സാഹിത്യ അക്കാദമി അവാര്‍ഡുകള്‍ പ്രഖ്യാപിച്ചു
Posted by
21 February

സാഹിത്യ അക്കാദമി അവാര്‍ഡുകള്‍ പ്രഖ്യാപിച്ചു

തൃശൂര്‍: 2016ലെ സാഹിത്യ അക്കാദമി അവാര്‍ഡുകള്‍ പ്രഖ്യാപിച്ചു. പികെ പാറക്കടവ്, ഇയ്യങ്കോട് ശ്രീധരന്‍, സിആര്‍ ഓമനക്കുട്ടന്‍, ലളിത ലെനിന്‍, ജോസ് പുന്നാപറമ്പില്‍, പൂയപ്പിള്ളി തങ്കപ്പന്‍ എന്നിവര്‍ക്ക് സമഗ്ര സംഭാവനക്കുള്ള പുരസ്‌ക്കാരം ലഭിച്ചു.

നോവല്‍ ടിഡി രാമകൃഷ്ണന്‍(സുഗന്ധി എന്ന ആണ്ടാള്‍ ദേവനായകി), കവിത: സാവിത്രി രാജീവന്‍(അമ്മയെ കുളിപ്പിക്കുമ്പോള്‍), കഥ: എസ് ഹരീഷ്(ആദം) നാടകം: ഡോ. സാംകുട്ടി പട്ടംകരി (ലല്ല), സാഹിത്യ വിമര്‍ശനം: എസ് സുധീഷ്, ജീവചരിത്രം: ഡോ. ചന്തവിള മുരളി, യാത്രവാവരണം: ഡോ. ഹരികൃഷ്ണന്‍, വിവര്‍ത്തനം: സി.എം രാജന്‍, വൈഞ്ജാനിക സാഹിത്യം: വിപി ജോസഫ് വലിയ വീട്ടില്‍ എന്നിവര്‍ക്കാണ് അവാര്‍ഡ്.

പ്രേംനസീര്‍ നിര്‍മ്മിച്ച വായനശാല സാമൂഹിക വിരുദ്ധര്‍ തീയിട്ട് നശിപ്പിച്ചു
Posted by
10 February

പ്രേംനസീര്‍ നിര്‍മ്മിച്ച വായനശാല സാമൂഹിക വിരുദ്ധര്‍ തീയിട്ട് നശിപ്പിച്ചു

ചിറയിന്‍കീഴ്: നിത്യഹരിത നായകന്‍ പ്രേംനസീര്‍ ജന്മനാട്ടില്‍ നിര്‍മ്മിച്ച് നല്‍കിയ വായനശാല കത്തി നശിച്ചു. കലാ-സാമൂഹിക-സാംസ്‌കാരിക ഉന്നമനത്തിനായി നിര്‍മ്മിച്ച വായനശാല സാമൂഹിക വിരുദ്ധര്‍ തീയിട്ട് നശിപ്പിച്ചതാണെന്ന് ആരോപണം ഉയരുന്നു.

വായനശാലയിലുണ്ടായിരുന്ന ലക്ഷക്കണക്കിന് രൂപ വിലമതിക്കുന്ന പുസ്തകങ്ങളും സാധനസാമഗ്രികളും പൂര്‍ണമായും കത്തിനശിച്ചു. ഇതിനു പിന്നില്‍ പ്രവര്‍ത്തിച്ചവരെ അടിയന്തിരമായി പിടികൂടണമെന്ന് ബ്ലോക്ക് പഞ്ചായത്ത് പ്രസിഡന്റും, പ്രേം നസീര്‍ അനുസ്മരണ കമ്മിറ്റിയുടെ ചെയര്‍മാനുമായ ആര്‍ സുഭാഷും, സിപിഐ ലോക്കല്‍ കമ്മിറ്റി സെക്രട്ടറി അന്‍വര്‍ ഷായും ആവശ്യപ്പെട്ടു.

1958 ലാണ് വായനശാലക്ക് പ്രേംനസീര്‍ തറക്കല്ലിട്ടത്. താരത്തിന്റെ മരണശേഷം ജന്മനാട്ടില്‍ ഒരു സ്മാരകം എന്ന നാട്ടുകാരുടെ ആവശ്യം ഇന്നും നടപ്പായിട്ടില്ല. ജീര്‍ണ്ണാവസ്ഥയിലെത്തിയ വായനശാല പൊളിഞ്ഞ് വീഴാറായ അവസ്ഥയിലിരിക്കവേയാണ് സാമൂഹ്യ വിരുദ്ധര്‍ തീയിട്ട് നശിപ്പിച്ചിരിക്കുന്നത്.

ഈ കെട്ടിടം പുതുക്കി പണിത് പ്രേംനസീറിന്റെ സ്മരണയില്‍ തന്നെ ഡിജിറ്റല്‍ ലൈബ്രറിയും, ഡിജിറ്റല്‍ ഫിലിം ക്ലബും ആരംഭിക്കണമെന്നാണ് നാട്ടുകാര്‍ ആവശ്യപ്പെടുന്നത്. സംഭവത്തില്‍ കലാസാംസ്‌കാരിക, രാഷ്ട്രീയ രംഗത്തുള്ളവര്‍ പ്രതിഷേധവുമായി രംഗത്തെത്തിയിട്ടുണ്ട്. സംഭവത്തില്‍ ചിറയിന്‍കീഴ് പോലീസ് അന്വേഷണം ആരംഭിച്ചു.

എഡേ മിത്രോം, കുരീപ്പുഴയിപ്പോള്‍ ജാതി മതില്‍ പണിയാന്‍ പോയിക്കാണും, ശാഖയില്‍ ചേര്‍ന്നു കാണും, നിക്കറെടുത്തിട്ടു കാണും; ആര്‍എസ്എസിനെ പരിഹസിച്ച് കെആര്‍ മീര
Posted by
06 February

എഡേ മിത്രോം, കുരീപ്പുഴയിപ്പോള്‍ ജാതി മതില്‍ പണിയാന്‍ പോയിക്കാണും, ശാഖയില്‍ ചേര്‍ന്നു കാണും, നിക്കറെടുത്തിട്ടു കാണും; ആര്‍എസ്എസിനെ പരിഹസിച്ച് കെആര്‍ മീര

കവി കുരീപ്പുഴ ശ്രീകുമാറിനെതിരെ ആര്‍എസ്എസ് നടത്തിയ ആക്രമണത്തെ അപലപിച്ച് എഴുത്തുകാരി കെആര്‍ മീര. ആര്‍എസ്എസ് ഭീകരതയ്‌ക്കെതിരെ തന്റെ കവിത കൊണ്ടാണ് കെആര്‍ മീര പ്രതിഷേധം അറിയിച്ചിരിക്കുന്നത്. സംഘപരിവാറിന്റെ ഭീഷണികള്‍ക്ക് മുന്നില്‍ പതറുന്നയാളല്ല കുരീപ്പുഴയെന്നും ഇതൊന്നും കണ്ട് അദ്ദേഹത്തേയും അദ്ദേഹത്തിന്റെ ആശയങ്ങളേയും ഇല്ലാതാക്കാന്‍ സാധിക്കില്ലെന്നും മീര പറയുന്നു.

കെആര്‍ മീരയുടെ ഫേസ്ബുക്ക് പേജിലെ കുറിപ്പ്:

എഡേ മിത്രോം,
കുരീപ്പുഴയങ്ങു വിരണ്ടു കാണും.
പേടി കൊണ്ടു നാവു വരണ്ടു കാണും.
ശരീരം കിടുകിടാ വിറച്ചു കാണും.
കേട്ട തെറിയോര്‍ത്തു കരഞ്ഞു കാണും.
ഇനിയെങ്ങും പ്രസംഗിക്കുകയില്ലെന്ന് തീരുമാനിച്ചു കാണും.
ഇനി കൊന്നാലും കവിതയില്ല എന്ന് ആണയിട്ടു കാണും.
ഉള്ളിലെ ഹിന്ദുവിനെ വിളിച്ചുണര്‍ത്തിക്കാണും.
രക്തപുഷ്പാഞ്ജലി കഴിപ്പിച്ചു കാണും.
ഏലസ്സും രക്ഷയും ജപിക്കാന്‍ കൊടുത്തു കാണും.
മൃത്യുഞ്ജയത്തിനു രസീതെടുത്തു കാണും.
ജാതി സംഘടനയില്‍ അംഗത്വമെടുത്തു കാണും.
ഒരു തടയണ കൊണ്ടു പുഴയങ്ങു വരണ്ടു പോകുന്നതു പോലെ
ഒരു തടയല്‍ കൊണ്ടു കുരീപ്പുഴയങ്ങു കൂരിപ്പുഴയായിക്കാണും.
ഇഷ്ടമുടിക്കായല്‍ ക്ലിഷ്ടമുടിക്കായലായിക്കാണും.
ശാഖയില്‍ ചേര്‍ന്നു കാണും.
നിക്കറെടുത്തിട്ടു കാണും.
ചുവന്ന കുറി തൊട്ടു കാണും.
ഓറഞ്ച് ചരടു കെട്ടിക്കാണും.
എഡേ മിത്രോം,
കുരീപ്പുഴയിപ്പോള്‍ ജാതി മതില്‍ പണിയാന്‍ പോയിക്കാണും.
നാടു മുഴുവന്‍ വടയമ്പാടിയായിക്കാണും.
‘പ്രേതബാധ ഏറ്റ പോലെ രാത്രി വണ്ടി കൂകിടുമ്പോള്‍
പാലവും കേളനും’ പാടേ കുലുങ്ങിക്കാണും !

ഇതിനിടെ, കവി കുരീപ്പുഴ ശ്രീകുമാറിനെ ആക്രമിച്ച സംഭവത്തില്‍ കണ്ടാലറിയാവുന്ന15 ആര്‍എസ്എസ് പ്രവര്‍ത്തകര്‍ക്കെതിരെ പോലീസ് കേസെടുത്തിരുന്നു. ഇതില്‍ ഏഴ് പേര്‍ അറസ്റ്റിലാവുകയും ചെയ്തിട്ടുണ്ട്. ഒളിവിലുള്ള മറ്റ് പ്രതികള്‍ക്കായി തിരച്ചില്‍ തുടരുകയാണ്.

മുഖ്യമന്ത്രിയുടെ നിര്‍ദ്ദേശത്തെത്തുടര്‍ന്നാണ് പോലീസിന്റെ അടിയന്തര നടപടി. സംഭവത്തെ ഗൗരവമായി കണ്ട് ഊര്‍ജിതമായ അന്വേഷണം നടത്തണമെന്ന് കൊല്ലം റൂറല്‍ എസ്പിക്ക് മുഖ്യമന്ത്രി പിണറായി വിജയന്‍ നിര്‍ദ്ദേശം നല്‍കിയിരുന്നു. ഇന്നലെ രാത്രി കോട്ടുക്കലില്‍ കൈരളി ഗ്രന്ഥശാലാ സംഘടിപ്പിച്ച ചടങ്ങില്‍ പങ്കെടുത്ത് മടങ്ങുന്നതിനിടെയാണ് കുരീപ്പുഴയെ ഒരു സംഘം ആര്‍എസ്എസ് പ്രവര്‍ത്തകര്‍ ആക്രമിച്ചത്. താന്‍ സഞ്ചരിക്കുകയായിരുന്ന കാറിനടുത്തെത്തിയ അക്രമികള്‍ കാറിന്റെ ഡോര്‍വലിച്ച് തുറന്ന് ആക്രമിക്കുകയായിരുന്നുവെന്ന് കുരീപ്പുഴ പറഞ്ഞു.

ഗ്രന്ഥശാലാ ചടങ്ങില്‍ വടയമ്പാടി ജാതി മതില്‍ സമരത്തെക്കുറിച്ചും ചിത്രകാരന്‍ അശാന്തന്റെ മൃതദേഹത്തോട് കാണിച്ച അനാദരവിനെ കുറിച്ചും സംസാരിച്ച അദ്ദേഹം ആര്‍എസ്എസിനെയും സംഘപരിവാറിനെയും രൂക്ഷമായി വിര്‍ശിച്ചു. ഇതിനെ തുടര്‍ന്നാണ് അദ്ദേഹത്തിനെതിരെ ആക്രമണമുണ്ടായത്.

‘സ’സ ഒരു സമരമാണ്..!; ശരത് പ്രകാശിന്റെ സമരപുസ്തകം വായനക്കാരിലേക്ക്
Posted by
15 January

'സ'സ ഒരു സമരമാണ്..!; ശരത് പ്രകാശിന്റെ സമരപുസ്തകം വായനക്കാരിലേക്ക്

കൊച്ചി: ശരത് പ്രകാശിന്റെ സമരപുസ്തകം പ്രകാശനത്തിന് ഒരുങ്ങുന്നു.’സ’
സ ഒരു സമരമാണ്..! കാണാതാക്കപ്പെട്ടവര്‍ക്കും ഇല്ലാതാക്കപെട്ടവര്‍ക്കും വേണ്ടിയാണ് ശരത് പ്രകാശിന്റെ സമരപുസ്തകം.

മലപ്പുറം വളാഞ്ചേരി എംഇഎസ് കോളേജ്ജില്‍ വച്ച് ജനുവരി 20 വൈകീട്ട് 6 ന് ആണഅ പ്രകാശനം. ‘ഊരാളി ബാന്റ് ‘ ആണ് പുസ്തകം ഏറ്റുവാങ്ങുന്നത്. നൂറോളം ആര്‍ട്ടിസ്റ്റുകളും സാംസ്‌കാരിക-രാഷ്ട്രീയ രംഗത്തെ പ്രമുഖരും ചടങ്ങില്‍
പങ്കെടുക്കും.

ഒരുപാട് പുതുമകളോടെയൊരു സമരപുസ്തകം വായനക്കാരിലേക്ക് എത്തുന്നത്. സംവിധായകന്‍ ലാല്‍ജോസ് ആണ് പുസ്തകത്തിന് അവതാരിക എഴുതിയിരിക്കുന്നത്.
ധനമന്ത്രി തോമസ് ഐസക്ക് ആണ് പിന്‍കുറിപ്പ് എഴുതിയിരിക്കുന്നത്.

37 ആര്‍ട്ടിസ്റ്റുകള്‍ ആണ് പുസ്തകത്തിലെ കഥകള്‍ക്ക് ചിത്രങ്ങള്‍ വരച്ചത്. പ്രമോ വീഡിയോ, മോഷന്‍ പോസ്റ്റര്‍, ്സാന്‍ഡ് ആര്‍ട്ട് വീഡിയോ, മിനിമല്‍ പോസ്റ്റര്‍, ഗ്രാഫിക്‌സ് തുടങ്ങി ഒരുപാട് മാര്‍ക്കറ്റിംഗ് പുതുമകളോടെയാണ് പുസ്തകം ഇറങ്ങുന്നത്.
അല്‍-മലപ്പുറം എന്ന സോഷ്യല്‍ മീഡിയ ഹിറ്റിനു ശേഷം ടീം KA10CHAYA ബാനര്‍ ചെയ്യുന്നു.

അക്ഷരങ്ങളെ പ്രണയിക്കുന്നവര്‍ക്കായി മണ്ണിനെ പ്രണയിക്കുന്ന ‘വേരുകള്‍’പുസ്തകമാവുന്നു
Posted by
29 December

അക്ഷരങ്ങളെ പ്രണയിക്കുന്നവര്‍ക്കായി മണ്ണിനെ പ്രണയിക്കുന്ന 'വേരുകള്‍'പുസ്തകമാവുന്നു

കൊച്ചി: മലയാള സാഹിത്യത്തിലേക്ക് നവമാധ്യമക്കൂട്ടായ്മയുടെ കൈയ്യൊപ്പ് ചാര്‍ത്തുകയാണ് വേരുകള്‍. പ്രണയവും, വിരഹവും, ബാല്യവും, ഓര്‍മ്മകളും ഇഷ്ടങ്ങളും എല്ലാം ചെറിയ വാക്കുകളിലൂടെ മനസുകളിലേക്ക് ആഴ്ന്നിറങ്ങുന്ന വേരുകള്‍ എന്ന ഫേസ്ബുക്ക് പേജ് ശ്രദ്ധേയമാണ്.

ഫേസ്ബുക്ക് പേജുകളില്‍ ഇന്നുവരെ വന്നിട്ടുള്ള 200 കൃതികളില്‍ മികച്ചവ പുസ്തക രൂപത്തില്‍ വായനക്കാരിലേക്ക് എത്തുകയാണ്. യുവ എഴുത്തുകാരെ പ്രോത്സാഹിപ്പിക്കുകയെന്ന ഉദ്ദേശത്തോടുകൂടിയാണ് വേരുകള്‍ പുസ്തകമാവുന്നത്. 3000ബിസി ആണ് പ്രസാധകര്‍.

വേരുകള്‍ പുസ്തക പ്രകാശനത്തിന് സിനിമാ താരങ്ങളായ വിനയ് ഫോര്‍ട്ട്, അനു സിത്താര, ഷാജു ശ്രീധര്‍,ഇര്‍ഷാദ് അലി, ദിനേഷ് പ്രഭാകര്‍ എന്നിവര്‍ ആശംസകളുമായി എത്തിയിരുന്നു. ഡിസംബര്‍ 31-ാംതിയ്യതി തൃശൂര്‍ സാഹിത്യ അക്കാദമിയിലാണ് പ്രകാശന ചടങ്ങ്.

കെപി രാമനുണ്ണിക്ക് കേന്ദ്രസാഹിത്യ അക്കാദമി പുരസ്‌കാരം
Posted by
22 December

കെപി രാമനുണ്ണിക്ക് കേന്ദ്രസാഹിത്യ അക്കാദമി പുരസ്‌കാരം

ന്യൂഡല്‍ഹി: ചെറുകഥാകൃത്തും നോവലിസ്റ്റുമായ കെപി രാമനുണ്ണിക്ക് കേന്ദ്രസാഹിത്യ അക്കാദമി പുരസ്‌കാരം. ‘ദൈവത്തിന്റെ പുസ്തകം’ എന്ന കൃതിക്കാണ് പുരസ്‌കാരം ലഭിച്ചത്. ഒരു ലക്ഷം രൂപയും പ്രശസ്തി പത്രവും, ഫലകവും അടങ്ങുന്നതാണ് പുരസ്‌കാരം.

മുഹമ്മദ് നബി, ക്രിസ്തു, കൃഷ്ണന്‍ എന്നിവരുടെ ജീവിതം പറയുന്ന നോവലിന്റെ പ്രമേയത്തിന് രാഷ്ട്രീയ പ്രാധാന്യവുമുണ്ട്. തകഴിയുടെ ‘കയറി’നും വിലാസിനിയുടെ ‘അവകാശികള്‍’ക്കും ശേഷം മലയാളത്തില്‍ ഇറങ്ങുന്ന ഏറ്റവും വലിയ നോവലാണിത്.

സൂഫി പറഞ്ഞ കഥ എന്ന നോവലിന് മുന്‍പ് കേരളസാഹിത്യ അക്കാദമി പുരസ്‌കാരം ലഭിച്ചിരുന്നു. ഇതിനു പുറമേ വയലാര്‍ പുരസ്‌കാരം, ഇടശ്ശേരി പുരസ്‌കാരം, പത്മരാജന്‍ പുരസ്‌കാരം തുടങ്ങി നിരവധി പുരസ്‌കാരങ്ങള്‍ ലഭിച്ചിട്ടുണ്ട്.

ജാതി ചോദിക്കുക, പ്രണയപര്‍വം, കുര്‍നസ്, പുരുഷ വിലാപം,അവള്‍ മൊഴിയുകയാണ്, ചരമവാര്‍ഷികം, ദൈവത്തിന്റെ പുസ്തകം, അനുഭവം ഓര്‍മ യാത്ര എന്നിവ പ്രധാന കൃതികളാണ്.

Desabhimani Award for T Padmanaban
Posted by
20 December

ദേശാഭിമാനി സാഹിത്യ പുരസ്‌കാരം ടി പത്മനാഭന്

കണ്ണൂര്‍: ഈ വര്‍ഷത്തെ ദേശാഭിമാനി സാഹിത്യ പുരസ്‌കാരം കഥാകാരന്‍ ടി പത്മനാഭന്. രണ്ട് ലക്ഷം രൂപയും പ്രശസ്തി പത്രവുമാണ് പുരസ്‌കാരം. ദേശാഭിമാനി ചീഫ് എഡിറ്റര്‍ എംവി ഗോവിന്ദന്‍ കണ്ണൂരില്‍ വാര്‍ത്താസമ്മേളനത്തിലാണ് പുരസ്‌ക്കാരം പ്രഖ്യാപിച്ചത്.

മാര്‍ച്ചില്‍ കണ്ണൂരില്‍ നടക്കുന്ന ഒരാഴ്ച നീളുന്ന ടി പത്മനാഭന്‍ സാഹിത്യോല്‍സവത്തില്‍ മുഖ്യമന്ത്രി പിണറായി വിജയന്‍ പുരസ്‌ക്കാരം സമ്മാനിക്കും. കഴിഞ്ഞ വര്‍ഷമാണ് ദേശാഭിമാനി സാഹിത്യ പുരസ്‌ക്കാരം ഏര്‍പ്പെടുത്തിയത്. എംടി വാസുദേവന്‍ നായര്‍ക്കായിരുന്നു ആദ്യ പുരസ്‌ക്കാരം ലഭിച്ചത്. സാഹിത്യ മേഖലയിലെ സമഗ്ര സംഭാവനക്കാണ് ദേശാഭിമാനി പുരസ്‌കാരം സമ്മാനിക്കുന്നത്.

നേമം പുഷ്പരാജ് ലളിതകലാ അക്കാദമി അധ്യക്ഷനായി ചുമതലയേറ്റു
Posted by
14 December

നേമം പുഷ്പരാജ് ലളിതകലാ അക്കാദമി അധ്യക്ഷനായി ചുമതലയേറ്റു

തൃശൂര്‍: കേരള ലളിതകലാ അക്കാദമി അധ്യക്ഷനായി ചലച്ചിത്ര സംവിധായകന്‍ നേമം പുഷ്പരാജ് നിയമിതനായി. തൃശൂരിലെ അക്കാദമി ആസ്ഥാനത്ത് നടന്ന ചടങ്ങിലാണ് പുഷ്പരാജ് ചുമതലയേറ്റത്.

മുന്‍ ചെയര്‍മാന്‍ സത്യപാല്‍ രാജിവെച്ചതിനെ തുടര്‍ന്നുള്ള ഒഴിവിലേക്കാണ് നേമം പുഷ്പരാജിനെ തെരഞ്ഞെടുത്തത്. അക്കാദമിയുടെ പ്രവര്‍ത്തനങ്ങള്‍ കൂടുതല്‍ വിപുലമാക്കാനുള്ള പദ്ധതികള്‍ നടപ്പാക്കാന്‍ ശ്രമിക്കുമെന്ന് ചുമതലയേറ്റ ശേഷം അദ്ദേഹം പ്രതികരിച്ചു.

ലളിതകലാ അക്കാദമി സെക്രട്ടറി പൊന്ന്യം ചന്ദ്രന്‍, സാഹിത്യ അക്കാദമി പ്രസിഡന്റ് വൈശാഖന്‍ തുടങ്ങിയവര്‍ ചടങ്ങില്‍ പങ്കെടുത്തു.

കവി കെ സച്ചിദാനന്ദന് എഴുത്തച്ഛന്‍ പുരസ്‌കാരം
Posted by
01 November

കവി കെ സച്ചിദാനന്ദന് എഴുത്തച്ഛന്‍ പുരസ്‌കാരം

തിരുവനന്തപുരം: ഈ വര്‍ഷത്തെ എഴുത്തച്ഛന്‍ പുരസ്‌കാരം കവി കെ സച്ചിദാനന്ദന്. അഞ്ച് ലക്ഷം രൂപയും പ്രശസ്തി പത്രവും ശില്പവും അടങ്ങിയതാണ് പുരസ്‌കാരം. അവാര്‍ഡ് തുക ഒന്നര ലക്ഷത്തില്‍ നിന്നും അഞ്ചു ലക്ഷമായി കൂട്ടിയിരിക്കുകയാണ് ഇത്തവണ.

2010 വരെ ഒരു ലക്ഷം രൂപയായിരുന്ന അവാര്‍ഡ് തുക 2011 മുതലാണ് ഒന്നര ലക്ഷമാക്കിയത്.

അമേരിക്കന്‍ സാഹിത്യകാരന്‍ ജോര്‍ജ് സോന്‍ഡേര്‍സിന് മാന്‍ ബുക്കര്‍ പ്രൈസ്
Posted by
18 October

അമേരിക്കന്‍ സാഹിത്യകാരന്‍ ജോര്‍ജ് സോന്‍ഡേര്‍സിന് മാന്‍ ബുക്കര്‍ പ്രൈസ്

ലോസ് ആഞ്ചലസ്: അമേരിക്കന്‍ സാഹിത്യകാരന്‍ ജോര്‍ജ് സോന്‍ഡേര്‍സിന് ബുക്കര്‍ പ്രൈസ്. ചെറുകഥാകൃത്തായി അറിയപ്പെടുന്ന സോന്‍ഡേര്‍സിന്റെ നോവലായ ലിങ്കണ്‍ ദ ബാര്‍ഡോ എന്ന നോവലിനാണ് മാന്‍ ബുക്കര്‍ പ്രൈസ് ലഭിച്ചത്. അമേരിക്കന്‍ പ്രസിഡന്റായിരുന്ന എബ്രഹാം ലിങ്കണുമായി ജീവിതവുമായി ബന്ധപ്പെട്ട നോവലാണ് ‘ലിങ്കണ്‍ ഇന്‍ ദി ബാര്‍ഡോ’.

ജോര്‍ജ് സാന്‍ഡേഴ്‌സിനൊപ്പം ബ്രിട്ടീഷ് എഴുത്തുകാരായ അലി സ്മിത്ത്, ഫിയോണ മോസ്ലി, അമേരിക്കന്‍ എഴുത്തുകാരായ പോള്‍ ഓസ്റ്റര്‍, എമിലി ഫ്രിഡോള്‍ഡ്, ബ്രിട്ടീഷ്പാകിസ്താനി എഴുത്തുകാരനായ മോഷിന്‍ ഹാമിദ് എന്നിവരും ബുക്കര്‍ പ്രൈസിനായി പരിഗണിക്കപ്പെട്ടിരുന്നു. തുടര്‍ന്നും എഴുത്തുകള്‍ക്ക് വേണ്ടിയാകും തന്റെ ജീവിതമെന്ന് സാന്‍ഡേഴ്‌സ് പറഞ്ഞു.

ടെക്‌സാസിലെ അമരിലോയില്‍ 1958ലാണ് സോന്‍ഡേര്‍സ് ജനിച്ചത്. ടെക്‌നിക്കല്‍ റൈറ്റര്‍ ആയാണ് ഇദ്ദേഹം കരിയര്‍ ആരംഭിച്ചത്. പിന്നീട് സൈറക്യൂസ് യൂണിവേഴ്‌സിറ്റിയില്‍ പ്രഫസറായി ജോലി ചെയ്യുമ്പോഴും ഫിക്ഷന്‍ നോണ്‍ ഫിക്ഷന്‍ എഴുത്ത് തുടര്‍ന്നു. അമേരിക്കയിലെ പ്രശസ്തമായ പല അവാര്‍ഡുകളും ഇദ്ദേഹത്തെ തേടിയെത്തിയിട്ടുണ്ട്.

error: This Content is already Published.!!