ്കിലും ചോദിക്കുമോ എന്നാണെകില്‍ സംശയിക്കേണ്ട. ഉണ്ടായ കാര്യം ആണ്. ആ ചോദ്യത്തോടുള്ള എംടിയുടെ മറുപടിയും രസകരമായിരുന്നു. ഉള്ളില്‍ ചിരിച്ചു കൊണ്ട് എംടിയുടെ നല്‍കിയ മറുപടി ഇങ്ങനെ ആയിരുന്നു,

‘ഞാന്‍ അവരോട് ചോദിച്ചിട്ട് പറയാം’

മനുഷ്യന്റെ സങ്കീര്‍ണ്ണമായ ബന്ധങ്ങളും സംഘര്‍ഷഭരിതമായ മാനസീക വ്യാപാരങ്ങളും എം ടിയുടെ കഥകളെയും തിരക്കഥകളെയും അതില്‍ നിന്ന് പിറവി കൊള്ളുന്ന സിനിമകളെയും എന്നും വ്യത്യസ്തമാക്കിരുന്നു.വെള്ളിത്തിരയില്‍ തന്റെ കഥാപാത്രത്തിനു ഒരു പ്രേക്ഷകയുടെ വ്യഖ്യാനം കണ്ട് ഒരിക്കല്‍ എം ടി തന്നെ അത്ഭുതപ്പെട്ടു പോയിഎന്നാണു അദ്ദേഹം തന്നെ വെളിപ്പെടുത്തുന്നത്.

സംഭവം ഇങ്ങനെ ആണ്: ഒടുവില്‍ ഉണ്ണികൃഷ്ണനും നിര്‍മലയും നായിക നായകന്മാരായി എത്തിയ എം ടി യുടെ സിനിമ കണ്ടതിനു ശേഷം ഒരു പ്രേക്ഷക എം ടിയോട് ചോദിച്ചത് ആണ് ഇങ്ങനെ.എം ടി തന്നെ ഒരു മാഗസിനു നല്‍കിയ അഭിമുഖത്തിലാണ് ഇതു പറഞ്ഞത്.

എംടി പറയുന്നത് ഇങ്ങനെ:

‘ഞാന്‍ ഒരു ചെറിയ പടം ചെയ്തല്ലോ. ഒടുവില്‍ ഉണ്ണികൃഷ്ണനും നിര്‍മലയും ആണ് അതില്‍ വൃദ്ധ കഥപാത്രങ്ങള്‍. അത് ബര്‍ലിന്‍ ഫെസ്റ്റിവലിലൊക്കെ പോയി. എല്ലാവര്‍ക്കും വലിയ കാര്യമായിരുന്നു. ആദ്യ ഷോ കഴിഞ്ഞ് ഞാന്‍ എവിടേയ്‌ക്കോ പോയി. എന്നെ അവര്‍ തേടിപ്പിടിച്ച്, എങ്ങിനെയൊക്കെയോ കണ്ടുപിടിച്ച് വന്നു. ഞാന്‍ വീണ്ടും അവിടേയ്ക്ക് പോവണം. നോക്കുമ്പോള്‍ വീണ്ടും ഷോ വച്ചിട്ടുണ്ട്. അത് കഴിഞ്ഞ് അടുത്ത ദിവസം ഒരു ഗെറ്റ് ടുഗതര്‍. അതില്‍ ഒരു ലേഡി എന്നോടു ചോദിച്ചു. സാര്‍ ആര്‍ ദെ സ്റ്റില്‍ ഹാവിങ് സെക്‌സ്? എന്താ അതിന് മറുപടി പറയുക. ഞാന്‍ ഉള്ളില്‍ ചിരിച്ചു. എന്നിട്ട് പറഞ്ഞു, ഐ മസ്റ്റ് ആസ്‌ക് ദെം.

സാഹിത്യലോകത്തെ നിത്യസഞ്ചാരി എസ്‌കെ പൊറ്റെക്കാട്ടിന്റെ ഓര്‍മ്മകളില്‍ 35 വര്‍ഷം
Posted by
07 August

സാഹിത്യലോകത്തെ നിത്യസഞ്ചാരി എസ്‌കെ പൊറ്റെക്കാട്ടിന്റെ ഓര്‍മ്മകളില്‍ 35 വര്‍ഷം

മുക്കം: നാടന്‍ പ്രേമമെന്ന തന്റെ നോവലിലൂടെ മുക്കമെന്ന കൊച്ചുഗ്രാമത്തെ ലോകത്തിന് പരിചയപ്പെടുത്തിയ കോഴിക്കോടിന്റെ സ്വകാര്യ അഹങ്കാരം എസ്കെ പൊറ്റക്കാടെന്ന ശങ്കരന്‍ കുട്ടി പൊറ്റക്കാട് വിടപറഞ്ഞിട്ട് 35 വര്‍ഷം. 1913 മാര്‍ച്ച് നാലിന് ജനിച്ച് 1982 ഓഗസ്റ്റ് 6 നാണ് എസ്‌കെ മരണത്തിന് കീഴടങ്ങിയത്.തന്റെ 69 വര്‍ഷത്തെ ജീവിതത്തിനിടയില്‍ 60 ല്‍പരം പുസ്തകങ്ങള്‍ അദ്ദേഹം എഴുതിയിട്ടുണ്ട്. ഇതില്‍ നോവലുകള്‍ ,കഥകള്‍, കവിതാ സമാഹാരം, യാത്രാവിവരണം, നാടകം, പ്രബന്ധങ്ങള്‍ എന്നിവയെല്ലാം ഉണ്ട്. 1941 ലെ നാടന്‍ പ്രേമമെന്ന നോവലിന്റെ പശ്ചാത്തലം മുക്കവും ഇരുവഴിഞ്ഞിപ്പുഴയും ഒക്കെയായിരുന്നു. ടൗണില്‍ നിന്നു വന്ന രവീന്ദ്രറേയും മുക്കത്തെ ഗ്രാമീണ സുന്ദരിമാളുവിന്റേയും അനശ്വര പ്രേമം ലോകമൊന്നാകെ ഏറ്റെടുത്തു. 1961 ല്‍ തന്റെ ഒരു തെരുവിന്റെ കഥക്ക് കേരള സാഹിത്യ അക്കാഥമി അവാര്‍ഡും 1980 ല്‍ ഒരു ദേശത്തിന്റെ കഥക്ക് ജ്ഞാനപീഢം അവാര്‍ഡും ലഭിച്ചു.

ഒരു കാലത്ത് മുക്കവും ഏറെ ബഹുമാനത്തോടെ ഉരുവിട്ടിരുന്ന പേരാണ് എസ്‌കെ പൊറ്റെക്കാടെന്നത്. കാലം മാറിയങ്കിലും മുക്കത്ത് ഇന്നും സാംസ്‌കാരിക പ്രവര്‍ത്തകര്‍ക്കോ സാംസ്‌കാരികകൂട്ടായ്മകള്‍ക്കോ ഒട്ടും കുറവില്ല എന്നതാണ് സത്യം. എന്നാല്‍ ലോകത്തിനാകമാനം മുക്കത്തെ പരിചയപ്പെടുത്തിയ ഒരു അതുല്യ പ്രതിഭയെ ഇന്ന് മുക്കത്തുകാര്‍ മറന്നു എന്നു പറഞ്ഞാല്‍ അത് സാംസ്‌കാരിക മുക്കത്തിന് അപമാനംതന്നെയാണ്. കാരശേരി ഗ്രാമപഞ്ചായത്ത് വര്‍ഷങ്ങള്‍ക്ക് മുന്‍പ് സ്ഥാപിച്ച എസ്‌കെ സ്മൃതി കേന്ദ്രം അധികൃതരുടെ അനാസ്ഥകാരണം ഏറെ കാലം അവഗണനയിലായിരുന്നു. ഒരു വേള മുക്കം കടവ് പാലത്തിന്റെ സൈറ്റ് ഓഫീസാക്കി മാറ്റി അദ്ധേഹത്തെ അപമാനിച്ചു.തുടര്‍ന്ന് നാട്ടുകാരുടെ നിരന്തര ആവശ്യത്തെ തുടര്‍ന്ന് സ്മൃതി കേന്ദ്രം നടത്തിപ്പ് മുക്കത്തെ മാനവം പ്രവര്‍ത്തകരെ ഏല്‍പ്പിക്കുകയായിരുന്നു. സ്വന്തം കയ്യില്‍ നിന്ന് പണം മുടക്കി മാനവം പ്രവര്‍ത്തകര്‍ സ്മൃതി കേന്ദ്രം മോഡി പിടിപ്പിക്കുകയും പെയിന്റടിച്ച് വൃത്തിയാക്കുകയും ചെയ്തു.നിരവധി സാംസ്‌കാരിക പ്രവര്‍ത്തനങ്ങള്‍ക്കും കലാകാരന്‍മാരുടെ കൂട്ടായ്മകള്‍ക്കും ഇവിടെ വേദിയായി.എന്നാല്‍ തുടക്കത്തിലെ ആവേശം മാനവം പ്രവര്‍ത്തകര്‍ക്കും ഇല്ലാ എന്നാണ് എസ്‌കെയുടെ ഈ 35 മത് ചരമവാര്‍ഷിക ദിനത്തില്‍ നമുക്ക് കാണാനാവുന്നത്. ഒരു അനുസ്മരണ പരിപാടിക്ക് പോലും എസ് കെയുടെ പേരിലുളള ഈ സ്മൃതി കേന്ദ്രം വേദിയായില്ല എന്നതാണ് സത്യം.ഈ സംഘടനക്ക് കേന്ദ്രം എല്‍പ്പിച്ചു കൊടുത്ത ഗ്രാമ പഞ്ചായത്തധികൃതരും എസ്‌കെ യെ മറന്നു.

എസ്‌കെയുടെ ഓര്‍മ്മക്കായി മുക്കത്ത് സ്ഥാപിച്ച എസ്‌കെ പാര്‍ക്കും കടുത്ത അവഗണനയിലാണ്. മാലിന്യം നിറഞ്ഞും നോക്കാനാളില്ലാതെയും അന്യസംസ്ഥാന തൊഴിലാളികളുടെ മൂത്രപ്പുരയായും പാര്‍ക്ക് മാറി. ഇവിടെ സ്ഥാപിച്ച എസ്‌കെയുടെ ഛായ ചിത്രം ഇത് നിര്‍മ്മിച്ചു നല്‍കിയ ആര്‍കെ പൊറ്റശേരിയെ പോലും അപമാനിക്കുന്ന തരത്തില്‍ നിലകൊള്ളുന്നു. ഒരു വേള അധികൃതരുടെ അനാസ്ഥക്കെതിരെ ശില്‍പ്പി ആര്‍കെ പൊറ്റശേരി തന്നെ രംഗത്ത് വന്നിരുന്നു. എന്നിട്ടുപോലും അധികൃതര്‍ ഇതിനെ സംരക്ഷിക്കാന്‍ നടപടി സ്വീകരിച്ചില്ലന്നത് വേദനാജനകമാണ്. ലോകം അംഗീകരിച്ച ഒരു മഹാ പ്രതിഭയെ മുക്കത്തെ ലോകത്തിന് പരിചയപ്പെടുത്തിയ അതുല്യ എഴുത്തുകാരനെ പക്ഷെ മുക്കം മറന്നു എന്നതാണ് സത്യം.