ഇന്ത്യയുടെ ബാങ്കിംങ് രംഗം കൂടുതല്‍ കരുത്തിലേക്ക്; പൊതുമേഖലാ ബാങ്കുകളെ ഏകോപിപ്പിക്കാന്‍ കേന്ദ്ര മന്ത്രിസഭ അംഗീകാരം
Posted by
23 August

ഇന്ത്യയുടെ ബാങ്കിംങ് രംഗം കൂടുതല്‍ കരുത്തിലേക്ക്; പൊതുമേഖലാ ബാങ്കുകളെ ഏകോപിപ്പിക്കാന്‍ കേന്ദ്ര മന്ത്രിസഭ അംഗീകാരം

ന്യൂഡല്‍ഹി: ഇന്ത്യയുടെ ബാങ്കിംങ് രംഗം കൂടുതല്‍ കരുത്താര്‍ജിക്കുന്നതിനായി പൊതുമേഖലാ ബാങ്കുകളെ ഏകോപിപ്പിക്കാനൊരുങ്ങി കേന്ദ്ര സര്‍ക്കാര്‍. പൊതുമേഖലാ ബാങ്കുകളെ ഏകോപിപ്പിക്കുന്നതിനുള്ള നടപടികള്‍ മുന്നോട്ടു കൊണ്ടുപോകുന്നതിന് കേന്ദ്ര മന്ത്രിസഭ അംഗീകാരം നല്‍കിയതായി റിപ്പോര്‍ട്ടുകള്‍ വ്യക്തമാക്കുന്നു.

അഞ്ചോ ആറോ വലിയ ബാങ്കുകളായി പൊതുമേഖലാ ബാങ്കുകളുടെ എണ്ണം കുറയ്ക്കുന്നതിനാണ് കേന്ദ്ര സര്‍ക്കാരിന്റെ പദ്ധതി. പൊതുമേഖലാ ബാങ്കുകളെ ലയിപ്പിക്കുന്നതിലൂടെ ഇന്ത്യയുടെ ബാങ്കിംങ് രംഗം കൂടുതല്‍ ശക്തമാകും എന്നാണ് കേന്ദ്ര സര്‍ക്കാരിന്റെ വിലയിരുത്തല്‍.

സ്റ്റേറ്റ് ബാങ്ക് ഓഫ് ഇന്ത്യയില്‍ അഞ്ച് അനുബന്ധ ബാങ്കുകളെയും മഹിളാ ബാങ്കിനെയും ലയിപ്പിച്ചു കൊണ്ടാണ് സര്‍ക്കാര്‍ ബാങ്കിംഗ് മേഖലയിലെ ഏകീകരണങ്ങള്‍ക്ക് തുടക്കമിട്ടത്.

രാജ്യത്തെ 21 പൊതുമേഖലാ ബാങ്കുകളില്‍ ഭൂരിപക്ഷം ഓഹരി പങ്കാളിത്തം കേന്ദ്ര സര്‍ക്കാരിനുണ്ട്. ഇന്ത്യയുടെ ബാങ്കിംങ് ആസ്തിയുടെ മൂന്നില്‍ രണ്ട് ഭാഗത്തിലധികം സംഭാവന ചെയ്യുന്നത് ഈ ബാങ്കുകളാണ്.ബാങ്കിംങ് മേഖലയെ ബാധിക്കുന്ന സമ്മര്‍ദ്ദിത ആസ്തികളില്‍ സിംഹഭാഗവും വഹിക്കുന്നതും പൊതുമേഖലാ ബാങ്കുകളാണ്.150 ബില്യണ്‍ ഡോളറിലധികമാണ് ഈ വിഭാഗത്തില്‍ പൊതു ധനകാര്യ സ്ഥാപനങ്ങളുടെ സംഭാവന. ആഗോള ബേസല്‍ 3 മാനദണ്ഡങ്ങള്‍ പാലിക്കുന്നതിന് 2019 മാര്‍ച്ച് മാസത്തോടെ കോടിക്കണക്കിന് മൂലധനവും ബാങ്കുകള്‍ക്ക് ആവശ്യമായി വരും.

വായ്പാ വളര്‍ച്ച വേഗത്തിലാക്കുന്നതിനും സാമ്പത്തിക വിപുലീകരണ പ്രവര്‍ത്തനങ്ങളെ പ്രോത്സാഹിപ്പിക്കുന്നതിനും ബാങ്കിംങ് മേഖലയില്‍ വിശാലമായ പരിഷ്‌കരണങ്ങള്‍ നടപ്പാക്കുന്നതിന്റെ ഭാഗമായാണ് ലയനത്തിനുള്ള സാധ്യതകള്‍ സര്‍ക്കാര്‍ മുന്നോട്ടുവെച്ചത്.

ജിയോയെ വെല്ലാനായ് ഐയുസി: മൊബൈല്‍ കോള്‍ നിരക്കുകള്‍ വീണ്ടും കുറയുന്നു
Posted by
23 August

ജിയോയെ വെല്ലാനായ് ഐയുസി: മൊബൈല്‍ കോള്‍ നിരക്കുകള്‍ വീണ്ടും കുറയുന്നു

ന്യൂഡല്‍ഹി: ജിയോയെ വെല്ലാനായ് ഐയുസി മൊബൈല്‍ കോള്‍ നിരക്കുകള്‍ വീണ്ടും കുറയ്ക്കുന്നു. ഒരു നെറ്റ് വര്‍ക്കില്‍ നിന്ന് മറ്റൊന്നിലേക്ക് വിളിക്കുമ്പോള്‍ ഈടാക്കുന്ന ഇന്റര്‍ കണക്ട് യൂസേജ് ചാര്‍ജ് (ഐയുസി) ഘട്ടംഘട്ടമായി ഇല്ലാതാക്കാനാണ് ഇതിലൂടെ ട്രായ് ശ്രമിക്കുന്നത്.

നിലവില്‍ മിനിറ്റിന് 14 പൈസയാണ് ഉപഭോക്താക്കളില്‍ നിന്ന് ഐയുസിയായി മൊബൈല്‍ സേവന ദാതാക്കള്‍ ഈടാക്കുന്നത്. ആദ്യഘട്ടത്തില്‍ ഇത് ഏഴ് പൈസയും പിന്നീട് മൂന്ന് പൈസയുമായി കുറയക്കാനാണ് ആലോചിക്കുന്നത്. അടുത്തഘട്ടത്തില്‍ ചാര്‍ജ് എടുത്തുകളയുകയും ചെയ്യും.

ജിയോ ഉപഭോക്താക്കള്‍ക്കായി ഏത് നെറ്റ് വര്‍ക്കിലേക്കും സൗജന്യ വോയ്‌സ് കോളുകളാണ് നല്‍കുന്നത്. ഇതോടെയാണ് ഐയുസിയില്‍ കുറവു വരുത്താന്‍ ട്രായ് തീരുമാനിച്ചത്. ജിയോ കടന്നുവരുന്നതിന് മുമ്പ് ഐഡിയ, വോഡഫോണ്‍, എയര്‍ടെല്‍ തുടങ്ങിയ കമ്പനികള്‍ ഐയുസി ഇനത്തില്‍ കോടികളാണ് ഉപഭോക്താക്കളില്‍ നിന്ന് നേടിയിരുന്നത്.

ഇന്ത്യയില്‍ ടെലികോം ഭീമനായ എയര്‍ടെല്‍ കഴിഞ്ഞവര്‍ഷം ഐയുസി ഇനത്തില്‍ ഉപഭോക്താക്കളില്‍ നിന്ന് നേടിയത് 10,279 കോടി രൂപയാണ്. മാത്രമല്ല നിലവില്‍ ഈടാക്കുന്ന തുകയില്‍ വര്‍ധനവ് വരുത്തണമെന്നാവശ്യപ്പെട്ട് എയര്‍ടെല്‍ ട്രായ് ചെയര്‍മാന് അയച്ച കത്ത് പരിഗണിക്കാതെയാണ് നിരക്ക് വീണ്ടും കുറയ്ക്കാന്‍ ട്രായ് തയ്യാറെടുക്കുന്നത്. അങ്ങനെയാണെങ്കില്‍ വോയിസ് കോളുകള്‍ക്ക് ഈടാക്കുന്ന നിരക്ക് വീണ്ടും കുത്തനെ കുറയുമെന്നാണ് പ്രതീക്ഷിക്കുന്നത്.

ഓണത്തെ വരവേല്‍ക്കാന്‍ 200 രൂപ നോട്ടുകളും
Posted by
23 August

ഓണത്തെ വരവേല്‍ക്കാന്‍ 200 രൂപ നോട്ടുകളും

ന്യൂഡല്‍ഹി: ഇത്തവണ ഓണത്തെ വരവേല്‍ക്കാന്‍ പുതിയ 200 രൂപ നോട്ടുകളുമുണ്ടാകും. റിസര്‍വ് ബാങ്ക് ഓഫ് ഇന്ത്യ ചരിത്രത്തിലാദ്യത്തിലാദ്യമായാണ് 200 രൂപ നോട്ടുകള്‍ പുറത്തിറക്കാനൊരുങ്ങുന്നത്. നോട്ടുകള്‍ ഓഗസ്റ്റ് അവസാനത്തിലോ സെപ്റ്റംബര്‍ ആദ്യ വാരത്തിലോ പുറത്തിറക്കാനാണ് ആര്‍ബിഐ നീക്കം. ഇന്ത്യയില്‍ നോട്ടു നിരോധനത്തിന്റെ ഭാഗമായാണ് 200 രൂപ നോട്ടുകളുടെ കടന്നുവരവ്.

തുടക്കത്തില്‍ 200 രൂപ മൂല്യത്തിലുള്ള 50 കോടിയോളം നോട്ടുകളാണ് പുറത്തിറക്കുകയെന്നും അതിനാല്‍ നോട്ട് ക്ഷാമം ഒഴിവാക്കാനും അനധികൃത വിനിമയം തടയാനും സാധിക്കുമെന്നാണ് ആര്‍ബിഐ വിലയിരുത്തുന്നത്. 100, 500 രൂപ നോട്ടുകളുടെ ഇടയില്‍ മൂല്യമുള്ള മറ്റ് നോട്ടുകള്‍ ഉടന്‍ പുറത്തിറക്കാന്‍ ആര്‍ബിഐ ഉദ്ദേശിക്കുന്നില്ല. അതിനാല്‍ 200 രൂപയുടെ നോട്ടുകള്‍ ഏറെ പ്രചാരം നേടുമെന്നാണ് വിലയിരുത്തപ്പെടുന്നത്.

200 രൂപ നോട്ടുകള്‍ വ്യാപകമാവുന്നതോടെ എടിഎമ്മില്‍ നിന്ന് കൂടുതല്‍ നോട്ടുകള്‍ പിന്‍വലിക്കുമെന്നാണ് കരുതുന്നത്. പുതിയ നോട്ടുകള്‍ കൂടുതലായി എത്തുന്നത് സാധാരണക്കാര്‍ അനുഭവിച്ചിരുന്ന പ്രായോഗിക ബുദ്ധിമുട്ടുകള്‍ ലഘൂകരിക്കാന്‍ സഹായിക്കുമെന്നാണ് സ്റ്റേറ്റ് ബാങ്ക് ഓഫ് ഇന്ത്യയുടെ ഗ്രൂപ്പ് ചീഫ് ഇക്കണോമിസ്റ്റ് സൗമ്യ കാന്തി ഘോഷ് പറയുന്നത്.

സംസ്ഥാനത്ത് സ്വര്‍ണ വിലയില്‍ മാറ്റമില്ല
Posted by
23 August

സംസ്ഥാനത്ത് സ്വര്‍ണ വിലയില്‍ മാറ്റമില്ല

കൊച്ചി: സംസ്ഥാനത്ത് സ്വര്‍ണ വിലയില്‍ മാറ്റമില്ല. പവന് 21,680 രൂപ, ഗ്രാമിന് 2,710 രൂപ. ഒരാഴ്ചയായി സ്വര്‍ണവില മാറ്റമില്ലാതെ തുടരുകയാണ്. 31 ഗ്രാമിന്റെ ട്രോയ് ഔണ്‍സിന് 1,285 ഡോളറാണ് ആഗോള വിപണിയിലെ വില.

ഇന്ത്യയില്‍ മക്ഡൊണാള്‍ഡ്സിന്റെ 169 ഫ്രാഞ്ചൈസികള്‍ അടച്ചുപൂട്ടുന്നു
Posted by
22 August

ഇന്ത്യയില്‍ മക്ഡൊണാള്‍ഡ്സിന്റെ 169 ഫ്രാഞ്ചൈസികള്‍ അടച്ചുപൂട്ടുന്നു

ന്യൂഡല്‍ഹി: കൊണാട്ട് പ്ലാസ റെസ്റ്റോറന്റ് ലിമിറ്റഡ്(സിപിആര്‍എല്‍) കരാറെടുത്തിരുന്ന വന്‍കിട റെസ്റ്റോറന്റ് ശൃംഖലയായ മക്ഡൊണാള്‍ഡ്സ് ഇന്ത്യയിലെ 169 ഫ്രാഞ്ചൈസികള്‍ അടച്ചുപൂട്ടുന്നു. വിക്രം ബക്ഷിയുടെ ഉടമസ്ഥതയിലാണ് സിപിആര്‍എല്‍ ഔട്ട്ലെറ്റുകള്‍.

സിപിആര്‍എല്‍ ഫ്രാഞ്ചൈസിയുമായുള്ള കരാര്‍ അവസാനിപ്പിച്ചതായും ഇനി തങ്ങളുടെ ബ്രാന്‍ഡിന്റെ പേര് ഉപയോഗിക്കാന്‍ പാടില്ലെന്നും കാട്ടി മക്ഡൊണാള്‍ഡ്സ് പത്രക്കുറിപ്പ് പുറത്തിറക്കിയിരുന്നു. കമ്പനിയുടെ പേര് ഉപയോഗിച്ച് ഭക്ഷ്യവിഭവങ്ങള്‍ വില്‍ക്കുന്നത് 15 ദിവസത്തിനുള്ളില്‍ നിര്‍ത്തണമെന്നും മക്ഡൊണാള്‍ഡ്സ് നിര്‍ദേശിച്ചു.

രാജ്യതലസ്ഥാനത്ത് സിപിആര്‍എല്ലിന്റെ ഉടമസ്ഥതയിലുള്ള 43 ഔട്ട്ലെറ്റുകള്‍ക്ക് പ്രാദേശിക ഭരണകൂടം ഈറ്റിംഗ് ഹൗസ് ലൈസന്‍സ് നിഷേധിച്ചിരുന്നു. ഇത് കരാര്‍ ലംഘനമാണെന്ന് ചൂണ്ടിക്കാട്ടിയാണ് ഫ്രാഞ്ചൈസികള്‍ അടച്ചുപൂട്ടാനുള്ള തീരുമാനത്തിലേക്ക് മക്ഡൊണാള്‍ഡ്സ് എത്തിയതെന്നാണു സൂചന.

ജോണ്‍സന്‍ ആന്റ് ജോണ്‍സന്‍ പൗഡര്‍ ഉപയോഗിച്ച യുവതിക്ക് ഒവേറിയന്‍ കാന്‍സര്‍: കമ്പനിക്ക് 417 മില്യണ്‍ ഡോളര്‍ പിഴ
Posted by
22 August

ജോണ്‍സന്‍ ആന്റ് ജോണ്‍സന്‍ പൗഡര്‍ ഉപയോഗിച്ച യുവതിക്ക് ഒവേറിയന്‍ കാന്‍സര്‍: കമ്പനിക്ക് 417 മില്യണ്‍ ഡോളര്‍ പിഴ

കാലിഫോര്‍ണിയ: ജോണ്‍സന്‍ ആന്റ് ജോണ്‍സന്‍ കമ്പനിയുടെ ഫെമിനിന്‍ ഹൈജീന്‍ പൗഡര്‍ ഉപയോഗിച്ചത് മൂലം തനിക്ക് ഒവേറിയന്‍ കാന്‍സര്‍ ബാധിച്ചെന്ന സ്ത്രീയുടെ പരാതിയില്‍ കമ്പനിക്ക് 417 മില്യണ്‍ ഡോളര്‍ പിഴ. കാലിഫോര്‍ണിയ സ്വദേശിനിയായ ഈവ എഷിവേറിയ എന്ന സ്ത്രീയുടെ പരാതിയിന്മേലാണ് ഇതുവരെയുള്ളതില്‍ ഏറ്റവും കനത്ത പിഴ കമ്പനിക്ക് ലഭിച്ചത്. ടാല്‍ക് ബേസ് പൗഡറുകള്‍ മൂലമുള്ള കാന്‍സര്‍ സാധ്യതയെ കുറിച്ച് ഉപഭോക്താക്കള്‍ക്ക് സൂചന നല്‍കിയില്ല എന്നതിനാലാണ് ഇത്രയും കനത്ത പിഴ നല്‍കുന്നതെന്നും കോടതി വ്യക്തമാക്കി.

താന്‍ വര്‍ഷങ്ങളായി ജോണ്‍സണ്‍ ആന്റ് ജോണ്‍സണ്‍ ഉത്പന്നങ്ങള്‍ ഉപയോഗിക്കുന്ന വ്യക്തിയാണെന്നും, അതുമൂലമാണ് തനിക്ക് ഒവേറിയന്‍ കാന്‍സര്‍ പിടിപെട്ടതെന്നും 63 വയസ്സുകാരിയായ ഈവ പരാതിപ്പെട്ടു. കമ്പനി സ്വന്തം ജെനിറ്റല്‍ ടാല്‍കം പൗഡറുകള്‍ മൂലമുള്ള കാന്‍സര്‍ സാധ്യത മറച്ചു വെച്ചുകൊണ്ട് അവ ഉപയോഗിക്കാന്‍ സ്ത്രീകളെ പ്രേരിപ്പിക്കുന്നുവെന്ന് വാദിഭാഗം അഭിഭാഷകര്‍ കോടതിയെ ധരിപ്പിച്ചു. ജെനിറ്റല്‍ ടാല്‍കം പൗഡര്‍ കാന്‍സര്‍ ഉണ്ടാക്കുന്നുവെന്നു ശാസ്ത്രീയമായി ആരും തെളിയിച്ചിട്ടില്ല എന്ന് കമ്പനി വാദം.

ഇതിനു മുന്‍പും സമാനമായ കേസുകളില്‍ ഇതേ കോടതിയില്‍ നിന്നും കമ്പനിക്ക് പിഴ ശിക്ഷ ലഭിച്ചിട്ടുണ്ട്.2002 നും, 2013 നുമിടയില്‍ ഇത്തരം കേസുകള്‍ മൂലം കമ്പനിക്ക് 2.2 ബില്യണ്‍ ഡോളര്‍ പിഴ ഒടുക്കേണ്ടി വന്നിട്ടുണ്ടെന്ന് കമ്പനി അധികൃതര്‍ തന്നെ സമ്മതിച്ചിക്കുന്നു. 2016 ഫെബ്രുവരി മാസത്തില്‍ 72 മില്യണ്‍ ഡോളറും, അതേ വര്‍ഷം മെയ് മാസത്തില്‍ 55 മില്യണ്‍ ഡോളറും, 2017 മെയ് മാസത്തില്‍ 110 മില്യണ്‍ ഡോളറും നഷ്ടപരിഹാരമായി നല്‍കിയ കമ്പനിക്ക് പുതിയ വിധി മൂലം വീണ്ടും കോടികളുടെ നഷ്ടമാണ് സംഭവിക്കുന്നത്. അമേരിക്കയില്‍ മാത്രം കമ്പനിക്കെതിരെ സമാനമായ 4,800 കേസുകള്‍ നിലവിലുണ്ടെന്നാണ് റിപ്പോര്‍ട്ടുകള്‍. മിസോറി കോടതിയില്‍ മാത്രം നിലവിലുള്ള കേസുകളില്‍ മാത്രം കമ്പനി മുന്നൂറു മില്യണ്‍ ഡോളര്‍ നഷ്ടപരിഹാരം നല്‍കേണ്ടി വരും എന്നാണ് നിഗമനം.

തകര്‍ച്ചക്കൊടുവിലെ നേട്ടം: സെന്‍സെക്സില്‍ 84 പോയിന്റ് മുന്നില്‍
Posted by
22 August

തകര്‍ച്ചക്കൊടുവിലെ നേട്ടം: സെന്‍സെക്സില്‍ 84 പോയിന്റ് മുന്നില്‍

മുംബൈ: തകര്‍ച്ചയുടെ ദിനങ്ങള്‍ക്കൊടുവില്‍ ഓഹരി സൂചികകളില്‍ വന്‍ നേട്ടത്തോടെ തുടക്കം. സെന്‍സെക്‌സ് 84 പോയിന്റ് നേട്ടത്തില്‍ 31342.85ലും നിഫ്റ്റി 33 പോയിന്റ് ഉയര്‍ന്ന് 9787.35ലുമാണ് വ്യാപാരം നടക്കുന്നത്. ബിഎസ്ഇയിലെ 906 കമ്പനികളുടെ ഓഹരികള്‍ നേട്ടത്തിലും 661 ഓഹരികള്‍ നഷ്ടത്തിലുമാണ്.

ലുപിന്‍, ഹിന്‍ഡാല്‍കോ, ഇന്‍ഫോസിസ്, വേദാന്ത, സണ്‍ ഫാര്‍മ, ആക്‌സിസ് ബാങ്ക്, ഡോ റെഡ്ഡീസ് ലാബ്, ടാറ്റ സ്റ്റീല്‍, ടാറ്റ മോട്ടോഴ്‌സ് തുടങ്ങിയവ നേട്ടത്തിലും ടിസിഎസ്, സണ്‍ ടിവി, അജന്ത ഫാര്‍മ, ബിപിസിഎല്‍ തുടങ്ങിയവ നഷ്ടത്തിലുമാണ്.

ബാങ്ക് ജീവനക്കാര്‍ ഇന്ന് പണിമുടക്കുന്നു
Posted by
22 August

ബാങ്ക് ജീവനക്കാര്‍ ഇന്ന് പണിമുടക്കുന്നു

കൊച്ചി: വിവിധ ആവശ്യങ്ങളുന്നയിച്ച് യുണൈറ്റഡ് ഫോറം ഓഫ് ബാങ്ക് യൂണിയന്‍സിന്റെ(യുഎഫ്ബിയു) നേതൃത്വത്തില്‍ രാജ്യവ്യാപകമായി ചൊവ്വാഴ്ച ബാങ്ക് ജീവനക്കാര് പണിമുടക്കും.

കോര്‍പറേറ്റ് കിട്ടാക്കടങ്ങള്‍ എഴുതിത്തള്ളരുത്, വര്‍ധിപ്പിച്ച സേവന നിരക്കുകള്‍ കുറക്കുക, ജനവിരുദ്ധ ബാങ്കിങ് പരിഷ്‌കാരം ഉപേക്ഷിക്കുക, സ്വകാര്യവത്കരിക്കാനും ലയനത്തിനുമുള്ള നീക്കങ്ങള് അവസാനിപ്പിക്കുക, ജിഎസ്ടിയുടെ പേരിലെ സര്‍വീസ് ചാര്‍ജ് വര്‍ധന ഉപേക്ഷിക്കുക എന്നിവയാണ് ആവശ്യങ്ങള്‍.

പണിമുടക്കില്‍ പത്തുലക്ഷം ബാങ്ക് ജീവനക്കാരും ഓഫിസര്‍മാരും പങ്കെടുക്കുമെന്ന് യുഎഫ്ബിയു അറിയിച്ചു.

ലോണ്‍ എടുത്തവര്‍ക്ക് ഇനി ജപ്തിയെ പേടിക്കേണ്ട: വീടും കൃഷിസ്ഥലവും ജപ്തിയില്‍നിന്ന് ഒഴിവാക്കാന്‍ ഭേദഗതി
Posted by
21 August

ലോണ്‍ എടുത്തവര്‍ക്ക് ഇനി ജപ്തിയെ പേടിക്കേണ്ട: വീടും കൃഷിസ്ഥലവും ജപ്തിയില്‍നിന്ന് ഒഴിവാക്കാന്‍ ഭേദഗതി

തിരുവനന്തപുരം: വായ്പയ്ക്ക് ഈടു നല്‍കിയ വീടും കൃഷിസ്ഥലവും ജപ്തിയില്‍നിന്ന് ഒഴിവാക്കാന്‍ നിയമഭേദഗതിയുമായി സംസ്ഥാന സര്‍ക്കാര്‍. മുഖ്യമന്ത്രി നിയമസഭയില്‍ അവതരിപ്പിച്ച പ്രമേയത്തിലാണ് ഇക്കാര്യം പറഞ്ഞത്.

അഞ്ചുലക്ഷം രൂപ വരെ വായ്പ എടുത്തിട്ടുള്ളവര്‍ക്കാണ് ഇളവ് ബാധകമാവുക. ഭേദഗതി നിലവില്‍ വരുന്നതോടെ ഗ്രാമങ്ങളില്‍ ഒരേക്കര്‍ വരെയുള്ള കൃഷിസ്ഥലങ്ങള്‍ ജപ്തിയില്‍ നിന്ന് ഒഴിവാക്കപ്പെടും.

നഗരങ്ങളില്‍ അമ്പത് സെന്റ് വരെയുള്ള കൃഷിയിടങ്ങളാണ് ഒഴിവാക്കപ്പെടുക. ആയിരം സ്‌ക്വയര്‍ ഫീറ്റ് വരെയുള്ള വീടുകളും ഭേദഗതി നിലവില്‍ വരുന്നതോടെ ജപ്തിയില്‍ നിന്ന് ഒഴിവാക്കപ്പെടും.

അവധിക്കാലമായതോടെ പ്രവാസികളെ കൊള്ളയടിച്ച് വിമാന കമ്പനികള്‍; ടിക്കറ്റിന് നിരക്ക് വര്‍ധിച്ചത് ആറിരട്ടിയിലേറെ; കുടുംബത്തോടെ യാത്ര ചെയ്യാന്‍ ചിലവ് ലക്ഷങ്ങള്‍
Posted by
21 August

അവധിക്കാലമായതോടെ പ്രവാസികളെ കൊള്ളയടിച്ച് വിമാന കമ്പനികള്‍; ടിക്കറ്റിന് നിരക്ക് വര്‍ധിച്ചത് ആറിരട്ടിയിലേറെ; കുടുംബത്തോടെ യാത്ര ചെയ്യാന്‍ ചിലവ് ലക്ഷങ്ങള്‍

ന്യൂഡല്‍ഹി: ഉത്സവ സീസണില്‍ പ്രവാസികളുടെ പോക്കറ്റ് കൊള്ളയടിക്കുന്ന സ്ഥിരം പല്ലവി ആവര്‍ത്തിച്ച് വിമാന കമ്പനികള്‍. ഓണം ബക്രീദ് അവധി ആഘോഷിച്ചു കേരളത്തില്‍നിന്ന് ഗള്‍ഫ് നാടുകളിലേക്ക് മടങ്ങുന്നവരെയാണ് ഇത്തവണ വിമാനകമ്പനികള്‍ ലക്ഷ്യം വെച്ചിരിക്കുന്നത്. വിമാനടിക്കറ്റ് നിരക്ക് ആറിരട്ടിവരെ കൂട്ടിയാണ് പകല്‍ക്കൊള്ള. എല്ലാ വര്‍ഷവും ഈ സീസണില്‍ ടിക്കറ്റ് കൂടാറുണ്ടെങ്കിലും സമീപകാലത്തൊന്നും ഇത്രയുമുണ്ടായിട്ടില്ല. വിമാനനിരക്ക് നിയന്ത്രിക്കാന്‍ സര്‍ക്കാര്‍ ഇടപെടലില്ലാത്തതാണ് ചൂഷണം വ്യാപകമാവാന്‍ കാരണമെന്ന് ട്രാവല്‍ ഏജന്‍സികള്‍ സാക്ഷ്യപ്പെടുത്തുന്നു.

മുപ്പത്തയ്യായിരം രൂപ മുതല്‍ ഒരു ലക്ഷം വരെയാണു വിവിധ കമ്പനികളുടെ നിരക്ക്. മൂന്നു വര്‍ഷത്തിനിടയിലെ ഏറ്റവും വലിയ വര്‍ധനയാണിതെന്നു ട്രാവല്‍ ഏജന്‍സികളും പറയുന്നു. സാധാരണ സീസണില്‍ 15,000 വരെയായിരുന്നു റിയാദിലേക്കുള്ള നിരക്കെങ്കില്‍ ഇപ്പോള്‍ 50,000 മുതല്‍ 85,000 വരെയായി. കുവൈത്തിലേക്കു യാത്ര ചെയ്യാന്‍ 30,000 മുതല്‍ 88,000 വരെയും ബഹ്‌റൈനിലെത്താന്‍ 75,000 വരെയും കൊടുക്കണം. 5000 മുതല്‍ 10,000 രൂപ വരെയായിരുന്ന ദുബായ് ടിക്കറ്റ് നിരക്ക് എത്തിനില്‍ക്കുന്നത് നാല്‍പ്പതിനായിരത്തിലാണ്. ഏറ്റവും കൂടുതല്‍ നിരക്ക് ഈടാക്കുന്നത് എയര്‍ ഇന്ത്യയാണെന്നതും ശ്രദ്ധേയം. അബുദാബിക്കു പോകാന്‍ 30,000 മതല്‍ അറുപതിനായിരം വരെയാകുമ്പോള്‍ ഷാര്‍ജയിലെത്തുന്നതിനു നാല്‍പതിനായിരമാകും. ജിദ്ദ യാത്രയാണ് ഏറ്റവും കഠിനം. എത്തിഹാദ് വിമാനത്തില്‍ ഒരു ലക്ഷമാണ് ടിക്കറ്റ് നിരക്ക്.

ഗള്‍ഫ് നാടുകളിലിപ്പോള്‍ അവധിക്കാലമാണെന്നതിനാല്‍ തന്നെ പ്രവാസികളെ പിഴിയുക തന്നെയാണ് വിമാനക്കമ്പനികളുടെ ലക്ഷ്യവും. അവധി ആഘോഷിച്ച് മലയാളികള്‍ മടങ്ങുന്ന സമയം വിമാനക്കമ്പനികള്‍ക്ക് ചാകരക്കാലമാണ്. അത് പരമാവധി മുതലാക്കുകയാണ് വര്‍ധനയുടെ ലക്ഷ്യം.