ഒറ്റവാക്കില്‍ പറഞ്ഞാല്‍ അഡാറ് പീസായ ഒരു കട്ടലോക്കല്‍ പടം : തീയ്യേറ്റര്‍ ഇളക്കി മറിച്ച് അങ്കമാലി ഡയറീസ് മുന്നേറുന്നു

 ഒറ്റവാക്കില്‍ പറഞ്ഞാല്‍ അഡാറ് പീസായ ഒരു കട്ടലോക്കല്‍ പടം : തീയ്യേറ്റര്‍ ഇളക്കി മറിച്ച് അങ്കമാലി ഡയറീസ് മുന്നേറുന്നു
Posted by
Story Dated : March 4, 2017

പോപ്പുലര്‍ സിനിമയുടെ നടപ്പു രീതികളെ പൊളിച്ചെഴുതുക എന്നത് മലയാള സിനിമാ ഇന്‍ഡസ്ട്രിയില്‍ അത്ര എളുപ്പമുള്ള കാര്യമല്ല. അത് വളരെ ധൈര്യത്തോടെ ചെയ്യുന്ന പതിവ് രീതി ലിജോ ജോസ് അങ്കമാലി ഡയറീസിലും ആവര്‍ത്തിച്ചിട്ടുണ്ട്. അവിടെ പുതുമുഖ നായകനോ നായികയോ ഇല്ല, ഒരു കൂട്ടം പുതുമുഖങ്ങള്‍ മാത്രം. ഒരു കട്ട ലോക്കല്‍ പടം എന്നാണ് അങ്കമാലി ഡയറീസിന്റെ സബ് ടൈറ്റില്‍. അതിവിടെ എങ്ങനെ വിലപ്പോവും എന്നത് അറിയില്ലെങ്കിലും, ‘ഞങ്ങള്‍ പരിചയപ്പെടുത്തുന്ന 86 പുതുമുഖങ്ങള്‍’ എന്ന ധൈര്യം തന്നെയാണ് സിനിമയുടെ ഒരു യുഎസ്പി.

ഒരു ദേശത്തെ തന്നെയാണ് സിനിമ ആദ്യം മുതല്‍ കൃത്യമായി അടയാളപ്പെടുത്തുന്നത്. ഒരു ജനപ്രിയ സമകാലിക മാസ്സ് കൊട്ടേഷന്‍ മലയാള സിനിമയുടെ ആരാധകര്‍ക്ക് ആസ്വദിക്കാന്‍ ഒന്നും തരാന്‍ ഇടയില്ല അങ്കമാലി ഡയറീസ്. താരാരാധകരെയും നിരാശപ്പെടുത്തും. ഹീറോയിസം ഒന്നും തന്നെ ഇല്ല. മൊബൈല്‍ വെളിച്ചത്തില്‍ മുഴുകിയ അലസ കാഴ്ചയിലും അങ്കമാലി ഡയറീസ് പ്രേക്ഷകര്‍ക്കായി ഒന്നും ഒരുക്കി വച്ചിട്ടില്ല. പക്ഷേ, പരീക്ഷണങ്ങള്‍ കൂടിയാണ് സിനിമ എന്ന് സഹിഷ്ണുതയോടെ ഉള്‍ക്കൊള്ളുന്നവരെ നിരാശപ്പെടുത്താത്ത ഒരു സിനിമയാണിത്.ചെമ്പന്‍ വിനോദിന്റെ തിരക്കഥയില്‍ ഡബിള്‍ ബാരലിന് ശേഷം പുറത്തിറങ്ങുന്ന ലിജോ ജോസ് സിനിമയാണ് അങ്കമാലി ഡയറീസ്. ഒരു പരീക്ഷണ ചിത്രം എന്നു തന്നെ തോന്നും വിധത്തിലുള്ള ട്രെയിലറും പാട്ടുകളും പ്രേക്ഷകര്‍ തുടക്കം മുതല്‍തന്നെ ശ്രദ്ധിച്ചിരുന്നു.

ഒരു സിനിമയോടു കാണിക്കുന്ന അതിസൂഷ്മതയും ശ്രദ്ധയും അപൂര്‍വ്വമായ കാഴ്ചയാണിവിടെ, മേക്കപ്പ് അണിഞ്ഞ നായികയോ വില്ലനെ കുത്തി വീഴ്ത്തുന്ന നായകനെയോ പ്രത്യക്ഷപ്പെടുത്താതെ വളരെ ധൈര്യസമേതം കാണികള്‍ക്കിടയിലേക്ക് ചിത്രത്തെ സംവിധായകന്‍ എത്തിച്ചു. വളരെ സൂക്ഷ്മതയോടെ അലസം എന്ന് നാം കരുതുന്ന വിദൂരമായ കാഴ്ചകള്‍പോലും സംവിധായകന്‍ ഒരോ ഫ്രയിമിലും അടയാളപ്പെട്ടിട്ടുണ്ട്.
ഒരുപാട് പരീക്ഷണങ്ങള്‍ ഉള്‍പ്പെടുത്തി പ്രേക്ഷകരെ നിരാശപ്പെടുത്താത്ത ഒരു സിനിമയാണിതെന്ന് അങ്കമാലി ഡയറീസ് തെളിയിച്ചു തരുന്നു.

Comments