ബോളിങിലെ യുവരാജ് ആയി അലെഡ് കാരി; ഒരു ഓവറിലെ ആറു പന്തിലും വിക്കറ്റ്

ബോളിങിലെ യുവരാജ് ആയി അലെഡ് കാരി; ഒരു ഓവറിലെ ആറു പന്തിലും വിക്കറ്റ്
Posted by
Story Dated : January 28, 2017

സിഡ്നി: ആറു പന്തില്‍ ആറും സിക്‌സ് പറത്തി റെക്കോര്‍ഡ് തീര്‍ത്ത ബാറ്റ്‌സ്മാന്മാരായ യുവരാജ് സിംഗ്, ഹര്‍ഷല്‍ ഗിബ്ബ്സ്, രവി ശാസ്ത്രി, അലെക്സ് ഹെയ്ല്‍സ് എന്നിവര്‍ക്ക് പിന്‍ഗാമിയായി ഒരു ഓസ്‌ട്രേലിയന്‍ കളിക്കാരന്‍ എത്തിയിരിക്കുകയാണ്.എന്നാല്‍ ബാറ്റുകൊണ്ടല്ല പന്തുകൊണ്ട് മാജിക് തീര്‍ത്തിരിക്കുന്ന താരമാണ് ഓസ്‌ട്രേലിയന്‍ ബോളര്‍ അലെഡ് കാരി. ഒരിക്കലും സാധ്യമല്ലെന്ന് കരുതിയ ഒരോവറിലെ ആറു പന്തിലും വിക്കറ്റ് നേടി ലോകത്തെ അമ്പരിപ്പിച്ചിരിക്കുകയാണ് ഈ താരം.

ഗോള്‍ഡന്‍ പോയിന്റ് ക്രിക്കറ്റ് ക്ലബ്ബിലെ താരമാണ് അലെഡ് കാരി. അത്യപൂര്‍വ്വ പ്രകടനത്തിലൂടെ ചരിത്ര നേട്ടമാണ് താരം സ്വന്തം പേരില്‍ എഴുതി ചേര്‍ത്തിരിക്കുന്നത്. വിക്ടോറിയയില്‍ ഈസ്റ്റ് ബല്ലാറട്ടിനെതിരെ നടന്ന മത്സരത്തിലാണ് അലെഡ് ബാറ്റ്‌സ്മാന്മാര്‍ക്ക് പേടി സ്വപ്‌നമായത്. ആദ്യമെറിഞ്ഞ എട്ട് ഓവറുകളിലും വിക്കറ്റൊന്നും നേടാന്‍ കഴിയാത്തതിന്റെ ക്ഷീണം ഒമ്പതാം ഓവറില്‍ ആറ് വിക്കറ്റെടുത്താണ് താരം തീര്‍ത്തത്. അലെഡിന്റെ ഓവര്‍ തീര്‍ന്നതോടെ 40 റണ്‍സിന് എതിരാളികള്‍ ഓള്‍ ഔട്ടാവുകയും ചെയ്തു.

ആദ്യത്തെ രണ്ട് വിക്കറ്റുകളും സ്ലിപ്പിലെ ക്യാച്ചുകളായിരുന്നുവെങ്കില്‍ മൂന്നാമത്തേത് എല്‍ബിഡബ്ല്യൂ ആയിരുന്നു. അവസാനത്തെ മൂന്ന് വിക്കറ്റുകള്‍ ആകട്ടെ സ്വപ്ന തുല്യമായ ക്ലീന്‍ബൗള്‍ഡുകളും. അലെഡിന്റെ പ്രകടനം ക്രിക്കറ്റ് ലോകത്തെയാകമാനം അമ്പരപ്പിച്ചിരിക്കുകയാണ്. ക്രിക്കറ്റ് ചരിത്രത്തില്‍ ഇതാദ്യമായാണ് ആറ് പന്തില്‍ ആറ് വിക്കറ്റ് വീഴുന്നത്.

Comments