വമ്പന്‍ ഏറ്റെടുക്കലിനൊരുങ്ങി ടാറ്റാ സ്റ്റീല്‍
Posted by
20 February

വമ്പന്‍ ഏറ്റെടുക്കലിനൊരുങ്ങി ടാറ്റാ സ്റ്റീല്‍

മുംബൈ: ടാറ്റാ സ്റ്റീല്‍ വമ്പന്‍ ഏറ്റെടുക്കലിനു തയാറെടുക്കുന്നു. കടക്കെണിയിലായ രണ്ടു സ്റ്റീല്‍ കമ്പനികളെ (ഭൂഷന്‍ സ്റ്റീലും ഭൂഷന്‍ പവര്‍ ആന്‍ഡ് സ്റ്റീലും) ഏറ്റെടുക്കാനാണു നീക്കം.

എന്‍ ചന്ദ്രശേഖരന്‍ ടാറ്റാ ഗ്രൂപ്പ് മേധാവിയായ ശേഷമുള്ള ഏറ്റവും വലിയ നടപടിയാണിത്. മൊത്തം 60,000 കോടി രൂപയാണ് കണക്കെണിയിലായ ഇവ രണ്ടും കൂടി വാങ്ങാന്‍ മുടക്കുക.

ഈ കന്പനികള്‍ നാഷണല്‍ കന്പനി ലോ ട്രൈബ്യൂണലി(എന്‍സിഎല്‍ടി)ന്റെ പരിഗണനയിലാണ്. കന്പനികള്‍ ഏറ്റെടുക്കാന്‍ താത്പര്യമുള്ളവരെ വിളിച്ചപ്പോഴാണു ടാറ്റാ സ്റ്റീല്‍ രണ്ടിനും താത്പര്യമറിയിച്ചത്. മറ്റു കന്പനികള്‍ ഓഫര്‍ ചെയ്തതിനേക്കാള്‍ കൂടുതല്‍ തുക ടാറ്റാ നല്‍കും.

രണ്ടും കൂടി വര്‍ഷം 88 ലക്ഷം ടണ്‍ സ്റ്റീല്‍ ഉത്പാദനശേഷിയുണ്ട്. ഇവ ഏറ്റെടുത്തു കഴിയുമ്പോള്‍ ടാറ്റാ സ്റ്റീലിന്റെ ശേഷി 218 ലക്ഷം ടണ്‍ ആയി ഉയരും. ഇതോടെ സ്റ്റീല്‍ അഥോറിറ്റി (സെയില്‍)യേക്കാള്‍ ശേഷിയുള്ളതാകും ടാറ്റാ സ്റ്റീല്‍. ഭൂഷന്‍ പവറിന് 720 മെഗാവാട്ടിന്റെ താപവൈദ്യുത നിലയമുണ്ട്.

സിംഗാള്‍മാരുടേതാണു ഭൂഷന്‍ ഗ്രൂപ്പ്. എന്നാല്‍ ഭൂഷന്‍ സ്റ്റീലും ഭൂഷന്‍ പവര്‍ ആന്‍ഡ് സ്റ്റീലും രണ്ടു ശാഖകളുടേതാണ്. ഉടമകള്‍ തമ്മില്‍ യോജിപ്പുമില്ല.56,000 കോടി രൂപയുടെ കടബാധ്യതയുള്ള ഭൂഷന്‍ സ്റ്റീലിന് 35,000 കോടി രൂപയാണു ടാറ്റാ മുടക്കുക.

ജിന്‍ഡല്‍ സൗത്ത് വെസ്റ്റ് (ജെഎസ്ഡബ്ല്യു) 29,500 കോടി മുടക്കാന്‍ തയാറായിരുന്നു. ഭൂഷന്‍ പവറിന് ടാറ്റാ 24,500 കോടി മുടക്കും. ജെഎസ്ഡബ്ല്യു 13,000 കോടിയാണ് ഓഫര്‍ ചെയ്തത്.

പഞ്ചാബ് നാഷണല്‍ ബാങ്ക് തട്ടിപ്പില്‍ മലയാളി ജീവനക്കാര്‍ക്കും പങ്ക്; തെളിവുകളുമായി സിബിഐ
Posted by
19 February

പഞ്ചാബ് നാഷണല്‍ ബാങ്ക് തട്ടിപ്പില്‍ മലയാളി ജീവനക്കാര്‍ക്കും പങ്ക്; തെളിവുകളുമായി സിബിഐ

ന്യൂഡല്‍ഹി: പഞ്ചാബ് നാഷനല്‍ ബാങ്കിലെ കോടിക്കണക്കിന് രൂപയുടെ തട്ടിപ്പില്‍ ജീവനക്കാരുടെ പങ്ക് വ്യക്തമാക്കുന്ന കൂടുതല്‍ തെളിവുകളുമായി സിബിഐ. തട്ടിപ്പ് നടത്തി മുങ്ങിയ വജ്രവ്യാപാരി നീരവ് മോദിയുള്‍പ്പെടെയുള്ളവര്‍ക്ക് കമ്മീഷന്‍ വ്യവസ്ഥയിലാണ് ജാമ്യ രേഖ (എല്‍ഒയു) നല്‍കിയിരുന്നതെന്നും ഓരോ തവണ ജാമ്യരേഖ അനുവദിക്കുന്നതിനും നിശ്ചിത തുക കമ്മീഷനായി ഈടാക്കിയിരുന്നുവെന്നും കണ്ടെത്തല്‍. കേസില്‍ അറസ്റ്റിലായ മുന്‍ ജീവനക്കാരനാണ് ഇതുസംബന്ധിച്ച മൊഴി സിബിഐക്ക് നല്‍കിയത്. വായ്പ നല്‍കിയതിന്റെ നിശ്ചിത ശതമാനം മാത്രമായിരുന്നു കമ്മീഷന്‍. കേസുമായി ബന്ധപ്പെട്ട് ബാങ്കിലെ മുന്‍ ഡെപ്യൂട്ടി മാനേജര്‍ ഗോകുല്‍നാഥ് ഷെട്ടിയുള്‍പ്പടെയുള്ള മൂന്നുപേര്‍ സിബിഐ കസ്റ്റഡിയിലാണ്. ഇവരെ വിശദമായി ചോദ്യം ചെയ്തു വരികയാണ്.

അതേസമയം, സിബിഐയുടെ പുതിയ എഫ്‌ഐആറില്‍ മെഹുല്‍ ചോക്‌സിയുടെ ഗില്ലി ഇന്ത്യാ ലിമിറ്റഡിന്റെ മേധാവി മലയാളിയായ അനിയത്ത് ശിവരാമന്‍ നായരുടെ പേരുമുണ്ട്. എസ്ബിഐ, യൂണിയന്‍ ബാങ്ക് ഓഫ് ഇന്ത്യ, കാനറാ ബാങ്ക്, അലഹബാദ് ബാങ്ക്, ആക്‌സിസ് ബാങ്ക് ഉള്‍പ്പെടെയുള്ള ബാങ്കുകളും നീരവ് മോഡിക്കും ബന്ധുവും വജ്രവ്യാപാരിയുമായ മെഹുല്‍ ചോക്‌സിക്കും നിയമവിരുദ്ധമായി വായ്പ അനുവദിച്ചിരുന്നതായി റിപ്പോര്‍ട്ടില്‍ പറയുന്നു.

കഴിഞ്ഞ മാര്‍ച്ചിലെ കണക്ക് പ്രകാരം 17,632 കോടി രൂപ നീരവ് മോഡിക്കും മെഹുല്‍ ചോക്‌സിക്കും ബാങ്ക് വായ്പ അനുവദിച്ചതായാണ് റിപ്പോര്‍ട്ടില്‍ പറയുന്നു. തട്ടിപ്പുമായി ബന്ധപ്പെട്ട് ഈമാസം 13നു സിബിഐക്കു ലഭിച്ച രണ്ടാമത്തെ പരാതിയില്‍ മറ്റു ബാങ്കുകളുടെ പങ്ക് വിശദീകരിക്കുന്നുണ്ട്.

എന്നാല്‍ നീരവ് മോഡിയുമായോ ചോക്‌സിയുമായോ നേരിട്ട് ഇടപാടില്ലെന്നും ഇടപാട് പിഎന്‍ബിയുമായിട്ടായിരുന്നെന്നും എസ്ബിഐ പറയുന്നു. ഇന്നലെ ഡല്‍ഹി, ബംഗളൂരു, കൊല്‍ക്കത്ത, മുംബൈ, പട്‌ന, ലഖ്‌നോ, അഹമ്മദാബാദ്, ചെന്നൈ, ഗുവാഹതി, ഗോവ, ജയ്പൂര്‍, ജലന്ധര്‍, ശ്രീനഗര്‍ എന്നിവിടങ്ങളിലെ ഇദ്ദേഹത്തിന്റെ സ്ഥാപനങ്ങളിലുള്‍പ്പടെ 45 സ്ഥലങ്ങളില്‍ പരിശോധനടന്നു.

ഇതിനിടെ, കൂടുതല്‍ പേര്‍ അറസ്റ്റിലാവാന്‍ സാധ്യതയുണ്ടെന്ന് പോലീസ് അറിയിച്ചു. തട്ടിപ്പു പുറത്തുവന്നതിനു പിന്നാലെ പിഎന്‍ബി നടത്തിയ ആഭ്യന്തര അന്വേഷണത്തെത്തുടര്‍ന്ന് 20ലേറെ ജീവനക്കാരെ സസ്‌പെന്‍ഡ് ചെയ്തിട്ടുണ്ട്. ഇവരില്‍ ചിലരുടെയും നീരവ് മോഡി, മെഹുല്‍ ചോക്‌സി എന്നിവരുമായി അടുപ്പമുള്ളവരില്‍ ചിലരുടെയും അറസ്റ്റ് ഉടനുണ്ടായേക്കും. ചില ബാങ്ക് ഉദ്യോഗസ്ഥരെ കസ്റ്റഡിയിലെടുത്തു ചോദ്യംചെയ്യുന്നതായും സൂചനയുണ്ട്.

തട്ടിപ്പ് പുറത്തു വന്നതിനു പിന്നാലെ പഞ്ചാബ് നാഷണല്‍ ബാങ്കിന് കടുത്ത നിയന്ത്രണങ്ങളുമായി ആര്‍ബിഐ
Posted by
17 February

തട്ടിപ്പ് പുറത്തു വന്നതിനു പിന്നാലെ പഞ്ചാബ് നാഷണല്‍ ബാങ്കിന് കടുത്ത നിയന്ത്രണങ്ങളുമായി ആര്‍ബിഐ

ന്യൂഡല്‍ഹി: കോടികളുടെ തട്ടിപ്പ് പുറത്തുവന്ന സാഹചര്യത്തില്‍ പഞ്ചാബ് നാഷണല്‍ ബാങ്കിന് എതിരെ കര്‍ശന നിയന്ത്രണങ്ങളുമായി ആര്‍ബിഐ. ബാങ്കിന്റെ പ്രവര്‍ത്തനങ്ങളെല്ലാം കര്‍ശനമായി നിരീക്ഷിക്കുമെന്നാണ് നിലവില്‍ ആര്‍ബിഐ അറിയിച്ചിരിക്കുന്നത്.

വെള്ളിയാഴ്ചയാണ് ഇതുസംബന്ധിച്ച ആര്‍ബിഐ അറിയിപ്പ് പുറത്ത് വന്നത്. മറ്റ് ബാങ്കുകളില്‍ ഏര്‍പ്പെടുത്തിയതിനെക്കാള്‍ കര്‍ശന നിയന്ത്രണങ്ങള്‍ പിഎന്‍ബിക്ക് മുകളില്‍ കൊണ്ട് വരാനാണ് ആര്‍ബിഐയുടെ പദ്ധതി.

പഞ്ചാബ് നാഷണല്‍ ബാങ്കിന്റെ ജാമ്യം ഉപയോഗിച്ച് വിദേശത്ത് നിന്ന് വജ്രവ്യവസായി നീരവ് മോദി കോടികള്‍ തട്ടിയെന്ന വാര്‍ത്തകളാണ് കഴിഞ്ഞ ദിവസം പുറത്ത് വന്നത്. ബാങ്ക് ഉദ്യോഗസ്ഥരുടെ ഒത്താശയോടെയായിരുന്നു തട്ടിപ്പ് നടന്നതെന്നാണ് റിപ്പോര്‍ട്ട്.

ആക്‌സിസ് ബാങ്ക്, യൂണിയന്‍ ബാങ്ക്, അലഹബാദ് ബാങ്ക്, എസ്ബിഐ തുടങ്ങി രാജ്യത്തെ മുന്‍നിര ബാങ്കുകളെല്ലാം നീരവ് മോദിക്ക് പിഎന്‍ബിയുടെ ജാമ്യം മുന്‍നിര്‍ത്തി വായ്പ അനുവദിച്ചിരുന്നു.

ഫ്‌ളിപ്കാര്‍ട്ടിന്റെ കൂടുതല്‍ ഓഹരികള്‍ സ്വന്തമാക്കാനൊരുങ്ങി വാള്‍മാര്‍ട്ട്
Posted by
17 February

ഫ്‌ളിപ്കാര്‍ട്ടിന്റെ കൂടുതല്‍ ഓഹരികള്‍ സ്വന്തമാക്കാനൊരുങ്ങി വാള്‍മാര്‍ട്ട്

മുംബൈ: ഫ്‌ളിപ്കാര്‍ട്ടിന്റെ കൂടുതല്‍ ഓഹരികള്‍ സ്വന്തമാക്കാന്‍ വാള്‍മാര്‍ട്ടിനു മോഹം. മുമ്പ് 40 ശതമാനം ഓഹരികള്‍ ഏറ്റെടുക്കുമെന്നാണ് അറിയിച്ചിരുന്നതെങ്കിലും ഇന്ത്യന്‍ ഇ-കൊമേഴ്‌സ് ഭീമന്റെ കൂടുതല്‍ ഓഹരികള്‍ സ്വന്തമാക്കാനാണ് നീക്കം.

ഏഷ്യയിലെ ഏറ്റവും വലിയ മൂന്നാമത്തെ ബിസിനസ് ശക്തിയായ ആമസോണിനെതിരേയുള്ള വാള്‍മാര്‍ട്ടിന്റെ നീക്കങ്ങളുടെ ഭാഗമായാണ് ഈ ഏറ്റെടുക്കല്‍.

അമേരിക്കന്‍ റീട്ടെയ്ലറായ വാള്‍മാര്‍ട്ടിന്റെ ഏറ്റവും വലിയ അന്താരാഷ്ട്ര ഇടപാടാണ് ഫ്‌ളിപ്കാര്‍ട്ടുമായുള്ളത്. അടുത്ത ആഴ്ചയോടെ തീരുമാനമുണ്ടായേക്കും.

ജപ്പാന്റെ സോഫ്റ്റ് ബാങ്ക് ഗ്രൂപ്പിന്റെ വിഷന്‍ ഫണ്ടില്‍നിന്ന് 250 കോടി ഡോളറിന്റെ നിക്ഷേപം ലഭിച്ചതോടെ ഫ്‌ളിപ്കാര്‍ട്ടിന്റെ മൂല്യം 1200 കോടി ഡോളറായി ഉയര്‍ത്തിയിട്ടുണ്ട്.

അമേരിക്കയുടെ ടൈഗര്‍ ഗ്ലോബല്‍ മാനേജ്‌മെന്റ്, ചൈനയുടെ ടെന്‍സെന്റ് ഹോള്‍ഡിംഗ്‌സ്, ഇ-കൊമേഴ്‌സ് സ്ഥാപനം ഇ-ബേ, സോഫ്റ്റ്വേര്‍ ഭീമന്‍ മൈക്രോസോഫ്റ്റ് കോര്‍പ് എന്നിവയാണ് ഫ്‌ളിപ്കാര്‍ട്ടിന്റെ മറ്റു നിക്ഷേപകര്‍.

പിഎന്‍ബിയില്‍ എന്ത് സംഭവിച്ചെന്ന് അറിയില്ല; എസ്ബിഐയില്‍ ഇത്തരത്തിലുള്ള ക്രമക്കേടുകള്‍ നടക്കില്ല; ബാങ്കിങ് സേവനങ്ങള്‍ സൗജന്യമാക്കാനാകില്ലെന്നും എസ്ബിഐ
Posted by
16 February

പിഎന്‍ബിയില്‍ എന്ത് സംഭവിച്ചെന്ന് അറിയില്ല; എസ്ബിഐയില്‍ ഇത്തരത്തിലുള്ള ക്രമക്കേടുകള്‍ നടക്കില്ല; ബാങ്കിങ് സേവനങ്ങള്‍ സൗജന്യമാക്കാനാകില്ലെന്നും എസ്ബിഐ

മുംബൈ: രാജ്യത്തെ ബാങ്കിങ് സേവനങ്ങള്‍ എല്ലാം സൗജന്യം ആക്കാന്‍ സാധിക്കില്ലെന്ന് എസ്ബിഐ ചെയര്‍മാന്‍ രജ്‌നിഷ് കുമാര്‍. നിരക്ക് അധികമാകാതെ നോക്കാമെന്നും അദ്ദേഹം വ്യക്തമാക്കി. എല്ലാ വര്‍ഷവും ബാങ്ക് സര്‍വീസ് നിരക്കുകള്‍ പുന പരിശോധിക്കും. സര്‍വീസ് നിരക്കുകള്‍ ഇല്ലാതാക്കാന്‍ കഴിയില്ലെന്നും അദ്ദേഹം വ്യക്തമാക്കി.

ബാങ്കുമായി ബന്ധപ്പെട്ട വിഷയങ്ങളില്‍ നിലപാട് വ്യക്തമാക്കി നടത്തിയ വാര്‍ത്താസമ്മേളനത്തിലായിരുന്നു എസ്ബിഐ ചെയര്‍മാന്റെ വാക്കുകള്‍. എസ്ബിഐയില് ഓഡിറ്റിംഗ് സംവിധാനം ശക്തമാണ്. ക്രമക്കേട് കണ്ടെത്താന്‍ ബാങ്കിന് സംവിധാനമുണ്ട് പിഎന്‍ബിയില്‍ എന്ത് സംഭവിച്ചു എന്ന് അറിയില്ലെന്നും എസ്ബിഐയില്‍ ഇങ്ങനെ ഉണ്ടാകില്ലെന്നും അദ്ദേഹം പറഞ്ഞു.

പിഎന്‍ബി തട്ടിപ്പുമായി ബന്ധപ്പെട്ട് എസ്ബിഐയിലും പ്രശ്‌നങ്ങളുണ്ടോ എന്ന മാധ്യമപ്രവര്‍ത്തകരുടെ ചോദ്യത്തിന് മറുപടി പറയുകയായിരുന്നു അദ്ദേഹം.

ഷെഫീന യൂസഫ് അലി; വിജയം രുചിപ്പിച്ച പെണ്‍കരുത്ത്
Posted by
16 February

ഷെഫീന യൂസഫ് അലി; വിജയം രുചിപ്പിച്ച പെണ്‍കരുത്ത്

നവസംരംഭം കേവലമായി ബിസിനസ് കെട്ടിപ്പെടുക്കല്‍ മാത്രമല്ല. പുതിയ ബിസിനസിന്റെ അടിത്തറ പാകുന്ന മൗലികമായ ആശയത്തിന് രൂപം നല്‍കലാണ്. അടിത്തറ കെട്ടുറപ്പുള്ളതാക്കുക എന്ന ബാലപാഠമാണ് വലിയ പാഠം. നല്ല അടിത്തറയില്ലാതെ ഉയര്‍ത്തിപ്പൊക്കിയ എല്ലാ കൊട്ടാരങ്ങളും നഷ്ടത്തിലേക്ക് കൂപ്പുകുത്തും. വലിയ ബിസിനസാണെങ്കില്‍ വീഴ്ചയുടെ ആഘാതവും വലുതായിരിക്കും. എല്ലാവരും ചെയ്തു ശീലിച്ച ബിസിനസില്‍ പോലും മറ്റാരും ചെയ്യാത്ത മാറ്റമെന്താണ് എന്ന അന്വേഷണമാണ് നല്ലൊരു ബിസിനസിന്റെ യു.എസ്.പി. അതായത് കമ്പോളത്തില്‍ നിലനില്‍ക്കാനുള്ള ശേഷി നിര്‍ണയിക്കുന്ന അതിന്റെ വിപണനമുല്യം.

ഇപ്പറഞ്ഞതിന് വലിയൊരു ഉദാഹരണം ലുലു ഗ്രൂപ്പാണ്. എം.എ യൂസഫ്് അലി അസ്തിവാരമിടുകയും ക്രമാനുഗതമായി വളര്‍ന്ന് പന്തലിക്കുകയും ചെയ്ത റീടൈല്‍ ബിസിനസിന്റെ ആഗോള സാമ്രാജ്യം. പക്ഷെ അത് പലവട്ടം കേട്ടപാഠമാണല്ലോ എന്ന് നിങ്ങള്‍ നെറ്റി ചുളിക്കുന്നുണ്ടാകാം. എന്നാല്‍ അത്രയൊന്നും ആരും കേട്ടിട്ടില്ലാത്ത കഥയും ലുലുവിന് പറയാനുണ്ട്. ഷെഫീന യൂസഫ് അലി എന്നാണ് ആ വീരഗാഥയുടെ പേര്. കേരളത്തിലെ മികച്ച വനിതാ സംരംഭകരില്‍ ഒരാള്‍ എന്ന അവാര്‍ഡിനര്‍ഹയായ യുവതി. ആ കഥയാണ് ഈ ലക്കം.

ലണ്ടനില്‍ പഠിച്ചു വളര്‍ന്ന ഷെഫീന ലോകനഗരങ്ങളില്‍ ലണ്ടനു മാത്രം സവിശേഷമായ കോഫീ ഹൗസുകളുടെ കഫെ കള്‍ചറിന്റെ ആരാധികയായിരുന്നു. ആവി പറക്കുന്ന കേപ്പകള്‍ക്കിരുവശവുമിരുന്നുള്ള ചര്‍ച്ചകള്‍, ചിന്തകള്‍, ബ്‌ളോഗെയുത്തുകള്‍, പിന്നെ തന്റെ സ്വകാര്യമായ പാചകനൈപുണ്യം.. എന്നിങ്ങനെ പരസ്പരബന്ധിതമായ താല്‍പര്യങ്ങള്‍. അങ്ങിനെയൊരു ലോകത്തു നിന്ന് മിന്നിത്തിളങ്ങുന്ന അബുദബിയിലേക്ക് അവരെത്തുമ്പോള്‍ എന്തോ ഒരു വലിയ കുറവാണ് ഷെഫീനയ്ക്ക് അനുഭവപ്പെട്ടത്. ഭക്ഷണത്തിന്റെയും പാനീയങ്ങളുടെയും വൈവിധ്യം അവിടെയുണ്ടായിരുന്നെങ്കിലും ആംബിയന്‍സ് എന്നു വിളിക്കാവുന്ന അന്തരീക്ഷത്തിന്റെ കുറവ് വലുതാണെന്ന് അവര്‍ക്ക് തോന്നി.

മറ്റൊന്ന് കൂട്ടത്തില്‍ പാടുക എന്ന രീതിയിലേക്കുള്ള എമിറേറ്റ് നഗരത്തിന്റെ കുതിച്ചു ചാട്ടമാണ്. എല്ലാവര്‍ക്കും വേണ്ടത് നല്‍കുക എന്നതില്ല കാര്യം. നമുക്ക് നല്‍കാനുള്ളതിലേക്ക് എല്ലാവരും വരലാണ് കാര്യം. ആദ്യത്തേത് നമുക്ക് തന്നെ പൂര്‍ണമായും താല്‍പര്യമില്ലാത്ത കമ്പോള താല്‍പര്യങ്ങളുമായി അഡ്ജസ്റ്റ് ചെയ്യേണ്ടി വരും. രണ്ടാമത്തേത് നമുക്ക് നല്‍കാന്‍ കഴിയുന്നതിന്റെ വ്യത്യസ്തയും പുതുമയും വൈവിധ്യങ്ങളും പുതിയൊരു ബ്രാന്‍ഡ് ഐഡന്റിന്റി തന്നെ ഉണ്ടാക്കും. ഫുഡ് ഇന്‍ഡസ്ട്രിയുടെ കാര്യത്തില്‍ ‘ഹലാല്‍’ എന്ന ആശയമാണ് ഇവിടെ ശ്രദ്ധേയം. മാനസികവും ശാരീരികവുമായ ആരോഗ്യത്തിന് ഹിതകരമായത്, ഹാനികരമല്ലാത്തത് എന്നതാണ് ഹലാല്‍. ഹലാല്‍ ഭക്ഷ്യോത്പന്നങ്ങള്‍, നല്ലൊരു അന്തരീക്ഷത്തില്‍, വൈവിധ്യത്തോടെ എങ്ങിനെ സെര്‍വ് ചെയ്യാം എന്ന ആലോചനയാണ് തബ്ലേസ് ഫുഡ് കമ്പനിയുടെ വിജയത്തിന് പിന്നിലുള്ളത്.

തബ്ലേസ് ഫുഡ് കമ്പനി ലുലു ഗ്രൂപ് ഇന്റര്‍നാഷണലിന്റെ ഫുഡ് ആന്റ് ബീവറേജസ് വിപണനത്തിനു വേണ്ടിയുള്ള ഉപസ്ഥാപനമായിട്ടാണ് കമ്പോളത്തില്‍ ചുവടുവെയ്ക്കുന്നത്. മദ്യവും പോര്‍ക്ക് വിഭവങ്ങളും ലഭ്യമായിരുന്ന എമിറേറ്റ്‌സ് നഗരത്തില്‍ ‘ഹലാല്‍’ ഫുഡ് എന്ന ബ്രാന്‍ഡാണ് ടി.എഫ്.സി പരിചയപ്പെടുത്തിയത്. അതൊരു വെല്ലുവിളിയായിരുന്നു. പ്രത്യേകിച്ചും ഹലാല്‍ എന്നോ കോഷര്‍ എന്നോ കേല്‍ക്കുമ്പോള്‍ നെറ്റിചുളിക്കുന്ന ആഗോള ഉപഭോക്താക്കള്‍ക്കിടയില്‍. ടി.എഫ്.സി ആദ്യമായി ചെയ്ത്ത് ആഗോളതലത്തില്‍ പേരും പെരുമയും ആര്‍ജിച്ച ബ്രാന്‍ഡുകളുടെ ഫ്രാഞ്ചൈസി എന്ന നിലക്ക് പ്രവര്‍ത്തിക്കുകയാണ്. ജിസിസിയിലും ഏഷ്യാ വന്‍കരയിലും ഈ ബ്രാന്‍ഡുകളെ ടിഎഫ്‌സിയുടെ ബാനറില്‍ റീബ്രാന്‍ഡ് ചെയ്തു. ബ്‌ളൂംസ്‌ബെറി എന്നപേരില്‍ സ്വയം റീബ്രാന്‍ഡ് ചെയ്ത ടിഎഫ്‌സി ലോകമൊമ്പാടുമുള്ള രുചിവൈവിധ്യങ്ങളുടെ ജിസിസിയിലെയും ഏഷ്യയിലെയും ലക്ഷ്യസ്ഥാനമായി മാറി. അങ്ങിനെയാണ് നൂറുശതമാനവും ഹലാലായ രുചി പകരുക എന്ന വെല്ലുവിളി തബ്ലേസിന് നിഷ്പ്രയായം ഏറ്റടുക്കാനായത്.

വാപ്പയില്‍ നിന്ന് ഷെഫീന പഠിച്ച രണ്ട് ബിസിനസ് പാഠങ്ങളിലൊന്ന് ഉത്പന്നത്തിന്റെ പാക്കേജിംഗാണ്. വാങ്ങാന്‍ വരുന്നവര്‍ക്കു മുമ്പില്‍ അവരുടെ ഇഷ്ടത്തിനും മുന്‍ഗണനകള്‍ക്കും അനുസരിച്ച് ഉത്പന്നം അവതരിപ്പിക്കുക. ബ്രാന്റ് തനിമ പുതുക്കിക്കൊണ്ടിരിക്കുക. ഇത്രയുമൊക്കെയുണ്ടെങ്കില്‍ മാര്‍ക്കറ്റ് സമാവാക്യം അനുസരിച്ച് സ്വന്തം ബിസിനസ് സങ്കല്‍പങ്ങളെയും ആശയങ്ങളെയും അളന്നു മുറിക്കേണ്ടി വരില്ല. ബ്രിട്ടീഷ് ടീ ഹൗസിന്റെ മാതൃകയില്‍ സംവിധാനിച്ച ബ്‌ളുംബറി കഫെയിലെ കേക്കുകളും കപ്‌കേക്കുകളും വളരെ സമയമെടുത്ത് നല്ലതു പോലെ പരീക്ഷണം നടത്തി തയ്യാറാക്കുന്നവയാണ്.

മറ്റൊരു പാഠം ഫ്രാഞ്ചൈസിംഗാണ്. അതായത് ലേകപ്രശസ്തരായ ബ്രാന്‍ഡുകള്‍ ഒരു പ്രദേശത്ത് തങ്ങളെ മാര്‍ക്കൈറ്റ് ചെയ്യാനുള്ള ചുമതല വിശ്വസിച്ചേല്‍പിക്കുക. ഈ വിശ്വാസം പെട്ടന്ന് കൈവരുന്നതല്ല. കാലങ്ങളായി നേടിയെടുത്ത ഉപഭോക്താക്കള്‍ നല്‍കിയ മാര്‍ക്കാണ്. ഈ മാര്‍ക്ക് തന്നെയാണ് ഒരു കമ്പനിയുടെ മാര്‍ക്കറ്റ് വാല്യു. സൗത്താഫ്രിക്കന്‍ ബ്രാന്‍ഡായ ഗലീറ്റോയുടെ ഫ്രാഞ്ചസി, ലണ്ടന്‍ ഡയറി, ഏഷ്യയിലെ വിഖ്യാതമായ ചെങ്കിസ് ഗ്രില്‍, അമേരിക്കയിലെ പ്രമുഖ ബ്രാന്‍ഡുകളായ ഫേമസ് ഡേവ്, ശുഖര്‍ ഫാക്ടറി തുടങ്ങി ഭക്ഷ്യപാനീയ വ്യവസായത്തിലെ കൊലകൊമ്പന്‍മാരാണ് ടിഎഫ്‌സിയെ തങ്ങളുടെ ഫ്രാഞ്ചസിയായി കണ്ടത്. ഇതു കൂടാതെ കൊളോണിയല്‍ ഇന്ത്യന്‍ വിഭവങ്ങള്‍ക്കു വേണ്ടിയുള്ള പെപ്പര്‍മില്‍ എന്ന ട്രേഡ്മാര്‍ക്കും ഷെഫീന ആരംഭിച്ചു.

കണക്കുകള്‍ സംസാരിക്കുന്നത് വിസ്മയകരമായ വിജയഗാഥയാണ്. കഴിഞ്ഞവര്‍ഷം 41 ദശലക്ഷം ഡോളറിന്റെ നിക്ഷേപമാണ് ഗ്രൂപ് സമാഹരിച്ചത്. ഇക്കൊല്ലത്തോടെ ടിഎഫ്‌സി നടത്തുന്ന ഔട്‌ലെറ്റുകളുടെ എണ്ണം 57 ആയി വര്‍ദ്ധിച്ചു. ഗലീറ്റോവിന്റെയും ബ്‌ളൂംസ്ബറിയുടെയും ശാഖകള്‍ ബാംഗ്‌ളൂര്‍ ആരംഭിച്ചു. കോള്‍ഡ് സ്‌റ്റോണ്‍ ക്രീമറിയുടെ ശാഖകള്‍ കൊച്ചിയിലും ബാഗ്‌ളൂരും ആരംഭിച്ചതും നേട്ടമാണ്.

ഈ നേട്ടങ്ങളോടൊപ്പം എടുത്തു പറയേണ്ടതാണ് ഷെഫീന എന്ന ബ്‌ളോഗര്‍, കുക്ക്, പാര്‍ടി പ്‌ളാനര്‍ എന്നിങ്ങനെ. കൂടാതെ നാലു മക്കളുടെ ഉമ്മയായ ഷെഫീന ലുലു എക്‌സേഞ്ച് എന്ന ധനകാര്യസ്ഥാപനത്തിന്റെ സിഇഒ, ഹോസ്പിറ്റാലിറ്റി നിക്ഷേപസ്ഥാനമായ ട്വന്റി14ഹോള്‍ഡിംഗ്‌സിന്റെ എംഡി, ടിഎഫ്‌സിയുടെ ഡയറക്ടര്‍ എന്ന നിലയിലൊക്കെ പ്രവര്‍ത്തിക്കുന്ന അദീബ് അഹ്മദിന്റെ ഭാര്യയുമാണ്.

തന്റെ വിജയത്തിനു പിന്നിലും വിവിധ റോളുകള്‍ കൈകാര്യം ചെയ്യാനുള്ള ആത്മവിശ്വാസത്തിനു പിന്നിലും തന്റെ ഉമ്മയാണെന്ന് ഷെഫീന പറയുന്നു.

Article by Shahir Esmail

ഇഷ്ട ഭക്ഷണം ആവശ്യക്കാരിലേക്ക് എത്തിക്കാന്‍ ‘ഊബര്‍ ഈറ്റ്‌സ്’ വെള്ളിയാഴ്ച മുതല്‍
Posted by
15 February

ഇഷ്ട ഭക്ഷണം ആവശ്യക്കാരിലേക്ക് എത്തിക്കാന്‍ 'ഊബര്‍ ഈറ്റ്‌സ്' വെള്ളിയാഴ്ച മുതല്‍

കൊച്ചി: ടാക്‌സി ആപ് സേവനക്കമ്പനിയായ ഊബര്‍ ഇനി ഭക്ഷണവും ആവശ്യക്കാരിലേക്ക് എത്തിക്കും. ഇരുനൂറോളം റസ്റ്റോറന്റുകളില്‍ നിന്ന് എത്ര ചെറിയ ഓര്‍ഡറും ആവശ്യക്കാര്‍ക്ക് എത്തിക്കുന്ന സേവനം വെള്ളിയാഴ്ച മുതല്‍ കൊച്ചിയില്‍ തുടങ്ങുന്നു. ഊബറിന്റെ ‘ഊബര്‍ ഈറ്റ്‌സ്’ വെള്ളിയാഴ്ച 12 മുതല്‍ കലൂര്‍, പനമ്പിള്ളി നഗര്‍, മറൈന്‍ ഡ്രൈവ്, എളംകുളം ഭാഗങ്ങളില്‍ ലഭ്യമാകും.

ഒരു കപ്പ് ചായയായാലും കുടുംബത്തിനു മൊത്തത്തിലുള്ള ഭക്ഷണമായാലും ഒരു രൂപ മാത്രം ഫീസ് ഈടാക്കിക്കൊണ്ടാണ് ഊബര്‍ ഈറ്റ്സ് എത്തിക്കുകയെന്ന് ഊബര്‍ ഈറ്റ്സ് ഇന്ത്യ മേധാവി ഭാവിക് റാത്തോഡ് പറഞ്ഞു. ഇരുചക്ര വാഹനങ്ങളില്‍, ഭക്ഷണത്തിന്റെ ചൂട് നഷ്ടമാകാത്ത ബാഗുകളിലാണു ഡെലിവറി. ശരാശരി അരമണിക്കൂറിനുള്ളില്‍ ഭക്ഷണം ലഭ്യമാകും.

ഊബര്‍ ഈറ്റ്‌സ് (uber eats) ആപ് ഡൗണ്‍ലോഡ് ചെയ്താണ് സേവനം ലഭ്യമാക്കേണ്ടത്. റസ്റ്റോറന്റുകളുടെ പട്ടികയില്‍നിന്ന് ഇഷ്ടവിഭവങ്ങള്‍ കണ്ടെത്തി ഓര്‍ഡര്‍ ചെയ്യാം. ഊബര്‍ ടാക്‌സി ആപ്പിലെപ്പോലെ പേയ്ടിഎം വഴിയോ ഭക്ഷണമെത്തുമ്പോള്‍ പണമായോ വില നല്‍കാം. ഓര്‍ഡറിന്റെ പുരോഗതി തല്‍സമയം പരിശോധിക്കുകയും ചെയ്യാം. യുഎസില്‍ 2014ല്‍ ആണ് ആരംഭിച്ച ഊബര്‍ ഈറ്റ്സ് ഇപ്പോള്‍ 29 രാജ്യങ്ങളിലായി 130 നഗരങ്ങളിലുണ്ട്. ഇന്ത്യയിലെ ഒന്‍പതാമത്തെ നഗരമാണു കൊച്ചി.

400 കോടിയുടെ നിക്ഷേപത്തിനൊരുങ്ങി ഫുഡ് പാണ്ട
Posted by
13 February

400 കോടിയുടെ നിക്ഷേപത്തിനൊരുങ്ങി ഫുഡ് പാണ്ട

ന്യൂഡല്‍ഹി: ഓണ്‍ലൈന്‍ ഭക്ഷണവിതരണ പ്ലാറ്റ്‌ഫോമായ ഫുഡ് പാണ്ട കൂടുതല്‍ നിക്ഷേപത്തിനൊരുങ്ങുന്നു. വിതരണശൃംഖല വിപുലീകരിക്കുന്നതിന്റെ ഭാഗമായി 400 കോടി രൂപയുടെ നിക്ഷേപമാണ് നടത്തുന്നത്.

അടുത്ത 12-15 മാസത്തിനുള്ളില്‍ രാജ്യവ്യാപകമായി 25,000 ഡെലിവറി റൈഡര്‍മാരെ നിയമിക്കാനും ഫുഡ് പാണ്ടയ്ക്കു പദ്ധതിയുണ്ട്.

നഗരവത്കരണം, ഇന്റര്‍നെറ്റ് ഉപയോഗത്തിന്റെ വര്‍ധന, വലിയ വരുമാനം തുടങ്ങിയവ ഭക്ഷണം ഓണ്‍ലൈനില്‍ ഓര്‍ഡര്‍ ചെയ്യാന്‍ ജനങ്ങളെ പ്രേരിപ്പിക്കുന്നു.

ഈ സാഹചര്യം മുതലെടുത്ത് ബിസിനസ് വികസിപ്പിക്കാനാണ് ഫുഡ് പാണ്ടയുടെ ശ്രമം.

സെര്‍വര്‍ തകരാറിലായി; ഇ-വേ ബില്‍ സംവിധാനം അനിശ്ചിതത്ത്വത്തില്‍
Posted by
12 February

സെര്‍വര്‍ തകരാറിലായി; ഇ-വേ ബില്‍ സംവിധാനം അനിശ്ചിതത്ത്വത്തില്‍

കൊച്ചി: അന്തര്‍സംസ്ഥാന ചരക്കുനീക്കത്തിന് ഇ-വേ ബില്‍ സംവിധാനം നടപ്പാക്കുന്നത് അനിശ്ചിതത്ത്വത്തില്‍. ഫെബ്രുവരി ഒന്നിന് നിലവില്‍ വന്ന സംവിധാനം ആദ്യദിനം സെര്‍വര്‍ തകരാറിലായതിനെത്തുടര്‍ന്ന് താല്‍ക്കാലികമായി നീട്ടിവെച്ചിരുന്നു.

തകരാര്‍ പരിഹരിക്കാനുള്ള നടപടി എങ്ങുമെത്താത്ത സാഹചര്യത്തില്‍ എന്നുമുതല്‍ നടപ്പാക്കാനാകുമെന്നതില്‍ ചരക്ക് സേവന നികുതി (ജി.എസ്.ടി) വകുപ്പ് അധികൃതര്‍ക്ക് വ്യക്തതയില്ല.

അരലക്ഷത്തില്‍ കൂടുതല്‍ മൂല്യമുള്ള അന്തര്‍സംസ്ഥാന ചരക്കുനീക്കത്തിനാണ് ഇ–വേ ബില്‍ നിര്‍ബന്ധമാക്കിയത്. ചരക്ക് കയറ്റിയയക്കുന്ന അല്ലെങ്കില്‍ സ്വീകരിക്കുന്ന വ്യാപാരിയോ കടത്തുന്നയാളോ ആണ് ഇ-വേ ബില്‍ തയാറാക്കേണ്ടത്.

ചരക്കിന്റെ വിവരങ്ങള്‍ മുന്‍കൂട്ടി ജി.എസ്.ടി.എന്‍ എന്ന കേന്ദ്രീകൃത ശൃംഖലയിലേക്ക് നല്‍കിയശേഷം ബില്ലിന്റെ പകര്‍പ്പ് വാഹനത്തില്‍ സൂക്ഷിക്കുകയാണ് വേണ്ടത്. ജി.എസ്.ടി സ്‌ക്വാഡ് ബില്‍ ഓണ്‍ലൈനായി പരിശോധിച്ച് നികുതി വെട്ടിപ്പ് കണ്ടെത്തണം.

രാജ്യത്ത് 1.29 കോടി വ്യാപാരികള്‍ ജി.എസ്.ടി രജിസ്‌ട്രേഷന്‍ എടുത്തിട്ടുണ്ടെന്നാണ് ഏകദേശ കണക്ക്. കേരളത്തില്‍ 27 ലക്ഷവും. ഇവര്‍ ഒരേസമയം ജി.എസ്.ടി.എന്നില്‍ വിവരങ്ങള്‍ ചേര്‍ക്കാന്‍ ശ്രമിച്ചതാണ് തകരാറിനിടയാക്കിയത്.

ഇ-വേ ബില്‍ സംവിധാനം താല്‍ക്കാലികമായി പിന്‍വലിക്കുകയും ജി.എസ്.ടി സ്‌ക്വാഡുകളുടെ പരിശോധന നാമമാത്രമാകുകയും ചെയ്തതോടെ നികുതിവെട്ടിപ്പ് കൂടിയതായി തിരുവനന്തപുരം ജി.എസ്.ടി കമീഷണറേറ്റിലെ ഉന്നത ഉദ്യോഗസ്ഥര്‍തന്നെ സമ്മതിക്കുന്നു.

ജി.എസ്.ടി വന്നതോടെ ഇതരസംസ്ഥാനങ്ങളില്‍ എന്‍ഫോഴ്‌സ്മന്റെ് സ്‌ക്വാഡുകളുടെ എണ്ണം ഇരട്ടിയാക്കിയിരുന്നു. എന്നാല്‍, കേരളത്തില്‍ എട്ട് സ്‌ക്വാഡ് മാത്രമാണ് പുതുതായി ഉണ്ടായത്.

ആകെ 96 സ്‌ക്വാഡ്. ചെക്‌പോസ്റ്റുകളില്‍ ജോലി ചെയ്തിരുന്നവരെ സ്‌ക്വാഡുകള്‍ക്ക് പകരം ഓഫിസുകളിലാണ് പുനര്‍വിന്യസിച്ചത്. മതിയായ സ്‌ക്വാഡ് ഇല്ലാത്തതിനാല്‍ പരിശോധന നാമമാത്രമായി. ഇത് നികുതി വെട്ടിപ്പുകാര്‍ക്ക് സഹായകമായി.

നിലവിലെ സ്‌ക്വാഡുകള്‍ കഴിഞ്ഞമാസം 10 ദിവസം മാത്രം പരിശോധന ഊര്‍ജിതമാക്കിയപ്പോള്‍ 2.5 കോടിയുടെ നികുതി വെട്ടിപ്പ് കണ്ടെത്താനായി.

കൂടുതല്‍ സ്‌ക്വാഡിനെ നിയോഗിച്ചാല്‍ ഈ ഇനത്തില്‍ വരുമാനം കൂട്ടാനാകും. എന്നാല്‍, നിലവിലെ സംവിധാനങ്ങളുമായി മുന്നോട്ടുപോകാനും ചെറിയതോതിലുള്ള നികുതി വെട്ടിപ്പുകള്‍ ഗൗരവമായി കാണേണ്ടെന്നുമാണ് താഴേക്കിടയിലെ ഉദ്യോഗസ്ഥര്‍ക്കുള്ള നിര്‍ദേശം.

കേരളത്തിന്റെ തനത് ഉല്‍പ്പന്നങ്ങളും കൈത്തറി വസ്ത്രങ്ങളും വാങ്ങാന്‍ ആഗ്രഹിക്കുന്നവര്‍ക്ക്  ഇ കൊമേഴ്സ് കാര്‍ട്ട് ‘ഗ്രാമീണ്‍ ഓണ്‍ലൈന്‍’
Posted by
11 February

കേരളത്തിന്റെ തനത് ഉല്‍പ്പന്നങ്ങളും കൈത്തറി വസ്ത്രങ്ങളും വാങ്ങാന്‍ ആഗ്രഹിക്കുന്നവര്‍ക്ക് ഇ കൊമേഴ്സ് കാര്‍ട്ട് 'ഗ്രാമീണ്‍ ഓണ്‍ലൈന്‍'

കൊച്ചി: കേരളത്തിന്റെ തനത് ഉല്‍പ്പന്നങ്ങളും കൈത്തറി വസ്ത്രങ്ങളും വാങ്ങാന്‍ ആഗ്രഹിക്കുന്നവര്‍ക്ക് ഇനി ഒരു ഒറ്റ ക്ലിക്ക് മതി സാധനം ഓണ്‍ലൈനായി നിങ്ങളുടെ വീട്ടില്‍ എത്തും. കേന്ദ്ര സര്‍ക്കാരിന്റെ അംഗീകാരത്തോടെ പ്രവര്‍ത്തിക്കുന്ന ഓണ്‍ലൈന്‍ വ്യാപാര സൈറ്റായ ഗ്രാമീണ്‍ ഓണ്‍ലൈന്‍ ഇപ്പോള്‍ നിങ്ങളുടെ വിരല്‍ തുമ്പില്‍.http://www.graameen.in/

കേരളത്തിന്റെ കൈത്തറി വസ്ത്ര മേഖലയെ പ്രോത്സാഹിപ്പിക്കുന്നതിനും ഗ്രാമീണരുടെ കരകൗശല വിദ്യയെ അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിനുമായി ആരംഭിച്ച ‘ഗ്രാമീണ്‍ ഓണ്‍ലൈന്‍’ വളരെ തുച്ഛമായ വിലയ്ക്ക് മനസിനിണങ്ങിയ ഉല്‍പ്പന്നങ്ങള്‍ നിങ്ങളിലെത്തിക്കും.

കൈത്തറി വസ്ത്രങ്ങളില്‍ തുടങ്ങി, ഗ്രാമീണര്‍ കൈകളാല്‍ നിര്‍മ്മിച്ച ആഭരണങ്ങള്‍, മര കളിപ്പാട്ടങ്ങള്‍, പ്രതിമകള്‍, ദേവ വിഗ്രഹങ്ങള്‍, ചെരുപ്പുകള്‍, ബാഗുകള്‍, അറന്മുള കണ്ണാടികള്‍, വിളക്കുകള്‍ തുടങ്ങി നിരവധി ഉല്‍പ്പന്നങ്ങളുടെ എറ്റവും മികച്ച ശേഖരം തന്നെയാണ് ഗ്രാമീണ്‍ ഉപഭോക്താക്കള്‍ക്കായി ഒരുക്കിയിരിക്കുന്നത്. മികച്ച ഗുണമേന്മയുള്ള വസ്തുക്കള്‍ ഏറ്റവും വേഗത്തില്‍ കുറഞ്ഞ നിരക്കില്‍ ഗ്രാമീണ്‍ ഓണ്‍ലൈന്‍ നിങ്ങള്‍ക്ക് ലഭ്യമാക്കുന്നു.

സ്വദേശ നിര്‍മ്മിത വസ്തുക്കളുടെ ഉപയോഗം പ്രോത്സാഹിപ്പിക്കുന്ന ‘ഗ്രാമീണ്‍’ ഇന്ത്യന്‍ ഗ്രാമീണരുടെ കരകൗശല വിദ്യകളെ ലോകത്തിന് മുന്നില്‍ ഉയര്‍ത്തി കാട്ടുകയാണ്. ഫെബ്രുവരി 14 വാലന്റൈന്‍സ് ദിനത്തോടനുബന്ധിച്ച് ‘ഗ്രാമീണ്‍’ 20 ശതമാനം ഡിസ്‌കൗണ്ട് നല്‍കുന്നുണ്ട്. സാരികള്‍ക്കും ത്രെഡ് സില്‍ക്ക് ആഭരണങ്ങള്‍ക്കുമാണ് ഫെബ്രുവരി 7 മുതല്‍ 13 വരെ ഓഫര്‍ ലഭ്യമാകുന്നത്.


http://www.graameen.in/

error: This Content is already Published.!!