അങ്കമാലി ഡയറീസിന് ഒരു അങ്കമാലിക്കാരന്റെ റിവ്യൂ

അങ്കമാലി ഡയറീസിന് ഒരു അങ്കമാലിക്കാരന്റെ റിവ്യൂ
Posted by
Story Dated : March 12, 2017

മലയാളത്തിലെ ഏറ്റവു പുതിയ സൂപ്പര്‍ഹിറ്റായ അങ്കമാലി ഡയറീസ് എല്ലാത്തരം പ്രേക്ഷകരേയും ആകര്‍ഷിച്ച് മുന്നേറുകയാണ്. 80 ല്‍ അധികം പുതുമുഖങ്ങളെ അണിനിരത്തി ലിജോ ജോസ് പെല്ലിശ്ശേരി സംവിധാനം ചെയ്ത ചിത്രം അങ്കമാലിയുടെ പശ്ചാത്തലത്തിലാണ് ഒരുക്കിയിരിക്കുന്ന്. മലയാളത്തിന്റെ താരരാജാവ് മോഹന്‍ലാല്‍ വരെ അഭിനന്ദിച്ച ഈ ചിത്രത്തിന് സോഷ്യല്‍ മീഡിയയിലും മികച്ച റിവ്യൂസ് ആണ് ലഭിക്കുന്നത്. ഇപ്പോഴിതാ മുന്‍ എസ്ഫ്‌ഐ നേതാവും അങ്കമാലി സ്വദേശിയുമായ രതീഷ് കുമാര്‍ മാണിക്യമംഗലം എഴുതി ഫേസ്ബുക്കില്‍ പോസ്റ്റ് ചെയ്ത റിവ്യൂ ശ്രദ്ദയമായമാവുകയാണ് .

രതീഷ് കുമാര്‍ മാണിക്യമംഗലത്തിന്റെ ഫേസ്ബുക്ക് പോസ്റ്റ്:

അങ്കമാലി ഡയറീസ് കണ്ടു..

ഈ സിനിമയില്‍ അങ്കമാലിയുടെ മണവും നിറവുമുണ്ട്. മാര്‍ക്കറ്റും, പോര്‍ക്കും, പാരീസ് ഹോട്ടലും, പള്ളിയും, പെരുന്നാളും, ചേറ്റുങ്ങല്‍ ബാറും, പ്രദക്ഷിണവും എല്ലാം ചേര്‍ന്ന് അങ്കമാലിയെ അനുഭവിപ്പിക്കാന്‍ സിനിമയ്ക്ക് കഴിഞ്ഞു. കുറച്ചു വര്‍ഷങ്ങള്‍ക്കു മുമ്പുവരെ അങ്കമാലിയില്‍ കുപ്രസിദ്ധമായിരുന്ന ഗുണ്ടാസംഘങ്ങളും, നിമിഷ നേരം കൊണ്ട് പ്രകോപിതമാകുന്ന ശരാശരി അങ്കമാലിക്കാരന്റെ മനസും, അരക്ഷിതത്വത്തിലേയ്ക്ക് വലിച്ചെറിയപ്പെടുന്ന യൗവ്വനങ്ങളും ഈ സിനിമയ്ക്ക് പശ്ചാത്തലമാവുന്നുണ്ട്. ആകാരം കൊണ്ട് ചെറുതെങ്കിലും സ്‌ക്രീനില്‍ അപാരമായ സാന്നിദ്ധ്യം കൊണ്ട് നിറയുന്ന അപ്പാനി രവിയും, പൊട്ടിത്തെറിച്ച യൗവ്വനം കണ്ണില്‍ നിറച്ച വിന്‍സന്റ് പെപ്പെയും, ഓരോ ചെറുചലനങ്ങളിലും പ്രണയം തൂവുന്ന ലിച്ചിയുമടക്കം മലയാള സിനിമയില്‍ കണ്ടു പരിചയമില്ലാത്ത എത്ര കഥാപാത്രങ്ങള്‍!! പലരെയും പക്ഷെ അങ്കമാലിക്കാര്‍ക്ക് കണ്ടോ കേട്ടോ പരിചിതമായി അനുഭവപ്പെടുകയും ചെയ്യും.

സിനിമ ‘കഥ പറച്ചിലാണ്’ എന്ന് ഒരു കഥയുമില്ലാതെ ധരിച്ചു പോയ മലയാളത്തില്‍ ഇത്തരം സംരംഭങ്ങളാണ് അപൂര്‍വ്വമായെങ്കിലും സിനിമാറ്റിക് അനുഭവങ്ങള്‍ സമ്മാനിക്കുന്നത്. അങ്കമാലിയില്‍ കറങ്ങി നടന്ന കഥാപാത്രങ്ങള്‍ക്കു പുറകേ ഓടുകയായിരുന്നു എന്ന മട്ടില്‍ ക്യാമറ കൈകാര്യം ചെയ്ത ഗിരീഷ് ഗംഗാധരനും, സിനിമയ്ക്ക് ബാധ്യതയാവാത്ത വണ്ണം സംഭാഷണങ്ങള്‍ പോലെ ഗാനങ്ങള്‍ കോര്‍ത്തു വെച്ച പ്രശാന്ത് പിള്ളയുമടക്കമുള്ള സാങ്കേതിക വിദഗ്ധര്‍ തരുന്ന പ്രതീക്ഷകള്‍ വാനോളമാണ്. എന്നാല്‍ സാങ്കേതികതകള്‍ കൊണ്ട് സങ്കീര്‍ണ്ണമാക്കാതെ അനുഭവങ്ങളുടെ മൂര്‍ച്ചത്തിളക്കമുള്ള സിനിമ. അങ്കമാലിയിലെ എല്ലാ ചെറുപ്പക്കാരുടെയും ചേട്ടനായ സജി വര്‍ഗ്ഗീസേട്ടന്റെ സഹോദരനായ സിനോജ് വര്‍ഗീസേട്ടന്റെ (കുഞ്ഞൂട്ടി) സാന്നിദ്ധ്യവും സിനിമയെ വ്യക്തിപരമായി പ്രിയപ്പെട്ടതാക്കുന്നുണ്ട്. ആദ്യ സിനിമയെന്ന് തോന്നിക്കാത്തവണ്ണം അറിഞ്ഞഭിനയിച്ച 86 പുത്തന്‍ വാഗ്ദാനങ്ങള്‍ക്കും, അങ്കമാലിയുടെ ഒരു മുഖം നാടകീയതയില്ലാതെ എഴുതി ഫലിപ്പിച്ച ചെമ്പന്‍ വിനോദ് ജോസിനും, ആമേന്‍ എന്ന സിനിമയ്ക്കു ശേഷം സിനിമാവതരണത്തില്‍ പുതിയ വഴിയിലൂടെ ഏറെ മുന്നേറിയ ലിജോ ജോസ് പെല്ലിശ്ശേരിയ്ക്കും അഭിനന്ദനങ്ങള്‍.. അവസാനമായി, വിന്‍സെന്റ് പെപ്പെ ആ അങ്കമാലി മലയാളം പറയുന്നത് കേള്‍ക്കുമ്പോ വല്ലാത്ത ഒരു സുഖമുണ്ട്..

Comments

error: This Content is already Published.!!