nizhlalttam panchamiraav cultural meet present sthree sakthi puraskaram to vaikom vijayalakshmi
Posted by
09 March

നിഴലാട്ടം പഞ്ചമി രാവ് സാംസ്‌കാരിക സമ്മേളനത്തിന് സമാപനം; പ്രഥമ സ്ത്രീ ശക്തി പുരസ്‌കാരം വൈക്കം വിജയലക്ഷ്മിക്ക് സമ്മാനിച്ചു

തിരുവനന്തപുരം: ലോക വനിതാ ദിനത്തോട് അനുബന്ധിച്ച് നിഴലാട്ടം പ്രഥമ സ്ത്രീ ശക്തി പുരസ്‌കാരം വൈക്കം വിജയ ലക്ഷ്മിക്ക് സമ്മാനിച്ചു. വനിത ദിനത്തോട് അനുബന്ധിച്ച് നിഴലാട്ടം സംഘടിപ്പിച്ച പഞ്ചമി രാവ് സാംസ്‌കാരിക സമ്മേളനത്തില്‍ വെച്ച് ടൂറിസം മന്ത്രി കടകം പള്ളി സുരേന്ദ്രന്‍ ആണ് വൈക്കം വിജയ ലക്ഷമിക്ക് പുരസ്‌കാരം കൈമാറിയത്. ഇതോടൊപ്പം അകാലത്തില്‍ മലയാളിയെ വിട്ട് പിരിഞ്ഞ നടന്‍ കലാഭവന്‍ മണി അനുസ്മരണവും നിഴലാട്ടം സംഘടിപ്പിച്ചു. മൂന്ന് ദിവസങ്ങളായാണ് നിഴലാട്ടം പഞ്ചമിരാവ് സംഘടിപ്പിച്ചിരുന്നത്.

പഞ്ചമിരാവ് സാംസ്‌കാരിക സമ്മേളനത്തെക്കുറിച്ച് നിഴലാട്ടത്തിലെ അംഗമായി എംആര്‍ സിബിയുടെ കുറിപ്പ്;

ഒരു കൂട്ടം ചെറുപ്പക്കാര്‍ ഒത്ത് കൂടി കൂട്ടായ്മയായ് ഇന്നതൊരു കുടുംബമായി….. കലയും സംസ്‌കാരവും എല്ലാം ഒത്ത് ചേരുന്ന കൂട്ട് കുടുംബം…. ഈ കാലയളവില്‍ തന്നെ നിഴലാട്ടം നിരവധിയായിട്ടുള്ള സാമൂഹ്യ ഇടപെടല്‍ നടത്തി മുന്നോട്ട് പോകുന്നു…
ലോക വനിത ദിനത്തോട് അനുബന്ധിച്ച് നിഴലാട്ടം സംഘടിപ്പിച്ച പഞ്ചമി രാവ് സാംസ്‌കാരിക സമ്മേളനത്തിന് സമാപനം കുറിച്ചു…..പ്രഥമ സ്ത്രീ ശക്തി പുരസ്‌കാരം വൈക്കം വിജയ ലക്ഷ്മിക്ക് ടൂറിസം മന്ത്രി കടകം പള്ളി സുരേന്ദ്രന്‍ സമ്മാനിച്ചു കൊണ്ടായിരുന്നു ഔപചാരിക തുടക്കം…..സ്വാഗത പ്രസംഗത്തിതില്‍ രതീഷ് രോഹിണി പറഞ്ഞത് പോലെ ജീവിതത്തിലെ മറക്കാനാവാത്ത നിമിഷം എതെന്ന് ചോതിച്ചാല്‍ …. പഞ്ചമി രാവിന്റെ പ്രതിഭാദരം വേദി ആണെന്ന് പറഞ്ഞത് അക്ഷരാര്‍ത്ഥത്തില്‍ ശരിയായിരുന്നു … ജീവിതം സഹജീവികളുടെ ആശ്വാസത്തിന് വേണ്ടി മാറ്റി വെച്ച പത്ത് മഹത് വ്യക്തികളായ സ്ത്രീകള്‍ ഒരേ വേദിയില്‍… കണ്ണം നിറയിപ്പിക്കുന്ന അവരുടെ ജീവിത അനുഭവങ്ങള്‍ ‘ ഒരു മന്ത്രി മണിക്കൂറുകളോളം വേദി പങ്കിട്ട ചരിത്ര നിമിഷങ്ങള്‍…. കാറ്റിനെ കാണാന്‍ കഴിയില്ല അനുഭവിക്കാനെ പറ്റു എന്ന പോലെ…. ഗായത്രി വീണ തുടര്‍ച്ചയായി 68 മണിക്കൂര്‍ പാടി ഗിന്നസ് റെക്കോര്‍ഡ് നേടിയ വൈക്കം വിജയ ലക്ഷിമി കാറ്റേ കാറ്റേ എന്ന ഗാനത്തോടെ മലയാളി മനസ്സ് കളെ കീഴ്‌പ്പെടുത്തിയ പോലെ ….. ഒരു കീര്‍ത്തനം കൊണ്ട്….. ശംഖുമുഖത്ത് ഒത്ത് കൂടിയ ജനാവലിയുടെ ഹൃദത്തില്‍ കാറ്റ് പോലെ തലോടി …. മറക്കാനാവാത്ത അനുഭവം പോലെ സമ്മാനിച്ചു…. കാഴ്ചയില്ലാത്ത ലക്ഷമിയുടെയും ഷിഫ്‌ന എന്ന കൊച്ച് മിടുക്കിയുടെയും വൈകാരിക സംഭാഷണങ്ങള്‍ സകലരുടെയും കണ്ണുകളെ ഈറനണിയിച്ചം….. വൈക്കം വിജയ ലക്ഷ്യമിക്ക് കാഴ്ചയിലെങ്കിലും ഈശ്വരന്‍ ഉണ്ടെങ്കില്‍ ലോകത്തെ കാണിച്ച് കൊടുക്കാന്‍ … രണ്ട് കണ്ണിനെക്കാള്‍ പ്രകാശമുള്ള അച്ഛനെയും അമ്മയെയും ഉണ്ടെന്ന് കാണാന്‍ കഴിഞ്ഞു….
രണ്ടാം ദിനം കലാഭവന്‍ എന്ന റിയാലിറ്റി ഷോകളുടെ വരവോടെ തകര്‍ന്ന് പോയ സംഘടയുടെ നാമം ഇന്നും സമൂഹത്തില്‍ അടയാളപ്പെടുത്തി കൊണ്ടിരിക്കുന്ന അകാലത്തില്‍ മലയാളിയെ വിട്ട് പിരിഞ്ഞ സഹോദരന്‍ കലാഭവന്‍ മണിക്ക് നിഴലാട്ടം മാറ്റി വെച്ചപ്പോള്‍ മണി മാത്രമേ മരിക്കു മണിനാദം മരിക്കില്ല എന്ന് തിരമാലകളെ സാക്ഷി നിര്‍ത്തി ഞങ്ങള്‍ പ്രഖ്യാപിച്ചു….. മിന്നാമിനുങ്ങിന്റെ നുറുങ്ങുവെട്ടം നമുക്കിയില്‍ എന്നുമുണ്ടാകും….. കാലാവസ്ഥ പോലും ആ ഓര്‍മ്മ പുതുക്കല്‍ സമയത്തേക്ക് മാത്രം മാറി നിന്നു…..
ലോക വനിത ദിനമായ മാര്‍ച്ച് 8 ന് പഞ്ചമി രാവിന് സമാപനം കുറിക്കുമ്പോള്‍….. അറബിക്കടലിന്റെ റാണി എന്ന അറിയപ്പെടുന്ന കൊച്ചിയില്‍ സദാചാര പോലീസ് ഗുണ്ടകള്‍ ഉറത്ത് തുള്ളി സ്ത്രീകളെ കടന്നാക്രമിച്ചപ്പോള്‍ ….മാര്‍ ഇവാനിയോസ് കോളേജിലെ ആണും പെണ്ണും നിഴലാട്ടം വേദിയില്‍ ശംഖുമുഖം കടല്‍ തീരത്ത് ആടിയും പാടിയും നൃത്ത ചുവടുകള്‍ വെയ്ക്കുകയായിരുന്നു…… സ്ത്രിക്കും പുരുഷനും തുല്യ അവകാശമാണ് പൊതുസ്ഥലത്ത് എന്ന പ്രഖ്യാപനം കൂടിയായ് നമുക്കതിനെ കാണാം .പഞ്ചിമി രാവ് വേദിയെ…. ഒട്ടേറെ പ്രതിസന്ധികള്‍ നേരിട്ടാണ് മൂന്ന് ദിന രാത്രങ്ങളെ ഞങ്ങള്‍ സൃഷ്ടിച്ചത് പേരെടുത്ത് പറയാതെ സകലര്‍ക്കും നിഴലാട്ടം കുടുംബത്തിന് വേണ്ടി നന്ദി രേഖപ്പെടുത്തുന്നു..

special story about jilaani day
Posted by
10 January

ഇന്ന് ജീലാനി ദിനം: സൂഫികളുടെ ലോകത്തെ ബോധിവൃക്ഷം

-ഫഖ്‌റുദ്ധീന്‍ പന്താവൂര്‍

ആയിരങ്ങള്‍ തിങ്ങി നിറഞ്ഞൊരു പ്രഭാഷണ സദസ്സ്. പ്രധാന പ്രാസംഗികന്‍ പ്രസംഗം തുടങ്ങി. തികഞ്ഞ ആത്മവിശ്വാസത്തിലായിരുന്നു അയാള്‍. പ്രഭാഷണ കലയില്‍ അദ്ധേഹത്തെ വെല്ലാന്‍ മറ്റാരുമില്ലായിരുന്നു. അനുവാചകര്‍ ശ്രദ്ധയോടെ പ്രസംഗം കേള്‍ക്കുന്നുണ്ട്. മണിക്കൂറുകള്‍ക്കു ശേഷം പ്രസംഗം നിര്‍ത്തി. അടുത്ത ഊഴം വേദിയിലെ വൃദ്ധന്റെതായിരുന്നു. അദ്ധേഹം പതിയെ എഴുന്നേറ്റു.

എല്ലാവരുടെ കണ്ണുകളിലേക്കും മൃദുലമായൊന്ന് നോക്കി. എന്നിട്ടു പതിഞ്ഞ ശബ്ദത്തില്‍ പറഞ്ഞു ‘ഇന്നലെ എന്റെ പൂച്ച മരിച്ചു പോയി ‘
സദസ്സ് ഒന്നടങ്കം അതുകേട്ട് പൊട്ടിക്കരഞ്ഞു… ഒരൊറ്റ വാക്കില്‍ സദസ്സിനെ മൊത്തം കരയിപ്പിച്ച ആ വൃദ്ധനെ പണ്ഡിതനായ പ്രാസംഗികന്‍ അസൂയയോടെ നോക്കി ..

വൃദ്ധന്‍ ആ ഒറ്റവാക്കില്‍ പ്രസംഗം അവസാനിപ്പിച്ചു. പ്രാസംഗികന്‍ അദ്ധേഹത്തിന്റെ അരികിലെത്തി പ്രസംഗത്തിന്റെ രഹസ്യം അന്വേഷിച്ചു. അദ്ധേഹം ഇങ്ങനെ മറുപടി പറഞ്ഞു ‘നിങ്ങള്‍ കിതാബുകളില്‍ നിന്ന് പഠിച്ച അറിവുകള്‍ ജനങ്ങളുടെ കാതുകളിലേക്ക് പകര്‍ന്നു കൊടുത്തു. നാവിന്റെ ഉപഭോക്താവ് ചെവിയാണ്. ഞാന്‍ ഖല്‍ബില്‍ നിന്നും ഖല്‍ബിലേക്കാണ് സംസാരിച്ചത്. അതിന് ശബ്ദത്തിന്റെയോ സാഹിത്യ വാക്കുകളോടെയോ അലങ്കാരം വേണ്ട’
മഹാസൂഫി ഗുരുവായ ശൈഖ് അബ്ദുല്‍ ഖാദര്‍ ജീലാനിയായിരുന്നു ഈ വൃദ്ധന്‍. ആ മഹാ ഗുരുവിന്റെ ഈശ്വരീയലയ ദിവസത്തെ ജീലാനി ദിനമെന്ന പേരില്‍ ലോകത്തിന്റെ വിവിധയിടങ്ങളില്‍ സൂഫികളും അദ്ധേഹത്തിന്റെ അനുരാഗികളും ഓര്‍മിക്കുന്നു.

ലോകത്ത് ഏറ്റവുമധികം സ്വാധീനം ചെലുത്തിയ ഒത്തിരി സൂഫികളുണ്ട്. അതില്‍ കേരളത്തില്‍ ഏറ്റവും പ്രിയപ്പെട്ട സൂഫി ഗുരു ശൈഖ് ജീലാനിയാണ്. ഇന്നേ ദിവസം കേരളത്തിലെ നല്ലൊരു വിഭാഗം ആളുകളും അദ്ധേഹത്തിനെക്കുറിച്ചുള്ള കവിതകളും ഗദ്യങ്ങളും സൂഫി സാഹിത്യങ്ങളും പാടിയും പറഞ്ഞും ആഘോഷിക്കുന്നു. 1500 കള്‍ക്ക് മുമ്പ് കോഴിക്കോട് ഖാസി മുഹമ്മദ് എഴുതിയ ‘മുഹിയദ്ധീന്‍ മാല’ കേവലം സാഹിത്യ കൃതിയോ അനുഷ്ഠാന ഗീതകങ്ങളോ മാത്രമായി കാണരുത്. അത് സൂഫിലോകത്തെ ഉന്നതമായ സൂഫി സാഹിത്യങ്ങളാണ് .അതിന്റെ പൊരുളറിയാന്‍ സൂഫിസത്തിന്റെ അധികകുപ്പായമണിയണം.

കേരളത്തിന്റെ മുസ്ലിം മനസ്സ് ജീവിച്ചിരിക്കുന്ന സൂഫികളെ അക്കാലയളവില്‍ അതിന്റെ പൂര്‍ണ്ണാര്‍ത്ഥത്തില്‍ ഉള്‍കൊള്ളാറില്ലെങ്കിലും മരണത്തോടെ അവരെ പാടിപ്പുകഴ്ത്തുകയും നേര്‍ച്ചകള്‍ നടത്തുകയും ചെയ്യും .ഇക്കാര്യത്തില്‍ ശൈഖ് ജീലാനിയെന്ന മഹാ സൂഫിഗുരുരിവിനോളം കേരള മുസ്ലിംകള്‍ക്ക് അനുരാഗത്തിന്റെ വെളിച്ചം നല്‍കിയ മറ്റൊരാളില്ല . ജീലാനിയുടെ അരുമ ശിഷ്യനാണല്ലോ കാഞ്ഞിരമുറ്റം ഫരീദ് ഔലിയ സൂഫി. ഇദ്ധേഹത്തിലൂടെയായിരിക്കാം ഈ സൂഫി ദര്‍ശനങ്ങള്‍ കേരളത്തില്‍ പടര്‍ന്നത്. ജീവിതത്തിലെ ഏറ്റവും വലിയ അനുഗ്രഹം ഒരു സൂഫിയോടൊപ്പമാവുക എന്ന് പറഞ്ഞ സൂഫിവചനം നിരര്‍ത്ഥകമായ മൗനത്തിന്റെ ഗുഹയ്ക്കുള്ളില്‍ നിന്ന് ആത്മീയതയുടെ വെളിച്ചത്തിലേക്ക് പറന്നുയരാന്‍ നമ്മെ സഹായിക്കുന്നു..

ഓരോ സൂഫി കഥകളും അനുഭവങ്ങളും കലുഷിതമായ വര്‍ത്തമാന കാല സാഹചര്യത്തില്‍ നന്മയുടെ വെളിച്ചം തന്നെയാണ്. കേവലം കഥകള്‍ മാത്രമല്ല സൂഫിവര്‍ത്തമാനങ്ങള്‍. എല്ലാവിധ ആഗ്രഹങ്ങളെയും സുഖപ്പെടുത്തുന്ന സവിശേഷ ഔഷധമാണ് ആത്മീയ സംഗിതം. അത് കേള്‍ക്കാന്‍ കാതുകള്‍ പോരാ.. കാണാന്‍ ഈ കണ്ണുകളും മതിയാകില്ല. ഹൃദയങ്ങള്‍ കൊണ്ട് അനുഭവിക്കുന്നവയാണവ.

സൂഫി അനുഭവത്തിന്റെ ആനന്ദലഹിരി അന്വേഷിച്ചെത്തിയ ദര്‍വീശിനോട് മന്‍സൂര്‍ ഖല്ലാജ് എന്ന സൂഫി കാത്തിരിക്കാന്‍ പറഞ്ഞു.. ഒടുവില്‍ ആത്മീയ സത്യം വിളിച്ചു പറഞ്ഞ ഖല്ലാജിനെ മതഭരണകൂടം തൂക്കിക്കൊല്ലുമ്പോള്‍ അദ്ധേഹം ആള്‍ക്കൂട്ടത്തിലേക്ക് നോക്കി ഇങ്ങനെ വിളിച്ച് കൂവി..
‘പ്രിയ മിത്രമെ എവിടെയാണ് താങ്കള്‍ ..? കാണുക ഇതാണ് സൂഫി അനുഭവത്തിന്റെ പരമാനന്ദം ‘
കാലങ്ങള്‍ക്കിപ്പുറം ഇറാഖിലെ ഗ്രാമത്തില്‍ ജനിച്ച ശൈഖ് ജീലാനിയെന്ന മഹാ സൂഫിഗുരു ആ ആത്മീയ സത്യം തൊട്ടറിഞ്ഞപ്പോള്‍ ഇങ്ങനെ പാടി
‘ ഖല്ലാജിനെ കൊല്ലും അന്നേരം ഞാനുണ്ടായിരുന്നെങ്കില്‍ രക്ഷിപ്പാന്‍ ഞാന്‍ എത്തുമായിരുന്നു ‘
( മുഹിയദ്ധീന്‍ മലയില്‍ നിന്ന് )
കേരളത്തില്‍ അങ്ങാളമിങ്ങോളം മുഹിയദ്ധീന്‍ മസ്ജിദും ജീലാനി നഗറുകളും ഉണ്ടായത് ഈ സൂഫി ഓര്‍മയിലാണ് .കോഴിക്കോട്ടെ മൊയ്തീന്‍ പള്ളി ഉദാഹരണം. ശൈഖ് ജീലാനിയുടെ സൂഫി മാര്‍ഗത്തെ ‘.ഖാദരിയ സൂഫി മാര്‍ഗം ‘ എന്നാണ് പേര് വിളിക്കുക. ഇതിന് എമ്പാടും കൈവഴികളുണ്ട് . ഇന്ത്യയില്‍ തന്നെ ഒത്തിരിയുണ്ട് .അജ്മീര്‍ ശൈഖിന്റെ (മുഈനുദ്ധീന്‍ ചിശ്തി) ചിശ്തിയാ സൂഫി മാര്‍ഗം പോലെ…

ജീവിച്ചിരിക്കുമ്പോള്‍ മറ്റേത് സൂഫികളെയും പോലെ പൊതുബോധ മനസ്സിന്റെ എതിര്‍പ്പുകള്‍ അബ്ദുല്‍ ഖാദര്‍ ജീലാനിയും നേരിട്ടിട്ടുണ്ട് . ഇപ്പോള്‍ ആ ജീവിതം കഥകളായും ഗദ്യങ്ങളായും കീര്‍ത്തനങ്ങളായും നാടെങ്ങും പാടിപ്പുകഴ്ത്തുന്നു. സൂഫികളിലെ ആദ്യ വനിതാ ത്വരീഖത്തും ( സൂഫി മാര്‍ഗം ) ബഗ്ദാദിലാണ് സ്ഥാപിച്ചത്. മഹാ സൂഫിഗുരു ശൈഖ് ജീലാനിയുടെ പേരില്‍. സൂഫി അപദാനങ്ങള്‍ പാടിയും പറഞ്ഞും പോകുന്നതിനപ്പുറം അതിന്റെ അനുഭൂതിയില്‍ ലയിക്കാന്‍ കഴിയണം. നിര്‍ഭാഗ്യവശാല്‍ അതിന് മഹാഭാഗ്യം ലഭിക്കുന്നവര്‍ വിരളമാണ്.
‘ ഞാന്‍ സ്‌നേഹിക്കുന്നവനാണു ഞാന്‍. ഞാന്‍ ആരെ സ്‌നേഹിക്കുന്നുവോ ആ ആള്‍ ഞാന്‍ തന്നെയാണ് . ഒരേ ശരീരത്തില്‍ അധിവസിക്കുന്ന രണ്ടാത്മക്കളാണ് നമ്മള്‍ ‘ ദൈവസ്‌നേഹത്തെക്കുറിച്ചുള്ള ഈ സൂഫി കവിതയിലുണ്ട് സൂഫിസത്തിന്റെ പൊരുള്‍ .

(മാധ്യമപ്രവര്‍ത്തകനും, അധ്യാപകനുമായ ലേഖകന്‍ ഹൈദരാബാദ് ജാമിഅ നിസാമിയ്യ സര്‍വ്വകലാശാലയില്‍ നിന്ന് നിസാമി ബിരുദവും, ഖുര്‍ആനില്‍ ബിരുദാനന്തര ബിരുദവും നേടിയിട്ടുണ്ട്. 9946025819 )

director pt kunju muhammed remembering famous writer m rasheed
Posted by
07 January

എം റഷീദ് മനുഷ്യ സ്‌നേഹിയായ ചിന്തകന്‍; കഴിഞ്ഞ ദിവസം അന്തരിച്ച പ്രശസ്ത കോളമിസ്റ്റ് എം റഷീദിനെ അനുസ്മരിച്ച് സംവിധായകന്‍ പിടി കുഞ്ഞുമുഹമ്മദ്

പൊന്നാനി: മനുഷ്യ സ്‌നേഹിയായ ചിന്തകനും എഴുത്തുകാരനുമായിരുന്നു എം റഷീദ് എന്ന് പ്രമുഖ സംവിധായകന്‍ പിടി കുഞ്ഞുമുഹമ്മദ് .
കഴിഞ്ഞദിവസം സേലത്ത് മകളുടെ വീട്ടില്‍ വെച്ച് അന്തരിച്ച പ്രമുഖ മാധ്യമപ്രവര്‍ത്തകനും എഴുത്തുകാരനും ചിന്തകനും വിപ്ലവകാരിയും സ്വാതന്ത്രസമരസേനാനിയുമായ എം റഷീദുമായി ഏറെ സൗഹൃദം പുലര്‍ത്തിയിരുന്ന ആളാണ് പിടി കുഞ്ഞുമുഹമ്മദ്. അദ്ധേഹംഎം റഷീദിനെക്കുറിച്ച് ഇങ്ങനെ ഓര്‍മകള്‍ പങ്കുവെച്ചു.

‘അല്‍അമീന്‍ പത്രത്തിന്റെ അന്തേവാസിയായിരുന്നു എം റഷീദും പിടി കുഞ്ഞുമുഹമ്മദിന്റെ അമ്മാവനായ അബ്ദുറഹിമാനും. ആ അടുപ്പമാണ് എന്നെ എം റഷീദിലെക്കെത്തിച്ചത്. അപകടകരമായ സത്യസന്ധനായിരുന്നു എം റഷീദ്. സ്വതന്ത്ര ചിന്തകള്‍ തിരഞ്ഞെടുത്ത എം റഷീദ് മതത്തിന്റെ പക്ഷത്ത് നിക്കാതെ വിശാലമായ മനുഷ്യ പക്ഷത്ത് നില്‍ക്കുകയായിരുന്നു ഇദ്ധേഹമെന്ന് പിടി കുഞ്ഞുമുഹമ്മദ് പായുന്നു. മകന്‍ ഗഫൂറുമായും ആ സൗഹൃദം നിലനിര്‍ത്തി .

മറ്റുള്ളവരില്‍ നിന്ന് ഭിന്നമായി സ്വന്തമായി ഒരു വഴി തിരഞ്ഞെടുക്കുകയായിരുന്നു അദ്ധേഹം. എന്‍പി മുഹമ്മദിനേക്കാളും മുഹമ്മദ് അബ്ദുറഹിമാന്‍ സാഹിബിനെക്കുറിച്ച് ആധികാരികമായി പഠനം നടത്തിയത് എം റഷീദാണ്. അതുകൊണ്ടാണ് വീരപുത്രന്‍ ( മുഹമ്മദ് അബ്ദുറഹിമാന്‍ സാഹിബിനെക്കുറിച്ചുള്ള സിനിമ ) എന്ന സിനിമയുമായി എം റഷീദുമായി ചര്‍ച്ച നടത്തിയതും അനാരോഗ്യം വകവെക്കാതെ അതില്‍ അഭിനയിച്ചതും. മുഹമ്മദ് അബ്ദുറഹിമാന്‍ സാഹിബ് വധിക്കപ്പെട്ടതല്ലെന്ന് വിശ്വസിച്ചിരുന്ന സാഹിബിന്റെ അപൂര്‍വ്വ കൂട്ടാളിയായിരുന്നു എം റഷീദ്.

ശത്രുക്കള്‍ കൊന്നുകളഞ്ഞതാണ് സാഹിബിനെ എന്നാണ് അക്കാലത്ത് വിശ്വസിക്കെപ്പെട്ടതും പ്രചരിപ്പിക്കപ്പെട്ടതും. എന്നാല്‍ തെളിവ് സഹിതം ഇതെല്ലാം തള്ളുകയായിരുന്നു എം റഷീദ് ചെയ്തത്. കാലിക്കറ്റ് സര്‍വകലാശാല സിഗ്രി വിദ്യാര്‍ത്ഥിക്ക് സാഹിബിനെക്കുറിച്ച് പഠിക്കാന്‍ തയാറാക്കിയ പാഠപുസ്തകത്തില്‍ എം റഷീദിന്റെ ലേഖനം ഉള്‍പ്പെടുത്തിയത് യാദൃശ്ചികമല്ല. 1994 ല്‍ ഞാന്‍ ഗുരുവായൂരില്‍ മല്‍സരിച്ച കാലത്ത് എന്റെ അരികില്‍ വന്നിരുന്നു റഷീദിക്ക. അന്ന് അബ്ദുറഹിമാന്‍ സാഹിബിന്റെ തെരഞ്ഞെടുപ്പനുഭവങ്ങള്‍ പങ്കുവെച്ചിരുന്നു. സ്വന്തം നിലപാടുകള്‍ വിട്ട് വീഴ്ചയില്ലാതെ പ്രകടിപ്പിച്ചതിന് തെരഞ്ഞെടുപ്പില്‍ തോറ്റ സാഹിബിന്റെ കഥയാണ് അന്ന് എന്റെ കാതിലോതിത്തന്നത് .

നര്‍മ്മത്തില്‍ പൊതിഞ്ഞ് കഥ പറയാന്‍ കഴിയുന്ന എഴുത്തുകാരനായിരുന്നു എം റഷീദ്. വിപ്ലവ ജിവിതവും സ്വാതന്ത്രസമര കാലഘട്ടവും ഒരു കഥ പോലെ നര്‍മ്മത്തില്‍ ചേര്‍ത്ത് മനോഹരമായി അവതരിപ്പിക്കും. നന്നായി ചിരിപ്പിക്കുന്ന ചിന്തകന്‍ അതാണ് ഞാന്‍ അടുത്തറിഞ്ഞ എം റഷീദ്.

ഒരു മതത്തിന്റെയും വേലികള്‍ക്കകത്ത് നില്‍ക്കാതിരുന്നിട്ടും മാധ്യമതില്‍ ന്യൂനപക്ഷ വിവേചനങ്ങള്‍ക്കെതിരെ നിരന്തരം എഴുതിയതിന് കഥാകൃത്ത് പി സുരേന്ദ്രന്‍ ഒരിക്കല്‍ ഇദ്ദേഹത്തെ പൊന്നാടയണിയിച്ച് ആദരിക്കാന്‍ തയ്യാറാകാതെ മാറി നിന്നു. എരമംഗലം അല്‍ഫുര്‍ഖാന്‍ കോളേജിന്റെ പത്താം വാര്‍ഷികത്തിനായിരുന്നു ഇത്. തീവ്ര മത നിലപാടാണ് എം റഷീദി നന്നായിരുന്നു ആരോപണം. യഥാര്‍ത്ഥത്തില്‍ ഒരു മതത്തിലും വിശ്വസിക്കാത്ത യഥാര്‍ത്ഥ ഇടത് വിപ്ലവകാരിയായിരുന്നു എം റഷീദ്.

ചിന്തകനായ എം റഷീദിനെ മലയാളികള്‍ വേണ്ടവിധം തിരിച്ചറിഞ്ഞിട്ടില്ല. വിപ്ലവങ്ങള്‍ പാതിവഴിയില്‍ നേര്‍ത്തു പോയെങ്കിലും ഒപ്പം നിന്നത് മനുഷ്യ പക്ഷത്താണ്. ഒത്തിരി യാത്രകള്‍ നടത്തിയ ആ മനുഷ്യന്‍. അതിലേറെ യാത്ര ചെയ്യാന്‍ കൊതിച്ച ആ മനുഷ്യന്‍ വെളിയംകോട് എന്ന സ്വന്തം ഗ്രാമവും വിട്ട് തമിഴ്‌നാട്ടിലെ സേലത്ത് വെച്ച് മരിച്ചതും ഒരു പക്ഷെ യാത്രയോടുള്ള ആത്മാവിന്റെയും ദേഹത്തിന്റെയും ഉപാസന കൊണ്ടാകും. നിശ്ചലമായ ആ ശരീരവും ഒടുവില്‍ ദീര്‍ഘമായൊരു യാത്ര നടത്തിയാണ് സ്വന്തം മണ്ണില്‍ ലയിച്ച് ചേര്‍ന്നത്. ‘
പി ടി കുഞ്ഞുമുഹമ്മദ് പറഞ്ഞു.

( തയ്യാറാക്കിയത് : ഫഖ്‌റുദ്ധീന്‍ പന്താവൂര്‍ )

vishnu’s  photograpgy…
Posted by
19 December

ക്യാമറയില്‍ പതിയുന്ന ജീവിത നേര്‍ക്കാഴ്ച്ചകള്‍

തിരുവനന്തപുരം: ഫോട്ടോഗ്രഫിയെ ഇഷ്ടപ്പെടുന്നവര്‍ ഏറെയുണ്ടെങ്കിലും അതിനെ ജീവിതചര്യയാക്കി മാറ്റിയവര്‍ ചുരുക്കമാണ്. പ്രകൃതിയുടെ ഓരോ ചലനവും സൂക്ഷ്മമായി വീക്ഷിച്ച് അവയെ ക്യാമറയില്‍ ഒപ്പിയെടുക്കുകയെന്നത് നിസ്സാര കാര്യമല്ല. കൂട്ടത്തില്‍ സ്വന്തമായി ക്യാമറ കൂടി ഇല്ലെങ്കിലോ? തിരുവനന്തപുരം സ്വദേശി വിഷ്ണുവിന്റെ കണ്ണുകളില്‍ പതിഞ്ഞ പല കാഴ്ച്ചകളും ക്യാമറയ്ക്കുള്ളിലായിട്ടുണ്ട്. സ്വന്തമായി ക്യാമറയില്ലെങ്കിലും സുഹൃത്തുക്കളുടെ ക്യാമറകളില്‍ വിഷ്ണു പകര്‍ത്തിയ ചിത്രങ്ങളില്‍ പലതിനും ഒരുപാട് പറയാനുണ്ട്. പ്രകൃതിയുടെ മനോഹര കാഴ്ച്ചകള്‍ മാത്രമല്ല ഈ ഫോട്ടോഗ്രാഫറുടെ ശേഖരത്തിലുള്ളത്. പലരും കണ്ടിട്ടും കാണാതെ പോകുന്ന കാഴ്ച്ചകളിലും വിഷ്ണുവിന്റെ കണ്ണും മനസ്സും എത്താറുണ്ട്.

കാര്യവട്ടം ക്യാംപസില്‍ സാമൂഹ്യ സേവനത്തില്‍ ബിരിദാനന്തര ബിരുദ വിദ്യര്‍ത്ഥിയാണ് വിഷ്ണു. സ്വന്തമായി ഒരു ക്യാമറ സ്വന്തമാക്കണം എന്ന ആഗ്രഹം ബാക്കിയാണെങ്കിലും ഫോട്ടോഗ്രാഫി എന്ന ലക്ഷ്യത്തില്‍ നിന്നും മാറി ചിന്തിക്കാന്‍ ഈ യുവാവ് തയ്യാറല്ല. യാത്രകളെ പ്രണയിക്കുന്ന വിഷ്ണു തന്റെ യാത്രാ വിവരണങ്ങള്‍ walktomypast.wordpress.com എന്ന ബ്ലോഗിലൂടെ മറ്റുള്ളവരില്‍ എത്തിക്കാറുമുണ്ട്.

ചിത്രങ്ങളിലൂടെ

15645598_1671227856236029_1806680588_n

15645197_1671235739568574_433134528_n

15644194_1671207579571390_241147000_n

15591707_1671207316238083_993345511_n

15645679_1671236879568460_1933507451_n

15554995_1671237306235084_978734126_n

15577692_1671237982901683_868390668_n

ranjini jose compose sufi song as milad e sherif gift
Posted by
09 December

നബിദിനത്തിന് സമ്മാനമായി സൂഫി ഗാനമൊരുക്കി രജ്ഞിനി ജോസ്; സൂഫിഗുരു മന്‍സൂര്‍ ഖല്ലാജിന്റെ 'അനല്‍ ഹഖിന്' സംഗീത ഭാഷ്യം

പൊന്നാനി: നബിദിനത്തിന് സ്‌നേഹത്തിന്റെ സൂഫി ഗാനവുമായി പ്രശസ്ത ഗായിക രഞ്ജിനി ജോസ് എത്തുന്നു. ‘അനല്‍ ഹഖ് ‘ എന്നു പേരിട്ടിരിക്കുന്ന ഈ മ്യൂസിക്കല്‍ വിഡിയോയില്‍ പാടി അഭിനയിച്ചിരിക്കുന്നത് രഞ്ജിനി തന്നെയാണ്.

ദൈവം എന്നില്‍ കുടികൊള്ളുന്നു എന്ന സത്യത്തെ ആസ്പദമാക്കിയാണു വിഡിയോ ചെയ്തിരിക്കുന്നത്.ലോക പ്രശസ്ത സൂഫിഗുരുവായ ജുനൈദുല്‍ ബഗ്ദാദിയുടെ പ്രിയ ശിഷ്യനും സൂഫിയുമായ മന്‍സൂര്‍ ഖല്ലാജിന്റെ അനല്‍ ഹഖ് എന്ന ചിന്തയാണ് സൂഫി ഗാനത്തിന് ആധാരമായിട്ടുള്ളത് . അക്കാലത്തെ മത നേതൃത്വം ഈ ചിന്തയുടെ പേരില്‍ മന്‍സൂറിനെ മതഭ്രഷ്ടനാക്കുകയും മുസ്ലിം ഭരണകൂടം ഇദ്ധേഹത്തെ തൂക്കിലേറ്റുകയും ചെയ്തിരുന്നു .കാലങ്ങള്‍ക്ക് ശേഷം ഇറാനിലെ ജീലാനിയില്‍ ജനിച്ച മറ്റൊരു സൂഫിയായ അബ്ദുല്‍ ഖാദര്‍ ജീലാനിയാണ് മന്‍സൂറിന്റെ മഹത്വം ലോകത്തിന് ബോധ്യപ്പെടുത്തിക്കൊടുത്തത് .

ദൈവത്തെ തിരഞ്ഞുള്ള യാത്രയില്‍ കണ്ടത് തന്നെത്തന്നെയാണെന്ന തത്വമാണ് വിഡിയോയുെട സത്ത. സ്‌നേഹം സ്‌നേഹിയില്‍ ലയിച്ചപ്പോള്‍ സ്‌നേഹം തന്നെ സ്‌നേഹിയായി മാറിയ സൂഫി നിമിഷമാണ് അനല്‍ ഹഖ് ( ഞാനാണ് പരമ സത്യം ) ഫസിലുദ്ദീന്‍ തങ്ങള്‍ എന്ന കുടുംബ സുഹൃത്തില്‍ നിന്നാണ് രഞ്ജിനിക്ക് ഈ ആശയം കിട്ടിയത്. അദ്ദേഹത്തില്‍ നിന്നു പ്രചോദനമുള്‍ക്കൊണ്ടാണ് വിഡിയോ ചെയ്യുന്നത്.

സന്തോഷ് ചന്ദ്രനാണ് സംഗീതം. പ്രേമം ഉള്‍പ്പെടെയുള്ള ചിത്രങ്ങള്‍ക്കു വരികളെഴുതിയ ശബരീഷ് വര്‍മയുടേതാണ് വരികള്‍. അമ്പിളി എസ് രംഗനാണു സംവിധാനം. ആല്‍ബം ലോകമെമ്പാടും റിലീസ് ചെയ്യും .

(ഫഖ്‌റുദ്ധീന്‍ പന്താവൂര്‍ )

story about 100 years old tree
Posted by
02 December

മധുരിക്കുന്ന പുളിയോര്‍മ്മകളുമായി അപൂര്‍വ്വമായൊരു ആദരം; വന്നേരിയില്‍ പുളിമരമുത്തശ്ശിയെ പൊന്നാടയണിയിച്ച് ആദരിച്ചു

മലപ്പുറം: നൂറ് വര്‍ഷത്തിലധികം പഴക്കമുള്ള പുളിമരത്തെ പൊന്നാടയണിയിച്ച് ആദരിച്ച് അപൂര്‍വ്വമായൊരു മാതൃക സൃഷ്ടിച്ചിരിക്കുകയാണ് മലപ്പുറം ജില്ലയിലെ വന്നേരി ഹൈസ്‌കൂളില്‍. പ്രതിഭ കോളേജിലെ ഭൂമിത്രസേനയും വന്നേരി ഹൈസ്‌കൂളും ചേര്‍ന്നാണ് വന്നേരി സ്‌കൂളിലെ 100 വര്‍ഷം പഴക്കമുള്ള പുളിമരമുത്തശ്ശിയെ ആദരിച്ചത്. വന്നേരി ഹൈസ്‌കൂള്‍ പ്രധാന അധ്യാപകന്‍ കുഞ്ഞിമോന്‍ മാസ്റ്റര്‍ ഉദ്ഘാടനം ചെയ്ത ചാങ്ങിന് പിടിഎ പ്രസിഡന്റ് സി ദിനേശന്‍ അദ്ധ്യക്ഷനായിരുന്നു. ഉദ്ഘാടനത്തെ തുടര്‍ന്ന് പ്രതിഭ കോളേജ് പ്രിന്‍സിപ്പാള്‍ ഉമ്മര്‍ മാസ്റ്റര്‍, ഭൂമിത്ര സേന സെക്രട്ടറി രഞ്ജിത്ത്, വൈസ് പ്രസിഡന്റ് റാഫ്ഷീദ, യൂണിയന്‍ ചെയര്‍മാന്‍ മഷൂര്‍ഖാന്‍, വന്നേരി സ്‌കൂള്‍ മാനേജര്‍ അശോകന്‍ നാലപ്പാട്ട് എന്നിവര്‍ ചേര്‍ന്ന് മുത്തശ്ശി മരത്തെ പൊന്നാടയണിയിച്ചു.vanneerry

വിദ്യാര്‍ത്ഥികളും അധ്യാപകരും പൊന്നാടയില്‍ കയ്യൊപ്പ് രേഖപ്പെടുത്തി. മുന്‍ പഞ്ചായത്ത് പ്രസിഡന്റ് ഇഠ. സോമരാജന്‍ മാസ്റ്റര്‍, കൃഷ്ണദാസ് മാസ്റ്റര്‍, പ്രതിഭ കോളേജ് യൂണിയന്‍ ചെയര്‍മാന്‍ മഷൂര്‍ഖാന്‍ പ്രിന്‍സിപ്പാള്‍ ഉമ്മര്‍ മാസ്റ്റര്‍ എന്നിവര്‍ ആശംസകള്‍ നേര്‍ന്നു. ഈ പുളിമരച്ചോട്ടിലെ കലഹത്തിനും സൗഹൃദത്തിനും പ്രണയത്തിനും പ്രണയഭംഗത്തിനും ഓര്‍മയുടെ രുചി പുളിയല്ല മധുരമാണ്. മധുരിക്കുന്ന പുളിയോര്‍മ്മകള്‍.
നൂറ്റാണ്ടിന്റെ കഥ പറയുന്ന വേരുകള്‍ തലമുറകളെ തലോടിപ്പോയ പുളിമരത്തിനിന്ന് മധുരമാണ്. കാലങ്ങള്‍ക്കോ ഓര്‍മകള്‍ക്കോ മായ്ച്ച് തേച്ച് കളയാനാവാത്ത വിധം മധുരിക്കുന്ന ഓര്‍മ്മകള്‍ .അതു തന്നെയാണ് മരം ആദരിക്കപ്പെടാന്‍ കാരണവും.

vannyyy

വന്നേരി സ്‌കൂളിന്റെ അറുപതാണ്ടിന്റെ കഥകള്‍ വിരിഞ്ഞതും തളിരിട്ടതും ഈ പുളിമരച്ചുവട്ടിലാണ്. ഒരു മരത്തെ ഓര്‍ത്തെടുത്ത് ആദരിക്കുന്നത് ആ ഓര്‍മ്മകള്‍ ഇന്നും മധുരിക്കുന്നത് കൊണ്ടാണ് .ഇവിടെ പുളിയോര്‍മ്മകള്‍ക്ക് മധുരമാണ്. എത്രയോ തലമുറകളെ കണ്ട.. കൗമാരസ്വപ്നങ്ങള്‍ക്ക് തണലേകിയ പുളിമരം ഒരു കാലത്തിന്റെ പൂമരമാണിന്ന്. കപ്പലല്ല ഈ പൂമരം കൊണ്ട് കൗമാരങ്ങളാണ് ഇന്ന് പുനര്‍നിര്‍മിക്കുന്നത്. തിരിച്ചെടുക്കാനാവാത്ത വിധം കാലത്തിന്റെ യവനികകപ്പുറത്തേക്ക് മാഞ്ഞുപോയ കൗമാരക്കാലത്തെ വിണ്ടെടുക്കാന്‍ ഈ പുളിമരച്ചോട്ടിലെ കാറ്റുകള്‍ക്ക് ഇന്നും ശക്തിയുണ്ട്.

ഒരു മരത്തെ ഓര്‍ത്തെടുക്കുക എന്നത് പ്രകൃതിയോട് ചെയ്യുന്ന ഉപാസനയാണ്. പ്രതിഭയുടെ ഭൂമിത്രസേനയും വന്നേരി ഹൈസ്‌കൂളിലെ നാച്വറല്‍ ക്ലബും കാലത്തിന്റെ വഴിവിളക്കാവുന്നത് നന്മയുടെ ഈ അപൂര്‍വ്വതകൊണ്ടാണ്

(ഫഖ്‌റുദ്ധീന്‍ പന്താവൂര്‍)

Vineetha Anil’s ‘Samarppanam’ goes viral in social media
Posted by
01 December

മക്കളാല്‍ തിരസ്‌കരിക്കപ്പെടുന്ന വിധവകളായ അമ്മമാര്‍ക്കായി; ഒറ്റപ്പെടുന്നവരുടെ വേദന വരച്ച് കാണിക്കുന്ന വിനീതയുടെ 'സമര്‍പ്പണം' ശ്രദ്ധേയമാവുന്നു

കൊച്ചി: ജീവിത സായാഹ്നത്തില്‍ ഒറ്റപ്പെടുന്നവരുടെ വേദന ഒരിക്കലും യൗവ്വനത്തിന്റെ ഊര്‍ജം തുണയായുള്ള യുവാക്കള്‍ക്ക് മനസിലാവില്ല. ജീവിതം തന്നെ ഹോമിക്കുന്നത് മക്കളെ പോറ്റി വളര്‍ത്താനാണെങ്കിലും വളര്‍ന്ന് വലുതായാല്‍ അവര്‍ ഏറ്റവും അവഗണിക്കുക തങ്ങള്‍ക്കായി വിയര്‍പ്പൊഴുക്കിയ മാതാപിതാക്കളെ ആയിരിക്കും. അങ്ങനെയെങ്കില്‍ ആരുടെയും തണല്‍ തേടാതെ മക്കളെ സ്വന്തം മനക്കരുത്തിന്റെ ബലത്തില്‍ വളര്‍ത്തിയെടുക്കുന്ന വിധവകളായ അമ്മമാരുടെ അവസ്ഥ തനിച്ചാവാത്തിടത്തോളം കാലം ഒരാള്‍ക്കും തിരിച്ചറിയാനുമാവില്ല.

എന്നാല്‍ ഏകയായ അമ്മമാരുടെ വേദന വരച്ചിടുകയാണ് വിനീത അനില്‍ എന്ന യുവതി. സമര്‍പ്പണം എന്ന പേരില്‍ എഴുതിയ ചെറിയ ബ്ലോഗില്‍ വിനീത ഇത്തരത്തില്‍ വിധവകളായ അമ്മമാരുടെ മനസിന്റെ നേര്‍ചിത്രം എഴുത്തിലൂടെ കോറിയിട്ടിരിക്കുന്നു. സോഷ്യല്‍മീഡിയയിലൂടെ ഇതിനോടകം ഏറെ വായനക്കാരെ നേടിയ ഈ എഴുത്ത്, പ്രശംസകള്‍ ഏറ്റുവാങ്ങി വായനക്കാരെ നേടുകയാണ.് പ്രണയിച്ച പുരുഷന്‍ വൈധവ്യത്തിന്റെ ഏകാന്തതയിലും കൈപിടിക്കാന്‍ വന്നപ്പോള്‍ തട്ടിമാറ്റിയ അരുന്ധതി, പിന്നീട് വാര്‍ദ്ധക്യത്തിന്റെ പടിവാതില്‍ക്കല്‍ എത്തി നില്‍ക്കെ എന്തിനാണ് തന്റെ മുന്‍കാമുകനോടൊപ്പം പോവുകയാണെന്ന് മക്കളെ അറിയിച്ചതെന്ന അന്വേഷണത്തോടെയാണ് ഈ കൊച്ചു കഥ ആരംഭിക്കുന്നത്.

വിനീത അനില്‍ നല്ലെഴുത്തില്‍ കുറിച്ച ‘സമര്‍പ്പണം’ വായിക്കാം:

prathipha college student play  big  thiruvathira on keralapiravi day
Posted by
01 November

കേരളപ്പിറവി ദിനത്തില്‍ ഭീമന്‍ തിരുവാതിരക്കളിയൊരുക്കി പുന്നയൂര്‍ക്കുളം പ്രതിഭ കോളേജ് വിദ്യാര്‍ത്ഥികള്‍

പുന്നയൂര്‍ക്കുളം: കേരളപ്പിറവി ദിനത്തില്‍ ഇത്തവണ വ്യത്യസ്ഥ ആഘോഷത്തിലാണ് തൃശൂര്‍ ജില്ലയിലെ പുന്നയൂര്‍ക്കുളം പ്രതിഭ കോളേജ് വിദ്യാര്‍ത്ഥികള്‍.
കോളേജിലെ നാല് ക്ലബുകള്‍ ഒന്നിച്ച് 150 ഓളം വിദ്യാര്‍ത്ഥിനികളെ അണിനിരക്കി കൂറ്റന്‍ തിരുവാതിരക്കളി ഒരുക്കിയാണ് കേരളപ്പിറവി ദിനം ആഘോഷിച്ചത്.

unnamed

കോളേജിലെ സോഷ്യല്‍ ക്ലബുകളായ പ്രതിഭ സര്‍ഗവേദി, ഭൂമിത്ര സേന, പ്രതിഭ ടൂറിസം ക്ലബ്, പ്രതിഭ കാരുണ്യ നിധി എന്നീ കൂട്ടായ്മകള്‍ ഒന്നിച്ചാണ് കൂറ്റന്‍ തിരുവാതിരക്കളിയൊരുക്കിയത്. തിരുവാതിരക്കളിക്ക് സൂര്യ, അനില, ഐശ്വര്യ,ബിനീഷ് എന്നീ വിദ്യാര്‍ത്ഥികള്‍ നേതൃത്വം നല്‍കി.

thiru

തിരുവാതിരക്കളിക്ക് പുറമെ വിദ്യാര്‍ത്ഥികളെക്കൊണ്ട് കേരളത്തിന്റെ ഭൂപടമൊരുക്കി വിദ്യാര്‍ത്ഥി കേരളവും കുട്ടികള്‍ ഒരുക്കിയിരുന്നു. കോളേജ് പ്രിന്‍സിപ്പള്‍ ഉമ്മര്‍ മാസ്റ്റര്‍, സാജന്‍, മഞ്‌ജേഷ്, അബ്ദുള്‍ റസാഖ്, ഷുക്കൂര്‍, എന്നിവര്‍ നേതൃത്വം നല്‍കി .

Actor Murali’s  seventh death anniversary
Posted by
06 August

അഭിനയത്തിന്റെ രസതന്ത്രം ഉള്ളിലേക്കാവാഹിച്ച പ്രതിഭ മുരളി ഓര്‍മ്മയായിട്ട് ഏഴ്‌വര്‍ഷം

അരികില്‍ നീയുണ്ടായിരുന്നെങ്കില്‍ എന്നു ഞാന്‍ ഒരുമാത്ര വെറുതെ നിനച്ചുപോയ്… അഭിനയത്തെ സപര്യയാക്കിയ കലാകാരന്‍ മുരളിയ്ക്ക് ശ്രദ്ധാഞ്ജലിയര്‍പ്പിക്കാന്‍ ഈ വരികള്‍ മാത്രംമതി. മലയാളസിനിമാപ്രേക്ഷകര്‍ മുഴുവന്‍ ആഗ്രഹിക്കുന്നു മുരളി ഉണ്ടായിരുന്നെങ്കില്‍ എന്ന്… മലയാളത്തിന്റെ അതുല്യപ്രതിഭ മുരളി അന്തരിച്ചിട്ട് ഇന്നേക്ക് ഏഴുവര്‍ഷമാകുന്നു.

murali1954 മെയ് 25-ന് കൊല്ലം ജില്ലയിലെ കുടവട്ടൂരിലാണ് മുരളിയുടെ ജനനം. സ്‌കൂള്‍ കാലഘട്ടത്തില്‍ തന്നെ നാടകരംഗത്തെത്തി. എല്‍ഡി ക്ലര്‍ക്കായി ജോലിയില്‍ പ്രവേശിച്ചെങ്കിലും അദ്ദേഹം നാടകം കൈവിട്ടില്ല. തിരുവനന്തപുരത്തെ പ്രശസ്തമായ നാട്യഗൃഹം നാടക്കക്കളരി മുരളിയുടെ കൂടി ശ്രമഫലമായാണ് സ്ഥാപിക്കപ്പെട്ടത്.

അഭിനയത്തിന്റെ രസതന്ത്രം ഉള്ളിലേക്കാവാഹിച്ച് അഭിനയത്തെ സപര്യയാക്കിയ കലാകാരന്‍. ഇടതുപക്ഷ ചിന്തകളുടെ വീറും വാശിയും കഥാപാത്രങ്ങളില്‍ ഉള്‍ക്കൊള്ളിച്ച് മുരളി നിരവധി ചിത്രങ്ങളില്‍ ഇടത് സഹയാത്രികന്റെ വേഷത്തില്‍ നാട്യങ്ങളേതുമില്ലാതെ തിളങ്ങി. പരുക്കന്‍ മുഖഭാവത്തില്‍ ഒരു നായകന്റെ ലോലഭാവങ്ങളില്ലാതിരുന്നിട്ടു പോലും ശക്തമായ കഥാപാത്രങ്ങളിലൂടെ മുരളി ജനഹൃദയങ്ങളില്‍ ഇടം പിടിച്ചു. നായകനായും വില്ലനായും സഹകഥാപാത്രമായും രണ്ടു പതിറ്റാണ്ടിലേറെ തിരശീലയില്‍ തിളങ്ങിനിന്നു.
murali-1
1979ല്‍ ഭരത് ഗോപി സംവിധാനം ചെയ്ത ‘ഞാറ്റടി’ എന്ന ചിത്രത്തിലൂടെയാണ് മുരളി ചലച്ചിത്ര രംഗത്ത് എത്തുന്നത്. ഇടതുപക്ഷ ചിന്താഗതിയുള്ള രഘുവെന്ന കഥാപാത്രത്തെ അനശ്വരമാക്കിയെങ്കിലും ചിത്രം വെളിച്ചം കണ്ടില്ല. തീവ്രവാദ സിനിമ എന്ന് മുദ്രകുത്തി ചിത്രത്തെ സെന്‍സര്‍ ബോര്‍ഡ് നിരോധിച്ചു. പിന്നീട് ചില ചെറിയ വേഷങ്ങള്‍ ചെയ്തെങ്കിലും ഹരിഹരന്‍ സംവിധാനം ചെയ്ത പഞ്ചാഗ്‌നിയാണ് മുരളിയെ ശ്രദ്ധേയനാക്കിയത്. അമരത്തിലെ കൊച്ചുരാമനിലൂടെ മികച്ച രണ്ടാമത്തെ നടനുള്ള സംസ്ഥാന സര്‍ക്കാരിന്റെ പുരസ്‌കാരം അദ്ദേഹം സ്വന്തമാക്കി.

വില്ലനായാണ് ചലച്ചിത്രലോകത്ത് ചുവടുറപ്പിച്ചതെങ്കിലും പിന്നീട് ക്യാരക്ടര്‍ റോളുകളും മുരളിയെന്ന നടനെ തേടിയെത്തി. ദശരഥം, അര്‍ത്ഥം, കുട്ടേട്ടന്‍, ലാല്‍ സലാം, ഏയ് ഓട്ടോ, കിഴക്കുണരും പക്ഷി, കേളി, ധനം, അമരം, ചമ്പക്കുളം തച്ചന്‍ തുടങ്ങിയ ചിത്രങ്ങളിലൂടെ എണ്‍പതുകളുടെ അവസാനത്തിലും തൊണ്ണൂറുകളുടെ തുടക്കത്തിലും മുരളി മലയാള സിനിമയിലെ അവിഭാജ്യ ഘടകമായി മാറി.
murali-2
1992 ല്‍ പുറത്തിറങ്ങിയ ആധാരം ആദ്ദേഹത്തെ മികച്ച നടനാക്കി. നെയ്ത്തുകാരനിലെ അഭിനയത്തിന് മികച്ച നടനുള്ള ദേശീയ പുരസ്‌കാരവും അദ്ദേഹം നേടി. അമരത്തിലെ കൊച്ചു രാമനിലൂടെ മികച്ച സഹനടനുള്ള പുരസ്‌കാരം മുരളിയെ തേടിയെത്തിയിരുന്നു. വെങ്കലം, ആധാരം വളയം, ചമയം എന്നിങ്ങനെ പ്രതിഭ മാറ്റുരച്ച കഥാപാത്രങ്ങള്‍. പ്രിയനന്ദന്റെ പുലിജന്മത്തിലെ കഥാപാത്രവും ഏറെ പ്രശംസകള്‍ പിടിച്ചുപറ്റി.

പിന്നീട് ചമയം, പ്രായിക്കര പാപ്പാന്‍, കാരുണ്യം, പത്രം, ഗര്‍ഷോം, നിഴല്‍ക്കുത്ത്, അരനാഴികനേരം, പുലിജന്മം തുടങ്ങി ചിത്രങ്ങളിലൂടെ മലയാള സിനിമയ്ക്കും മലയാള സിനിമാ പ്രേക്ഷകനും മറക്കാനാവാത്ത എത്രയെത്ര കഥാപാത്രങ്ങള്‍. കാണാക്കിനാവ് (1996), താലോലം (1998) എന്നീ ചിത്രങ്ങളിലൂടെ മുരളി വീണ്ടും മികച്ച നടനുള്ള സംസ്ഥാന അവാര്‍ഡുകള്‍ നേടി.

2001ല്‍ പുറത്തിറങ്ങിയ പ്രിയനന്ദനന്റെ ‘നെയ്ത്തുകാരന്‍’ എന്ന ചിത്രം മുരളിയുടെ അഭിനയ മികവിന് മികച്ച നടനുള്ള ദേശീയ അംഗീകാരം നേടിക്കൊടുത്തു. ദേശീയ പുരസ്‌കാരത്തിനു പുറമേ സംസ്ഥാന പുരസ്‌ക്കാരവും നെയ്ത്തുകാരനിലെ അപ്പ മേസ്തിരിയെ തേടിയെത്തി. വീരാളിപ്പട്ട്, പ്രണയകാലം എന്നീ ചിത്രങ്ങളിലെ പ്രകടനത്തിന് 2007-ല്‍ സംസ്ഥാന സര്‍ക്കാരിന്റെ സഹനടനുള്ള പുരസ്‌കാരം വീണ്ടും മുരളിയ്ക്ക് ലഭിച്ചു.
murali-3
മലയാളത്തിനുപുറമേ തമിഴ്, ഹിന്ദി ചിത്രങ്ങളിലും മുരളി ശക്തമായ വേഷങ്ങള്‍ ചെയ്തു. പഠനകാലം മുതല്‍ക്കേ വ്യക്തമായ രാഷ്ട്രീയ കാഴ്ചപ്പാട് സൂക്ഷിച്ചിരുന്ന മുരളി 1999ലെ ലോക്സഭാ തിരഞ്ഞെടുപ്പില്‍ സിപിഎം സ്ഥാനാര്‍ത്ഥിയായി ആലപ്പുഴയില്‍ മല്‍സരിച്ചെങ്കിലും പരാജയപ്പെട്ടു. സാഹിത്യത്തിലും ആ പ്രതിഭ പതിഞ്ഞു. അഞ്ച് പുസ്തകങ്ങള്‍ മുരളിയുടേതായി പ്രസിദ്ധീകരിക്കുകയുണ്ടായി. ഇതില്‍ ‘അഭിനേതാവും ആശാന്റെ കവിതയും’ എന്ന പുസ്തകത്തിന് സംഗീത നാടക അക്കാദമി അവാര്‍ഡ് ലഭിച്ചു.

കേരള സംഗീതനാടക അക്കാദമി ചെയര്‍മാന്‍ ആയിരിക്കെ 2009 ആഗസ്റ്റ് 6 നാണ് മുരളി വെള്ളിവെളിച്ചത്തിന്റെ അകമ്പടിയില്ലാതെ യാത്രയായത്. സിനിമയില്‍ ഒരിക്കലും പകരം വെക്കാനാവാത്ത നഷ്ടമായി മുരളി കാലത്തിനപ്പുറത്തേക്ക് യാത്രപറഞ്ഞു. മറവിയിലേക്ക് മറയാന്‍ മടിച്ച് മുരളി ഇന്നും ആസ്വാദകമനസ്സില്‍ അനശ്വരനാകുന്നു.

It’s APJ Abdul Kalam’s first death anniversary
Posted by
27 July

ആര്‍ക്കും അത്രവേഗം നടന്ന് ഒപ്പമെത്താന്‍ കഴിയാതെപോയ പ്രതിഭ; ഡോ. കലാമിന്റെ ഓര്‍മ്മകള്‍ക്ക് പ്രണാമമര്‍പ്പിച്ച് രാജ്യം

കൊച്ചി: ഇന്ത്യയുടെ മിസൈല്‍ മാനും മുന്‍ രാഷ്ട്രപതിയുമായ ഡോ എപിജെ അബ്ദുള്‍കലാമിന്റെ ജ്വലിക്കുന്ന ഓര്‍മ്മയില്‍ രാജ്യം. ജൂലൈ 27ന്‌ ഡോ. എപിജെ അബ്ദുള്‍ കലാം ഓര്‍മ്മയായിട്ട് ഒരാണ്ട് തികയുന്നു. പ്രതിഭാധനനായ ശാസ്ത്രജ്ഞനില്‍ നിന്നും ഭാരതത്തിന്റെ പ്രഥമ പൗരനായി വളര്‍ന്ന അബ്ദുള്‍ കലാമിന്റെ ദീപ്ത സ്മരണയ്ക്ക് മുന്നില്‍ ആദരാഞ്ജലിയര്‍പ്പിക്കുകയാണ് രാഷ്ട്രം.

അവുല്‍ പക്കീര്‍ ജൈനലബ്ദീന്‍ അബ്ദുള്‍ കലാമെന്ന എപിജെ അബ്ദുള്‍ കലാമിന്റെ ജീവിതം ഇല്ലായ്മകളെ അഗ്‌നിച്ചിറകുകളാല്‍ കീഴടക്കിയ വിജയഗാഥയായിരുന്നു.1931ല്‍ തമിഴ്‌നാട്ടിലെ രാമേശ്വരത്ത് ഒരു സാധാരണ കുടുംബത്തില്‍ ജനിച്ച കലാം മിസൈല്‍മാനായതും രാഷ്ട്രപതിയായതിനും പിന്നില്‍ ലാളിത്യത്തിന്റെയും, സ്ഥിരോത്സാഹത്തിന്റെയും കഥയുണ്ട്. രാമേശ്വരം ക്ഷേത്രത്തിലെ പൂജാരിയായ പാക്ഷി ലക്ഷ്മണ ശാസ്ത്രിയും പിതാവായ ജൈനലബ്ദീനും തമ്മിലുള്ള സൗഹൃദത്തില്‍നിന്ന് മതമൈത്രിയുടെ ഇഴയടുപ്പം ചെറുപ്രായത്തിലേ തൊട്ടറിഞ്ഞു. പത്രം വിതരണം ചെയ്തും കക്ക പെറുക്കിയും നടന്ന പ്രഭാതങ്ങളില്‍ നിന്ന് ജീവിതത്തേയും. പിന്നീട് സതീഷ് ധവാനില്‍ നിന്നും വിക്രം സാരാഭായിയില്‍ നിന്നും ബഹിരാകാശത്തിന്റെ അനന്ത വിസ്മയങ്ങളേയും അടുത്തറിഞ്ഞു.

ബഹിരാകാശ പഠനത്തിന് ശേഷം ഡിആര്‍ഡിഒ, ഐഎസ്ആര്‍ഒ തുടങ്ങിയ ഗവേഷണ സ്ഥാപനങ്ങളില്‍ ഉന്നത സ്ഥാനങ്ങള്‍ വഹിച്ചു. ഭാരതത്തിന്റെ മിസൈല്‍ മാന്‍ എന്ന വിശേഷണത്തിന് പിന്നില്‍ നേട്ടങ്ങളുടെ നീണ്ട പട്ടിക. 2002ല്‍ പ്രഥമപൗരനായി. രാഷ്ടപതി ഭവന്റെ ഔപചാരികതകള്‍ക്കപ്പുറം ജനകീയനായി.

2007ല്‍ സ്ഥാനമൊഴിഞ്ഞ ശേഷം അധ്യാപനത്തിലും പ്രസംഗത്തിലും എഴുത്തിലും മുഴുകി. മരണം ആകസ്മികമായി കടന്നുവന്നതും അത്തരത്തിലൊരു വേദിയില്‍ വെച്ചായിരുന്നു. ഷില്ലോങ്ങില്‍ ഒരു പ്രഭാഷണ പരിപാടിയ്ക്കിടെ ഹൃദയാഘാതത്തെ തുടര്‍ന്ന് കുഴഞ്ഞ് വീഴുകയായിരുന്നു.

1997ല്‍ രാജ്യത്തെ പരമോന്നത സിവിലിയന്‍ ബഹുമതിയായ ഭാരതരത്ന. പത്മഭൂഷണ്‍(1981), പത്മവിഭൂഷണ്‍( 1990), ദേശീയ ഉദ്ഗ്രഥനത്തിനുളള ഇന്ദിരാഗാന്ധി പുരസ്‌കാരം (1997), വീര്‍ സവര്‍ക്കര്‍, രാമാനുജന്‍ പുരസ്‌കാരങ്ങള്‍, കാലിഫോര്‍ണിയ സര്‍വകലാശാലയുടെ ഇന്റര്‍നാഷണല്‍ വോണ്‍ കാര്‍മല്‍ വിങ്സ് പുരസ്‌കാരം. വിദേശത്തുനിന്നുള്‍പ്പെടെ 40 സര്‍വകലാശാലകളുടെ ഡോക്ടറേറ്റ് ബിരുദവും ലഭിച്ചു. ആത്മകഥയായ ‘അഗ്‌നിച്ചിറകുകള്‍’ അടക്കം പത്ത് പുസ്തകങ്ങളും രചിച്ചിട്ടുണ്ട്. ‘അഗ്‌നിച്ചിറകുകള്‍’ 1999-ല്‍ രാജ്യത്ത് ഏറ്റവുംകൂടുതല്‍ വിറ്റഴിഞ്ഞ പുസ്തകങ്ങളിലൊന്നായിരുന്നു.

ഇരുപത്തൊന്നാം നൂറ്റാണ്ടിലെ ഇന്ത്യയിലൂടെ അതിവേഗം നടന്നുപോയ, ഇന്ത്യയുടെ സുശോഭനമായ ഭാവിയെപ്പറ്റി മറ്റാര്‍ക്കും സാധ്യമാകാത്ത സ്വപ്നങ്ങള്‍ കണ്ട അസാധാരണ പ്രതിഭാശാലി എന്നാണ് ചരിത്രം ഡോ. കലാമിനെ വിലയിരുത്തുക. ആര്‍ക്കും അത്രവേഗം നടന്ന് ഒപ്പമെത്താന്‍ കഴിയാതെപോയ ഒരാള്‍!

എല്ലാ തിരമാലകളെയും മുറിച്ചുകടന്നു ഞാനെന്റെ ലക്ഷ്യം നേടിയിരിക്കുന്നു. എന്റെ ദൗത്യവും പൂര്‍ത്തിയായി’ എന്ന് ഒരിക്കല്‍ കവിതയില്‍ എഴുതിയ ഡോ. കലാമിന്റെ ഓര്‍മ്മകള്‍ക്കു മുന്നില്‍ കാലത്തിന്റെ തിരകള്‍ നമിക്കുകയാണിപ്പോള്‍.