ബിറ്റ്‌കോയിന് ഇന്ത്യയില്‍ നിയന്ത്രണം വരുന്നു; ബജറ്റില്‍ പ്രഖ്യാപനം ഉണ്ടായേക്കും
Posted by
28 December

ബിറ്റ്‌കോയിന് ഇന്ത്യയില്‍ നിയന്ത്രണം വരുന്നു; ബജറ്റില്‍ പ്രഖ്യാപനം ഉണ്ടായേക്കും

ന്യൂഡല്‍ഹി: ഇന്ത്യന്‍ സമ്പദ് വ്യവസ്ഥ ഔദ്യോഗികമായി നിര്‍വചിക്കാത്ത ക്രിപ്‌റ്റോ കറന്‍സികളെ വരുതിയിലാക്കാന്‍ ഒരുങ്ങി കേന്ദ്ര സര്‍ക്കാര്‍. ഇന്ത്യയില്‍ ഇത്തരത്തിലുള്ള കറന്‍സികളുടെ വിനിമയം വര്‍ധിച്ച സാഹചര്യത്തിലാണ് അടുത്ത ബജറ്റില്‍ ബിറ്റ് കോയിന്‍ ഉള്‍പ്പടെയുള്ള ക്രിപ്‌റ്റോ കറന്‍സികളെ കുറിച്ച് പരാമര്‍ശിക്കുക. ഫെബ്രുവരി ഒന്നിന് അവതരിപ്പിക്കുന്ന 2018 -19 വര്‍ഷത്തേക്കുള്ള ബജറ്റില്‍ ഇത് സംബന്ധിച്ച പ്രഖ്യാപനം നടത്താനാണ് സര്‍ക്കാര്‍ ആലോചിക്കുന്നത്. ക്രിപ്‌റ്റോ കറന്‍സികള്‍ എന്താണെന്ന് വ്യക്തമായ നിര്‍വചനം കൊണ്ടുവരും.

ഇതിനെ കുറിച്ച് പഠനം നടത്തുന്നതിന് സര്‍ക്കാര്‍ ഒരു ഉന്നതതല സമിതിയെ നിയോഗിച്ചിരുന്നു. ഇക്കണോമിക് അഫയേഴ്സ് സെക്രട്ടറി സുഭാഷ് ചന്ദ്ര ഗാര്‍ഗ് അധ്യക്ഷനായ സമിതി ഒരു കരട് നിയമം തയാറാക്കിയതായാണ് വിവരം. ക്രിപ്‌റ്റോകറന്‍സിയെ കറന്‍സിയായി പരിഗണിക്കണോ എന്ന കാര്യത്തില്‍ ഇനിയും വ്യക്തത കൈവന്നിട്ടില്ല. ഇത് ഒരു ക്യാപിറ്റല്‍ അസറ്റായോ, ഭൗതികമല്ലാത്ത അസറ്റായോ പരിഗണിക്കാം എന്ന തരത്തിലുള്ള ശുപാര്‍ശയാണ് കമ്മറ്റി മുന്നോട്ട് വയ്ക്കുന്നത്.

ഇന്ത്യയില്‍ ബിറ്റ്കോയിന്‍ അടക്കമുള്ള ക്രിപ്‌റ്റോകറന്‍സികളില്‍ നല്ല തോതില്‍ തന്നെ ഇടപാടുകള്‍ നടക്കുന്നതായി റിപ്പോര്‍ട്ടുകളുണ്ട്. ഈയിടെ ആദായനികുതി വകുപ്പ് കൊച്ചി അടക്കമുള്ള നഗരങ്ങളില്‍ ഇത് സംബന്ധിച്ച വിവരങ്ങള്‍ തേടിയിരുന്നു. ആയിരത്തിലേറെ പേര് ഇതിനകം സജീവമായി ഈ രംഗത് നിക്ഷേപം നടത്തുന്നു എന്നാണ് റിപ്പോര്‍ട്ട്. കേന്ദ്ര സര്‍ക്കാര്‍ ഇത് വരെ ക്രിപ്‌റ്റോ കറന്‍സികള്‍ക്ക് ഔദ്യോഗിക അംഗീകാരമോ നിരോധനമോ ഏര്‍പ്പെടുത്തിയിട്ടില്ല.

എസ്ബിടി-റിലയന്‍സ് കരാര്‍; വിദ്യാഭ്യാസ വായ്പയെടുത്ത 20,000 വിദ്യാര്‍ത്ഥികള്‍ സഹായം ലഭിക്കാതെ നിരാശയില്‍
Posted by
28 December

എസ്ബിടി-റിലയന്‍സ് കരാര്‍; വിദ്യാഭ്യാസ വായ്പയെടുത്ത 20,000 വിദ്യാര്‍ത്ഥികള്‍ സഹായം ലഭിക്കാതെ നിരാശയില്‍

കൊച്ചി: വിദ്യാഭ്യാസ വായ്പയെടുത്ത വിദ്യാര്‍ത്ഥികളെ വെട്ടിലാക്കി എസ്ബിടി. കുടിശ്ശികയായ വിദ്യാഭ്യാസ വായ്പകള്‍ എസ്ബിടി, റിലയന്‍സ് അസെറ്റ് കണ്‍സ്ട്രക്ഷന്‍ കമ്പനിക്ക് കൈമാറിയതോടെ വിദ്യാഭ്യാസ വായ്പയെടുത്ത 20,000-ലേറെ കുട്ടികളാണ് പ്രതിസന്ധിയിലായിരിക്കുന്നത്. ഇത്തരക്കാര്‍ക്ക് സഹായധനം നല്‍കില്ലെന്നാണ് സര്‍ക്കാര്‍ തീരുമാനം.

2016 മാര്‍ച്ച് വരെ വിദ്യാഭ്യാസ വായ്പ കുടിശ്ശികയായവര്‍ക്കാണ് സര്‍ക്കാര്‍ സഹായം പ്രഖ്യാപിച്ചത്. 40 ശതമാനം വിദ്യാര്‍ഥികള്‍ അടയ്ക്കണം. 60 ശതമാനം സര്‍ക്കാര്‍ കൊടുക്കും. പലിശ അതത് ബാങ്കുകള്‍ കുറച്ചുകൊടുക്കും. സര്‍ക്കാര്‍ പോര്‍ട്ടലിലൂടെയാണ് അപേക്ഷിക്കേണ്ടത്. ഡിസംബര്‍ 31 ആണ് അവസാന തീയതി. ഇതുവരെ 5,50,000 അപേക്ഷകള്‍ ലഭിച്ചു. മറ്റെല്ലാ ബാങ്കുകളും സര്‍ക്കാര്‍ തീരുമാനത്തോട് സഹകരിച്ചാണ് പോകുന്നത്. പക്ഷേ, എസ്ബിടിയില്‍നിന്ന് വായ്പയെടുത്തവര്‍ മാത്രം ത്രിശങ്കുവിലായി.

എസ്ബിടിയില്‍നിന്ന് വായ്പയെടുത്തവര്‍ എത്തുമ്പോള്‍ അവിടെ രേഖകളില്ലെന്നും റിലയന്‍സുമായി ബന്ധപ്പെടണമെന്നുമുള്ള അറിയിപ്പാണ് വിദ്യാര്‍ത്ഥികള്‍ക്ക് ലഭിക്കുന്നത്. റിലയന്‍സില്‍ നിന്നാകട്ടെ ഇവിടെ നിന്നും വായ്പയെടുത്തിട്ടില്ലെന്ന നിലപാടിലാണ് അവര്‍. മുംബൈ ചര്‍ച്ച് ഗേറ്റ് ട്രസ്റ്റ് ഓഫീസില്‍ നിന്നാണ് റിലയന്‍സിന്റെ കൊച്ചി ഓഫീസിലേക്ക് വായ്പയെടുത്തവരുടെ വിവരങ്ങള്‍ കൊടുത്തിട്ടുള്ളത്. പലരുടെയും വിവരങ്ങള്‍ ഇവിടെ ഇല്ല. മുംബൈയില്‍നിന്ന് ആവശ്യമായ വിവരങ്ങള്‍ ലഭിക്കുന്നുമില്ല. എസ്ബിടി വായ്പ പിരിക്കാന്‍ റിലയന്‍സിനെ ഏല്‍പ്പിച്ചതിന്റെ പേരില്‍ സര്‍ക്കാര്‍ സഹായം നിഷേധിക്കുന്നത് നീതി നിഷേധമാണെന്ന് വായ്പയെടുത്ത വിദ്യാര്‍ഥികളുടെ കൂട്ടായ്മ പറയുന്നു. സര്‍ക്കാര്‍ അടിയന്തരമായി ഇടപെടണമെന്ന് അവര്‍ ആവശ്യപ്പെടുന്നു.

അതേസമയം, ഇക്കാര്യത്തില്‍ ഒന്നും ചെയ്യാനാവില്ലെന്ന നിലപാടാണ് എസ്ബിഐ. അധികൃതരുടേത്. എസ്ബിടിയെ ഏറ്റെടുക്കുമ്പോള്‍ മുതലുള്ള ബാധ്യതമാത്രമേ വഹിക്കേണ്ടതുള്ളൂവെന്ന് അവര്‍ പറയുന്നു. 2017 മാര്‍ച്ചിന് മുന്‍പുള്ള എസ്ബിടിയുടെ ഒരു രേഖയും എസ്ബിഐ സൂക്ഷിക്കുന്നില്ല. അതിനാല്‍ ഇക്കാര്യം ബാങ്കിനെ ബാധിക്കുന്നതേയല്ലെന്നും എസ്ബിഐ അധികൃതര്‍ വ്യക്തമാക്കുന്നു.

ജിഎസ്ടി വരുമാനത്തില്‍ വന്‍ ഇടിവ്; നവംബറില്‍ മാത്രം 3000 കോടിയുടെ കുറവ്
Posted by
27 December

ജിഎസ്ടി വരുമാനത്തില്‍ വന്‍ ഇടിവ്; നവംബറില്‍ മാത്രം 3000 കോടിയുടെ കുറവ്

ന്യൂഡല്‍ഹി: ജിഎസ്ടി വരുമാനത്തില്‍ വന്‍ ഇടിവെന്ന് റിപ്പോര്‍ട്ട്. നവംബര്‍ മാസത്തിലെ ജിഎസ്ടി വരുമാനത്തിന്റെ കണക്കുകള്‍ പുറത്തുവന്നതോടെയാണ് മുന്‍ മാസത്തേക്കാള്‍ 3000 കോടിയുടെ കുറവുണ്ടായതായി കണക്കാക്കിയത്. ഒക്ടോബറില്‍ 83,000 കോടി വരുമാനമായി ലഭിച്ച സ്ഥാനത്ത് നവംബറില്‍ വരുമാനം 80,000 കോടിയായി കുറഞ്ഞു.

ഡിസംബര്‍ മാസത്തില്‍ 25-ാം തീയതി വരെ 80,808 രൂപ ജിഎസ്.ടി വരുമാനമായി ലഭിച്ചിട്ടുണ്ടെന്നും ധനകാര്യവകുപ്പിന്റെ വാര്‍ത്തക്കുറിപ്പില്‍ പറയുന്നു.

ജിഎസ്ടി നടപ്പാക്കിയ ജൂലൈ മാസത്തില്‍ വരുമാനം 95,000 കോടി രൂപയായിരുന്നു. ആഗസ്റ്റില്‍ ഇത് 91,000 കോടിയായി കുറഞ്ഞു. സെപ്തംബറില്‍ 92,150 കോടിയും ഒക്ടോബറില്‍ 83,000 കോടിയുമായി.

മൊബൈല്‍ വിപണിക്ക് പിന്നാലെ കാര്‍ വിപണിയും കൈയ്യടക്കാന്‍ ഷാവോമി? ഇന്ത്യയില്‍ ഇലക്ട്രിക് കാറുകള്‍ ഇറക്കാന്‍ നീക്കം
Posted by
26 December

മൊബൈല്‍ വിപണിക്ക് പിന്നാലെ കാര്‍ വിപണിയും കൈയ്യടക്കാന്‍ ഷാവോമി? ഇന്ത്യയില്‍ ഇലക്ട്രിക് കാറുകള്‍ ഇറക്കാന്‍ നീക്കം

ന്യൂഡല്‍ഹി: ഇന്ത്യന്‍ മൊബൈല്‍ വിപണി മൂന്നു വര്‍ഷംകൊണ്ട് കൈപ്പിടിയിലാക്കിയ ചൈനീസ് മൊബൈല്‍ കമ്പനി ഷാവോമി ഇന്ത്യന്‍ കാര്‍ വിപണിയിലേക്കും കണ്ണുനട്ടിരിക്കുകയാണെന്ന് സൂചന.

രാജ്യത്തെ മൊബൈല്‍ വിപണിയില്‍ നിന്നു കാര്യമായ നേട്ടമുണ്ടാക്കിയ ഷവോമി വാഹന വിപണിയിലേക്ക് കടക്കാനായി രജിസ്ട്രാര്‍ ഓഫ് ഇന്ത്യയ്ക്കു നല്‍കിയ വിവരങ്ങള്‍ പുറത്തു വന്നു. ഇതുപ്രകാരമാണ് ഇന്ത്യയില്‍ ഇലക്ട്രിക് വാഹന നിര്‍മാണ-വിതരണ രംഗത്തേക്കും ഷവോമി കടന്നേക്കും എന്ന സൂചനയുള്ളത്.

നിലവില്‍ ചൈനയില്‍ ഇലക്ട്രിക് ബൈക്കുകള്‍ വില്‍ക്കുന്ന കമ്പനി സമീപ ഭാവിയില്‍ കാര്‍ നിര്‍മ്മാണം ആരംഭിക്കും എന്നാണു പ്രതീക്ഷിക്കുന്നത്. ഷവോമിയുടെ ഏറ്റവും വലിയ വിപണികളിലൊന്നായ ഇന്ത്യയിലെ നിക്ഷേപം വര്‍ധിപ്പിക്കാന്‍ കൂടുതല്‍ പദ്ധതികളുണ്ടെന്നാണു കമ്പനിയില്‍ നിന്ന് ലഭിക്കുന്ന വിവരങ്ങള്‍.

സ്മാര്‍ട്ട് ഫോണുകള്‍ക്ക് 4000 രൂപ വരെ വിലക്കിഴിവ്; കിടിലന്‍ ഓഫറുമായി ഫ്‌ളിപ്പ്കാര്‍ട്ട്
Posted by
26 December

സ്മാര്‍ട്ട് ഫോണുകള്‍ക്ക് 4000 രൂപ വരെ വിലക്കിഴിവ്; കിടിലന്‍ ഓഫറുമായി ഫ്‌ളിപ്പ്കാര്‍ട്ട്

ഹോണര്‍ സ്മാര്‍ട്ട് ഫോണുകള്‍ വന്‍ വിലക്കിഴിവില്‍ ഫ്‌ളിപ്പ് കാര്‍ട്ടില്‍ നിന്നും സ്വന്തമാക്കാന്‍ സുവര്‍ണ്ണാവസരം. ഇന്ത്യന്‍ വിപണിയില്‍ ഹിറ്റായികൊണ്ടിരിക്കുന്ന സ്മാര്‍ട്ട്‌ഫോണുകള്‍ക്കാണ് ഹോണര്‍ ആകര്‍ഷണീയമായ ഡിസ്‌കൗണ്ട് ഏര്‍പ്പെടുത്തിയിരിക്കുന്നത്. ഫ്‌ലിപ്പ്കാര്‍ട്ട്. ഹോണര്‍ ഹോണര്‍ 8 പ്രോ സ്മാര്‍ട്ട്‌ഫോണുകള്‍ക്കായിരിക്കും ഓഫര്‍ ലഭ്യമാവുക.

ഹോണര്‍ 9ഐ സ്മാര്‍ട്ട്‌ഫോണിന് 2,000 രൂപയുടെ ഇളവാണ് ലഭ്യമാക്കിയിരിക്കുന്നത്. 19,999 പ്രൈസ് ടാഗില്‍ വിപണിയിലവതരിച്ച ഹോണര്‍ 9ഐ 17,999 രൂപയ്ക്ക് ലഭ്യമാക്കാം. 17,000 രൂപയുടെ എക്‌സ്‌ചേഞ്ച് ഓഫറും ഫ്‌ളിപ്പ്കാര്‍ട്ട് ലഭ്യമാക്കിയിട്ടുണ്ട്. ആക്‌സിസ് ബാങ്ക് ക്രെഡിറ്റ് കാര്‍ഡ് ഉടമകള്‍ക്ക് 5 ശതമാനം ഡിസ്‌കൗണ്ടും ലഭ്യമാകും.

അതെസമയം 4,000 രൂപ വിലക്കിഴിവിലാണ് ഹോണര്‍ 8 പ്രോ സ്മാര്‍ട്ട്‌ഫോണ്‍ ലഭ്യമാവുക. 29,999 രൂപ വിലയുള്ള ഹോണര്‍ 8 പ്രോ നിലവില്‍ 25,999 രൂപയ്ക്ക് സ്വന്തമാക്കാം. ഇതോടൊപ്പം 18,000 രൂപയുടെ എക്‌സ്‌ചേഞ്ച് ഓഫറും 1,261 രൂപയുടെ ഇഎംഐ ഓപ്ഷനും ലഭ്യമാക്കിയിട്ടുണ്ട്. ആക്‌സിസ് ബാങ്ക് ക്രെഡിറ്റ് കാര്‍ഡ് ഉടമകള്‍ക്ക് 5 ശതമാനം അധിക ഡിസ്‌കൗണ്ടും ലഭ്യമാക്കിയിട്ടുണ്ട്.

അടുത്തിടെയായിരുന്നു ഹോണര്‍ വി10 ആഗോള വിപണിയില്‍ എത്തിച്ചേര്‍ന്നത്. 2018 ജനുവരി 8 ന് ഈ സ്മാര്‍ട്ട്‌ഫോണിനെ ഇന്ത്യയില്‍ അവതരിപ്പിക്കുമെന്ന് അറിയിച്ചിരിക്കുകയാണ് കമ്പനി.

ഒടുവില്‍ ബിഎസ്എല്‍എല്‍ 4ജി വരുന്നു; ആദ്യം കേരളത്തില്‍, അടുത്ത മാസം മുതല്‍ സേവനം ലഭ്യമാകും
Posted by
25 December

ഒടുവില്‍ ബിഎസ്എല്‍എല്‍ 4ജി വരുന്നു; ആദ്യം കേരളത്തില്‍, അടുത്ത മാസം മുതല്‍ സേവനം ലഭ്യമാകും

ന്യൂഡല്‍ഹി: ഒടുവില്‍ ബിഎസ്എന്‍എല്‍ 4 ജി യാതാര്‍ത്ഥ്യമാകുന്നു. അടുത്ത മാസം മുതല്‍ കേരളത്തില്‍ 4ജി സേവനം ആരംഭിക്കുമെന്ന് പൊതുമേഖലാ സ്ഥാപനമായ ഭാരത് സഞ്ചാര്‍ നിഗം ലിമിറ്റഡ് (ബിഎസ്എന്‍എല്‍) അറിയിച്ചു. തുടര്‍ന്ന് ഒഡിഷയിലും സേവനം ആരംഭിക്കും.

എല്‍ടിഇ അടിസ്ഥാനമാക്കിയ 4ജി സേവനമാണ് ബിഎസ്എന്‍എല്‍ അവതരിപ്പിക്കുന്നത്. ഇതിലൂടെ മൊബൈല്‍ ഉപയോക്താക്കള്‍ക്ക് അതിവേഗ ഡാറ്റ സേവനവും മെച്ചപ്പെട്ട ഉപഭോകൃ അനുഭവവും ആസ്വദിക്കാന്‍ കഴിയും.

“ഞങ്ങള്‍ കേരളത്തില്‍ നിന്ന് 4 ജി ആരംഭിക്കുകയാണ്. അതായിരിക്കും ഞങ്ങളുടെ ആദ്യ 4ജി എല്‍ടിഇ സര്‍ക്കിള്‍. 3 ജി കവറേജ് കുറഞ്ഞ പ്രദേശങ്ങളിലാകും ഞങ്ങള്‍ ആദ്യ ഘട്ടത്തില്‍ ശ്രദ്ധ കേന്ദ്രീകരിക്കുക”- ബിഎസ്എന്‍എല്‍ ചെയര്‍മാനും മാനേജിംഗ് ഡയറക്ടറുമായ അനുപം ശ്രീവാസ്തവ പിടിഐയോട് പറഞ്ഞു.തുടര്‍ന്ന് നല്ല വരുമാനം ലഭിക്കുന്ന മറ്റൊരു സര്‍ക്കിളായ ഒഡിഷയിലും 4ജി സേവനം അവതരിപ്പിക്കുമെന്നും അദ്ദേഹം പറഞ്ഞു.

നിലവില്‍ 4ജി അവതരിപ്പിച്ചുകഴിഞ്ഞ സ്വകാര്യ സേവനദാതാക്കളായ ഭാരതി എയര്‍ടെല്‍, വോഡഫോണ്‍, ജിയോ എന്നിവരോടാണ് സര്‍ക്കാര്‍ ഉടമസ്ഥതയിലുള്ള ബിഎസ്എന്‍എല്‍ മത്സരിക്കുന്നത്. 4 ജി സേവനത്തിന്റെ തുടക്കത്തിന് ബിഎസ്എന്‍എല്ലിന്റെ കൈവശമുള്ള 2100 ജിഗാഹെട്സിലെ 5 മെഗാഹെട്സ് സ്പെക്‌ട്രം മതിയാകും. മറ്റൊരു സ്പെക്‌ട്രം കൂടി ബിഎസ്എന്‍എല്‍ ആവശ്യപ്പെടുന്നുണ്ട്.

അധികമായി ഒരു സ്പെക്‌ട്രം കൂടി വരുന്നതോടെ ബംഗളൂരുവിലും ഹൈദരാബാദിലും മറ്റു സ്ഥലങ്ങളിലും 4ജി സേവനം ആരംഭിക്കുമെന്നും ശ്രീവാസ്തവ കൂട്ടിച്ചേര്‍ത്തു. ബിഎസ്എന്‍എല്ലിനു ഇന്ത്യയൊട്ടാകെ (ഡല്‍ഹി, മുംബൈ സര്‍ക്കിളുകള്‍ ഒഴികെ) 10 കോടി വരിക്കാരാണ് ഉള്ളത്. 2018 മാര്‍ച്ചോടെ 10,000 4ജി ടവറുകള്‍ സ്ഥാപിക്കാനാണ് കമ്ബനി ലക്ഷ്യമിടുന്നത്.

അധിക സ്പെക്‌ട്രം ലഭിക്കുന്നതോടെ വരിക്കാരുടെ എണ്ണത്തില്‍ വര്‍ധനവുണ്ടാകുമെന്നും അദ്ദേഹം പ്രതീക്ഷ പ്രകടിപ്പിച്ചു.

4ജി സേവനം ഒരു പ്രത്യേക ബ്രാന്‍ഡായി അവതരിപ്പിക്കാനാണ് കമ്ബനി പദ്ധതിയിടുന്നതെന്നും ഇക്കാര്യം 4ജി സേവനം പുറത്തിറക്കുന്ന വേളയില്‍ പ്രഖ്യാപിക്കുമെന്നും ശ്രീവാസ്തവ വ്യക്തമാക്കി.

ഓണ്‍ലൈന്‍ പുസ്തക വ്യാപാരത്തില്‍ നിന്ന് ‘ഫ്‌ലിപ്പ്കാര്‍ട്ട് ‘ എന്ന ബിസിനസ്സ് സാമ്രാജ്യത്തിനു പിന്നില്‍ രണ്ടു ചെറുപ്പക്കാരുടെ സ്ഥിരോത്സാഹം
Posted by
25 December

ഓണ്‍ലൈന്‍ പുസ്തക വ്യാപാരത്തില്‍ നിന്ന് 'ഫ്‌ലിപ്പ്കാര്‍ട്ട് ' എന്ന ബിസിനസ്സ് സാമ്രാജ്യത്തിനു പിന്നില്‍ രണ്ടു ചെറുപ്പക്കാരുടെ സ്ഥിരോത്സാഹം

നവസംരംഭകരുടെ ഏറ്റവും വലിയ ശത്രുവാണ് കോംപ്ലസന്‍സി. ആ വാക്കിന് രണ്ടര്‍ത്ഥങ്ങളുണ്ട്, നല്ലതും ചീത്തയുമായ അര്‍ത്ഥങ്ങള്‍. ആത്മസംതൃപ്തി എന്ന അര്‍ത്ഥത്തില്‍ കോംപ്ലസന്‍സി നല്ലതു തന്നെ. എന്നാല്‍ അവനവന്‍ ചെയ്തതിനെക്കുറിച്ചുള്ള ആത്മവിശ്വാസത്തില്‍ നിന്നുണ്ടാകുന്ന അലംഭാവം എന്ന അര്‍ത്ഥത്തില്‍ അത് നല്ലതല്ല.

പണ്ടു കാലത്ത്, അതായത് കമ്പോളം ഉദാരമല്ലാത്ത, സംരംഭങ്ങള്‍ തുടങ്ങുന്നതിന് ലൈസന്‍സും പെര്‍മിറ്റും ആവശ്യമുണ്ടായിരുന്ന കാലത്ത് അതിരു കടന്ന ആത്മവിശ്വാസവും അലംഭാവവും വെച്ചുപുലര്‍ത്തിയ വ്യവസായങ്ങള്‍ ധാരാളമുണ്ടായിരുന്നു. അവരില്‍ നിന്ന് വ്യത്യസ്തമായി റിലയന്‍സോ, ടാറ്റയോ ഇന്നും പ്രൗഡിയോടെ നില്‍ക്കുന്നതിന്റെ കാരണം ഒരിക്കലും തളരാത്ത, ഒരു വിജയത്തോടെയും വിശ്രമിക്കാത്ത, ക്രിയാത്മകതയായിരിക്കും.

സച്ചിന്‍ ബന്‍സലും, ബിന്നി ബന്‍സലും ബന്ധുക്കളല്ലെങ്കിലും രണ്ടാം പേരിലെ സമാനത പോലെ ഇരുവരെയും കൂട്ടിയിണക്കിയ നിരവധി ഘടകങ്ങളുണ്ടായിരുന്നു. അതിലൊന്ന് ഇരുവരും സാഹസികത ഇഷ്ടപ്പെടുന്നവരും പരിശ്രമശാലികളും ആയിരുന്നു എന്നതാണ്. പുതുമയും ക്രിയാത്മകതയും കാംക്ഷിക്കുന്ന ഈ ചെറുപ്പക്കാര്‍ ഡെല്‍ഹി ഇന്ത്യന്‍ ഇന്‍സ്റ്റിറ്റിയൂട് ഓഫ് ടെക്‌നോളജിയില്‍ സഹപാഠികളായത് നിയോഗമായിരിക്കാം.

ഐ.ഐ.ടി യില്‍ നിന്ന് പഠിച്ചിറങ്ങുന്നവരുടെ സ്വപ്നം സുരക്ഷിതമായ ജോലിയാണ്. പ്രത്യേകിച്ചും ഇന്ത്യയിലെ മികവിന്റെ കേന്ദ്രത്തില്‍ നിന്ന് പഠിച്ചിറങ്ങുന്നവരെ സ്വീകരിക്കാന്‍ രണ്ടു കൈയ്യും നീട്ടി കമ്പനികള്‍ അണിനിരക്കുമ്പോള്‍ റിസ്‌കുള്ള ഇടപാടുകള്‍ക്ക് ചെറുപ്പക്കാര്‍ സന്നദ്ധരാകുകയില്ല. ബന്‍സലുമാരെ കാത്തും സുരക്ഷിതമായ തൊഴിലുണ്ടായിരുന്നു ആമസോണ്‍ എന്ന ആഗോള സാങ്കേതിക വിപണനകേന്ദ്രത്തില്‍. എന്നാല്‍ യൂറോഅമേരിക്കന്‍ പ്രദേശം കേന്ദ്രമായ ആമസോണിനെപ്പോലെ ഇന്ത്യയില്‍ മികച്ചൊരു സംരംഭവുമായി രണ്ടു പേരും പിറന്ന നാട്ടിലെത്തി. അതാണ് ഫ്‌ലിപ്കാര്‍ട്ടിന്റെ കഥ.

ഇന്ത്യയില്‍ ഓണ്‍ലൈനായി പുസ്തകം വിറ്റുകൊണ്ട് ആരംഭിച്ച ഫ്‌ലിപ്കാര്‍ട് ഇലക്ട്രോണിക്, ഡിജിറ്റല്‍ ഉത്പന്നങ്ങളിലേക്കും സേവനങ്ങളിലേക്കും വഴിമാറി. 33,000 ആളുകള്‍ തൊഴില്‍ ചെയ്യുന്ന നവപ്രവര്‍ത്തന സംരംഭം എന്ന നിലക്ക് ഫ്‌ലിപ്കാര്‍ട്ടിന്റെ നാള്‍വഴിയില്‍ നിരവധി വഴിത്തിരിവുകളുണ്ടായിരുന്നു. ഐ.ടൂണ്‍സിന് സമാന്തരമായ ഫ്‌ലറ്റ് മൂസിക് ഡൗണ്‍ലോഡ് സേവനം. വിലക്കുറവ് കൊണ്ട് പുസ്തകവായനക്കാരെയും ഡിജിറ്റല്‍ ഉപഭോക്താക്കളെയും വിസ്മയിപ്പിച്ചത്, ഇന്ത്യയിലെ രണ്ടാമത്തെ തന്നെ ബിഗ് ബില്യണ്‍ വിപണനം നടത്തിയത് (മൊത്തം വിപണനവസ്തുക്കളുടെ എണ്ണത്തില്‍ 300 ബില്യണ്‍ ക്രോസ് ചെയ്തത്. അങ്ങിനെയങ്ങിനെ.

ഫ്‌ലിപ്കാര്‍ട് ഇന്ന് വലിയൊരു വെല്ലുവിളിയെ അഭിമുഖീകരിക്കുകയാണ്. തങ്ങളുടെ തൊഴില്‍ ദാതാക്കളായ ആമസോണ്‍ സച്ചിന്റെയും ബിന്നിയുടെയും സംരംഭത്തെ അപ്രസക്തമാക്കിയിരിക്കുന്നു. പക്ഷെ ഫ്‌ലിപ്കാര്‍ട് ഒരു സംരംഭത്തിന്റെ പേരായിരുന്നില്ല. രണ്ട് ചെറുപ്പക്കാരുടെ സ്ഥിരോത്സാഹത്തിന്റെയും സമര്‍പ്പണത്തിന്റെയും പേരാണ്. അതു കൊണ്ടാണ് നാം ഫ്‌ലിപ്കാര്‍ടിനെ എഴുതിത്തള്ളാത്തത്. അത്തരമൊരു സ്ഥിരോത്സാഹമാണ് നവപ്രവര്‍ത്തകര്‍ക്ക് ആവശ്യമായിട്ടുള്ളത്.

2ജിബി ഡാറ്റ ദിനവും; ഹാപ്പി ന്യൂയര്‍ പ്ലാനുമായി ജിയോയും എത്തി; ടെലികോം കമ്പനികളുടെ ഓഫര്‍ പെരുമഴയില്‍ അമ്പരന്ന് ഉപയോക്താക്കള്‍
Posted by
23 December

2ജിബി ഡാറ്റ ദിനവും; ഹാപ്പി ന്യൂയര്‍ പ്ലാനുമായി ജിയോയും എത്തി; ടെലികോം കമ്പനികളുടെ ഓഫര്‍ പെരുമഴയില്‍ അമ്പരന്ന് ഉപയോക്താക്കള്‍

ഉപയോക്താക്കള്‍ക്ക് ഇത് സന്തോഷത്തിന്റെ ഉത്സവകാലമാണ്. ക്രിസ്മസ്-ന്യൂയര്‍ ആഘോഷങ്ങള്‍ക്ക് നിറം നല്‍കാന്‍ ഓഫര്‍ പെരുമഴയാണ് സ്വകാര്യ ടെലികോം കമ്പനികള്‍ ഒരുക്കിയിരിക്കുന്നത്. കുറഞ്ഞ നിരക്കില്‍ കൂടുതല്‍ ഡേറ്റയും സൗജന്യ കോളുകളുമാണ് ഇത്തവണത്തേയും ഓഫറുകള്‍. ജിയോ കൂടി ഇതിനിടയില്‍ പുതിയ പ്ലാനുമായി എത്തിയതോടെ രംഗത്ത് മത്സരം കടുത്തിരിക്കുകയാണ്. ജിയോ ഹാപ്പി ന്യൂയര്‍ പ്ലാന്‍ 2018 എന്നപേരിലാണ് പുതിയ ഓഫര്‍.

199 രൂപയ്ക്ക് പ്രതിദിനം 1.2 ജിബി ഡാറ്റ ഉപയോഗിക്കാവുന്നതാണ് പ്ലാന്‍. 28 ദിവസമാണ് കാലാവധി. ഇതോടൊപ്പം പരിധിയില്ലാതെ കോള്‍, എസ്എംഎസ് സൗകര്യവും ജിയോ നല്‍കുന്നു. 299 രൂപ നിരക്കിലുള്ള മറ്റൊരു പ്ലാനില്‍ ചേരുന്നവര്‍ക്ക് പ്രതിദിനം 2ജിബി വീതം ഉപയോഗിക്കാം. 28 ദിവസംതന്നെയാണ് ഇതിന്റെയും കാലാവധി. കൂടുതല്‍ ഡാറ്റ ഉപയോഗിക്കുന്നവരെയും പുതിയ വരിക്കാരെയും ലക്ഷ്യമിട്ടാണ് പുതിയ ഓഫര്‍. നിലവിവിലുള്ള പ്രൈം വരിക്കാര്‍ക്കും പുതിയതായി ചേരുന്നവര്‍ക്കുമാണ് പ്ലാന്‍ ലഭ്യമാകുക.

ഭാരതി എയര്‍ടെല്‍, ഐഡിയ, വൊഡാഫോണ്‍ എന്നീ കമ്പനികളും 199 രൂപയുടെ പ്ലാന്‍ നല്‍കി വരുന്നുണ്ട്. പ്രതിദിനം ഒരു ജിബിയാണ് ഈ പ്ലാന്‍ പ്രകാരം ലഭിക്കുക. മാസം നാല് ജിബി ഡാറ്റ ഉപയോഗിക്കാന്‍ കഴിയുന്ന 149 രൂപയുടെ പ്ലാനാണ് നിലവില്‍ ജിയോയുടെ ഏറ്റവും കുറഞ്ഞനിരക്കിലുള്ള പ്ലാന്‍.

യുഎസ് നികുതി പരിഷ്‌കാരം തുണച്ചത് ഇന്ത്യയെ; ഓഹരി വിപണിയില്‍ ചരിത്ര നേട്ടം
Posted by
22 December

യുഎസ് നികുതി പരിഷ്‌കാരം തുണച്ചത് ഇന്ത്യയെ; ഓഹരി വിപണിയില്‍ ചരിത്ര നേട്ടം

മുംബൈ: ഇന്ത്യന്‍ ഓഹരി വിപണിയില്‍ ചരിത്ര നേട്ടം. ദേശീയ സൂചിക നിഫ്റ്റി പുതിയ റെക്കോര്‍ഡിലേക്ക് ഉയര്‍ന്ന് ചരിത്രം സൃഷ്ടിക്കുകയായിരുന്നു. നിഫ്റ്റി 52.70 പോയിന്റ് ഉയര്‍ന്ന് 10,493ല്‍ വ്യാപാരം അവസാനിപ്പിച്ചു. വെള്ളിയാഴ്ച വ്യാപാരത്തിനിടെ നിഫ്റ്റി 10,500 പോയിന്റില്‍ എത്തുകയായിരുന്നു. ബോംബെ സൂചിക സെന്‍സെക്‌സ് 184.02 പോയിന്റ് ഉയര്‍ന്ന് 33,940ലാണ് വ്യാപാരം അവസാനിപ്പിച്ചത്.

അമേരിക്കയുടെ സാമ്പത്തിക സ്ഥിതി സംബന്ധിച്ച മികച്ച റിപ്പോര്‍ട്ട്, യുഎസിലെ നികുതി പരിഷ്‌കാരം എന്നിവ ആഗോളവിപണികളെ സ്വാധീനിച്ചിരുന്നു. ഇതിെന്റ പ്രതിഫലനം ഇന്ത്യന്‍ വിപണിയിലും ഏഷ്യന്‍ വിപണിയിലും ഉണ്ടായി. ഗുജറാത്ത് തെരഞ്ഞെടുപ്പില്‍ ബിജെപിയുടെ വിജയവും വിപണിക്ക് നിര്‍ണായകമായി.

ഒഎന്‍ജിസി, ടിസിഎസ്, ബജാജ് ഫിനാന്‍സ്, ഹിന്‍ഡാല്‍കോ, ഇന്‍ഫോസിസ് എന്നീ ഓഹരികളെല്ലാം നേട്ടം രേഖപ്പെടുത്തി. ഇവയുടെ വില 1.7 മുതല്‍ 2.9 ശതമാനം വരെ ഉയര്‍ന്നു. അമേരിക്കയില്‍ പുറംജോലി കരാറുമായി ബന്ധപ്പെട്ട് പ്രവര്‍ത്തിക്കുന്ന അസെഞ്ച്വര്‍ എന്ന കമ്പനിക്ക് ഭാവിയില്‍ നേട്ടമുണ്ടാകുമെന്ന പ്രവചനവും ഐടി ഓഹരികളുടെ വില ഉയരുന്നതിന് കാരണമായി. കോള്‍ ഇന്ത്യ, ടാറ്റ സ്റ്റീല്‍, അള്‍ട്രാടെക് എന്നിവയാണ് നഷ്ടം രേഖപ്പെടുത്തിയ പ്രധാന ഓഹരികള്‍.

ഫൈസല്‍ കോട്ടിക്കോളന്‍: അഥവാ ഒരു വടക്കന്‍ വീരഗാഥ
Posted by
19 December

ഫൈസല്‍ കോട്ടിക്കോളന്‍: അഥവാ ഒരു വടക്കന്‍ വീരഗാഥ

നവസംരംഭകര്‍ എല്ലാവരും തങ്ങളുടെ ബിസിനസ് പൂജ്യത്തില്‍ നിന്ന് കെട്ടിപ്പൊക്കിയവരല്ല. ചിലര്‍ കുടുംബ ബിസിനസുകള്‍ ഏറ്റെടുത്തു കൊണ്ട് അതിന് പുതിയ ദിശയും അര്‍ത്ഥവും നല്‍കിയവരാണ്. അതായത് പരമ്പരാഗതമായി കൈമാറിവന്ന കച്ചവടത്തെ പുതിയ കാലത്തിന്റെയും ലോകത്തിന്റെയും കളിനിയമങ്ങള്‍ക്കനണസരിച്ച് മാറ്റിമറിച്ചവര്‍. അങ്ങിനെയൊരാളെപ്പറ്റിയാണ് ഈ പംക്തിയിലൂടെ നാം സംസാരിക്കുന്നത്. അതായത് ഫൈസല്‍ കോട്ടിക്കോളന്‍ എന്ന കോഴിക്കോട്ടുകാരന്‍ എമിറേറ്റ്‌സില്‍ കാഴ്ചവെച്ച മികവിനെപ്പറ്റി.

പി.കെ സ്റ്റീല്‍സിന്റെ പി.കെ അഹ്മദ്, തന്റെ മകന്‍ ഫൈസലില്‍ മണിപ്പാലില്‍ എന്‍ജിനീയറിംഗിന് പഠിക്കുമ്പോഴോ പിന്നീട് അമേരിക്കയില്‍ നിന്ന് ഉപരിപഠനം സമ്പാദിക്കുമ്പോഴോ താന്‍ തുടങ്ങിവെച്ച കുടുംബ ബിസിനസിന് ഒരു വലിയ വഴിത്തിരവായി മാറുമെന്ന് പ്രതീക്ഷിച്ചിരുന്നില്ല. എന്നാല്‍ ഫൈസല്‍ ദുബായിയില്‍ സ്‌ക്രാപ് മെറ്റലിന്റെ ബിസിനസ് 1995ല്‍ തുടങ്ങുമ്പോള്‍, കടുത്ത മത്സരമില്ലാത്ത കേരളത്തിന്റെ സുരക്ഷിതത്വമല്ല, വെല്ലുവിളികളുടെ ഒരന്തരീക്ഷമാണ് തന്റെ നിയോഗമെന്ന് തിരിച്ചറിയുകയായിരുന്നു.

ഈ വെല്ലുവിളികള്‍ ഏറ്റെടുക്കാനും അതില്‍ വിജയിക്കാനുമുള്ള സന്നദ്ധതയാണ് 2008ല്‍ ഷാര്‍ജയിലെ ഹംറിയ ഫ്രീ സോണില്‍ സ്റ്റീല്‍ കാസ്റ്റിംഗുകളും വാല്‍വുകളും നിര്‍മിക്കുന്ന അതിനൂതനമായ സ്ഥാപനം തുടങ്ങിയ സന്ദര്‍ഭത്തില്‍ വിജയത്തിന്റെ അടയാളമായി പ്രകടമായത്. ബില്യണ്‍ കോടി ഡോളറുകള്‍ ആസ്ഥിയുള്ള കെ.ഇ.എഫ് ഹോള്‍ഡിംഗ്‌സിന്റെ സിഇഒ ആണ് ഫൈസല്‍ ഇന്ന്. മിഡില്‍ ഈസ്റ്റില്‍ സ്റ്റീല്‍ വാല്‍വുകളുടെ ആദ്യത്തെ ഇന്റഗ്രേറ്റഡ് ഉത്പാദകനാണ് ഫൈസല്‍.

മധേഷ്യയിലെ പാചകവാതകഎണ്ണ കമ്പനികള്‍ക്കാവശ്യമായ ഇന്റസ്ട്രിയല്‍ വാല്‍വുകളാണ് കെ.ഇ.എഫ് നിര്‍മിച്ച് നല്‍കുന്നത്. 50000 ചതുരശ്രമീറ്ററിലാണ് കെ.ഇ.എഫ് വ്യാപിച്ച് നില്‍ക്കുന്നത്. തക്‌റീര്‍, ENOC, ഖത്തര്‍ പെട്രോളിയം, KOC, PDO, Qatar Gas, Tyco തുടങ്ങിയ ഭീമന്‍മാരാണ് ഫൈസലിന്റെ ക്ലയന്റുകള്‍.

കെ.ഇ.എഫിന്റെ ചരിത്രത്തിലെ ഒരു വഴിത്തിരിവായിരുന്നു 2008 വര്‍ഷാവസാനം ദുബായ് ഇന്റര്‍നാഷണല്‍ ക്യാപിറ്റല്‍ ഹോള്‍ഡിംഗ്‌സിന്റെ 45 ശതമാനം ഓഹരികളും വാങ്ങിയത്. അത് ബിസിനസ് വിപുലീകരണത്തിന് വഴിതുറന്നു. ഫിനാന്‍സ് കമ്പോളത്തില്‍ വലിയ മതിപ്പാണ് കെ.ഇ.എഫിന്റെ സ്‌റ്റേക്കുകള്‍ക്കുള്ളത്.

ഫൈസലിന്റെ വിജയം മുന്നോട്ട് വെക്കുന്ന പാഠം, അസംതൃപ്തി അഥവാ മതിയായ്ക ബിസിനസിന്റെ വികാസത്തിന് വഴിതുറന്നിടും എന്നുള്ളതാണ്. നിലവിലെ വിജയത്തില്‍ സംതൃപ്തരായി കുടുംബ ബിസിനസുമായി മുന്നോട്ട പോകുക എന്നതിനപ്പുറം ഭാവി മുന്‍കുട്ടി കണ്ടുള്ള ചുവടുവെപ്പാണ് നവസംരംഭകര്‍ക്കു വേണ്ടത്. ഫൈസലിന്റെ വളര്‍ച്ചയോടൊപ്പം വളര്‍ന്നത് കെ.ഇ.എഫും പികെ സ്റ്റീലും മാത്രമല്ല. നടക്കാവ് ഗവണ്‍മെന്റ് സ്‌കൂള്‍ കൂടിയാണ്. കോര്‍പറേറ്റ് സാമൂഹിക ഉത്തരവാദിത്വത്തിന്റെ ചരിത്രത്തില്‍ പുതിയ അദ്ധ്യായം എഴുതിച്ചേര്‍ത്ത ആ കഥ പിന്നൊരിക്കല്‍ പറയാം.

Article by Shahir Esmail

error: This Content is already Published.!!