jio-offers extended-to-june-30
Posted by
20 January

ജിയോ ഓഫറുകള്‍ ജൂണ്‍ 30വരെ തുടരും

ജിയോയുടെ ഹാപ്പി ന്യൂ ഇയര്‍ ഓഫര്‍ മാര്‍ച്ച് 31ന് ശേഷവും തുടരുമെന്ന് സൂചന. മാര്‍ച്ച് 31ന് ശേഷം മൂന്ന് മാസത്തേക്ക് കൂടിയാവും ഇത്തരത്തില്‍ ജിയോയുടെ സേവനം ലഭിക്കുക. ഇതിന് ജൂണ്‍ 30 വരെ കാലവധിയുണ്ടായിരിക്കും.

പുതിയ ഓഫര്‍ പ്രകാരം വോയ്‌സ് കോളുകള്‍ പൂര്‍ണ സൗജന്യമായിരിക്കുമെങ്കിലും. ഡാറ്റ സേവനത്തിനായി 100 രൂപ അധികമായി നല്‍കേണ്ടി വരുമെന്നാണ് സൂചന. എന്നാല്‍ ഇതേകുറിച്ച് ഇതുവരെ ഔദ്യോഗിക പ്രഖ്യാപനം ഉണ്ടായിട്ടില്ല. ട്രായ് നിര്‍ദേശം അനുസരിച്ച് മാര്‍ച്ചിന് ശേഷം സൗജന്യ സേവനം നല്‍കാന്‍ ജിയോയ്ക്ക് ആവില്ല. ഇത് കൊണ്ടാണ് കുറഞ്ഞ നിരക്കില്‍ സേവനം തുടരാന്‍ റിലയന്‍സ് ശ്രമിക്കുന്നതെന്നാണ് സൂചന.

BSNL wallet:  Mobi cash
Posted by
19 January

ബിഎസ്എന്‍എല്ലിന്റെ എസ്ബിഐ-മൊബിക്യാഷ് വരുന്നു; ഒപ്പം 4ജിയും

തിരുവനന്തപുരം: ഇന്ത്യയെ ഡിജിറ്റലാക്കാനുള്ള പദ്ധതി ഏറ്റെടുത്ത് ബിഎസ്എന്‍എല്ലും രംഗത്ത്. ഇനി മൊബൈല്‍ ഫോണ്‍ വഴി ബാങ്ക് ഇടപാടുകള്‍ സാധ്യമാക്കാന്‍ എസ്ബിഐയുമായി ചേര്‍ന്നു മൊബൈല്‍ വോലറ്റാണ് ബിഎസ്എന്‍എല്‍ പദ്ധതിയിലുള്ളത്. ‘എസ്ബിഐ മൊബിക്യാഷ്’ എന്ന പേരിലായിരിക്കും സേവനം ലഭ്യമാക്കുക. ഏതു മൊബൈല്‍ ഫോണിലും ഈ വോലറ്റ് ഉപയോഗിക്കാമെന്നു ബിഎസ്എന്‍എല്‍ കേരള ചീഫ് ജനറല്‍ മാനേജര്‍ ആര്‍ മണി അറിയിച്ചു.

ഐഎഫ്എസ് കോഡുപയോഗിച്ചു ബാങ്കിലേക്കു പണം അടയ്ക്കാനും മൊബൈല്‍ ഫോണ്‍ ബില്‍, ഇലക്ട്രിസിറ്റി, വാട്ടര്‍ അതോറിറ്റി ബില്‍ അടയ്ക്കാനും മൊബൈല്‍ റീചാര്‍ജ് ചെയ്യാനും വോലറ്റ് സഹായിക്കും. ബാങ്ക് അക്കൗണ്ടില്ലാത്തവര്‍ക്കും ഓണ്‍ലൈന്‍, ഡിജിറ്റല്‍ പണമിടപാടുകളും വ്യാപാരങ്ങളും നടത്താന്‍ ഈ സംവിധാനം സഹായിക്കും. നിശ്ചിത സംഖ്യ ഇതില്‍ നിക്ഷേപിച്ചാല്‍ ഇതുപയോഗിച്ചു വ്യാപാരങ്ങള്‍ക്കോ ഇടപാടുകള്‍ക്കോ ഉപയോഗിക്കാം. 0.5 മുതല്‍ മൂന്നു ശതമാനം വരെയാകും സര്‍വീസ് ചാര്‍ജ്.

ഇതോടൊപ്പം തന്നെ മറ്റൊരു സുപ്രധാന പ്രഖ്യാപനവും ബിഎസ്എന്‍എല്‍ നടത്തിയിട്ടുണ്ട്. രാജ്യത്താകമാനം തരംഗമായികൊണ്ടിരിക്കുന്ന 4ജിയിലേക്ക് ബിഎസ്എന്‍എല്ലും മാറുകയാണ്. 4 ജി സേവനം സംസ്ഥാനത്ത് മാര്‍ച്ചില്‍ എത്തുമെന്നാണ് ചീഫ് ജനറല്‍ മാനേജര്‍ അറിയിക്കുന്നത്. 4ജി സേവനം ബിഎസ്എന്‍എല്‍ ആദ്യം തുടങ്ങുന്ന സംസ്ഥാനങ്ങളിലൊന്നാണു കേരളം. രാജ്യത്തു ബിഎസ്എന്‍എല്ലിന്റെ ഡേറ്റ സേവനങ്ങളില്‍ 25 ശതമാനവും വിനിയോഗിക്കപ്പെടുന്നതു കേരളത്തിലാണ്. കേരളത്തിലെ ആയിരം കേന്ദ്രങ്ങളില്‍ വൈഫൈ ഹോട്ട് സ്‌പോട്ട് സേവനം ലഭ്യമാക്കുന്ന പരിപാടിയും മാര്‍ച്ചില്‍ പൂര്‍ത്തിയാകും. ഇത് 4 ജിയെക്കാള്‍ വേഗതയേറിയതായിരിക്കുമെന്നും അദ്ദേഹം പറഞ്ഞു.

India demands Amzon to apologize
Posted by
12 January

ആമസോണ്‍ ഇന്ത്യയോട് മാപ്പ് പറയണം; ഇല്ലെങ്കില്‍ വിസ അനുവദിക്കാനാവില്ലെന്ന് സുഷമാ സ്വരാജ്

ന്യൂഡല്‍ഹി: ഇന്ത്യന്‍ പതാകയെ അപമാനിച്ച ഓണ്‍ലൈന്‍ വ്യാപാര ഭീമനായ ആമസോണ്‍ മാപ്പ് പറയണമെന്ന് രാജ്യം ആവശ്യപ്പെട്ടു. ഇന്ത്യന്‍ ദേശീയ പതാകയുടെ നിറത്തില്‍ ചവിട്ടി ഉണ്ടാക്കി കമ്പോളത്തിലെത്തിച്ച ആമസോണ്‍ നടപടി അതീവ ഗൗരവം നിറഞ്ഞതാണെന്നും ഉടന്‍ തന്നെ മാപ്പ് പറയണമെന്നും ഇന്ത്യന്‍ വിദേശ കാര്യ മന്ത്രി സുഷമാ സ്വരാജ് ആവശ്യപ്പെട്ടു.

ട്വിറ്റര്‍ അക്കൗണ്ടിലൂടെയാണ് വിദേശകാര്യ മന്ത്രി മാപ്പ് പറയാന്‍ ആമസോണിനോട് ആവശ്യപ്പെട്ടത്. ആമസോണ്‍ മാപ്പ് പറഞ്ഞില്ലെങ്കില്‍ ഒരു ആമസോണ്‍ ഉദ്യോഗസ്ഥനും ഇന്ത്യയിലേക്ക് വിസ അനുവദിക്കില്ലെന്നും സുഷമ പറഞ്ഞു. കാനഡയിലെ ഇന്ത്യന്‍ ഹൈക്കമ്മീഷനോട് ആമസോണിനോട് വിഷയം ചര്‍ച്ച ചെയ്യാനും സുഷമ സ്വരാജ് ആവശ്യപ്പെട്ടു.

കാനഡയിലാണ് ഇന്ത്യന്‍ പതാകയുടെ നിറത്തിലുള്ള ചവിട്ടികള്‍ നിര്‍മ്മിച്ച് ആമസോണ്‍ വിപണിയിലെത്തിച്ചത്.

new gen banks reducearound 10000 thousands  staffs
Posted by
06 January

ജീവനക്കാരെ വെട്ടി കുറയ്ക്കാന്‍ ഒരുങ്ങി എച്ച്ഡിഎഫ്‌സി അടക്കമുള്ള ന്യൂജെനറേഷന്‍ ബാങ്കുകള്‍; പതിനായിരത്തോളം ജീവനക്കാര്‍ക്ക് ജോലി നഷ്ടപ്പെടും

കൊച്ചി: പതിനായിരത്തോളം ജീവനക്കാരെ വെട്ടി കുറയ്ക്കാന്‍ ഒരുങ്ങി ന്യൂജെനറേഷന്‍ ബാങ്കുകള്‍. ഏജന്‍സികളെ പിരിച്ചുവിട്ടും തസ്തികകള്‍ വെട്ടിക്കുറച്ചും ആണ് ബാങ്കിങ് രംഗത്തു പുതിയ പരിഷ്‌കരണങ്ങളുമായി പുതുതലമുറ ബാങ്കുകള്‍ എത്തുന്നത്. ഇതിന്റെ ഭാഗമായി രാജ്യത്തെ സ്വകാര്യ ബാങ്കുകളില്‍ രണ്ടാം സ്ഥാനമുള്ള എച്ച്ഡിഎഫ്‌സി ഫയല്‍ പ്രോസസിങ്ങിനുള്ള ഏജന്‍സികളോടു പിരിഞ്ഞുപോകാന്‍ മാര്‍ച്ച് വരെ സമയം നല്‍കിക്കഴിഞ്ഞു. കേരളത്തില്‍ മാത്രം രണ്ടായിരത്തില്‍ അധികം പേരാണ് ഇത്തരം ജോലികളില്‍ ഏര്‍പ്പെട്ടിരിക്കുന്നത്.

പിരിച്ചുവിട്ടുകൊണ്ടുള്ള നോട്ടിസ് ലഭിച്ചതിനെത്തുടര്‍ന്ന് ഔട്ട് സോഴ്‌സിങ് ഏജന്‍സികള്‍ കഴിഞ്ഞ ദിവസം കൂട്ടത്തോടെ പണിമുടക്കിയിരുന്നു. തുടര്‍ന്നു ബാങ്കിന്റെ പ്രവര്‍ത്തനം സ്തംഭിച്ചതോടെ മാര്‍ച്ച് 31 വരെ സമയം നീട്ടി നല്‍കുകയായിരുന്നു. വാഹനവായ്പയുമായി ബന്ധപ്പെട്ടടക്കം പ്രധാന ജോലികള്‍ കൈകാര്യം ചെയ്തിരുന്ന ഉയര്‍ന്ന തസ്തികകള്‍ ഒഴിവാക്കി ജീവനക്കാരെ പുനര്‍വിന്യസിക്കുകയും ചെയ്തു.

ഇതില്‍ നിരവധി പേര്‍ രാജിവെച്ചു മറ്റു ബാങ്കുകളിലേക്കു ചേക്കേറി. രാജ്യത്തെല്ലായിടത്തുമായി അയ്യായിരത്തോളം ജീവനക്കാരെ കുറയ്ക്കുകയാണ് എച്ച്ഡിഎഫ്‌സിയുടെ ലക്ഷ്യം. മറ്റു ബാങ്കുകളെല്ലാം കൂടി അയ്യായിരത്തിലധികം പേര്‍ക്ക് നോട്ടിസ് നല്‍കിക്കഴിഞ്ഞു.
ഐസിഐസിഐ, ആക്‌സിസ്, യെസ് ബാങ്ക് എന്നിവയും തങ്ങളുടെ ബിസിനിസ് വര്‍ധിപ്പിക്കുന്നതിനൊപ്പം ജീവനക്കാരെ കുറയ്ക്കാനും പദ്ധതിയിട്ടിരിക്കുകയാണ്. അടുത്തിടെ വാഹനവായ്പ ആരംഭിച്ച യെസ് ബാങ്ക് വിരലിലെണ്ണാവുന്ന ജീവനക്കാരെ മാത്രമേ ഈ രംഗത്തേക്ക് നിയമനം നടത്തിയിട്ടുള്ളൂ. മറ്റ് വിഭാഗങ്ങളില്‍ ജോലി ചെയ്യുന്നവര്‍ക്ക് അധിക ജോലി നല്‍കി ബിസിനിസ് വര്‍ധിപ്പിക്കുകയാണ് യെസ് ബാങ്കിന്റെ പദ്ധതി.

നേരത്തെ ടെക്‌സ്‌റ്റൈല്‍സ് ഭീമനായ റയ്മണ്ട് അടുത്ത മൂന്നുവര്‍ഷത്തിനുള്ളില്‍ 10000 ജീവനക്കാരെ കുറയ്ക്കാന്‍ പദ്ധതിയിട്ടിരുന്നു. സാമ്പത്തിക മാന്ദ്യത്തിലേക്കു കൂപ്പുകുത്താതിരിക്കാനാണ് മിക്ക കമ്പനികളും ജീവനക്കാരെ കുറച്ചുകൊണ്ടിരിക്കുന്നത്. 2016ല്‍ നോണ്‍ ബാങ്കിങ് രംഗത്തുണ്ടായിരുന്ന കമ്പനികളില്‍ ഏഴെണ്ണത്തിനു ബാങ്കിങ്ങിന് അനുമതി കൊടുത്തതോടെ ബിസിനിസ് കുറയുമെന്ന കണക്കുകൂട്ടിലിലാണു നിലവിലുള്ള ബാങ്കുകള്‍. ഇതാണു ജീവനക്കാരെ കുറയ്ക്കുന്നതിനുള്ള പ്രധാന കാരണം. എടിഎമ്മുമായി ബന്ധപ്പെട്ട അന്വേഷണങ്ങള്‍ക്കും വിലാസം, മൊബൈല്‍ നമ്പരുകള്‍ അപ്‌ഡേഷന്‍ തുടങ്ങിയ ജോലികള്‍ക്കെല്ലാം റോബോട്ടുകളെ ആശ്രയിക്കാനാണ് ഐസിഐസിഐ ബാങ്ക് പദ്ധതി. 20 ശതമാനത്തോളം അന്താരാഷ്ട്ര ഇടപാടുകള്‍ റോബോട്ടുകളെ ഉപയോഗിച്ചു നടത്തുകയാണു ലക്ഷ്യം. എച്ച്ഡിഎഫ്‌സിയും ആര്‍ട്ടിഫിഷ്യല്‍ ഇന്റലിജന്റുകളെന്നു പേരിട്ടിരിക്കുന്ന റോബോട്ടുകളെ ജോലിക്കായി വിന്യസിച്ചുകഴിഞ്ഞു.

രാജ്യത്തെ ഇന്‍ഷൂറന്‍സ് കമ്പനികളും ജീവനക്കാരുടെ എണ്ണം വെട്ടിക്കുറച്ചുകൊണ്ടിരിക്കുകയാണ്. രാജ്യത്ത് 24 ലൈഫ് ഇന്‍ഷൂറന്‍സ് കമ്പനികളാണു നിലവിലുള്ളത്. ഇതില്‍ 72.61 ശതമാനം മാര്‍ക്കറ്റ് വിഹിതമുള്ള സര്‍ക്കാര്‍ നിയന്ത്രണത്തിലുള്ള എല്‍ഐസി ഒഴികെ എല്ലാ കമ്പനികളും പ്രതിസന്ധിയിലാണ്. സ്വകാര്യ കമ്പനികളില്‍ അധികവും അഞ്ചു ശതമാനത്തില്‍ താഴെയാണു ബിസിനിസ്. ഈ കമ്പനികളാകട്ടെ പിടിച്ചുനില്‍ക്കാന്‍ പ്രയാസപ്പെടുകയാണ്. ജീവനക്കാരെ സ്ഥലം മാറ്റിയും അമിത ജോലിഭാരം നല്‍കിയും സ്വയം പിരിഞ്ഞുപോകാന്‍ നിര്‍ബന്ധിതരാക്കുകയാണ് ഈ കമ്പനികള്‍.

Pytm starts Payment Bank
Posted by
04 January

പേടിഎം ആരംഭിക്കുന്ന പേയ്‌മെന്റ് ബാങ്കിന് റിസര്‍വ് ബാങ്ക് അനുമതി

ന്യൂഡല്‍ഹി: നോട്ട് നിരോധനത്തോടെ ഇ-മണിക്ക് പ്രാധാന്യം വര്‍ധിച്ചത് ഏറെ ഗുണം ചെയ്തത് പേടിഎംന് കൂടിയായിരുന്നു. ഇന്ത്യയിലെ പേടിഎമ്മിന്റെ പ്രാധാന്യം ചോദ്യ ചിഹ്നമായിരുന്നുവെങ്കിലും കറന്‍സി രഹിത സമൂഹത്തില്‍ ഏറെ ഉപകാരപ്രദമാവുന്ന ഈ സങ്കേതം ഇനി പേയ്‌മെന്റ് ബാങ്ക് ആരംഭിക്കാന്‍ പോവുന്നു.

പേയ്‌മെന്റ്‌സ് ബാങ്ക് തുടങ്ങാന്‍ പേടിഎമ്മിന് റിസര്‍വ് ബാങ്ക് ഓഫ് ഇന്ത്യ അനുമതി. ഈ മാസം പ്രവര്‍ത്തനം തുടങ്ങും. ബാങ്കിങ് വ്യവസായ രംഗത്ത് പുതിയ മാതൃക സൃഷ്ടിക്കുകയാണ് പേടിഎം പേയ്‌മെന്റ്‌സ് ബാങ്കിന്റെ ലക്ഷ്യമെന്നു വണ്‍ 97 കമ്യൂണിക്കേഷന്‍സ് സ്ഥാപകന്‍ വിജയ് ശേഖര്‍ ശര്‍മ പറഞ്ഞു.

നോയിഡയിലാണ് ആദ്യ ശാഖ തുറക്കുക. നിലവില്‍ ടെലികോം കമ്പനിയായ ഭാരതി എയര്‍ടെല്ലിന്റെ ഉപസ്ഥാപനമായ എയര്‍ടെല്‍ പേയ്‌മെന്റ്‌സ് ബാങ്ക് മാത്രമാണ് ഈ വിഭാഗത്തില്‍ പ്രവര്‍ത്തിക്കുന്നത്.

ആദിത്യ ബിര്‍ള ഐഡിയ പേയ്‌മെന്റ്‌സ് ബാങ്ക് ഈ വര്‍ഷം തുടങ്ങും. പേയ്ടിഎം പേയ്‌മെന്റ്‌സ് ബാങ്കില്‍ ശര്‍മയ്ക്കാവും കൂടുതല്‍ പങ്കാളിത്തം. കഴിഞ്ഞ വര്‍ഷം ചൈനയിലെ ആലിബാബ ഗ്രൂപ്പ് 68 കോടി ഡോളറിന്റെ നിക്ഷേപം പേയ്ടിഎമ്മിന്റെ മാതൃ കമ്പനിയായ വണ്‍ 97 കമ്യൂണിക്കേഷന്‍സില്‍ നടത്തിയിരുന്നു. ഇതോടെ ഓഹരി പങ്കാളിത്തം 40 ശതമാനമായും ഉയര്‍ന്നു. എന്നാല്‍ പേയ്‌മെന്റ്‌സ് ബാങ്കില്‍ ആലിബാബയ്ക്ക് നേരിട്ടുള്ള ഓഹരി പങ്കാളിത്തം ഉണ്ടാവില്ല.

reliance jio new offers in new year
Posted by
01 January

പുതുവര്‍ഷത്തില്‍ പുത്തന്‍ ഓഫറുകളുമായി റിലയന്‍സ് ജിയോ; 'ഹാപ്പി ന്യൂ ഇയര്‍ ഓഫര്‍' ഇന്നു മുതല്‍

ന്യൂഡല്‍ഹി : പുതുവര്‍ഷത്തില്‍ പുത്തന്‍ ഓഫറുകളുമായി റിലയന്‍സ് ജിയോ. റിലയന്‍സ് ജിയോയുടെ പുതിയ ഓഫര്‍ ‘ഹാപ്പി ന്യൂ ഇയര്‍ ഓഫര്‍’ ഇന്നു മുതല്‍ പ്രാബല്യത്തില്‍. ജിയോ വെല്‍ക്കം ഓഫര്‍ ഡിസംബര്‍ 31 ന് അവസാനിച്ച സാഹചര്യത്തിലാണ് പുതിയ ഓഫര്‍ നിലവില്‍ വരുന്നിരിക്കുന്നത്. നിലവിലുള്ള ഉപഭോക്താക്കള്‍ക്കും പുതിയ ഉപഭോക്താക്കള്‍ക്കും ഈ ഓഫര്‍ ലഭ്യമാകും.

ഒരു ചെറിയ വിഭാഗത്തിന്റെ ഉയര്‍ന്ന ഉപഭോഗം മൂലം ഭൂരിഭാഗം വരുന്ന മറ്റ് ഉപഭോക്താക്കള്‍ക്ക് ജിയോ ഓഫറിന്റെ ആനുകൂല്യം ശരിയായ രീതിയില്‍ ലഭിക്കുന്നില്ലെന്ന് ചൂണ്ടിക്കാട്ടി എല്ലാ ഉപഭോക്താക്കള്‍ക്കും തുല്യമായ രീതിയില്‍ മികച്ച സേവനം ഉറപ്പാക്കാന്‍ ഒരു ജിബിയുടെ ഫെയര്‍ യൂസേജ് പോളിസി കൊണ്ടുവരുമെന്നും റിലയന്‍സ് ചെയര്‍മാന്‍ വ്യക്തമാക്കിയിരുന്നു.

പുതിയ ഓഫര്‍ പ്രകാരം ഉപഭോക്താക്കള്‍ക്ക് ഒരു ദിവസം സൗജന്യമായി ഉപയോഗിക്കാവുന്ന ഡാറ്റയുടെ പരിധി 4 ജിബിയില്‍ നിന്നും 1 ജിബിയായി കുറയും. ഈ ഒരു ജിബിയ്ക്ക് ശേഷം 51 രൂപയ്ക്ക് റീചാര്‍ജ് ചെയ്താല്‍ 1 ജിബി 4 ജി ഡാറ്റ അധികമായി ലഭിക്കും. 301 രൂപയ്ക്ക് ആറ് ജിബിയും. മാര്‍ച്ച് 31 വരെയാണ് ഹാപ്പി ന്യൂ ഇയര്‍ ഓഫറിന്റെ കാലാവധി.

സൗജന്യ ഓഫറുകള്‍ക്ക് 90 ദിവസത്തില്‍ കൂടുതല്‍ ദൈര്‍ഘ്യം പാടില്ലെന്ന നിബന്ധന ലംഘിച്ചതായി ചൂണ്ടിക്കാട്ടി ടെലികോം റഗുലേറ്ററി അതോറ്ററി ഓഫ് ഇന്ത്യ (ട്രായ്) യാണ് വിശദീകരണം ചോദിച്ചത്.

Idea offers new magic offer
Posted by
25 December

ഉപയോക്താക്കള്‍ക്കായി ഐഡിയയുടെ മാജിക് ഓഫര്‍

ഉപയോക്താക്കള്‍ക്ക് ഗംഭീര ഓഫറുമായി ഐഡിയ. തിരഞ്ഞെടുക്കപ്പെടുന്ന ഭാഗ്യവാന്മാര്‍ക്ക് ഒരു ജിബി വരെ ഡാറ്റ സമ്മാനമായി നല്‍കുന്ന മാജിക് ഓഫറാണ് ഐഡിയ അവതരിപ്പിക്കുന്നത്. 69 രൂപയുടെ ഡാറ്റ മാജിക് റീചാര്‍ജ് വഴി 280 എംബി ഡേറ്റ ലഭിക്കും. ഇതിനൊപ്പമാണു തിരഞ്ഞെടുക്കപ്പെടുന്ന ഭാഗ്യവാന്മാര്‍ക്ക് 500 എംബി, 750 എംബി, ഒരു ജിബി എന്നിങ്ങനെ അധിക ഡേറ്റാ സൗജന്യമായി ലഭിക്കുന്നത്.

ക്രിസ്മസ് പുതുവത്സര സമ്മാനമായാണു ഡേറ്റ മാജിക് റീച്ചാര്‍ജ് കേരളത്തിലെ ഉപയോക്താക്കള്‍ക്കായി അവതരിപ്പിക്കുന്നതെന്ന് ഐഡിയ സെല്ലുലാര്‍ കേരള ചീഫ് ഓപ്പറേറ്റിങ് ഓഫിസര്‍ വിനു വര്‍ഗീസ് പറഞ്ഞു.

Cyrus Mistry removed from TCS director board
Posted by
14 December

ടിസിഎസിന്റെ ഡയറക്ടര്‍ ബോര്‍ഡില്‍ നിന്ന് സൈറസ് മിസ്ത്രിയെ പുറത്താക്കി

മുംബൈ: അഭിപ്രായ വ്യത്യാസങ്ങളും പരസ്പര ആരോപണങ്ങള്‍ക്കും ഒടുവില്‍ രത്തന്‍ ടാറ്റ ടിസിഎസ് ഡയറക്ടര്‍ ബോര്‍ഡില്‍ നിന്ന് സൈറസ് മിസ്ത്രിയെ പുറത്താക്കി.

രാജ്യത്തെ പ്രമുഖ സോഫ്റ്റ് വെയര്‍ കമ്പനിയായ ടിസിഎസിന്റെ ഡയറക്ടര്‍ ബോര്‍ഡ് സ്ഥാനത്ത് നിന്നും സൈറസ് മിസ്ത്രിയെ പുറത്താക്കുന്നത് അദ്ദേഹത്തിന്റെ കരിയറിലെ കറുത്തദിനം തന്നെയായി വിലയിരുത്തപ്പെടുന്നു.

മിസ്ത്രിയുടെ സ്ഥാനത്തെ കുറിച്ചുള്ള ചര്‍ച്ചകള്‍ നടക്കുന്നതിനിടെ ടിസിഎസിന്റെ 93 ശതമാനം ഓഹരി ഉടമകളും മിസ്ത്രിയെ പുറത്താക്കുന്നതിനെ അനുകൂലിച്ച് വോട്ട് രേഖപ്പെടുത്തി.

എന്നാല്‍ ടാറ്റ സണ്‍സിന് 73 ശതമാനം ഓഹരിയുള്ള കമ്പനിയുടെ തീരുമാനം ഏകപക്ഷീയമാണെന്നാണ് മിസ്ത്രി ആരോപിക്കുന്നത്.

airtel providing prepaid bundle offers to their customer
Posted by
08 December

ജിയോയെ എതിരിടാന്‍ എയര്‍ടെല്‍ പ്രീപെയ്ഡ് ബണ്‍ഡില്‍ ഓഫറുകള്‍ നല്‍കുന്നു

ന്യൂഡല്‍ഹി: ജിയോയുടെ ഓഫറുകള തുടര്‍ന്ന് ബിഎസ്എന്‍എല്‍ ഉപഭോക്താക്കളെ പിടിച്ച് നിര്‍ത്താനായി പുത്തന്‍ ഓഫറുകളുമായി രംഗത്തെത്തിയിരുന്നു. അതിനു പിന്നാലെ ഇപ്പോള്‍ എയര്‍ടെലും രംഗത്തെത്തിയിരിക്കുകയാണ്.345 രൂപയുടെ പ്രീപെയ്ഡ് ബണ്‍ഡില്‍ ഓഫറുകളെയാണ് എയര്‍ടെല്‍ ഇന്നലെ അവതരിപ്പിച്ചത്. 145 രൂപാ നിരക്കില്‍ ലഭ്യമാകുന്ന ഓഫറിന്റെ ആകര്‍ഷണങ്ങളില്‍ ഒന്ന് 300 എംബിയുടെ 4ജി ഡാറ്റയാണ്. എന്നാല്‍ ഓഫറിന്റെ പ്രധാന ആകര്‍ഷണം എന്നത് സൗജന്യമായ എയര്‍ടെല്‍ ടു എയര്‍ടെല്‍ ലോക്കല്‍ എസ്ടിഡി കോളുകളാണ്. ഇതിന് പുറമെ, ഫീച്ചര്‍ ഫോണാണ് ഉപയോക്താവിന്റേത് എങ്കില്‍ ഉപയോഗിക്കുവാനായി 50 എംബി ഡാറ്റയും എയര്‍ടെല്‍ നല്‍കുന്നു. ഇന്ത്യയിലുടനീളം ലഭ്യമാകുന്ന എയര്‍ടെലിന്റെ പുതിയ ഓഫറിന്റെ കാലാവധി 28 ദിവസമാണ്. 1 ജിബിയാണ് ഓഫറിന്റെ കീഴില്‍ ഉപഭോക്താവിന് ലഭിക്കുക. കൂടാതെ, എയര്‍ടെല്‍ടുഎയര്‍ടെല്‍ നെറ്റ്‌വര്‍ക്കിനുള്ളിലുള്ള എല്ലാ ലോക്കല്‍എസ്ടിഡി കോളുകള്‍ ഓഫറിന്റെ ഭാഗമായി സൗജന്യമായി ലഭിക്കും. 28 ദിവസമാണ് ഓഫറിന്റെ കാലാവധി. മുന്‍ ഓഫറിലേത് പോലെ, ഫീച്ചര്‍ ഉപയോക്തക്കള്‍ക്കായി 50 എംബി ഡാറ്റായും എയര്‍ടെല്‍ നല്‍കുന്നുണ്ട്.

Cyrus Mistry against TATA Nano
Posted by
05 December

നാനോ ടാറ്റയ്ക്ക് നല്‍കിയത് നഷ്ടങ്ങള്‍ മാത്രം;നിലനിര്‍ത്തിയത് വൈകാരിക കാരണങ്ങള്‍ കൊണ്ടെന്നും സൈറസ് മിസ്ത്രി

മുംബൈ: ടാറ്റാ മോട്ടോഴ്‌സിന് രാജ്യാന്തരതലത്തില്‍ ഏറെ പ്രശംസ നേടികൊടുത്ത ലോകത്തെ തന്നെ ഏറ്റവും ചെലവു കുറഞ്ഞ കാറായ ടാറ്റ നാനോയ്‌ക്കെതിരെ ചെയര്‍മാന്‍ സ്ഥാനത്തുനിന്നു പുറത്താക്കപ്പെട്ട സൈറസ് മിസ്ത്രി. നാനോ കമ്പനിക്ക് കനത്ത നഷ്ടം മാത്രമാണുണ്ടാക്കിയതെന്നും വൈകാരിക കാരണങ്ങള്‍ കൊണ്ടുമാത്രമാണ് ടാറ്റ നാനോയുടെ നിര്‍മ്മാണം നിര്‍ത്താതിരുന്നതെന്നും മിസ്ത്രി പറയുന്നു. ടാറ്റ സണ്‍സിനും ടാറ്റ ട്രസ്റ്റ് ബോര്‍ഡ് അംഗങ്ങള്‍ക്കും എഴുതിയ കത്തിലാണ് അദ്ദേഹം ഇക്കാര്യം വ്യക്തമാക്കുന്നത്.

നാനോ പ്രോജക്ട് വലിയ നഷ്ടമാണെന്നും പതിനായിരം കോടിയോളം നഷ്ടം ഇത് സൃഷ്ടിച്ചെന്നും അദ്ദേഹത്തിന്റെ കത്തില്‍ വെളിപ്പെടുത്തുന്നുണ്ട്. ഒരു ലക്ഷം രൂപയ്ക്കു താഴെ കാര്‍ എന്നായിരുന്നു ആശയമെങ്കിലും കാര്‍ നിര്‍മാണത്തിന് അതില്‍ക്കൂടുതല്‍ ചെലവു വന്നിരുന്നു. നാനോ അവസാനിപ്പിക്കുക മാത്രമാണ് നഷ്ടം കുറയ്ക്കാനുള്ള വഴി. എന്നാല്‍ വൈകാരിക കാരണങ്ങളാല്‍ അതു നടക്കുന്നില്ല. മിസ്ത്രി പറയുന്നു.

‘ടാറ്റ നാനോ അടച്ചുപൂട്ടുന്നതിനുള്ള മറ്റൊരു വെല്ലുവിളി രത്തന്‍ ടാറ്റയ്ക്ക് ഷെയറുള്ള ഒരു ഇലക്ട്രിക് കാര്‍ കമ്പനിക്കായുള്ള നാനോ ഗ്ലൈഡേഴ്സിന്റെ വിതരണം നിലയ്ക്കുമെന്നതാണ്’ മിസ്ത്രി കത്തില്‍ പറയുന്നു. ടാറ്റയുടെ പല തീരുമാനങ്ങളും തെറ്റായിരുന്നെന്നും സുതാര്യതയില്ലാത്തതായിരുന്നെന്നും മിസ്ത്രി കത്തില്‍ ആരോപിക്കുന്നുണ്ട്. ഇന്ത്യന്‍ ഹോട്ടല്‍സ്, ടാറ്റ മോട്ടോഴ്സ്, ടാറ്റ സ്റ്റീല്‍ യൂറോപ്പ്, ടാറ്റ പവര്‍ മുന്ദ്ര, ടാറ്റ ടെലിസര്‍വീസസ് എന്നീ അഞ്ചു കമ്പനികള്‍ ഉണ്ടാക്കിയിട്ടുള്ള കടബാധ്യത അതിഭീമമാണെന്നും 1,18,00 കോടി രൂപയെങ്കിലും എഴുതിതള്ളേണ്ടി വരുമെന്നും സൈറസ് മിസ്ത്രി ആരോപിക്കുന്നുണ്ട്.