ഇന്‍ഫോസിസ് പ്രസിഡന്റ് സ്ഥാനത്ത് നിന്നും രാജേഷ് മൂര്‍ത്തി രാജി വെച്ചു
Posted by
13 January

ഇന്‍ഫോസിസ് പ്രസിഡന്റ് സ്ഥാനത്ത് നിന്നും രാജേഷ് മൂര്‍ത്തി രാജി വെച്ചു

ന്യൂഡല്‍ഹി: രാജ്യത്തെ പ്രമുഖ ഐടി കമ്പനി ഇന്‍ഫോസിസിന്റെ പ്രസിഡന്റ് സ്ഥാനത്തു നിന്നും രാജേഷ് മൂര്‍ത്തി രാജി പ്രഖ്യാപിച്ചു. മൂന്നു പ്രസിഡന്റുമാരില്‍ ഒരാളാണ് രാജേഷ് മൂര്‍ത്തി. വ്യക്തിപരമായ കാരണങ്ങളാലാണ് രാജി. ജനുവരി 31 നായിരിക്കും അദ്ദേഹം സേവനം അവസാനിപ്പിക്കുക. ഇന്‍ഫോസിസ് സിഇഒ ആയി സലീല്‍ പരോഖ് ചുമതലയേറ്റ ശേഷം നടക്കുന്ന ആദ്യ രാജിയാണിത്.

1990ല്‍ അന്നത്തെ ചെയര്‍മാനായിരുന്ന നന്ദന്‍ നിലേകനിയാണ് മൂര്‍ത്തിയെ ഇന്‍ഫോസിസില്‍ എടുത്തത്. 2016ല്‍ ആണ് അദ്ദേഹം പ്രസിഡന്റ് പദവിയില്‍ എത്തിയത്. ഇന്‍ഫോസിസിന്റെ യൂറോപ്യന്‍ ബിസിനസുകള്‍ നിയന്ത്രിച്ചിരുന്നത് മൂര്‍ത്തിയായിരുന്നു. നിലവില്‍ പാരീസില്‍ ആയിരിക്കുന്ന മൂര്‍ത്തിക്ക് വ്യക്തിപരമായ കാരണങ്ങളാല്‍ ഇന്‍ഫോസിസ് ആസ്ഥാനത്തെ ദൈന്യംദിന പ്രവര്‍ത്തനങ്ങളില്‍ ശ്രദ്ധകേന്ദ്രീകരിക്കാന്‍ കഴിയാത്തതിനാലാണ് രാജിയെന്ന് നിലേകനി പറഞ്ഞു.

മൂര്‍ത്തിക്ക് പകരം ആരാണ് പ്രസിഡന്റ് പദവിയില്‍ എത്തുക എന്ന് വ്യക്തമല്ല. തത്ക്കാലം സിഇഒ സലീല്‍ പരേഖ് തന്നെ പദവി വഹിക്കുമെന്ന് ഇന്‍ഫോസിസ് ഇന്നലെ പുറത്തിറക്കിയ പത്രക്കുറിപ്പില്‍ പറയുന്നു.

ബിസിനസില്‍ പ്രാഞ്ചിയേട്ടന്‍മാര്‍ ബാദ്ധ്യതയാകാതിരിക്കുവാന്‍ ശ്രദ്ധിക്കേണ്ടത്
Posted by
12 January

ബിസിനസില്‍ പ്രാഞ്ചിയേട്ടന്‍മാര്‍ ബാദ്ധ്യതയാകാതിരിക്കുവാന്‍ ശ്രദ്ധിക്കേണ്ടത്

പ്രാഞ്ചിയേട്ടന്‍മാരെ ആശ്രയിച്ചാണ് പല സ്റ്റാര്‍ട്അപ് ബിസിനസുകളും നിലനില്‍ക്കുന്നത്. മമ്മൂട്ടി അഭിനയിച്ച സിനിമ ഓര്‍മയില്ലേ. തന്റെ പേരും പെരുമയും കൂട്ടാന്‍ വളരെ ഉദാരമായി പണം ചിലവഴിക്കുന്ന സഹൃദനായ സമ്പന്നന്‍. അവരെ പുതിയ കമ്പോളത്തില്‍ വിളിക്കുന്ന പേര്‍ മാലാഖ നിക്ഷേപകര്‍ എന്നാണ്. അഥവാ Angel Investors. അവരുടെ നിക്ഷേപത്തെ ഏയ്ഞ്ജല്‍ ഇന്‍വസ്റ്റ്‌മെന്റ് എന്നും പറയുന്നു. പുറം നിക്ഷേപങ്ങളില്ലാത്തവര്‍ക്കും, വായ്പയ്ക്ക് പ്രയാസം നേരിടുകയും, വായപയെടുക്കാന്‍ ആശങ്കപ്പെടുകയും ചെയ്യുന്നവര്‍ക്കും Angel Investment അനിവാര്യമാണ്. പ്രത്യേകിച്ചും ഉയര്‍ന്ന വരുമാനവും സേവിംഗ്‌സുമുള്ള വിദേശികള്‍, നല്ല റിട്ടേണ്‍സ് ലഭിക്കുന്ന ബിസിനസുകാര്‍, ഉയര്‍ന്ന ശമ്പളം വാങ്ങുന്ന ഡോക്ടര്‍മാര്‍ തുടങ്ങിയവര്‍ പുതിയ വിപണിയുടെയും സാമ്പത്തിക മേഖലകളുടെയും ചലനങ്ങളറിയാനും അതിന്റെ ഭാഗമാകാനും ഇപ്രകാരം മുതല്‍മുടക്കാറുണ്ട്. ഉദാരമായ സഹായം, പ്രണയം, ഭാവിയുലെ ബിസിനസ് സാദ്ധ്യതയോക്കുറിച്ചുള്ള സന്ദേഹം, തുടങ്ങി സാഹസികതയോടും റിസ്‌കിനോടുമുള്ള ഇഷ്ടം എന്നിങ്ങനെ പലതരം പ്രേരണകളാണ് മാലാഖ നിക്ഷേപങ്ങള്‍ക്കു പിന്നിലുള്ളത്.

അമേരിക്കയിലെ നാടകകലയുടെ ഹബ്ബായ ബ്രോഡ്വേ തീയറ്ററില്‍ നാടകങ്ങള്‍ക്കു വേണ്ടി പണം ചിലവഴിക്കുന്നവരെ ‘മാലാഖമാര്‍’ എന്നാണ് വിളിച്ചിരുന്നത്. ചിത്രകലയെയും മറ്റും പ്രോത്സാഹിപ്പിച്ചിരുന്നവരെ രക്ഷാധികാരികള്‍ (patrons) എന്ന് വിളിച്ചതു പോലെ. 1980കളില്‍ അമേരിക്കയില്‍ മുളച്ചു പൊങ്ങിയ പല വ്യവസായങ്ങള്‍ക്കും പണമിറക്കിയവരെ മാലാഖമാര്‍ എന്ന് വിളിക്കപ്പെട്ടു. സ്റ്റീവ് ജോബ്‌സും, വോസ്‌നികും ചേര്‍ന്ന് വികസിപ്പിച്ച ആപ്പിള്‍ രണ്ട് പേഴ്‌സണല്‍ കംപ്യൂട്ടറിന് പണമിറക്കിയ മൈക് മറക്കുളയെ മറന്ന് കളയരുത്.

തലമുടി ചീകാത്ത മോശം വസ്ത്രധാരിയായ സ്റ്റീവ് ജോബ്‌സും കൂടെയുള്ള ഒരു കുറുക്കനും കണ്ടെത്തിയ ഉപകരണത്തിന് നിക്ഷേപമിറക്കാന്‍ പലരും വിമുഖത കാണിച്ചു. സാങ്കേതികവിദ്യാ ബിസിനസ് രംഗത്ത് പണമിറക്കി വിജയിച്ച പ്രഗത്ഭരായ റെജിസ് മക്കന്ന, ഡോണ്‍ വാലന്റെയിന്‍ എന്നിവരാണ് അവരെ ഒന്ന് ഒഴിവാക്കാനായി മറക്കുളയുടെ അടുക്കലേക്ക് പറഞ്ഞയക്കുന്നത്. ചെരുപ്പിടാത്ത, തല ചീകാത്ത സ്റ്റീവിനെയല്ല, അയാളുടെ എനര്‍ജിയും ആത്മവിശ്വാസവുമാണ് മറക്കുളയെ ആകര്‍ഷിച്ചത്. ഒരു പുതിയ സാങ്കേതിക ഉപകരണത്തെ, സാങ്കേതിക ഉപകരണങ്ങളുടെ നിര്‍മാതാക്കള്‍ക്കിടിയില്‍ അഗ്രഗണ്യരാക്കി ഉയര്‍ത്തുന്നതിന് പിന്നില്‍ മറക്കുള ഇറക്കിയ പണം മാത്രമല്ല ഉള്ളത്. ഒരു ബിസിനസ് സംരംഭമായി ആപ്പിളിനെ പരിവര്‍ത്തിപ്പിച്ച ദിശോബോധവും, ബിസിനസ് സംഘാടനവും, കൂടുതല്‍ നിക്ഷേപങ്ങളും മറക്കുളയുടെ സംഭാവനയായിരുന്നു.

ചില പ്രാഞ്ചിയേട്ടന്‍മാര്‍ ഒരു കാലത്ത് ഇങ്ങനെ പറയും ‘അവന്‍ തേരാപ്പാര നടന്ന കാലത്ത്, ഞാനാ അവന് കാശു കൊടുത്തത്. എന്നിട്ടത് നശിപ്പിച്ചു. അവനൊന്നും ഒരു ഗുണോം ഒരു കാലത്തും ഉണ്ടാവൂല.’

വളരെ റിസ്‌കേറിയ ബിസിനസ് നവപ്രവര്‍ത്തനങ്ങളുടെ കാലത്ത് ഇത്തരം വര്‍ത്തമാനങ്ങള്‍ സര്‍വസാധാരണമാണ്. ഒരു പക്ഷെ കുറഞ്ഞ ഒരു നിക്ഷേപത്തിന്റെ പുറത്തും ആത്മവീര്യം കെടുത്തുന്ന ഇത്തരം നെടുങ്കന്‍ പ്രസ്താവനകള്‍ ഉണ്ടാകാതിരിക്കാന്‍ പുതിയ സംരംഭകര്‍ ശ്രദ്ധിക്കേണ്ടത് ഒന്നാമതായി ഒരു കാര്യമാണ്.

പണം മാത്രം നല്‍കുന്നവരെ നിക്ഷേപകര്‍ ആക്കാതിരിക്കുക. മറക്കുളയെപ്പോലെ ബിസിനസ് സംഘാടനത്തിന്റെ ടെക്‌നികുകള്‍ അറിയാവുന്നവരോ, ദിശാബോധമുള്ളവരോ ആയിരിക്കണം അവര്‍. നമ്മുടെ കാഴ്ചപ്പാടുകള്‍ പൂര്‍ണ്ണമായി മനസ്സിലാക്കുകയും, റിസ്‌കിനെ ഇഷ്ടപ്പെടുകയും, നമ്മുടെ ഭാവിയെക്കുറിച്ച് അന്തര്‍ജ്ഞാനമുള്ളവരുമായിരിക്കണം അവര്‍. അല്ലാത്തവര്‍ പണം തരുമായിരിക്കും. പണം വേണം എന്നതല്ല പ്രാമുഖ്യം, ബിസിനസ് വളര്‍ച്ചയുടെ നിക്ഷേപമാണ് വേണ്ടത്. അതില്ലാത്ത പണം ബാദ്ധ്യതയാണ്.

Article by Shahir Esmail

സംഭരിക്കാന്‍ ഇടമില്ല; രാജ്യം അടിയന്തരമായി നാണയ നിര്‍മ്മാണം നിര്‍ത്തി വെച്ചു
Posted by
10 January

സംഭരിക്കാന്‍ ഇടമില്ല; രാജ്യം അടിയന്തരമായി നാണയ നിര്‍മ്മാണം നിര്‍ത്തി വെച്ചു

ന്യൂഡല്‍ഹി: നാണയം ശേഖരിച്ചു വയ്ക്കുന്ന സംഭരണശാല നിറഞ്ഞതിനാല്‍ നാണയ നിര്‍മ്മാണം നിര്‍ത്തിവെക്കാന്‍ സര്‍ക്കാര്‍ തീരുമാനിച്ചു. സംഭരണ ശേഷി കവിഞ്ഞതിനെതുടര്‍ന്നാണ് അടിയന്തരമായി നാണയ നിര്‍മ്മാണം നിര്‍ത്താന്‍ നിര്‍ദേശം നല്‍കിയതെന്ന് സര്‍ക്കാര്‍ വൃത്തങ്ങള്‍ വ്യക്തമാക്കി.

നാണയം മിന്റ് ചെയ്യുന്ന കൊല്‍ക്കത്ത, ഹൈദരാബാദ്, നോയ്ഡ, മുംബൈ എന്നീ നാലു സ്ഥലങ്ങളിലെയും യൂണിറ്റുകളുടെ ജനറല്‍ മാനേജര്‍മാര്‍ക്ക് ജനുവരി എട്ടിന് നിര്‍മാണം നിര്‍ത്തിവെയ്ക്കാന്‍ സര്‍ക്കാര്‍ നിര്‍ദേശം നല്‍കി. സര്‍ക്കാരിന്റെ നേതൃത്വത്തിലാണ് മിന്റ് ചെയ്യുന്നതെങ്കിലും ആര്‍ബിഐയാണ് വിതരണത്തിന് നേതൃത്വം നല്‍കുന്നത്. സര്‍ക്കാരിനുവേണ്ടി മിന്റിങ് കേന്ദ്രങ്ങളിലെ ജനറല്‍ മാനേജര്‍മാരാണ് കാലാകാലങ്ങളിലായി ഇത് നിര്‍വഹിച്ചുവരുന്നത്.

500 മില്യണ്‍ നാണയങ്ങളാണ് സര്‍ക്കാരിന്റെ സൂക്ഷിപ്പ് കേന്ദ്രങ്ങളില്‍ ഇപ്പോഴുള്ളത്. നിര്‍മാണം നിര്‍ത്തിയത് ക്ഷാമത്തിന് ഇടയാകില്ലെന്ന് സര്‍ക്കാര്‍ വ്യക്തമാക്കി. നിലവില്‍ സംഭരണശാലകള്‍ നിറഞ്ഞതുകൊണ്ടു മാത്രമാണ് നിര്‍മ്മാണം നിര്‍ത്തുന്നതെന്നുമാണ് വിശദീകരണം.

എസ്ബിഐക്ക് എട്ടിന്റെ പണി; മിനിമം ബാലന്‍സില്ലെന്ന് പറഞ്ഞ് സീറോ ബാലന്‍സ് അക്കൗണ്ടില്‍ നിന്നും 885 രൂപ പിഴയീടാക്കി; പലിശയും നഷ്ടപരിഹാരവും സഹിതം പണം ഉപഭോക്താവിന് തിരിച്ചു നല്‍കണമെന്ന് ഓംബുഡ്‌സ്മാന്‍
Posted by
10 January

എസ്ബിഐക്ക് എട്ടിന്റെ പണി; മിനിമം ബാലന്‍സില്ലെന്ന് പറഞ്ഞ് സീറോ ബാലന്‍സ് അക്കൗണ്ടില്‍ നിന്നും 885 രൂപ പിഴയീടാക്കി; പലിശയും നഷ്ടപരിഹാരവും സഹിതം പണം ഉപഭോക്താവിന് തിരിച്ചു നല്‍കണമെന്ന് ഓംബുഡ്‌സ്മാന്‍

കൊച്ചി: സാധാരണക്കാരായ ഉപയോക്താക്കളെ പിഴിഞ്ഞ് കൊള്ളലാഭം കൊയ്യുന്ന എസ്ബിഐക്ക് ബാങ്കിംഗ് ഓംബുഡ്‌സ്മാന്റെ വക എട്ടിന്റെ പണി. മിനിമം ബാലന്‍സില്ലെന്ന് കാണിച്ച് ഉപഭോക്താവിന്റെ അക്കൗണ്ടില്‍ നിന്ന് പിഴയീടാക്കിയ എസ്ബിഐയോട് പിഴത്തുകയും പലിശയും നഷ്ടപരിഹാരവും ചേര്‍ത്ത് ഉപഭോക്താവിന് തിരിച്ച് നല്‍കണമെന്ന് ബാങ്കിംഗ് ഓംബുഡ്സ്മാന്‍ ഉത്തരവിടുകയായിരുന്നു. വെഞ്ഞാറമൂട്ടിലെ പൂരം ടെക്സ്റ്റയില്‍സ് ഉടമ ഷാജഹാന്റെ അക്കൗണ്ടില്‍ നിന്നും പിന്‍വലിച്ച തുക പിഴ സഹിതം തിരിച്ചടക്കാനാണ് ഓംബുഡ്സ്മാന്‍ ഉത്തരവിട്ടത്.

ഷാജഹാന്‍ നല്‍കിയ പരാതിയുടെ അടിസ്ഥാനത്തിലാണ് നടപടിയുണ്ടായത്. ഇദ്ദേഹത്തിന്റെ സ്ഥാപനത്തിന്റെ പേരില്‍ ബാങ്കിലുള്ള സീറോ ബാലന്‍സ് കറന്റ് അക്കൗണ്ടില്‍ നിന്നും 10,000 രൂപ മിനിമം ബാലന്‍സില്ലാത്ത കാരണം കാട്ടി 885 രൂപ പിന്‍വലിച്ചിരുന്നു.

ഗ്രാമീണ മേഖലയില്‍ പ്രവര്‍ത്തിക്കുന്ന ബാങ്കുകളില്‍ മിനിമം ബാലന്‍സ് 5,000 രൂപയാണെന്ന് നിജപ്പെടുത്തിയിരിക്കെ 5,694 രൂപ ബാങ്കിലുണ്ടായിരുന്നിട്ടും അക്കൗണ്ടില്‍ നിന്നും പണം പിന്‍വലിച്ചത് ചോദ്യം ചെയ്ത് ഷാജഹാന്‍ ഓംബുഡ്സ്മാനില്‍ പരാതി നല്‍കുകയായിരുന്നു. തുടര്‍ന്ന് നഷ്ടപരിഹാരമായി 2,000 രൂപയും മറ്റിനത്തില്‍ പിന്‍വലിച്ചതും പിഴയും ചേര്‍ത്ത് 3,711 രൂപ കടയുടമയുടെ അക്കൗണ്ടില്‍ നിക്ഷേപിക്കാന്‍ ഉത്തരവിടുകയായിരുന്നു. ഷാജഹാന്റെ അക്കൗണ്ടില്‍ കൂടുതല്‍ ഇടപാടുകള്‍ നടത്തുന്നെന്ന് ആരോപിച്ചാണ് പിഴ ഈടാക്കിയത്. പിഴ ഈടാക്കിയതിനെതിരെ ബാങ്കില്‍ പരാതി നല്‍കിയെങ്കിലും മറുപടി തന്നില്ല. തുടര്‍ന്നാണ് ഓംബുഡ്സ്മാന് പരാതി നല്‍കിയത്.

മിനിമം ബാലന്‍സില്ലാത്തതിന്റെ പേരില്‍ രാജ്യത്താകമാനമുള്ള ഉപഭോക്താക്കളില്‍ നിന്ന് കോടിക്കണക്കിന് രൂപയാണ് എസ്ബിഐ പിഴയായി ഈടാക്കുന്നത്. ഇതിനെതിരെ പാര്‍ലമെന്റില്‍ വരെ രൂക്ഷമായ വിമര്‍ശനങ്ങളും ചര്‍ച്ചകളും നടക്കുകയാണ്. മെട്രോനഗരങ്ങളിലെയും നഗരങ്ങളിലെയും ഗ്രാമങ്ങളിലെയും മിനിമം ബാലന്‍സ് തുക കുറയ്ക്കണമെന്നാണ് ഉപഭോക്താക്കളുടെ ആവശ്യം.

വീഡിയോ ചാറ്റിനും ഇന്റര്‍നെറ്റ് കോളിങിനും ഇളവ്:  പ്രവാസികള്‍ക്ക് പുതിയ ഓഫറുകളുമായി ഇത്തിസാലത്ത്
Posted by
09 January

വീഡിയോ ചാറ്റിനും ഇന്റര്‍നെറ്റ് കോളിങിനും ഇളവ്: പ്രവാസികള്‍ക്ക് പുതിയ ഓഫറുകളുമായി ഇത്തിസാലത്ത്

അബുദാബി: യുഎഇയിലെ പ്രവാസികളായ ഉപഭോക്താക്കള്‍ക്ക് വേണ്ടി ഇത്തിസാലത്ത് പുതിയ ഓഫര്‍ അവതരിപ്പിച്ചു. പുതിയ ഓഫര്‍ പ്രകാരം വീഡിയോ ചാറ്റ്, ഇന്റര്‍നെറ്റ് കോളിങ് തുടങ്ങിയവയക്ക് ഇളവ് ലഭിക്കും. പ്രീപെയ്ഡ്, പോസ്റ്റ്പെയ്ഡ്, ഇ-ലൈഫ് ഹോം ബ്രോഡ്ബാന്‍ഡ് ഉപഭോതാക്കള്‍ക്ക് ഇതിന്റെ പ്രയോജനം ലഭിക്കും.

ഇത്തിസലാത്ത് മൊബൈല്‍ ഉപയോഗിക്കുന്ന ഉപഭോക്താക്കള്‍ക്കും, ഇ-ലൈഫ് സേവനം ഉപയോഗിച്ച് മറ്റുള്ളവര്‍ക്കും ഇതു പ്രയോജനപ്പെടുത്താം.

1. മൊബൈലിനുള്ള ഇന്റര്‍നെറ്റ് കോളിംഗ് പ്ലാന്‍: മൊബൈല്‍ ഡാറ്റ പ്ലാന്‍ വഴിയായി നിശ്ചിത രൂപയ്ക്കു പ്രതിമാസം ചാര്‍ജ് ചെയ്താല്‍ ആപ്പുകള്‍ ഉപയോഗിച്ച് വോയ്സ്, വീഡിയോ കോള്‍ എന്നിവ നടത്താന്‍ സാധിക്കും. 50 ദിര്‍ഹത്തിന്റെ പ്ലാനാണ് ഇത്.

2. ഇ ലൈഫനായുള്ള ഇന്റര്‍നെറ്റ് കോളിംഗ് പ്ലാന്‍: ഈ പ്ലാന്‍ ഇലൈഫ് അക്കൗണ്ടുമായി ബന്ധിപ്പിച്ച എല്ലാ ഉത്പനങ്ങളിലും ഈ സേവനം ലഭിക്കും. 100 ദിര്‍ഹത്തിന്റെ ഈ പ്ലാനില്‍ വൈഫൈയില്‍ നിന്ന് ആപ്പുകള്‍ വഴിയുള്ള വോയ്സ്, വീഡിയോ കോളിംഗ് എന്നിവ ലഭിക്കും. പ്രവാസികള്‍ക്ക് ഇതു വഴി പ്രയോജനം ലഭിക്കുമെന്നാണ് പ്രതീക്ഷിക്കുന്നത്.

C’Me, BOTIM എന്നീ ആപ്ലിക്കേഷനുകള്‍ ഡൗണ്‍ലോഡ് ചെയ്ത ഉപഭോക്താക്കള്‍ക്ക് മാത്രമാകും ഈ രണ്ട് ഓഫറുകളും ലഭ്യമാകുക.സമീപകാലത്ത് യുഎഇയില്‍ സ്‌കൈപ്പ് അടക്കമുള്ള പല സേവനങ്ങളും നിരോധിച്ചിരുന്നു.

ബാങ്കുകളെ പറ്റിച്ച് കോര്‍പ്പറേറ്റുകള്‍; തിരിച്ചടക്കാനുള്ളത് 1.01 ലക്ഷം കോടി
Posted by
08 January

ബാങ്കുകളെ പറ്റിച്ച് കോര്‍പ്പറേറ്റുകള്‍; തിരിച്ചടക്കാനുള്ളത് 1.01 ലക്ഷം കോടി

മുംബൈ: വായ്പകള്‍ തിരിച്ചടയ്ക്കാതെ കിട്ടാക്കടമായി ബാങ്കുകളെ പറ്റിച്ച് കോര്‍പ്പറേറ്റുകള്‍. 1.01 ലക്ഷം കോടി രൂപയാണ് കോര്‍പ്പറേറ്റുകള്‍ ബോധപൂര്‍വം തിരിച്ചടയ്ക്കാതിരിക്കുന്നത്.

2017 സെപ്റ്റംബര്‍ 30വരെയുള്ള കണക്കുപ്രകാരം 21 പൊതുമേഖല ബാങ്കുകളിലായി കിട്ടാക്കടമായുള്ളത് 7.33 ലക്ഷം കോടി രൂപയാണ്. ബോധപൂര്‍വം തിരിച്ചടയ്ക്കാത്ത വായ്പയുള്‍പ്പടെയുള്ള തുകയാണിത്. കമ്പനിയുടെ കണക്കുകളില്‍ തിരിമറി നടത്തി പണം വകമാറ്റിയതിനാല്‍ ഇത്തരം അക്കൗണ്ടുകളില്‍നിന്ന് നിയമപരമായിപോലും പണം തിരിച്ചുപിടിക്കാന്‍ ബുദ്ധിമുട്ടാണെന്നാണ് വിലയിരുത്തല്‍.

9,025 കേസുകളാണ് ഇതുസംബന്ധിച്ചുള്ളത്. വായ്പ തിരിച്ചുപിടിക്കുന്നതിനായി 8,423 കമ്പനികള്‍ക്കെതിരെ ഇതിനകം ബാങ്കുകള്‍ കേസ് ഫയല്‍ ചെയ്തിട്ടുണ്ട്. ഇവരില്‍നിന്ന് 95,384 കോടി രൂപയാണ് കിട്ടാക്കടം ഇനത്തില്‍ തിരിച്ചുപിടിക്കാനുള്ളത്. 1,968 പോലീസ് കേസുകളും നിലവിലുണ്ട്. ഇതുപ്രകാരം 31,807 കോടി രൂപയാണ് തിരിച്ചുകിട്ടാനുള്ളത്. 6,937 അക്കൗണ്ടുകളില്‍ കുടിശികയുള്ള 87,458 കോടി രൂപയുടെ വായ്പ തിരിച്ചുപിടിക്കാന്‍ ആസ്തികള്‍ കണ്ടുകെട്ടുക, വില്പന നടത്തുക തുടങ്ങിയവയ്ക്കുള്ള നടപടിക്രമങ്ങള്‍ തുടങ്ങിക്കഴിഞ്ഞു.

ഏറ്റവുംകൂടുതല്‍ കിട്ടാക്കടം ലഭിക്കാനുള്ളത് ബാംഗ്ലൂര്‍ ആസ്ഥാനമായി പ്രവര്‍ത്തിക്കുന്ന വിജയാ ബാങ്കിനാണ്. 6,649 കോടി രൂപ. ഇതില്‍തന്നെ ബോധപൂര്‍വം തിരിച്ചടയ്ക്കാത്ത കണക്കിലുള്ളത് 3,537 കോടി രൂപയുമാണ്. ബോധപൂര്‍വം വായ്പ തിരിച്ചടയ്ക്കാത്തവരുടെ കുടിശിക ഏറ്റവും കൂടുതലുള്ളത് പഞ്ചാബ് നാഷണല്‍ ബാങ്കിലാണ്. ബാങ്കിന്റെ കിട്ടാക്കടമായ 57,630 കോടി രൂപയില്‍ 25 ശതമാനം തുകയും ഈയിനത്തിലുള്ളതാണ്.

ഇത്തവണ ഞെട്ടിയത് ജിയോ! 93 രൂപയ്ക്ക് അണ്‍ലിമിറ്റഡ് പ്ലാനുമായി ഐഡിയ
Posted by
07 January

ഇത്തവണ ഞെട്ടിയത് ജിയോ! 93 രൂപയ്ക്ക് അണ്‍ലിമിറ്റഡ് പ്ലാനുമായി ഐഡിയ

വീണ്ടും ടെലികോം മോഖലയില്‍ മത്സരം ശക്തമാകുന്നു. കിടിലന്‍ ഓഫറുകള്‍ പ്രഖ്യാപിച്ച് ഉപയോക്താക്കളെ അമ്പരപ്പിക്കുന്ന ജിയോയെ ഇത്തവണ ഞെട്ടിച്ചിരിക്കുകയാണ് ഐഡിയ. താരിഫ് പ്ലാന്‍ പ്രഖ്യാപിച്ചുള്ള കമ്പനികളുടെ ഏറ്റുമുട്ടലുകള്‍ക്കിടെയാണ് ഐഡിയയുടെ അപ്രതീക്ഷിത നീക്കം. ജിയോ ഓഫര്‍ നിരക്കുകള്‍ കുത്തനെ കുറച്ചതിന് പിന്നാലെ ഐഡിയ 93 രൂപയ്ക്ക് അണ്‍ലിമിറ്റഡ് പ്ലാന്‍ പ്രഖ്യാപിച്ചിരിക്കുകയാണ്. ജിയോയുടെ 98 രൂപ പ്ലാനിനേയും എയര്‍ടെല്ലിന്റെ 93 രൂപ പ്ലാനിനെയമാണ് ഐഡിയ ഉന്നം വെച്ചിരിക്കുന്നത്.

ഐഡിയയുടെ 93 രൂപ പ്ലാനില്‍ അണ്‍ലിമിറ്റഡ് എസ്റ്റിഡി/ ലോക്കല്‍ കോളുകള്‍, 1 ജിബി ഡാറ്റ 10 ദിവസം വാലിഡിറ്റി എന്നിവയാണ് ഉള്ളത്. എസ്എംഎസും അണ്‍ലിമിറ്റഡ് ഡാറ്റ ഓഫറും ഈ പ്ലാനിലില്ല. പ്രതിദിനം 250 മിനിറ്റ് ഫ്രീ കോളും പ്രതിവാരം 1000 മിനിറ്റ് ഫ്രീ കോളും നല്‍കുന്നു. പരിധി കഴിഞ്ഞാല്‍ ഒരു സെക്കന്‍ഡില്‍ ഒരു പൈസ വീതം ഈടാക്കും. ഈ പ്ലാനുമായി മത്സരിക്കുന്നത് ജിയോയുടെ 98 രൂപ പ്ലാനും എയര്‍ടെല്ലിന്റെ 93 രൂപ പ്ലാനുമാണ്.

ജിയോ നല്‍കിയിരിക്കുന്നത് അണ്‍ലിമിറ്റഡ് വോയിസ് കോള്‍, 2.1 ജിബി 4ജി ഡാറ്റ, 140 ഫ്രീ എസ്എംഎസ്, ജിയോ ആപ്ലിക്കേഷനുകളുടെ അണ്‍ലിമിറ്റഡ് ആക്‌സസും ലഭിക്കുന്നു. എയര്‍ടെല്‍ നല്‍കുന്നത് അണ്‍ലിമിറ്റഡ് കോള്‍, 1ജിബി 3ജി/ 4ജി ഡാറ്റ, 10 ദിവസത്തെ വാലിഡിറ്റിയില്‍ 100 ഫ്രീ എസ്എംഎസ് എന്നിവയാണ്.

വ്യവസായ, സേവന മേഖലകളില്‍ തിരിച്ചടി;സാമ്പത്തിക വളര്‍ച്ച കുറഞ്ഞെന്ന് തുറന്ന് സമ്മതിച്ച് അരുണ്‍ ജെയ്റ്റ്‌ലി
Posted by
29 December

വ്യവസായ, സേവന മേഖലകളില്‍ തിരിച്ചടി;സാമ്പത്തിക വളര്‍ച്ച കുറഞ്ഞെന്ന് തുറന്ന് സമ്മതിച്ച് അരുണ്‍ ജെയ്റ്റ്‌ലി

ന്യൂഡല്‍ഹി: ജിഡിപിയില്‍ കുറവെന്ന് കേന്ദ്ര ധനമന്ത്രിയുടെ പ്രസ്താവന. 2016-2017 വര്‍ഷത്തില്‍ രാജ്യത്തെ സാമ്പത്തിക വളര്‍ച്ച കുറഞ്ഞെന്ന് തുറന്ന് സമ്മതിച്ച് കേന്ദ്രധനമന്ത്രി അരുണ്‍ ജെയ്റ്റ്‌ലി. നോട്ട് നിരോധനത്തിന് പിന്നാലെ സാമ്പത്തിക രംഗത്ത് തിരിച്ചടി ഉണ്ടായെന്ന വാര്‍ത്തകള്‍ നിഷേധിച്ചിരുന്ന മന്ത്രി ഒടുവില്‍ ജിഡിപിയിലെ കുറവ് ഏറ്റു പറഞ്ഞിരിക്കുകയാണ്.

ഈ സാമ്പത്തിക വര്‍ഷത്തിലെ ജിഡിപി നിരക്ക് എട്ട് ശതമാനത്തില്‍ നിന്ന് 7.1 ശതമാനമായി കുറഞ്ഞെന്നാണ് കേന്ദ്രസര്‍ക്കാര്‍ പാര്‍ലമെന്റില്‍ വ്യക്തമാക്കിയത്.

വ്യവസായ, സേവന മേഖലകളിലെ കുറഞ്ഞ വളര്‍ച്ച നിരക്കാണ് സമ്പദ് വ്യവസ്ഥക്ക് തിരിച്ചടിയായത്. ആഗോള സാമ്പത്തിക രംഗത്ത് വളര്‍ച്ച കുറവാണ്. ഇത് രാജ്യത്തെ നിക്ഷേപത്തെ ബാധിച്ചു. ഇതും ജിഡിപി നിരക്ക് കുറയുന്നതിനും കാരണമായി. നിലവിലെ സാഹചര്യത്തില്‍ കോര്‍പ്പറേറ്റുകള്‍ക്കും ഇത് പ്രതിസന്ധി സൃഷ്ടിക്കുന്നുണ്ടെന്നും ജെയ്റ്റ്‌ലി വ്യക്തമാക്കി.

ലോക്‌സഭയില്‍ ശൂന്യവേളയിലാണ് വളര്‍ച്ച നിരക്ക് കുറയുന്നതിനെ സംബന്ധിച്ച് ജെയ്റ്റ്‌ലി പ്രസ്താവന നടത്തിയത്. അതേ സമയം, ഐഎംഎഫിന്റെ കണക്കുകളനുസരിച്ച് ലോകത്തില്‍ അതിവേഗത്തില്‍ വളരുന്ന സമ്പദ്വ്യവസ്ഥയാണ് ഇന്ത്യയെന്നും ജെയ്റ്റ്‌ലി അവകാശപ്പെട്ടു. 2017ലെ കണക്കുകള്‍ പുറത്തു വരുേമ്പാള്‍ ഇന്ത്യ ഇക്കാര്യത്തില്‍ ഒന്നാം സ്ഥാനം കൈവരിക്കുമെന്നും ജെയ്റ്റ്‌ലി വ്യക്തമാക്കി.

ജിയോ തരംഗത്തില്‍ തകര്‍ന്നടിഞ്ഞ് അനില്‍ അംബാനി; 40,000 കോടിയിലധികം കടബാധ്യത; റിലയന്‍സ് ഏറ്റെടുത്ത് രക്ഷകനാകാന്‍ ഒരുങ്ങി ‘വല്യേട്ടന്‍’ മുകേഷ് അംബാനി
Posted by
29 December

ജിയോ തരംഗത്തില്‍ തകര്‍ന്നടിഞ്ഞ് അനില്‍ അംബാനി; 40,000 കോടിയിലധികം കടബാധ്യത; റിലയന്‍സ് ഏറ്റെടുത്ത് രക്ഷകനാകാന്‍ ഒരുങ്ങി 'വല്യേട്ടന്‍' മുകേഷ് അംബാനി

ന്യൂഡല്‍ഹി: ബിസിനസ് ലോകത്തെ പകരംവെക്കാനില്ലാത്ത കരുത്തനായി മുകേഷ് അംബാനി വളര്‍ന്നുകൊണ്ടിരിക്കെ, സഹോദരന്‍ അനില്‍ അംബാനി നഷ്ടത്തിലേക്ക് കൂപ്പുകുത്തുന്നു. കടുത്ത സാമ്പത്തിക പ്രതിസന്ധി നേരിടുന്ന അനില്‍ അംബാനിയുടെ റിലയന്‍സ് കമ്മ്യൂണിക്കേഷന്‍ ലിമിറ്റഡിന്റെ സ്വത്തുക്കള്‍ സഹോദരന്‍ മുകേഷ് അംബാനിയുടെ ഉടമസ്ഥതയിലുള്ള റിലയന്‍സ് ജിയോ ഇന്‍ഫോകോം ലിമിറ്റഡ് ഏറ്റെടുക്കുന്നു. ഇക്കാര്യത്തില്‍ ഇരു കമ്പനികള്‍ തമ്മില്‍ ധാരണയായി. ധാരണ പ്രകാരം റിലയന്‍സ് കമ്മ്യൂണിക്കേഷന്‍സിന്റെ ടവറുകള്‍, ഓപ്റ്റിക് ഫൈബര്‍ കേബിള്‍ ശൃംഖല, സ്പെക്ട്രം, മീഡിയ കണ്‍വര്‍ജന്‍സ് നോഡ്സ് തുടങ്ങിയവ റിലയന്‍സ് ജിയോ ഏറ്റെടുക്കും.

40,000 കോടിയിലധികം രൂപയുടെ കടബാധ്യത അനില്‍ അംബാനി ഗ്രൂപ്പിനുണ്ടെന്നാണ് കണക്കുകള്‍. സാമ്പത്തിക ബാധ്യതയെ തുടര്‍ന്ന് കമ്പനിയുടെ ഡിടിഎച്ച്, വയര്‍ലെസ് ടെലികോം വ്യവസായങ്ങള്‍ കമ്പനി അവസാനിപ്പിച്ചിരുന്നു. കടബാധ്യത തീര്‍ക്കാന്‍ എയര്‍സെല്ലുമായി ചേരാന്‍ ശ്രമിച്ചെങ്കിലും വിജയിച്ചില്ല. ഇതേതുടര്‍ന്നാണ് പ്രധാന സേവനങ്ങള്‍ കമ്പനി അവസാനിപ്പിച്ചത്.

ഗാര്‍ഹിക, വ്യാവസായിക ഉപഭോക്താക്കള്‍ക്കുള്ള വയര്‍ലെസ്, ഫൈബര്‍ സേവനങ്ങള്‍ക്ക് ഇവ റിലയന്‍സ് ജിയോക്ക് സഹായകമാകും. ഏറ്റെടുക്കലിന്റെ പണമിടപാട് സംബന്ധിച്ച വിശദാംശങ്ങള്‍ കമ്പനികള്‍ പുറത്തുവിട്ടിട്ടില്ല. സര്‍ക്കാരിന്റെയും ബന്ധപ്പെട്ട ഏജന്‍സികളുടെയും അനുമതിയും ലഭിക്കേണ്ടതുണ്ട്. പണമിടപാട് സംബന്ധിച്ച വിവരങ്ങള്‍ അധികം വൈകാതെ പുറത്ത് വിടുമെന്നാണ് സൂചന.

മറ്റ് കമ്പനികള്‍ക്ക് തിരിച്ചടിയായ റിലയന്‍സ് ജിയോയുടെ വരവ് തന്നെയാണ് അനില്‍ അംബാനിയെയും അടിതെറ്റിച്ചത്. റിലയന്‍സ് കമ്മ്യൂണിക്കേഷന്‍സ് ഉള്‍പ്പെടെ നിരവധി കമ്പനികളാണ് ജിയോ തരംഗത്തില്‍ അടിപതറിയത്.

ബിറ്റ്‌കോയിന് ഇന്ത്യയില്‍ നിയന്ത്രണം വരുന്നു; ബജറ്റില്‍ പ്രഖ്യാപനം ഉണ്ടായേക്കും
Posted by
28 December

ബിറ്റ്‌കോയിന് ഇന്ത്യയില്‍ നിയന്ത്രണം വരുന്നു; ബജറ്റില്‍ പ്രഖ്യാപനം ഉണ്ടായേക്കും

ന്യൂഡല്‍ഹി: ഇന്ത്യന്‍ സമ്പദ് വ്യവസ്ഥ ഔദ്യോഗികമായി നിര്‍വചിക്കാത്ത ക്രിപ്‌റ്റോ കറന്‍സികളെ വരുതിയിലാക്കാന്‍ ഒരുങ്ങി കേന്ദ്ര സര്‍ക്കാര്‍. ഇന്ത്യയില്‍ ഇത്തരത്തിലുള്ള കറന്‍സികളുടെ വിനിമയം വര്‍ധിച്ച സാഹചര്യത്തിലാണ് അടുത്ത ബജറ്റില്‍ ബിറ്റ് കോയിന്‍ ഉള്‍പ്പടെയുള്ള ക്രിപ്‌റ്റോ കറന്‍സികളെ കുറിച്ച് പരാമര്‍ശിക്കുക. ഫെബ്രുവരി ഒന്നിന് അവതരിപ്പിക്കുന്ന 2018 -19 വര്‍ഷത്തേക്കുള്ള ബജറ്റില്‍ ഇത് സംബന്ധിച്ച പ്രഖ്യാപനം നടത്താനാണ് സര്‍ക്കാര്‍ ആലോചിക്കുന്നത്. ക്രിപ്‌റ്റോ കറന്‍സികള്‍ എന്താണെന്ന് വ്യക്തമായ നിര്‍വചനം കൊണ്ടുവരും.

ഇതിനെ കുറിച്ച് പഠനം നടത്തുന്നതിന് സര്‍ക്കാര്‍ ഒരു ഉന്നതതല സമിതിയെ നിയോഗിച്ചിരുന്നു. ഇക്കണോമിക് അഫയേഴ്സ് സെക്രട്ടറി സുഭാഷ് ചന്ദ്ര ഗാര്‍ഗ് അധ്യക്ഷനായ സമിതി ഒരു കരട് നിയമം തയാറാക്കിയതായാണ് വിവരം. ക്രിപ്‌റ്റോകറന്‍സിയെ കറന്‍സിയായി പരിഗണിക്കണോ എന്ന കാര്യത്തില്‍ ഇനിയും വ്യക്തത കൈവന്നിട്ടില്ല. ഇത് ഒരു ക്യാപിറ്റല്‍ അസറ്റായോ, ഭൗതികമല്ലാത്ത അസറ്റായോ പരിഗണിക്കാം എന്ന തരത്തിലുള്ള ശുപാര്‍ശയാണ് കമ്മറ്റി മുന്നോട്ട് വയ്ക്കുന്നത്.

ഇന്ത്യയില്‍ ബിറ്റ്കോയിന്‍ അടക്കമുള്ള ക്രിപ്‌റ്റോകറന്‍സികളില്‍ നല്ല തോതില്‍ തന്നെ ഇടപാടുകള്‍ നടക്കുന്നതായി റിപ്പോര്‍ട്ടുകളുണ്ട്. ഈയിടെ ആദായനികുതി വകുപ്പ് കൊച്ചി അടക്കമുള്ള നഗരങ്ങളില്‍ ഇത് സംബന്ധിച്ച വിവരങ്ങള്‍ തേടിയിരുന്നു. ആയിരത്തിലേറെ പേര് ഇതിനകം സജീവമായി ഈ രംഗത് നിക്ഷേപം നടത്തുന്നു എന്നാണ് റിപ്പോര്‍ട്ട്. കേന്ദ്ര സര്‍ക്കാര്‍ ഇത് വരെ ക്രിപ്‌റ്റോ കറന്‍സികള്‍ക്ക് ഔദ്യോഗിക അംഗീകാരമോ നിരോധനമോ ഏര്‍പ്പെടുത്തിയിട്ടില്ല.

error: This Content is already Published.!!